Viɖe Siwo Le Mawu Vavã La Vɔvɔ̃ Me
“Nye Yehowa, wò Mawu, enye amesi fia nusi nyo na wò la wò, nyee akplɔ wò to mɔ, si dzi nato la.”—YESAYA 48:17.
1. Afɔku kawoe mawuvɔvɔ̃ ana woaƒo asa na hafi?
ÐE ADAM tu mawuvɔvɔ̃ ɖo la, anye ne mewɔ nuvɔ̃ si na eya ŋutɔ ku ɖikaa eye eƒe dzidzimeviwo ɖo nuxaxa me ƒe akpe geɖe o. Ðe blema Israel-dukɔa wɔ Yehowa ƒe aɖaŋuɖoɖo be woavɔ̃ ye ahalɔ̃ ye dzi la, anye ne womeɖe dukɔ ma aboyoe yi Babilon o, eye womagbe Mawu ƒe Vi la ahaɖi ʋufɔ to ewuwu me o. Ðe egbe xexeame vɔ̃a Mawu la, anye ne nu fitifitiwo wɔwɔ manɔ dziɖuɖuwo alo asitsatsawo me o, nuvlowɔwɔ, alo aʋawɔwɔ hã manɔ anyi o.—Lododowo 3:7.
2. Togbɔ be nɔnɔme manyomanyowo le xexe si ƒo xlã mí me hã la, nukata wòle be míatu Yehowa-vɔvɔ̃ ɖo?
2 Gake nuka kee amesiwo ƒo xlã mí ɖawɔna o, Mawu vavã la vɔvɔ̃ tutuɖo ate ŋu aɖe vi na mí ame ɖekaɖekawo, ƒomewo, kple Yehowa subɔlawo ƒe hamewo. Esia wɔ ɖeka kple ŋkuɖodzinya si Mose gblɔ na Israel-dukɔa be: “Yehowa, wò Mawu la, mele naneke dim tso asiwò o, negbe esia ko be, navɔ̃ Yehowa, wò Mawu la, eye nazɔ eƒe mɔwo katã dzi, nalɔ̃e, eye nasubɔ Yehowa, wò Mawu la, tso dzi blibo kple wò luʋɔ blibo me; eye nawɔ Yehowa ƒe se . . . dzi bena wòanyo na wò.” (Mose V, 10:12, 13) Nukawoe nye viɖe siwo míekpɔna ne míevɔ̃ Mawu vavã Yehowa la dometɔ aɖewo?
Nunya—Exɔ Asi Wu Sika
3. (a) Nukae nye viɖe gãtɔ si míate ŋu akpɔ? (b) Psalmo 111:10 ƒe nyawo gɔme ɖe?
3 Viɖe gãtɔe nye nunya vavãtɔ. Psalmo 111:10 gblɔ be: “Yehowa vɔvɔ̃ enye nunya ƒe gɔmetoto.” Nya ma gɔme ɖe? Nunyae nye ŋutete be woazã sidzedze atsɔ akpɔ kuxiwo gbɔe, woaxe mɔ na dzɔgbevɔ̃e, ahaɖo taɖodzinu aɖewo gbɔ dzidzedzetɔe. Ebia nuwɔwɔ ŋuɖɔɖotɔe. Yehowa-vɔvɔ̃e nye nunya ma ƒe gɔmetoto, eƒe akpa gbãtɔ, eƒe anyinɔ. Nukatae? Elabena eƒe asinudɔwɔwɔwoe nuwɔwɔwo katã nye. Edzie wonɔ te ɖo. Etsɔ tiatiawɔblɔɖe na ameƒomea, gake mena ŋutete wo be woafia mɔ wo ɖokui wòadze edzi yeƒe mɔfiame manɔmee o. (Yosua 24:15; Yeremya 10:23) Ne míelɔ̃ ɖe nyateƒenya vevi mawo dzi henɔ agbe ɖe wo nu ko hafi nu ate ŋu adze edzi na mí ɖaa. Ne míaƒe sidzedze Yehowa na míeka ɖe edzi vevie be Mawu ƒe lɔlɔ̃nu ava eme godoo eye be kakaɖedzi le eƒe ŋugbedodo kple ŋutete be yeaɖo eteƒe na nuteƒewɔlawo ŋu la, ekema mawuvɔvɔ̃ aʋã mí míawɔ nu le nunya me.—Lododowo 3:21-26; Hebritɔwo 11:6.
