Ta 33

Ʋɔnu Dɔdrɔ̃ Gbolo Ŋkɔgbegblẽxɔla La

Ŋutega 11—Nyaɖeɖefia 17:1-18

Nyati: Babilon Gã la do lã wɔadã dzẽ aɖe si trɔ ɖe eŋu mlɔeba eye wòtsrɔ̃e

Emevaɣi: Tso ƒe 1919 vaseɖe xaxa gã la me

 1. Nukae mawudɔla adreawo dometɔ ɖeka ɖe fia Yohanes?

ELE BE woakɔ Yehowa ƒe dziku dzɔdzɔe la ɖe anyi keŋkeŋ, si nye eƒe kplu adreawo katã! Esime mawudɔla adelia kɔ eƒe kplu la ɖe afisi blema Babilon nɔ la, enye kpɔɖeŋu si sɔ ɖe fuwɔame si wohe va Babilon Gã dzie esime nudzɔdzɔwo le du dzi yina Harmagedon-ʋa mlɔea me la dzi. (Nyaɖeɖefia 16:1, 12, 16) Edze ƒã be anye mawudɔla sia kee ɖe nusitae Yehowa he eƒe ʋɔnudɔdrɔ̃ dzɔdzɔeawo vɛ kple alesi wòhe wo vɛ la me. Nusi kplɔe ɖo si Yohanes kpɔ hese la wɔ nuku nɛ ŋutɔ: “Eye mawudɔla adre, siwo si kplu adreawo nɔ la, dometɔ ɖeka ƒo nu kplim gblɔ bena: Va afii, ne mafia gbolo gã, si bɔbɔ nɔ tsi geɖewo dzi la, ƒe ʋɔnudɔdrɔ̃ wò; amesia kple anyigba dzi fiawo wɔ ahasi, eye wòna anyigbadzinɔlawo mu eƒe ahasiwɔwɔ ƒe aha la.”—Nyaɖeɖefia 17:1, 2.

 2. Ðaseɖiɖi kae li be “gbolo gã” la (a) menye Roma o? (b) menye asi gã tsatsa o? (d) enye mawusubɔsubɔha?

² “Gbolo gã” la! Nukatae wotsɔ ŋkɔ nyɔŋu sia gbegbe nɛ? Eyae nye ameka? Ame aɖewo bu kpɔɖeŋugbolo sia be eyae nye blema Roma. Gake dunyaheŋusẽe Roma nye. Gbolo sia wɔ ahasi kple anyigbadzifiawo, eye edze ƒã be esia lɔ Roma-fiawo hã ɖe eme. Azɔ hã, le eƒe tsɔtsrɔ̃ vɔ megbe la, wogblɔ be ‘anyigbadzifiawo’ fa konyi ɖe alesi enu yii ta. Eyata mate ŋu anye dunyaheŋusẽ o. (Nyaɖeɖefia 18:9, 10) Hekpe ɖe eŋu la, esi anyigbadzisitsalawo hã fa konyi ɖe eta ta la, mate ŋu anye asi gã tsatsa o. (Nyaɖeɖefia 18:15, 16) Gake míexlẽe be ‘woble dukɔwo katã to eƒe gbɔgbɔyɔyɔ me.’ (Nyaɖeɖefia 18:23) Esia na eme kɔ ƒã be ele be gbolo gã la nanye xexeame katã ƒe subɔsubɔha.

 3. (a) Nukatae wòle be Babilon Gã la natsi tre ɖi na nusi yi ŋgɔ wu Roma Katoliko-ha la alo Kristodukɔa katã gɔ̃ hã? (b) Babilon ƒe nufiafia kawoe woate ŋu akpɔ le Ɣedzeƒe-subɔsubɔhawo ƒe akpa gãtɔ kple Kristodukɔa ƒe kɔmamãwo hã me? (d) Nuka dzie Roma Katoliko papatenɔla John Henry Newman lɔ̃ ɖo ku ɖe Kristodukɔa ƒe nufiafiawo, kɔnuwo kple nuwɔnawo dometɔ geɖe ƒe dzɔtsoƒe ŋu? (Kpɔ etenuŋɔŋlɔa.)

³ Subɔsubɔha kae? Eyae nye Roma Katoliko-ha la, abe alesi ame aɖewo tea tɔ ɖe edzie enea? Alo Kristodukɔa katã yea? Ao, ele be wòanye nane si lolo wu esiawo bene wòate ŋu able dukɔwo katã. Le nyateƒe me la, eyae nye alakpasubɔsubɔ ƒe xexemefiaɖuƒe bliboa. Alesi wòdzɔ tso Babilon ƒe nya ɣaɣlawo mee la dze le Babilon ƒe nufiafia kple nuwɔna geɖe siwo bɔ ɖe subɔsubɔhawo me le xexeame katã la me. Le kpɔɖeŋu me, dzixɔse siwo nye be luʋɔ makumaku le amegbetɔ me wotsɔ dzii, be woawɔ funyafunya ame le dzomavɔ me, kpakple be mawuɖekaetɔ̃e li la bɔ ɖe Ɣedzeƒe-subɔsubɔhawo ƒe akpa gãtɔ kple Kristodukɔa ƒe kɔmamãwo siaa me. Alakpasubɔsubɔha, si ƒe dzɔdzɔ de ƒe 4,000 kple edzivɔ tso blemadu si nye Babilon me la keke ta va ɖo egbegbe ƒe nɔnɔme nyadri si me wòle la eye woyɔe wòsɔ be Babilon Gã la.a Gake nukatae wotsɔ ŋkɔ nyɔŋu si nye “gbolo gã” la nɛ?

 4. (a) Mɔ kawo nue blema Israel wɔ ahasi le? (b) Mɔ ɖedzesi ka nue Babilon Gã la wɔ ahasi le?

⁴ Babilon (alo Babel, si gɔmee nye “Tɔtɔ”) ɖo eƒe gãnyenye ƒe kɔkɔƒe kekeake le Nebukadnezar ŋɔli. Enye subɔsubɔ- kple dunyahedukɔ si me gbedoxɔ kple trɔ̃xɔ sue akpe ɖeka kple edzivɔ nɔ. Eƒe nunɔlawo kpɔ ŋusẽ gã aɖe. Togbɔ be ɣeyiɣi didi aɖee nye sia si Babilon meganye xexemeŋusẽ o hã la, subɔsubɔha ƒe Babilon Gã la ya gali, eye abe alesi blematɔa nɔ ene la, egadina kokoko be yeakpɔ ŋusẽ ɖe dunyahenyawo dzi ahafia mɔ wo. Gake ɖe subɔsubɔha ƒe eɖokui ƒoƒo ɖe dunyahehe me dzea Mawu ŋua? Le Hebri Ŋɔŋlɔawo me la, wogblɔ be Israel wɔ gbolo esime wòƒo eɖokui ɖe alakpatadedeagu me kple esime wòbla nu kple dukɔwo le esi teƒe be wòaɖo ŋu ɖe Yehowa ŋu. (Yeremya 3:6, 8, 9; Xezekiel 16:28-30) Babilon Gã la hã wɔa ahasi. Eɖe dzesi vevie le alesi wòwɔ nusianu si wòkpɔ be ade ye dzi be yeaɖu anyigbadzifia siwo le dzi ɖum la dzi ahakpɔ ŋusẽ ɖe wo dzi la me.—Timoteo I, 4:1.

