Ta Adrelia
Mitrɔ Va Yehowa ƒe Tadedeagu Gbɔ
1. Babilon-mawu gãtɔ eve ƒe ŋkɔwo ɖe, eye nya kae wogblɔ ɖi le wo ŋu?
NE ISRAEL le aboyo me le Babilon la, anɔ alakpamawusubɔlawo dome. Le Yesaya ƒe ɣeyiɣia me la, Yehowa ƒe amewo kpɔtɔ nɔ woa ŋutɔwo ƒe anyigba dzi eye gbedoxɔa kple nunɔlawo nɔ wo dome. Ke hã Mawu ƒe dukɔ ɖeadzɔgbea me tɔ geɖe va nɔ trɔ̃ subɔm. Eyata ele vevie be woadzra wo ɖo do ŋgɔ ale be womagavɔ̃ na Babilon ƒe alakpamawuwo loo alo wòadzro wo be woasubɔ wo o. Eyata Yesaya ƒo nu tso Babilon-mawu vevi eve ŋu le nyagblɔɖi me be: “Bel mũ, eye Nebo do dɔgɔ̃e; wotsɔ miaƒe legba, siwo mieléna ɖe ta la, de asi na agbatsɔlãwo, wotsɔ wo do agbae ɖe lã, si ŋu ɖeɖi te la dzi.” (Yesaya 46:1) Bel ye nye Kaldeatɔwo ƒe mawu gãtɔ. Wobua Nebo be enye nunya kple nusɔsrɔ̃ ƒe mawu. Bubu si ame geɖe dea mawu eve siawo ŋu la dze le alesi woƒe ŋkɔwo dze le Babilontɔ geɖe ƒe ŋkɔwo mee la me—wo dometɔ ʋɛ aɖewoe nye Belsazar, Nabopolassar, Nebukadnezar, kple Nebuzaradan.
2. Aleke wote gbe ɖe Babilon-mawuwo ƒe wɔnamanɔŋutɔnyenye dzii?
2 Yesaya gblɔ be Bel “mũ” eye Nebo “do dɔgɔ̃e.” Woabɔbɔ alakpamawu siawo ɖe anyi. Ne Yehowa he eƒe ʋɔnudɔdrɔ̃ va Babilon dzi la, mawu siawo mate ŋu axɔ na woƒe tadeagulawo o. Womate ŋu axɔ na wo ɖokui gɔ̃ hã o! Womagatsɔ Bel kple Nebo ɖe ta bubutɔe aɖi tsa, abe alesi wowɔnɛ le Babilontɔwo ƒe Ƒe Yeye Ŋkeke ƒe azãɖuɣi ene azɔ o. Ke boŋ amesiwo dea ta agu na wo atsɔ agbatsɔlãwo ahe wo dzoe abe agba bubu ɖesiaɖe ene. Woako wo ahado vlo wo ɖe wo kafukafu kple wo subɔsubɔ teƒe.
3. (a) Nukae awɔ mo yaa na Babilontɔwo? (b) Nukae míate ŋu asrɔ̃ tso nusi dzɔ ɖe Babilon-mawuwo dzi me egbea?
3 Aleke gbegbe wòawɔ mo yaa na Babilontɔwo enye si be woase be yewoƒe legba siwo ŋu yewoɖoa ŋu ɖo zu agba dzodzro si lã siwo ŋu ɖeɖi te ahe dzoe! Nenema ke xexememawu siwo li egbea—nusiwo ŋu amewo ɖoa ŋu ɖo kple nusiwo wotsɔa woƒe ŋusẽ kple woƒe agbe gɔ̃ hã kena—nye ameflunuwoe. Kesinɔnuwo, aʋawɔnuwo, vivisese, dziɖulawo, amewo denyigba alo woƒe dzesiwo, kple nu bubu geɖe va zu nusiwo amewo subɔna. Woaklo nu le mawu siawo ƒe toflokonyenye dzi le Yehowa ŋutɔ ƒe ɣeyiɣi si sɔ dzi.—Daniel 11:38; Mateo 6:24; Dɔwɔwɔwo 12:22; Filipitɔwo 3:19; Kolosetɔwo 3:5; Nyaɖeɖefia 13:14, 15.