4, 5. (a) Nukata ɖekakpui aɖe ƒe yunivɛsiti dede mena nunya vavãtɔe o? (b) Aleke nunya vavãtɔ wɔ su ɖekakpui sia kple srɔ̃a si, eye aleke esia trɔ woƒe agbenɔnɔe?
4 Bu kpɔɖeŋu sia ŋu kpɔ: Ƒe aɖewoe nye esi va yi la, ɖekakpui aɖe nɔ Saskatchewan Yunivɛsiti dem le Canada. Nugbagbewo ŋuti nusɔsrɔ̃ hã nɔ woƒe nusɔsrɔ̃wo me eye wofia nui le nɔnɔmetɔtrɔ ŋu. Esi wòwu sukua nu la, eva bi ɖe atɔm ƒe dzɔdzɔmeŋusẽŋununya me eye woɖoe ɖe Toronto Yunivɛsiti be wòayi eƒe nusɔsrɔ̃a dzi. Esi wònɔ nua srɔ̃m la, ekpɔ kpeɖodzi wɔnukuwo le ɖoɖo kple atsyɔ̃ si me atɔm le la ŋu. Gake womeɖo biabia siwo nye: Amekae wɔe? Ɣekaɣi wòwɔe? Kple Nukata wòwɔe ɖo? la ŋu nɛ o. Ne womeɖo nya siawo ŋu nɛ o ɖe, ɖe wòate ŋu awɔ eƒe sidzedze ŋudɔ le xexe si kpe aʋa ɣemaɣi la me nunyatɔea? Nukae afia mɔe? Dulɔlɔ̃ yea? Ŋutilãmenuwo didi yea? Ðe nunya vavãtɔ su esi nyateƒea?
5 Ðekakpui sia kple srɔ̃a wodze Biblia sɔsrɔ̃ gɔme kple Yehowa Ðasefowo esi wòwu suku nu megbe kpuie. Wova nɔ ŋuɖoɖo siwo wode kpɔkpɔ ge do kpoe tsã la kpɔm le Mawu ŋutɔ ƒe Nya la me. Wova nya Wɔla Yehowa Mawu. Esi wosrɔ̃ nu tso Mose ŋu le Ƒudzĩa nu, le Daniel kple eƒe zɔhɛwo ŋu le Babilon la, wosrɔ̃ alesi wòle vevie be woavɔ̃ Mawu ke menye amegbetɔ o. (Mose II, 14:10-31; Daniel 3:8-30) Mawuvɔvɔ̃ sia kple lɔlɔ̃ vavãtɔ na Yehowa va nɔ wo ʋãm. Eteƒe medidi o woƒe agbenɔnɔ katã trɔ. Ðekakpui sia va nya Amesi ƒe asinudɔwɔwɔ ŋuti wòsrɔ̃ nu tsoe le nugbagbewo ŋuti nusɔsrɔ̃a me azɔ. Eva nɔ Amesi ƒe nunya wòkpɔ esime wònɔ dzɔdzɔmeŋusẽŋununya srɔ̃m la ƒe tameɖoɖowo gɔme sem azɔ. Le esi teƒe be wòawɔ sidzedze si su esi ŋudɔ atsɔ awɔ nusiwo atsrɔ̃ ehaviwo la, woa kple srɔ̃a wodi be yewoakpe ɖe ame bubuwo ŋu woalɔ̃ Mawu kple wo haviwo. Wodze ɣeyiɣiawo katã ƒe subɔsubɔdɔa gɔme abe Mawu ƒe Fiaɖuƒea ƒe gbeƒãɖelawo ene. Emegbe wode Gbetakpɔxɔ Habɔbɔa ƒe Biblia Gilead Suku eye woɖo wo dutanyanyuigblɔlawoe.
6. Ne nunya si ƒo ke ɖe to ɖe Yehowa-vɔvɔ̃ me le mía si la, nudidi siwo anɔ anyi kpuie ko kawoe míatsri, eye nuka boŋ míanɔ wɔwɔm?