 5. (a) Bubudedeameŋu ka mee subɔsubɔhawo ƒe osɔfowo kpɔa gome le? (b) Nukatae nɔƒe gã didi le xexeame nye tsitre tsitsi ɖe Yesu Kristo ƒe nyawo ŋu tẽ?

⁵ Egbea subɔsubɔhakplɔlawo doa boblo zi geɖe tsɔna dia dziɖuɖunɔƒe kɔkɔ nɔnɔ, eye le anyigba aɖewo dzi la, wokpɔa gome le dziɖuɖu me eye wonɔa dziɖuɖukametiwo gɔ̃ hã dome. Le ƒe 1988 me la, Protestant-sɔfo eve siwo wonya nyuie la di be woada akɔ na yewo hena dukplɔlanɔƒe nɔnɔ le United States. Babilon Gã la ƒe ŋgɔnɔlawo lɔ̃a nɔƒe gã didi; woƒe fotowo dzena zi geɖe le dukɔa ƒe nyadzɔdzɔgbalẽwo me esime wodea ha kple dunyahela ŋkutawo. Le nusi to vovo na ema me la, Yesu tsri eɖokui ƒoƒo ɖe dunyahehe me eye wògblɔ tso eƒe nusrɔ̃lawo ŋu be: “Womenye xexeame ƒe akpa aɖeke o, abe alesi nye hã nyemenye xexeame ƒe akpa aɖeke o ene.”—Yohanes 6:15; 17:16, New World Translation; Mateo 4:8-10; kpɔ Yakobo 4:4 hã.

Míaƒe Ŋkekea me ƒe ‘Gbolowɔwɔ’

 6, 7. (a) Aleke Hitler ƒe Nazi-dunyahehabɔbɔa wɔ va zi dzi le Germania? (b) Aleke nu si Vatikan kple Nazi Germania bla la kpe ɖe Hitler ŋu be wòadi xexeame dzi ɖuɖu vevie?

⁶ To gbolo gã la ƒe eɖokui ƒoƒo ɖe dunyahehe me dzi la, ehe nuxaxa manyagblɔ va ameƒomea dzie. Le kpɔɖeŋu me, bu tame tso nusiwo wɔe be Hitler va zu dziɖula le Germania la ŋu kpɔ—esiawo nye nusiwo menya se o ale gbegbe be ame aɖewo adi be woatutu wo ɖa keŋkeŋ le ŋutinyagbalẽwo me. Le ƒe 1924 ƒe May me la, dziɖuɖunɔƒe 32 nɔ Nazi-dunyahehabɔbɔa si le Germania Dziɖuɖua me. Le ƒe 1928 ƒe May me la, woɖiɖi va zu nɔƒe 12. Gake Ganyawo ƒe Sesẽ Gã la va xɔ xexeame katã le ƒe 1930 me; Nazitɔwo wɔ mɔnukpɔkpɔ sia ŋudɔ tsɔ kpɔ ŋgɔyiyi ɖedzesii eye nɔƒe 230 su wo si le nɔƒe 680 siwo nɔ anyi le akɔ si woda le Germania le ƒe 1932 ƒe July me la me. Ɣeyiɣi kpui aɖe le ema megbe la, Franz von Papen, dudɔnunɔlagã tsãtɔ, amesi Papa ɖo Ame Ŋkutae la va na kpekpeɖeŋu Nazitɔwo. Le ŋutinyaŋlɔlawo ƒe nya nu la, von Papen ƒe susue nye be woaɖo Roma-fiaɖuƒe Kɔkɔe yeye aɖe anyi. Edo kpo nu le ɣeyiɣi kpui si me eya ŋutɔ nye dudɔnunɔlagã la, eyata azɔ exɔe se be yeato Nazitɔwo dzi akpɔ ŋusẽ. Kaka ƒe 1933 ƒe January naɖo la, eƒo amewo nu ƒu tso mɔ̃ɖaŋudɔwɔlawo ƒe tatɔwo dome be woanɔ megbe na Hitler, eye to ayemenuwɔwɔwo dzi la, ekpɔ egbɔ be Hitler zu Germania ƒe dudɔnunɔlagã le ƒe 1933 ƒe January 30 lia dzi. Woɖo eya ŋutɔ dudɔnunɔlagã ƒe kpeɖeŋutɔe eye Hitler zãe be wòna nuto siwo nye Katolikotɔwo tɔ le Germania la da megbe nɛ. Le Hitler ƒe zi dzi nɔnɔ ɣleti eve megbe la, egbã sewɔtakpekpea, etutu dunyahehabɔbɔ siwo tsi tre ɖe eŋu la ƒe ŋgɔnɔla akpe geɖe de fuwɔamegaxɔwo me, eye wòdze dɔ si nye Yudatɔwo tete ɖe anyi gɔme le gaglãgbe.

⁷ Vatikan ɖe eƒe ɖe tsɔtsɔ le Nazi-dunyahehabɔbɔa me fia le July 20, 1933 esime Papatenɔla Paselli (si zu Papa Pius XII emegbe) de asi nubabla aɖe si Vatikan la kple Nazi Germania wɔ te le Roma. Von Papen de asi agbalẽa te abe Hitler teƒenɔla ene, eye le afima la, Paselli tsɔ papa ƒe bubudeameŋu gã si nye Atitsoga Gã si Nye Pius ƒe Hatsotso Tɔ la na von Papen.b Tibor Koeves ŋlɔ tso esia ŋu ɖe eƒe agbalẽ si nye Satan in Top Hat me be: “Nubabla la nye aʋadziɖuɖu gã aɖe na Hitler. Ena megbenɔnɔ nɛ si tso dukɔ bubu me la ƒe gbãtɔ eyama, eye esia tso dzɔtsoƒe kɔkɔtɔ kekeake.” Nubabla la bia tso Vatikan si be wòagbugbɔ le Germania Katolikotɔwo ƒe Titina Dunyahehabɔbɔa yome esi ana wòade Hitler ƒe “dzizizidziɖuɖu” ƒe dunyahehabɔbɔ ɖeka la dzi.c Hekpe ɖe eŋu la, eƒe se 14 lia gblɔ be: “Ne dziɖula si Dziɖuɖua ɖo la kpɔ kakaɖedzi si ŋu ɖikeke aɖeke mele o be womado kplamatse dukɔa ƒe nukpɔsusuwo ku ɖe dunyahehe ŋu o ko hafi woaɖo bisiɔpgãwo kple bisiɔpwo kpakple amesiawo ƒomevi.” Le ƒe 1933 (si Papa Pius XI ɖe gbe ƒãe be enye “Ƒe Kɔkɔe”) ƒe nuwuwu la, Vatikan ƒe megbenɔnɔ nɛ va wɔ akpa vevi aɖe le Hitler ƒe ʋiʋli be yeazu xexeame katã dzi ɖula la me.

