Ta 6
Nukatae Mi̇́etsina Kua Amegã Hekuna?
1. Nuka mee dzɔdzɔmeŋutinunyalawo mete ŋu ɖe le amegbetɔ ƒe agbe ŋu o?
DZƆDZƆMEŊUTINUNYALAWO menya nusita ame tsina kua amegã hekuna o. Ewɔ abe ɖe wòle be míaƒe ŋutilãmenugbagbeviwo nanɔ wo ɖokui ɖɔ lim ɖaa ale be míanɔ agbe tegbee ene. Agbalẽ si nye Hyojun Soshikigaku (Nugbagbeŋutinusuesuewo Ŋutinunya ƒe Dzidzenu) gblɔ be: “Nya dovivitiɖeame ŋutɔe alesi ame ƒe ŋutilãmenugbagbeviwo ƒe tsitsi do ƒome kple ku la nye.” Dzɔdzɔmeŋutinunyala geɖe xɔe se be “esɔ ɖe dzɔdzɔme nu eye wòle amegbetɔ me hã” be seƒe nanɔe na eƒe agbe. Èsusu be nyateƒee wotoa?
2. Nukae ame aɖewo wɔ le esi ame mesẽa kuna o ta?
2 Enye amegbetɔwo ƒe didi vevie tso blema ke be yewoanɔ agbe didi eye wote kpɔ be makumakunyenye gɔ̃ hã nasu yewo si. Tso ƒe alafa enelia D.M.Ŋ. me ke la, Chinatɔ dziɖuɖumegãwo di be woawɔ atike siwo ŋu wotrɔ asi le be ana womagaku akpɔ o la na yewo. China-fiagã aɖewo siwo va ɖe wo yome la no atike siwo dzi woda ŋkɔ ɖo be agbemavɔtike—si wotsɔ mercury wɔe—eye woku! Le xexeame godoo la, amewo bunɛ be ku menye yewoƒe anyinɔnɔ ƒe seƒe o. Agbenɔnɔ le ku megbe ƒe mɔkpɔkpɔ dodzidzɔnamewo le Buddhatɔwo, Hindutɔwo, Moslemtɔwo, kple ame bubuwo si. Le Kristodukɔa me la, ame geɖe xɔe se be yewoava nɔ agbe le dzidzɔ me le dziƒo le ku megbe.
3. (a) Nukatae agbe mavɔ dzroa amegbetɔ vevie? (b) Nyabiabia siwo ku ɖe ku ŋu kawo ŋue wòhiã be míaɖo?
3 Nusi dzidzɔkpɔkpɔ le ku megbe ƒe dzixɔse siawo fiae nye be enye amewo ƒe didi vevie be yewoanɔ agbe tegbee. Biblia gblɔ le mavɔmavɔnyenye ƒe susu si Mawu de mía me ŋu be: “[Ede] mavɔmavɔ dzi me na wo.” (Nyagblɔla 3:11) Ewɔ ame gbãtɔwo eye wòna mɔnukpɔkpɔ wo be woate ŋu anɔ agbe mavɔ le anyigba dzi. (Mose I, 2:16, 17) Ke nukatae amewo kuna? Aleke ku wɔ va ge ɖe xexeame? Mawu ŋuti sidzedze kɔ biabia siawo me.—Psalmo 119:105.
NUGBEÐOÐO VƆ̃ÐI AÐE
4. Aleke Yesu ɖe hlɔ̃dola si he ku vɛ na amegbetɔ la fiae?
4 Hlɔ̃dola dzea agbagba be yeaɣla nusiwo aɖo kpe yeƒe hlɔ̃nuwɔwɔ dzi. Alea ke hlɔ̃nuwɔla aɖe si ƒe nuwɔna he ku vɛ na ame biliɔn geɖe la hã wɔ. Eto ayemɔwo dzi be yeana womase nusita ame kuna la me o. Yesu Kristo ɖe hlɔ̃nuwɔla sia ɖe go esime Wògblɔ na amesiwo di be yewoawui be: “Miawo la mietso fofo, si nye Abosam la me, eye mia fofo ƒe nudzodzrowo miedina be, miawɔ. Eya la amewula wònye tso gɔmedzedzea me, eye mele tsitre ɖe nyateƒe la me o, elabena nyateƒe mele eyama me o.”—Yohanes 8:31, 40, 44.
