Menye Futɔ Vɔ̃ɖi Ko Wònye O
VEVESESE atraɖii ate ŋu agblẽ amewo ƒe agbe dome. Exɔa woƒe ŋutifafa, dzidzɔkpɔkpɔ, kple dɔwɔɖui le wo si, eye wòna woƒe agbenɔnɔ wɔa nublanui ale gbegbe be ame aɖewo wua wo ɖokui be woakpɔ gbɔdzɔe. Atikewɔla Albert Schweitzer ƒo nya ta be: “Vevesese nye ameƒomea ƒe aƒetɔ vɔ̃ɖi wu ku gɔ̃ hã.”
Ame miliɔn geɖe kpea fu ŋɔdzitɔe. Fransetɔ amekola aɖe gblɔ be: ‘Ne woatsɔ mí atsi ɖe yame le aʋli me tegbee, afisi míate ŋu ase anyigba ƒe totro ƒe ɖiɖi le la, míase ameƒome si le fu kpem la ƒe ŋeŋe abe gbe ɖekae wotsɔ le ɣli dom sesĩe ene.’
Nyateƒee, nusi Kristotɔ apostolo Paulo ŋlɔ ƒe 1,900 kple edzivɔe nye sia la gale dɔ wɔm egbea wu: “Nuwɔwɔ blibo la katã le ŋeŋem, eye fu le eɖum vaseɖe fifi.”—Romatɔwo 8:22.
Dɔlénya Sesẽwo
Ƒunukpeƒeetetedɔ si nye ŋuɖui ƒomevi aɖe si bɔ wu la na Amerikatɔ 1 le 8 ɖesiaɖe me sea veve vevie. Dzime vea amesiwo sɔ gbɔ wu ema gɔ̃ hã vevie. Dɔdzẽ kple dzidɔ na ame bubuwo sea veve vevie.
Taɖui, aɖuvee, tovee, koko, kple dɔléle gbogbo bubuwo kpakple nuveviwɔame wɔa fu ame miliɔn geɖe vevie. Eyata mewɔ nuku o be le nyitsɔ laa ƒe aɖe me la, Amerikatɔwo zã dɔlar biliɔn 2.1 ɖe vevesesenutsitike siwo ɖɔktawo meyɔ be woaƒle o ɖeɖe dzaa ŋu, eye woyɔa vevesese sia be “Amerikatɔwo ƒe dɔvɔ̃ ɣaɣla la.”
John J. Bonica, si ɖewohĩ eyae nye amesi nya nu le vevesese ŋuti wu la, gblɔ be: “Le ga si wogblẽna kple fu si wòwɔa ame gome la, vevesese atraɖii sesẽ wu dɔlénya bubu ɖesiaɖe kloe ne wotsɔ wo katã ƒo ƒu.”
Woanɔ Agbe eye Womase Veve Oa?
Adze nuŋumabumabu nyuie le nɔnɔme sesẽ sia me be woagblɔ be woate ŋu anɔ agbe si me vevesese manɔ o. Eyata edze abe ɖe nya si Biblia gblɔ be: “Mawu latutu aɖatsi sia aɖatsi ɖa le woƒe ŋku me . . . eye konyifafa kple ɣlidodo kple veve aɖeke maganɔ anyi o” la mava eme o ene.—Nyaɖeɖefia 21:4.
Gake be woanɔ agbe eye womase veve o la menye nusi ado kpo emevava o. Gake bu eŋu vie kpɔ. Nukae ŋɔŋlɔawo wɔnɛ ŋutɔŋutɔ? Ame aɖewo li egbea siwo mesea veve kura o. Wometsɔe dzi woe o. Ðe wòle be woaʋã ŋu woa? Ŋutilãŋununyala Allan Basbaum gblɔ be: “Afɔku wònye be womase veve kura o.”
Ne mèsea veve o la, ɖewohĩ mànya be yeƒe afɔ ɖo loholoho o vaseɖe esime wòaƒaƒã. Nyadzɔdzɔ aɖe gblɔ be nyɔnuvi aɖe si mesea veve o dzilawo “sea lã fiafiã ƒe ʋeʋẽ ɣeaɖewoɣi eye kaka woakpɔ la, ɖeviae nye ma ziɔ ɖe gamle ŋu bɔkɔɔ.” Esia ta vevesese menye futɔ vɔ̃ɖi ko o. Viɖe hã ate ŋu anɔ eŋu.
Ke ŋugbe si Biblia do be: “Veve aɖeke maganɔ anyi o” ya ɖe? Ðe wònye ŋugbedodo si míadi be wòava emea?
Woanɔ Agbe eye Womafa Avi Oa?
De dzesii be nya siwo ƒo xlã kpukpui sia gblɔ hã be: “Mawu latutu aɖatsi sia aɖatsi ɖa le woƒe ŋku me.” (Nyaɖeɖefia 21:4) Esi aɖatsi le vevie ta la, ele be gɔmesese tɔxɛ aɖe nanɔ nya sia ŋu. Wokpɔa mía ta abe alesi lãmenusese si naa míesea veve kpɔa mía tae ene.
Aɖatsi lólona ɖe míaƒe ŋku dzi eye wòkpɔa egbɔ be aɖaba la manɔ ŋkua dzi klim o. Woklɔa nu tutɔwo hã ɖa le míaƒe ŋku dzi. Hekpe ɖe eŋu la, dɔlékuiwutike aɖe hã le eme si woyɔna be lysozyme, ewua dɔlékuiwo le ŋkua dzi be wòagaxɔ dɔ o. Eyata aɖatsifafa nye míaƒe ŋutilã si wowɔ nukutɔe ƒe dɔwɔwɔ tɔxɛ aɖe abe míaƒe lãmenusese si na míesea veve ene.—Psalmo 139:14.
Gake avifafa kple konyifafa, nuxaxa, kpakple fukpekpee zɔna zi geɖe. Fia Dawid si nɔ anyi le Biblia-ŋlɔɣi fa konyi be: “Meƒoa aɖatsi nye aba bekee zã sia zã, eye aɖatsi ƒoa nye dɔƒe.” (Psalmo 6:7) Yesu gɔ̃ hã “fa avi” esi exɔlɔ̃a aɖe ku. (Yohanes 11:35) Mawu meɖo tame le gɔmedzedzea me be konyifafa nado avi na ame o. Ame gbãtɔ Adam ƒe nuvɔ̃e na ameƒomea mede blibo o eye wole kukum. (Romatɔwo 5:12) Eyata avi si blibomademade kple ku na míefanae maganɔ anyi o.
Esi Biblia yɔ aɖatsi aɖe tɔgbe be eyae woaɖe ɖa ɖe, ke aleke ŋugbe si wodo be veve maganɔ anyi o la ava emee? Ðe amewo mase veve si ana woaxa nu ahafa avi ɣeaɖewoɣi teti oa?