4. Gɔmesese ka nue Babilon-mawuwo ‘do dɔgɔ̃e hemũ’ le?
4 Nyagblɔɖia yi edzi ƒo nu tso Babilon-mawuwo ƒe kpododonu keŋkeŋ ŋu be: “Wo katã wodo dɔgɔ̃e, eye womũ, womate ŋu axɔ agba la o, eye woawo ŋutɔ wozɔ yi aboyo me.” (Yesaya 46:2) Babilon-mawuwo ƒe nɔnɔme dze abe ɖe “wodo dɔgɔ̃e” eye “womũ” abe ɖe wode abi wo ŋu le aʋawɔwɔ me alo wogbɔdzɔ le tsitsi ta ene. Womate ŋu aɖe lã tsɛ siwo tsɔ wo la ƒe agba dzi wòanɔ wodzoe na wo alo ana woasi gɔ̃ hã o. Eyata ɖe wòle be Yehowa ƒe dukɔ si wòbla nu kplii, togbɔ be wole aboyo me le Babilon hã, nade bubu wo ŋua? Ao! Nenema ke wòdzɔe be togbɔ be Yehowa subɔla amesiaminawo nɔ gbɔgbɔmeboyo me hã la, womede bubu “Babilon gã” la ƒe alakpamawu siwo mete ŋu xe mɔ ɖe eƒe mumu le ƒe 1919 me nu ŋu o eye womate ŋu axɔ nɛ le afɔku si ava edzi le “xaxa gã” me hã o.—Nyaɖeɖefia 18:2, 21; Mateo 24:21.
5. Aleke Kristotɔ siwo li egbea ƒoa asa na vodada si Babilontɔ trɔ̃subɔlawo wɔ la wɔwɔ?
5 Kristotɔ vavã siwo li egbea medea ta agu na legba ƒomevi aɖeke o. (Yohanes I, 5:21) Atitsogawo, rosario tsɔtsɔ do gbe ɖae, kple ame kɔkɔewo ƒe nɔnɔmewɔwɔwo mewɔnɛ be wotena ɖe Wɔla la ŋu wu o. Womate ŋu axɔ nya ɖe mía nu o. Le ƒe alafa gbãtɔ me la, Yesu fia mɔ nyuitɔ si dzi woade ta agu na Mawu le la eƒe nusrɔ̃lawo esime wògblɔ be: “Nyee nye mɔ la kple nyateƒe la kpakple agbe la, ame aɖeke mevaa Fofo la gbɔ o, negbe to dzinye ko. Ne miabia nane le nye ŋkɔa dzi la, nye la mawɔe.”—Yohanes 14:6, 14.
“Metsɔ Mi tso Vidzidɔ me Ke”
6. Aleke Yehowa to vovo na dukɔwo ƒe mawuwoe?
6 Esi Yehowa klo nu le Babilon-mawuwo subɔsubɔ ƒe toflokonyenye dzi vɔ la, egblɔ na eƒe amewo be: “Yakob ƒe aƒe la kple Israel ƒe aƒe me ame mamlɛawo, miɖo tom, mi amesiwo metsɔ do agba ɖe ɖokuinye dzi tso dɔ me ke, eye metsɔ mi tso vidzidɔ me ke.” (Yesaya 46:3) Aleke gbegbe Yehowa to vovo na Babilon-legba wɔwɔewoe nye si! Babilon-mawuwo mate ŋu awɔ naneke na wo subɔlawo o. Agbatsɔlã aɖee tsɔa wo hafi wote ŋu ɖea zɔ. Gake Yehowa ya tsɔa eƒe amewo. Ekpɔ wo ta “tso vidzidɔ me,” tso esime woɖo dukɔ la anyi. Ele be ŋkuɖoɖo alesi Yehowa tsɔa Yudatɔwoe dzi dzidzɔtɔe nade dzi ƒo na wo be woatsri trɔ̃subɔsubɔ eye be woaɖo ŋu ɖe eŋu be enye yewo Fofo kple Xɔlɔ̃.
