Gbe Ƒe Ðiɖime Si Sɔ

NE NUƑOLA bɔbɔ gbe akpa la, nyaselawo dometɔ aɖewo anɔ akɔlɔ̃e dɔm. Ne gbeƒãɖela ƒe gbe yi to akpa le gbeadzi la, aƒea me nɔla ƒe to manɔ nyaa ŋu o. Eye ne kpekpevalawo ƒe gbe mede dzi nyuie le nyaŋuɖoɖo me o la, nyaselawo makpɔ tutuɖo si dze o. (Heb. 10:24, 25) Ne nuƒola kɔ eƒe gbe dzi evɔ mehiã nenema hafi o la, nyaselawo mavo le wo ɖokui me o—ado dziku na wo kura gɔ̃ hã.—Lod. 27:14.

Bu Wò Nyaselawo Ŋu. Amekawoe nèle nu ƒom na? ame ɖekaea? ƒome aɖeea? nɔvi ʋɛ aɖewo siwo kpe ta hena gbeadziyiyiea? hame blibo laea? alo ame gbogbo aɖewo le takpekpe gã aɖe mee? Edze ƒã be gbe si sɔ nyuie le nɔnɔme aɖe me la, masɔ tututu le nɔnɔme bubu me o.

Mawu subɔlawo ƒo nu na ameha gãwo le ɣeyiɣi vovovowo me le blema. Nuƒomɔ̃ menɔ anyi le Salomo ŋɔli esime wòʋu gbedoxɔa nu le Yerusalem o. Eyata Salomo tsi tre ɖe kɔkɔƒe aɖe eye wòyra dukɔ la “kple gbe sesĩ.” (Fia. I, 8:55; Kron. II, 6:13) Ƒe alafa nanewo megbe esime wokɔ gbɔgbɔ kɔkɔe ɖe anyi le Pentekoste-ŋkekea dzi vɔ megbe le ƒe 33 M.Ŋ. la, ameha aɖe—wo dometɔ aɖewo nye ɖetsɔlemetɔwo, bubuwo nye fewuɖulawo—ƒo ƒu ɖe Kristotɔwo ƒe ha sue la ŋu le Yerusalem. Petro wɔ susu ŋudɔ nyuie esi ‘wòtsi tre hekɔ eƒe gbe dzi.’ (Dɔw. 2:14) Ðase ʋãme aɖee wòɖi gbemagbe.

Aleke nàwɔ anya nenye be wò gbe le ɖiɖim nyuie? Nyaselawo ƒe nuwɔnae nye mɔ nyuitɔwo kekeake dometɔ ɖeka si dzi nàte ŋu ato anya. Ne ède dzesii be nyaselawo dometɔ aɖewo ƒe nuwɔna fia be womele nyaa sem tututu o la, ekema ele be nàgakɔ gbe dzi vie.

Míeɖale nu ƒom na ame ɖeka alo na amehawo o, anyo ŋutɔ ne ènya ame vovovo siwo le nyaa sem. Ne ame aɖe ƒe to mesea nu tututu o la, ekema ahiã be nàkɔ gbe dzi. Gake ne tsitsi le ƒe me ta koe womele nu sem tututu o hafi wò gbe le dzi dem la, nyaselawo makpɔ dzidzɔ ɖe ŋuwò o. Woabu ɣlidodoa abe amemabumabu ene kura gɔ̃ hã. Le dukɔ aɖewo me la, wobua gbe si de dzi boo be efia be amea kpɔ dziku alo be megbɔa dzi ɖi o.

Bu Gbeɖiɖi Siwo Doa Kplamatse Nuƒo Ŋu. Ne èle gbeadzi la, nɔnɔme siwo nàdo goe ye afia gbe si tɔgbe wòle be nàtsɔ aɖi ɖasee. Ðewohĩ ʋuwo va le yiyim hele toɣli ɖem, ɖeviwo le toɣli ɖem, avuwo le wowom, wole ha ƒom sesĩe, alo woʋu television wòle ɖiɖim sesĩe. Le go bubu me la, ne aƒeawo te ɖe wo nɔewo ŋu la, ate ɖe aƒea me nɔla dzi ne le wò gbe si le dzi dem boo ta la, aƒelikawo anɔ bubum be nya aɖee le dzɔdzɔm.

