2 Mose

40 Yehowa gblɔ na Mose be: 2 “Le ɣleti gbãtɔ ƒe ŋkeke gbãtɔ dzi la, nàtu avɔgbadɔ si nye takpegbadɔ la.+ 3 Tsɔ Ðaseɖiɖiɖaka la da ɖe eme,+ eye nàtsi xɔmetsovɔ la atsɔ axe Aɖaka la ŋkume.+ 4 Tsɔ kplɔ̃+ la da ɖe eme eye nàɖo edzi nuwo ɖe edzi, eye nàtsɔ akaɖiti+ la ada ɖe eme ahasi eƒe akaɖigbɛawo.+ 5 Eyome nàtsɔ dzudzɔdomlekpui+ si wotsɔ sika wɔ la ada ɖe Ðaseɖiɖiɖaka la ŋgɔ, eye nàtsi avɔgbadɔ la ƒe mɔnuvɔ la.+

6 “Tsɔ numevɔsamlekpui+ la da ɖe avɔgbadɔ si nye takpegbadɔ la ƒe mɔnu ŋgɔdze, 7 eye nàtsɔ ze la ada ɖe takpegbadɔ la kple vɔsamlekpui la dome, eye nàkɔ tsi ɖe eme.+ 8 Eyome nàtɔ kpɔ ɖe avɔgbadɔ la ŋu godoo atsɔ aɖe xɔxɔnu+ la ɖi, eye nàtsi kpɔnuvɔ+ la. 9 Eye nàtsɔ ami kɔkɔe+ la asi na avɔgbadɔ la kple eme nuwo katã+ atsɔ akɔ agbadɔ la kple eŋu nuwo katã ŋu, ne wòazu nu kɔkɔe. 10 Nàsi ami na numevɔsamlekpui la kple eŋu nuwo katã atsɔ akɔ vɔsamlekpui la ŋu, ne wòazu vɔsamlekpui kɔkɔetɔ.+ 11 Nàsi ami na ze la kple eƒe zɔ la atsɔ akɔ eŋu.

12 “Azɔ nàkplɔ Aron kple viaŋutsuwo ate ɖe takpegbadɔ la nu, eye nàle tsi na wo.+ 13 Do awu kɔkɔeawo+ na Aron, eye nàsi ami nɛ+ ahakɔ eŋu, ne wòazu nunɔla asubɔm. 14 Emegbe na viaŋutsuwo nate va, eye nàdo awu ʋlayaawo na wo.+ 15 Si ami na wo abe ale si tututu nèsi ami na wo fofo+ ene, be woazu nunɔlawo asubɔm; ami sia sisi na wo ana nunɔlanyenye la nazu wo tɔ le woƒe dzidzimewo katã me.”+

16 Mose wɔ se siwo katã Yehowa de nɛ la dzi.+ Ewɔe nenema pɛpɛpɛ.

17 Le ƒe evelia ƒe ɣleti gbãtɔ ƒe ŋkeke gbãtɔ dzi la, wotu avɔgbadɔ la.+ 18 Esi Mose de asi avɔgbadɔ la tutu me la, etsɔ eƒe anyinɔwo+ ɖo anyi, etsɔ eƒe ʋuƒoawo+ de wo me, eye wòtsɔ xɔblatiawo+ de wo ŋu hetu eƒe sɔtiawo. 19 Ekeke agbadɔvɔ la ɖe avɔgbadɔ+ la dzi, eye wògba agbadɔ+ la tame abe ale si tututu Yehowa de se na Mose ene.

20 Etsɔ Ðaseɖinu+ la de Aɖaka+ la me, eye wòtsɔ kpoawo+ de Aɖaka la ŋu hetsɔ nutunu+ la ɖo Aɖaka+ la nu. 21 Ekɔ Aɖaka la va da ɖe avɔgbadɔ la me, eye wòtsi xɔmetsovɔ+ la tsɔ xe Ðaseɖiɖiɖaka+ la ŋkume, abe ale si tututu Yehowa de se na Mose ene.

22 Emegbe eda kplɔ̃+ la ɖe takpegbadɔ la me le avɔgbadɔ la ƒe dziehekpa dzi, le xɔmetsovɔ la ŋgɔ, 23 eye wòɖo aboloawo+ ɖe edzi le Yehowa ŋkume, abe ale si tututu Yehowa de se na Mose ene.

24 Etsɔ akaɖiti+ la da ɖe takpegbadɔ la me le kplɔ̃ la ŋgɔ, le avɔgbadɔ la ƒe anyiehekpa dzi. 25 Eye wòsi akaɖigbɛawo+ le Yehowa ŋkume, abe ale si tututu Yehowa de se na Mose ene.

26 Eyome etsɔ sikavɔsamlekpui+ la da ɖe takpegbadɔ la me le xɔmetsovɔ la ŋgɔ, 27 ne wòatsɔ atike ʋeʋĩ+ ado dzudzɔ ɖe edzi,+ abe ale si tututu Yehowa de se na Mose ene.

28 Eye wòtsi avɔgbadɔ la ƒe mɔnuvɔ+ la.

29 Etsɔ numevɔsamlekpui+ la da ɖe avɔgbadɔ si nye takpegbadɔ la ŋgɔdze, be wòasa numevɔ+ kple nuɖuvɔ le edzi, abe ale si tututu Yehowa de se na Mose ene.

30 Eyome etsɔ ze la da ɖe takpegbadɔ la kple vɔsamlekpui la dome, eye wòkɔ tsi ɖe eme hena ŋuti kɔklɔ.+ 31 Afi mae Mose kple Aron kpakple Aron viŋutsuwo klɔa asi kple afɔ le. 32 Ɣesiaɣi si woayi takpegbadɔa me alo ate ɖe vɔsamlekpuia ŋu la, woklɔa ŋuti,+ abe ale si tututu Yehowa de se na Mose ene.

33 Mlɔeba etɔ kpɔ+ ɖe avɔgbadɔ la kple vɔsamlekpui la ŋu godoo va kpe tsɔ ɖe xɔxɔnu la ɖi, eye wòtsi kpɔnuvɔ+ la.

Ale Mose wu dɔ la nu. 34 Eye alilikpo va tsyɔ takpegbadɔ la dzi, eye Yehowa ƒe ŋutikɔkɔe yɔ avɔgbadɔ la taŋ.+ 35 Mose mete ŋu ge ɖe eme o, elabena alilikpo tsyɔ takpegbadɔ la dzi, eye Yehowa ƒe ŋutikɔkɔe yɔ avɔgbadɔ la taŋ.+

36 Le Israel-viwo ƒe mɔzɔzɔ bliboa katã me la, ne alilikpo la ho le avɔgbadɔa dzi la, woawo hã wohona.+ 37 Gake ne alilikpo la meho o la, ekema woawo hã womehona o, va se ɖe gbe si gbe wòho hafi.+ 38 Elabena Yehowa ƒe alilikpo la nɔa avɔgbadɔ la tame le ŋkeke me, eye wòdzena na Israel ƒe aƒe blibo la katã le zã me abe dzo ene le woƒe mɔzɔzɔa katã me.+