Nu Geɖe Gbegblẽ Ði ɖe Nusi Lolo Wu Ta

ABE ALESI JULIUS OWO BELLO GBLƆE ENE

Menye Aladuratɔ ƒe 32 sɔŋ.a Mexɔe se be xɔsegbedada kple gbedodoɖawo akpɔ nye kuxiwo katã gbɔ eye woada dɔlélewo katã. Nyemeƒle atike aɖeke kpɔ o, nyemeƒle vevesesenutsitike gɔ̃ hã kpɔ o. Le ƒe mawo me la, womexɔ nye ƒomea me tɔ aɖeke ɖe kɔdzi kpɔ o. Ne vinyewo dometɔ aɖe dze dɔ la, medoa gbe ɖa ɖe wo ta zã kple keli vaseɖe esime wohayana. Mexɔe se be Mawu nɔ nye gbedodoɖawo ŋu ɖom henɔ yrayem.

MENƆ hadomeha si nye Egbe Jolly, si xɔ ŋkɔ wu ɖesiaɖe le Akure, si nye du aɖe le Nigeria ƒe ɣetoɖoƒe gome la me. Gatɔ gãwo kple amesiwo kpɔ ŋusẽ le míaƒe nutoa mee nye xɔ̃nyewo. Deji si nye Akure-fia va srãam kpɔ edziedzi le nye aƒeme.

Srɔ̃geɖeɖela hãe menye, eye srɔ̃ ade kple ahiãvi geɖe nɔ asinye. Nye dɔ nɔ dzidzedze kpɔm. Nusianu yi nyuie nam. Gake abe asitsala mɔzɔla si le Yesu ƒe dzonu ŋuti lododoa me ene la, mekpɔ nane si xɔ asi ale gbegbe be meɖe asi le srɔ̃nyewo dometɔ atɔ̃ kple nye ahiãviwo ŋu, medo le sɔlemeha kple hadomehabɔbɔ la me, eye meɖe asi le xexemeŋkɔxɔxɔ ŋu ɖe eta.—Mateo 13:45, 46.

Alesi Mewɔ Va Zu Aladuratɔ

Mese nu tso Aladuratɔwo ŋu le ƒe 1936 me, esime mexɔ ƒe 13. Xɔ̃nye aɖe si ŋkɔe nye Gabriel gblɔ nam be: “Ne èyi Kristo Apɔstɔlik Ha me la, àse Mawu ƒe nuƒoƒo.”

Mebiae be: “Aleke Mawu ƒoa nui?”

Egblɔ be: “Ne èva ko àkpɔe.”

Medi vevie be mase Mawu ƒe nuƒo. Eyata le zã ma me la, mía kple Gabriel míeyi sɔlemea. Sɔlemedelawo yɔ xɔ sue la me taŋ. Sɔlemeha la te nya sia gbɔgblɔ sesĩe be: “Miva! Afisiae Yesu le!”

Esi wonɔ nya siawo gblɔm la, ame aɖe do aƒa be: “Gbɔgbɔ kɔkɔe, ɖi va!” Ame bubu hã ƒo ga aɖe, eye amesiame zi ɖoɖoe. Emegbe nyɔnu aɖe dze egɔme tsɔ dzonɔameme nɔ nya aɖewo gblɔm ɖe gbe bubu aɖe me. Edo ɣli sesĩe zi ɖeka be: “Mise Mawu ƒe gbedasi! Nya si Mawu gblɔe nye si: ‘Mido gbe ɖa ɖe adelawo ta ale be womegawu amegbetɔwo o!’ ” Amesiame nɔ aƒa dom sesĩe.

Mebui be Mawue ƒo nu to nyɔnua dzi, eyata le ƒe si kplɔe ɖo me la, wode tsi ta nam mezu Kristo Apɔstɔlik Ha me tɔ.

