“Ne Megbɔdzɔ la, Ekema Mesẽa Ŋu”

DUVI aɖe si woyɔna be Petaluma si le San Francisco ƒe dziehe le California la mee menɔ tsi. Danye tsɔ ɖe mawusubɔsubɔ me vie, gake mawusubɔsubɔ medzea fofonye ya ŋu kura o. Mexɔe se ɣesiaɣi be wɔla aɖe li—ɖeko nyemenya amesi tututu wònye o.

Ðevi kpɔdzidzɔ aɖee menye esi menɔ tsitsim. Aleke metsɔa dzidzɔ ɖoa ŋku ablɔɖeŋkeke mawo dzii enye si! Nyemenya kura be nanewo nɔ edzi yim le nye ŋutilã me si axɔ ablɔɖe le asinye o. Meɖo ŋku edzi be ƒe 1960, esi menɔ ƒe mamlɛa me le suku kɔkɔ, ye megblɔ na xɔ̃nye vevi aɖe be mele veve sem le nye asibide aɖewo me.

Eteƒe medidi o nye afɔwo va nɔ veyem ale gbegbe be danye kplɔm yi kɔ aɖe dzii le San Francisco, afisi menɔ ŋkeke ade. Mexɔ ƒe 18 ɣemaɣi, eye dodokpɔawo ɖee fia be ƒunukpeƒetetedɔ le ŋunye. Wodze egɔme nɔ sodium thiosulfate si le abe sikatsi ene la ƒe abi dom nam, emegbe wotrɔ ɖe prednisone ŋu, eye emegbe wova nɔ cortisone ƒomevi aɖe dom nam. Le ye katã me la, menɔ atike mawo dom ƒe 18 sɔŋ, eye wo dometɔ ɖesiaɖe faa vevea nu ƒe ʋee aɖewo eye vivivi la megava wɔa dɔ nyuie o, eye wotrɔna ɖe bubu ŋu. Menɔ veve sem ɖaa, eye meva tsi dzi ɖe atike vovovo siwo akpe ɖe ŋunye la didi ŋu vevie. Meke ɖe dɔdamɔnu bubu siwo hã kpe ɖe ŋunye vie ŋuti. Edzɔ dzi nam be nyemegasea veve geɖe abe alesi wònɔ tsã esime dɔlélea nɔ kakam ɖe nye ŋutilã me ene o.

Gbeɖeka le ƒe 1975 me la, vinyeŋutsuvi va ke ɖe agbalẽ aɖe si me danye wɔ nuŋlɔɖi ɖo tso ŋunye esime menye vidzĩ la ŋu. Mekpɔe be esime mexɔ ɣleti ade la, ɖɔkta aɖe zã X-ray tsɔ dze dɔdada nam gɔme esi lãmenu si nye dɔlélenutsinu te. Mexɔe se be ɖewohĩ keklẽ si wotsɔ da dɔ nam le ɖevime gbɔe nɔnɔme si me mele egbea tso. Ne nenemae la, ke vodada gã kae nye si wowɔ!

Meɖe srɔ̃ le ƒe 1962 me. Le ƒe 1968 me esime dɔlélea dze egɔme la, mía kple srɔ̃nyeŋutsu Lynn míewɔ dɔ ɖekae le abolomeƒe aɖe si nye mía tɔ. Míefɔna ŋdi ga 4:00 lɔƒo, eye srɔ̃nye blua wɔ la eye wòmlɔa abolowɔkotokua dzi nɔa alɔ̃ dɔm ɣeaɖewoɣi esime aboloa le kpoa me. Míetsonɛ dea nu me, eye emegbe Lynn tsɔnɛ yina na amewo. Ɣeaɖeɣi la, nugblẽfexeha aɖe ƒe nudzrala va míaƒe abolomeƒea eye wòƒo nu na mí tso Mawu ƒe Fiaɖuƒe si ŋugbe wodo ŋu. Nya si míese la dzɔ dzi na mí, gake vovo menɔ mía ŋu kura o. Ame geɖe nɔ míaƒe aboloa xɔm, eye ŋutilãmedɔ geɖe wu va do agba na mí. Edzɔ dzi na mí be abolomeƒe bubu aɖe ƒle mía tɔ la! Lynn yi va wɔ dɔ na wo, eye meyi va wɔ dɔ le ɖawɔƒe aɖe. Gake esi ƒunukpeƒetetedɔa nu nɔ sesẽm ɖe edzi la, ŋkeke etɔ̃ ko mete ŋu wɔa dɔ kwasiɖa ɖeka eye mlɔeba la, eva hiã be madzudzɔ dɔwɔwɔ kura.

