Takpekpe Dodzidzɔnamewo Do Mawu Ƒe Nufiafia Ðe Ŋgɔ
NYATAKAKAMƆNU vovovowo bɔ ɖe xexeame egbea. Nusianu si vaa susu me na ame ŋuti sidzedze le agbɔ sɔm ɖe edzi le television kple radio dzi, le agbalẽwo me alo kɔmpiutawo dzi. Gake amewo galéa dɔ hekuna kokoko. Nuvlowɔwɔ, dɔwuame, kple ahedada le anyigba la dzi godoo eye amewo tɔtɔ wu ɣeyiɣi ɖesiaɖe. Sidzedze siwo katã li mete ŋu ɖɔ nuwo ɖo o. Nukatae? Elabena ameƒomea trɔ megbe de Mawu ƒe nunya.
Aleke wòhesɔe nye si be wotia “Mawu ƒe Nufiafia” be wòanye tanya na Yehowa Ðasefowo ƒe takpekpe siwo wowɔ nyitsɔ laa! Nuƒoawo ɖo ŋku edzi na vavalawo be nufiafia si le Mawu ƒe Nya si nye Biblia la me koe ate ŋu axɔ ame ɖe agbe ŋutɔŋutɔ.
Takpekpe gbãtɔ dze egɔme le Yawoɖa, June 3 dzi le Uniondale, New York, U.S.A. Tso ɣemaɣi dzi la, wowɔ takpekpea le du vovovowo me le dukɔ geɖewo me eye wòva wu enu le Afrika- kple Dziehe Amerika-nyigbawo dzi.
Ŋkeke Gbãtɔ ƒe Ŋdɔ
Wona tanya ŋkeke ɖesiaɖe si tea gbe ɖe Mawu ƒe nufiafia ƒe akpa aɖe dzi. Le kpɔɖeŋu me, wotu ŋkeke gbãtɔ ƒe takpekpea ɖe tanya si nye “Nufiafia si Tso Mawu Gbɔ la Nyanya” la dzi. (Yohanes 7:17) Woƒo nu tso nya sia ŋu nyuie le ŋkeke bliboa me.
Le hadzidzi kple gbedodoɖa megbe la, takpekpea ƒe zimenɔla tsɔ nuƒo si ƒe tanyae nye “Mawu ƒe Nufiafia Ƒoa Mía Nu Ƒu Ðekae” ʋu kpekpea nui. Eɖee fia be Yehowa ƒe amewo wɔ ɖeka to Eƒe mɔwo nyanya kple zɔzɔ le Eƒe toƒewo me. (Mixa 4:1-5) Mawu ƒe nufiafia doa ŋusẽ woƒe ɖekawɔwɔ. Wode dzi ƒo na takpekpevalawo be dzi nadzɔ wo le woƒe nɔvisiléle me.—Psalmo 133:1-3.
Le ɣetrɔ me la, woƒo nu tso hame ƒe kpekpe siwo míewɔna edziedzi ŋu le nuƒo kpui siwo ƒe tanyae nye “Kpekpe Siwo me Wofiaa Yehowa ƒe Mɔwo Mí Le” me. Nuƒola gbãtɔ ɖo ŋku edzi na takpekpevalawo be ne míekpe ta ɖekae la, míedea bubu Yehowa ŋu eye ema wɔwɔ nana míekpɔa Eƒe yayra. Nuƒola si kplɔe ɖo te gbe ɖe alesi wòhia be míakpɔ gome le kpekpewo mee dzi. Le esia wɔwɔ me la, míekafua Yehowa le gaglãgbe, ɖea míaƒe xɔse fiana, eye míetua ame bubuwo ƒe xɔse ɖo. Nuƒo kpuiawo ƒola etɔ̃lia fia alesi wòhiã be míawɔ nusiwo míesrɔ̃na le kpekpewo mee la ŋudɔ. Ele be míanye “nyadziwɔlawo, eye menye [nyaselawo] . . . ɖeɖeko o!”—Yakobo 1:22.