 8, 9. (a) Aleke Vatikan kpakple Katoliko-ha la kple woƒe nunɔlawo siaa wɔ nu ɖe Nazi ƒe ŋutasẽnuwɔwɔwo ŋue? (b) Nya kae Germania Katoliko bisiɔpwo gblɔ le Xexemeʋa II ƒe gɔmedzedze me? (d) Nukae ƒomedodo siwo le subɔsubɔha kple dunyahehe dome la he vɛ?

⁸ Togbɔ be nunɔla kple nyɔnusaɖagaxɔmenɔla ʋee aɖewo tsi tre ɖe Hitler ƒe ŋutasẽnuwɔnawo ŋu—eye wofia fu wo ɖe eta—hã la, Vatikan la kple Katoliko-ha la kpakple eƒe nunɔla gbogboawo nɔ megbe na Nazitɔwo, amesiwo wobu be woawoe nye glikpɔ sesẽ si axe mɔ na kɔmiunistɔwo ƒe xexeame katã dzi ɖuɖu la, ƒe ŋutasẽnuwɔnawo tẽ alo le ɖoɖoezizi me. Papa Pius XII si xɔ anyinɔ ɖe Vatikan bɔkɔɔ la na Yudatɔwo Tsɔtsrɔ̃ kple Yehowa Ðasefowo kpakple ame bubuwo yome titi anyrãtɔe la yi edzi wònɔ ekpɔm numakemakee. Ewɔ mo yaa be esime Papa John Paul II va Germania le May 1987 me la, ekafu alesi nunɔla anukwaretɔ aɖe tsi tre ɖe Nazitɔwo ŋue la. Nukae Germania-nunɔla akpe geɖe bubuawo nɔ wɔwɔm le Hitler ƒe ŋɔdzidziɖuɣia? Lɛta aɖe si Germania Katoliko bisiɔpwo ŋlɔ le September 1939 me esime Xexemeʋa II dze egɔme la na nusia me kɔ na mí. Eƒe akpa aɖe xlẽ be: “Le nyametsogaƒoƒo sia me la, míele nu xlɔ̃m míaƒe Katoliko-srafowo be woawɔ woƒe dɔdasi le toɖoɖo Kplɔla la me eye woanɔ klalo be woatsɔ woƒe ametia katã asa vɔe. Míele koko ƒom na Hameviwo be woawɔ ɖeka kpli mí le gbedodoɖa vevie me be Mawu ƒe Mɔfiafia nakplɔ mí ayi dziɖuɖu si me yayra le gbɔe le aʋa sia me.”

⁹ Katolikotɔwo ƒe nudede dunya me ma nye gbolowɔwɔ si tɔgbe me subɔsubɔha ƒo eɖokui ɖo le ƒe siwo wu 4,000 siwo va yi me le ahiã didi Dunyahedziɖuɖua me be ŋusẽnɔƒe kple kesinɔnuwo nasu ye si la ƒe kpɔɖeŋu. Subɔsubɔha kple dunyahehe ƒe kadodo mawo he aʋawɔwɔwo, yometitiwo, kple amegbetɔ ƒe fukpekpe si keke ta vɛ. Aleke gbegbee nye si ameƒomea ate ŋu akpɔ dzidzɔe be Yehowa ƒe ʋɔnu dɔdrɔ̃ gbolo gã la tu aƒe. Tsɔtsɔe nenɔ eƒe tsɔtsrɔ̃a ŋu!

Tsi Geɖe dzi Nɔnɔ

10. Nukae nye ‘tsi geɖe’ siwo ŋu Babilon Gã la ɖoa ŋu ɖo hena takpɔkpɔ, eye nukae le dzɔdzɔm ɖe wo dzi?

¹⁰ Blema Babilon la nɔ tsi geɖe dzi—woawoe nye Frat-tɔsisia kple eƒe tsimɔ gbogboawo. Wonye takpɔkpɔ kpakple asitsamɔnu si he kesinɔnu vɛ nɛ ƒe dzɔtsoƒe, vaseɖe esime womie le zã ɖeka me. (Yeremya 50:38; 51:9, 12, 13) Babilon gã la hã ɖoa ŋu ɖe “tsi geɖewo” ŋu be woakpɔ ye ta eye woana yeazu kesinɔtɔ. Kpɔɖeŋutsi siawoe nye “dukɔwo kple amehawo kple xexemedukɔwo kpakple gbegbɔgblɔwo,” esi nye ame miliɔn akpe geɖe siwo dzi wòɖu eye wonɔ megbe nɛ le ga gome la. Gake tsi siawo hã le miemiem, alo wole tɔtrɔm le eyome.—Nyaɖeɖefia 17:15; tsɔe sɔ kple Psalmo 18:5; Yesaya 8:7.

11. (a) Aleke blema Babilon ‘na anyigba blibo la mu ahae’? (b) Aleke Babilon Gã la ‘na anyigbadzinɔlawo katã mu ahae’?

¹¹ Wogayi edzi ɖɔ blema Babilon la be enye “sikakplu . . . le Yehowa si me, si na anyigba blibo la mu aha.” (Yeremya 51:7) Blema Babilon na dukɔ siwo ƒo xlãe la no Yehowa ƒe dziku ƒe ɖeɖefiawo esime wòɖu wo dzi le aʋa me, eye wòna wogbɔdzɔ abe amesiwo mu aha ene. Le ema gome la, enye dɔwɔnu si le Yehowa ƒe asi me. Babilon Gã la hã ɖu aʋa dzi vaseɖe esime wòzu xexeame katã ƒe fiaɖuƒe. Gake kakaɖedzitɔe la, menye Mawu ƒe dɔwɔnue wònye o. Ke boŋ ‘anyigbadzifia’ siwo woa kpli wo wɔa mawusubɔsubɔ ƒe ahasi la ƒe nudidiwo dzie wòwɔ. Edo dzidzɔ na fia siawo to eƒe aʋatsonufiafiawo kpakple nuwɔna siwo wɔa ame kluvie la zazã dzi be wòna ameha siwo nye “anyigbadzinɔlawo” gbɔdzɔ abe amesiwo mu aha ene, eye wòna wosubɔ woƒe dziɖulawo numakemakee.