7. Aleke Yehowa ƒe beléle na esubɔlawo lɔlɔ̃tɔe de ŋgɔ wu alesi dzila si nye amegbetɔ léa be na viawoe gɔ̃ hã?
7 Yehowa gagblɔ nya bubu siwo me lɔlɔ̃ dze le na eƒe dukɔa be: “Ame ma ke manye, vaseɖe esime miaku amegã; matsɔ mi ado agbae ɖe ɖokuinye dzi, eye maɖe mi.” (Yesaya 46:4) Yehowa ƒe beléle na eƒe amewo de ŋgɔ wu amegbetɔ dzila si léa ŋku ɖe viawo ŋu ale gbegbe la tɔ. Ne ɖeviwo le tsitsim la, dzilawo senɛ le wo ɖokui me geɖe wu be womeganye agba le yewo dzi o. Ne dzilawo tsi la, ɖeviawoe kpɔa wo dzi zi geɖe. Medzɔ alea kpɔ le Yehowa gome o. Medzudzɔa beléle na via siwo nye amegbetɔwo gbeɖe o—ne wotsi ku amegã gɔ̃ hã. Mawu subɔla siwo li egbea ɖoa ŋu ɖe wo Wɔla ŋu helɔ̃nɛ eye nya siawo siwo le Yesaya ƒe nyagblɔɖia me faa akɔ na wo ŋutɔ. Mehiã be woatsi dzodzodzoe ɖe ŋkeke alo ƒe siwo woagatsɔ anɔ nuɖoanyi sia me ŋu o. Yehowa do ŋugbe be yeatsɔ amesiwo ku amegã ‘ado agbae ɖe ye ɖokui dzi,’ eye yeana ŋusẽ si hiã la wo be woado dzi ayi edzi awɔ nuteƒe. Atsɔ wo, ado ŋusẽ wo, ahaɖe wo.—Hebritɔwo 6:10.
Kpɔ Nyuie le Egbeŋkekea me Trɔ̃wo Ŋu
8. Nuvɔ̃ si ŋu taflatsedodo aɖeke mele o kae Yesaya detɔ aɖewo wɔ?
8 Kpɔ alesi gbegbe Babilontɔ siwo ɖoa ŋu ɖe trɔ̃ siwo ava zu nu maɖinuwo keŋkeŋ ŋu la ada ƒui ɖa le susu me! Ðe wòle be Israel nabu be yewoate ŋu atsɔ mawu mawo asɔ kple Yehowaa? Kura o. Esɔ be Yehowa bia be: “Ameka ŋu miebe, yewoatsɔm aɖoe, ne míasɔ kple mía nɔewo? eye ameka miebe, yewoatsɔ aɖo ŋunye, ne míaɖi mía nɔewo?” (Yesaya 46:5) Aleke gbegbe taflatsedodo aɖeke mele eŋu o nye si be Yesaya detɔ aɖewo va subɔ kpememe maƒonu siwo me agbe mele o eye wɔna aɖeke mele wo ŋu o la! Bometsinue wònye vavã be dukɔ si nya Yehowa nanɔ ŋu ɖom ɖe legba siwo amegbetɔ tsɔ eƒe asi wɔ siwo me agbe mele o eye womete ŋu kpɔa wo ɖokui ta o ŋu.
9. Ƒo nu tso trɔ̃subɔla aɖewo ƒe nuŋububu si me susu mele o ŋu.