Eyome wova dzro kafukafuhawo dzidzi na Yehowa me eme kɔ ƒã. Hadzidzi tso dzime nye míaƒe tadedeagu ƒe akpa vevi aɖe. Emegbe woƒo nuƒo tɔxɛ si ƒe tanyae nye “Mawu ƒe Nufiafia Ðua Dzi” ɖe nuƒo sia yome. Tanya nyui kae nye si! Nuƒola la gblɔ be: “Yehowae nye nufiafia nyuitɔ kekeake si amesiame ate ŋu axɔ la Dzoƒe. Emegbe esi wòƒo nu tso alesi amegbetɔ ƒe ahɔhɔ̃ wɔ nukue ŋuti kpuie vɔ la, egblɔ be: “Ele be míawɔ míaƒe tamebubu ƒe ŋutetewo ŋudɔ ɖe Mawu ƒe nufiafiawo xɔxɔ ŋu koŋ. Eya ɖeɖekoe naa nunya vavãtɔ ame.” Nya mawo le eme nyateƒe!
Ŋkeke Evelia ƒe Ŋdi
Takpekpea ƒe ŋkeke evelia ƒe tanyae nye “Minɔ Atsyɔ̃ Ðom na Mawu, Mía Xɔla, ƒe Nufiafia Ðaa.” (Tito 2:10, New World Translation) Wote gbe ɖe gɔmeɖose sia dzi le nuƒo si nye “Mawu ƒe Nufiafia Kple Gbɔgbɔ Vɔ̃wo ƒe Nufiafia” me. Ẽ, nufiafiawo le gbɔgbɔ vɔ̃wo ŋutɔ si. (Timoteo I, 4:1) Abe alesi nuƒola ɖe emee ene la, Mawu ƒe nufiafia ɖua Satana ƒe “nunya” dzi esi wòkloa nu le aʋatsonufiafiawo kple Abosam ƒe ayemɔwo ŋu. Le esia ta la, Kristotɔ siwo ade 4,500,000 siwo si dzi anukwaretɔ le la meganye kluviwo le Satana ƒe vivitia me o.—Yohanes 8:32.
Gake ele be míayi edzi atsi tre ɖe Satana ŋu. Wote gbe ɖe esia dzi le nuƒo si nye “Ðe Nèle Avu Wɔm Kple Xexeame ƒe Gbɔgbɔa?” la me. Xexe sia me ƒe gbɔgbɔ wua ame. Edea agbegbegblẽnɔnɔ, aglãdzedze ɖe ŋusẽ ŋu, kple ŋukeklẽ ɖe ŋutilãmenuwo ŋu ƒe dzi ƒo. Ele be Kristotɔ nadzro eɖokui me ɣesiaɣi. Ðe dzidzenu kɔkɔwo gakpɔtɔ le esi le nusi wòkpɔna, ɖoa toe, alo xlẽna la gomea? Nuƒola la de dzi ƒo be: “Nɔviŋutsuwo, nɔvinyɔnuwo, kple ɖeviwo, míekafu mi le agbagba si dzem miele vevie le esia gome la ta.”—Yohanes I, 2:15-17.
Alesi avuwɔwɔ kple xexeame ƒe gbɔgbɔ sesẽnae la tso nu bubu aɖe hã gbɔ. Nukae? Eyae nye mí katã míaƒe blibomademade. Vavãe Yesu ku ɖe míaƒe nuvɔ̃wo ta, gake egale kokoko be míawɔ avu kple nuvɔ̃wɔwɔ ƒe didi si le mía me la. Wodzro esia me le nuƒo si nye “Aʋawɔwɔ Kple Nuvɔ̃ ƒe Ŋusẽkpɔkpɔ Ðe Ŋutilã Madeblibo la Dzi” me. Nya siwo nuƒola la gblɔ dometɔ aɖee nye be ne míedoa amenyenye yeye la eye míetsria nusianu si doa nuvɔ̃wɔwɔ ƒe didi siwo le mía me ɖe ŋgɔ ko hafi míaɖu aʋa si wɔm míele kple nuvɔ̃ la dzi.