6 Nyateƒee, menye amesiamee ate ŋu anye dutanyanyuigblɔla o. Gake nunya si nɔ te ɖe Yehowa-vɔvɔ̃ dzi ate ŋu aɖe vi na mí katã. Ne míetu nunya ma ɖo la, míanɔ amesiwo susua tameɖoɖo si le agbe ŋu gblɔna ko ƒe nunya srɔ̃m vevie o. Míanɔ Biblia si Yehowa Mawu si nye Agbedzɔƒe, amesi ate ŋu ana agbe mavɔ mí ƒe gbɔgbɔ ʋã woŋlɔ la boŋ srɔ̃m. (Psalmo 36:10 Kolosetɔwo 2:8) Le esi teƒe be asitsanuɖoanyi si ŋutɔ gli ɖo ta gbegblẽ me naɖe mí aboyoe la, míawɔ ɖe Yehowa ƒe aɖaŋuɖoɖo be míana nuɖuɖu kple avɔtata si le mía si nasɔ gbɔ na mí la dzi eye míana ƒomedodo kple Mawu nanye nu vevitɔ na mí le míaƒe agbe me. (Timoteo I, 6:8-12) Le esi teƒe be míanɔ nu wɔm abe ɖe míaƒe etsɔ me nɔ te ɖe ŋutilãmedɔwɔɖui dzi le xexe sia me ene la, míaxɔ Yehowa ƒe Nya si wògblɔ na mí be xexeame va yina kple eƒe nudzodzrowo ke amesi wɔa Mawu ƒe lɔlɔ̃nu la nɔa anyi yi ɖe mavɔmavɔ me dzi ase.—Yohones I, 2:17.
7. (a) Aleke Lododowo 16:16 kpe ɖe mía ŋu be susu si da sɔ nanɔ mía si le nu veviwo ŋu? (b) Teƒeɖoɖo kawoe Mawu ƒe lɔlɔ̃nu wɔwɔ nu vevitɔe le míaƒe agbe me hena vɛ?
7 Lododowo 16:16 gblɔ anukwaretɔe tsɔ de dzi ƒo na mí be: “Aleke gbegbe nunya [nunya si dze egɔme kple Yehowa-vɔvɔ̃] kpɔkpɔ mehenyo wu sikae, eye gɔmesesekpɔkpɔ meheƒo klosalo tae o!” Nunya kple gɔmesese sia aʋã mí be míana Mawu ƒe lɔlɔ̃nuwɔwɔ nanye nu vevitɔ na mí le míaƒe agbe me. Eye dɔ kae Mawu de eƒe Ðasefowo si be woawɔ le amegbetɔ ƒe ŋutinya ƒe ɣeyiɣi sia me? Eyae nye be woaɖe gbeƒã tso yeƒe Fiaɖuƒea ŋuti ahakpe ɖe dzi anukwaretɔwo ŋu be woava zu Yesu Kristo ƒe nusrɔ̃la vavãwo. (Mateo 24:14; 28:19, 20) Esia nye dɔ si ƒe teƒeɖoɖo naa dzidzeme vavãtɔ kple dzidzɔkpɔkpɔ geɖe ame. Eyata susu nyui aɖe tae Biblia gblɔ be: “Woayra amesi tu nunya.”—Lododowo 3:13.
Ekpɔa Ame Ta tso Vɔ̃ Wɔwɔ Me
8. (a) Yɔ viɖe evelia si tsoa mawuvɔvɔ̃ me. (b) Nukae nye nu gbegblẽ si me wòkpɔ mía ta tsoe? (d) Aleke mawuvɔvɔ̃ va zua ameʋãnu sẽŋui?
8 Viɖe evelia si tsoa mawuvɔvɔ̃ mee nye be ekpɔa mía ta le vɔ̃ wɔwɔ me. Amesiwo dea bubu deto Mawu ŋu metsoa nya me na wo ɖokui le nyui kple vɔ̃ ŋu o. Womekpɔa nusi Mawu gblɔ be enyo la be menyo o, eye womebua nusiwo Mawu gblɔ be womenyo o la be wonyo o. (Psalmo 37:1, 27; Yesaya 5:20, 21) Hekpe ɖe eŋu la, amesi mawuvɔvɔ̃ ʋãna la mebunɛ ko be nusi Yehowa gblɔ be enyo alo menyo o ɖeɖe nyanya sɔ gbɔ o. Amesia lɔ̃a nusi Yehowa lɔ̃ eye wòléa fu nusi Yehowa lé fui. Esia wɔnɛ be wòwɔna ɖe Mawu ƒe dzidzenuwo dzi. Eyata abe alesi Lododowo 16:6 gblɔe ene la, “Yehowa-vɔvɔ̃ wotsɔna tsria vɔ̃e.” Mawuvɔvɔ̃ sia va zua ameʋãŋusẽ sẽŋu aɖe si na wowɔa nusi ame mate ŋu atsɔ eya ŋutɔ ƒe ŋusẽ awɔ o.