5. (a) Afikae amesi va zu Satana Abosam la dzɔ tso? (b) Nya “Satana” kple “Abosam” gɔme ɖe?
5 Nyateƒee, “amewula” sẽŋuta aɖee Abosam nye. Biblia ɖee fia be ame ŋutɔŋutɔe wònye, menye susu vɔ̃ɖi aɖe ko si anɔ ame ƒe dzi mee wònye o. (Mateo 4:1-11) Togbɔ be wowɔe wònye mawudɔla dzɔdzɔe hã la, ‘meli ɖe nyateƒe la me o.’ Aleke gbegbe wòsɔe nye si be woyɔe be Satana Abosam! (Nyaɖeɖefia 12:9) Woyɔe be “Satana,” alo “tsitretsiɖeŋula,” elabena etsi tre ɖe Yehowa ŋu vevie hedze aglã ɖe eŋu. Wogayɔa hlɔ̃dola sia be “Abosam,” si gɔmee nye “ameŋugblẽla,” elabena eka aʋatso ɖe Mawu si busutɔe.
6. Nukatae Satana dze aglã ɖe Mawu ŋu?
6 Nukae na Satana dze aglã ɖe Mawu ŋu? Ŋukeklẽe. Ŋukeklẽ na tadedeagu si amewo tsɔna na Yehowa biã ŋu nɛ. Abosam meɖe didi be yeaxɔ tadedeagu ma si Wɔla la ɖeɖeko dze na la le susu me o. (Tsɔe sɔ kple Xezekiel 28:12-19.) Ke boŋ mawudɔla si va zu Satana la tu ŋukeklẽ ƒe nudzodzro sia ɖo vaseɖe esime wòtsi ɖe eme va dzi nuvɔ̃.—Yakobo 1:14, 15.
7. (a) Nukae naa ame kuna? (b) Nukae nye nuvɔ̃?
7 Míeva nya agɔdzela si ƒe hlɔ̃nue kplɔ amewo de ku me. Gake nuka gɔ̃e he amegbetɔ ƒe ku vɛ? Biblia gblɔe be: “Ku ƒe ti enye nuvɔ̃.” (Korintotɔwo I, 15:56) Eye nukae nye nuvɔ̃? Be míase nya sia gɔme la, mina míade ŋugble tso gɔmesese si le eŋu le gbe gbãtɔ siwo me woŋlɔ Biblia ɖo la me ŋu. Hebri kple Hela gbe me dɔwɔnya siwo gɔme woɖe be “wɔ nuvɔ̃” la fia be “woada ƒu” le gɔmesese sia nu be woada dzeside aɖe ƒu alo womate ŋu aɖo taɖodzinu aɖe gbɔ o. Taɖodzinu ka gbɔe mí katã míedo kpo ɖoɖo? Toɖoɖo Mawu bliboe ƒe taɖodzinu gbɔe. Gake aleke nuvɔ̃ wɔ va xexeame?
ALESI WOÐO NUGBE LAE
8. Aleke Satana dze agbagba be yeana amewo nasubɔ yee?
8 Satana tsɔ ayedzedze gã aɖe ɖo nugbe aɖe si wòsusu be ana yeava nɔ amegbetɔwo katã dzi ɖum eye yeaxɔ woƒe tadedeagu lae. Eɖoe be yeable atsu kple asi gbãtɔ, Adam kple Xawa, ne woawɔ nuvɔ̃ ɖe Mawu ŋu. Yehowa na sidzedze si akplɔ mía dzila gbãtɔwo ayi agbe mavɔ mee la wo. Wonya be yewo Wɔla la ƒe dɔme nyo elabena eda wo ɖe Eden-bɔ dzeani aɖe me. Adam koŋ ye kpɔ eƒe Dziƒofofo la ƒe dɔmenyonyo wu esime Mawu wɔ srɔ̃nyɔnu kpeɖeŋutɔ dzetugbe nyui aɖe nɛ. (Mose I, 1:26, 29; 2:7-9, 18-23) Ne ame eve gbãtɔ siawo anɔ agbe ayi edzii la, anɔ te ɖe woƒe toɖoɖo Mawu dzi.