Nɔnɔme vovovowo dzea ŋgɔ nɔvi siwo hã ƒoa nuƒo le hamea alo takpekpewo me. Nuƒoƒo na nyaselawo le gota to vovo kura na nuƒoƒo le xɔ si wotu ale gbegbe be gbeɖiɖia ɖoa xɔa me ƒe akpa sia akpa nyuie. Dutanyanyuigblɔla eve nɔ dutoƒonuƒo ƒom ɖe wo nɔewo yome le ɖetsɔlemetɔ aɖe ƒe aƒe ƒe xɔxɔnu le Latin Amerika dukɔ aɖe me esime dua me tɔ siwo nɔ dua ƒe takpeƒe si te ɖe wo ŋu la nɔ nusiwo wóna sesĩe la dam ɖe yame, evɔ koklotsu aɖe hã nɔ atɔ kum madzudzɔmadzudzɔe le afima lɔƒo!

Nane ate ŋu ado mo ɖa esime nuƒoa le edzi yim, si awɔe be wòahiã be woatɔ te nuƒoa vaseɖe esime woakpɔ kplamatsedonua gbɔ vɔ loo alo be woakɔ gbe dzi ahayi nuƒoa dzi. Le kpɔɖeŋu me, ne wole kpekpea wɔm le xɔ si wogba kple zingi me eye kasia tsi gã aɖe te dzadza la, asesẽ ŋutɔ be nyaselawo nase nusi gblɔm nuƒolaa le. Ne ɖevi aɖe le avi fam alo ame aɖewo tsi megbe la, esiawo hã ate ŋu ado kplamatse nusese. Srɔ̃ alesi nàtrɔ ɖe kplamatsedonuawo ŋui ale be nusiwo gblɔm nèle la naɖe vi na wò nyaselawo bliboe.

Ne nuƒomɔ̃ li, si ate ŋu ana wò gbe nade dzi la, anyo ŋutɔ, gake ele be nuƒolaa nakɔ gbe dzi koe ne ehiã. Ele be nuƒolaa nayi eƒe nuƒoa dzi, nuƒomɔ̃ manɔmee, le teƒe siwo wotsia elektrik kaɖiwo le edziedzi.

Bu Nusi Ŋu Nèle Nu Ƒom le la Ŋu. Nusi ŋu nuƒoa ku ɖo kple gbeɖiɖi si tɔgbe asɔ nɛ. Ne nusi gblɔm nèle la bia be ŋusẽ nanɔ gbeɖiɖia me la, mègaƒo nu kple gbe blewu atsɔ axɔ ŋusẽ le nuƒoa si o. Le kpɔɖeŋu me, ne èle mokaname xlẽm tso Ŋɔŋlɔawo me la, ele be wò gbe nasẽ ŋu wu gbe si nàtsɔ axlẽ lɔlɔ̃ ƒe aɖaŋuɖoɖoe. Trɔ gbea ƒe ɖiɖime wòasɔ ɖe nyatia nu, gake kpɔ nyuie be nàgahe amewo ƒe susu va ɖokuiwò dzi o.

Bu Wò Taɖodzinua Ŋu. Ele be dzo nanɔ wò gbea me nyuie ne èdi be yeade dzo lãme na wò nyaselawo hena dɔwɔna. Ne èdi be yeaɖɔ woƒe tamesusu ɖo le nane gome la, mègatsɔ gbe sesẽ he woƒe susu ɖa le wò nya ŋu o. Ne èdi be yeafa akɔ na wo la, gbe si le bɔkɔɔ ye nye nyuitɔ.

Gbe si De Dzi la Zazã Nyuie. Ne ame aɖe le dɔ wɔm kple ŋkubiã eye nèdi be wòaɖo to ye la, edzea edzi zi geɖe ne èkɔ gbe dzi. Dzilawo nya esia, eyata woƒe gbe dea dzi boo ne wole wo viwo yɔm bene woadzudzɔ fefe ahage ɖe xɔ me. Ahiã hã be gbea nade dzi ne zimenɔla di be yeaɖe gbeƒãe be ɣeyiɣia de hena kpekpea alo takpekpea gɔmedzedze. Ne gbeƒãɖelawo le gbeadzi eye woke ɖe amesiwo le dɔ wɔm le xexe ŋu la, ɖewohĩ woakɔ gbe dzi hafi ado gbe na ameawo.