Ɣemaɣi la, Yehowa Ðasefo aɖe vaa aƒea me edziedzi eye wònaa Gbetakpɔxɔ kple Nyɔ! ƒe magazinewom. Menaa nudzɔdzɔ ɖe eta ɣesiaɣi hexɔa magazineawo, kple susu be menɔ kpekpem ɖe eŋu. Ne edzo la, medaa wo ɖe agbalẽdaɖoƒea ŋkeke ʋee aɖewo emaʋumaʋui, eye emegbe mía dometɔ ɖeka fɔa wo ƒua gbe. Ewɔ nublanui ŋutɔ elabena fifia míekpɔa ŋudzedze ɖe gbɔgbɔmenu xɔasi siwo le wo me ŋu. Gake ɣemaɣi la, míebu mawusubɔsubɔ nya vevi aɖekee o.

Míetsi Dzi ɖe Míaƒe Gbɔgbɔmenuhiahiã Ŋu

Gbeɖeka fiẽ la, mía kple srɔ̃nye míenɔ dze ɖom tso alesi wòle be gɔmesese geɖe wu nanɔ agbe ŋu wu nuɖuɖu kple alɔ̃dɔdɔ kpakple dɔ sesẽ wɔwɔ ko. Míedze gbɔgbɔmenu si menɔ míaƒe agbenɔnɔ me o la didi gɔme. Míeyi ɖe sɔleme sue aɖe si nɔ ablɔa dzi, gake míekpɔ gbɔgbɔmetutuɖo si míekpɔ mɔ na la o. Mía gbɔ kuxiwo koŋ ŋue hameviawo ƒoa nu tsonɛ.

Ðasefo si tsɔa magazineawo vanɛ la nɔ vavam anye ƒe ɖeka, gake alesi mewɔa eƒe agbalẽawoe la metrɔ o vaseɖe esime mlɔeba mexlẽ Eŋlisigbe me October 8, 1968, ƒe Nyɔ! ƒe tata si ƒe tanyae nye “Ðe Wòtsi Megbe Wu Alesi Nèbua?” Nya si mexlẽ la dzɔ dzi nam eye dzidzɔtɔe la, ekpɔ ŋusẽ ɖe srɔ̃nye hã dzi nenema ke. Míedze nusɔsrɔ̃ gɔme eye míenɔ nyateƒea gɔme sem kabakaba. Míetsɔ didi vevie xɔ nu wɔnuku siwo katã míesrɔ̃ lae. Míexɔ nyɔnyrɔ le ƒe 1969 me.

Esime ɣeyiɣia nɔ yiyim la, eva sesẽ nam be matso anɔ anyi eye azɔlizɔzɔ ya gavlo wu. Medzea agbagba geɖe hafi biaa klo ale be mate ŋu age ɖe ʋu me eye mado le eme. Mesrɔ̃ alesi manɔ agbe nanewo mawɔmawɔ kple le vevesese si na menɔa avi dzi zi geɖe la me. Eyata medzraa ɖokuinye ɖo eye míedzea mɔ yia kpekpe alo gbeadzi. Mezɔna tso aƒeme yi aƒeme ɣeyiɣi didi si mate ŋui. Medzea agbagba be mayi gbeadzi zi ɖeka alo zi eve kwasiɖa sia kwasiɖa, vaseɖe esime nyemegate ŋu yina o le esi nye klowo kple afɔwo va lia henɔ veyem ta. Mevɔ̃na zi geɖe be mava dze anyi eye nyemagate ŋu atso o. Ne meƒo nu kple Yehowa la, ekpena ɖe ŋunye. Ɣeaɖewoɣi la, mefaa avi ɖe edzi vevie.