Nuƒo si kplɔe ɖo ƒe tanyae nye “Na Nufiafia Deblibowo Nafia Mɔ Wò Agbenɔnɔ Ɣesiaɣi.” Ame aɖewo tsia dzi ɖe woƒe ŋutilãmelãmesẽ ŋu vevie wògbɔa eme. Gake le nyateƒe me la, gbɔgbɔmelãmesẽe le vevie wu. Nuƒola la te gbe ɖe alesi wòhiã be míatsɔ míaƒe agbanɔamedzi le esia me vevie la dzi, hegblɔ nya aɖe tsɔ de dzi ƒo na nyɔnu Kristotɔwoe koŋ. Egblɔ be: “Míekpɔa ŋudzedze ɖe nɔvinyɔnu tsitsi kple nɔvinyɔnu ɖetugbi siwo da sɔ nyuie le woƒe veviedodo le gbeadzisubɔsubɔdɔa me kple le woa ŋutɔwo ƒe agbanɔamedziwo gbɔ kpɔkpɔ me la ŋu vevie.” Ẽ, mía dometɔ ɖesiaɖe daa akpe na Yehowa ɖe nufiafia deblibo si ɖea mí ɖe vovo tso xexeame gbɔ la ta.
Nuƒo si woƒo tsɔ wu ŋdikpekpea nue nye “Mawu ƒe Nufiafia Ðea Tameɖoɖo si Le Agbe Ŋu Fiana.” Nuƒola la gblɔ be: “Ne ɣeyiɣiawo va le yiyim la, amesiame kloe biaa eɖokui be, ‘Tameɖoɖo Kae Le Agbe Ŋu?’” Etsɔ kpeɖodzi sẽŋu ɖee fia be Biblia la ɖeka koe ɖo nya ma ŋu wònye nyateƒe. Azɔ nuƒola la ɖee fia be Mawu ƒe ŋugbedodo wɔnukuwo nana tameɖoɖo nɔa míaƒe agbe ŋu nyuie. Anɔ eme be nyaselawo dometɔ geɖe nɔ bubum be, ‘Nya sia tututue wòle be nye anyigbamamã me tɔwo nase.’ Dziɖuha la hã bui nenema. Woɖe agbalẽ gbadza yeye aɖe si ƒe tanyae nye “Tameɖoɖo Kae Le Agbe Ŋu?” ɖe go le nuƒo sia ƒe nuwuwu. Amesiame kpɔ dzidzɔ si mele gbɔgblɔ me o! Ŋdɔ me ɖiɖiɖemeɣi na mɔnukpɔkpɔ amesiame be wòato agbalẽ yeyea me.
Ŋkeke Evelia ƒe Ŋdɔ
Tanya fakɔname nɔ nuƒo gbãtɔ si woƒo le ŋdɔ me la si, esi nye “Tsɔ Wò Dzimaɖeɖiwo Katã Da ɖe Yehowa Dzi.” Nu geɖe nana míetsia dzimaɖeɖi; gake Mawu ƒe Nya la gblɔ be míada míaƒe dzimaɖeɖiwo katã ɖe eyama dzi. (Petro I, 5:6, 7) Nyateƒee, kuxi aɖewo gbea vɔvɔ ya, eye nuƒola la de dzi ƒo na ame le esia ŋuti be: ‘Gbɔ dzi ɖi. Kpɔ Yehowa sinu. Xɔe se kple kakaɖedzi be Biblia ƒe nudidiwo dzi wɔwɔe nye nu nyuitɔ kekeake ɣesiaɣi. Ne míena míaƒe dzi le Yehowa ŋu la, “Mawu ƒe ŋutifafa” si ƒo gɔmesesewo katã ta la asu mía si.’—Filipitɔwo 4:6, 7.