9. Se kae Mawu de na ame gbãtɔ eye nukatae menye se sesẽ o?
9 Mawu de se na Adam be: “Ðu abɔmetiawo katã ƒe tsetse faa; ke ati, si na wodzea si nyui kple vɔ̃ la, megaɖu eya ƒe tsetse aɖeke o; gbesigbe naɖu eƒe ɖe, ku ke naku.” (Mose I, 2:16, 17) Esi Yehowa Mawue nye Wɔla la ta la, ekpɔ mɔ aɖo agbenɔnɔ ƒe dzidzenuwo na wo eye wòagblɔ nusi nye nyui kple vɔ̃ na eƒe nuwɔwɔwo. Se si wòde na wo la mesesẽ o elabena eɖe mɔ na Adam kple Xawa be woaɖu abɔmeti bubuawo katã ƒe tsetse faa. Woate ŋu aɖe woƒe ŋudzedzekpɔkpɔ ɖe Yehowa ƒe fianyenye si dze ŋu afia to wɔwɔ ɖe se si wòde na wo dzi me ke menye be woawo ŋutɔ natsɔ dada aɖo woƒe agbenɔnɔ ƒe dzidzenuwoe o.
10. (a) Mɔ ka dzie Satana to be yeana amewo nava nɔ yeƒe akpa dzi? (b) Nukae Satana di be woabu le Yehowa ŋu? (d) Nukae nye wò susu le nya siwo Satana gblɔ ɖe Mawu ŋu la ŋuti?
10 Abosam ɖo nugbe be yeate ame gbãtɔwo ɖa tso Mawu gbɔ. Satana ka aʋatso be yeatsɔ able wo ne woade ye dzi. Abosam zã da aɖe abe alesi ayetɔ aɖe awɔ abe nu maƒonu aɖe si le egbɔe le nu ƒom ene tsɔ bia Xawa be: “Vavãe Mawu gblɔ bena, migaɖu abɔmetiawo katã ƒe tsetse oa?” Esi Xawa gblɔ Mawu ƒe sededea la, Satana gblɔ be: “Miele kuku ge akpɔ o.” Eyi edzi gblɔ nya si fia be susu nyui aɖeke mele Yehowa si ɖe wo ŋu o esi wògblɔ be: “Mawu nyae bena, gbesigbe ke miaɖu eƒe ɖe la, miaƒe ŋkuwo laʋu, eye mianɔ abe Mawu ene, anya nyui kple vɔ̃.” (Mose I, 3:1-5) Abosam gblɔ nya sia tsɔ le fiafiam be Mawu le nu nyui aɖe tem wo. Ameŋugblẽnya vɔ̃ɖi kae nye si wògblɔ ɖe Dziƒofofo lɔlɔ̃ Yehowa, amesi nye nyateƒetɔ la ŋu!
11. Aleke Adam kple Xawa va wɔ ɖeka kple Satana le eƒe nuvɔ̃wɔwɔa me?
11 Xawa gbugbɔ galé ŋku ɖe atia ŋu, eye eƒe tsetsewo va nɔ edzrom vevie. Eyata egbe eƒe tsetsea ɖu. Emegbe srɔ̃aŋutsua lɔ̃ faa wɔ ɖeka kplii le tomaɖomaɖo Mawu ƒe nuvɔ̃ sia me. (Mose I, 3:6) Togbɔ be ɖe woble Xawa hã la, wo kple Adam siaa wode nugbe si Satana ɖo be yeaɖu amegbetɔƒomea dzi la dzi. Esia na wova zu amesiwo wɔ ɖeka kplii le eƒe nuvɔ̃a me.—Romatɔwo 6:16; Timoteo I, 2:14.