9 Bu trɔ̃subɔlawo ƒe nuŋububu si me susu mele o la ŋu kpɔ. Nyagblɔɖia yi edzi be: “Wo, amesiwo dudua sika tsoa kotoku me ɖe anyi, eye wodaa klosalo le nudanu me, woɖatsɔa gbede, ne wòatsɔe awɔ mawu, si woadze klo ade ta agu na.” (Yesaya 46:6) Trɔ̃subɔlawo gblẽa ga geɖe tsɔ wɔa woƒe mawui, abe ɖe trɔ̃ si ŋu wogblẽ ga geɖe ɖo te ŋu ɖea ame wu esi wowɔ kple ati ene. Ke hã agbagba kae woɖadze alo nu xɔasi kawoe woɖatsɔ wɔe o, legba si me agbe mele o ko wòganye, eye menye naneke wu ema o.
10. Aleke woƒo nu tso trɔ̃subɔsubɔ ƒe toflokonyenye ŋui?
10 Nyagblɔɖia yi edzi te gbe ɖe trɔ̃subɔsubɔ ƒe bometsinunyenye dzi be: “Wokɔe ɖo abɔta, eye wode ta ete ɖadro ɖe enɔƒe; etsia tre ɖi meʋãna tsoa eteƒe o. Ne ame aɖe do ɣli nɛ hã, mesenɛ o, eye meɖenɛ tsoa eƒe hiã la me o.” (Yesaya 46:7) Movinu kae nye si wònye be woado gbe ɖa na legba si mete ŋu sea nu alo wɔa nu o! Hakpala la ƒo nu tso nusiawo siwo wodea ta agu na ƒe numaɖinunyenye ŋu nyuie be: “Woƒe legbawo nye klosalo kple sika, amegbetɔ ƒe asinudɔwɔwɔwo wonye. Nu li na wo, womeƒoa nu o; ŋku li na wo, womekpɔa nu o; to li na wo, womesea nu o; ŋɔti li na wo, womeʋẽa nu sena o; asi li na wo, wometea nu kpɔna o; afɔ li na wo, womezɔa azɔli o, eye womeƒoa nu toa ve me o. Amesiwo wɔa wo kple amesiwo katã ɖoa dzi ɖe wo ŋu la, sɔ kpli wo.”—Psalmo 115:4-8.
“Mili Ðe Nu Ðeka Dzi”
11. Nukae akpe ɖe amesiwo tsi vedomesi ŋu ‘woali ɖe nu ɖeka dzi’?
11 Esi Yehowa ɖe trɔ̃subɔsubɔ ƒe toflokonyenye fia vɔ la, egblɔ nusiwo ta wòle be eƒe dukɔa nasubɔ ye, esi wògblɔ be: “Miɖo ŋu esia, eye mili ɖe nu ɖeka dzi; mi godzelawo, mina wòade dzi gbɔ na mi. Miɖo ŋu nusiwo dzɔ va yi tso blema la be, nyee nye Mawu, ɖeke megali o, nyee nye Mawu, ame aɖeke mesɔ kplim o.” (Yesaya 46:8, 9) Ele be amesiwo tsi vedomesi le tadedeagu vavãtɔ kple trɔ̃subɔsubɔ dome naɖo ŋku nusiwo dzɔ va yi dzi. Ele be woaɖo ŋku nusiwo Yehowa wɔ dzi. Esia akpe ɖe wo ŋu woali ɖe nu ɖeka dzi ahawɔ nusi sɔ. Akpe ɖe wo ŋu woagatrɔ ava de ta agu na Yehowa.
12, 13. Aʋa ka wɔmee Kristotɔwo le, eye aleke woawɔ aɖu dzii?