Nuƒo ene siwo woƒo ɖe eyome la ɖee fia be Mawu ƒe nufiafia hiã le ƒomegbenɔnɔ hã me. Gbãtɔ si nye “Nana be Wò Srɔ̃ɖeɖe Nanɔ Anyi Adidi” ɖo ŋku edzi na takpekpevalawo be le Yehowa ŋkume la, womate ŋu abu srɔ̃ɖeɖe be enye nusi ŋu woaɖe asi le abe alesi xexeametɔ geɖewo bunɛ ene o. Gake hafi míaƒe srɔ̃ɖeɖe nadze edzi la, ele be míawɔ ɖe Yehowa ƒe mɔfiafiawo dzi. Eyae wɔ mí. Eyata srɔ̃ɖeɖe ŋuti aɖaŋuɖoɖo nyuitɔ kekeake si li la le eƒe Nya si tso gbɔgbɔ me la me.
Nuƒo si nye “Ku Kutri Hena Wò Ƒomea ƒe Agbekpɔkpɔ” dzro beléle na ƒomea le ɣeyiɣi sesẽ siawo me ƒe kuxiwo me. (Timoteo II, 3:1) Dzilawo fiaa beléle na ame ɖokui kple ame ɖokui gbɔ dzadzraɖo, nɔnɔme nyuiwo, dɔwɔwɔ, kple alesi woanyo dɔme na ame bubuwo ahatsɔ ɖe le eme na woe la wo viwo. Vevietɔ wu la, ele be woafia wo viwo be woanye Yehowa subɔla dovevienuwo.—Lododowo 22:6.
Le numedzodzro si kplɔe ɖo si ƒe tanyae nye “Dzilawo, Mia Viwo Hiã Ŋkuléleɖeŋu Tɔxɛ” me la, nuƒola la ɖo ŋku edzi na takpekpevalawo alesi wòhiã be woakafu ɖeviwo, esime womaŋe aɖaba aƒu woƒe vodadawo dzi o. Ele be dzilawo nanɔ ŋudzɔ vevie ɖe anukwaremaɖimaɖi, ŋutilãmenudidi, alo ɖokuitɔdidi ƒe nɔnɔme siwo adze le ɖeviwo ŋu la ŋuti.
Vevietɔ takpekpevala siwo nye sɔhɛwo ɖo to nuƒo si nye “Sɔhɛwo—Ameka ƒe Nufiafiae Miexɔna?” la nyuie. Egbea nuwo le sesẽm ɖe edzi na sɔhɛ Kristotɔwo. Xexeame yomedzedze le bɔbɔe, gake ku mee esia kplɔa ame yinae. Togbɔ be ebia dzideƒo hafi sɔhɛ natiae be yealé Mawu ƒe nufiafia me ɖe asi goŋgoŋ hã la, ehea yayra gãwo vɛ fifia kple agbe mavɔ le etsɔ me.—Timoteo I, 4:8.
Wotsɔ drama dodzidzɔname si nye “Sɔhɛ Siwo Ðoa Ŋku Wo Wɔla Dzi Fifia” wu takpekpe ƒe ŋkeke evelia nui. Le edzikpɔla ƒe ŋgɔdonya me la, eyɔ sɔhɛ siwo le Mawu ƒe habɔbɔ me be “wonye teokrasiʋakɔ siwo tsɔ nuteƒewɔwɔ le ɖokuitsɔtsɔna ƒe subɔsubɔdɔ wɔm na Yehowa Mawu kple eƒe Dziƒofia si wòɖo si nye Kristo Yesu.” Egblɔ kpee be: “Le nyateƒe me la, míaƒe sɔhɛwo le dɔ nyui aɖe wɔm!” Drama la ɖee fia kɔte be ne dzila he via nyuie la, ava ɖe vi na ɖevia ne etsi hele Yehowa subɔm le eɖokui si.