Alesi Mewɔ Ke Ðe Yehowa Ðasefowo Ŋu Zi Gbãtɔ

Le ƒe 1951 me la, mexɔ Gbetakpɔxɔ magazine ɖeka tso Ðasefo aɖe si ŋkɔe nye Adedeji Boboye gbɔ. Magazine la me nyawo vivi nunye, eyata medɔe nɔ xexlẽm edziedzi. Le ƒe 1952 me la, mede Yehowa Ðasefowo ƒe ŋkeke ene nutome gã takpekpe aɖe le Ado Ekiti.

Nusi mekpɔ le takpekpea me wɔ dɔ ɖe dzinye. Mebu Yehowa Ðasefo zuzu ŋu vevie gake meɖee le susu me. Nye kuxie nye be srɔ̃ etɔ̃ kple ahiãvi ɖeka nɔ asinye ɣemaɣi. Mebu be nyemate ŋu anɔ anyi kple nyɔnu ɖeka ko gbeɖe o.

Esi metrɔ yi Akure la, megblɔ na Adedeji be megava gbɔnye azɔ o, eye nyemegawɔ Gbetakpɔxɔ ƒe nudɔdɔ yeye o. Meva ƒo ɖokuinye ɖe míaƒe sɔlemeha la me vevie wu. Mebu le ɖokuinye me be, Mawu yram xoxo tso esime mege ɖe Kristo Apɔstɔlik Ha la me. Meɖe srɔ̃ etɔ̃ eye medzi vi geɖe. Nye ŋutɔ metu xɔ. Womexɔm ɖe kɔdzi kpɔ o. Esi wòdze be Mawu le nye gbedodoɖawo ŋu ɖom la, nukata wòle be matrɔ nye subɔsubɔha?

Ŋkɔxɔxɔ Geɖe Wu Kple Dziɖeleameƒo

Meva nɔ ga geɖe dzɔm na sɔlemeha la. Eteƒe medidi o woɖom sɔlememegãe, si nye ɖoƒe si na mete ŋu kpɔ nusiwo yia edzi le ha la me ŋutɔŋutɔ. Nusiwo mekpɔ la ɖe fu nam. Osɔfo la kple “nyagblɔɖilawo” nye galɔ̃lawo; woƒe ŋukeklẽ wɔ mo yaa nam.

Le kpɔɖeŋu me le March 1967 me la, nyɔnu vovovo etɔ̃ dzi vi etɔ̃ nam. Kɔnu wònye le ha la me be ŋkɔ nana ɖevi ƒe wɔna aɖe nayi edzi. Eyata metsɔ nunanawo—tɔmelã, dɔŋutitsi, kple atukpameha viviwo—yi na osɔfoa ɖe wɔna la ŋu.

Le sɔlemewɔgbea la, osɔfoa gblɔ le ha bliboa ŋkume be: “Gatɔ siwo le ha sia me ƒe nu wɔ nuku nam. Wodi be woana ŋkɔ yewo viwo, eye nusiwo wotsɔ vɛ katã koe nye aha viviwo kple tɔmelã. Ʋulɛ̃ aɖeke mele eme o! Gbɔ̃ mekpe ɖe eŋu o! Mia ŋutɔwo mikpɔe ɖa! Kain tsɔ te gãwo sa vɔe na Mawu, gake Mawu mexɔ eƒe vɔsa ma o elabena ʋu menɔ eme o. Nusiwo me ʋu le ye Mawu dina. Habel tsɔ lã sa vɔe nɛ, eye wòxɔe.”

Esi wògblɔ nya ma la, metso hedo le xɔa me kple dziku. Gake meganɔ sɔleme dem. Meva nɔ ha dem kple hadomeha si me mele la geɖe wu eye medea woƒe kpekpewo. Ɣeaɖewoɣi la, medea kpekpewo le Fiaɖuƒe Akpata me, eye megawɔ Gbetakpɔxɔ ƒe nudɔdɔ yeye. Gake nyemenɔ klalo be mava zu Yehowa Ðasefo o.