Ne amea trɔ ɖe ŋuwò vɔ la, egale vevie kokoko be nàyi edzi akɔ gbe dzi ne èle nu ƒom nɛ. Gbe si bɔbɔ akpa la ana amea nabu be nuƒolaa medzra ɖo tututu o alo be eya ŋutɔ meka ɖe eɖokui dzi o.

Ne wokɔ gbe dzi heɖe gbe na ame la, ewɔnɛ be amea tsona kpla ɖe dɔwɔwɔ ŋu. (Dɔw. 14:9, 10) Nenema ke ne woɖe gbe kple ɣli la, ate ŋu aɖe ame tso afɔku me. Le Filipi la, gaxɔdzikpɔla aɖe de eɖokui wu ge kloe le esi wòbu xaa be gaxɔmenɔlawo si ta. ‘Paulo do ɣli kple gbe sesẽ gblɔ bena: Mègawɔ vɔ̃ aɖeke ɖokuiwò o, elabena mí katã míele afii!’ Ale gaxɔdzikpɔla megaxa wu eɖokui o. Emegbe Paulo kple Sila ɖi ɖase na eyama kple eƒemetɔwo, eye wo katã va xɔ nyateƒea.—Dɔw. 16:27-33.

Alesi Nàwɔ Wò Gbe Nade Dzi. Le ame aɖewo gome la, ehiã be woaku kutri agbadre hafi ate ŋu asrɔ̃ alesi woawɔ be woƒe gbe nasɔ ɖe nɔnɔmea nu. Ame aɖewo ƒe gbe meɖina tututu o esi wònye be le dzɔdzɔme la, woƒe gbe mesẽ o ta. Gake ne amesiawo le wo tɔ sinua wɔm la, woate ŋu awɔ ŋgɔyiyi togbɔ be gbe si le bɔkɔɔ akpɔtɔ anɔ wo si hã. Alesi nègbɔa yae kple alesi nètsia tsitree alo nɔa anyii hã le vevie. Srɔ̃ alesi nànɔ anyi adzɔ kple alesi nànɔ tsitrenu adzɔ kã. Mègabi ɖe ŋgɔ o, eye nàgbɔ ayi eme ʋĩ. Lɔ ya ɖe wò dzitodzitoawo me yi eme ʋĩ ke. Ya si ge ɖe dzitodzitoawo me aleae wɔnɛ be nàte ŋu anɔ ŋusẽ kpɔm ɖe wò gbeɖiɖia dzi esime nèle asi ɖem le yaa ŋu vivivi le nuƒoƒo me.

Ame bubuwo hã ƒe kuxie nye be woƒoa nu sesĩe akpa. Ðewohĩ esi wònye be wowɔa dɔ le gota alo le afisi ɣlidodo dea dzi hoo le la tae nɔnɔme sia tsi wo si ɖo. Ate ŋu anɔ eme hã be afisi wotsi le la, amesiame doa ɣli le nuƒoƒo me faa eye woxɔa nya le ame nu bɔbɔe. Le esia ta wobuna be nusi yewoate ŋu awɔ koe nye be yewoƒe gbe nade dzi boo wu ame mamlɛawo tɔ. Nenye be woyi edzi le wɔwɔm ɖe Biblia ƒe aɖaŋuɖoɖo be woado ‘dɔmetɔtrɔ kple nublanuikpɔkpɔ, dɔmekɔkɔ, ɖokuibɔbɔɖeanyi, dɔmefafa, kple dzigbɔgbɔ blewu’ dzi la, ava eme be amesiawo atrɔ asi le woƒe gbe ŋu wòasɔ na dzeɖoɖo.—Kol. 3:12.

Dzadzraɖo nyuie, nuteƒekpɔkpɔ si asu asiwò esi nèle gome kpɔm le gbeadzisubɔsubɔdɔa me edziedzi kpakple gbedodoɖa na Yehowa akpe ɖe ŋuwò be nàƒo nu kple gbe si sɔ. Eɖanye nuƒolanɔƒee nèle nu ƒom le alo ame aɖee nèle nu ƒom na le gbeadzi o, wɔ tɔwò sinua be wò susu nanɔ alesi nàwɔ akpe ɖe amea ŋu ale be wòalé to ɖe wò nyaa ŋu la dzi.—Lod. 18:21.