Ŋkeke Etɔ̃lia ƒe Ŋdi
Ŋkeke etɔ̃lia ƒe tanyae nye “Miyi Edzi Mianɔ Nu Fiam Dukɔwo Katã Me Nɔlawo.” (Mateo 28:19, 20, NW) Ðikeke mele eme o be takpekpevalawo nɔ mɔ kpɔm na gbeƒãɖeɖedɔa ŋuti aɖaŋuɖoɖo si sɔ ɖe ɣeyiɣia nu, eye woƒe mɔkpɔkpɔa va eme na wo. Nuƒo kpui siwo ƒe tanyae nye “Míaƒe Gbeƒãɖeɖe Kple Nufiafia Dɔa Wɔwɔ Dzidzɔtɔe” do ŋusẽ woƒe tameɖoɖo kplikpaa be yewoayi edzi anɔ ɖaseɖiɖidɔ sia wɔm. Nuƒo gbãtɔ dzro amewo gbɔ yiyi zi gbãtɔ me, evelia dzro tɔtrɔyiwo wɔwɔ me, eye etɔ̃lia hã dzro Biblia-nusɔsrɔ̃wo wɔwɔ me. Wokpe dutanyanyuigblɔla siwo le xexeame katã be woatrɔ ayi wo de ahayi takpekpea kple woƒe ƒometɔwo kple xɔlɔ̃wo. Dutanyanyuigblɔlawo ƒo nuƒo siawo ƒe ɖewo le teƒe aɖewo. Edzɔ dzi na takpekpevalawo be woagblɔ dzidzedze si kpɔm wole le woƒe dɔdasiwo wɔwɔ me na yewo. Nuƒo si kplɔe ɖo si ƒe tanyae nye “Nyanyuia Tsɔtsɔ yi na Amesiame” dzro dɔ si vomeɖaseɖiɖi wɔna la me.
Wotsɔ nyɔnyrɔ̃xɔxɔnuƒo si nyea nu vevi aɖe ɣesiaɣi le Yehowa Ðasefowo ƒe takpekpe gãwo me wu ŋdikpekpea nui. Le takpekpeawo katã me la, adzɔgbeɖela yeyewo ƒe ƒuƒoƒo gãwo tsi tre ɖe ameha siwo kpe ta la ŋkume hetsɔ kakaɖedzi ɖo nyabiabia eve siwo wobia wo la ŋu be ẽ. Emegbe wonyrɔ̃ wo le gaglãgbe. Mawu ƒe nufiafia ƒe dɔwɔwɔ ŋuti ɖaseɖiɖi gã kae nye si!
Ŋkeke Etɔ̃lia ƒe Ŋdɔ
Ŋdɔ ƒe takpekpea dze egɔme kple Ŋɔŋlɔawo me dzodzro si de to. Yehowa Ðasefowo nya Mateo ta 24 kple Luka ta 21 me nyawo nyuie. Ðe ame aɖewo susu be nya yeye aɖeke megali si woagblɔ tso Biblia ƒe ta siawo ŋu oa? Aleke gbegbe woda ƒue nye si! Nuƒo siwo nye “Nukae Anye Wò Anyinɔnɔ ƒe Dzesi?” kple “Gblɔe na Mí, Ɣekaɣie Nusiawo Ava?” nye ta eve mawo ƒe akpa aɖewo me dzodzro dodzidzɔname na nyaselawo eye wòɖe kpukpuiawo dometɔ aɖewo ƒe numeɖeɖe yeyewo fia. Numedzodzro dodzidzɔname aɖewo yi edzi le takpekpea megbe esime takpekpevalawo to nu me ɖekae kpɔ be yewose nya veviawo me hã. Ðikeke mele eme o be woaɖo nyabiabia geɖe ŋu ne wota nya siawo ɖe Gbetakpɔxɔ me.
