Suku Yeye Aɖe le Afrika

Etso Nyɔ! ƒe nuŋlɔla si tso Nigeria gbɔ

LE ƑE 1990 ƒe July me la, woxlẽ lɛta aɖe na Yehowa Ðasefo 400 siwo nye lɔlɔ̃nu faa dɔwɔla siwo le Gbetakpɔxɔ Habɔbɔa ƒe alɔdzedɔwɔƒe si le Igieduma si le Nigeria eye wowɔa dɔ le afima la, esi na wokpɔ dzidzɔ geɖe. Subɔsubɔdɔwɔlawo ƒe Hehexɔsuku si woɖo anyi le United States le ƒe 1987 la gbɔna Afrika hã, eye woana hehe klass gbãtɔwo le Igieduma!

Le ɣleti siwo kplɔe ɖo me la, Betel-ƒomea dzra ɖo ɖe klass gbãtɔ ƒe hehexɔxɔ ŋu.a Nusrɔ̃viawo kple nufialawo ahiã dzeƒewo. Amedzroxɔ siwo nɔ anyi la mesɔ gbɔ o; xɔdɔme 15 gahiã kpe ɖe wo ŋu. Eyata Ðasefoawo dze egɔme nɔ nudzraɖoxɔwo trɔm be woazu xɔdɔmewo. Kpe zɔzrɔ̃e ɖoɖo ɖe anyigba, aŋɔsisi na gliawo, kple fesrenuvɔwo dede nye dzadzraɖodɔ sia dometɔ aɖewo. Atikpadɔwɔƒea kpa abatiwo, nudzraɖoɖakawo, kple nusrɔ̃kplɔ̃wo hedee xɔawo me. Mlɔeba la, wotsɔ zikpuiwo, kplɔ̃dzikaɖiwo, kple nusi me woadzra agbalẽwo ɖo va xɔawo me. Wode teokrasigbalẽwo agbalẽdzraɖoƒeawo me taŋ.

Tsɔ kpe ɖe eŋu la, wotrɔ Betel-ƒomea ƒe modzakaɖexɔ wòzu nusrɔ̃xɔ kple agbalẽdzraɖoƒee na nusrɔ̃viawo. Wotsɔ xɔ siwo me wokpɔa amesiwo le dɔ lém gbɔ le dometɔ ɖeka wɔ nufialawo ƒe ɔfis hena ɣeyiɣi aɖe, eye wode nusrɔ̃kplɔ̃wo, kplɔ̃wo, kple ɔfis dɔwɔnu bubuwo eme. Le ɣeyiɣi ma ke me la, esi woto nutome gã takpekpewo kple nutome sue takpekpewo dzi na amewo katã nya nu le suku si wogbɔna wɔwɔ ge ŋu ta la, mɔbiagbalẽvi alafa geɖe dze egɔme nɔ vavam tso amesiwo di be yewoade sukua gbɔ.

Nusianu sɔ gbe le ƒe 1992 ƒe February me. Nufiala eve siwo nye Michael Purbrick kple Peter Nicholls tso Britania va be woava fia nu klass gbãtɔ. Ame etɔ̃ siwo nye Isaiah Mnwe, Isaiah Olabode, kple Pius Oparaocha siwo ava nye nufialawo hã va kpe ɖe nusrɔ̃vi 22 ŋu. Amesiawo nye Ðasefo siwo tso Nigeria siwo woana hehee be woanye nufialawo le klass siwo akplɔe ɖo ƒe hehenana me.

Sukua ƒe Taɖodzinu

Le Betel-ƒea me katã la, amewo nɔ mɔ kpɔm na sukua kple dzidzɔ. Nukatãe? Le alesi sukua aɖe vi le nusrɔ̃lawɔwɔdɔa me le Nigeria tae. Yehowa gblɔ ɖi ɣeyiɣi didi aɖe do ŋgɔ be yeana “nunana le amegbetɔwo dome.” (Psalmo 68:18) Ewɔ esia le apostolowo ƒe ɣeyiɣiwo me, abe alesi apostolo Paulo ŋlɔe le Efesotɔwo 4:8-11 ene. Egbea la, Yehowa le nunana siwo nye amegbetɔwo nam mí. Subɔsubɔdɔ ƒe Hehenasukua nye ɖoɖo si me lɔlɔ̃ le be wòadzra amesiawo dometɔ aɖewo ɖo ɖe habɔbɔa ƒe dɔdasi bubuwo xɔxɔ ŋu.