12. (a) Aleke Babilon Gã la ƒe akpa si le Japan la he ʋukɔkɔɖi gbogbo aɖe vɛ le Xexemeʋa II mee? (b) Aleke “tsi” siwo dzi Babilon Gã bɔbɔ nɔ la miee le Japan, eye nukae nye emetsonu?

¹² Esia ƒe kpɔɖeŋu ɖedzesi aɖe dze le Japan, afisi Shinto-subɔsubɔha xɔ aƒe ɖo. Japan-srafo si wotsɔ nufiafia ma mlãe la bunɛ bubu gãtɔ kekeakee be yeatsɔ yeƒe agbe ake ɖe fia la—si nye Shinto-subɔsubɔha ƒe mawu gãtɔ la ta. Le Xexemeʋa II me la, Japan-srafo siwo ade 1,500,000 ku le aʋagbedzi; le wo dometɔ ɖesiaɖe kloe gome la, wobui be enye gbɔɖiɖi be yewoana ta. Gake esi wosi Japan ta la, ezu dzizizi na Fia Hirohito be wòagbe nu le nya si wògblɔ be mawue yenye la gbɔ. Esia na be Babilon Gã la ƒe “tsi” siwo le akpa ma, si dzi Shinto-subɔsubɔha nɔ la ƒe akpa gã aɖe mie—aã, le esi Shinto-subɔsubɔha na wokɔ ʋu gbogbo aɖe ɖe anyi le Pasifik-ʋagbedzi vɔ hafi! Alesi Shinto ƒe ŋusẽkpɔɖeamedzi gbɔdzɔe alea la ʋu mɔ le ƒe ʋee siwo va yi me be Japantɔ siwo wu 150,000, siwo dometɔ akpa gãtɔ nye Shintotɔwo kple Buddhatɔwo tsã la be woazu Dziɖulagã Aƒetɔ Yehowa subɔla adzɔgbeɖela xɔnyɔnyrɔ̃wo.

Gbolo la Le Lã aɖe Dom

13. Nu wɔnuku kae Yohanes kpɔ esime mawudɔla la kplɔe yi gbedzi le gbɔgbɔ la ƒe ŋusẽ me?

¹³ Nukae nyagblɔɖia gaɖe fia ku ɖe gbolo gã la kple nusi adzɔ ɖe edzi la ŋu? Abe alesi Yohanes gblɔe azɔ ene la, nukpɔkpɔ aɖe si me kɔ ƒã la dze: “Eye [mawudɔla la kplɔm] yi gbedzi le gbɔgbɔ me, eye mekpɔ nyɔnu aɖe bɔbɔ nɔ lã dzẽ aɖe, si ta adre kple dzo ewo li na, eye busuŋkɔwo le eŋuti fũ la dzi.”—Nyaɖeɖefia 17:3.

14. Nukatae wòsɔ be wokplɔ Yohanes yi gbedzi?

¹⁴ Nukatae wokplɔ Yohanes yi gbedzie? Wogblɔ le blema Babilon ƒe tsɔtsrɔ̃ ŋuti nyagblɔɖi aɖe ŋu be enye ‘atsiaƒutagba si le gbedzi.’ (Yesaya 21:1, 9) Esia nye nuxlɔ̃me si sɔ be, togbɔ be tsi geɖe nye akpoxɔnu na blema Babilon hã la, ava zu aƒedo si me nu gbagbewo manɔ o. Eyata enye nusi sɔ be woakplɔ Yohanes ayi gbedzie le ŋutega la me be wòakpɔ nusi adzɔ ɖe Babilon Gã la dzi. Eya hã azu aƒedo kokoko si ŋu viɖe aɖeke manɔ o. (Nyaɖeɖefia 18:19, 22, 23) Gake nusi Yohanes kpɔ le afima la wɔ mo yaa nɛ ŋutɔ. Menye gbolo gã la ɖeɖekoe le afima o! Enɔ lã wɔadã dziŋɔ aɖe dzi!

15. Vovototo kawoe le lã wɔadã si le Nyaɖeɖefia 13:1 kple esi le Nyaɖeɖefia 17:3 me la dome?

¹⁵ Ta adre kple dzo ewo le lã sia si. Ekema lã wɔadã si Yohanes kpɔ do ŋgɔ si si ta adre kple dzo ewo le la keea? (Nyaɖeɖefia 13:1) Ao, vovototo le wo dome. Lã wɔadã sia le dzĩe eye, abe nusi to vovo na lã wɔadã si wòkpɔ gbã ene la, womegblɔ be fiakukuwo le eta o. Ke boŋ le esi teƒe be busuŋkɔwo nanɔ eƒe ta adreawo ɖeɖeko ŋu la, “busuŋkɔwo le eŋuti fũ.” Gake la, ele be ƒomedodo aɖe nanɔ lã wɔadã sia kple esi wokpɔ do ŋgɔ la dome; woɖi wo nɔewo akpa be woagblɔ be nudogoɖenunue wònye.

16. Nukae nye lã wɔadã dzẽ la, eye nukae wogblɔ ku ɖe nusi eƒe taɖodzinu nye la ŋu?

¹⁶ Ekema nukae nye lã wɔadã dzẽ yeye sia? Ele be wòanye lã wɔadã la ƒe legba si Anglo-Amerika ƒe lã wɔadã si to dzo eve abe alẽvi ene ƒe agbagbadzedzewo na wowɔ la. Esi wòwɔ legba la vɔ la, woɖe mɔ na lã wɔadã ma si to dzo eve la be wòatsɔ gbɔgbɔ na lã wɔadã la ƒe legba la. (Nyaɖeɖefia 13:14, 15) Yohanes kpɔ legba si me agbe le eye wòle gbɔgbɔm la azɔ. Enye kpɔɖeŋu na Dukɔwo ƒe Nubabla ƒe habɔbɔ si lã wɔadã si to dzo eve la gbɔ agbee le ƒe 1920 me. United States Dukplɔla Wilson susui be Nubabla la “anye nyamedzroƒe hena ʋɔnu dzɔdzɔe dɔdrɔ̃ na amewo katã eye aɖe aʋawɔwɔ ƒe ŋɔdzi ɖa tegbee.” Esime wogafɔe ɖe tsitre le xexemeʋa evelia megbe wònye Dukɔ Ƒoƒuawo la, taɖodzinu si wòŋlɔ ɖe eƒe ɖoɖowo mee nye be “wòakpɔ dukɔwo dome ŋutifafa kple dedienɔnɔ ta.”

17. (a) Mɔ ka nue busuŋkɔwo le kpɔɖeŋulã wɔadã dzẽ la ŋu fũ le? (b) Amekae le lã wɔadã dzẽ la dom? (d) Aleke Babilon-subɔsubɔha tra eɖokui ɖe Dukɔwo ƒe Nubabla kple eteƒexɔla ŋue tso gɔmedzedzea me ke?