Woyi Biblia-nusɔsrɔ̃ ƒe tanya la me dzodzro dzi le nuƒo si nye “Wò Biblia me Nyabiabiawo ƒe Ŋuɖoɖo Siwo me Nufiame Le” me. Takpekpea he susu yi nya bubu dzi. Gbetakpɔxɔ Habɔbɔa ƒe Gilead Biblia Sukua xɔ ƒe 50 le ƒe 1993 me. Nuƒo si nye “Gilead Dutanyanyuigblɔlawo ƒe Hehenasuku si Xɔ ƒe 50 Kple Eƒe Dɔwɔnawo” ɖe nusi wote ŋu wɔ tso ɣemaɣi vaseɖe fifia la fia takpekpevalawo. Ne dutanyanyuigblɔlawo li le nuƒo si nye “Dɔ si Wowɔ le Nyanyuigbɔgblɔdɔa me le Xexeame Katã” ƒoɣi la, wokpea wo be woava gblɔ woƒe nuteƒekpɔkpɔ aɖewo na nyaselawo. Dutanyanyuigblɔlawo ƒe nyawo sese do dzidzɔ na ame!
Nuƒo si kplɔe ɖo si nye “Nusitae Yehowa Ðasefowo Nɔa Ŋudzɔ Ðo” nye ŋutinya me nufiame bubu. Eɖee fia be Kristotɔwo nɔ ŋudzɔ tso keke ƒe alafa gbãtɔ me ke vaseɖe fifia. Ema gakplɔ ame yi dzidzɔnu bubu aɖe gbɔe. Le nuƒo si ƒe tanyae nye “Fiaɖuƒe Gbeƒãɖelawo Le Dɔa Dzi Kple Dzo le Xexeame Katã” ƒe gɔmedzedze la, nuƒola la kɔ agbalẽ gã aɖe ɖe dzi eye wògblɔ be: “enye dzidzɔ na mí be míaɖe gbeƒãe le afisia egbea be woɖe agbalẽ yeye sia si ƒe ŋkɔe nye Jehovah’s Witnesses—Proclaimers of God’s Kingdom ɖe go na mí.” Yehowa Ðasefowo ƒe egbegbe ŋutinya deto le agbalẽa me. Egblɔ dzidodo, tameɖoɖo kplikpaa, kple dzidzedzekpɔkpɔ ŋuti nya dodzidzɔname, siwo nye alesi Yehowa ƒe gbɔgbɔ le dɔ wɔm ɖe esubɔlawo dzii ƒe ɖaseɖiɖi sẽŋu.
Ŋkeke Enelia ƒe Ŋdi
Takpekpea ƒe ŋkeke mamletɔ va ɖo xoxo. Ŋkekea ƒe tanya si nye “Nana be Mawu ƒe Nufiafia Naɖe Vi na Mí” ɖee fia be takpekpea awu enu nyuie. (Yesaya 48:17) Le ŋdia me la, wohe takpekpevalawo ƒe susu yi Nuƒo Kpui siwo me nuƒo sẽŋu etɔ̃ nɔ la dzi. Nuƒo kpui siawo siwo ƒe tanyae nye “Yeremya ƒe Nuxlɔ̃amegbedasi si Tso Gbɔgbɔ me—Le Blema Kple na Egbea” dzro Yeremya ta 23, 24, kple 25 ƒe kpukpuiwo me ɖekaɖeka. Gbedasi sẽŋu kawoe nye si le ta siawo me! Yeremya ƒe nuxlɔ̃amenya siwo tso Mawu ƒe gbɔgbɔ me si wògblɔ kple moveviɖoɖo la anya ʋuʋu Israel mawɔnuteƒe si nɔ anyi le eŋɔli. Xexeame katã ʋuʋu gɔ̃ hã esime nuxlɔ̃amenya mawo va eme. Ðe nuwo to vovo egbea? Kura o. Yehowa Ðasefowo tsɔa dzideƒo ɖea gbeƒã Mawu ƒe ʋɔnudrɔ̃gbedasiwo. Mlɔeba la, nuɖoanyi blibo sia adze ŋgɔ Yehowa ƒe ʋɔnudɔdrɔ̃. Esia anye tsɔtsrɔ̃ ɖikaa na Satana ƒe xexea.
