TA 6

Nufiala Gã La Subɔ Ame Bubuwo

ÐE WÒNYOA ŋuwò ne ame aɖe wɔ nane na wòa?— Nyateƒee, enyoa ame bubuwo hã ŋu ne ame aɖe wɔ nane na wo. Edzɔa dzi na mí katã. Nufiala Gã la nya esia, eye wòwɔa nu nyui na amewo ɣesiaɣi. Egblɔ be: ‘Meva, menye bena woasubɔm o, ke boŋ bena masubɔ.’—Mateo 20:28.

Eyata ne míedi be míanɔ abe Nufiala Gã la ene la, nukae wòle be míawɔ?— Ele be míasubɔ amewo. Ele be míawɔ nu nyuiwo na wo. Enye nyateƒe be ame geɖe mewɔa esia o. Le nyateƒe me la, ame akpa gãtɔ dina be ame bubuwo boŋ nasubɔ yewo. Ɣeaɖeɣi Yesu yomedzelawo gɔ̃ hã see le wo ɖokui me nenema. Wo dometɔ ɖesiaɖe di be yeanye amegã, alo ame vevitɔ.

Gbeɖeka Yesu nɔ mɔ zɔm kple eƒe nusrɔ̃lawo, siwo nye eyomedzelawo. Esi woɖo du si nye Kapernaum, si tsɔ ɖe Galilea-ƒua gbɔ me la, wo katã woge ɖe aƒe aɖe me. Afima Yesu bia nya sia wo le be: ‘Nya ka ʋlim mienɔ le mia nɔewo dome le mɔa dzi?’ Wozi kpi, elabena wonɔ nya ʋlim le wo nɔewo dome le mɔa dzi le wo dometɔ si nye gãtɔ ŋu.—Marko 9:33, 34.

Yesu nyae be menyo be yeƒe nusrɔ̃lawo dometɔ aɖeke nabui be yee nye gã wu o. Eyata abe alesi míesrɔ̃e le agbalẽ sia ƒe ta gbãtɔ me ene la, etsɔ ɖevi sue aɖe ɖo wo titina eye wògblɔ na wo be ele be woabɔbɔ wo ɖokui abe ɖevi sue sia ene. Gake vaseɖe fifia la, womesrɔ̃ nu tso eme o. Eyata ɣeyiɣi kpui aɖe hafi Yesu naku la, ewɔ nane tsɔ fia nu woe, esi womaŋlɔ be akpɔ o. Nukae wòwɔ?—

Esi wo katã wonɔ nu ɖum la, Yesu tso le kplɔ̃a ŋu eye wòɖe eƒe awudziwui da ɖi. Etsɔ papahũ sa ɖe ali. Eyome wòtsɔ tsileze eye wòkɔ tsi ɖe eme. Eyomedzelawo anya nɔ nusi wɔ ge wògbɔna ŋu bum. Wonɔ Yesu kpɔm esi wòte ɖe wo dometɔ ɖesiaɖe ŋu, bɔbɔ klɔ afɔ na wo. Eyome wòtsɔ papahũ tutu afɔ na wo. Wò ya bu eŋu kpɔ ko! Ne ɖe nènɔ wo dome ɖe? Anye ne aleke nàse le ɖokuiwò me?—

Ewɔ na eyomedzelawo be mesɔ be Nufiala Gã la nasubɔ yewo alea o. Ekpe ŋu na wo. Le nyateƒe me la, Petro medi be yealɔ̃ ne Yesu nawɔ subɔsubɔdɔ tsɛ sia na ye o. Gake Yesu gblɔ be enye nusi le vevie na ye be yeawɔe.

Zi geɖe míeklɔa afɔ na mía nɔewo egbea o. Gake esia nye nusi wowɔna le ɣeyiɣi si me Yesu nɔ anyigba dzi. Ènya nusitaea?— Le anyigba si dzi Yesu kple eyomedzelawo nɔ la, atokotawo, siwo nye afɔkpa siwo dzi ka le lae wodona afɔwui madomadoe. Eyata ne wozɔ mɔ siwo dzi ʋuʋudedi le la, woƒe afɔ ƒoa ɖi. Enye dɔmenyowɔwɔ be woaklɔ ʋuʋudedia le afɔ na amedzro si va ame ƒe aƒeme.

Gake fifia Yesu yomedzelawo dometɔ aɖeke metsɔ eɖokui na be yeaklɔ ame mamlɛawo ƒe afɔ o. Eyata Yesu ŋutɔ wɔ dɔ sia. To esia wɔwɔ me la, Yesu fia nufiame vevi aɖe eyomedzelawo. Ehiã be woasrɔ̃ nufiame sia. Eye enye nufiame si wòhiã be míawo hã míasrɔ̃ egbea.

