Anukwaremaɖimaɖi Ƒe Ameheŋusẽwo

“Anukwareɖiɖi le dɔwɔnyawo me va zu gbeaɖegbenya; ame siwo di be yewoaɖi anukware le nu sia nu me la ado kpo nu godoo.”—Stephen, U.S.A.

ÐE NÈLƆ̃ ɖe dziɖeleameƒonya sia dzia? Ele eme baa be anukwaremaɖimaɖi hea viɖe aɖewo vanɛ ɣeaɖewoɣi ya, gake viɖeawo nu yina kaba. Ke hã, ame siwo dzea agbagba be yewoaɖi anukware ɣeawokatãɣi la doa go kuxi siwo gbɔna:

Ame Ŋutɔ Ƒe Dzodzrowo. Ame kae madi be ga alo nunɔamesi geɖe nasu ye si o? Ne wotsɔ gakpɔmɔnu aɖe si ŋu nya ku ɖo la ɖo ame ŋkume la, ate ŋu asesẽ be woagbe.

● “Nyee tiaa adzɔha siwo atsa asi kple míaƒe dɔwɔƒea. Zi geɖe la, adzɔhawo dina be yewoana zãnum. Mazu-gatɔ-kaba ƒe ameheŋusẽa nu sẽ ŋutɔ.”—Franz, Middle East.

Adzɔhawo Ƒe Viɖe Gã Didi. Egbea, adzɔha geɖe siwo le xexea me godoo la le akɔ kpem kple ganyawo ƒe sesẽ. Ele be woanɔ te ɖe mɔ̃ɖaŋunu yeye siwo tom wole vɛ kple adzɔhawo dome hoʋiʋliwo hã nu. Dɔwɔlawo ate ŋu ase le wo ɖokui me be anukwaremaɖimaɖi nuwɔnawo dzi koe yewoato hafi ate ŋu aɖo dɔtɔwo kple dɔmemegãwo ƒe didiwo gbɔ.

● “Míesusu be nenema koe wòle be míawɔe. . . . Ne menye nenema o la, míaƒe dɔwɔƒea aɖu agba.”—Reinhard Siekaczek, ame si wolé ɖe zãnunana ta.—The New York Times.

Amewo Ƒe Nyaƒoɖeamenu. Dɔwɔhatiwo alo asisiwo ate ŋu adoe ɖe gbɔwò be nàwɔ ɖeka kpli yewo le amebaba me.

● “Adzɔha aɖe si nye míaƒe asisi vevi la ƒe amegã gblɔ nam be, ne nyemedi ‘nane de kotoku me na ye’ o la, yewoadzudzɔ asitsatsa kpli mí.”—Johan, South Africa.

Amewo Ƒe Nɔnɔme. Le nuto aɖewo me la, ele be ‘nàdi nane awɔ’ hafi woakpɔ dɔ aɖe gbɔ na wò. Nunanaa ƒe home alo nɔnɔme si me wotsɔe na le ate ŋu ana wòasesẽ be woanya ne dɔwɔɖoɖo wònye loo alo zãnunanae. Le dukɔ geɖe me la, dumegã nu fitifiti wɔlawo biana be woana ga yewo hafi yewoakpɔ dɔ aɖe gbɔ na ame, eye wodina hã be woana nu yewo ɖe dɔ si yewowɔ ta.

● “Menɔa bɔbɔe be woanya ne nunana dzro koe loo alo zãnunana ye o.”—William, Colombia.

Ale Si Nɔnɔmea Le Le Dukɔa Me. Ame siwo le teƒe siwo ahedada xɔ aƒe ɖo alo le dukɔ siwo me dukplɔɖoɖowo me gbɔdzɔ le lae dzea ŋgɔ anukwareɖiɖi ƒe tetekpɔ gãtɔwo. Le nuto mawo me la, wobua ame siwo medina be yewoaba ame alo afi fi o la be wonye aƒedzikpɔla maʋuŋkuwo.

● “Wobua anukwaremaɖimaɖi be ehiã eye naneke megblẽ le eŋu o, nenye be asi menya su dziwò o ko.”—Tomasi, Congo Kinshasa.

