Dzonɔameme

DZONƆAMEME naa agbe nɔa nuƒo me. Togbɔ be ele vevie be nufiame nanɔ wò nuƒoa me hã la, nuƒoa ƒoƒo dzonɔamemetɔe ye ana nàlé nyaselawo ƒe ɖetsɔleme ɖe te. Eɖanye afikae nètso alo amenyenye kae le asiwò o, àte ŋu aƒo nu dzonɔamemetɔe.

Ƒo Nu Kple Seselelãme. Esi Yesu nɔ nu ƒom na Samaria nyɔnu aɖe la, egblɔ nɛ be ele be amesiwo subɔa Yehowa nasubɔe “le gbɔgbɔ kple nyateƒe me.” (Yoh. 4:24) Ele be woƒe subɔsubɔ natso dzi si yɔ fũ kple ŋudzedzekpɔkpɔ me eye wòasɔ ɖe nyateƒe si le Mawu ƒe Nya la me nu. Ne ŋudzedzekpɔkpɔ blibo le ame me la, adze le alesi wòaƒo nui me. Adi vevie be yeaƒo nu tso ɖoɖo siwo Yehowa wɔ na mí lɔlɔ̃tɔe ŋu na amewo. Alesi tututu wòle sesem le eɖokui me la adze le eƒe moɖoɖo, eƒe asiwɔwɔ ɖe nya dzi, kple eƒe gbe me.

Ke nukata wòate ŋu adzɔ be dzo manɔ nuƒola si lɔ̃ Yehowa eye wòxɔ nya si gblɔm wòle dzi se la ƒe nuƒo me o? Eƒe dzadzraɖo ɖe nya si wòagblɔ ŋu ɖeɖe mefia be ewɔ vɔ o. Ele be nuƒoa naxɔ eya ame bliboa me ŋutɔŋutɔ, wòawɔ dɔ ɖe eƒe seselelãmewo dzi bliboe. Tsɔe be wode dɔ asi nɛ be wòaƒo nu tso Yesu Kristo ƒe tafevɔsaa ŋu. Ne nuƒolaa le eƒe nuƒoa ƒom la, menye nya siwo ŋu nuƒoa ku ɖo koe wòle be wòaxɔ susu me nɛ o, ke ele be ŋudzedzekpɔkpɔ ɖe nusi Yesu ƒe vɔsaa fia na eya nuƒolaa ŋutɔ, kpakple na eƒe nyaselawo, ŋu hã naxɔ susu me nɛ. Ele be eƒe susu nayi akpedada si yɔ eme na Yehowa Mawu kple Kristo Yesu ɖe nunana wɔnuku sia ta dzi. Ele be wòabu mɔnukpɔkpɔ gã si wòʋu ɖi na ameƒomea ŋu—si nye dzidzɔkpɔkpɔ tegbee le lãmesẽ deblibo me le anyigba dzi paradiso si woagaɖo anyi me! Esia bia be wòana nya si gblɔm wòle natso eƒe dzi me.

Biblia gblɔ tso agbalẽfiala Ezra si nɔ Israel ŋu be ‘etsɔ eƒe dzi ɖo Yehowa ƒe se la me dzodzro ŋu, ne wòawɔ edzi, eye wòafia ɖoɖowo kple kɔnuwo le Israel.’ (Ezra 7:10) Ne míawo hã míewɔe nenema—míedzra míaƒe dzi ɖo, ke menye míaƒe nufiamewo ko o—la, míate ŋu aƒo nu tso dzi me faa. Nyateƒea gbɔgblɔ tso dzi me alea ate ŋu akpe ɖe amesiwo míele nu ƒom na ŋu be lɔlɔ̃ vavã na nyateƒea naɖo wo me.

Bu Wò Nyaselawo Ŋu. Nu bubu si ana dzo nanɔ wò nuƒo mee nye kakaɖedzi si anɔ mewò be ehiã be wò nyaselawo nase nya si gblɔm nèle. Efia be ne èle wò nuƒoa dzram ɖo la, menye nya veviawo tiatia nyuie koe hiã o ke ehiã hã be nàdo gbe ɖa na Yehowa abia be wòafia mɔ wò bene nàte ŋu azã nyawo atsɔ aƒo nui wòaɖe vi na amesiwo nàƒo nu na. (Ps. 32:8; Mat. 7:7, 8) Bu nusita wòhiã be wò nyaselawo nase nyaa, alesi wòaɖe vi na woe, kple alesi nàte ŋu agblɔe le mɔ si ana woade asixɔxɔ eƒe vevienyenye ŋu la ŋuti.

Yi edzi nàdzra nuƒoa ɖo eye nàsrɔ̃e vaseɖe esime didi vevie naɖo mewò na nuƒoa ƒoƒo. Mehiã be wòanye nya yeye kokoko o, gake àte ŋu atrɔ asi le nyatia ŋu to mɔ si le yeye kura nu. Ne èdzra nya si akpe ɖe wò nyaselawo ŋu ŋutɔŋutɔ be wo kple Yehowa dome ƒomedodo me nasẽ ɖe edzi, woakpɔ ŋudzedze ɖe eƒe nunanawo ŋu, woakpe akɔ dzidzedzetɔe kple nuɖoanyi xoxo sia me nyaƒoɖeamenuwo, alo be woawɔ subɔsubɔdɔa wòaganyo wu la, ekema esɔ le go sia go me be dzo nanɔ mewò ɖe nuƒoa ŋu.

