Mawunyadɔgbedelawo—Kekeli Alo Viviti Ƒe Dɔlawoe Wonyea?—Akpa 6

Nusrɔ̃la Vavãwo Wɔwɔ Egbea

YESU KRISTO de se be: “Miheyi ɖawɔ dukɔwo katã [me nɔlawo] ne woanye nusrɔ̃lawo, [mianyrɔ̃] wo.” (Mateo 28:19) Everyman’s Encyclopedia gblɔ be “Kristotɔwo wɔ” dɔ sia “le dzidzime ɖesiaɖe me,” gake egagblɔ be “dzonɔameme vi aɖe ko wotsɔ wɔe ɣeaɖewoɣi.” Agbalẽ si nye The Missionary Myth bia be: “Ðe mawunyadɔgbedelawo ƒe azã wu enua?”

Newsweek magazine ka nya ta le ƒe sia ƒe January me be: “Papa John Paul II tsɔ Roma Katolikoha ƒe Nufiafia do ɖe ablɔ dzi.” Magazine la ɖe eme be: “Eɖo nyanyuigblɔla 350 siwo menye nunɔlawo o ɖa be woaɖadi dzimetrɔlawo le ɣeɖuƒewo, asiƒleƒewo, kple ʋudzeƒewo le Roma. Dɔ sia si tem wole kpɔ dze egɔme tso Afi alo Dzowɔ Kuɖa (February 16) dzi. Ne etsɔ afɔ nyuie la, papa la adɔ nyanyuigblɔlawo ɖe xexeame katã—enye afɔɖeɖe si ana Katoliko mawunyadɔgbedelawo nanɔ ago dom le aƒewo me tso Buenos Aires va do ɖe Tokyo.”

Gake Yehowa Ðasefowo ya se agba si le wo dzi be woawɔ nyanyuigbɔgblɔdɔa gɔme tso gbaɖegbe ke. (Timoteo II, 4:⁠5) Nyateƒee, menye wo katãe ɖea gbeƒã abe dutanyanyuigblɔlawo ene le dzronyigbawo dzi o. Gake woate ŋui—eye woɖea gbeƒã hã⁠—⁠le afisiafi si wole. Le gɔmesese sia nu la, wo katã wonye dutanyanyuigblɔlawo.

Suku Tɔxɛ Aɖe

Gbetakpɔxɔ Habɔbɔa ɖo suku aɖe le ƒe 1940 ƒeawo ƒe gɔmedzedze be woana hehe subɔla bibiwo woazu dutanyanyuigblɔlawo le dzronyigbawo dzi, afisiwo kpekpeɖeŋu hiã le vevie. Wogbugbɔ asi trɔ le nusɔsrɔ̃wo ŋu le ƒeawo me, gake meda eƒe taɖodzinu vevitɔ si nye gbetete ɖe Biblia sɔsrɔ̃ kple nyanyuigblɔdɔ si hiã la wɔwɔ dzi ƒu gbeɖe o.

Gilead, si gɔme le Hebrigbe mee nye “Ðaseɖilawo ƒe Kpo,” ye nye ŋkɔ si wotsɔ na suku yeye sia. Esi Gilead le asi kpem ɖe eŋu wole kɔ lim ɖaseɖilawo ƒe kpo gã aɖe hena bubudede Yehowa ŋu ta la, ele akpa vevi aɖe wɔm le xexeame katã ƒe gbeƒãɖeɖedɔ si Yesu gblɔ ɖi be woawɔ le míaƒe ŋkekea me la me.—Mateo 24:14.

Esi Nathan H. Knorr si nye Gbetakpɔxɔ Habɔbɔa ƒe zimenɔla ɣemaɣi nɔ nu ƒom na Gilead Sukua ƒe klass gbãtɔ le ƒe 1943 me la, egblɔ be: “Wole dzadzraɖo si de ŋgɔ wu wɔm na mi be miawɔ dɔ si sɔ kple esi apostolo Paulo, Marko, Timoteo, kple ame bubuwo wɔ esi wozɔ kpe Roma-fiaɖuƒea ɖo henɔ gbeƒã ɖem Fiaɖuƒegbedasia. . . . Miaƒe dɔ vevitɔe nye be miaɖe gbeƒã Fiaɖuƒe ŋuti nyanyuia tso aƒeme yi aƒeme abe alesi Yesu kple apostoloawo wɔe ene.”