Nu Si Na Anukwareɖiɖi Yi To

Anukwaremaɖimaɖi ƒe ŋusẽkpɔɖeamedzi tea ŋu gblẽa nu geɖe. Esi wobia gbe adzɔha gã aɖewo ƒe amegãwo le Australia la, wo dometɔ 9 le 10 me gblɔ be yewonya be zãnunana kple nu fitifiti wɔwɔ “menyo o, gake yewomate ŋu aƒo asa nɛ o.” Wogblɔ kpee be masesẽ na yewo kura be yewoaŋe aɖaba aƒu nu si sɔ wɔwɔ dzi atsɔ akpɔ dɔ alo atsɔ adi viɖe na yewoƒe adzɔha o.

Ke hã, nu fitifiti wɔlawo bua wo ɖokuiwo be yewonye anukwareɖilawo. Mɔ ka nue woƒe nuwɔna kple ale si wobua wo ɖokuiwoe la sɔ le? Numekugbalẽ aɖe ka nya ta be: “Ne amewo di be nuwo nade yewo dzi la, womegabua anukwareɖiɖi nu vevii o, evɔ wokpɔtɔ blea wo ɖokuiwo be yewonye anukwareɖilawo ŋutɔŋutɔ.” (Journal of Marketing Research) Be nɔnɔme sia nagaɖe fu na woƒe dzitsinya o la, wotoa mɔ vovovowo dzi tɔa tsi anukwaremaɖimaɖi ƒe ŋkubiãnyanyenye tsɔ faa dzi na wo ɖokui.

Le kpɔɖeŋu me, wozãa nyagbɔgblɔ aɖewo tsɔ ɖɔa anukwaremaɖimaɖi nuwɔnawo be woagadze nu gbegblẽ o. Egbea, woyɔa alakpadada be “aɖaŋudzedze,” eye woyɔa amebaba be “dɔnyanya.” Woɖɔa zãnunana be enye “tamea” alo “ahawɔwɔname.”

Ame bubuwo de ba mo na gɔmesese si le anukwareɖiɖi ŋu be yewoatsɔ ado taflatsɛ ɖe nuwɔna maɖɔʋuwo ta. Tom, si wɔa dɔ le gasitsaƒe aɖe la gblɔ be: “Nukpɔsusu si le amewo si egbea le anukwareɖiɖi ŋue nye ale si woate ŋu akpɔ viɖe aɖe evɔ womadze se me o, ke menye be woato nyateƒea ŋutɔŋutɔ o.” David, si nye dɔnunɔla aɖe tsã la gblɔ be: “Togbɔ be anukwaremaɖimaɖi nuwɔna menyoa amewo ŋu o ne wova ʋu goe hã la, wobunɛ be naneke megblẽ le eŋu o ne womenya lé wò o ko. Wobua ame siwo ƒe nuwɔna medze gaglã o la be wobi eye ‘wodze aɖaŋu.’”

Ame geɖe gblɔna gɔ̃ hã be anukwaremaɖimaɖi hiã hafi woate ŋu akpɔ dzidzedze. Ame aɖe si bi ɖe asitsatsa me la gblɔ be: “Hoʋiʋli si le asitsanyawo me va zu ‘Ne màyi oa, agoo nam mayi’ ƒe nya.” Gake ɖe woƒe nya sia sɔa? Alo ɖe wòanye be ame siwo ʋlia anukwaremaɖimaɖi nuwɔnawo ta la tsɔ ‘tamebubu totrowo le wo ɖokuiwo fluma’? (Yakobo 1:22) De ŋugble le viɖe siwo le anukwareɖiɖi ŋu, siwo ŋu nya wogblɔ le nyati si kplɔe ɖo me la ŋu kpɔ.—g12-E 01.

[Nya si ɖe dzesi si le axa 5]

“Nukpɔsusu si le amewo si egbea le anukwareɖiɖi ŋue nye ale si woate ŋu akpɔ viɖe aɖe evɔ womadze se me o, ke menye be woato nyateƒea ŋutɔŋutɔ o”

[Nɔnɔmetata si le axa 5]

Ame geɖe gblɔna be ele be woablu afɔ na nanewo hafi ate ŋu akpɔ dzidzedze