Kpɔ Nyuie le Ðokuiŋudzedze Ŋu!

LE ƑE alafa gbãtɔ me la, wokafua Farisitɔwo be wonye Mawu-subɔla dzɔdzɔewo. Wosrɔ̃a Ŋɔŋlɔawo vevie hedoa gbe ɖa edziedzi. Ame aɖewo bua wo ame ɖɔʋu senugɔmewoe. Yudatɔ ŋutinyaŋlɔla Josephus ŋlɔ be: “Farisitɔwo lɔ̃ wo nɔewo eye wo kple amewo dome vivina nyuie.” Eyata mewɔ nuku o be ɖewohĩ woawo ŋue wodea bubu kple kɔkɔe wu le Yudatɔwo dome ɣemaɣi!

Gake nya “Farisitɔnyenye” kple eŋu nya bubuwo megaɖi naneke egbea o, alakpanuwɔwɔ, ɖokuiŋudzedze, ɖokuibubu ame dzɔdzɔe wu, subɔsubɔzãzɛnyahehe, kple nuyi ƒe subɔsubɔ ŋue wozãnɛ ɖo. Nukata Farisitɔawo ƒe ŋkɔ va gblẽ?

Nusitae nye be Farisitɔwo ƒe gota dzedzeme meflu Yesu Kristo abe alesi wòflu Yudatɔ akpa gãtɔ ene o. Etsɔ wo sɔ kple “yɔdo, siwo ŋuti wosi akalo ɖo, eye wole dzedzem nyuie la, ke wo me yɔ fũ kple ame kukuwo ƒe ƒuwo kpakple ɖiƒoƒo katã.”—Mateo 23:27.

Nyateƒee, wodoa gbe didiwo ɖa le ablɔwo me, gake ɖeko wowɔnɛ be amewo nakpɔ, abe alesi Yesu gblɔ ene. Ameŋkumenuwɔwɔ koe woƒe subɔsubɔ nye. Wolɔ̃a teƒe gãwo nɔnɔ le fiẽnuɖuƒewo kple kplɔ̃tanɔnɔ le ƒuƒoƒewo. Togbɔ be wobia tso Yudatɔwo katã si be woade awutogbowo woƒe awuwo ŋu hã la, Farisitɔwo te kpɔ wɔ woƒe awutogbowo wodidi legbee be wòadze amewo ŋu. Enyea dada na wo be woabla woƒe aɖaka gã siwo me mawunyakpukpui aɖe le la abe atiblɛ ene amewo nakpɔ. (Mateo 6:5; 23:5-8) Mlɔeba la, woƒe alakpanuwɔwɔ, ŋukeklẽ, kple dada va do ŋukpe wo.

Yesu gblɔ alesi Mawu gbe Farisitɔawoe be: “Alakpatɔwo! Yesaya gblɔe ɖi nyuie le mia ŋuti bena: ‘Dukɔ sia le buyem kple nuyiwo; gake woƒe dzi te ɖa xaa tso gbɔnye. Eye dzodzro wole subɔyem hele nufiafia, siwo nye amewo ƒe sededewo la fiam.’” (Mateo 15:7-9) Woƒe dzɔdzɔenyenye la nye ɖokuiŋudzedze ŋutɔŋutɔ. Eme kɔ be Yesu xlɔ̃ nu eƒe nusrɔ̃lawo be: “Mikpɔ mia ɖokui dzi nyuie le farisitɔwo ƒe amɔwɔ ʋaʋã . . . la, ŋuti.” (Luka 12:1) Egbea ele be míawo hã ‘míakpɔ mía ɖokui dzi nyuie’ le ɖokuiŋudzedze ŋu alo míanɔ ŋudzɔ be míagazu mawusubɔsubɔ me alakpanuwɔlawo o.

Le esia wɔwɔ me la, ele be míade dzesii be womezua ɖokuiŋudzela le zã ɖeka me o. Ke boŋ ɖe nɔnɔme sia nɔa vavam vivivi ɣeyiɣi aɖe. Farisitɔawo ƒe nɔnɔme madzeameŋuawo gɔ̃ hã ate ŋu age ɖe ame me le manyamanya me.

Ðokuidodoɖedzi ƒe Nɔnɔme

Nɔnɔme siwo ŋu wòle be ‘míakpɔ nyuie le’ dometɔ aɖewo ɖe? Encyclopædia of Religion and Ethics ɖe eme be, ɖokuiŋudzelawo “ƒoa nu, nɔa tsitrenu, hekpɔa nu zi geɖe abe ke ɖe womewɔ nu gbegblẽ aɖeke kpɔ o ene.” Ðokuiŋudzelawo ƒoa adegbe eye wodoa wo ɖokui ɖe dzi hã, si nye kuxi nɔ Farisitɔwo ŋu.