Ðasefo 160,000 siwo le hame 3,000 mee le dukɔa me. Hamemegã ɖeka alo eve kple subɔsubɔdɔwɔla ʋee aɖewo koe le hame siawo dometɔ aɖewo me. Anyigbamamã gã siwo me womeɖe gbeƒã wòɖo afisiafi haɖe o lae le hame aɖewo si. Eyata eva hiã ŋutsu siwo dze siwo maxɔ ŋgɔ le nyanyuigbɔgblɔdɔa ɖeɖeko me o ke boŋ woakplɔ alẽha la hã ahafia nu le hameawo me la geɖe.

Subɔsubɔdɔ ƒe Hehenasukua ƒe taɖodzinue nye be wòana hehe nɔviŋutsuwo be woakpɔ agbanɔamedzi siawo gbɔ. Ne wodo go le sukua la, nusrɔ̃vi siawo dometɔ aɖewo wɔa mɔɖela vevi ƒe dɔ alo mɔzɔzɔdɔa, si nye subɔsubɔdɔa ƒe akpa si hiã ŋutɔ le Nigeria. Ame bubuwo trɔna yia woƒe hamewo me be woana kpekpeɖeŋu kple dzideƒo nɔvi siwo le wo gbɔ. Yayra ka gbegbe ŋutsu bibi siawo nye na hame si me wosubɔna le la!

Hehe Tɔxɛ

Togbɔ be Subɔsubɔdɔ ƒe Hehenasukua nye Gbetakpɔxɔ Habɔbɔa ƒe Gilead Biblia Suku si naa hehe dutanyanyuigblɔlawo hena dutasubɔsubɔdɔ keke ɖe enu hã la, eƒe nusɔsrɔ̃ nye etɔxɛ. Le kwasiɖa enyi ƒe sukua me la, nusrɔ̃viawo srɔ̃a Biblia la wòdea to. Wodea ŋugble le Biblia ƒe nufiafia geɖewo ŋu, tsɔ kpe ɖe alẽkpɔkplɔdɔ ƒe agbanɔamedziwo ŋuti aɖaŋuɖoɖo kple Kristotɔwo ƒe agbenɔnɔ me kuxiwo gbɔ kpɔkpɔ ŋuti mɔfiamewo sɔsrɔ̃ tsitotsito ŋuti. Wosrɔ̃a nu hã le nusi Ŋɔŋlɔawo gblɔ le dɔdzikpɔkpɔ, ʋɔnudrɔ̃nyawo, kple ɖoɖowɔwɔ ƒe nya bubuwo ŋu. Woxɔa hehe tɔxɛ le dutoƒonuƒoƒo me eye nufiala siwo tsɔa ɖe le eme na wo hekpena ɖe wo ŋu be woatsi le gbɔgbɔ me la kpɔa woƒe nuhiahiãwo gbɔ na wo ɖekaɖeka.

Le ye katã me la, nusrɔ̃la ɖesiaɖe xɔa sukuxɔ me dɔdasi 45, eye wòkpɔa viɖe tso gaƒoƒo 256 ƒe sukuxɔ me nufiamewo me. Tsɔ kpe ɖe eŋu la, ezãa gaƒoƒo 140 ɖe dɔdasi siwo wòawɔ le aƒeme ŋu eye wòzãa gaƒoƒo 14 ɖe dodokpɔ wɔwɔ ŋu.

