Aleke Mawu ƒe Gbɔgbɔ Ʋã Amewo Woŋlɔ Biblia Lae?

KADODOMƆNUWO wɔ nuku egbea geɖe wu ɣeyiɣi ɖesiaɖe le ŋutinya me. Telefonwo, faks mɔ̃wo, kɔmpiutawo—gbaɖegbe va yi la, amekae susu be woate ŋu aɖo nyatakakawo ɖe afisiafi kloe le xexeame wòaɖo enumake?

Gake amegbetɔ mate ŋu anya nyatakakamɔnu ƒomevi aɖe si wɔ nuku wu ya o—eyae nye Mawu ƒe ameʋaʋã. Yehowa ʋã amegbetɔ nuŋlɔla 40 be woŋlɔ eƒe Nya, Biblia Kɔkɔe la. Abe alesi nyatakakamɔnuwo bɔ ɖe amegbetɔwo sii ene la, nenema kee Yehowa hã zã nyatakakamɔnu geɖe tsɔ ʋã amewo be woŋlɔ Ŋɔŋlɔawo.

Nyayɔŋlɔ. Mawu tsɔ gbedasi tɔxɛ aɖewo na siwo wova ŋlɔ de Biblia me emegbe.a Le kpɔɖeŋu me, bu sedede siwo le Se ƒe nubabla la me ŋu kpɔ. Yehowa gblɔ na Mose be: “Ŋlɔ nya siawo ɖi; elabena nya siawo dzi mebla nu kpli wò kpakple Israel-viwo ɖo.” (Mose II, 34:27) Mose gbugbɔ ŋlɔ “nya” mawo siwo ‘wogblɔ to mawudɔlawo dzi’ eye woate ŋu axlẽ wo fifia le Biblia-gbalẽ siwo nye Mose ƒe Agbalẽ Evelia, Etɔ̃lia, Enelia, kple Atɔ̃lia me.—Dɔwɔwɔwo 7:53.

Nyagblɔɖila bubu geɖe siwo dometɔ aɖewo nye Yesaya, Yeremya, Xezekiel, Amos, Naxum, kple Mixa, xɔ gbedasi tɔxɛwo tso Mawu gbɔ to mawudɔlawo dzi. Ɣeaɖewoɣi la, ŋutsu siawo tsɔa nyagbɔgblɔ sia dzea woƒe gbedasiwo gɔmee be: “Ale Yehowa gblɔ esi.” (Yesaya 37:6; Yeremya 2:2; Xezekiel 11:5; Amos 1:3; Mixa 2:3; Naxum 1:12) Emegbe woŋlɔa nya siwo Mawu gblɔ la ɖi.

Ŋutegawo, Drɔ̃ewo, Kple Ðimeyiyiwo. Ŋutega nye nane ƒe nɔnɔme, nukpɔkpɔ, alo gbedasi aɖe si wotsɔ de susu me na ame esime wòle ŋute, eye etoa nukumɔ aɖe nu zi geɖe. Le kpɔɖeŋu me, esime Petro, Yakobo, kple Yohanes, ƒe “mo kɔ keŋ la,” wokpɔ Yesu si ƒe nɔnɔme trɔ. (Luka 9:28-36; Petro II, 1:16-21) Le go aɖewo me la, wotsɔ gbedasi na to drɔ̃e me, alo woku eƒe drɔ̃e, eye wotsi susu me na amesi wotsɔe na esime wòle alɔ̃ me. Eyata Daniel ŋlɔ be “ŋutega, si mekpɔ le nye aba dzi”—alo, le alesi gbegɔmeɖela Ronald A. Knox gblɔe ene be, “memlɔ anyi nɔ ekpɔm le drɔ̃eƒe.”—Daniel 4:10.

Edze ƒã be amesi Yehowa na wòyi ɖi me la yia ŋugble me ʋĩ, togbɔ be ele ŋu vie hã. (Tsɔe sɔ kple Dɔwɔwɔwo 10:9-16.) Helagbe me nya si gɔme woɖe le Biblia me be “ŋutega” (ekʹsta·sis) fia ‘nu ɖeɖeɖa alo nɔƒe ɖɔliɖɔli na nua.’ Efia be woana susua nawɔ dɔ le mɔ bubu nu. Eyata amesi yi ɖi me la manya nusi le edzi yim le egbɔ o esime eƒe susu katã anɔ ŋutega la dzi. Anɔ eme be ɖi mee apostolo Paulo yi esime “wotsɔe dzoe yi ɖe Paradiso la me, eye wòse nya, siwo mele [be] woagblɔ o, siwo womeɖe mɔ na ame, bene wòagblɔ o la.”—Korintotɔwo II, 12:2-4.