Gake menye ɣesiaɣie mete ŋu faa aɖatsi o. Amesi ŋu ƒunukpeƒetetedɔ le ƒe ŋkutome hã ate ŋu aƒu. Edzɔ ɖe dzinye ɣeaɖewoɣi be eƒuna kplakplakpla ale gbegbe be nu meganya xlẽna nam o. Ne edzɔ nenema la, mesea Biblia si wolé ɖe kasɛtwo dzi. Memiãa ŋku hafi nɔa zɔzɔm elabena ne meƒo aɖaba la, edea abi ŋku dzi nam. Anye ne ana nye ŋku hã nagbã. Ɣeaɖewoɣi la, ele be mage aɖatsi wɔwɔe ɖe ŋkua dzi aɖabaƒoƒo atɔ̃ ɖesiaɖe. Vɔ̃ɖitɔe nye be, ahiã be made ami ŋku dzi eye wòanɔ babla ŋkeke atɔ̃ alo ade vaseɖe esime woaka ɖe eme. Mele bɔbɔe be ame nayi edzi anɔ akpe dam esime wòle dagbadagbam le ɣeyiɣi didi ƒe dɔléle si womate ŋu akpɔ mɔ na wòasɔ be avɔ le nuɖoanyi sia me la me o.

Le ƒe 1978 me la, eva hiã be manɔ bunɔkeke me. Nyametsotso ma wɔwɔ sesẽ nam. Megbe ezazã ɣeyiɣi aɖe alesi mate ŋui, gake fifia naneke megali mawɔ wu ezazã o. Menya be megbɔna ezã ge gbeɖeka, gake mekpɔ mɔ be Mawu ƒe xexeme yeyea nava gbã. Lynn ƒle nutalawo ƒe zikpui kɔkɔ si keke eye afɔti atɔ̃ le ete. Menɔa eme tutua ɖokuinye yia afisiafi le aƒea me.

Nyemete ŋu doa asi ɖa tsɔa nu o, elabena nyemete ŋu didia abɔ ale o eye nyemete ŋu tsɔa nye asibide siwo xa hetro la léa nu nyuie o. Eyata mezãa “nutsɔti.” Mete ŋu zãnɛ tsɔnɛ kɔa nu le anyigba, metsɔ ʋua agbadzraɖoƒe heɖea agba, alo metsɔnɛ ɖea nu le tsifamɔ̃a me. Esi meva nya mɔnu yeye siwo nu mazã “nutsɔti” le ta la, mete ŋu wɔa aƒemedɔ aɖewo. Mete ŋu ɖaa nu, klɔa agbawo, meɖoa nu dzi heŋea wo, eye metutua anyigba. Evivia nunye be nye ŋutetewo dzi ɖe edzi, eye edzɔ dzi nam be mete ŋu kpɔa gome le aƒemedɔ aɖewo wɔwɔ me. Gake nusi metsɔa aɖabaƒoƒo aɖewo ko wɔna tsã la xɔa gaƒoƒo geɖe fifia.

Ðaseɖiɖi le Telefon Dzi

Exɔ ɣeyiɣi hafi mete ŋu te kpɔ ɖi ɖase le telefon dzi. Nyemebu be mate ŋu awɔe o, gake fifia ewɔwɔ vivia nunye eye mekpɔ dzidzedze nyuie. Nukutɔe la, esɔ kple tso aƒeme yi aƒeme tututu, elabena mete ŋu ƒoa nu na amewo tso Yehowa kple eƒe tameɖoɖowo ŋu.

Dzeɖonya siwo mezãna dometɔ ɖeka dzea egɔme ale: “Aƒetɔ—— enye ma? Nyee nye Aƒenɔ Maass. Mele dze kpui aɖe ɖom kple amewo, eye àlɔ̃ be matsɔ aɖabaƒoƒo ʋee aɖewo aƒo nu kpli wòa? (Ame geɖe ɖoa eŋu be: “Nya kae wònye?”) Nusiwo le edzi yim le xexeame egbea ɖi vɔvɔ̃ ŋutɔ, alo mekpɔe nenema oa? (Meɖea mɔ woɖoa eŋu.) Medi be magblɔ Biblia me nya sia si naa etsɔmemɔkpɔkpɔ vavã mí la na wò.” Mexlẽa Aƒetɔ ƒe Gbedodoɖa la kple ɖewohĩ Petro II, 3:13. Megblɔ na nɔvinyɔnu Kristotɔ bubuwo alo Lynn be woawɔ tɔtrɔyi aɖewo nam.