Esi klass gbãtɔ wu woƒe hehexɔxɔ nu la, woɖo sukunuwulawo ɖe Latin-Amerika dukɔ asieke me. Vaseɖe egbea la, wona hehe sukuvi 6,500 kple vɔ siwo tso dukɔ siwo wu 110 me le Gilead Sukua, eye woɖo wo ɖe anyigba kple ƒukpo 200 kple vɔ dzi wonye dutanyanyuigblɔlawo.

Dutanyanyuigblɔlawo ƒe Ha Bubu Aɖe

Nyati siwo míeta ɖe wo nɔewo yome do ŋgɔ ƒo nu tso dɔ si Kristodukɔa ƒe mawunyadɔgbedelawo wɔ va yi ŋu. Wo dometɔ geɖe, abe esiwo woɖo ɖe Greenland ene, ɖe Biblia bliboa alo eƒe akpa aɖe gɔme ɖe afimatɔwo degbe me. Gake zi geɖe la, didi bubu si menye Biblia fiafia amewo o ye nɔ mawunyadɔgbedela gbãtɔ mawo me.

Le kpɔɖeŋu me, Kodansha Encyclopedia of Japan de dzesii be Kristodukɔa ƒe mawunyadɔgbedela siwo woɖo ɖe Japan ƒo wo ɖokui ɖe “agbalẽsrɔ̃ƒewo kple sukuwo ɖoɖo” me. Egblɔ be: “Mawunyadɔgbedela geɖe tsɔ woƒe agbalẽnyanya de dzesi wo ɖokuii.” Wova zu gbenyala alo nufialagãwo, eye wofiaa agbalẽŋɔŋlɔŋununya, gbegbɔgblɔ, ŋutinya, xexemenunya, Ɣedzeƒe Asia ƒe mawusubɔsubɔwo, kple Japantɔwo ƒe kɔnuwo. Numekugbalẽa gagblɔ be: “Dɔmenyo kple hadome kpekpeɖeŋunahawo hã nye mawunyadɔgbededɔ ƒe akpa vevi aɖe.”

Mawunyadɔgbedela akpa gãtɔ metsɔ gbeƒãɖeɖe nyanyuia ɖo ŋgɔ o. Zi geɖe la, ŋutilãmenuhiahiãwo gbɔ kpɔkpɔ dzie wotea gbe ɖo, ke menye gbɔgbɔmenuhiahiãwo o. Wotsɔ woƒe nuhiahiãwo didi ɖo ŋgo. Eyata wova nya England Sɔlemeha ƒe mawunyadɔgbedela aɖe si woɖo ɖe Japan le ƒe 1889 me nyuie egbea be “amesi koŋ to tolialia vɛ le Japan.”

Dutanyanyuigblɔla siwo wona hehee le Gilead to vovo na Kristodukɔa tɔwo le mɔ ɖedzesi aɖewo nu. Agbalẽ si nye Jehovah’s Witnesses—Proclaimers of God’s Kingdom ta 23 lia gblɔ be: “Gilead Sukua nuwula dutanyanyuigblɔlawo fiaa Biblia amewo. Le esi teƒe be woaɖo sɔlemewo ahakpɔ mɔ be amewo nava yewo gbɔ la, woyia amewo gbɔ tso aƒeme yi aƒeme . . . , menye be ­amewo nasubɔ yewo o ke boŋ be yewoasubɔ.”

Nukawoe Do tso Eme?