12 Dzideƒonamenya siawo gahiã egbea. Abe Israel-viwo ene la, ele be Kristotɔ anukwaretɔwo nawɔ aʋa atsi tre ɖe tetekpɔwo kple woa ŋutɔwo ƒe blibomademadewo ŋu. (Romatɔwo 7:21-24) Tsɔ kpe ɖe eŋu la, wokpe gbɔgbɔmeʋa kple futɔ makpɔmakpɔ aɖe si ƒe ŋusẽ tri akɔ. Apostolo Paulo gblɔ be: “Míele kame tem kple ʋu kpakple ŋutilã o, ke boŋ mía kple dziɖulanyenye kple ŋusẽ kple xexe sia me fia, siwo le fifi viviti sia me kpakple vɔ̃ɖinyenye ƒe gbɔgbɔ, siwo le dziƒonutowo me lae le kame tem.”—Efesotɔwo 6:12.
13 Satana kple eƒe gbɔgbɔ vɔ̃wo awɔ nusianu si woate ŋui be yewoatrɔ Kristotɔwo ɖa le tadedeagu vavãtɔ ŋu. Ele be Kristotɔwo nawɔ ɖe Yehowa ƒe aɖaŋuɖoɖoa dzi ahali ɖe nu ɖeka dzi. Alekee? Apostolo Paulo ɖe eme be: “Mido Mawu ƒe aʋawɔnu blibo la katã, bene miate ŋu anɔ te ɖe Abosam ƒe aɖaŋu vɔ̃wo nu.” Yehowa medɔa esubɔlawo ɖe aʋa ne medzra wo ɖo o. Woƒe gbɔgbɔmeʋawɔnu aɖee nye “xɔse ƒe akpoxɔnu, si [woate] ŋu atsɔ atsi vɔ̃ɖitɔ la ƒe atsurɔ bibiawo.” (Efesotɔwo 6:11, 16) Israel-viwo nye vodalawo elabena wogbe gbɔgbɔmeɖoɖo siwo Yehowa wɔ na wo. Ne ɖe wobu nu klitsu siwo Yehowa wɔ ɖe wo ta enuenu ŋu la, anye ne womava trɔ ɖe trɔ̃subɔsubɔ nyɔŋu ŋu o. Neva eme be míasrɔ̃ nu tso woƒe kpɔɖeŋua me eye míaɖoe kplikpaa be míaʋuʋu le nunyuiwɔwɔ ƒe aʋa la wɔwɔ me gbeɖe o.—Korintotɔwo I, 10:11.
14. Ŋutete ka dzie Yehowa he susu yii tsɔ fia be ye koe nye Mawu vavã la?
14 Yehowa nye “amesi ɖe nuwuwu fia le gɔmedzedzea me ke kple nusi gbɔna dzɔdzɔ ge la fia le blema ke gblɔ bena: Nye tameɖoɖo ava me, eye mawɔ nye didiwo katã dzi.” (Yesaya 46:10) Mawu bubu kae ate ŋu asɔ kple Yehowa le go sia me? Etsɔme gbɔgblɔ ɖi nye Wɔla la ƒe Mawunyenye ƒe kpeɖodzi ɖedzesi aɖe. Gake ehiã nu geɖe wu nukpɔkpɔdoŋgɔ be woana nya siwo wogblɔ ɖi nava eme. Nya si wògblɔ be “nye tameɖoɖo ava me” te gbe ɖe alesi Mawu ƒe tameɖoɖo si wòɖe gblɔ metrɔna o dzi. Esi seɖoƒe meli na Yehowa ƒe ŋusẽ o ta la, naneke mele xexeame si ate ŋu axe mɔ na eƒe lɔlɔ̃nu wɔwɔ o. (Daniel 4:32) Eyata míate ŋu aka ɖe edzi be nyagblɔɖi siwo meva eme haɖe o ava eme le Mawu ƒe ɣeyiɣi si sɔ dzi.—Yesaya 55:11.