Yesu tsɔ kpɔɖeŋu aɖe ƒo nu tso Farisitɔwo ƒe nɔnɔme sia ŋu be: “Ame eve yi mawuxɔ me, be yewoado gbe ɖa; ɖeka nye farisitɔ, eye evelia nye nudzɔla. Farisitɔ la le tsitrenu, eye wòdo gbe ɖa ɖe ta me be: Mawu, meda akpe na wò bena, nyemele abe ame bubuawo, adzodalawo, ame madzɔmadzɔwo, ahasiwɔlawo, alo abe nudzɔla sia hã ene o. Metsia nu dɔna zi eve le kwasiɖa ɖeka me, eye metsɔa nusiwo katã sua asinye la, ƒe ewolia nana.” Ke nudzɔla la ya lɔ̃ ɖe eƒe vodadawo dzi ɖokuibɔbɔtɔe eye wòzu ame dzɔdzɔe wu Farisitɔ dadala la. Amesiwo “ɖo dzi ɖe woa ŋutɔwo ɖokui ŋu bena, yewonye ame dzɔdzɔewo, eye wobu ame bubuwo be, womenye naneke o” lae Yesu gblɔ kpɔɖeŋu sia na.—Luka 18:9-14.

Esi míenye ame madeblibowo ta la, míabui ɣeaɖewoɣi be míenyo wu ame bubuwo le míaƒe dzɔdzɔme ŋutetewo kple nudzedzinamewo ta. Gake ele be Kristotɔwo naɖe susu mawo ɖa enumake. Ðewohĩ ènɔ agbe abe alesi Kristotɔwo nɔnɛ ene ƒe geɖe. Ðewohĩ ènye Biblia-fiala bibi aɖe. Alo ègblɔna be wosi ami na ye be yeaɖaɖu dzi kple Kristo le dziƒo. Mɔnukpɔkpɔ tɔxɛwo abe ɣeyiɣiawo katã ƒe subɔlawo, hamemegãwo, subɔsubɔdɔwɔlawo ene su ame aɖewo si le hamea me. Bia ɖokuiwò be, ‘Aleke Yehowa abu ne mewɔ nusi wòtsɔ nam ŋudɔ tsɔ do gã ɖokuinye ɖe ame bubuwo dzi?’ Kakaɖedzitɔe la, madze eŋu kura o.—Filipitɔwo 2:3, 4.

Ne Kristotɔ ɖea ɖokuidodoɖedzigbɔgbɔ fiana le ŋutete, mɔnukpɔkpɔ, alo ŋusẽ si Mawu nɛ ta la, ke le nyateƒe me la, ele ŋutikɔkɔe kple kafukafu si dze na Mawu ɖeka ko la tem Eyama. Biblia xlɔ̃ nu Kristotɔ eme kɔ be “negadi nu gã wu nusi dze ame be, wòadi o.” Eƒoe ɖe mía nu be: “Midi nu ɖeka ma ke hena mia nɔewo; migadi nu kɔkɔwo yome o, hafi midi nusiwo bɔbɔ ɖe anyi boŋ. Migabu mia ɖokui aɖaŋudzelawo o.”—Romatɔwo 12:3, 16, NW.

‘Migadrɔ̃ Ʋɔnu O’

Biblia-numekugbalẽ aɖe gblɔ be ɖokuiŋudzela “bua eɖokui ame nyui alo ame dzɔdzɔe le Mawu gbɔ le esi wòléna ɖe se ƒe nudidiwo me nyakui ɖesiaɖe ŋu evɔ mebua gɔmesese si le wo ŋu o ta.” Agbalẽ bubu ɖɔ ɖokuiŋudzelawo be wonye “mawusubɔsubɔnyahela siwo gblẽa woƒe ɣeyiɣiwo katã nɔa vɔ̃ɖinyenye dim le ame bubuwo ŋu.”