Dzidzedze kae Kristodukɔa ƒe mawunyadɔgbedelawo kpɔ esi wozã ƒe alafa geɖe hena Kristotɔ nusrɔ̃lawo wɔwɔ le Europa? Agbalẽ si nye A Global View of Christian Missions ɖo eŋu be: “Amesiwo ade miliɔn 160 le Europa megblɔ be yewole ha aɖeke me o. Le amesiwo gblɔna be Kristotɔwoe yewonye dome gɔ̃ hã la, ame ʋee aɖewo koe tsɔa woƒe mawusubɔsubɔ nu vevii. . . . Womate ŋu ayɔ Europa be Kristotɔwo ƒe anyigba wòasɔ gbeɖe o.”

Ke aleke nuwo le le Asia hã? Kodansha Encyclopedia of Japan ɖo eŋu be: “Ame akpa gãtɔ gabua Kristotɔnyenye kokoko be enye ‘duta’ dzixɔse, . . . si mesɔ na Japantɔwo o. . . . Kristotɔwo ƒe habɔbɔ la kpɔtɔ le Japantɔwo ƒe liƒowo dzi.” Le nyateƒe me la, amesiwo mede 4 le alafa me o koe gblɔna be yewonye Kristotɔwo le Japan, le India la, womede 3 le alafa me o, le Pakistan womede 2 le alafa me o, eye le China womede 0.5 le alafa me o.

Aleke nuwo le le Afrika esi Kristodukɔa ƒe mawunyadɔgbedelawo tsɔ ƒe alafa geɖe wɔ dɔ le afima? Germaniatɔwo ƒe maga­zine Focus ka nya ta le Afrika-bisiɔpwo ƒe takpekpe si wowɔ le ada sia me le Roma ŋu be: “Mele be woagabu fɔ Afrikatɔwo ƒe subɔsubɔ be wonye trɔ̃subɔsubɔ o. Haŋgɔnɔlawo ƒe nuŋlɔɖi si wometa haɖe o gblɔ be ‘Afrikatɔwo ƒe subɔsubɔ siwo li tso wo tɔgbuiwo ŋɔli ke’ kpe ɖe mawusubɔsubɔ ŋu, eye esɔ be woagblɔ be wonye zɔhɛ siwo sɔ na wo nɔewo vevie. Wo me nɔlawo dze na bubu. Aɖaŋuɖotakpekpea lɔ̃ ɖe edzi be subɔsubɔ siwo wobu fɔe tsã be wonye trɔ̃subɔsubɔ nue ‘Katolikotɔ veviedonulawo kekeake gɔ̃ hã nɔa agbe ɖo zi geɖe.’”a

Dzidzedze kae Kristodukɔa ƒe mawunyadɔgbedelawo kpɔ esi wotsɔ ƒe alafa geɖe wɔ Kristotɔ nusrɔ̃lawo le Amerika-nyigbawo dzi? Agbalẽ si nye Mission to the World ɖo eŋu be: “‘Latin Amerika’ gadze be woayɔ dzesideŋkɔ si nye ‘anyigbagã si wogblẽ ɖi’ na togbɔ be mawunyadɔgbededɔ kpɔ ŋgɔyiyi gã aɖe le nyitsɔ laa ƒewo me hã.” Newsweek gblɔ le United States ŋu be numekuku yeyewo “ɖee fia be togbɔ be mawusubɔsubɔ yɔ Amerika-nyigba dzi fũ hã la, ame ʋee aɖewo koe tsɔe vevie. . . . Ameawo ƒe afã siwo gblɔ na numekulawo be yewodea sɔleme Kwasiɖagbewo la mele nyateƒe tom o. . . . Amerikatɔ siwo xɔ ƒe 18 alo wu nenema ƒe akpa etɔ̃liawo ɖeka kloe ƒe agbenɔnɔ nye xexeame tɔ . . . Wo dometɔ 19 le alafa me koe . . . nɔa agbe ɖe woƒe subɔsubɔ nu ɣesiaɣi.”