9. Aleke didi vevie be yemawɔ nusi madze Mawu ŋu o kpɔ ŋusẽ ɖe nyɔnu aɖe si le Mexico ƒe nyametsotso dzii, eye nukae do tso eme?
9 Ne fifia koe ame aɖe le mawuvɔvɔ̃ tum ɖo gɔ̃ hã la, ado ŋusẽe be mawɔ nusi ava vee emegbe le eƒe agbemeŋkekewo katã me o. Le kpɔɖeŋu me, nyɔnu funɔ aɖe si le Mexico bia nya Yehowa Ðasefo aɖe le fuɖeɖe ŋu. Ðasefoa xlẽ ŋɔŋlɔ geɖe na nyɔnua hegblɔ nɛ be: “Agbe nye nu xɔasi le Wɔla la gbɔ, vidzĩ siwo womekpɔ dzi haɖe o tɔ hã xɔ asi nɛ.” (Mose 21:22, 23; Psalmo 139:13-16) Dodokpɔ si wowɔ nɛ le kɔdzi fia be ɖevia anye nuwɔametɔ. Gake esi nusi nyɔnua kpɔ le Mawu ƒe Nya la me ʋãe fifia ta la, eɖoe be yeadzi ɖevia. Eƒe ɖɔkta la gbe be wòagava ye gbɔ azɔ o, eye srɔ̃a hã gblɔ be yeagbee, gake enɔ te sesĩe. Mlɔeba la, edzi nyɔnuvi—ele ame me, eƒe lãme sẽ, eye edze tugbe ŋutɔ. Ŋudzedzekpɔkpɔ ʋãe wòdi Ðasefowo eye wòdze Mawu ƒe Nya la sɔsrɔ̃ gɔme. Le ƒe ɖeka ko me la, wo kple srɔ̃a woxɔ nyɔnyrɔ̃. Dzi dzɔ wo ŋutɔ esi wova do go Ðasefo si ɖe gbeƒã na wo gbã la le nutome gã takpekpe aɖe me le ƒe ʋee aɖewo megbe, eye woɖee fia wo vi dzetugbe si xɔ ƒe ene ɣemaɣi la. Bubu vavã dede Mawu ŋu kple didi vevie be womawɔ nusi madze eŋu o te ŋu kpɔa ŋusẽ gã aɖe ɖe ame ƒe agbenɔnɔ dzi nyateƒe.
10. Nɔnɔme gbegblẽ kawoe mawuvɔvɔ̃ ate ŋu ado ŋusẽ amewo be woadzudzɔ?
10 Mawuvɔvɔ̃ doa ŋusẽ mí be míagawɔ nu gbegblẽ vovovowo o. (Korintotɔwo II, 7:1) Ne wotui ɖo nyuie la, ate ŋu akpe ɖe ame ŋu wòadzudzɔ nuvɔ̃ ɣaɣla siwo eya kple Yehowa ɖeɖeko nya la wɔwɔ. Ate ŋu akpe ɖe ame ŋu wòavo tso aha alo atike vɔ̃ɖi zazã ƒe kluvinyenye me. Ame aɖe si zã atike vɔ̃ɖi tsã le Dziehe Afrika ɖe eme be: “Esi meva dze si Mawu la, vɔvɔ̃ be mava do dziku nɛ alo mava wɔ nusi madze eŋu o hã va ɖo menye. Menya be enɔ kpɔyem eye nye didi wònye be wòakpɔ ŋudzedze ɖe ŋunye. Esia ʋãm be melɔ atike vɔ̃ɖi siwo nɔ asinye la kɔ ɖe afɔdzi me ʋu tsi wòkplɔe dzoe.” Mawuvɔvɔ̃ kpe ɖe ame akpe bubu geɖewo hã ŋu le mɔ siawo tɔgbe nu.—Lododowo 5:21; 15:3.
