Biblia Gbalẽ 45 Lia—Romatɔwo

Eŋlɔla: Paulo

Afi Si Wòŋlɔe Le: Korinto

Ƒe Si Me Wòwu Eŋɔŋlɔ Nu: Ƒe 56 M.Ŋ. lɔƒo

MÍEKPƆE le Dɔwɔwɔwo ƒe agbalẽa me be Paulo, si tia Yudatɔ Kristotɔwo yome tsã kutɔkutɔe la, va zu Kristo ƒe apostolo dovevienu le dukɔ siwo menye Yudatɔwo o dome. Romatɔwo ƒe agbalẽae nye Biblia gbalẽ 14 siwo gbɔgbɔ kɔkɔea ʋã ŋutsu sia, si nye Farisitɔ tsã, gake va zu Mawu subɔla wɔnuteƒe, wòŋlɔ la ƒe gbãtɔ. Paulo wu gbeƒãɖeɖe mɔzɔzɔ legbe eve nu hele etɔ̃lia dzi hafi ŋlɔ agbalẽ na Romatɔwo. Gbɔgbɔ ʋãe wòŋlɔ agbalẽ atɔ̃ bubuwo do ŋgɔ, siwo nye: Tesalonikatɔwo Gbãtɔ kple Evelia, Galatiatɔwo, kpakple Korintotɔwo Gbãtɔ kple Evelia. Gake le Biblia siwo li egbea me la, Romatɔwo ƒe agbalẽa do ŋgɔ na bubuawo, eye ewɔ abe esia sɔ ene, elabena eƒo nu tso ale si vovototo megava le Yudatɔwo kple ame siwo menye Yudatɔwo o, siwo nye hatsotso eve siwo Paulo ɖe gbeƒã na, la dome azɔ ŋu geɖe. Agbalẽ si woŋlɔ na Romatɔwo la ɖe ale si Mawu dzudzɔ nuwɔwɔ kple eƒe dukɔ la etɔxɛe me, eye eɖee fia hã be, wogblɔe ɖi xoxoxo le Hebri Ŋɔŋlɔawo me be woava ɖe gbeƒã na dukɔ siwo menye Yudatɔwo o hã.

² Paulo zã Tertio wònye eƒe agbalẽŋlɔla, eye wòdzro nu me kabakaba heyɔ Hebri Ŋɔŋlɔawo me nya gbogbo aɖewo le Kristotɔwo ƒe Hela Ŋɔŋlɔawo me gbalẽ wɔdɔɖeamedzi sia ŋɔŋlɔ me. Ezã nya vivi wɔdɔɖeamedziwo tsɔ dzro kuxi siwo do mo ɖa le ƒe alafa gbãtɔ me Kristotɔwo ƒe hame siwo me nɔlawo nye Yudatɔwo kple Helatɔwo me la me. Ðe Yudatɔwo xɔ asi wu le esi wonye Abraham ƒe dzidzimeviwo taa? Ðe Kristotɔ tsitsiwo kpɔ mɔ azã woƒe ablɔɖe le mɔ si azu nuklikli na wo nɔvi Yudatɔ siwo mesẽ ŋu le gbɔgbɔ me o, siwo gakpɔtɔ lé ɖe blemakɔnuawo ŋu, le esi womegale Mose ƒe Sea te o taa? Paulo gblɔe kɔtɛ le agbalẽ sia me be, tenɔnɔ ɖekae le Yudatɔwo kple ame siwo menye Yudatɔwo o siaa si le Mawu ŋkume, eye be wobua ame be ele dzɔdzɔe, menye to Mose ƒe Sea dzi wɔwɔ me o, ke boŋ to Yesu Kristo dzi xɔxɔse kple Mawu ƒe amenuveve me. Ke hã, Mawu di tso Kristotɔwo si be woabɔbɔ wo ɖokui ɖe dziɖuɖu vovovo siwo te wole la te ale si dze.

