Amewuwu Le Dzigbezã Aɖe Ðuɣi

Esi Yesu ƒe apostoloawo le woƒe subɔsubɔdɔa wɔm le Galilea la, ame si ɖe Yesu fia ya mekpɔ ablɔɖe ma o. Yohanes Amenyrɔɖetsimela kpɔtɔ le gaxɔ me ƒe eve kloe nye ema.

Yohanes gblɔ le dutoƒo be mesɔ be Fia Herodes Antipa naxɔ nɔviaŋutsu Filipo srɔ̃ Herodia aɖe o. Herodes gbe srɔ̃a gbãtɔ heɖe Herodia. Le Mose ƒe Se si dzi Herodes gblɔna be yewɔna ɖo nu la, srɔ̃ɖeɖe sia nye ahasisrɔ̃ɖeɖe eye mele se nu o. Esi Yohanes ƒe nya la mevivi Herodes nu o ta la, ena wode Yohanes gaxɔ me, eye ɖewohĩ Herodia ye ƒoe ɖe enu.

Herodes tɔtɔ eye menya nu si wòawɔ Yohanes o, elabena amewo buna “Yohanes nyagblɔɖilae.” (Mateo 14:5) Gake Herodia ya metɔtɔ le nya sia me o. Elé “Yohanes ɖe dɔme,” eye wònɔ didim be yeana woawui. (Marko 6:19) Mlɔeba la, mɔnukpɔkpɔa va ʋu ɖi nɛ.

Ŋkeke ʋɛ aɖewo do ŋgɔ na ƒe 32 K.Ŋ. ƒe Ŋutitotoŋkekenyuia la, Herodes wɔ ɖoɖo be yeaɖu azã gã aɖe le yeƒe dzigbeŋkeke dzi. Herodes ƒe dziɖuɖumegãwo kple asrafomegãwo katã kpakple Galileatɔ xɔŋkɔwoe nye ame siwo ƒo ƒu ɖe azã la ɖuƒe. Esi azãɖuɖua nɔ edzi yim la, wodɔ Salome, si nye ɖetugbui dzaa aɖe si Herodia dzi na srɔ̃a xoxoa Filipo la ɖa be wòayi aɖaɖu ɣe na amedzroawo. Ale si wòɖu ɣea la dzɔ dzi na ameawo ale gbegbe.

Herodes kpɔ dzidzɔ ɖe Salome ŋu ŋutɔ, eye wògblɔ nɛ be: “Bia nu sia nu si nèdi lam, eye mana wò.” Eka atam gɔ̃ hã be: “Nu sia nu si nàbiam la, mana wò, va se ɖe nye fiaɖuƒea ƒe afã ke hã dzi.” Hafi Salome nagblɔ nu si dim wòle la, edo go yi ɖabia dadaa be: “Nu kae mabia?”—Marko 6:22-24.

Mɔnukpɔkpɔ si dim Herodia le la tututue nye esia! Mehe ɖe megbe o, eɖo eŋu be: “Yohanes Amenyrɔɖetsimela ƒe ta.” Salome trɔ yi Herodes gbɔ enumake eye wòbia be: “Medi be nàtsɔ Yohanes Amenyrɔɖetsimela ƒe ta de agba me nam fifi laa.”—Marko 6:24, 25.

Nu sia ve Herodes vevie ŋutɔ, gake eƒe ame kpekpeawo se atam si wòka na Salome la. Ekpe ŋu nɛ be yeagbe nu si wòbia la nana nenye be ema abia be wòawu ame maɖifɔ gɔ̃ hã. Eya ta Herodes dɔ eŋusrafo ɖeka ɖe gaxɔa me be wòaɖawu Yohanes. Kasia eŋusrafo la trɔ gbɔ kple Yohanes ƒe ta le agba gbadzɛ me xoxo. Etsɔe na Salome, eye eya hã tsɔe yi na dadaa.

Esi Yohanes ƒe nusrɔ̃lawo se nu si dzɔ la, wova tsɔ eƒe kukua yi ɖaɖi. Eye woyi ɖagblɔ nya la na Yesu.

Emegbe esi Herodes se ale si Yesu nɔ gbe dam le amewo ŋu eye wònɔ gbɔgbɔ vɔ̃wo nyam le wo me la, dzika tso eƒo ŋutɔ. Enɔ susum be Yesu, si nɔ nu siawo wɔm lae nye Yohanes Amenyrɔɖetsimela si fɔ “tso ame kukuwo dome.” (Luka 9:7) Eya ta Herodes Antipa di vevie be yeakpɔ Yesu. Gake edze ƒãa be menye esi wòdi be yease nu si ƒe gbeƒã ɖem Yesu le tae o. Ke boŋ Herodes di be yeakpɔ Yesu ne yeaɖo kpe edzi be nu si susum yele la nye nyateƒe loo alo menye nyateƒe o.