¹⁷ Mɔ ka nue busuŋkɔwo le kpɔɖeŋulã wɔadã sia ŋu fũ? Eyae nye be amewo ɖo dukɔwo ƒe ƒuƒoƒo ƒe legba sia be enye nusi axɔ ɖe Mawu ƒe Fiaɖuƒea teƒe—be wòawɔ nusi Mawu gblɔ be yeƒe Fiaɖuƒea koe ate ŋu awɔe la. (Daniel 2:44; Mateo 12:18, 21) Gake nusi ɖe dzesi le Yohanes ƒe ŋutega la ŋue nye be Babilon Gã la le lã wɔadã dzẽa dom. Eye abe alesi nyagblɔɖia gblɔe ene la, Babilon-subɔsubɔha, vevietɔ esiwo le Kristodukɔa me la, tra wo ɖokui ɖe Dukɔwo ƒe Nubabla kple habɔbɔ si va xɔ ɖe eteƒe la ŋu. Le ƒe 1918 ƒe December 18 lia dzi ke la, ƒuƒoƒo si woyɔna fifia be Dukɔa ƒe Kristo Sɔlemeha Siwo Le Amerika ƒe Aɖaŋuɖotakpekpe la xɔ nyagbɔgblɔ si ƒe akpa aɖee nye sia be: “Menye dunyahehe ƒe dɔwɔnu dzro aɖe koe Nubabla ma nye o; ke Mawu ƒe Fiaɖuƒe la ɖeɖefia le dunyahemɔ nu le anyigba dzi boŋ ye wònye. . . . Sɔlemeha la ate ŋu atsɔ lɔlɔ̃nunyuigbɔgbɔ, si eya manɔmee la, Dukɔwo ƒe Nubabla aɖeke mate ŋu anɔ anyi adidi o la axɔe. . . . Nyanyuia mee Dukɔwo ƒe Nubabla la ƒo ke ɖe to ɖo. Abe Nyanyuia ene la, eƒe taɖodzinue nye be ‘ŋutifafa nanɔ anyigba dzi, lɔlɔ̃nu nyui nava na amewo.’”

18. Aleke Kristodukɔa ƒe osɔfowo ɖee fia be yewole megbe na Dukɔwo ƒe Nubabla lae?

¹⁸ Le January 2, 1919 me la, tanya si nye “Papa Ƒo Koko be Woaxɔ Wilson ƒe Dukɔwo ƒe Nubabla La” dze le San Francisco Chronicle nyadzɔdzɔgbalẽa ƒe axa gbãtɔ. Le October 16, 1919 dzi la, wotsɔ kokoƒoƒo aɖe si te subɔsubɔha gãwo ƒe osɔfo 14,450 de asii la vɛ na United States ƒe Sewɔtakpekpe Gãtɔ eye wòle dzi dem ƒo na habɔbɔ ma be “[woada asi ɖe] Paris ŋutifafa ƒe nubabla la si me woɖoe le be woaɖo dukɔwo ƒe nubabla anyi le la dzi.” Togbɔ be United States ƒe Sewɔtakpekpe Gãtɔ do kpo asidada ɖe ŋutifafa ƒe nubabla la dzi hã la, Kristodukɔa ƒe osɔfowo yi edzi nɔ boblo dom na Nubabla la. Eye aleke woʋu Nubabla la nue? Nyatakaka aɖe si woɖo ɖa tso Switzerland si nye November 15, 1920 tɔ xlẽ be: “Wotsɔ sɔlemegawo katã ƒoƒo ɖe gbe ƒã Dukɔwo ƒe Nubabla la ƒe takpekpe gbãtɔ nu ʋuʋui le egbe ŋdi ga wuiɖekɛ me le Geneva.”

19. Esi lã wɔadã dzẽ la dze zi gbãtɔ la, afɔ kae Yohanes habɔbɔ la ɖe?

¹⁹ Ðe Yohanes habɔbɔ la, si nye ƒuƒoƒo ɖeka kolia si le anyigba la dzi si tsɔ dzidzɔ xɔ Mesia Fiaɖuƒe si woɖo anyi yeyee la, kpɔ gome kple Kristodukɔa le bubudede lã wɔadã dzẽa ŋu mea? Kurakura o! Le Kwasiɖagbe, September 7, 1919 me la, le Yehowa ƒe amewo ƒe takpekpe si wowɔ le Cedar Point, Ohio me la, woƒo dutoƒonuƒo si nye “Amegbetɔƒomea si Le Xaxa Me la ƒe Mɔkpɔkpɔ.” Esi ŋu ke la, Sandusky ƒe Star-Journal ka nya ta be le nu ƒoƒo na amesiwo de 7,000 kloe me la, Gbetakpɔxɔ Habɔbɔa ƒe zimenɔla J. F. Rutherford “ka ɖe edzi be Aƒetɔ la ƒe ŋudzedzemakpɔmakpɔ ava Nubabla la dzi godoo . . . elabena osɔfo—Katolikotɔwo kple Protestantɔwo tɔ siaa—siwo gblɔna be Mawu teƒenɔlawoe yewonye la, gblẽ eƒe tameɖoɖo ɖi eye woda asi ɖe Dukɔwo ƒe Nubabla la dzi hele ekafum be enye Kristo ƒe fiaɖuƒe la ɖeɖefia le dunyahemɔ nu le anyigba dzi.”

20. Nukatae wònye busunu be osɔfowo nado ɣli be Dukɔwo ƒe Nubabla nye “Mawu ƒe Fiaɖuƒe la ɖeɖefia le dunyahemɔ nu le anyigba dzi”?

²⁰ Ele be Dukɔwo ƒe Nubabla ƒe anyidzedze wɔnublanuia nana osɔfowo nanya be habɔbɔ mawo siwo nye ame tɔ wɔwɔewo menye Mawu ƒe Fiaɖuƒe si le anyigba dzi la ƒe akpa aɖeke o hafi. Busunyagbɔgblɔ kae nye si wònye be woagblɔ nya ma! Esia na wòdze abe ɖe Mawu kpɔ gome le tɔtɔ nyamaa gã si me Nubabla la va le me ene. Le Mawu ya gome la, “eƒe nuwɔwɔ de blibo.” Yehowa ƒe Dziƒofiaɖuƒe si le Kristo si me dzie wòato ahe ŋutifafa vɛ eye woawɔ eƒe lɔlɔ̃nu le anyigba dzi sigbe alesi wowɔnɛ le dziƒo ene—ke menye to dunyahela siwo le dzre me tikaa, siwo dometɔ aɖewo nye mawudzimaxɔselawo dzi o.—Mose V, 32:4; Mateo 6:10.