³ Aleke wowɔ ɖo Roma hamea? Yudatɔ geɖe va nɔ Roma, eye ne mede ɖeke o hã, tso esime Pompey va ɖu Yerusalem dzi le ƒe 63 D.M.Ŋ. me ya teti. Wogblɔ le Dɔwɔwɔwo 2:10 be, Yudatɔ mawo dometɔ aɖewo va Yerusalem le ƒe 33 M.Ŋ. ƒe Pentekostea ɖuɣi, eye afi mae wose nya nyuia le. Amedzro siwo va zu xɔsetɔwo la tsi Yerusalem be yewoasrɔ̃ nu tso apostoloawo gbɔ, eye ɖikeke mele eme o be, wo dometɔ siwo tso Roma la va trɔ yi aƒe, eye ɖewohĩ wo dometɔ aɖewo anya trɔ dzo esime yometiti va Yerusalem. (Dɔw. 2:41-47; 8:1, 4) Gawu la, amewo zɔa mɔ le ŋkeke mawo me ŋutɔ, eye ɖewohĩ esia tae Paulo nya Roma hamea me tɔ geɖe nenema; ame siawo dometɔ aɖewo anya se nya nyuia le Hela alo le Asia to Paulo ƒe gbeƒãɖeɖedɔa dzi.

⁴ Hamea ŋuti nyatakaka gbãtɔ si dzi woate ŋu aka ɖo la dze le Paulo ƒe agbalẽa me. Ena eme kɔ ƒãa be, Kristotɔ Yudatɔwo kple esiwo menye Yudatɔwo o siaae nɔ hamea me, eye be woƒe veviedodo dze na kafukafu. Egblɔ na wo be: “Wole nu ƒom tso miaƒe xɔse ŋu le xexe blibo la katã me,” eye be: “Amewo katã se nu tso miaƒe toɖoɖo ŋu.” (Rom. 1:8; 16:19) Suetonius ŋlɔ le ƒe alafa evelia me be, le Claudius ƒe dziɖuɣi (si nye ƒe 41-54 M.Ŋ. me) la, wonya Yudatɔwo le Roma. Ke hã, wotrɔ gbɔ emegbe, abe ale si Akwila kple Priskila ƒe Roma nɔnɔ ɖo kpe edzii ene. Wonye Yudatɔ siwo Paulo do goe le Korinto, siwo dzo le Roma esime Claudius de sea, gake wotrɔ gbɔ va Roma le ɣeyiɣi si me Paulo ŋlɔ agbalẽ na hame si nɔ afi ma.—Dɔw. 18:2; Rom. 16:3.

⁵ Nu geɖe li ɖo kpe edzi be kakaɖedzi le agbalẽa ŋu. Abe ale si eƒe ŋgɔdonyawo fia ene la, etso “Paulo, Yesu Kristo ƒe kluvi si woyɔ be wòanye apostolo, . . . na ame siwo katã le Roma, siwo nye Mawu ƒe lɔlɔ̃tɔwo, siwo woyɔ be woava zu ame kɔkɔewo” la gbɔ. (Rom. 1:1, 7) Ele Kristotɔwo ƒe Hela Ŋɔŋlɔawo me gbalẽ siwo ƒe nyateƒenyenye dzi woɖo kpee gbã la dome. Petro anya ŋlɔ eƒe agbalẽ gbãtɔ ƒe ade va se ɖe enyi le Paulo ƒe agbalẽŋɔŋlɔ na Romatɔwo megbe, eye le eme la, ezã nya geɖe siwo ɖi Romatɔwo ƒe agbalẽa me nyawo ale gbegbe be, agbalẽnyala aɖewo susu be, ɖewohĩ anya kpɔ Romatɔwo ƒe agbalẽa ƒe kɔpi aɖe do ŋgɔ. Ame sia ame kloe da asi ɖe edzi be Paulo ye ŋlɔ Romatɔwo ƒe agbalẽa, eye ame ŋkutawo, abe Clement si tso Roma, Polycarp si tso Smirna, kple Ignatius si tso Antioxia ene, siwo katã nɔ agbe le ƒe alafa gbãtɔ ƒe nuwuwu kple ƒe alafa evelia M.Ŋ. ƒe gɔmedzedze me la, yɔ nya tso Romatɔwo ƒe agbalẽa me.

