Nukae Wò Dɔwɔna Abia Tso Asiwò?

WOTSƆ nya ɖe Dziehe Amerika dukɔ aɖe ƒe dukplɔla srɔ̃ ŋu be elɔ dɔlar akpe alafa geɖe tsɔ de adzɔha fitifiti siwo eƒe ƒometɔwo ɖo la me. Wolé adzɔnudzraɖoɖodzikpɔla aɖe si xɔ ƒe 38 le India hekplɔe dzoe le eƒe aƒe xɔasi la kple ʋu 29 gbɔe le esi wotsɔ nya ɖe eŋu be efi dɔlar biliɔn 1.6 le gadzadzraɖo kple adzɔnudzraɖoɖodzikpɔha me ta. Le Philippines la, tukpui si zazã ŋu se meɖe mɔ ɖo o ye ƒukpo aɖe dzi tɔ akpe geɖe wɔna tsɔ kpɔa woƒe nuhiahiãwo gbɔe. Wogblɔ be bene woayi dɔ ɖevi sia wɔwɔ dzi la, wonaa zãnu amegãwo zi geɖe be woagaɖe fu na yewo o.

Ẽ, anukwaremaɖimaɖi kple ametafatafa le dɔwɔwɔ me bɔ ɖe xexeame katã. Eye zi geɖe la, egblẽ ameawo ƒe ɖoƒe, ŋkɔ, kple ga dome.

Ke wò ya ɖe? Ðe nèle dɔ aɖe wɔma? Alo ɖe nèle eŋu bum be yeadze ɖe gɔmea? Nukawoe wòabia tso asiwò? Dɔwɔna abia nane godoo. Esia manye nu manyomanyo kokoko o. Gake anyo be nàbu nusi wòabia ŋu hafi nàƒo ta ɖe eme alo atso nya me le esi nèɖo anyi xoxo ŋu. (Luka 14:28) Aɖaka si le axa 31 fia asi nane siwo wòabia siwo ŋu nàdi be yeabu.

Eme kɔ be dɔwɔwɔ mele bɔbɔe o. Le Kristotɔ gome la, gbɔgbɔ me kple agbenyuinɔnɔ ƒe agbanɔamedzi aɖewo li siwo ŋu wòle be wòabu. Ðe nàte ŋu akpɔ nusiwo wòabia la gbɔ agada asɔ le gbɔgbɔ mea? Ðe nusiwo wòabia dometɔ aɖewo manyawɔ na wò o le agbenyuinɔnɔ taa? Nukawoe nye gɔmeɖose siwo akpe ɖe ŋuwò nànya nusiwo nyo kple esiwo menyo o dometɔ aɖewo?

Tsɔ Ga Ðo Afisi Sɔ

Ga hiã woatsɔ awɔ dɔe, eye wokpɔa mɔ be dɔwɔwɔ ahe ga vɛ woatsɔ akpɔ ƒome dzii. Gake wò taɖodzinuwo le ga gome ate ŋu atɔtɔ bɔbɔe. Ŋukeklẽ ate ŋu ado mo ɖa. Le ame geɖe gome la, gae wotsɔ ɖoa ŋgɔ na nu bubuwo katã. Gake Agur si nye Biblia-gbalẽ, Lododowo, ŋlɔlawo dometɔ ɖeka gblɔ nukpɔsusu si da sɔ be: “Megana ahedada kple hotsuim o; na maɖu nye nusi nye tɔnye.” (Lododowo 30:8) Ekpɔ ŋudzedze ɖe nunyiame si asu ƒe amesinɔnɔ ƒe vevienyenye ŋu dze sii—medi be “nu nadze edzi na ye kakaka” abe alesi ame aɖewo dinɛ le dɔwɔwɔ me ene o.