21. Nukae ɖee fia be gbolo gã la le megbe na Dukɔwo ƒe Nubabla la teƒexɔla si nye Dukɔ Ƒoƒuawo eye eƒe nu nyoa eŋu?

²¹ Dukɔ Ƒoƒuawo si va xɔ ɖe Nubabla la teƒe ya ɖe? Tso habɔbɔ sia ɖoɖo teti dzi ko la, gbolo gã la lia edzi eye edze gaglã be ewɔ ɖeka kplii eye wòdina be yeafia mɔ nusi adzɔ ɖe edzi. Le kpɔɖeŋu me, le eɖoɖo anyi ƒe ƒe 20 lia ɖuɖu le June 1965 me la, Roma Katoliko-ha la kple Ɣedzeƒe Orthodoks Sɔlemeha la, kple Protestantɔwo, Hindutɔwo, Buddhatɔwo, kpakple Moslemtɔwo ƒe teƒenɔlawo—siwo wogblɔ be wole anyigbadzinɔla miliɔn akpe eve teƒe la—kpe ta ɖe San Fransisko be woaɖu woƒe megbenɔnɔ na Dukɔ Ƒoƒuawo kple alesi eƒe nu nyoa wo ŋui la ƒe azã. Esi Papa Paul VI ɖi tsa yi ɖasrã Dukɔ Ƒoƒuawo kpɔ le ƒe 1965 ƒe October me la, eyɔe be enye “habɔbɔ ma si ƒo dukɔwo dome habɔbɔwo katã ta” eye wògblɔ kpee be: “Anyigbadzidukɔwo trɔna ɖe Dukɔ Ƒoƒuawo ŋu be eyae nye ɖekawɔwɔ kple ŋutifafa ƒe mɔkpɔkpɔ mamletɔ.” Papa bubu si nye Papa John Paul II gblɔ na Dukɔ Ƒoƒuawo le October 1979 me be: “Mele mɔ kpɔm be Dukɔ Ƒoƒuawo akpɔtɔ anye ŋutifafa kple ʋɔnu dzɔdzɔe dɔdrɔ̃ ƒe takpekpe gãtɔ kekeake tegbee.” Enye nusi ɖe dzesi be papa la meyɔ Yesu Kristo alo Mawu ƒe Fiaɖuƒea ŋkɔ le eƒe nuƒoa me o. Le eƒe tsaɖiɖi yi United States le September 1987 me la, The New York Times ka nya ta be: “John Paul ƒo nu didi aɖe tso wɔƒe vevi si le Dukɔ Ƒoƒuawo si le . . . ‘xexeame katã ƒe ɖekawɔwɔ yeye’ ɖoɖo anyi me ŋu.”

Ŋkɔ aɖe, Nya Ɣaɣla Aɖe

22. (a) Lã ka ƒomevie gbolo gã la tia be yeado? (b) Aleke Yohanes ƒo nu tso kpɔɖeŋugbolo si nye Babilon Gã la ŋue?

²² Eteƒe madidi hafi apostolo Yohanes asee be lã dziŋɔe gbolo gã la tia be yeado o. Gake gbã la, etrɔ eƒe susu ɖe Babilon Gã la ŋutɔ ŋu. Ewɔ leke na eɖokui abe kesinɔtɔ ene, gake ao, aleke gbegbee nye si wònyɔ ŋui! “Eye nyɔnu la do aɖabɛwu kple awu dzĩ, eye wòwɔ leke kple sika kple kpe xɔasi kple adzagbawo, eye sikakplu, si me yɔ fũ kple ŋunyɔnuwo kple eƒe ahasiwɔwɔ ƒe makɔmakɔnyenye la, le esi. Eye woŋlɔ ŋkɔ, si nye nya ɣaɣla la, ɖe eƒe ŋgonu bena: Babilon gã la, gbolowo kple anyigba dzi ŋunyɔnuwo ƒe dada. Eye mekpɔ nyɔnu la mu ame kɔkɔewo ƒe ʋu kple Yesu ƒe ɖaseɖilawo ƒe ʋu.”—Nyaɖeɖefia 17:4-6a.

23. Nukae nye Babilon Gã la ƒe ŋkɔ blibo la, eye nukae wòfia?

²³ Abe alesi wowɔna le blema Roma ene la, wotsɔ ŋkɔ si le gbolo sia ƒe ŋgonu la de dzesii.d Enye ŋkɔ didi aɖe si nye: “Babilon gã la, gbolowo kple anyigba dzi ŋunyɔnuwo ƒe dada.” Ŋkɔ ma nye “nya ɣaɣla,” nane si gɔme sese dzi wotsyɔ nui. Gake le Mawu ƒe ɣeyiɣi si sɔ dzi la, woaɖe nya ɣaɣla la gɔme. Le nyateƒe me la, mawudɔla la gblɔ nyatakaka geɖe be Yehowa-subɔla siwo li egbea nadze si nusi ŋkɔ sia si wotsɔ ɖɔe la fia gɔme bliboe. Míekpɔ Babilon Gã la dze sii be enye alakpasubɔsubɔhawo katã. Enye “gbolowo . . . ƒe dada” elabena alakpasubɔsubɔha siwo katã le xexeame, siwo dome Kristodukɔa ƒe kɔmamã gbogboawo hã le la, le abe vianyɔnuwo ene eye wosrɔ̃nɛ le gbɔgbɔmegbolowɔwɔ me. Enye “ŋunyɔnuwo” ƒe dada hã le gɔmesese sia nu be eyae dzi vi nyɔŋu siwo nye trɔ̃subɔsubɔ, gbɔgbɔyɔyɔ, etsɔmegbɔgblɔɖi, ɣletivimefakaka, asiʋlomefakaka, amegbetɔwo tsɔtsɔ sa vɔe, gbedoxɔmegbolowɔwɔ, ahamumu be woatsɔ ade bubu alakpamawuwo ŋui, kple ŋunyɔnu bubuwo.

24. Nukatae wòsɔ be wokpɔ Babilon Gã la be edo “aɖabɛwu kple awu dzĩ” eye “wòwɔ leke kple sika kple kpe xɔasi kple adzagbawo”?

²⁴ Babilon Gã la do “aɖabɛwu kple awu dzĩ,” siwo nye amadede siwo wozãna tsɔ dea dzesi fianyenyee la, eye “wòwɔ leke kple sika kple kpe xɔasi kple adzagbawo.” Aleke gbegbee nye si esia sɔe! Wò ya lé ŋku ɖe xɔ dzeaniwo, kpememe kple nɔnɔmetata siwo tɔgbe mebɔ o, nɔnɔmetata siwo wodea ta agu na siwo ƒe home mele gbɔgblɔ me o, kpakple subɔsubɔha ƒe nuzazã bubuwo, kpakple nunɔamesi kple ga home siwo ŋu xexlẽme mele o siwo gbegbe xexe sia me ƒe subɔsubɔhawo li kɔe ɖi la ŋu kpɔ ko. Eɖanye le Vatikan o, le dziɖuƒe siwo television dzi mawunyagblɔla siwo le United States tu me o, alo le Ɣedzeƒetɔwo ƒe gbedoxɔ siwo woɖo atsyɔ̃ na etɔxɛ me o, Babilon Gã la li kɔ kesinɔnu gbogbo aɖe ɖi—eye ebú wo nenema ke hã ɣeaɖewoɣi.