Togbɔ be Biblia ye nye woƒe nusrɔ̃gbalẽ koŋ hã la, wobia tso nusrɔ̃viawo si be woatsɔ woa ŋutɔwo ƒe agbalẽ 16 bubu siwo nye Biblia-srɔ̃gbalẽ siwo Gbetakpɔxɔ Habɔbɔa ta la ɖe asi. Le sukua deɣi la, nusrɔ̃viawo wɔa numekuku detowo le agbalẽ bubu siwo le Betel ƒe agbalẽdzraɖoƒe si me agbalẽ geɖe le la me. Edze ƒã be ehiã be woanye nuxlẽla bibiwo.

Le sukudɔwo wɔwɔ vɔ megbe la, nusrɔ̃viawo wɔa dɔ aɖaƒoƒo 45 gbesiagbe le Betel-dɔwɔƒe enyiawo dometɔ ɖeka me: nukpɔkplɔ, nuɖuƒe, gbeŋɔŋlɔ, aƒemedzadzraɖo, dzodoƒe, nunyãƒe, agbalẽɖoɖaƒe, kple ʋukuku. Wonɔa dɔwɔwɔawo trɔm ale be kaka kwasiɖa enyi ƒe hehexɔxɔa nawu enu la, amesiame wɔa dɔ le dɔwɔƒe siawo katã me. Nusrɔ̃vi aɖe gblɔ be: “Nye dɔwɔwɔ le dɔwɔƒe vovovowo na mekpɔe be Yehowae le dɔa dzi kpɔm.” Ame bubu gblɔ be: “Dɔdzikpɔlawo le klalo be yewoafia nu ame eye woaɖɔ ame ɖo le lɔlɔ̃ me.” Eye ame bubu hã gblɔ be: “Betel-dɔ nye nusi wòle be amesiame nawɔ akpɔ eye wòakpɔe be enyo.”

Aleke nɔviwo wɔ nui le hehe si woxɔ ta? Wo dometɔ ɖeka gblɔ be: “Sukuwo katã ƒe sukue [wònye].” Ame bubu gblɔ kple dzonɔameme be: “Ðoɖo deŋgɔ ka gbegbee nye si!” Klass gbãtɔ ƒe nusrɔ̃la siwo ƒe dziwo yɔ fũ kple dzidzɔ kple ŋudzedzekpɔkpɔ la ŋlɔ le lɛta aɖe me be: “Míaƒe tameɖoɖo kplikpaae nye be . . . míatu míaƒe agbenɔnɔ ƒe akpa sia akpa ɖe nyanyuia ƒe gbedasia dzi.”

Kafukafunya Siwo Wogblɔ tso Gbeadzi

Le ƒe 1992 kple ƒe 1993 ƒe akpa gbãtɔ me la, wona hehe Subɔsubɔdɔ ƒe Hehenasuku ƒe klass ene gbãtɔwo le Nigeria. Klass evelia ƒe nusrɔ̃viwo ŋlɔ woƒe ŋudzedzekpɔkpɔ ɖe lɛta si woŋlɔ na Dziɖuha la me be: “Vavãe, míede suku aɖeke si nyo wu esia kpɔ o. Nusɔsrɔ̃a nyo wu Yunivɛsiti nusɔsrɔ̃ sãa. Ena míelɔ̃ ɖe William Phelps ƒe nyawo dzi be ‘Biblia me sidzedze si ŋu suku kɔkɔ dede mekpe ɖo o nyo sã wu suku kɔkɔ dede si ŋu Biblia me sidzedze mekpe ɖo o.’ Miaƒe ɖe tsɔtsɔ le eme na mí bliboe dze le esiawo katã me. Eyata míeɖoe kplikpaa be míatsɔ ɣeyiɣiawo katã ƒe subɔsubɔdɔ awɔ míaƒe agbemedɔe.”