Gake ŋukeklẽ ate ŋu ana woaŋlɔ gɔmeɖose sia be, vevietɔ ne yeaɖi nudzedziname ƒe mɔnukpɔkpɔwo ʋu ɖi. Yehowa Ðasefowo ƒe dzikpɔla mɔzɔla aɖe si le dukɔ madeŋgɔ aɖe me ka nya ta le nusia tɔgbe ŋu. Dɔwɔha aɖe si nɔ gati si woatsɔ aɖo dɔe dim la na wòdze be amesiwo ade ga dɔa me ƒe ga adzi ɖe edzi zi gbɔ zi eve, ɖewohĩ le ɣleti ʋee aɖewo ko me. Gakpɔmɔnu bɔbɔe sia na ame geɖe de ga eme. Subɔla mɔzɔla la gblɔ be: “Ame aɖewo tsi klokloklo dzi ɖe eŋu akpa. Womebia nu me se nyuie hafi o, eye wodo ga [tsɔ de eme].”

Gake ame eve aɖewo ya yi dɔwɔha sia ƒe ɔfis be yewoabia nu me nyuie hafi atsɔ ga ade eme. Esi wobia be yewoakpɔ woƒe dɔwɔnuwo la, wogbe etsɔtsɔ fia wo. Esia na womeka ɖe dɔwɔha la dzi tututu o. Ekpɔ wo ta elabena le kwasiɖa ʋee aɖewo me ko woƒe ametafatafa dze go eye wolé amewo. Wò ya kpɔ nusi gbegbe wògblẽ le amesiwo mebia nu me nyuie hafi o ŋu ɖa. Menye ga koe bu na wo o, ke ɖewohĩ wo kple wo xɔlɔ̃ siwo do ga na wo gake womate ŋu axee na wo o le esi dɔa gblẽ ta hã dome gblẽ. Aleke gbegbe nunya le emee nye esi be woawɔ Lododowo 22:3 me nyawo ƒe gɔmeɖosewo ŋudɔ le ganyawo gome: “Nunyala kpɔa dzɔgbevɔ̃e, eye wòɣlaa eɖokui; ke ame bebewu dea ta eme, eye akpɔ etɔnua”!

Wɔ Nya si Nègblɔ Dzi

Ke ne dɔa meva ɖe vi abe alesi nèbui ene o ɖe? Psalmo 15:4 kafu amesi metrɔa eƒe atamkaka o ne ema wɔwɔ agblẽ nu le eŋu hã: “Amesi ka atam, si me eya ŋutɔ ƒe gbegblẽ tsona, ke megatrɔnɛ o.” Ne dɔ le afɔ tsɔm nyuie la, nya dzi nya wɔna. Gake eva zua dodokpɔ ne ga abu na ame.

Ðo ŋku Biblia me kpɔɖeŋu aɖe dzi le Yosua ŋɔli. Gibeontɔwo zã aɖaŋu ale be Israel-megãwo nabla nu kpli yewo eye womatsrɔ̃ yewo o. Evɔ dukɔ si wobu be enye ŋɔdzi na Israel-viwo me tɔwoe wonye hafi. Esi amefuflua va dze go la, “Israel-viwo mesi wo o, elabena ameha la ƒe amegãwo ta Yehowa . . . na wo.” (Yosua 9:18) Togbɔ be futɔwoe wonye hã la, amegãwo kpɔe be ehiã be yewoawɔ ɖe yewoƒe nya dzi. Eye nusiwo va dzɔ emegbe ɖee fia be nusia dze Yehowa ŋu.—Yosua 10:6-11.

Ðe nàlé wò dɔ ŋuti atamkakawo kple dɔwɔɖoɖowo me ɖe asi ne nuwo metsɔ afɔ nyuie abe alesi nèbui ene o hã?a Esia wɔwɔ ana nànɔ abe Yehowa, amesi wɔa eƒe nyawo dzi ɣesiaɣi ene.—Yesaya 55:11.