Nyametsotso be Masubɔ Yehowa

Mewɔ tɔtrɔ ɖedzesi aɖe le ƒe 1968 me. Gbeɖeka mexlẽ nyati aɖe le Gbetakpɔxɔ me si ƒo nu tso alesi wole Yehowa Ðasefowo yome tim ŋutasesẽtɔe le Malawi ŋu. Eƒo nu tso nyɔnuvi aɖe si xɔ ƒe 15 si wobla ɖe ati ŋu eye wodɔ egbɔ sesẽe zi ade le esi wògbe tanana le eƒe xɔse me ta la ŋu. Ewɔ nuku nam ŋutɔ, eye medzudzɔ magazine la xexlẽ, gake meganɔ eŋu bum. Mekpɔe be nyɔnuvi aɖeke mele míaƒe sɔlemeha la me si aɖe xɔse ma tɔgbe afia o. Emegbe le fiẽ ma me la, metsɔ magazine la eye megaxlẽ axa ma ake.

Mete Biblia sɔsrɔ̃ vevie. Esi nye sidzedze nɔ dzidzim ɖe edzi la, meva kpɔ alesi gbegbe sɔlemeha la kplɔ mí trae. Abe alesi wònɔ le blemaɣeyiɣiwo me ene la, ‘nu makɔmakɔwo’ ko míaƒe nunɔlawo ‘wɔna.’ (Hosea 6:9) Amesiawo hã le aʋatsonyagblɔɖila siwo ŋu Yesu xlɔ̃ nu mí le la dome! (Mateo 24:24) Nyemegaxɔa woƒe ŋutegawo kple ŋusẽdɔwo dzi sena azɔ o. Metso nya me be mado le alakpasubɔsubɔ me eye makpe ɖe ame bubuwo ŋu woawɔ nenema ke.

Agbagba Siwo Wodze be Manɔ Ha la Me

Esime sɔlememegãwo kpɔe be meɖoe kplikpaa be mado le ha la me la, wodɔ ame aɖewo ɖe gbɔnye be woava ƒo nu nam. Womedi be gakpɔmɔnu vevi aɖe nabu ɖe yewo o. Wogblɔ be yewoaɖom Baba Egbe, si nye Kristo Apɔstɔlik ha siwo le Akure la dometɔ ɖeka ta kpɔla.

Megbe exɔxɔ eye megblɔ nusitae la na wo. Megblɔ be: “Sɔlemeha la le mía blem. Wogblɔna be ame nyuiwo katã ayi dziƒo. Gake mexlẽ Biblia la, eye mexɔe se vevie be ame 144,000 koe ayi dziƒo. Ame dzɔdzɔe mamlɛawo anɔ agbe le paradisonyigba aɖe dzi.”—Mateo 5:5; Nyaɖeɖefia 14:1, 3.

Sɔlemeha la ƒe osɔfo te kpɔ be yeana srɔ̃nyewo natsi tre ɖe ŋunye. Egblɔ na wo be womegana Yehowa Ðasefowo nava míaƒe aƒea me o. Srɔ̃nyewo dometɔ ɖeka de aɖi nuɖuɖu me nam. Wo dometɔ eve xlɔ̃ num le ŋutega aɖe si wokpɔ le sɔlemea me ŋu. Ŋutega la ɖee fia be ne medo le ha la me la, maku. Togbɔ be nuwo nɔ yiyim nenema hã, meyi edzi ɖi ɖase na srɔ̃nyewo, eye mekpea wo be woayi kpekpewo kplim. Megblɔ be: “Miakpɔ ŋutsu bubuwo aɖe le afima.” Gake wo dometɔ aɖeke meɖe ɖetsɔleme fia o, eye woyi edzi dze agbagba be yewoaɖe dzi le ƒonye.