⁶ Woke ɖe Romatɔwo ƒe agbalẽa, kple Paulo ƒe agbalẽ enyi bubu aɖewo, ŋu le blemasinuŋɔŋlɔgbalẽ aɖe si woyɔna be Chester Beatty Papyrus No. 2 (P⁴⁶) me. Aƒetɔ Frederic Kenyon ŋlɔ tso blemasinuŋɔŋlɔgbalẽ sia ŋu be: “Míeke ɖe Paulo ƒe Agbalẽawo, siwo woanya gbugbɔ ŋlɔ le ƒe alafa etɔ̃lia ƒe gɔmedzedze me la, katã kloe ŋu le blemasinuŋɔŋlɔgbalẽ sia me.”a Biblia gbalẽ siwo le Helagbe me, siwo le Chester Beatty ƒe asinuŋɔŋlɔgbalẽawo dome la li xoxoxo hafi wova ŋlɔ Sinai Asinuŋɔŋlɔgbalẽ kple Vatican Asinuŋɔŋlɔgbalẽ No. 1209, siwo kple evea woŋlɔ le ƒe alafa enelia M.Ŋ. me. Romatɔwo ƒe agbalẽa dze le agbalẽ siawo hã dome.

⁷ Ɣekaɣie woŋlɔ Romatɔwo ƒe agbalẽa, eye le afi ka? Biblia ŋuti nunyalawo katã lɔ̃ ɖe edzi be esi Paulo nɔ Hela, ɖewohĩ le Korinto ye wòŋlɔe, esime wòyi afi ma ɣleti aɖewo le eƒe duta nya nyui gbɔgblɔ mɔzɔzɔ etɔ̃lia ƒe nuwuwu lɔƒo. Emenyawo ɖo kpe edzi be Korinto ye wònɔ hafi ŋlɔe. Paulo nɔ Gayo, si nye Korinto hamea me tɔ, ƒe me hafi ŋlɔ agbalẽa, eye wòkafu Foibe, si nye Kenxrea hamea, si te ɖe afi ma ŋu la na wo (Kenxrea nye Korinto dua ƒe melidzeƒe). Ðewohĩ Foibe ye xɔ agbalẽ sia yi Roma. (Rom. 16:1, 23; 1 Kor. 1:14) Paulo ŋlɔ le Romatɔwo 15:23 be: “Teƒe aɖeke megale nuto siawo me, si nyemekpɔ ɖo o,” eye wògblɔ le kpukpui siwo kplɔe ɖo me be, yedi be yeawɔ duta nya nyui gbɔgblɔ dɔa aɖo ɣetoɖoƒenutowo me, le Spania gbɔ lɔƒo. Ðewohĩ eƒe mɔzɔzɔ etɔ̃lia ƒe nuwuwu lɔƒo, le ƒe 56 M.Ŋ. ƒe gɔmedzedze, ye wòŋlɔe.

NU SI TAE VIÐE LE EŊU

²⁰ Romatɔwo ƒe agbalẽa gblɔ nya siwo me susu le, siwo ta wòle be míaxɔ Mawu dzi ase, esi wògblɔ be, “eƒe nɔnɔme makpɔmakpɔawo dzena gaglãa wokpɔna tso xexea wɔwɔ dzi heyina, elabena wodzena wokpɔna le nu siwo wòwɔ la me, ɛ̃, eƒe ŋusẽ mavɔmavɔ kple Mawunyenye la dzena.” Gake nu si wu esia ye nye be, edo gã eƒe dzɔdzɔenyenye, eye eɖe eƒe nublanuikpɔkpɔ gã la kple eƒe amenuveve fia. Woto amiti, si ƒe alɔwo wolã ɖa hetsɔ gbemetɔ ƒe alɔwo va do ɖe edzi, ƒe kpɔɖeŋu ʋãme la dzi he míaƒe susu yi nufiame vevi sia dzi. Esi Paulo nɔ ŋugble dem tso Mawu ƒe asi sesẽ kple dɔmenyonyo ŋu la, egblɔ be: “Oo, Mawu ƒe kesinɔnuwo kple nunya kpakple sidzedze me goglo loo! Aleke seɖoƒe meli na eƒe ʋɔnudɔdrɔ̃wo me dzodzro o, eye eƒe mɔwo mele nyanya me o ye nye esi!”—1:20; 11:33.