Kpuie ko la, le Kristodukɔa ƒe mawunyadɔgbedelawo ƒe ha bliboa ƒe agbagbadzedze me be woaɖe hiãkame, dɔléle, kple sukumademade dzi akpɔtɔ la, amegbetɔ ƒe tameɖoɖo si ne eɖe vi ƒãe nye be woana gbɔdzɔe vi aɖe amewo ɣeyiɣi kpui aɖe koe wodo ɖe ŋgɔ. Gake nyateƒe Kristotɔwo ƒe dutanyanyuigblɔlawo ya he amewo ƒe susu yi Mawu ƒe Fiaɖuƒe si wòɖo, si ana gbɔdzɔe mavɔ amewo keŋkeŋ la dzii. Menye ɖeko wòalé kuxiwo nu vie o; akpɔ wo gbɔ keŋkeŋ. Ẽ, Mawu ƒe Fiaɖuƒea ana lãmesẽ deblibo ameƒomea, ganyawo ƒe dedienɔnɔ vavãtɔ anɔ anyi, dɔ ɖevi siwo ƒe mɔnukpɔkpɔ nu mayi gbeɖe o asu amesiame si, eye woanɔ agbe si seƒeɖo manɔe na o!—Psalmo 37:9-11, 29; Yesaya 33:24; 35:5, 6; 65:21-23; Nyaɖeɖefia 21:3,4.

Kristodukɔa ƒe mawunyadɔgbedelawo atɔ asi amesiwo gblɔna be yewonye Kristotɔwo eye wodea sɔleme ɣeaɖewoɣi ko dzi be wonye kpeɖodzi be yewowɔ ‘dukɔwo katã me nɔlawo nusrɔ̃lawoe, hede mawutsi ta na wo.’ Gake ɖaseɖiɖiawo fia be mawunyadɔgbedela siawo mete ŋu fia amesiawo siwo wode mawutsi ta na be ‘woawɔ nusiwo katã ƒe se Yesu de o.’—Mateo 28:19,20.

Gake nyateƒe Kristotɔwo ƒe nufiafiadɔ ayi edzi age ɖe Mawu ƒe xexe yeyea me. Akeke ɖe enu akpe ame miliɔn geɖe siwo woafɔ ɖe tsitre, siwo wòahiã be woafia Mawu ƒe mɔwoe la ɖo. Ekema mɔnukpɔkpɔ dodzidzɔname asu Kristotɔwo si be woayi edzi awɔ nusrɔ̃lawo Satana ƒe kplamatsedodo manɔmee—abe alesi wole ewɔm ƒe geɖe enye esia ene.

[Etenuŋɔŋlɔ]

[Aɖaka si le axa 14]

Alesi Wokpe Ðe Amewo Ŋui

Amesiwo ŋu dutanyanyuigblɔla siwo wona hehee le Gilead kpe ɖo lae gblɔ nya siwo gbɔna.

“Woƒe kutrikuku wɔ nuku nam ŋutɔ, wodo go nɔnɔme geɖe siwo to vovo na wo de tɔwo sã: yame ƒe nɔnɔme, gbegbɔgblɔwo, amewo ƒe agbenɔnɔ, nuɖuɖu, kple subɔsubɔhawo. Gake woyi woƒe dɔdasiwo wɔwɔ dzi, wo dometɔ aɖewo wɔe vaseɖe ku me. Woƒe nusɔsrɔ̃ ɖe ɖoɖo nu nyuie kple woƒe dzonɔameme le subɔsubɔdɔa me kpe ɖe ŋunye metu nɔnɔme mawo ke ɖo.”—J. A., India.

“Dutanyanyuigblɔla la ƒe gamedzinɔnɔ le nusɔsrɔ̃ kplim me wɔ dɔ ɖe dzinye ŋutɔ. Eɖe ɖokuidziɖuɖu ɖedzesi fia le tenɔnɔ ɖe nye nazãbubuwo kple numanyamanya nu me.”—P. T., Thailand.

“Ðasefo dutanyanyuigblɔlawo ƒe dzadzɛnyenye dze mía kple srɔ̃nye ŋu ale gbegbe. Woƒe dɔwɔna ʋã mí be míeɖo ɣeyiɣiawo katã ƒe subɔsubɔdɔa míaƒe taɖodzinui, eye dzi dzɔ mía ŋutɔwo be míenye dutanyanyuigblɔlawo egbea.”—A. C., Mozambique.