Ke ne wò dɔdasiae nye be nàxlẽ nu le dutoƒo ɖe? Be nàte ŋu awɔ esia dzonɔamemetɔe la, ebia nu geɖe wu nyawo yɔyɔ pɛpɛpɛ kple nyagbewo xexlẽ tẽ ko. Srɔ̃ nuxexlẽa nyuie. Ne Biblia ƒe akpa aɖee wode asi na wò be nàxlẽ la, wɔ numekuku le eŋu. Kpɔ egbɔ be nèse nusi tututu wòfia la gɔme nyuie. Bu alesi wòaɖe vi na mia kple wò nyaselawo ŋu, eye nàxlẽe kple didi vevie be wòaɖe vi na wò nyaselawo.

Gbeadzie nèle dzadzram ɖo na? To wò dzeɖonyaa kple mawunyakpukpui siwo nèdi be yeazã me. Bu nusi le susu me na ameawo hã ŋu. Nukawoe le nyadzɔdzɔwo me? Kuxi kawoe amewo le go domee? Ne èdzra ɖo be yeafia amewo ne woakpɔe be kuxi siwo ŋu wotsi dzi ɖo la gbɔ kpɔnu le Mawu ƒe Nya la me la, didia aɖo mewò vevie ɖe nyaa gbɔgblɔ ŋu, eye esia ana dzonɔamemea nava le eɖokui si.

Ðe Dzonɔameme Fia to Nuƒo si me Dzo Le la Ƒoƒo Me. Alesi nàƒo nui koŋ ye afia be dzo le mewò. Ele be wòadze le wò moɖoɖo me. Na woakpɔe be kakaɖedzi le mewò, gake esia mefia be nàƒo nu abe ɖe nèle nyaa zim ɖe ame dzi ene o.

Ehiã be woada asɔ. Ðewohĩ ame aɖewo adi be yewoagblɔ nya sia nya dzonɔamemetɔe. Ahiã be woakpe ɖe amesiawo ŋu woakpɔe adze sii be ne nuƒola wɔ nu wògbɔ eme alo ne seselelãme si wòɖe fia sɔ gbɔ akpa le eƒe nuƒoa me la, nyaselawo ƒe susu ava nɔ eya amea ŋu, ke menye eƒe nyawo ŋu o. Gake ele be woade dzi ƒo na amesiwo kpea ŋu hã be woana dzo nanɔ woƒe nuƒo me wu.

Dzonɔameme te ŋu nana dzo ɖoa ame bubuwo hã me. Ne èkpɔ wò nyaselawo ŋkume alesi dze eye dzo le wò nuƒoa me la, dzonɔameme sia aɖo wò nyaselawo hã me. Dzo nɔ Apolo me le eƒe nuƒo ƒoƒo me, eye wogblɔ le eŋu be enye nuƒola bibi. Ne èxɔ dzo le Mawu ƒe gbɔgbɔ me la, wò nuƒoƒo dzonɔamemetɔe aʋã amesiwo ɖoa to wò be woawɔ afɔɖeɖe si sɔ.—Dɔw. 18:24, 25; Rom. 12:11.

Dzonɔamemea Nasɔ na Nyatia. Kpɔ egbɔ be dzonɔameme si nàɖe afia nu nagasẽ le nuƒo bliboa katã ƒoƒo me ale be nu nava ti kɔ na wò nyaselawo o. Esia awɔe be nuxlɔ̃ame siwo katã nàna ɖe eyome la nati tome na amewo. Efia be ehiã vevie be nàdzra nuƒoa ɖo le mɔ si ana tɔtrɔ vovovo nanɔ eme nu. Kpɔ egbɔ be màɖe dzi ɖi fũ wòadze abe ɖe mètsɔ ɖeke le nuƒoa me ene o. Ne ètia wò nyawo nyuie la, ana nyatia navivi nuwò vevie. Gake zi geɖe la, ahiã be woana dzo nanɔ nuƒoa ƒe akpa aɖewo me wu bubuwo, eye ele be woana tɔtrɔ siwo anɔ nuƒoa me nade nu wo nɔewo me nyuie le nuƒo bliboa me.

Vevietɔ ele be woatsɔ dzonɔameme agblɔ nya veviawoe. Ele be veviƒewo alo teƒe ɖedzesiwo nanɔ wò nuƒoa me, siwo nye akpa veviawo ƒe nyataƒonya siwo gbɔ nàɖo. Esi nya siawoe nye wò nuƒoa ƒe akpa veviawo ta la, zi geɖe la, ele be woanye nya siwo ŋu nètrɔ asi le be wòaʋã wò nyaselawo. Esi nèna wò nyaselawo kpɔ kakaɖedzi le nyaa ŋu vɔ la, fifia ele be nàʋã wo, nàna viɖe siwo le nya siwo nègblɔ la dzi wɔwɔ ŋu nadze na wo. Wò dzonɔameme ɖe nyawo gbɔgblɔ ŋu ana nàɖo wò nyaselawo ƒe dzi gbɔ. Mele be nàtsɔ akpasesẽ azi seselelãme si le mewò ɖe amewo dzi o. Ele be susu si ta nàɖe dzonɔameme afia la nanɔ anyi, eye nyati si me dzrom nèlee aɖe dzonɔameme si hiã la afia.