12. Nukae do tso amegbetɔ ƒe aglãdzedze ɖe Mawu ŋu me?
12 Ele be Adam kple Xawa nadze ŋgɔ woƒe nuwɔnawo metsonuwo. Womeva le abe Mawu ene eye sidzedze tɔxɛ su wo si o. Ŋukpe boŋ ye va lé wo eye wobe. Yehowa bia gbe Adam eye wòtso afia sia nɛ: “Fifia ate wò, hafi nakpɔ abolo aɖu, vaseɖe esime nagatrɔ azu anyi, elabena eya mee woɖe wò tsoe. Anyi nènye, eye anyi ke nagatrɔ azu!” (Mose I, 3:19) “Gbesigbe” mía dzila gbãtɔwo ɖu sidzedze nyui kple vɔ̃ ƒe atia la, Mawu tso afia na wo eye woku le eƒe nukpɔsusu nu. Wonyã wo le Paradisoa me ɣemaɣi eye wodze kuku gɔme vivivii.
ALESI NUVƆ̃ KPLE KU WƆ KAKA
13. Aleke nuvɔ̃ wɔ kaka ɖe amegbetɔƒomea katã me?
13 Adze abe ɖe Satana ƒe nugbeɖoɖo be amegbetɔwo nade ta agu na ye la dze edzi ene. Gake mate ŋu alé esubɔlawo ƒe agbe ɖe te o. Esi nuvɔ̃ dze dɔwɔwɔ gɔme ɖe atsu kple asi gbãtɔawo dzi la, womegate ŋu na blibodede si nɔ wo si tsã la wo viwo o. Nuvɔ̃ ɖo mía dzila gbãtɔwo ƒe agbedomenyiŋusẽ ale gbegbe abe alesi woatsɔ ga aŋlɔ nu ɖe kpe dzi wòado ɖe eme ene. Eyata vi madeblibowo koe woate ŋu adzi. Esi wònye Adam kple Xawa ƒe nuvɔ̃medzedze vɔ megbe hafi wodzi wo viwo katã ta la, ɖevi siawo nyi nuvɔ̃ kple ku ƒe dome.—Psalmo 51:7; Romatɔwo 5:12.
14. (a) Amekae míate ŋu atsɔ amesiwo gbena be nuvɔ̃ meli o asɔ kple? (b) Aleke wona Israel-viwo nya be nuvɔ̃ le yewo ŋu?
14 Gake egbea ame geɖe mebua wo ɖokui nuvɔ̃wɔlawoe o. Le xexeame ƒe akpa aɖewo la, ame akpa gãtɔ menya naneke tso nuvɔ̃ si ƒe dome míenyi ŋu o. Gake ema menye kpeɖodzi be nuvɔ̃ meli o. Ðevi si ƒe ŋkume ƒo ɖi ate ŋu agblɔ be yele dzadzɛ, eye ne ekpɔ ahuhɔ̃e me ko hafi wòalɔ̃ ɖe edzi. Blema Israel-viwo ɖi ɖevi ma esime woxɔ Mawu ƒe Se la to Eƒe nyagblɔɖila Mose dzi. Sea na eme kɔ na wo kɔte be nuvɔ̃ li. Apostolo Paulo ɖe eme be: “Nyemedze si nuvɔ̃ la o, negbe to sea me ko.” (Romatɔwo 7:7-12) Abe ɖevi si le ahuhɔ̃e me kpɔm ene la, esi Israel-viwo tsɔ Se la kpɔ wo ɖokuii la, wote ŋu kpɔe be yewomele dzadzɛ le Yehowa ŋkume o.
15. Ne míekpɔ ahuhɔ̃e si nye Mawu ƒe Nya la me la, nukae dzena na mí?
15 Ne míekpɔ Mawu ƒe Nya la ƒe ahuhɔ̃e me eye míede dzesi eƒe dzidzenuwo la, míate ŋu akpɔe be míede blibo o. (Yakobo 1:23-25) Le kpɔɖeŋu me, bu nusi Yesu Kristo gblɔ na eƒe nusrɔ̃lawo le Mawu kple wo havi lɔlɔ̃ ŋu, abe alesi woŋlɔe ɖe Mateo 22:37-40 ene ŋu kpɔ. Aleke gbegbe amewo daa dzesi la ƒui enuenu le nusiawo me enye si! Ame geɖe ƒe dzitsinya meɖea fu na wo vie hã ne womete ŋu lɔ̃ Mawu alo wo haviwo o.—Luka 10:29-37.
KPƆ NYUIE LE SATANA ƑE AYEMƆWO ŊU!
16. Nukae míate ŋu awɔ be Satana ƒe ayemɔwo nagaɖe mí o, eye nukatae nusia wɔwɔ mele bɔbɔe o?
16 Satana dina be yeana míabua awɔ nuvɔ̃. (Yohanes I, 3:8) Ðe mɔ aɖe li si dzi míato be eƒe ayemɔwo magaɖe mí oa? Ẽ, ɖe li, gake abia be míawɔ aʋa kple dzodzro si anɔ mía me be míaɖoe koŋ awɔ nuvɔ̃ la. Esia wɔwɔ mele bɔbɔe o elabena le dzɔdzɔme nu la, didi be míawɔ nuvɔ̃ nu sẽ ɖe mía me ŋutɔ. (Efesotɔwo 2:3) Avu kple kɔe wònye na Paulo. Nukatae? Nuvɔ̃ si le eme tae. Ne míedi be míaƒe nu nadze Mawu ŋu la, ke ele be míawo hã míawɔ aʋa kple nuvɔ̃ ƒe nudzodzro siwo le mía me.—Romatɔwo 7:14-24; Korintotɔwo II, 5:10.
17. Nukae na be aʋa si míele wɔwɔm kple nuvɔ̃ ƒe nɔnɔmewo gasesẽ ɖe edzi wu?
17 Esi wònye be Satana nɔa mɔnu dim le mía ŋu ɖaa be yeable mí míada Mawu ƒe sewo dzi ta la, menye aʋa vie míeho ɖe nuvɔ̃ ŋu o. (Petro I, 5:8) Paulo gblɔ tso alesi wòtsi dzi ɖe nɔvia Kristotɔwo nu ŋu be: “Mele vɔvɔ̃m bena, ame aɖe menya nu o, alesi da la tsɔ eƒe aɖaŋu vɔ̃ ble Xawa la, nenema ke woagblẽ miaƒe tamesusuwo tso dzimekɔkɔ, si miekɔ na Kristo la me mahĩ?” (Korintotɔwo II, 11:3) Ayemɔ mawo ke tɔgbee Satana zãna egbea. Edzea agbagba be yeaƒã ɖikeke le Yehowa ƒe nyuiwɔwɔ kple viɖe siwo tsoa Mawu ƒe sewo dziwɔwɔ me ŋu ɖe mía me. Abosam dzea agbagba be yeazã nuvɔ̃ si ƒe dome míenyi ƒe nɔnɔme siwo le mía me be yeana dada, ŋukeklẽ, fuléle, kple nazãbubu naɖo mía me.
18. Aleke Satana zãa xexeame tsɔ dea nuvɔ̃wɔwɔ dzii?
18 Dɔwɔnu siwo Abosam zãna ɖe mía ŋu dometɔ ɖekae nye xexeame, si dzi wòkpɔ ŋusẽ ɖo. (Yohanes I, 5:19) Ne míenya wɔwɔ o la, nugbegblẽwɔla kple anukwaremaɖila siwo le xexe si ƒo xlã mí me la aƒoe ɖe mía nu be míawɔ nuvɔ̃ si anye dada le Mawu ƒe agbenɔnɔ ƒe dzidzenuwo dzi. (Petro I, 4:3-5) Ame geɖe metsɔa ɖeke le Mawu ƒe sewo me o eye dzitsinya ƒe nyagbenamewo gɔ̃ hã mewɔa naneke na wo o, eye ne wole edzi ʋuu la, woƒe dzitsinya va kua atri. (Romatɔwo 2:14, 15; Timoteo I, 4:1, 2) Ʋeʋeʋe la, ame aɖewo va wɔa nusiwo woƒe dzitsinya madeblibo la meɖea mɔ na wo tsã be woawɔ o gɔ̃ hã.—Romatɔwo 1:24-32; Efesotɔwo 4:17-19.
19. Nukatae agbe dzadzɛ nɔnɔ ɖeɖe mesɔ gbɔ o?
19 Agbedzadzɛnɔnɔ nye agbagbadzedze blibo le xexe sia me. Gake ne míedi be míaƒe nu nadze mía Wɔla ŋu la, wodi nu geɖe wu ema tso mía si. Ele be míaxɔ Mawu dzi ase eye míase le mía ɖokui me be agba le mía dzi le egbɔ. (Hebritɔwo 11:6) Nusrɔ̃la Yakobo ŋlɔ be: “Amesi ke nya nu nyui wɔwɔ, eye mewɔnɛ o la, enye nuvɔ̃ nɛ.” (Yakobo 4:17) Ẽ, ɖekematsɔmatsɔ le Mawu kple eƒe sewo me ŋutɔ hã nye nuvɔ̃ ƒomevi aɖe le eɖokui si.
20. Aleke Satana adze agbagba be yeaxe mɔ na wò be màgawɔ nu nyui o, gake nukae akpe ɖe ŋuwò be nàtsi tre ɖe nyaƒoɖeamenu siawo ŋu?
20 Satana adi kokoko be yeana woatsi tre ɖe agbagba si dzem nèle be sidzedze Mawu nasu asiwò to wò Biblia sɔsrɔ̃ me la ŋu. Enye míaƒe mɔkpɔkpɔ vevie be màna nyaƒoɖeamenu mawo nana nàɖe asi le nyuiwɔwɔ ŋu o. (Yohanes 16:2) Togbɔ be dziɖula geɖe xɔ Yesu dzi se le eƒe subɔsubɔdɔa wɔwɔ me hã la, womeʋu eme le gaglãgbe o le vɔvɔ̃ be woava ɖe yewo le ha me ta. (Yohanes 12:42, 43) Satana tsɔa tagbɔsesẽ dzea agbagba be yeado vɔvɔ̃ na amesiame si di be sidzedze Mawu nasu ye si. Gake ele be nàɖo ŋku nu wɔnuku siwo Yehowa wɔ la dzi ɣesiaɣi eye nàkpɔ ŋudzedze ɖe wo ŋu. Kura gɔ̃ hã la, ɖewohĩ àte ŋu akpe ɖe tsitretsiɖeŋulawo ŋu be woawo hã nava kpɔ ŋudzedze ɖe nusiawo ŋu nenema ke.
21. Aleke míawɔ aɖu xexeame kple nuvɔ̃ ƒe nɔnɔme siwo le mía ŋutɔwo me la dzi?
21 Zi alesi míede blibo o la, nuvɔ̃ anɔ mía ŋu. (Yohanes I, 1:8) Gake kpekpeɖeŋu li na mí le aʋa sia wɔwɔ me. Ẽ, míate ŋu aɖu dzi le aʋa si wɔm míele kple vɔ̃ɖitɔ Satana Abosam la me. (Romatɔwo 5:21) Le Yesu ƒe anyigba dzi subɔsubɔdɔa ƒe nuwuwu la, egblɔ nya sia tsɔ de dzi ƒo na eyomedzelawo be: “Le xexea me la miekpɔ xaxa; gake miaƒe dzi nedze eme; nye la meɖu xexeame dzi.” (Yohanes 16:33) Amegbetɔ madeblibowo gɔ̃ hã ate ŋu aɖu xexeame dzi le Mawu ƒe kpekpeɖeŋu me. Satana mekpɔ ŋusẽ ɖe amesiwo tsia tre ɖe eyama ŋu eye ‘wobɔbɔa wo ɖokui ɖe Mawu te’ la dzi o. (Yakobo 4:7; Yohanes I, 5:18) Abe alesi míava kpɔe ene la, Mawu wɔ ɖoɖo aɖe si ana míavo tso nuvɔ̃ kple ku ƒe kluvinyenye me.
DO WÒ SIDZEDZE KPƆ
Amekae nye Satana Abosam?
Nukatae amegbetɔ tsina hekuna?
Nukae nye nuvɔ̃?
Aleke Satana hea amewo wobua wɔa nuvɔ̃ ɖe Mawu ŋu?
[Nɔnɔmetata si xɔ axa 54]