Ði Anukware

Anukwareɖiɖi le abe lãha aɖe si tsrɔ̃m wole, alo wotsrɔ̃ wo vɔ keŋkeŋ ene le asitsatsa me egbea. Amesiwo wɔa wò dɔa tɔgbe ate ŋu ato mɔ fitifiti dzi akpɔ ga zã. Woate ŋu aka aʋatso le boblododo me. Woate ŋu afi adzɔha bubu ƒe ŋkɔ atsɔ aɖo woƒe adzɔnu dzi. Alo woate ŋu akafu adzɔnu gbegblẽ aɖe be enyo ŋutɔ. Esiawo katã nye anukwaremaɖimaɖi ƒomeviwo. Amesiwo katã wɔa nusiawo la le abe “ame vɔ̃ɖi” si Asaf gblɔ be “elia kɔ kesinɔnuwo ɖi” ene si edze ƒã be mɔ fitifiti dzie wòto.—Psalmo 73:12.

Ðe wò Kristotɔ nàto mɔ fitifitiwo dzia? Alo ɖe Biblia me gɔmeɖosewo abe esiawo ene: “Míewɔ vɔ̃ ɖe ame aɖeke ŋuti o, míegblẽ ame aɖeke o, míeba ame aɖeke o”; “míegbea ŋukpenanu ɣaɣlawo boŋ, eye míezɔna le aɖaŋu vɔ̃ me o”; “nudakpe eve ƒomevi enye ŋunyɔ na Yehowa; nudanu amebatɔ menyo o,” afia mɔ wòa? (Korintotɔwo II, 4:2; 7:2; Lododowo 20:23) Ðo ŋku edzi be menye ame bubu aɖekee to anukwaremaɖimaɖi vɛ tsɔ wu Satana Abosam “aʋatsokafofo” la o.—Yohanes 8:44.

Ame aɖewo agbe agblɔ be: ‘Asesẽ ŋutɔ hafi wò dɔ nali ke dzaa nèto mɔ fitifiti dzi abe ame bubuwo ene hafi.’ Afisiae Kristotɔ ate ŋu aɖe eƒe xɔse ɖe Yehowa me afia le. Wodoa ame ƒe anukwareɖiɖi kpɔna ne ema wɔwɔ abia nane tso ame si. Gbɔgblɔ be womakpɔ nu aɖu ne womeka aʋatso o sɔ kple gbɔgblɔ be Mawu metsɔ ɖeke le eme na amesiwo lɔ̃nɛ o. Amesi xɔ Yehowa dzi se bliboe nya be Mawu ate ŋu akpɔ esubɔlawo dzi le dukɔ kple nɔnɔme ɖesiaɖe me. (Hebritɔwo 13:5) Nyateƒee, ahiã be ga sue si anɔ ame si naɖi ƒo nɛ togbɔ be mede esi anɔ ame maɖianukwarewo si nu o, gake ɖe medze be woawɔ esia ne Mawu nakpɔ ŋudzedze ɖe ame ŋu oa?

Ðo ŋku edzi be anukwaremaɖimaɖi le abe bɔl si ne wodae xlã ɖe gli wòagatrɔ va edala gbɔ ene. Ne wokpɔe be asitsala aɖe meɖia anukware o la, zi geɖe la asisiwo kple agbatɔwo gblẽnɛ ɖi. Àte ŋu aflu wo zi ɖeka gake eseƒee nye ma. Gake wodea bubu anukwareɖila ya ŋu zi geɖe. Kpɔ nyuie be susu gbegblẽ si nye be ‘Amesiame wɔnɛ, eyata MEGBLẼ O’ la nagakpɔ ŋusẽ ɖe dziwò o. Biblia ƒe gɔmeɖose ye nye be, “Meganɔ ha yome le nu vlo wɔwɔ me o.”—Mose II, 23:2.

Tsɔe be wò dɔwɔhati si nèle dɔ wɔm kpli xoxoxo menye hati Kristotɔ o eye mewɔna ɖe Biblia ƒe gɔmeɖosewo dzi ɣesiaɣi o. Ðe wòasɔ be nàtsɔ esia ado taflatse ahaɖe ta le wò ŋutɔ wò agbanɔamedzi te ne nusi mesɔ kple Ŋɔŋlɔawo o le edzi yima? Ðo ŋku kpɔɖeŋuwo abe Adam kple Saul ene dzi. Le esi teƒe be woaƒo asa na nuvɔ̃ la, wona ame bubuwo ƒe nyaƒoɖeamenuwo ɖu wo dzi eye wobu fɔ woƒe zɔhɛwo be woawoe wɔe. Aleke gbegbe wòhegblẽ nu le wo ŋui enye si!—Mose I, 3:12, 17-19; Samuel I, 15:20-26.