Mlɔeba le February 2, 1970 dzi, esi megbɔ tso du aɖe si le nutoa me me la, mekpɔe be amesiame dzo le aƒea me. Srɔ̃nyewo katã si dzo kple ɖeviawo.

Kuku Ðe Nyɔnu Ðeka Ko Ŋu

Megblɔ na ɖokuinye be: ‘Fifia mate ŋu aɖɔ nye srɔ̃ɖeɖea ɖo.’ Meɖo du ɖe srɔ̃nye tsitsitɔ Janet be wòatrɔ ava aƒeme. Elɔ̃ ɖe edzi. Gake eƒe ƒometɔwo melɔ̃ ɖe nya sia dzi kura o. Esime srɔ̃nye bubuawo se be megblɔ na Janet be netrɔ va la, woyi ɖe fofoa ƒe aƒeme eye wote kpɔ be yewoaƒoe. Emegbe eƒe ƒometɔwo ɖo ame ɖem be mava kpekpe aɖe me.

Amesiwo va kpekpea ade ame 80. Janet tɔɖia si nye ƒomemetsitsi la gblɔ be: “Ne èdi be yeagaɖe mía vinyɔnua la, ke ele be nàna nyɔnu bubuawo hã nagatrɔ va. Gake ne èdi be yeanɔ agbe ɖe yeƒe subɔsubɔha yeyea nu aɖe srɔ̃ ɖeka ko la, ekema di nyɔnu bubu. Ne ègava kplɔ Janet la, srɔ̃wò bubuawo awui, eye míedi be mía vinyɔnu la naku o.”

Le nya geɖe gbɔgblɔ vɔ megbe la, ƒometɔwo kpɔe be meɖoe kplikpaa be srɔ̃ ɖeka ko maɖe. Mlɔeba la wona ta. Tɔɖia gblɔ be: “Míaxɔ srɔ̃wò le asiwò o. Àte ŋu akplɔe dzoe.”

Mía kple Janet míeɖe mía nɔewo le se nu le May 21, 1970 dzi. Ŋkeke asieke megbe la, mexɔ nyɔnyrɔ zu Yehowa Ðasefo. Le ƒe ma ke ƒe December me la, Janet hã xɔ nyɔnyrɔ.

Yehowa ƒe Yayrawo Xɔxɔ

Sɔlemeha si me míenɔ tsã me tɔwo gblɔ ɖi be ne míezu Ðasefowo la, míaku. Ƒe 30 enye sia esime wogblɔ nya ma. Ne meku fifia hã la, ɖe wòanye le esi meva zu Yehowa Ðasefo ta yea? Ne srɔ̃nye ku fifia la, ɖe ame aɖe ate ŋu agblɔ be esi wòva zu Yehowa Ðasefo tae wòkua?

Medze agbagba vevie be mafia nyateƒea ƒe mɔ vinye 17 mawo. Togbɔ be wo dometɔ geɖe tsi hafi meva zu Ðasefo hã la, mede dzi ƒo na wo be woasrɔ̃ Biblia eye mekplɔa wo yia kpekpewo kple takpekpewoe. Dzidzɔ wònye nam be wo dometɔ atɔ̃ le Yehowa subɔm kplim. Ðeka nye hamemegã kplim le hamea me. Bubu nye subɔsubɔdɔwɔla le hame aɖe si tsɔ ɖe mía gbɔ me. Vinyewo dometɔ eve nye gbesiagbe mɔɖelawo.

Ne metrɔ kpɔ megbe la, Yehowa ƒe amenuveve si wòtsɔ kpe ɖe ŋunye meva zu esubɔla la wɔa nuku nam. Aleke gbegbe Yesu ƒe nyawo nye nyateƒee nye si be: “Ame aɖeke mate ŋu ava gbɔnye o, ne menye Fofo, si dɔm ɖa lae hee vɛ o”!—Yohanes 6:44.

[Etenuŋɔŋlɔwo]