Esi ƒeawo va le yiyim la, meɖo dze vivi geɖe kple amewo eye mete ŋu ɖo agbalẽ gbadzawo, magazinewo, kple agbalẽwo ɖe amesiwo ɖe ɖetsɔleme fia. Wo dometɔ aɖewo dze Biblia sɔsrɔ̃ gɔme le telefon dzi. Nyɔnu aɖe si meƒo nu kpli la gblɔ be yebu be nu sɔsrɔ̃ le ye ɖokui si ɖeɖe sɔ gbɔ. Gake esi míeɖo dze zi geɖe megbe la, elɔ̃ be yeava míaƒe aƒeme míasrɔ̃ Biblia, elabena meƒo nu tso nye nɔnɔmewo ŋu nɛ.

Ɣebubuɣi esi menɔ ɖase ɖim na amewo la, telefonmɔ̃ aɖe si léa nya ɖi yɔ xexlẽdzesi bubu aɖe nam be mazã. Togbɔ be míaƒe nutoa me tɔwo ko meyɔna, eye xexlẽdzesi sia mele míaƒe nutoa me o hã la, nane ʋãm be mazã xexlẽdzesi la kpɔ. Esi mía kple nyɔnu si tsɔ telefon la míeɖo dze vie la, egblɔ be ye kple ye srɔ̃ yewole amesiwo nye Kristotɔ akuakuwo dim. Eyata mía kple Lynn míeyi woƒe aƒeme, si anye gaƒoƒo ɖeka ƒe mɔ, be míava srɔ̃ nu kpli wo.

Megale dzidzɔ kple dzidzeme kpɔm le nuƒoƒo na ame bubuwo le Yehowa kple ŋugbe si wòdo be dziƒo yeye kple anyigba yeye si me dzɔdzɔenyenye anɔ ava ŋu me. Nyitsɔ laa nyɔnu aɖe si menɔ nu ƒom na ɣleti geɖe la gblɔ nam be: “Ɣesiaɣi si maƒo nu kple wò la, mekpɔnɛ be megaxɔ sidzedze geɖe wu.” Menya be sidzedze si ŋu nya megblɔna na ame bubuwo la kplɔa ame yia agbe mavɔ me eye ena mekpɔa dzidzɔ togbɔ be megbã tsi teƒe ɖeka le gotagome hã. Mete ŋu wɔa subɔsubɔdɔa geɖe ɣeaɖewoɣi wu ɣebubuɣiwo, gake medi be mawɔ geɖe wu, mawɔ geɖe ɣesiaɣi hafi! Menya be Yehowa nya nɔnɔme si me amesiame le eye nusi míete ŋu wɔna la dzea eŋu, eɖanye aleke wòadze nu sue o. Mebua Lododowo 27:11 ŋu zi geɖe si gblɔ be: “Vinye, dze nunya, be nado dzidzɔ na nye dzi, ne mate ŋu aɖo nya ŋu na amesiwo le alɔme ɖem le ŋunye,” eye medi be manɔ amesiwo ɖenɛ fiana be alakpatɔe Satana nye la dome.

Kpekpewo yiyi dea dzi ƒo nam ɣesiaɣi, togbɔ be afima yiyi sesẽna nam hã. Yehowa wɔ mɔnuɖoɖo nyui geɖe ŋutɔ na mí be míaɖu nu nyuie le gbɔgbɔ me ale gbegbe be medi be mawɔ wo ŋudɔ bliboe. Aleke míekpɔa dzidzɔ enye si be mía vi eveawo wɔ nyateƒea wo tɔe! Nɔviŋutsu nyui aɖe ɖe mía vinyɔnu Terri, eye wodzi vi ene siwo melɔ̃na vevie. Aleke gbegbe dzi dzɔa mí enye si be míakpɔ be mía mamayɔviwo kple tɔgbuiyɔviwo hã lɔ̃ Yehowa! Mía viŋutsu James, kple srɔ̃a Tuesday, tiae be yewoasubɔ Yehowa le Brooklyn Betel, si nye Yehowa Ðasefowo ƒe xexeame katã ƒe ta, le New York.