²¹ Esia mee Romatɔwo ƒe agbalẽ ɖe Mawu ƒe nya ɣaɣla kɔkɔe la ƒe akpa bubuwo me geɖe wu le. Le Kristo hamea me la, vovototo aɖeke megale Yudatɔ kple Trɔ̃subɔla dome o, ke boŋ Yehowa ƒe amenuveve si to Yesu Kristo dzi la ate ŋu aɖe vi na dukɔ ɖe sia ɖe me tɔwo. “Ameŋkumekpɔkpɔ aɖeke mele Mawu gbɔ o.” “Ame si nye Yudatɔ le ememe lae nye Yudatɔ ŋutɔŋutɔ, eye eƒe aʋatsotso la nye esi woto gbɔgbɔ me tso na eƒe dzi, ke menye to se si woŋlɔ ɖi me o.” “Vovototo aɖeke mele Yudatɔ kple Helatɔ dome o, elabena Aƒetɔ ɖeka ye le wo katã nu, eye wònaa nu geɖe ame siwo katã yɔnɛ la.” Xɔsee na wobua ame siawo katã ame dzɔdzɔewo, ke menye dɔwɔwɔwoe o.—2:11, 29; 10:12; 3:28.

²² Aɖaŋuɖoɖo nyui siwo le agbalẽ sia si woŋlɔ na Kristotɔ siwo nɔ Roma me la ɖea vi na Kristotɔ siwo li egbea hã nenema ke, elabena woawo hã wodoa go kuxi mawo tɔgbi ke le xexe sia si me wonye amedzrowo le la me. Woxlɔ̃ nu Kristotɔ be wòanɔ “anyi kple amewo katã le ŋutifafa me,” ame siwo mele hamea me o hã. Ele be luʋɔ ɖe sia ɖe “[nabɔbɔ] eɖokui na ŋusẽtɔ siwo kɔ wu,” elabena Mawu ƒe ɖoɖoe, eye vɔvɔ̃ le wo ŋu, menye na sedziwɔlawo o, ke boŋ na ame siwo wɔa nu gbegblẽwo. Ele be Kristotɔwo nanye sedziwɔlawo, menye esi wole vɔvɔ̃m na tohehe ta ko o, ke boŋ le Kristotɔwo ƒe dzitsinya hã ta; eya ta ele be woaxe woƒe adzɔwo, woakpɔ woƒe agbanɔamedziwo gbɔ, eye womanyi naneke ƒe fe le ame aɖeke si o, “negbe [wo] nɔewo lɔlɔ̃ ƒe fe ko.” Lɔlɔ̃e nye Sea dzi wɔwɔ.—12:17-21; 13:1-10.

²³ Paulo te gbe ɖe ɖaseɖiɖi le dutoƒo dzi. Togbɔ be dzie wotsɔna ɖea xɔse fiana hena dzɔdzɔenyenye hã la, nue wotsɔna ʋua eme le dutoƒo hena agbekpɔkpɔ. “Ame sia ame si yɔa Yehowa ƒe ŋkɔ la, woaɖee.” Gake hafi amewo nakpɔ ɖeɖe la, ehiã be gbeƒãɖelawo nayi, eye woaɖe “gbeƒã nu nyuiwo ŋuti nya nyui la.” Dzidzɔ bliboe míakpɔ ne míele gbeƒãɖela siawo, siwo ƒe gbe ɖi hoo “de afi sia afi si amewo le le anyigba dzi” la dome. (10:13, 15, 18) Eye ne míele dzadzram ɖo ɖe gbeƒãɖeɖedɔa ŋu la, mina míadze agbagba anya Ŋɔŋlɔawo nyuie abe Paulo ene, elabena le teƒe ɖeka pɛ sia la, (10:11-21) eyɔ nya tso Hebri Ŋɔŋlɔawo me zi gbɔ zi geɖe. (Yes. 28:16; Yoel 3:5; Yes. 52:7; 53:1; Ps. 19:5; 5 Mose 32:21; Yes. 65:1, 2) Eya ta ete ŋu gblɔ be: “Nu siwo katã woŋlɔ ɖi tsã la, woŋlɔ wo ɖi le míaƒe nufiafia ta, bene to míaƒe dzidodo kple akɔfafa si míekpɔna le Ŋɔŋlɔawo me dzi la, mɔkpɔkpɔ nasu mía si.”—Rom. 15:4.