15. Yehowa ƒe etsɔmegbɔgblɔɖi ŋutete ƒe kpɔɖeŋu ɖedzesi ka dzie wohe míaƒe susu yii?
15 Yesaya ƒe nyagblɔɖinya siwo kplɔe ɖo he míaƒe susu yi ŋutete si le Yehowa si be wòagblɔ etsɔme ɖi ahana wòava eme la ƒe kpɔɖeŋu ɖedzesi aɖe dzi be: “Nye amesi yɔ hɔ̃ tso ɣedzeƒe kple ŋutsu, si nye nye tameɖoɖotsɔla la, tso anyigba matsɔmatsɔ dzi; megblɔ nya, eye mana wòava eme hã, meɖo nu, eye mawɔe hã.” (Yesaya 46:11) Esi Yehowa Mawu nye “amesi ɖe nuwuwu fia le gɔmedzedzea me” ta la, atrɔ asi le nusiwo adzɔ le amegbetɔ ƒe nyawo me ŋu be wòana eƒe tameɖoɖo nava eme. Ayɔ Kores tso “ɣedzeƒe,” alo Persia, si le ɣedzeƒe, afisi Kores ƒe fiadu, Pasargadae, si me wòlɔ̃a nɔnɔ wu anɔ. Kores anɔ abe “hɔ̃” ene aƒo Babilon kpata esi womele mɔ kpɔm nɛ o.
16. Aleke Yehowa ɖo kpe kakaɖedzi si le nya si wògblɔ ɖi ɖe Babilon ŋu la dzii?
16 Nya siwo nye “megblɔ nya, eye mana wòava eme hã” ɖo kpe kakaɖedzi si le nya si Yehowa gblɔ ɖi le Babilon ŋu la ŋuti dzi. Togbɔ be amegbetɔ madeblibo atsi klokloklo ado ŋugbe hã la, Wɔla ya medoa kpo eƒe nya dzi wɔwɔ gbeɖe o. Esi Yehowa nye Mawu si ‘mate ŋu aka aʋatso’ o ta la, míate ŋu aka ɖe edzi be ne ‘eɖo nu’ la, ‘awɔe hã.’—Tito 1:2.
Dzi Siwo Mexɔna Sena O
17, 18. Amekawoe woate ŋu agblɔ be wonye “tamesẽlawo” (a) le blema? (b) egbea?
17 Yehowa gatrɔ susu ɖe Babilontɔwo ŋu le nyagblɔɖi me hegblɔ be: “Miɖo tom, mi tamesẽlawo, mi amesiwo le adzɔge na dzɔdzɔenyenye.” (Yesaya 46:12) Nyagbɔgblɔ si nye “tamesẽlawo” fia dzimesẽla siwo ɖoe kplikpaa be yewoatsi tre ɖe Mawu ƒe lɔlɔ̃nu ŋu. Ðikeke mele eme o be Babilontɔwo le adzɔge tso Mawu gbɔ. Woƒe fuléle Yehowa kple eƒe amewo ʋã wo wotsrɔ̃ Yerusalem kple eƒe gbedoxɔa eye wokplɔ emenɔlawo yi aboyo mee.
18 Egbea amesiwo kea ɖi le dzime eye womexɔna sena o tsɔa dzimesesẽ gbea Fiaɖuƒegbedasi si ƒe gbeƒã ɖem wole le anyigba dzi katã la sese. (Mateo 24:14) Womedi be yewoalɔ̃ ɖe edzi be Yehowae nye amesi dze anye Dziɖulagã o. (Psalmo 83:19; Nyaɖeɖefia 4:11) Esi woƒe dzi “le adzɔge na dzɔdzɔenyenye” ta la, wogbea eƒe lɔlɔ̃nu wɔwɔ hetsia tre ɖe eŋu. (Timoteo II, 3:1-5) Abe Babilontɔwo ene la, wogbea toɖoɖo Yehowa.