25. (a) Nukae nusi le “sikakplu, si me yɔ fũ kple ŋunyɔnuwo” me la tsi tre ɖi na? (b) Gɔmesese ka nue kpɔɖeŋugbolo la mu aha le?

²⁵ Azɔ kpɔ nusi le gboloa si me ɖa. Nusi Yohanes kpɔ—“sikakplu, si me yɔ fũ kple ŋunyɔnuwo kple eƒe ahasiwɔwɔ ƒe makɔmakɔnyenye” la—ana gbɔgbɔtsixe natsi eƒo! Esiae nye kplu si me “eƒe ahasiwɔwɔ ƒe dɔmedzoe ƒe aha” si wòna dukɔwo katã mu la le. (Nyaɖeɖefia 14:8; 17:2) Edze ani le gota, gake nusi le eme nyɔ ŋu henye nu makɔmakɔ. (Tsɔe sɔ kple Mateo 23:25, 26.) Nuwɔna ƒoɖi kple aʋatso siwo katã gbolo gã la tsɔ ble dukɔwo nui eye wòna wova le eƒe ŋusẽkpɔɖeamedzi te la le eme. Esi ganyɔ ŋu wue nye be Yohanes kpɔe be gboloa ŋutɔ hã nye ahanoxe eye wòmu Mawu ƒe subɔlawo ƒe ʋu. Le nyateƒe me la, míexlẽ tso eŋu emegbe be: “wokpɔ nyagblɔɖilawo kple ame kɔkɔewo kpakple amesiwo katã wowu le anyigba dzi la, ƒe ʋu le eme.” (Nyaɖeɖefia 18:24) Ʋufɔɖiɖi gã ka gbegbee nye si!

26. Ðaseɖiɖi kae li si ɖee fia be Babilon Gã la ɖi ʋufɔ?

²⁶ Le ƒe alafa geɖewo me la, xexeame ƒe alakpasubɔsubɔha ƒe fiaɖuƒea kɔ ʋu si mele gbɔgblɔ me o ɖi. Le kpɔɖeŋu me, le Titinaɣeyiɣiwo me le Japan la, wotrɔ Kyoto-gbedoxɔwo wozu mɔ̃ sesẽwo, eye osɔfo saɖagaxɔmenɔla siwo nye aʋawɔlawo do gbe ɖa le “Buddha ƒe ŋkɔ kɔkɔe la” me hewɔ aʋa kple wo nɔewo vaseɖe esime ʋu nɔ sisim le ablɔwo dzi hẽ. Le ƒe alafa 20 lia sia me la, Kristodukɔa ƒe osɔfowo yi aʋagbedzi kple woƒe dukɔwo ƒe asrafowo, eye amesiawo wu wo nɔewo, eye ne mede ɖeke o hã la, ame miliɔn alafa ɖeka ya teti bu woƒe agbe. Le October 1987 me la, United States dukplɔla xoxotɔ Nixon gblɔ be: “Ƒe alafa 20 lia mee ʋukɔkɔɖi do agbogbo le wu le ŋutinya katã me. Wowu ame geɖe le ƒe alafa sia me wu le aʋa siwo katã wowɔ hafi ƒe alafa sia dze egɔme la me.” Mawu drɔ̃ fɔbuʋɔnu xexeame ƒe subɔsubɔhawo le woƒe gome kpɔkpɔ le nusiawo gbegbe me ta; Yehowa lé fu “asi, siwo kɔa ʋu maɖifɔ ɖi.” (Lododowo 6:16, 17) Do ŋgɔ la, Yohanes se ɣli aɖe tso vɔsamlekpui la gbɔ be: “Aƒetɔ [Fiagã] kɔkɔetɔ kple nyateƒetɔ, ŋkeke nenie nye si mèdrɔ̃ ʋɔnu, eye mèbia hlɔ̃ ɖe míaƒe ʋu ta le amesiwo le anyigba dzi la si o mahã?” (Nyaɖeɖefia 6:10) Nya aku ɖe Babilon Gã la, gbolowo kple anyigba dzi ŋunyɔnuwo dada la, ŋu vevie ne ɣeyiɣia de be wòaɖo nya ma ŋu.

[Etenuŋɔŋlɔwo]

Le esi teƒe be wòakɔ trɔ̃subɔsubɔ sia ŋu la, ‘Yehowa Ŋusẽkatãtɔ la’ xlɔ̃ nu Kristotɔwo be: “Mido go le wo dome, eye miɖe mia ɖokui ɖa, . . . eye migaka asi nu makɔmakɔ la ŋuti o.”—Korintotɔwo II, 6:14-18.

[Aɖaka si le axa 237]

Churchill Klo Nu le ‘Gbolowɔwɔ’ Dzi

Le Winston Churchill ƒe agbalẽ si nye The Gathering Storm (ƒe 1948) me la, eka nya ta be Hitler tia Franz von Papen be wòanye Germania ƒe dɔnunɔla le Vienna hena “nu gbegblẽ le amesiwo xɔ ŋkɔ le Austria ƒe dunyahehe me la ŋu le aye me alo ahe wo ava yeƒe akpa dzie.” Churchill gblɔ be U.S. dudɔnunɔla si le Vienna gblɔ tso von Papen ŋu be: “Le amemabumabu kple vodada didi le ame ŋu gãtɔ kekeake me la, . . . Papen gblɔ nam be . . . yeɖo be yeazã yeƒe ŋkɔxɔxɔ abe Katolikotɔ nyui ene atsɔ akpɔ ŋusẽ ɖe Austriatɔwo abe Papatenɔla Innitzer ene dzi.”

Esi Austria na ta vɔ eye Hitler ƒe aʋakɔ gbogboawo va ƒo ɖe Vienna bibibi megbe la, Katolikotɔwo ƒe papatenɔla Innitzer de se be Austria-sɔlemehawo katã natsi Nazi-titsoga gɔdɔ̃ ƒe aflaga la, woaƒo sɔlemegawo, eye woado gbe ɖa ɖe Adolf Hitler ta atsɔ ade bubu eƒe dzigbezã ŋue.

[Aɖaka si le axa 238]

Woɖe nyatia ɖa le nyadzɔdzɔgbalẽa ƒe tata siwo do emegbe la me. December 7, 1941 ye nye gbesigbe Japan si wɔ ɖeka kple Nazi Germania la dze U.S., Amerika ƒe ƒudziʋawɔlawo dzi le Pearl Harbor.