Wɔ Dɔ Kple Haxɔsetɔwo Nyuie

Ðe nu vevi aɖewo li siwo ŋu woabu ne wole dɔ wɔm kple hati Yehowa subɔlawoa? Esi nyagblɔɖila Yeremya ƒle agble le eya ŋutɔ tɔɖia si le wo de Anatot la, mexe fea nɛ eye wowɔe ame eve dome nyadzilɔlɔ̃ ko evɔ o. Ke boŋ egblɔ be: “Meŋlɔe ɖe agbalẽ me, eye metre enu, meɖe ɖasefowo, eye meda ga la le nudanu me.” (Yeremya 32:10) Ðoɖo siawo ŋɔŋlɔ ɖe agbalẽ me ate ŋu axe mɔ na masɔmasɔ siwo ate ŋu ado mo ɖa emegbe ne nuwo trɔ.

Ke ne edze abe nɔvi Kristotɔ aɖe meɖe afɔ ɖe ŋuwò nyuie le dɔwɔwɔ me o ɖe? Ðe wòle be nàkplɔe yi ʋɔnuia? Biblia ɖe esia me nyuie. Paulo bia be: “Ne mia dome ame aɖe he nya ɖe xɔlɔ̃via ŋuti la, ado dzi be, yeahee ayi ʋɔnu ɖe ame madzɔmadzɔwo ŋku me, eye menye ame kɔkɔewo ŋku me o mahã?” Ke ne miete ŋu kpɔ kuxi aɖe gbɔ nyuie enumake o ɖe? Paulo gagblɔ be: “Esia menyo na mi kura o bena, nyadɔdrɔ̃wo le mia dome ɖe mia nɔewo ŋuti. Nukaŋuti miena wowɔ vɔ̃ ɖe mia ŋuti boŋ oa? Nukaŋuti miena woba mi boŋ oa?” Kpɔ alesi wòaƒo ɖi Kristotɔwo ƒe habɔbɔa ne egodotɔwo see be Kristotɔ vavãwo tsɔ nya ɖe wo nɔewo ŋu le ʋɔnu ɖa! Ðe wòanye be galɔlɔ̃ nu sẽ wu havilɔlɔ̃ le nɔnɔme siawo mea? Alo ɖe wòanye be woɖe bubu le ame aɖe dzi eye wɔɖenui koe xɔ eƒe susu mea? Paulo ƒe aɖaŋuɖoɖo fia be le nɔnɔme siawo me la anyo be woaba wò tsɔ wu be nàtsɔ nya la ayi ʋɔnui.—Korintotɔwo I, 6:1, 7; Romatɔwo 12:17-21.

Le nyateƒe me la, Ŋɔŋlɔawo me mɔfiame li si dzi woato akpɔ nyahehe mawo gbɔ le hamea me. (Mateo 5:37; 18:15-17) Be Kristotɔ dzikpɔlawo nakpe ɖe nɔvi siwo kpe nya ŋu be woaɖe afɔ siwo sɔ la, woate ŋu aɖo aɖaŋu nyui aɖewo na wo. Ðewohĩ anɔ bɔbɔe be woalɔ̃ ɖe Biblia ƒe gɔmeɖosewo dzi le nyamedzroɣi mawo, gake ɖe nàɖee afia vavã be yexɔ aɖaŋuɖoɖoawo to wɔwɔ ɖe wo dzi mea? Lɔlɔ̃ na Mawu kple hati Kristotɔwo aʋã mí be míawɔe nenema.