Mawu ƒe Xɔname Matsi Megbe O
19. Mɔ ka nue Yehowa awɔ nu dzɔdzɔe na Israel le?
19 Nya siwo wotsɔ wu Yesaya ta 46 nui te gbe ɖe Yehowa ƒe amenyenye vovovowo dzi be: “Mehe nye dzɔdzɔenyenye va kpuiƒee, mele adzɔge o, eye nye xɔname mahe ɖe megbe o; mana xɔname Zion kple nye atsyɔ̃ Israel.” (Yesaya 46:13) Mawu ƒe ablɔɖe nana Israel anye nuwɔna dzɔdzɔe. Maɖe mɔ eƒe dukɔ natsi aboyo me o. Zion ƒe xɔname ava le ɣeyiɣi si sɔ dzi, eye “mahe ɖe megbe o.” Ne woɖe Israel-viwo tso aboyo me la, woava zu nukpɔkpɔ na dukɔ siwo ƒo xlã wo. Alesi Yehowa aɖe eƒe dukɔ aɖo kpe eƒe ameɖeŋusẽ dzi. Woaklo nu le Babilon-mawu siwo nye Bel kple Nebo ƒe numaɖinunyenye dzi be amesiame nakpɔ, eye woaɖee afia be ŋusẽ mele wo ŋu o.—Fiawo I, 18:39, 40.
20. Nukata Kristotɔwo ate ŋu aka ɖe edzi be Yehowa ƒe “xɔname mahe ɖe megbe o”?
20 Le ƒe 1919 me la, Yehowa na eƒe amewo kpɔ ablɔɖe tso gbɔgbɔmeboyo me. Mehe ɖe megbe o. Nudzɔdzɔ ma kple nusiwo dzɔ le blema esime Kores mu Babilon la siaa dea dzi ƒo na mí egbea. Yehowa do ŋugbe be yeahe nuɖoanyi vɔ̃ɖi sia kple eƒe alakpasubɔsubɔ ava nuwuwui. (Nyaɖeɖefia 19:1, 2, 17-21) Le amegbetɔ ƒe nukpɔkpɔ nu la, awɔ na Kristotɔ aɖewo be yewoƒe xɔname tsi megbe. Gake alesi Yehowa gbɔ dzi ɖi be ye ŋutɔ yeƒe ɣeyiɣi si sɔ nade hafi yeana ŋugbedodo ma nava eme la nye nu dzɔdzɔe ŋutɔŋutɔ si wòwɔ. Elabena “[Yehowa] melɔ̃ bena, ame aɖeke natsrɔ̃ o, ke boŋ bena amewo katã natrɔ va dzimetɔtrɔ gbɔ.” (Petro II, 3:9) Eyata kakaɖedzi nenɔ asiwò be “xɔname mahe ɖe megbe o,” abe alesi wònɔ le blema Israel ƒe ŋkekeawo me ene. Nyateƒee, esi xɔxɔgbe la le aƒe tum la, Yehowa yi edzi le amewo kpem lɔlɔ̃tɔe be: “Midi Yehowa, ŋkeke alesi wòle gaglãgbe, miyɔe, esime wòtsɔ kpuiƒe. Ame vɔ̃ɖi neɖe asi le eƒe mɔ ŋu, eye nu vlo wɔla neɖe asi le eƒe susuwo ŋu, ne wòatrɔ ɖe Yehowa ŋu, ekema akpɔ nublanui nɛ, eye wòatrɔ ɖe mía Mawu ŋu, elabena etsɔa nuvɔ̃ kena geɖe.”—Yesaya 55:6, 7.
[Nɔnɔmetata siwo le axa 94]
Babilon-mawuwo mekpɔ eta be wometsrɔ̃e o
[Nɔnɔmetata siwo le axa 98]
Ele be Kristotɔ siwo li egbea nakpɔ nyuie le egbeŋkekea me trɔ̃wo ŋu
[Nɔnɔmetata siwo le axa 101]
Li ɖe nu ɖeka dzi nàwɔ nusi sɔ