“Ðokuisigbe ko menɔna. Gododo dutanyanyuigblɔlawo na ameʋãnu si mehiã atsɔ atrɔ nɔnɔmea lam. Menye gota gome dzidzɔkpɔkpɔe mekpɔ le wo ŋu o, ke dzidzɔkpɔkpɔ vavãtɔe.”—J. K., Japan.

“Kristodukɔa ƒe mawunyadɔgbedelawo nɔ agbe si me dzidzeme le. Gbɔviwoe dzraa aƒea me ɖo, woawoe ɖaa nu, woawoe nyãa nu, woawoe ŋlɔa abɔa me, eye woawoe kua ʋua. Ewɔ nuku nam ŋutɔ be mekpɔ Gilead dutanyanyuigblɔlawo nɔ woa ŋutɔwo ƒe aƒemedɔwo wɔm nyuie, eye woganɔ kpekpem ɖe mía gbɔ tɔwo ŋu be woasrɔ̃ nu le Mawu ƒe Fiaɖuƒea ŋu.”—S. D., Thailand.

“Nyɔnu dutanyanyuigblɔlawo doa gasɔ yia amewo gbɔ ne yame xɔ dzo gbagbagbã wu Celcius 46° gɔ̃ hã. Woƒe amedzrowɔwɔ kple akpaɖekedzimademade, kpakple woƒe dzidodo kpe ɖe ŋunye mekpɔ nyateƒea dze sii.”—V. H., India.

“Dutanyanyuigblɔlawo mebu wo ɖokui gãe o. Wotrɔ woƒe nɔnɔme ɖe mía gbɔ tɔwo kple woƒe agbenɔnɔ madeamedziwo ŋu ɖokuibɔbɔtɔe. Ðe wova be yewoasubɔ, eyata wometo nyatoƒoe gbeɖe o ke boŋ wokpɔa dzidzɔ ɣesiaɣi eye nusi le wo si dzea wo ŋu.”—C. P., Thailand.

“Wometɔ tsi Biblia ƒe nyateƒe la o. Ke hã la, womena mía gbɔ tɔwo se le wo ɖokui me be woƒe dekɔnuwo katã gblẽ alo be woanɔ agbe abe Ɣetoɖoƒetɔwo ene o. Womena ame bubuwo se le wo ɖokui me be yewole tsɛ alo yewomedze o.”—A. D., Papua New Guinea.

“Nyɔnu sia mele abe Kristodukɔa ƒe mawunyadɔgbedelawo ene o, ke elɔ̃na nɔa anyigba kpalia afɔ abe Koreatɔwo ene ne míele Biblia-nusɔsrɔ̃ wɔm. Elɔ̃na ɖua mí Koreatɔwo ƒe nuɖuɖuwo. Lɔlɔ̃ si meɖo nɛ kpe ɖe ŋunye mewɔ ŋgɔyiyi.”—S. K., Korea.

“Mexɔ ƒe ewo ɣemaɣi eye mekpãna le suku le ŋdɔ me. Dutanyanyuigblɔla aɖe kpem be mawɔ dɔ kpli ye le gbeadzi le ŋdɔwo me. Efia Biblia me gɔmeɖose geɖewom eye wòƒã ŋudzedzekpɔkpɔ vavã ɖe Yehowa ƒe habɔbɔa ŋu ɖe menye.”—R. G., Colombia.

“Wofiam be malé nye dɔdasiwo me ɖe asi, mawɔ nusi hiã nyatoƒoematomatoe. Meda akpe na Yehowa kple Yesu Kristo tso dzi me ke le esi woɖo dutanyanyuigblɔlawo ɖe mí ta.”—K. S., Japan.

[Nɔnɔmetata si le axa 13]

Dutanyanyuigblɔla siwo xɔ hehe le Gilead tso dukɔ 16 me va gblɔ nuteƒekpɔkpɔwo le takpekpe aɖe me nyitsɔ laa