Ènya nufiame si le emea?— Esi Yesu gado eƒe awudziwuia eye wòbɔbɔ nɔ anyi ɖe enɔƒe le kplɔ̃a ŋu vɔ la, eɖe eme na wo be: ‘Mienya nusi mewɔ na mia? Mieyɔam be “Nufiala” kple “Aƒetɔ,” eye miegblɔe nyuie. Ne nye, miaƒe Aƒetɔ kple Nufiala, meklɔ miaƒe afɔ la, ekema ele na miawo hã be miaklɔ mia nɔewo ƒe afɔ.’—Yohanes 13:2-14.

Nufiala Gã la ɖee fia le afisia be yedi be ye yomedzelawo nasubɔ wo nɔewo. Medi be woabu wo ɖokui ko ŋuti o. Medi be woabui be yewole vevie ale gbegbe be ame bubuwoe wòle be woasubɔ yewo ɣesiaɣi o. Edi be woalɔ̃ faa asubɔ amewo.

Ðe ema menye nufiame nyui oa?— Ðe nànɔ abe Nufiala Gã la ene asubɔ amewoa?— Mí katã míate ŋu awɔ nuwo na amewo. Esia ado dzidzɔ na wo. Gake vevietɔ, ado dzidzɔ na Yesu kple Fofoa.

Menye nu sesẽe wònye be woasubɔ amewo o. Ne èléa ŋku ɖe nu ŋu la, àkpɔ nu geɖe siwo nàte ŋu awɔ na amewo. Bu eŋu fifi laa: Ðe nane li si nàte ŋu awɔ atsɔ akpe ɖe dada ŋua? Ènya be ewɔa nu geɖe na mia kple ƒome bliboa. Àte ŋu akpe ɖe eŋua?— Nukaŋuti màbiae be yeakpe ɖe eŋu o?

Ðewohĩ àte ŋu aɖo kplɔ̃ na ƒomea ƒe nuɖuɖu. Alo ɖewohĩ àte ŋu afɔ kplɔ̃a ne ƒomea ɖu nu vɔ. Ðevi aɖewo tsɔa gbeɖuɖɔ va ƒua gbe gbesiagbe. Nusianu si nàte ŋu awɔ la, enye amewo subɔsubɔ, abe alesi Yesu wɔe ene.

Ðe yowòmetɔwo li nàte ŋu asubɔa? Ðo ŋku edzi be Yesu, Nufiala Gã la, kura gɔ̃ hã subɔ eyomedzelawo. Ne èsubɔa nɔviwòwo la, ekema èle Yesu srɔ̃m. Nukawoe nàte ŋu awɔ na wo?— Ðewohĩ àte ŋu akpe ɖe wo ŋu woasrɔ̃ alesi woada woƒe fefenuwo ɖe wo nɔƒe ne wofe vɔ. Alo ɖewohĩ àte ŋu akpe ɖe wo ŋu woado awu adzra ɖo. Alo be nàkpe ɖe wo ŋu woaɖo aba. Àte ŋu asusu nu bubu siwo nàte ŋu akpe ɖe wo ŋu woawɔ ŋua?— Woava lɔ̃ wò nya le nusiawo wɔwɔ na wo ta, abe alesi Yesu yomedzelawo lɔ̃ eyama ene.

Àte ŋu asubɔ amewo le suku hã. Ate ŋu anye wò sukuxɔmehatiwo alo wò nufiala. Ne ame aɖe ƒe agbalẽwo ge le esi la, anye dɔmenyo wɔwɔ be nàfɔ wo nɛ. Àte ŋu atsɔ ɖokuiwò ana be nàtutu nuŋlɔkpe gã la dzi na miaƒe nufiala alo be nàwɔ nu bubu aɖe nɛ. Be nàʋu ʋɔtrua alée ɖe asi amesi gbɔna nage ɖe eme hã nye amewo subɔsubɔ dɔmenyotɔe.

Ɣeaɖewoɣi la, míakpɔe be amewo medaa akpe na mí ne míesubɔ wo o. Èbu be ele be esia nawɔe be míadzudzɔ nu nyui wɔwɔa?— Kura o! Ame geɖe meda akpe na Yesu ɖe eƒe dɔ nyui wɔwɔwo ta o. Gake ema mena wòdzudzɔ nu nyui wɔwɔ o.

Eyata mègana míahe ɖe megbe gbeɖegbeɖe le amewo subɔsubɔ me o. Na míaɖo ŋku Nufiala Gã Yesu dzi, eye míadze agbagba be míasrɔ̃ eƒe kpɔɖeŋu nyui la ɣesiaɣi.

Be nàkpɔ mawunyakpukpui bubu siwo ku ɖe kpekpe ɖe amewo ŋu la, xlẽ Lododowo 3:27, 28; Romatɔwo 15:1, 2; kple Galatiatɔwo 6:2.

[Nɔnɔmetata si le axa 37]

Nya ka ʋlim Yesu yomedzelawo nɔ?

[Nɔnɔmetata si le axa 39]

Nufiame kae Yesu nɔ eyomedzelawo nam?

[Nɔnɔmetata siwo le axa 40, 41]

Nukawoe nàte ŋu awɔ atsɔ akpe ɖe amewo ŋu?