²⁴ Aɖaŋuɖoɖo nyui tuameɖo aɖewo le agbalẽa me ku ɖe ale si míawɔ nu kple mía nɔewo le Kristo hamea me ŋu. Dukɔ ka mee wotso o, ŋutigbalẽ kae le wo ŋu o, alo teƒe kae wonyi wo le o, ele be hamea me tɔwo katã natrɔ woƒe tamesusu, be woawɔ subɔsubɔdɔ kɔkɔe na Mawu wòasɔ kple eƒe “lɔlɔ̃nu nyui dzeameŋu si le blibo la.” (11:17-22; 12:1, 2) Nugɔmesesename ka gbegbee nye si ɖe dzesi le Paulo ƒe aɖaŋuɖoɖowo katã me le Romatɔwo 12:3-16 ale! Aɖaŋuɖoɖo nyuitɔ kekeake si ana míado vevie nu, míabɔbɔ mía ɖokui, eye míalɔ̃ mía nɔewo le Kristo hamea me la le eƒe nyawo me. Le agbalẽa ƒe ta mamlɛawo me la, Paulo ɖo aɖaŋu ŋkubiãtɔe le ale si woalé ŋku ɖe ame siwo hea mama vanɛ ŋu ahaƒo asa na wo la ŋu, gake eƒo nu tso dzidzeme si hadede nyui kple haxɔsetɔwo hena vanɛ hã ŋu.—16:17-19; 15:7, 32.

²⁵ Esi míenye Kristotɔwo ta la, ele be míayi edzi alé ŋku ɖe ale si mía kple mía nɔviwo dome le ŋu. “Elabena Mawu fiaɖuƒe la menye nuɖuɖu kple nunono o, ke boŋ dzɔdzɔenyenye kple ŋutifafa kpakple dzidzɔ le gbɔgbɔ kɔkɔe me boŋ ye.” (14:17) Ame siwo anye “Kristo ƒe hati domenyilawo,” siwo ‘woado ɖe dzi kplii’ le Dziƒofiaɖuƒea me, koŋ sie dzɔdzɔenyenye sia asu, eye woakpɔ ŋutifafa kple dzidzɔ sia. De dzesii hã be, Romatɔwo ƒe agbalẽa fia afɔ bubu si woaɖe be Fiaɖuƒeŋugbe si wodo le Eden bɔa me nava eme, esi wògblɔ be: “Mawu si naa ŋutifafa la agbã Satana ɖe miaƒe afɔwo te gudugudu kpuie.” (Rom. 8:17; 16:20; 1 Mose 3:15) Mina nyateƒe xɔasi siawo dzi xɔxɔse nana míayɔ fũu kple dzidzɔ, ŋutifafa, kple mɔkpɔkpɔ. Nenye míaƒe tameɖoɖo kplikpaa be, míaɖu aʋa dzi kpe ɖe Fiaɖuƒea ƒe Dzidzimevia ŋu, elabena míeka ɖe edzi be, naneke mele dziƒo loo alo anyigba dzi afi sia, “alo nuwɔwɔ bubu aɖeke, [si ate] ŋu ama mí ɖa tso Mawu ƒe lɔlɔ̃, si le Kristo Yesu, mía Aƒetɔ, me la gbɔ o.”—Rom. 8:39; 15:13.

[Etenuŋɔŋlɔ]