Farisitɔwo ɖi fɔ le esia me. Mlɔeba la, woƒe amegbetɔ ƒe sededewo va dze nu vevii wu Mawu ƒe sewo kple gɔmeɖosewo. (Mateo 23:23; Luka 11:41-44) Woɖo wo ɖokui ʋɔnudrɔ̃lawoe eye wobua fɔ amesiame si meɖo woƒe ɖokuiŋudzedze ƒe gɔmeɖosewo gbɔ o. Woƒe ɖokuidodoɖedzi kple ɖokuiŋudzedze fũ na wokpɔe be ehiã be yewoakpɔ ŋusẽ ɖe ame bubuwo dzi. Eve wo ŋutɔ be yewomekpɔ ŋusẽ ɖe Yesu dzi o, eyata woɖoe be yewoawui.—Yohanes 11:47-53.

Amesi wɔa eɖokui ʋɔnudrɔ̃lae eye wònɔa vodada dim, nɔa ŋku lém ɖe amesiwo le egbɔ ŋu vevie henɔ nu ɖom na wo la gbɔ nɔnɔ mevivina kura o. Le nyateƒe me la, hamea me tɔ aɖeke mekpɔ mɔ azi eƒe nukpɔsusuwo kple eya ŋutɔ ƒe sewo ɖe ame bubuwo dzi o. (Romatɔwo 14:10-13) Kristotɔ siwo da sɔ kpɔnɛ be agbemenuwɔna geɖe nye nusiwo ŋu wòle be ame ŋutɔ natso nya me le. Vevietɔ ele be amesiwo bua wo ɖokui vodadamanɔŋutɔwo eye wozia nu ɖe amewo dzi la nadzudzɔ ʋɔnudɔdrɔ̃ ame bubuwo.

Nyateƒee, wona ŋusẽ Kristo-hamea be wòana gɔmeɖose siwo ana Yehowa ƒe anyigba dzi habɔbɔa natsɔ afɔ nyuie. (Hebritɔwo 13:17) Gake ame aɖewo tɔtɔ gɔmeɖose siawo alo wotsɔ woawo ŋutɔ ƒe sewo kpee. Le teƒe aɖe la, wobia be Teokrasi Subɔsubɔ Sukuviawo katã nado kot ahade woƒe awudziwui ƒe awunugbuiwo katã ne wole nuƒowo ƒom. Ne sukuvi aɖe mewɔe o la, magadze axɔ dɔdasi o. Le esi teƒe be woade se kpaɖii siawo la, ɖe masɔ wu eye wòanɔ ɖekawɔwɔ me kple Mawu ƒe Nya la ƒe gbɔgbɔ be woana mɔfiame si hiã la tufafatɔe oa?—Yakobo 3:17.

Ðokuiŋudzedze ana woabu hã be ne Kristotɔ aɖe le kuxi sesẽ aɖewo me tom la, ke efia be nane gblẽ le eŋu le gbɔgbɔ me. Nu ma tututue ɖokuiŋudzelawo Elifaz, Bildad, kple Zofar wobu ɖe nuteƒewɔla Hiob ŋu. Womenya nu tso nɔnɔmea ŋu keŋkeŋ o, eyata enye nudadawɔwɔ be woatso Hiob nu be ewɔ nuvɔ̃. Yehowa he to na wo ɖe alesi wobu dodokpɔ si va Hiob dzi bubui ta.—Kpɔ Hiob, ta 4, 5, 8, 11, 18, 20.

Dzonɔameme Manyomanyo

Ðokuiŋudzedze kple dzonɔameme dea nu wo nɔewo me zi geɖe. Apostolo Paulo gblɔ le Yudatɔ siwo tsɔ dzo ɖe mawusubɔsubɔ ŋu be “wole ŋu ʋãm ɖe Mawu ŋu, gake menye kple sidzedze o. Elabena esi womenya Mawu ƒe dzɔdzɔenyenye o, eye wole didim bena, woatsɔ woawo ŋutɔ ƒe dzɔdzɔenyenye atu tsitre la, womebɔbɔ wo ɖokui ɖe Mawu ƒe dzɔdzɔenyenye la te o.” (Romatɔwo 10:2, 3) Paulo nye Farisitɔ si ŋutɔ hã ʋã ŋu akpa togbɔ be eƒe dzonɔameme mesɔ o eye menɔ te ɖe Yehowa ƒe dzɔdzɔenyenye dzi o gake.—Galatiatɔwo 1:13, 14; Filipitɔwo 3:6.