Enye Ametakpɔnu tso Amegbetɔvɔvɔ̃ Si Me
11. Afɔku si bɔ ka mee Yehowa-vɔvɔ̃ le mɔ nyuitɔ nu akpɔ mía ta tsoe?
11 Mawuvɔvɔ̃ nyuitɔ kpɔa mía ta tso amegbetɔvɔvɔ̃ hã si me. Amegbetɔvɔvɔ̃ kpɔ ŋusẽ ɖe ame geɖe dzi le mɔ vovovowo nu. Yesu Kristo ƒe apostolowo gɔ̃ hã gblẽe ɖi hesi dzo esi asrafowo lée le Getsemane-bɔa me. Emegbe le nunɔla gã ƒe aƒeme, esi Petro tɔtɔ eye vɔvɔ̃ ɖoe la, egbe be menye Yesu ƒe nusrɔ̃lae yenye o eye be yemenyae gɔ̃ hã o. (Marko 14:48-50, 66-72; Yohanes 18:15-27) Gake wokpe ɖe apostoloawo ŋu wogasu te le gbɔgbɔ me. Le go bubu me la, vɔvɔ̃ ɖo Uriya, Semaya vi, le Fia Yoyakim ƒe ŋkekeawo me ale gbegbe be edzudzɔ eƒe subɔsubɔdɔ abe Yehowa ƒe nyagblɔɖila ene eye wòsi le dukɔa me, gake ɖeko wova lée hewui.—Yeremya 26:20-23.
12. (a) Ametakpɔnu tso amegbetɔvɔvɔ̃ me ka dzie Lododowo 29:25 tɔ asii? (b) Aleke wotua ŋuɖoɖo ɖe Mawu ŋu ɖoe?
12 Nukae ate ŋu akpe ɖe ame ŋu be wòaɖu amegbetɔvɔvɔ̃ dzi? Esi Lododowo 29:25 xlɔ̃ nu be “amegbetɔvɔvɔ̃ mɔ̃e wònye ɖea ame” vɔ la, egagblɔ be: “Amesi ɖoa dzi ɖe Yehowa ŋu la, woakpɔ eta.” Ŋuɖoɖo ɖe Yehowa ŋue nye nu vevitɔ. Sidzedze kple nuteƒekpɔkpɔ dzie ŋuɖoɖeŋu ma nɔa te ɖo. To Yehowa ƒe Nya la sɔsrɔ̃ me la, míekpɔa alesi eƒe mɔwo dzɔe la ƒe kpeɖodziwo. Míeva nyaa nudzɔdzɔ siwo ɖe alesi wònye amesi ŋu míate ŋu aɖo ŋu ɖo, kakaɖedzi si le eƒe ŋugbedodowo (tsitretsitsia hã le eme) ŋu, eƒe lɔlɔ̃ kple eƒe ŋusẽkatãtɔnyenye fia. Azɔ ne míewɔ nu wòsɔ ɖe sidzedze ma nu, míewɔ nusiwo Yehowa fia hetsri nusiwo nu wòde se ɖo la, eƒe lɔlɔ̃ ƒe beléle kple alesi wònye amesi ŋu míate ŋu aɖo ŋu ɖo ɖea vi na mí. Mía ŋutɔwo míekpɔa kpeɖodziwo be ewɔa eƒe ŋusẽ ŋudɔ be eƒe lɔlɔ̃nu nava eme. Míaƒe kaka ɖe eyama dzi, kple míaƒe lɔlɔ̃ nɛ kple didi vevie be míagawɔ nusi madze eŋu o la nu sẽna ɖe edzi. Gɔmeɖoanyi sesẽ dzie wotua ŋuɖoɖeŋu sia ɖo. Enyea ametakpɔnu sesẽ aɖe si kpɔa mía ta tso amegbetɔvɔvɔ̃ me.