Biblia-ŋlɔla siwo kpɔ ŋutegawo alo ku drɔ̃ewo alo yi ɖi me te ŋu tsɔa woa ŋutɔwo ƒe nyagbewo ɖɔa nusi wokpɔ, evɔ mele alea le amesiwo woyɔ Mawu ƒe gbedasiwo na wogbugbɔ ŋlɔe la gome o. Wogblɔ na Xabakuk be: “Ŋlɔ ŋutega la ɖi, eye naɖee ɖe kpe dzi, be wòanya xlẽ bɔbɔe.”—Xabakuk 2:2.

Ðe wòfia be Biblia ƒe akpa siawo metso gbɔgbɔ me abe nyagbɔgblɔ siwo wogblɔ woŋlɔ ene oa? Kpao. Yehowa to eƒe gbɔgbɔa dzi tsɔ gbedasia de nuŋlɔla ɖesiaɖe ƒe susu me goŋgoŋ, ale be menye amegbetɔ ƒe susu woŋlɔ ɖi o ke Mawu tɔe. Togbɔ be Yehowa ɖe mɔ na nuŋlɔla la be wòatia nya siwo sɔ hã la, eyae fia mɔ nuŋlɔla la ƒe susu kple dzi be meŋlɔ nya vevi aɖeke be o ale be mlɔeba la, woate ŋu agblɔ be Mawu ƒe nyawoe.—Tesalonikatɔwo I, 2:13.

Mawu ƒe Ðeɖefia. Nyagblɔɖiwo—ŋutinya si woɖe fia eye woŋlɔ ɖi ɣeyiɣi aɖe do ŋgɔ—le Biblia me si mate ŋu atso amegbetɔ dzro gbɔ o. Kpɔɖeŋu ɖekae nye “Hela-nyigba ƒe fia,” Alexander Gãtɔ, ƒe dziɖuɖu kple anyidzedze si wogblɔ ɖi ƒe 200 do ŋgɔ! (Daniel 8:1-8, 20-22) Biblia gblɔ nudzɔdzɔ aɖewo siwo amegbetɔ ƒe ŋku mekpɔ kpɔ o hã. Dziƒo kple anyigba wɔwɔ nye kpɔɖeŋu ɖeka. (Mose I, 1:1-27; 2:7, 8) Dzeɖoɖo aɖewo siwo yi edzi le dziƒo hã li, abe esiwo ŋu nya wogblɔ le Hiob ƒe agbalẽa me ene.—Hiob 1:6-12; 2:1-6.

Ne menye Mawue ɖe nudzɔdzɔ siawo fia eŋlɔla tẽ o hã la, ke Mawue na ame aɖe nya nu tso wo ŋu ale be wova zu xotutu alo ŋutinya woŋlɔ ɖi, eye dzidzimewo gblɔe na wo megbeviwo vaseɖe esime wova ŋlɔ wo ɖe Biblia me. (Kpɔ aɖaka si le axa 7 lia.) Ke hã la, míate ŋu aka ɖe edzi be Yehowa Gbɔe nyatakaka mawo katã tso, eye wòfia mɔ eŋlɔlawo be wometɔtɔe kple nyateƒematomato, nyakpakpa, alo gli o. Petro ŋlɔ tso nyagblɔɖiwo ŋu be: “Gbɔgbɔ kɔkɔe lae ʋã Mawu ƒe ame kɔkɔewo, hafi wogblɔ nya ɖi.”b—Petro II, 1:21.

Ebia Agbagbadzedze Blibo

Togbɔ be “Gbɔgbɔ kɔkɔe lae ʋã” Biblia-ŋlɔlawo hã la, ebia tso wo si be woabu tame. Le kpɔɖeŋu me, Salomo “[do] nu kpɔ, edi nu gɔme, eye wòdo lo geɖewo. [Edi] nya viviwo be, yeakpɔ, eye nyateƒenya, siwo woŋlɔ ɖi la, wole eteