Ta Enelia
Legba Gã Aɖe ƒe Dodo Kple Eƒe Mumu
1. Nukata wòle be míatsɔ ɖe le nɔnɔme si do mo ɖa esime Fia Nebukadnezar kplɔ Daniel kple ame bubuwo yi aboyo me ƒe ewo megbe la me?
ƑE EWO va yi tso esime Fia Nebukadnezar kplɔ Daniel kple ‘Yuda-nyigba dzi bubumewo’ yi aboyo me le Babilon. (Fiawo II, 24:15) Ðekakpui Daniel nɔ subɔsubɔm le fia ƒe dziɖuɖumegãwo dome esime nɔnɔme aɖe do mo ɖa si de amewo ƒe agbe afɔku me. Nukata wòle be míatsɔ ɖe le nya sia me? Elabena menye ɖeko alesi Yehowa Mawu de asi nyaa mee la kpɔ Daniel kple ame bubuwo ƒe agbe ta ko o ke egaɖe alesi xexemefiaɖuƒe siwo ŋu Biblia ƒe nyagblɔɖi ƒo nu tsoe ava ɖe wo nɔewo yomee va ɖo míaƒe ɣeyiɣia me hã fia mí.
FIAGÃ AÐE DZE ŊGƆ KUXI SESẼ AÐE
2. Ɣekaɣie Nebukadnezar ku drɔ̃e gbãtɔ si nye nyagblɔɖi?
2 Nyagblɔɖila Daniel ŋlɔ bena: “Le Nebukadnezar ƒe fiaɖuɖu ƒe ƒe evelia me la Nebukadnezar ku drɔ̃e, eye wòdzo haha, ale be alɔ̃ bu ɖee.” (Daniel 2:1) Babilon Fiaɖuƒea ƒe fia, Nebukadnezar, ye ku drɔ̃e la. Eva zu xexemedziɖula bliboe le ƒe 607 D.M.Ŋ. me esime Yehowa Mawu ɖe mɔ nɛ wòtsrɔ̃ Yerusalem kple eƒe gbedoxɔa. Le Nebukadnezar si nye xexemedziɖula ƒe dziɖuɖu ƒe ƒe evelia (ƒe 606/605 D.M.Ŋ.) me la, Mawu na wòku drɔ̃e dziŋɔ aɖe.
3. Amekawoe mete ŋu ɖe fia ƒe drɔ̃ea gɔme o, eye aleke Nebukadnezar wɔ nui?
3 Drɔ̃e sia tɔtɔ Nebukadnezar ale gbegbe be alɔ̃ bu ɖee. Abe alesi wòanɔ ene la, etsi dzi be yeanya nusi wòfia. Gake fia sẽŋu ma ŋlɔ drɔ̃ea be. Eyata ena woyɔ Babilon akunyawɔlawo, gbesalawo, kple dzotɔwo vɛ eye wòbia tso wo si be woalĩ drɔ̃e la ahaɖe egɔme na ye. Womete ŋui o. Woƒe kpododonu na Nebukadnezar do dɔmedzoe ale gbegbe be wòde se be “woawu Babel-nunyalawo katã.” Sedede sia ana nyagblɔɖila Daniel kple ametsrɔ̃la si wòtia nado go ŋkume kple ŋkume. Nukatae? Elabena wobua eya kple eƒe zɔhɛ Hebri-vi etɔ̃awo—Xananya, Misael, kple Azarya—ɖe Babilon-nunyalawo dome.—Daniel 2:2-14.
DANIEL VA XƆ NA WO
4. (a) Aleke Daniel wɔ te ŋu nya Nebukadnezar ƒe drɔ̃ea kple egɔmeɖeɖe? (b) Nya kae Daniel gblɔ tsɔ da akpe na Yehowa Mawui?
4 Esi Daniel se nusita Nebukadnezar de se sesẽ sia la, “[eyi] fia la gbɔ ɖaɖe kuku nɛ be, wòana azã ye, ne yeaɖe drɔ̃e la gɔme na fia la.” Elɔ̃ ɖe edzi nɛ. Daniel yi aƒeme eye eya kple exɔlɔ̃ Hebri-vi etɔ̃awo wodo gbe ɖa bia “amenuveve le dziƒo ƒe Mawu la si le nya ɣaɣla sia ta.” Yehowa ɖe nya ɣaɣla si le drɔ̃ea me fia Daniel le ŋutega me le zã ma ke me. Daniel da akpe be: “Woakafu Mawu ƒe ŋkɔ tso mavɔ me yi ɖe mavɔ me, elabena etɔe nye nunya kple ŋusẽ. Eyae ɖɔa li ɣeyiɣiwo kple azãgbewo, eɖea fiawo le zi dzi, eye wòɖoa fiawo zi dzi, enaa nunya nunyalawo kple sidzedze nugɔmeselawo; eɖea nusi me goglo, kple nu ɣaɣla fiana, enya nusi le viviti me, elabena kekeli le egbɔ.” Daniel kafu Yehowa ɖe nunya sia ta.—Daniel 2:15-23.
5. (a) Esime Daniel nɔ fia ƒe ŋkume la, aleke wòtsɔ kafukafu na Yehowae? (b) Nukata míetsɔ ɖe le Daniel ƒe numeɖeɖea me egbea?
5 Esi ŋu ke la, Daniel yi Aryox si nye fiaŋusrafowo ƒe amegã, amesi wode dɔ asi na be wòatsrɔ̃ Babilon-nunyalawo la gbɔ. Esi Aryox se be Daniel ate ŋu aɖe drɔ̃ea gɔme la, ekplɔe yi fia gbɔ enumake. Esi Daniel medi be yeakafu ye ɖokui o ta la, egblɔ na Nebukadnezar be: “Mawu aɖe le dzi me, amesi ɖea nya ɣaɣlawo ɖe go, eye eyae ɖe nusi gbɔna dzɔdzɔ ge gbaɖegbe la fia fia Nebukadnezar.” Menye Babilon Fiaɖuƒea ƒe etsɔme koe Daniel su te be yeaɖe afia o ke agblɔ nusiwo adzɔ le xexeame tso Nebukadnezar ƒe ŋkekea me vaseɖe míaƒe ɣeyiɣia me kple emegbe hã.—Daniel 2:24-30.
DRƆ̃E LA—WOÐO ŊKU EDZI
6, 7. Drɔ̃e kae Daniel lĩ na fia la?
6 Nebukadnezar ke to nyuie esi Daniel gblɔ be: “Wò fia, èɖo ŋku anyi, eye nèkpɔ legba gã aɖe; legba la lolo, eye eƒe dzodada teƒe mekɔ o, ele tsitrenu ɖe ŋkuwò me, eye eƒe nɔnɔme dzi ŋɔ. Legba sia ƒe ta nye sika nyuitɔ, eƒe akɔta kple eƒe abɔwo nye klosalo, eye eƒe ƒodo kple ali nye akɔbli; eƒe atawo nye gayibɔ, eƒe afɔwo ƒe akpa aɖewo nye gayibɔ, eye akpa aɖewo nye tsu. Eye esi nèle ekpɔm la, kpe aɖe, si menye ame ƒe asie dae o la, ge va dze legba la ƒe afɔ, si nye gayibɔ kple tsu la dzi, eye wògbãe gudugudu. Ale gayibɔ kple tsu, akɔbli, klosalo kple sika wogbã gudugudu, eye wozu abe tsro le lugbɔƒe le dzomeŋɔli ene, ya kplɔ wo dzoe, eye womegakpɔ wo teƒe o; ke kpe, si dze legbaa dzi la, zu to gã aɖe hexɔ anyigba blibo la dzi.”—Daniel 2:31-35.
7 Aleke gbegbe wòadzɔ dzi na Nebukadnezar enye si esi wòse Daniel nɔ drɔ̃ea lĩm! Gake lala vie! Ne Daniel te ŋu ɖe drɔ̃ea gɔme ko hafi woaɖe asi le Babilon-nunyalawo ŋu. Daniel ƒo nu ɖe eya ŋutɔ kple exɔlɔ̃ Hebri-vi etɔ̃awo nu be: “Drɔ̃e la nye esia. Azɔ míaɖe egɔme na fia la.”—Daniel 2:36.
FIAÐUƑE SI ÐE DZESI ETƆXƐE
8. (a) Amekae alo nukae Daniel ɖe eme be ta si nye sika la nye? (b) Ɣekaɣie woɖo ta si nye sika la anyi?
8 “Wò fia, si nye fiawo ƒe fia, amesi dziƒo ƒe Mawu la tsɔ fiaɖuɖu, ŋusẽ, kamesesẽ kple bubu na, wò amesi wòtsɔ nu gbagbewo katã, amegbetɔwo, gbemelãwo kple dziƒoxewo de asi na, eye wòtsɔ wò ɖo aƒetɔ ɖe wo katã nu la, wòe nye sika ta la.” (Daniel 2:37, 38) Nya sia ku ɖe Nebukadnezar ŋu esi Yehowa zãe wòtsrɔ̃ Yerusalem le ƒe 607 D.M.Ŋ. megbe. Ele alea elabena Dawid si nye fia si Yehowa si ami na la ƒe ƒomea mee fia siwo woɖo zi dzi le Yerusalem la tso. Yuda-fiadue Yerusalem nye, eye ezu Mawu ƒe fiaɖuƒe ƒe kpɔɖeŋu si tsi tre ɖi na Yehowa ƒe fiaɖuɖu ɖe anyigba dzi. Esi wotsrɔ̃ dugã ma le ƒe 607 D.M.Ŋ. me la, Mawu ƒe kpɔɖeŋufiaɖuƒe sia nu yi. (Kronika I, 29:23; Kronika II, 36:17-21) Xexemefiaɖuƒe siwo kplɔ wo nɔewo ɖo siwo legba la ƒe akpa siwo nye ga tsi tre ɖi na la ate ŋu akpɔ ŋusẽ ɖe xexeame dzi azɔ Mawu ƒe kpɔɖeŋufiaɖuƒe la ƒe asi manɔmee. Nebukadnezar si nye sika, si nye ga xɔasitɔ kekeake si wonya le blemaɣeyiɣiwo me la, ƒe ta ɖe dzesi etɔxɛe esi wòtsrɔ̃ Yerusalem tsɔ mu fiaɖuƒe ma.—Kpɔ “Fia Aʋakalẽtɔ aɖe Ðo Fiaɖuƒe Anyi,” le axa 63.
9. Nukae wotsɔ ta si nye sika la tsi tre ɖi na?
9 Nebukadnezar, amesi ɖu fia ƒe 43 lae nye fia gbãtɔ le Babilon Fiaɖuƒea dzi ɖulawo dome. Wo dometɔ aɖewoe nye eƒe toyɔvi Nabonido kple viaŋutsu tsitsitɔ Ewil Merodax. Fiaƒome ma gaɖu dzi ƒe 43 bubu, vaseɖe Nabonido vi Belsazar ƒe ku le ƒe 539 D.M.Ŋ. me. (Fiawo II, 25:27; Daniel 5:30) Eyata menye Nebukadnezar koe sika ƒe ta la tsi tre ɖi na o ke etsi tre ɖi na Babilon-fiaƒomea me fiawo katã.
10. (a) Aleke Nebukadnezar ƒe drɔ̃ea ɖee fia be Babilonia Xexemefiaɖuƒea manɔ anyi ɖaa o? (b) Nya kae nyagblɔɖila Yesaya gblɔ ɖi le amesi ava xɔ Babilon ŋu? (d) Gɔmesese ka nue Medo-Persia nɔ ʋee wu Babilon le?
10 Daniel gblɔ na Nebukadnezar be: “Fiaɖuƒe bubu ava ɖe yowòme, si anɔ ʋee wu tɔwò.” (Daniel 2:39) Fiaɖuƒe si legba la ƒe akɔta kple abɔ siwo nye klosalo tsi tre ɖi na ava xɔ ɖe Nebukadnezar ƒe fiaƒomea teƒe. Yesaya gblɔ fiaɖuƒe sia ŋuti nya ɖi ƒe 200 do ŋgɔ, eye wòyɔ eƒe fia aʋadziɖula la ƒe ŋkɔ gɔ̃ hã—eyae nye Kores. (Yesaya 13:1-17; 21:2-9; 44:24–45:7; 44:13) Esia nye Medo-Persia Fiaɖuƒea. Togbɔ be ŋkuʋuʋu gã aɖe nɔ Medo-Persia fiaɖuƒe sia me wòde ŋgɔ wu Babilonia Fiaɖuƒea tɔ hã la, klosalo si nye ga si ƒe asixɔxɔ mede sika nu o lae wotsɔ tsi tre ɖi na fiaɖuƒe mlɔetɔ sia. Enɔ ʋee wu Babilonia Xexemefiaɖuƒea le gɔmesese sia nu be mɔnukpɔkpɔ tɔxɛ mesu esi wòmu Mawu ƒe kpɔɖeŋufiaɖuƒe si nɔ Yuda, si ƒe fiadue nye Yerusalem la o.
11. Ɣekaɣie Nebukadnezar ƒe fiaƒomea meganɔ anyi o?
11 Esi Daniel ɖe drɔ̃e la gɔme anɔ ƒe 60 megbe la, ekpɔ eteƒe esime Nebukadnezar ƒe fiaƒomea me tɔwo ƒe dziɖuɖua wu enu. Daniel nɔ eteƒe le October 5/6, 539 D.M.Ŋ. dzi esime Medo-Persia ʋakɔa xɔ Babilon si dzi edze abe womate ŋu aɖu o la eye wowu Fia Belsazar. Esi Belsazar ku la, drɔ̃e me legbaa ƒe ta si nye sika—Babilon Fiaɖuƒe—la megava nɔ anyi o.
FIAÐUƑE AÐE NA ABLƆÐE ABOYOMEWO
12. Aleke se si Kores de le ƒe 537 D.M.Ŋ. ɖe vi na Yudatɔ aboyomewoe?
12 Medo-Persia va xɔ ɖe Babilon Fiaɖuƒea teƒe hezu xexemefiaɖuƒe si kpɔ ŋusẽ le ƒe 539 D.M.Ŋ. me. Esi Mediatɔ Dario xɔ ƒe 62 la, eva zu Babilon-dugã si dzi woɖu la ƒe fia gbãtɔ. (Daniel 5:30; 6:1) Wo kple Persiatɔ Kores wowɔ ɖeka ɖu fia ɖe Medo-Persia Fiaɖuƒea dzi ɣeyiɣi kpui aɖe. Esime Dario ku la, Kores ɖeɖe va zu Persia Fiaɖuƒea ƒe fia. Kores ƒe dziɖuɣie wona ablɔɖe Yudatɔwo tso aboyo me le Babilon. Le ƒe 537 D.M.Ŋ. me la, Kores de se si ɖe mɔ na Yudatɔ aboyome siwo nɔ Babilon be woatrɔ ayi wo denyigba dzi aɖagbugbɔ Yerusalem atso eye woagatu Yehowa ƒe gbedoxɔa. Gake womegbugbɔ Mawu ƒe kpɔɖeŋu fiaɖuƒea ɖo anyi le Yuda kple Yerusalem o.—Kronika II, 36:22, 23; Ezra 1:1–2:2a.
13. Nukae Nebukadnezar ƒe drɔ̃ea me legbaa ƒe akɔta kple abɔ siwo nye klosalo la tsi tre ɖi na?
13 Drɔ̃e me legba la ƒe akɔta kple abɔwo tsi tre ɖi na Persia-fia siwo ɖu dzi tso Kores Gãtɔ dzi. Woƒe fiaɖuɖu ma nɔ anyi xɔ ƒe 200 kple edzivɔ. Woxɔe se be aʋa aɖe wɔwɔ mee Kores ku le le ƒe 530 D.M.Ŋ. me. Le fia siwo ade 12 siwo kplɔe ɖo va nɔ Persia Fiaɖuƒea ƒe fiazikpui dzi dome la, wo dometɔ 2 ya teti kɔ dɔme ɖe Yehowa ƒe ame tiatiawo ŋu. Ðekae nye Dario I (Persiatɔ), eye eveliae nye Artaxsasta I.
14, 15. Aleke Dario Gãtɔ kple Artaxsasta I kpe ɖe Yudatɔwo ŋui?
14 Dario I nye Persia-fia etɔ̃lia si kplɔ Kores Gãtɔ ɖo. Fia eve siwo do ŋgɔ nɛ woe nye Cambyses II kple nɔvia Bardiya (alo ɖewohĩ Nunɔla alakpanuwɔla aɖe si ŋkɔe nye Gaumata). Woxe mɔ ɖe Yerusalem-gbedoxɔa gbugbɔgatu nu hafi Dario I si wogayɔna hã be Dario Gãtɔ va nɔ zi dzi le ƒe 521 D.M.Ŋ. me. Esi Dario ke ɖe agbalẽ si me Kores ƒe sededea le ŋu le Axmeta la, menye ɖeko wòɖe mɔxeɖenua ɖa le ƒe 520 D.M.Ŋ. me o. Eɖe ga kple nuhiahiãwo hã tso fiaƒeme nudzraɖoƒe be woatsɔ agbugbɔ gbedoxɔa atu.—Ezra 6:1-12.
15 Persia-fia si gava kpe asi ɖe Yudatɔwo ƒe gbugbɔɖoanyidɔwo ŋue nye Artaxsasta I, amesi va xɔ ɖe fofoa Axasweros (Xerxes I) teƒe le ƒe 475 D.M.Ŋ. me. Wona megbeŋkɔ Artaxsasta be Longimanus le esi eƒe ɖusibɔ didi wu miabɔ ta. Le eƒe fiaɖuɖu ƒe ƒe 20 lia si nye ƒe 455 D.M.Ŋ. me la, eɖo eƒe ahakula Yudatɔ Nexemya Yuda-nyigba dzikpɔlae eye be wòagbugbɔ Yerusalem-gliwo aɖo. Nuwɔna siae nye ‘ƒewo ƒe kwasiɖa blaadre’ siwo ŋu woƒo nu tsoe le Daniel ta 9 lia me ƒe gɔmedzedze eye wotsɔe ɖo ɣeyiɣi na Mesia, alo Kristo, si nye Yesu si tso Nazaret ƒe vava kple eƒe ku.—Daniel 9:24-27; Nexemya 1:1; 2:1-18.
16. Ɣekaɣie Medo-Persia Xexemefiaɖuƒea mu eye le fia ka ŋɔli?
16 Fia ade siwo kplɔ Artaxsasta I ɖo va nɔ Persia Fiaɖuƒea ƒe fiazikpui dzi ƒe mamlɛtɔe nye Dario III. Eƒe dziɖuɖua wu enu kpata le ƒe 331 D.M.Ŋ. me esime Alexander Gãtɔ ɖu edzi keŋkeŋ le Gaugamela, si medidi tso blema Niniwe gbɔ o. Edzi ɖuɖu alea he Medo-Persia Xexemefiaɖuƒe si Nebukadnezar ƒe drɔ̃ea me legba la ƒe akpa si klosalo tsi tre ɖi na la va nuwuwui. Fiaɖuƒe si akplɔe ɖo akpɔ ŋusẽ wu le go aɖewo me, gake anɔ ʋee wu le nu bubuwo hã me. Esia me akɔ ne míese alesi Daniel yi edzi ɖe Nebukadnezar ƒe drɔ̃ea gɔmee.
FIAÐUƑE AÐE—ELOLO GAKE LE ƲEE WU
17-19. (a) Xexemefiaɖuƒe kae ƒodo kple alia tsi tre ɖi na, eye afikae eƒe dziɖuƒe keke ta se ɖo? (b) Amekae nye Alexander III? (d) Aleke wòdzɔe be wova doa Helagbe le dukɔwo me, eye nuka wɔwɔe wòsɔ na nyuie?
17 Daniel gblɔ na Nebukadnezar be legba gã la ƒe ƒodo kple ali nye “fiaɖuƒe etɔ̃lia [si] ava, si nye akɔblitɔ, eye wòaɖu anyigba blibo la dzi.” (Daniel 2:32, 39) Fiaɖuƒe etɔ̃lia sia akplɔ Babilonia kple Medo-Persia ɖo. Abe alesi akɔbli ƒe asixɔxɔ mede klosalo tɔ nu o ene la, xexemefiaɖuƒe yeye sia anɔ ʋee wu Medo-Persia le go sia me be mɔnukpɔkpɔ tɔxɛ si ƒe ɖee nye ablɔɖe nana Yehowa ƒe amewo masu esi o. Gake fiaɖuƒe ma si ɖi akɔbli la ‘aɖu anyigba bliboa dzi,’ si fia be axɔ teƒe geɖe wu Babilonia loo alo Medo-Persia. Nuka dzie ŋutinya ɖo kpee le xexemefiaɖuƒe sia ŋu?
18 Esi Alexander III si di vevie be yeaxɔ ŋkɔ va xɔ fiazikpuia le Makedonia le ƒe 336 D.M.Ŋ. esime wòxɔ ƒe 20 la, edze aʋahoho siwo me wòkpɔ dziɖuɖu le la gɔme. Eƒe dzidzedzekpɔkpɔ le aʋawɔwɔ me na wova yɔe be Alexander Gãtɔ. Esi wòɖu dzi le aʋa siwo wòwɔ me ta la, eyi edzi nɔ gegem ɖe Persiatɔwo ƒe dziɖuƒewo nɔ exɔm. Esi wòɖu Dario III dzi le aʋa si wowɔ le Gaugamela le ƒe 331 D.M.Ŋ. me la, Persia Fiaɖuƒea te gbagbã eye Alexander wɔ Hela wòzu xexemefiaɖuƒe yeye.
19 Esi Alexander ɖu aʋa dzi le Gaugamela megbe la, eyi edzi va xɔ Persia-dugã siwo nye Babilon, Susa, Persepolis, kple Axmeta. Esi wòxɔ Persia Fiaɖuƒea ƒe akpa susɔea la, ekeke anyigba siwo wòxɔ ɖe enu ɖo India ƒe ɣetoɖoƒenutome. Eɖo Helatɔwo ƒe nɔƒewo ɖe anyigba siwo wòxɔ dzi. Esia wɔe be Helagbe kple woƒe dekɔnuwo kaka ɖe fiaɖuƒea katã me. Le nyateƒe me la, Hela Fiaɖuƒea va lolo wu ɖesiaɖe si do ŋgɔ nɛ. Fiaɖuƒe si nye akɔbli la ‘ɖu anyigba bliboa dzi’ abe alesi Daniel gblɔe ɖi ene. Nusiwo do tso esia me dometɔ ɖekae nye be Helagbe (Koine) va zu gbe si wodona le dukɔwo dome. Esi eme nyawo me kɔna nyuie ta la, esɔ nyuie ŋutɔ wotsɔ ŋlɔ Kristotɔwo ƒe Hela Ŋɔŋlɔawoe eye wotsɔe kaka Mawu Fiaɖuƒe ŋuti nyanyuia.
20. Nukae dzɔ ɖe Hela Fiaɖuƒea dzi le Alexander Gãtɔ ƒe ku megbe?
20 Ƒe enyi koe Alexander Gãtɔ tsɔ nɔ agbee tso esime wòzu xexemedziɖula. Togbɔ be Alexander si xɔ ƒe 32 la metsi boo o hã la, edze dɔ le aglotutu aɖe megbe eye wòku le ema megbe kpuie, le June 13, 323 D.M.Ŋ. dzi. Le ɣeyiɣi aɖe megbe la, womã eƒe fiaɖuƒe gã la ɖe akpa ene me, eye eƒe aʋafiawo dometɔ ɖeka ɖu ɖesiaɖe dzi. Eyata fiaɖuƒe ene siwo Roma Fiaɖuƒea va xɔ mlɔeba la do tso fiaɖuƒe gã ɖeka ma me. Xexemefiaɖuƒe sia si le abe akɔbli ene la nɔ anyi va ɖo ƒe 30 D.M.Ŋ. me esime fiaɖuƒe ene siawo ƒe mamlɛtɔ—si nye Ptolemy-fiaƒome si ɖu dzi le Egipte—ge dze Roma si me mlɔeba.
FIAÐUƑE SI ƑOA NU HEGBÃNƐ GUDUGUDU
21. Aleke Daniel ɖɔ “fiaɖuƒe enelia” lae?
21 Daniel yi edzi ɖe nu me le drɔ̃e me legbaa ŋu be: “Fiaɖuƒe enelia [le Babilon, Medo-Persia, kple Hela megbe] asesẽ abe gayibɔ ene, elabena gayibɔ ƒoa nuwo katã, eye wògbãa wo gudugudu; alesi gayibɔ gbãa nui la, nenema wòaƒo ekemeawo katã, eye wòagbã wo gudugudui.” (Daniel 2:40) Le ŋusẽ kple ŋutete si anɔ xexemefiaɖuƒe sia si wòatsɔ agbã nui gome la, anɔ abe gayibɔ ene—asesẽ wu fiaɖuƒe siwo wotsɔ sika, klosalo, alo akɔbli tsi tre ɖi na la. Fiaɖuƒe sia tɔgbe ye Roma Fiaɖuƒea nye.
22. Aleke Roma Fiaɖuƒea nɔ abe gayibɔ ene?
22 Romatɔwo ƒo Hela Fiaɖuƒea hegbãe gudugudu eye woxɔ Medo-Persia kple Babilon xexemefiaɖuƒeawo ƒe akpa susɔeawo. Esi mede bubu aɖeke Mawu ƒe Fiaɖuƒe si Yesu Kristo ɖe gbeƒãe ŋu o ta la, ewui le fuwɔameti ŋuti le ƒe 33 M.Ŋ. me. Romatɔwo ti Yesu ƒe nusrɔ̃lawo yome tsɔ te kpɔ be yewoagblẽ Kristotɔnyenye vavãtɔ dome. Tsɔ kpe ɖe eŋu la, Romatɔwo tsrɔ̃ Yerusalem kple eƒe gbedoxɔa le ƒe 70 M.Ŋ. me.
23, 24. Tsɔ kpe ɖe Roma Fiaɖuƒea ŋu la, nuka hãe legba la ƒe afɔwo tsi tre ɖi na?
23 Menye Roma Fiaɖuƒea koe Nebukadnezar ƒe drɔ̃ea me legba la ƒe afɔ siwo nye gayibɔ la tsi tre ɖi na o ke etsi tre ɖi na dunyaheŋusẽ si va do tso eme hã. Bu nya siawo siwo woŋlɔ ɖe Nyaɖeɖefia 17:10 ŋu kpɔ: “Wonye fia adre: Wo ame atɔ̃ dze anyi, eye ɖeka li, mamlɛtɔ la meva haɖe o, eye ne eva la, ele nɛ be, wòanɔ anyi ʋee ko.” Esime apostolo Yohanes ŋlɔ nya mawo la, Romatɔwo ɖe aboyoe ɖe Patmo-ƒukpo dzi. Fia, alo xexemefiaɖuƒe, atɔ̃ siwo dze anyi xoxo lae nye Egipte, Asiria, Babilon, Medo-Persia, kple Hela. Adelia—si nye Roma Fiaɖuƒea—ganɔ dzi ɖum. Gake eya hã ava dze anyi, eye fia adrelia atsi tre tso nuto siwo Romatɔwo xɔ la dometɔ ɖeka me. Xexemefiaɖuƒe kae wòanye?
24 Roma Fiaɖuƒea ƒe dzieheɣetoɖoƒe nutoe Britain nye tsã. Gake kaka ƒe 1763 naɖo la, eva zu Britain Fiaɖuƒe—si nye Britania si kpɔ ŋusẽ ɖe ƒugã adreawo dzi. Le ƒe 1776 me la, Amerika-nuto 13 siwo nɔ ete xɔ ɖokuisinɔnɔ be woaɖo United States of America anyi. Gake le ƒe aɖewo megbe la, Britain kple United States va wɔ nu aduadu le aʋawɔɣi kple le ŋutifafaɣi siaa me. Alea wòdzɔe be Britain kple Amerika wɔ ɖeka hezu xexemefiaɖuƒe adrelia le Biblia ƒe nyagblɔɖi me. ‘Esesẽ abe gayibɔ ene,’ abe alesi Roma Fiaɖuƒea nɔ ene, eye ekpɔ ŋusẽ si ɖi gayibɔ ƒe ŋusẽ ɖe amewo dzi. Eyata Roma Fiaɖuƒea kple Anglo-Amerika xexemefiaɖuƒe ƒokpli la siaae drɔ̃e me legba la ƒe afɔ siwo nye gayibɔ la tsi tre ɖi na.
NU EVE SIWO MENYA TSAKANA O
25. Nya kae Daniel gblɔ le legba la ƒe afɔwo kple afɔbidewo ŋu?
25 Daniel yi edzi gblɔ na Nebukadnezar be: “Esi nèkpɔ be, afɔwo kple afɔbideawo ƒe akpa aɖewo nye tsu, eye akpa aɖewo nye gayibɔ la, nenema fiaɖuƒe la amãe; gayibɔ ƒe sesẽ anɔ eme, elabena èkpɔ gayibɔ kple tsu wotsaka. Alesi afɔbideawo ƒe akpa aɖewo nye gayibɔ, eye akpa aɖewo nye tsu la, nenema fiaɖuƒe la ƒe akpa aɖe asesẽ, eye akpa aɖe masesẽ o. Eye alesi nèkpɔ gayibɔ kple tsu wotsaka la, nenema woatsaka kple amegbetɔwo ƒe ƒomeawo, ke womalé ɖe wo nɔewo ŋu o, abe alesi gayibɔ kple tsu menya tsakana o ene.”—Daniel 2:41-43.
26. Ɣekaɣie dziɖuɖu siwo afɔwo kple afɔbideawo tsi tre ɖi na la do?
26 Xexemefiaɖuƒe siwo kplɔ wo nɔewo ɖo si Nebukadnezar ƒe drɔ̃ea me legbaa tsi tre ɖi na la dze egɔme tso taa dzi ʋuu vaseɖe afɔ gbɔ. Esɔ be míagblɔ be afɔwo kple afɔbideawo, siwo nye ‘gayibɔ kple tsu si tsaka’ la atsi tre ɖi na amegbetɔdziɖuɖu mamlɛtɔ si anɔ anyi le ‘nuwuɣia’ me.—Daniel 12:4.
27. (a) Nɔnɔme kawoe afɔ kple afɔbide siwo nye gayibɔ kple tsu si tsaka la tsi tre ɖi na? (b) Nukae legba la ƒe afɔbide ewoawo tsi tre ɖi na?
27 Le ƒe alafa 20 lia ƒe gɔmedzedze la, Britain Fiaɖuƒea nɔ ame ɖeka le ame ene ɖesiaɖe dome dzi ɖum le anyigba dzi. Europa-fiaɖuƒe bubuwo hã ɖu ame miliɔn geɖe bubuwo dzi. Gake Xexemeʋa I na dukɔwo ƒe ƒuƒoƒowo va xɔ ɖe fiaɖuƒewo teƒe. Nɔnɔme sia va bɔ le Xexemeʋa II megbe. Esi dulɔlɔ̃ va keke ta la, dukɔ siwo le xexeame va sɔ gbɔ ɖe edzi. Legba la ƒe afɔbide ewoawo tsi tre ɖi na ŋusẽtɔ kple dziɖuɖu siawo katã siwo li le ɣeyiɣi ɖeka me, elabena le Biblia me la, wotsɔa xexlẽme ewo tsia tre ɖi na anyigbadzinuwo ƒe blibonyenye ɣeaɖewoɣi.—Tsɔe sɔ kple Mose II, 34:28; Mateo 25:1; Nyaɖeɖefia 2:10.
28, 29. (a) Nukae Daniel gblɔ be tsu la tsi tre ɖi na? (b) Nukae míate ŋu agblɔ le gayibɔ kple tsu si tsaka la ŋu?
28 Fifia si míele ‘nuwuɣia’ me la, míeɖo ɣeyiɣi si me legba la ƒe afɔwo le dzi ɖum le me. Dziɖuɖu siwo legba la ƒe afɔ kple afɔbide siwo gayibɔ kple tsu siwo tsaka tsi tre ɖi na la dometɔ aɖewo le abe gayibɔ ene—wozia ame dzi alo sẽa ŋuta. Bubuwo le abe tsu ene. Le mɔ ka nu? Daniel yɔ tsu tsɔ ku ɖe “amegbetɔwo ƒe ƒomeawo” ŋu. (Daniel 2:43) Togbɔ be tsu si nye nusi wotsɔ wɔ amegbetɔƒomea la bɔbɔ hã la, eva nɔ na dukɔwo me dziɖuɖu siwo le abe gayibɔ ene la be woaɖo to ame tsɛ, siwo di be yewoakpɔ gome le dziɖuɖu siwo le yewo dzi ɖum ƒe ɖoɖowɔwɔwo me la geɖe wu. (Hiob 10:9) Gake dziɖuɖu siwo ƒe nya me sẽ kple ame tsɛwo mete ŋu wɔa ɖeka o—abe alesi gayibɔ kple tsu manya tsaka o ene. Nyateƒee, dziɖuɖuwo ama kakɛkakɛ ne legba la gbãɣi ɖo!
29 Mamã si le afɔawo kple afɔbideawo mee ana legba bliboa nagbãa? Nukae adzɔ ɖe legba la dzi?
ETAƑOƑO SI ÐE DZESI!
30. Ƒo nu tso alesi Nebukadnezar ƒe drɔ̃ea wu enui ŋu.
30 Bu alesi legba la ƒe nuwuwu anɔ ŋu kpɔ. Daniel gblɔ na fia la be: “Esi nèle ekpɔm la, kpe aɖe, si menye ame ƒe asie dae o la, ge va dze legba la ƒe afɔ, si nye gayibɔ kple tsu la dzi, eye wògbãe gudugudu. Ale gayibɔ kple tsu, akɔbli, klosalo kple sika wogbã gudugudu, eye wozu abe tsro le lugbɔƒe le dzomeŋɔli ene, ya kplɔ wo dzoe, eye womegakpɔ wo teƒe o; ke kpe, si dze legbaa dzi la, zu to gã aɖe hexɔ anyigba blibo la dzi.”—Daniel 2:34, 35.
31, 32. Nya kae wogblɔ ɖi le Nebukadnezar ƒe drɔ̃ea ƒe akpa mamlɛa ŋu?
31 Nyagblɔɖia yi edzi kɔ nu me be: “Le fia mawo ŋɔli la dziƒo ƒe Mawu la aɖo fiaɖuƒe aɖe anyi, si matsrɔ̃ gbeɖegbeɖe o, eye eƒe fiaɖuƒe mayi ɖe dukɔ bubu aɖeke si me o, agbã fiaɖuƒe mawo katã, eye wòagblẽ wo, ke eya ŋutɔ anɔ anyi tegbee. Elabena èkpɔ kpe aɖe, si ame ƒe asi meda o la, ge tso to dzi va gbã gayibɔ, akɔbli kple tsu, klosalo kple sika la. Mawu gã lae ɖe nusi gbɔna gbaɖegbe la fia fia la. Drɔ̃e la le eme, eye eƒe gɔmeɖeɖe le eteƒe.”—Daniel 2:44, 45.
32 Esi Nebukadnezar kpɔ be wolĩ yeƒe drɔ̃ea heɖe egɔme na ye la, egblɔ be Daniel ƒe Mawu koe nye “fiawo dzi Aƒetɔ [kple] nya ɣaɣlawo ɖefiala.” Fia la tsɔ ɖoƒe kɔkɔ hã na Daniel kple eƒe zɔhɛ Hebri-vi etɔ̃awo. (Daniel 2:46-49) Gake nukae Daniel ƒe ‘nyameɖeɖe si le eteƒe’ la fia le egbeŋkekea me?
‘TO AÐE XƆ ANYIGBA DZI KATÃ’
33. “To” ka dzie ‘kpea’ tso, eye ɣekaɣie esia dzɔ eye aleke wòdzɔe?
33 Esime ‘dukɔwo ƒe ɣeyiɣi ɖoɖi’ la wu enu le October 1914 me la, “dziƒo ƒe Mawu la” ɖo Dziƒofiaɖuƒea anyi esi wòɖo Via, Yesu Kristo, si wosi ami na wòzu “fiawo dzi Fia kple aƒetɔwo dzi Aƒetɔ.”a (Luka 21:24; Nyaɖeɖefia 12:1-5; 19:16) Alea wòdzɔe be “kpe” si nye Mesia Fiaɖuƒe la ge tso “to” si nye Yehowa ƒe xexeame katã ƒe dziɖulanyenye la dzi. Yesu Kristo si Mawu do makumakunyenye na ƒe asi mee dziƒofiaɖuƒe sia le. (Romatɔwo 6:9; Timoteo I, 6:15, 16) Eyata ‘mía Aƒetɔ Mawu kple eƒe Kristo ƒe fiaɖuƒe’—si nye Yehowa ƒe xexeame katã ƒe dziɖulanyenye ɖeɖefia—la mayi ɖe ame bubu aɖeke si me o. Anɔ anyi tegbee.—Nyaɖeɖefia 11:15.
34. Aleke wòdzɔe be woɖo Mawu ƒe Fiaɖuƒe gɔme anyi “le fia mawo ŋɔli”?
34 “Fia mawo ŋɔli” ye woɖo Fiaɖuƒea anyi. (Daniel 2:44) Menye fia siwo wotsɔ legba la ƒe afɔbide ewoawo tsi tre ɖi na koe esiawo nye o ke esiwo ƒe kpɔɖeŋu gayibɔ, akɔbli, klosalo, kple sika ƒe akpaawo nye hã le eme. Togbɔ be Babilon, Persia, Hela, kple Roma fiaɖuƒeawo nu yi eye womeganye xexemefiaɖuƒewo o hã la, woƒe akpa susɔeawo kpɔtɔ nɔ anyi le ƒe 1914 me. Turkeytɔwo ƒe Ottoman Fiaɖuƒea ye nɔ Babilonia ƒe dziɖuƒea ɣemaɣi, eye dukɔwo ƒe dziɖuɖuwo nɔ dzi ɖum le Persia (Iran) kple Hela kpakple Roma le Italy.
35. Ɣekaɣie ‘kpea’ alɔ legba la, eye aleke woagbã legba la gudugudui?
35 Eteƒe madidi o Mawu ƒe Dziƒofiaɖuƒea alɔ kpɔɖeŋulegba la ƒe afɔwo. Esia agbã fiaɖuƒe siwo katã legbaa tsi tre ɖi na la ahahe wo ava nuwuwui. Le nyateƒe me le “Mawu, ŋusẽkatãtɔ la, ƒe ŋkeke gã la ƒe aʋawɔwɔ” me la, “kpe” ma alɔ legba la sesĩe ale gbegbe be agbã gudugudu azu wɔ eye Mawu ƒe ahom akplɔe dzoe abe tsro le lugbɔƒe ene. (Nyaɖeɖefia 16:14, 16) Ekema Mawu ƒe Fiaɖuƒea azu dziɖuɖu ƒe to si aɖu “anyigba blibo la” dzi, abe kpe si va lolo gã abe to ene hexɔ anyigba dzi la ene.—Daniel 2:35.
36. Nukata woate ŋu ayɔ Mesia Fiaɖuƒea be enye dziɖuɖu like?
36 Togbɔ be dziƒoe Mesia Fiaɖuƒea anɔ hã la, akeke eƒe ŋusẽ ɖe enu wòaɖo míaƒe anyigba dzi be wòayra ameƒomea me tɔ toɖola siwo katã le anyigba dzi. Dziɖuɖu like sia “matsrɔ̃ gbeɖegbeɖe o” eye “mayi ɖe dukɔ bubu aɖeke si me [hã] o.” Esi wòto vovo na amegbetɔdziɖula siwo kuna ƒe fiaɖuƒewo ta la, “eya ŋutɔ anɔ anyi tegbee,” yi ɖe mavɔmavɔ me. (Daniel 2:44) Neva eme be mɔnukpɔkpɔ nasu asiwò be nànɔ eteviwo dome tegbee.
[Etenuŋɔŋlɔwo]
a Kpɔ agbalẽ sia ƒe Ta 6 lia.
NUKAWO GƆMEE NÈVA SE?
• Xexemefiaɖuƒe kawoe wotsɔ Nebukadnezar ƒe drɔ̃ea me legba gã la ƒe akpa vovovoawo tsi tre ɖi na?
• Xexeame ƒe nɔnɔme kae afɔawo kple afɔbide ewo siwo nye gayibɔ kple tsu si tsaka la tsi tre ɖi na?
• Ɣekaɣie ‘kpea’ ge eye “to” ka dzie wòge tsoe?
• Ɣekaɣie ‘kpea’ alɔ legba la?
[Aɖaka/Nɔnɔmetata siwo le axa 63-67]
FIA AƲAKALẼTƆ AÐE ÐO FIAÐUƑE ANYI
BABILON fiavi si ava zu fia kple eƒe aʋakɔ ɖu Farao Nexo ƒe Egipte-srafowo dzi le Karkemis si le Siria. Egiptetɔ siwo dzi woɖu la si ɖo ta Egipte le anyiehe gome, eye Babilontɔwo kplɔ wo ɖo. Gake gbedasi aɖe si fiavi aʋadziɖula la xɔ tso Babilon na wòdzudzɔ wo yometiti. Gbedasiae nye be fofoa Nabopolassar ku. Esi Nebukadnezar de dɔ eƒe aʋafiawo si be woakplɔ aboyomeawo ahalɔ aboyonuawo vɛ la, ewɔ kaba trɔ yi aƒe va nɔ fiazikpui si fofoa gblẽ ɖi la dzi.
Eyata Nebukadnezar va nɔ Babilon-fiazikpuia dzi le ƒe 624 D.M.Ŋ. me eye wòva zu fia evelia le Babilonia Fiaɖuƒe Yeyea me. Le ƒe 43 siwo wòtsɔ ɖu fiae me la, exɔ nuto siwo nye Asiria Xexemefiaɖuƒea tɔ tsã eye wòkeke eƒe dziɖuƒe ɖe enu hexɔ Siria le dziehe gome kple Palestina le ɣetoɖoƒe gome vaseɖe keke Egipte-liƒoa dzi ke.—Kpɔ anyigbatataa.
Le Nebukadnezar ƒe fiaɖuɖu ƒe ƒe enelia (ƒe 620 D.M.Ŋ.) me la, ena Yuda-fiaɖuƒea va nɔ ete. (Fiawo II, 24:1) Ƒe etɔ̃ megbe la, Yudatɔwo ƒe aglãdzedze na Babilontɔwo ɖe to ɖe Yerusalem. Nebukadnezar ɖe aboyo Yoyaxin, Daniel, kple ame bubuwo yi Babilon. Fia la lɔ Yehowa ƒe gbedoxɔa me nu aɖewo hã dzoe. Eɖo Yoyaxin nyrui, Zedekiya, Yuda-fiae be wòanɔ ye te.—Fiawo II, 24:2-17; Daniel 1:6, 7.
Le ɣeyiɣi aɖe megbe la, Zedekiya hã dze aglã eye wòbla nu kple Egipte. Nebukadnezar gaɖe to ɖe Yerusalem ake, eye le ƒe 607 D.M.Ŋ. me la, egbã eƒe gliwo, etɔ dzo gbedoxɔa, eye wòtsrɔ̃ dua. Ewu Zedekiya viwo katã eye wògbã ŋku na Zedekiya heblae, eye wòkplɔe yi Babilon wòva zu gameme. Nebukadnezar ɖe aboyo ameawo ƒe akpa gãtɔ eye wòlɔ gbedoxɔa me nu susɔeawo yi Babilon. “Ale woɖe aboyo Yuda tso eƒe anyigba dzi enye si.”—Fiawo II, 24:18–25:21.
Nebukadnezar ɖu Tiro hã dzi esi wòɖe to ɖe dua—eɖe to ɖee ƒe 13 sɔŋ. Le toɖeɣia me la, gakuku si eƒe asrafowo ɖɔ na woƒe ta “bebe,” eye dɔwɔnu siwo wozã le toɖeɖedɔawo me tsɔtsɔ na woƒe abɔtawo “ɖe bo.” (Xezekiel 29:18) Mlɔeba la, Tiro na ta Babilonia-srafowo.
Edze ƒã be aʋawɔɖaŋu nɔ tagbɔ na Babilon-fia la. Agbalẽ aɖewo, vevietɔ esiwo woŋlɔ le Babilonia, hã gblɔ le eŋu be enye fia dzɔdzɔe. Ŋɔŋlɔawo megblɔe tẽ be fia nyui ye Nebukadnezar nye ya o, gake nyagblɔɖila Yeremya gblɔ be togbɔ be Zedekiya dze aglã hã la, woawɔ nu ɖe eŋu nyuie ‘ne edo yi Babilon-fia ƒe amegãwo gbɔ.’ (Yeremya 38:17, 18) Eye le Yerusalem ƒe tsɔtsrɔ̃ megbe la, Nebukadnezar wɔ nu ɖe Yeremya ŋu le bubu me. Fia la de se le Yeremya ŋu be: “Kplɔe, eye wò ŋku nanɔ eŋu, eye megawɔ vɔ̃ aɖekee o, ke boŋ alesi wòagblɔ na wò la, nenema nawɔ nɛ.”—Yeremya 39:11, 12; 40:1-4.
Esi Nebukadnezar nye dɔnunɔla ta la, mexɔ ɣeyiɣi aɖeke hafi wòte ŋu de dzesi Daniel kple eƒe zɔhɛ etɔ̃awo—Sadrax, Mesax, kple Abed-Nego—amesiwo ƒe Hebri-ŋkɔwoe nye Xananya, Misael, kple Azarya la ƒe nɔnɔme nyui kple ŋutetewo o. Eyata fia la zã wo hena ɖoƒe kɔkɔ wo le eƒe fiaɖuƒea me.—Daniel 1:6, 7, 19-21; 2:49.
Marduk si nye Babilon-mawu gãtɔ koŋue Nebukadnezar subɔ. Fia la xɔe se be Marduk gbɔe yeƒe aʋadziɖuɖuwo katã tso. Etu gbedoxɔwo na Marduk kple Babilonia-mawu bubu geɖe ɖe Babilon heɖo atsyɔ̃ na wo. Anye Marduk ye wòwɔ sikalegba si wòli anyi ɖe Dura-bali me la na. Eye edze abe Nebukadnezar ɖo ŋu ɖe afakaka ŋu vevie le ɖoɖowɔwɔ ɖe eƒe aʋahohowo ŋu me ene.
Enye dada na Nebukadnezar hã be wòdzra Babilon si nye dugã si ŋu gli nyadri le wu ɖesiaɖe ɣemaɣi la ɖo. Esi Nebukadnezar wu dugã la ƒe gli gã eve ƒokpli si gɔme fofoa dze la ɖoɖo nu la, ena wòva dze abe ɖe womate ŋu aɖu dugã ma dzi o ene. Fia la dzra fiasã xoxo aɖe si le dugã la titina ɖo eye wòtu fiasã si me wònɔna le dzomeŋɔli me ɖe afisi anɔ kilometa eve le dua ƒe dziehe gome. Wogblɔ be Nebukadnezar tso abɔ ɖe gli dzi be wòana srɔ̃a Mediatɔ si wo denyigba dzi togbɛwo kple avewo kpɔkpɔ dzro la ƒe dzi nadze eme—wobu abɔa ɖe nu adre siwo wɔ nuku wu le blemaxexeame la dome.
Esi fia la nɔ tsa ɖim le Babilon-fiasã me gbeɖeka la, eƒo adegbe be, “ɖe menye esia nye Babel gã, si metsɔ nye ŋusẽ triakɔ la tsoe, ne wòanye fia nɔƒe kple nye atsyɔ̃ ƒe bubu oa? Esi fia la mekpɔ ɖe nu le nyaa me o la,” eku tsu enumake. Esi megadze aɖu fia o ƒe adre la, eɖu gbe abe alesi Daniel gblɔe ɖi ene. Esi ɣeyiɣi ma wu enu la, wogbugbɔ fiaɖuƒea na Nebukadnezar, eye wòɖu fia vaseɖe eƒe kugbe le ƒe 582 D.M.Ŋ. me.—Daniel 4:27-33.
NUKAWO GƆMEE NÈVA SE?
Nya kae míate ŋu agblɔ le Nebukadnezar ƒe
• aʋawɔɖaŋu nyanya ŋu?
• dɔnunɔlanyenye ŋu?
• Marduk subɔsubɔ ŋu?
• xɔtutuwo ŋu?
[Anyigbatata]
(Edze nyuie le agbalẽa ŋutɔ me)
BABILONIA FIAÐUƑE
ƑUDZĨ
Yerusalem
Frat Tɔsisi
Tigris Tɔsisi
Niniwe
Susa
Babilon
Ur
[Nɔnɔmetata si le axa 64]
Babilon, dugã si ƒe gliwo tri wu ɖesiaɖe ɣemaɣi
[Nɔnɔmetata si le axa 66]
Ʋɔ driba ye nye Marduk ƒe dzesi
[Nɔnɔmetata si le axa 67]
Abɔ xɔŋkɔ si wotso ɖe gli dzi le Babilon
[Nuwo ƒe nɔnɔme/Nɔnɔmetata si le axa 56]
(Edze nyuie le agbalẽa ŋutɔ me)
XEXEMEFIAÐUƑE SIWO LE DANIEL ƑE NYAGBLƆÐIA ME
Legba gã la (Daniel 2:31-45)
BABILONIA tso ƒe 607 D.M.Ŋ.
MEDO-PERSIA tso ƒe 539 D.M.Ŋ.
HELA tso ƒe 331 D.M.Ŋ.
ROMA tso ƒe 30 D.M.Ŋ.
ANGLO-AMERIKA XEXEMEFIAÐUƑE tso ƒe 1763 M.Ŋ.
XEXE SI ME MÃ LE DUNYAHEHE GOME le nuwuɣia
[Nɔnɔmetata si xɔ axa 47]
[Nɔnɔmetata si xɔ axa 58]