Le tanya sia te la, nyati si gbɔna la dze le The New York Times, December 7, 1941 tɔ ƒe tata gbãtɔ me:

‘AƲAWƆWƆ ƑE GBEDODOÐA’ ÐE FIAÐUƑEA TA

Katoliko Bisiɔp Siwo Kpe Ta le Fulda Bia Yayra Kple Aʋadziɖuɖu . . .

Germania Katoliko Bisiɔpwo ƒe Aɖaŋuɖotakpekpe si kpe ta ɖe Fulda la kafui be woaɖo ‘aʋawɔwɔ ƒe gbedodoɖa’ tɔxɛ aɖe ɖi si woaxlẽ le sɔlemewɔwɔ ɖesiaɖe ƒe gɔmedzedze kple nuwuwu.

Gbedodoɖa la le Mawu Mɔfiala biam be wòatsɔ aʋadziɖuɖu ayra Germania-ʋawɔnuwoe eye wòakpɔ asrafowo katã ƒe agbe kple lãmesẽ ta.

Bisiɔpawo gagblɔ kpee na Katoliko-nunɔlawo be woaɖo Kwasiɖagbe mawunyagbɔgblɔ tɔxɛ aɖe ɖi zi ɖeka teti le ɣleti ɖesiaɖe me atsɔ aɖo ŋku Germania-srafo siwo le ‘aʋagbedzi, atsiaƒu dzi kple esiwo le yame’ la dzi.

[Aɖaka si le axa 244]

“Busuŋkɔwo”

Esime lã wɔadã si to dzo eve la do Dukɔwo ƒe Nubabla la ɖoɖo anyi ɖa le Xexemeʋa I megbe la, subɔsubɔha geɖe siwo nye eƒe ahiãviwo la di enumake be yewoakɔ afɔɖeɖe sia ŋu le mawusubɔsubɔmɔ nu. Le esia ta la, “busuŋkɔwo” va yɔ ŋutifafahabɔbɔ yeyea ŋu fũ.

“Kristotɔnyenye ate ŋu ana lɔlɔ̃nu nyui, si nye ŋusẽ si le megbe na [dukɔwo ƒe] nubabla la, eye to esia dzi la, ate ŋu atrɔ nubabla la be manye agbalẽ kakɛ ko o ke boŋ be wòazu Mawu ƒe fiaɖuƒea ƒe dɔwɔnu.”—The Christian Century, U.S.A., June 19, 1919, axa 15.

“Dukɔwo ƒe Nubabla la ɖoɖo anyi nye Mawu ƒe Fiaɖuƒea ƒe tameɖoɖo be ɖoɖo kple lɔlɔ̃nu nyui nanɔ xexeame la keke ɖe enu be wòayi dukɔwo dome ƒomedodowo me. . . Eyae nye nusi Kristotɔwo katã biana ne wole gbe dom ɖa be, ‘Wò Fiaɖuƒe neva.’”—The Christian Century, U.S.A., September 25, 1919, axa 7.

“Siminti si wotsɔ bla Dukɔwo ƒe Nubabla lae nye Kristo ƒe Ʋu.”—Ðk. Frank Crane, Protestant-sɔfo, U.S.A.

“[Dukɔa ƒe Kongregasin Sɔlemehawo ƒe] Aɖaŋuɖotakpekpe la le megbe na [Dukɔwo ƒe Nubabla ƒe] Nuɖoɖo la be eya koe nye dunyahedɔwɔnu si li fifia si dzi Yesu Kristo ƒe Gbɔgbɔ la ato be wòakeke ta wu le alesi woatsɔe ade dɔwɔwɔ me ŋutɔŋutɔ le dukɔwo ƒe nyawo me la me.”—The Congregationalist and Advance, U.S.A., November 6, 1919, axa 642.

“Aɖaŋuɖotakpekpea le Methodistɔwo katã kpem be woanɔ megbe na [Dukɔwo ƒe Nubabla] ƒe taɖodzinuwo eye woadoe ɖe ŋgɔ vevie abe alesi Mawu Fofo la kple Mawu ƒe vi siwo le anyigba dzi la gblɔe ene.”—Wesley Methodist-ha, Britania.

“Ne míebu tame tso nubabla sia ƒe didi veviwo, nusiwo wòate ŋu awɔ kple eƒe tameɖoɖo kplikpawo ŋu la, míakpɔe be nusi nye Yesu Kristo ƒe nufiafia ŋutɔŋutɔ la dze le eme: esi nye Mawu ƒe Fiaɖuƒea kple eƒe dzɔdzɔenyenye . . . Menye nu bubu aɖeke tsɔ wu ema o.”—Kanterbury ƒe Bisiɔpgã ƒe mawunya si wògblɔ le Dukɔwo ƒe Nubabla ƒe Takpekpe nu ʋuʋu me le Geneva, December 3, 1922.

“Gomekpɔkpɔ kɔkɔe si le mawunyadɔgbedeawo ƒe amenuvehabɔbɔ ɖesiaɖe si la kee le Dukɔwo ƒe Nubabla Habɔbɔa si le dukɔ sia me, elabena fifia la, eyae nye Kristo, Ŋutifafafia si le dukɔwo dome la ƒe dɔwɔnu si ŋu ŋusẽ le wu.”—Ðk. Garvie, Kongregasin-sɔfo, Britania.

[Anyigbatata si le axa 236]

(Edze nyuie le agbalẽa ŋutɔ me)

Aʋatsonufiafia siwo dzi woxɔ se le xexeame katã la dzɔ tso Babilon

Babilon

Mawuɖekaetɔ̃wo alo mawu etɔ̃ ƒokpliwo

Amegbetɔ ƒe luʋɔ yia edzi nɔa agbe le ku megbe

Gbɔgbɔyɔyɔ—nuƒoƒo kple “ame kukuwo”

Legbawo zazã le tadedeagu me

Gbesawo zazã be woatsɔ afa akɔ na gbɔgbɔ vɔ̃woe

Nunɔla sẽŋuwo ƒe dziɖuɖu

[Nɔnɔmetata si le axa 239]

Blema Babilon nɔ tsi geɖewo dzi

[Nɔnɔmetata si le axa 239]

Gbolo gã la hã bɔbɔ nɔ “tsi geɖewo” dzi egbea

[Nɔnɔmetata si le axa 241]

Babilon Gã la bɔbɔ nɔ lã dziŋɔ aɖe dzi

[Nɔnɔmetata siwo le axa 242]

Subɔsubɔha ƒe gbolo la wɔ ahasi kple anyigbadzifiawo

[Nɔnɔmetata siwo le axa 245]

Nyɔnu la “mu ame kɔkɔewo ƒe ʋu”