Wotsɔ drama evelia si nye “Mègana Woable Wò alo Nàɖu Fewu le Mawu Ŋu O” wu Kwasiɖagbe ŋdi ƒe kpekpea nui. Eɖe alesi Mawu ƒe nufiafia ate ŋu akpɔ mía ta tso video kple haƒoƒo gbegblẽwo kpakple masɔmasɔ dede hati Kristotɔwo dome eme kɔ nyuie. Le dramaa ƒe nuwuwu la, zimenɔla la gbugbɔ nya si ame aɖe gblɔ le dramaa me si nana wobua tame la gblɔ ake be: “Míevo tso xexeame ƒe ŋusẽkpɔɖeamedzi si me o. Ne míeʋli sesĩe o la, xexeame ate ŋu ato ayemenuwɔwɔ dzi atɔtɔ míaƒe tamebubu. Eye míaƒe nuteƒewɔwɔ alo nuteƒemawɔmawɔ nɔ te ɖe nusi míeƒãna dzi.” Aleke gbegbe wònye nyateƒee nye si!
Ŋkeke Mamletɔ ƒe Ŋdɔ
Takpekpea nɔ eƒe nuwuwu vam kabakaba esi nuƒola yi nuƒolanɔƒea be yeana Dutoƒonuƒo si ƒe tanyae nye “Nufiafia si Ðea Vi na Ame Hena Míaƒe Ɣeyiɣi Sesẽ Siawo.” Eɖe kuxi siwo le fu ɖem na mí egbea fia eye wòƒo nu tso mɔ siwo nu Mawu ƒe nufiafia ate ŋu akpe ɖe mía ŋu míanɔ agbe si nyo wu le la ŋu eme kɔ. Egblɔ be ne míele wɔwɔm ɖe Ŋɔŋlɔawo me nufiafia dzi fifia la, míate ŋu awɔ ɖe edzi tegbee le Yehowa ƒe xexe yeyea me hã.
Ɣeyiɣi de na nuƒo mamletɔ azɔ le kwasiɖa sia kwasiɖa ƒe Gbetakpɔxɔ nusɔsrɔ̃a totoɖeme megbe. Nuƒola la to nya vevi siwo wogblɔ le ŋkeke ene ƒe takpekpea me la me kabakaba eye wòɖo ŋku agbalẽ yeye siwo woɖe ɖe go la dzi na takpekpevalaawo. Eɖe gbeƒãe hã be woaɖe The Bible—A Book of Fact and Prophecy ƒe video kasɛt ɖe go kpuie. Le nyateƒe me la, video kasɛt si ƒe tanyae nye “The Bible—Mankind’s Oldest Modern Book” la le Eŋlisigbe me fifia. Woxlẽ nyadzɔdzɔ wɔdɔɖeamedzi siwo tso teƒe siwo nɔnɔme sesẽwo le abe Bosnia kple Herzegovina ene. Esi nuƒola la nɔ enu wum la exlẽ Nyagblɔla 12:13 ƒe nyawo be: “Mina míase nyaawo katã ƒe taƒonya be: Vɔ̃ Mawu, eye nalé eƒe seawo me ɖe asi; elabena esia nye amegbetɔwo katã tɔ!”
Ŋkuɖodzinya nyui kae nye si! Mina míanɔ agbe alala ŋkeke si dzi ameƒomea katã akafu míaƒe Nufiala Gã, Yehowa, ahaɖo to eƒe nufiafia.
[Nɔnɔmetata siwo le axa 24, 25]
“Mawu ƒe Nufiafia” takpekpewo le Moscow kple Kiev he dzidzɔ geɖe vɛ
[Nɔnɔmetata siwo le axa 26, 27]
1. Ame geɖe ɖo kpe woƒe adzɔgbeɖeɖe na Mawu dzi to nyɔnyrɔ̃xɔxɔ me
2. Edzɔ dzi na takpekpevala aɖe si xɔ ƒe 100 be yexɔ agbalẽ yeye si woɖe ɖe go
3, 4. Wokpɔ ŋudzedze geɖe ɖe drama siwo nana ame bua tame la ŋu
5. Dutanyanyuigblɔla siwo wobia gbee le takpekpeawo me ƒo nu le Mawu ƒe nufiafia ƒe viɖewo ŋu