2 Fiawo
20 Le ŋkeke mawo me la, Hizkiya dze dɔ de kuku ge kloe.+ Eye nyagblɔɖila Yesaya, Amoz vi, va egbɔ gblɔ nɛ be, “Ale Yehowa gblɔe nye esi: ‘Wɔ ɖoɖo na wò aƒemetɔwo, elabena èle kuku ge; màhaya o.’”+ 2 Enumake Hizkiya trɔ mo ɖe gli ŋu hedo gbe ɖa na Yehowa be: 3 “Oo Yehowa, meɖe kuku, ɖo ŋku ale si mezɔ le ŋkuwòme le nyateƒe kple dzi blibo me, eye mewɔ nu si nyo le ŋkuwòme la dzi.”+ Eye Hizkiya fa avi hehehe.
4 Yesaya mekpɔ ɖo xɔxɔnu titinatɔ hafi Yehowa ƒe gbe va nɛ be:+ 5 “Trɔ yi nàɖagblɔ na nye dukɔa kplɔla Hizkiya be, ‘Ale Yehowa, tɔgbuiwò David ƒe Mawu la, gblɔe nye esi: “Mese wò gbedodoɖa la. Mekpɔ wò aɖatsiwo.+ Kpɔ ɖa, mayɔ dɔ wò.+ Le ŋkeke etɔ̃a gbe la, àyi Yehowa ƒe me.+ 6 Matsɔ ƒe wuiatɔ̃ akpe wò agbenɔƒewo,* eye maɖe wò kple du sia tso Asiria-fia+ si me, eye maʋli du sia ta le nye ŋutɔ kple nye subɔla David ta.”’”+
7 Eye Yesaya gblɔ be: “Mitsɔ gbotsetse ƒuƒu kɔ vɛ.” Eya ta wotsɔe va ɖo ƒoƒoe la dzi, eye wòhaya.+
8 Do ŋgɔ la, Hizkiya bia Yesaya be: “Nu kae nye dzesi+ be Yehowa ayɔ dɔm, eye be mayi Yehowa ƒe me le ŋkeke etɔ̃a gbe?” 9 Yesaya ɖo eŋu be: “Esiae nye dzesi na wò tso Yehowa gbɔ be Yehowa awɔ nya si wògblɔ la dzi: Èdi be vɔvɔli la neyi ŋgɔ afɔ ewo le atrakpuiawo* dzi loo alo negbugbɔ ɖe megbe afɔ ewoa?”+ 10 Hizkiya gblɔ be: “Ele bɔbɔe be vɔvɔli la nayi ŋgɔ afɔ ewo, ke mele bɔbɔe be wòagbugbɔ ɖe megbe afɔ ewo o.” 11 Eya ta nyagblɔɖila Yesaya do ɣli na Yehowa; eye wòna vɔvɔli la gbugbɔ yi megbe le kpuiawo dzi, le Ahaz ƒe atrakpuiawo dzi, egbugbɔ yi megbe afɔ ewo.+
12 Ɣemaɣi la, Babilon-fia Berodak-Baladan, Baladan vi, ɖo agbalẽwo kple nunana ɖe Hizkiya, elabena ese be Hizkiya dze dɔ.+ 13 Eye Hizkiya xɔ wo nyuie,* eye wòtsɔ nu siwo katã le eƒe kesinɔnudzraɖoƒe+ siwo nye klosalo, sika, balsam-mi, kple ami xɔasi bubuwo, nu siwo le eƒe aʋawɔnuwo dzraɖoƒe kple nu sia nu si le eƒe kesinɔnudzraɖoƒe fia wo. Naneke meli si Hizkiya metsɔ fia wo le eya ŋutɔ ƒe aƒe* la kple eƒe dziɖuƒe blibo la katã me o.
14 Emegbe nyagblɔɖila Yesaya va Fia Hizkiya gbɔ va biae be: “Nya kae ame siawo gblɔ, eye afi kae wotso?” Hizkiya ɖo eŋu be: “Anyigba didi aɖe dzie wotso va, tso keke Babilon ke.”+ 15 Eye wòbiae be: “Nu kae wokpɔ le aƒewò me?”* Hizkiya ɖo eŋu be: “Wokpɔ nu sia nu si le aƒenye* me. Naneke mele nye kesinɔnudzraɖoƒe si nyemetsɔ fia wo o.”
16 Yesaya gblɔ na Hizkiya be: “Se Yehowa ƒe nya,+ 17 ‘Kpɔ ɖa! Ŋkekewo li gbɔna, esime woalɔ nu siwo katã le wò aƒe* me kple nu siwo katã tɔgbuiwòwo dzra ɖo va se ɖe egbe sia la adzoe ayi Babilon.+ Womagblẽ naneke ɖi o,’ Yehowa ye gblɔe. 18 ‘Woakplɔ wò ŋutɔ viwòŋutsu siwo nàdzi la dometɔ aɖewo adzoe,+ eye woazu fiaŋumewo le Babilon-fia ƒe fiasã me.”’”+
19 Eye Hizkiya ɖo eŋu na Yesaya be: “Yehowa ƒe nya si nègblɔ la nyo.”+ Eye wògagblɔ be: “Ne ŋutifafa anɔ anyi eye nuwo ali ke* le nye agbenɔɣi* ko la, ke enyo.”+
20 Hizkiya ŋutinya susɔeawo, eƒe kalẽwɔwɔwo katã kple ale si wòɖe ta+ kple tɔʋu eye wòhe tsi va dua mee la,+ woŋlɔ wo ɖe Yuda-fiawo ƒe ŋutinyagbalẽ me. 21 Eye wotsɔ Hizkiya mlɔ tɔgbuiawo gbɔ,+ eye via Manase+ zu fia ɖe eteƒe.+