13. Aleke mawuvɔvɔ̃ ate ŋu akpe ɖe mía ŋu le míaƒe dɔwɔƒe, aƒeme, kple suku?
13 Míaƒe ŋuɖoɖo ɖe Yehowa ŋu kple mawuvɔvɔ̃ ana míali ke sesĩe le nunyuiwɔwɔ me ne dɔtɔ aɖe do ŋɔdzi na mí be yeanyã mí le dɔ me ne míegbe be míakpɔ gome le asitsamɔnu fitifitiwo me o gɔ̃ hã. (Tsɔe sɔ kple Mixa 6:11, 12.) Mawuvɔvɔ̃ sia kpena ɖe Kristotɔ akpe geɖe ŋu be woyia tadedeagu vavãtɔ dzi togbɔ be ƒomea me tɔ dzimaxɔsetɔwo ƒe tsitretsiɖeŋu li gake. Edea dzi ƒo na sɔhɛ siwo le suku dem hã be woaɖe wo ɖokui afia be Yehowa Ðasefowoe yewonye eye wòdoa ŋusẽ wo wonɔa te ɖe sukuhati siwo ɖea alɔme le Biblia ƒe dzidzenuwo ŋu ƒe fewuɖuɖuwo nu. Esia ta ƒewuivi Ðasefo aɖe gblɔ be: “Nusi wosusuna la mele vevie kura o. Ke nusi Yehowa susunae le vevie.”
14. Aleke Yehowa subɔlawo wɔna ɖua aʋa dzi ne woƒe agbe ɖo afɔku me gɔ̃ hã?
14 Kakaɖedzi ma ke doa ŋusẽ Kristotɔ vavãwo be woalé Yehowa ƒe mɔwo me ɖe asi sesĩe ne woƒe agbe ɖo afɔku me gɔ̃ hã. Wonya be xexeame ati yewo yome tsã. Wokpɔe dze sii be woƒo apostoloawo eye be ame vɔ̃ɖiwo ƒo Yesu Kristo ŋutɔ̃ hã eye wowui. (Marko 14:65; 15:15-39; Dɔwɔwɔwo 5:40; tsɔe sɔ kple Daniel 3:16-18.) Gake kakaɖedzi blibo le Yehowa subɔlawo si be ate ŋu ado ŋusẽ yewo yewoado dzi; be le Mawu ƒe kpekpeɖeŋu me la, yewoate ŋu aɖu aʋa dzi; be Yehowa aɖo eteƒe na amesiwo wɔ nuteƒe la godoo—ne ahiã hã la, afɔ wo ɖe tsitre be woanɔ agbe le eƒe xexe yeyea me. Woƒe lɔlɔ̃ na Mawu kple mawuvɔvɔ̃ ʋãa wo vevie be woatsri nusianu si madze eŋu o la wɔwɔ.
15. Nukae kpe ɖe Yehowa Ðasefowo ŋu wote ŋu lé woƒe nuteƒewɔwɔ me ɖe asi le Nazi-fuwɔamegaxɔwo me?
15 Ameʋaʋã sia na Yehowa Ðasefowo te ŋu nɔ te ɖe nu dziŋɔwo nu le Nazi-fuwɔamegaxɔwo me le ƒe 1930 kple 1940 ƒeawo me. Wotsɔ Yesu ƒe aɖaŋuɖoɖo si le Luka 12:4, 5 de dzi me be: “Mele egblɔm na mi, xɔ̃nyewo, bena: Migavɔ̃ amesiwo wua ŋutilã, eye esia megbe la naneke megale wo si wu bena, woawɔ o la o. Ke mafia amesi miavɔ̃ la mi: Mivɔ̃ amesi, ne ewu ame, emegbe la ŋusẽ le esi be, wòatsɔe aƒu gbe ɖe dzomavɔʋe me; ẽ, mele egblɔm na mi bena: Eyama miavɔ̃!” Esia wɔe be Gustav Auschner si nye Ðasefo nɔ Sachsenhausen fuwɔamegaxɔ me la, ŋlɔ emegbe be: ‘SS-srafowo da tu August Dickmann eye woɖoe be yewoada míawo hã ne míede asi agbalẽ aɖe te tsɔ gbe nu le míaƒe xɔse gbɔ o. Mía dometɔ aɖeke mede asi agbalẽa te o. Nusi madze Yehowa ŋu o wɔwɔ do vɔvɔ̃ na mí wu woƒe tukpewo.’ Amegbetɔvɔvɔ̃ nana wonaa ta, gake mawuvɔvɔ̃ na wonɔa te sesĩe le nunyuiwɔwɔ me.