Paradisonyigba aɖe Ava le Yehowa ƒe Ŋusẽ Me

Medzea agbagba be malé paradisonyigba si ƒe ŋugbe wɔnuku Yehowa do la ɖe susu me. Fifia gɔ̃ hã la, eƒe nuwɔwɔ gbogbo aɖewo li siwo me mesea vivi le. Ɣe si gba amigo dzeani la nya kpɔna nam. Seƒoƒo vovovowo kple woƒe ʋeʋe lilili dzɔa dzi nam. Rose-seƒoƒowo léa dzi nam ŋutɔ! Nyemete ŋu dona le aƒeme zi geɖe o, gake ne mete ŋu do la, ŋdɔ ƒe keklẽ nu nɔnɔ vivia nunye ŋutɔ. Memiãa ŋku hewɔa towo dzi nɔnɔme aɖe le susu me, si me nye ƒomea nɔa fefem le sɔgbe dzi le gbadzaƒe aɖe si gbemeseƒoƒowo yɔ fũ. Adɔ̃ si ƒe tsiwo le bublum kple adzamatre siwo me tsi viviwo le li amesiame naɖu! Ne anya wɔ la, metaa nusiwo kpena ɖe ŋunye mebua Paradisonyigba si ŋugbe wodo be ava ŋu la ƒe nɔnɔmewo. Ne mele etam la, mekpɔa ɖokuinye le afima le susu me. Menya be Yehowa ate ŋu ana susu me nɔnɔmetata siwo gbɔ nyemelɔ̃a nu le o la nava eme ŋutɔŋutɔ.

Medina be malé mawunyakpukpui si le Yakobo 1:12 la ɖe susu me. Egblɔ be: “Woayra ŋutsu, si doa dzi le tetekpɔ me la; elabena ne eva li ke la, akpɔ agbefiakuku, si ŋugbe [Yehowa, NW] do na amesiwo lɔ̃nɛ la.” Paulo gblɔ be yeƒe dɔlélea le abe ‘Satana ƒe dɔlae le ye ƒom kple kɔ ɣesiaɣi’ ene. Edo gbe ɖa be Yehowa nana yeƒe dɔlélea navɔ gake wogblɔ nɛ be Mawu ƒe ŋusẽ zu blibo le eƒe gbɔdzɔgbɔdzɔ me. Eyata dzidzedze si Paulo kpɔ togbɔ be gbɔdzɔgbɔdzɔ nɔ eŋu hã la ɖo kpe edzi be Mawu ƒe ŋusẽ nɔ edzi. Paulo gblɔ be: “Ne megbɔdzɔ la, ekema mesẽa ŋu.” (Korintotɔwo II, 12:7-10) Mekpɔnɛ be Mawu ƒe ŋusẽ si le dzinye me koe dɔ sue si mete ŋu wɔna fifia le nye nɔnɔme madeamedzia me la tso.

Yohanes ŋlɔ nudzɔdzɔ aɖe ɖi si dea dzi ƒo nam ŋutɔ. Eku ɖe ŋutsu aɖe si tsi aba dzi ƒe 38 sɔŋ la ŋu. Woa kple dɔnɔ bubuwo tsɔ mɔkpɔkpɔ mlɔ ta aɖe to eye wònɔ didim vevie be yealé tsi le eme. Mete ŋu gena ɖe tsi si wòbu be ada dɔ na ye la me o. Gbeɖeka Yesu kpɔe eye wòbiae bena: “Èle didim bena, wò lãme nasẽ mahã?” Anye ne dzidzɔvi ka gbegbee nye si mafa atsɔ aɖo biabia ma ŋui! “Yesu gblɔ nɛ bena: Tsi tre, nakɔ wò aba dzi, eye nazɔ azɔli!” (Yohanes 5:2-9) Mía dometɔ geɖe míele lalam vevie be míase nya sia tɔgbe!—Abe alesi Luretta Maass gblɔe ene.

[Nɔnɔmetata si le axa 27]

Mebu ɖevi aɖe si lɔ̃a amewo la ŋu, eye eyae nye si tsɔ dzidzɔ le sɔgbe dzi zɔm

[Nɔnɔmetata si le axa 28]

Ne dzi le dzɔyem la, mekpɔa ŋutsuvi si le ati dzi eye eƒe avu le ete la le susu me

[Nɔnɔmetata siwo le axa 29]

Telefonxexlẽdzesiwo didi hena gbeadzisubɔsubɔdɔ wɔwɔ

Mele ka ƒom na ame aɖe