Eyata Biblia xlɔ̃ nu wòsɔ be: “Megawɔ nu dzɔdzɔe vivivo o, eye meganya nu tso eme akpa o; nukaŋuti nèbe, yeade ye ɖokui tsɔtsrɔ̃ me ɖo?” (Nyagblɔla 7:16) Le hamea me la, Kristotɔ ate ŋu adze dɔ gɔme kple veviedodo, gake eƒe veviedodonu kple dzonɔameme ate ŋu ava zu ɖokuiŋudzedze. Ne amegbetɔ ƒe nunyae míetsɔ dzidzea mawusubɔsubɔ ƒe dzonɔameme ke menye Yehowa ƒe dzɔdzɔenyenye o la, ate ŋu agblẽ nu le ame bubuwo ŋu. Le mɔ ka nu?

Le kpɔɖeŋu me, dzilawo ate ŋu atsi dzi ɖe ame bubuwo ƒe gbɔgbɔmenuhiahiãwo gbɔ kpɔkpɔ ŋu vevie, eye esia ate ŋu ana woaŋe aɖaba ƒu woawo ŋutɔ ƒe ƒome ƒe nuhiahiãwo dzi. Alo dzilawo ƒe dzonɔameme ɖe dɔ ŋu nu asẽ akpa, eye woanɔ nu geɖe biam tso wo viwo si wu nusi tututu woate ŋu awɔ. (Efesotɔwo 6:4; Kolosetɔwo 3:21) Ne ɖevi aɖewo kpɔe be yewomate ŋu awɔ nudidi masɔmasɔ siawo dzi o la, wova nɔa agbe eve nɔm. Dzila senugɔme abu eƒe ƒomea ƒe gbɔdzɔgbɔdzɔwo ŋu eye wòawɔ asitɔtrɔ si sɔ.—Tsɔe sɔ kple Mose I, 33:12-14.

Dzonɔameme si gbɔ eme ate ŋu ana hã be ɖokuiléle, veveseɖeamenu, kple tufafa siwo hiã le míaƒe nuwɔwɔ kple ame bubuwo me la manɔ mía si o. Ame ate ŋu awɔ dɔ vevie be yeado Fiaɖuƒea ƒe nuwo ɖe ŋgɔ. Gake eƒe dzonɔameme si agbɔ eme la, ate ŋu agblẽ nu le ame bubuwo ŋu. Paulo gblɔ be: “Nenye ɖe nyagbɔgblɔɖi le asinye, eye menya nya ɣaɣlawo katã kple sidzedze katã, eye nenye ɖe xɔse katã le asinye, ale bena mate ŋu aɖe towo ɖa, ke lɔlɔ̃ mele asinye o la, anye ne nyemenye naneke o. Eye nenye ɖe megblẽ nye nuwo katã henyi ame dahewo, eye nenye ɖe metsɔ nye ŋutilã na, bene woafiãm, ke lɔlɔ̃ mele asinye o la, anye ne nyemenyo na naneke o.”—Korintotɔwo I, 13:2, 3.

Mawu Vea Ðokuibɔbɔlawo Nu

Esi míenye Kristotɔwo la, ele be míakpɔ ɖokuiŋudzedze ƒe nɔnɔmewo kaba hafi woado ta ɖa. Ele be míatsri ɖokuidodoɖedzi, ʋɔnudɔdrɔ̃ ame bubuwo, kple dzonɔameme manyomanyo si nɔ te ɖe amegbetɔ ƒe nunya dzi.

Esi ‘míele ŋudzɔ ɖe’ Farisitɔwo ƒe nɔnɔmewo ŋu la, anyo be míalé ŋku ɖe mía ŋutɔwo ƒe nɔnɔmewo kple didiwo ŋu tsɔ wu be míanɔ ʋɔnu drɔ̃m ame bubuwo be wonye ɖokuiŋudzelawo. Nyateƒee, Yesu drɔ̃ ʋɔnu Farisitɔwo hebu fɔ wo be wonye “dawo ƒe dzidzimeviwo” siwo dze na tsɔtsrɔ̃. Gake Yesu te ŋu kpɔa amewo ƒe dzime. Míawo míate ŋui o.—Mateo 23:33.

Mina míadi Mawu ƒe dzɔdzɔenyenye ke menye mía tɔ o. (Mateo 6:33) Ema ko hafi míaƒe nu adze Yehowa ŋu elabena Biblia xlɔ̃ nu mí katã be: “Mi katã mibɔbɔ mia ɖokui ɖe mia nɔewo te, eye mitsɔ ɖokuibɔbɔɖeanyi hetsyɔ; elabena Mawu tsia tre ɖe dadalawo ŋuti, ke evea ɖokuibɔbɔlawo nu.”—Petro I, 5:5.