Agbe Ðeɖe
16. Nukae lé Noa ɖe te le mɔ nyuitɔ dzi ƒe geɖe vaseɖe esime Tɔɖɔɖɔa va, eye nukae do tso eme na eya kple eƒemetɔwo?
16 Noa nɔ agbe le xexe si nɔ anyi do ŋgɔ na tɔɖɔɖɔa ƒe ŋkeke mamleawo me. Le amegbetɔ ƒe nugbegblẽwɔwɔ ta Yehowa ɖoe kplikpaa be yeatsrɔ̃ xexe vɔ̃ɖi si nɔ anyi ɣemaɣi. Gake ɣemaɣi ke la, Noa nɔ xexe ma si me nuvlowɔwɔ, agbegbegblẽnɔnɔ tovo, kple Mawu ƒe lɔlɔ̃nu mawɔmawɔ bɔ ɖo me. Togbɔ be Noa ɖe gbeƒã nudzɔdzɔewɔwɔ hã la, “womedze sii o, vaseɖe esime tɔɖɔɖɔ va, eye wòkplɔ wo katã yi.” (Mateo 24:39) Gake esia mena Noa de megbe le dɔ si Mawu de esi ŋu o. “Alesi Mawu de se nɛ la, nenema pɛ wòwɔ.” (Mose I, 6:22) Nukae lé Noa ɖe te be wòyi dɔ dzi ƒe geɖe vaseɖe esime Tɔɖɔɖɔa va? Hebritɔwo 11:7 ɖo eŋu be: “Le xɔse me Noa, esime wòxɔ ɖeɖefia tso Mawu gbɔ le nusiwo womekpɔ haɖe o ŋuti la, [eɖe mawuvɔvɔ̃ fia].” Esia ta wokpɔ eya, srɔ̃a, wo viŋutsuwo, kple wo srɔ̃wo ta le Tɔɖɔɖɔa me.
17. (a) Eɖanye nukae ame bubuwo wɔna o, nukae wòle be míawɔ? (b) Nukatae Yehowa-vɔ̃lawo nye dzidzɔkpɔla vavãwo?
17 Míele ɣeyiɣi si sɔ kple Noa ƒe ŋkekea le mɔ geɖe nu la me. (Luka 17:26, 27) Wogale nu xlɔ̃m amewo. Nyaɖeɖefia 14:6, 7 gblɔ be mawudɔla aɖe le dzodzom le dziƒo titina, si le dzi dem ƒo na amewo tso dukɔ sia dukɔ kple to sia to kple gbegbɔgblɔ sia gbegbɔgblɔ me be “mivɔ̃ Mawu, eye mitsɔ ŋutikɔkɔe nɛ.” Eɖanye nukae amesiwo ƒo xlã wò wɔna o, wɔ nya mawo dzi eye nàkpe ame bubuwo be woawo hã nawɔ wo dzi. Wɔ nu le xɔse me eye nàɖe mawuvɔvɔ̃ afia abe Noa ene. Ne èwɔ esia la, ate ŋu ana woakpɔ mia kple ame bubu geɖe ƒe agbe ta. Ne míebu viɖe siwo amesiwo vɔ̃a Mawu vavã la kpɔna ŋu la, ɖeko míawɔ ɖeka kple hakpala si gbɔgbɔ ʋã wòdzi ha be: “Woayra, ŋutsu, si vɔ̃a Yehowa, eye wòkpɔa dzidzɔ le eƒe seawo ŋu vevie.”—Psalmo 112:1.
Aleke Nàɖo Wo Ŋui?
◻ Nukawoe nye viɖe ɖedzesi siwo Mawu vavã la vɔvɔ̃ hena vɛ dometɔ aɖewo?
◻ Aleke nunya si tso mawuvɔvɔ̃ me ate ŋu akpɔ mía tae?
◻ Nukata mawuvɔvɔ̃ na míetsria vɔ̃?
◻ Aleke mawuvɔvɔ̃ kpɔa mía ta tso amegbetɔvɔvɔ̃ si mee?
◻ Ŋusẽ kae mawuvɔvɔ̃ kpɔna ɖe agbe si míava nɔ le etsɔ me ƒe mɔkpɔkpɔ dzi?
[Nɔnɔmetata siwo le axa 16, 17]
“Woayra, ŋutsu, si vɔ̃a Yehowa, eye wòkpɔa dzidzɔ le eƒe seawo ŋu vevie.”—Psalmo 112:1