Aleke woxɔ sukunuwulawo ɖe woƒe dɔdasi yeyewo mee? Dzikpɔla mɔzɔla aɖe ŋlɔ le klass gbãtɔ nuwula eve siwo le subɔsubɔm abe mɔɖela veviwo ene ŋu be: “Dzo le kpekpewo me, wodea dzi ƒo na ame, dzidzɔ le wo me, eye gɔmesese le eŋu fifia. Gbeadzisubɔsubɔdɔwo le dzidzim ɖe edzi . . . Dzidzɔ geɖe ɖo hamea me . . . Esime mebia nya nɔvi aɖewo le mɔɖela vevi eve siawo ŋu la, dzikpɔla zimenɔla ɖo eŋu kple dzidzɔ ƒe aɖatsiwo be: ‘Míeda akpe na Yehowa kple eƒe habɔbɔa le kpekpeɖeŋunala nyuiwo ɖoɖo ɖe míaƒe hamea me ta.’”

Amekawoe Dze be Woaxɔ Hehea?

Subɔsubɔdɔ ƒe Hehenasuku dede le dukɔ ɖesiaɖe me nye subɔsubɔ ƒe mɔnukpɔkpɔ wɔnuku si nye yayra wɔnuku si tso Yehowa gbɔ. Ðikeke mele eŋu o be hehenana sia kpena ɖe nusrɔ̃viwo ŋu be woadzi woƒe gbɔgbɔmemenyenye ɖe edzi eye wòadzra wo ɖo be Yehowa nazã wo geɖe awu.

Gɔmesese le eŋu be nudidiawo kɔkɔ. Hafi amesiwo biana be woade sukua nadze la, ele be woanye hamemegãwo alo subɔsubɔdɔwɔlawo le Kristotɔwo ƒe hamea me ƒe eve ya teti. Wodia amesiwo nye gbesiagbe mɔɖelawo wu. Ele be wo katã nanye tre siwo xɔ tso ƒe 23 vaseɖe 50. Womanye amesiwo woka mo na alo amesiwo woɖe le hamea me le ƒe atɔ̃ siwo va yi me o. Ele be amesiwo di be yewoayi sukua nanya Eŋlisigbe xexlẽ, eŋɔŋlɔ, kple edodo nyuie, eye ele be woanɔ lãmesẽ nyui me, womanye amesiwo hiã beléle tɔxɛ alo nuɖuɖu tɔxɛ o.

Edze ƒã be ele be amesiwo tsɔ wo ɖokui na la nanɔ klalo alɔ̃ faa be yewoasubɔ le afisiafi si woahiã wo le. Menye didi sẽŋu be woawɔ Mawu ƒe lɔlɔ̃nu koe esia bia o, ke ele be Yesaya, amesi tsɔ eɖokui na keŋkeŋ be yeawɔ dɔ tɔxɛ eye wògblɔ be “Nyee nye si, dɔm” la ƒe gbɔgbɔ hã nanɔ wo me.—Yesaya 6:8.

Ðe gbɔgbɔ sia tɔgbe le asiwòa? Ðe nàte ŋu aminyã subɔsubɔ ƒe mɔnukpɔkpɔ siaa? Meve amesiwo wɔ esia la be wowɔ nenema o. Sukunuwula aɖe si nye nutome sue dzikpɔla fifia la ŋlɔ bena: “Le nye gome la, Subɔsubɔdɔ ƒe Hehenasukua nye nunana si ɖeke mesɔ kplii o. Enye ŋgɔyiyi deŋgɔtɔ kekeake si mewɔ le nye gbɔgbɔmegbenɔnɔ me. Ne mɔnukpɔkpɔ su asinye be maganɔ agbe ake la, nyematia agbe bubu aɖeke nɔnɔ wu esia o.”

[Etenuŋɔŋlɔ]

[Nɔnɔmetata siwo le axa 16, 17]

Nufiala siwo nye Isaiah Mnwe kple Pius Oparaocha

Sukuxɔ me nusɔsrɔ̃

Sukuxɔ me ƒuƒoƒo si le nu me dzrom

Numekuku wɔwɔ le agbalẽdzraɖoƒe

[Nɔnɔmetata siwo le axa 18]

Dɔwɔwɔ le Nunyãƒe kple Agbalẽɖoɖaƒe