Ðikeke mele eme o be wò dɔwɔna abia nanewo tso asiwò godoo. Míekpɔ mɔ be nusiwo wòabia la asɔ nyuie. Ne nyametsotso alo nɔnɔme aɖe si ŋu nya ku ɖo dze ŋgɔ wò la, nenɔ susu me na wò be nu geɖe le agbe me siwo xɔ asi sã wu ga. Ne míetsɔ ga ɖo afisi sɔ, ne míewɔa míaƒe nya dzi, ne míeɖia anukware, hewɔa nu kple dɔwɔhatiwo le Kristotɔwo ƒe mɔ nu la, míate ŋu akpɔ egbɔ be dɔwɔwɔ mabia ɣeyiɣi kple ga wu esi dze o, eye le ɣeyiɣi ma ke me la míate ŋu alé xɔlɔ̃wo, dzitsinya nyui, kple ƒomedodo nyui me ɖe asi kple Yehowa.

[Etenuŋɔŋlɔ]

[Aɖaka si le axa 31]

Nusiwo Wò Dɔwɔna Ate Ŋu Abia tso Asiwò

Ɣeyiɣi: Zi geɖe la, ɖokuisidɔ wɔwɔ xɔa ɣeyiɣi ɣesiaɣi kloe wu dɔwɔwɔ le ame te. Ðe esia ade nu wò ɖoɖowɔɖi me, axɔ ɣeyiɣi le asiwò be màkpɔ vovo ɖe gbɔgbɔmedɔ veviwo ŋu oa? Nyuitɔ wu la, ɖe nàte ŋu atrɔ asi le wò ɖoɖowo ŋu be nàkpɔ vovo ɖe Mawu ƒe lɔlɔ̃nu wɔwɔ ŋu wua? Ne àwɔe nenema la, ke enyo. Gake kpɔ nyuie! Menya wɔna o.

Ga: Gae dia ga. Ho nenie hiã nàtsɔ adze dɔ gɔmee? Ga le asiwò xoxoa? Alo ɖe wòle be nàdoea? Àte ŋu ado dzi ne ɖe fiã? Alo ɖe nusi wòabia awu tsɔtsɔ na wò ne nuwo metsɔ afɔ nyuie abe alesi nèkpɔ mɔe ene oa?

Xɔlɔ̃wo: Kuxi siwo le mo dom ɖa le gbesiagbedɔwɔnawo me na dɔtɔ geɖe ƒe dɔwo gblẽ wo kple xɔlɔ̃wo dome. Togbɔ be ema ana woadze xɔlɔ̃ geɖe hã la, edzɔna zi geɖe hã be ƒomedodowo me gblẽna. Ke ne mía nɔvi Kristotɔwoe nye xɔlɔ̃ siawo ɖe?

Dzitsinya Nyui: Alesi ame geɖe wɔa dɔ le xexeame egbeae nye be, “Agoo nam mayi” alo “Aleke mawɔ akpɔ viɖe?” Sukuvi siwo wu 70 le alafa me le Europatɔwo ƒe numekuku aɖe me gblɔ be nunyuiwɔwɔ megale dɔwɔwɔ me boo o alo megali kura o. Eyata mewɔ nuku o be ametafatafa, anukwaremaɖimaɖi, dɔwɔna manɔsenuwo va bɔ ŋutɔ. Ðe wòadzro wò be nàdze ame bubuwo yomea?

Wò Ƒomedodo Kple Yehowa: Togbɔ be nanewo siwo woawɔ le dɔwɔwɔ me siwo anye dada le Mawu ƒe sewo kple gɔmeɖosewo dzi abɔ le dɔwɔnawo me hã la, agblẽ ame kple Ewɔla dome ƒomedodo me. Esia ate ŋu ana agbe mavɔ natsi ame ŋu. Aleke ke ŋutilã me viɖeawo anɔ o, ɖe manye nublanuinya be esia nadzɔ ɖe Kristotɔ nuteƒewɔla dzi oa?

[Nɔnɔmetata siwo le axa 31]

Kae mana masɔmasɔwo nado mo ɖa emegbe o? Ame eve dome nyadzilɔlɔ̃ alo dɔwɔɖoɖowo ŋɔŋlɔ ɖi?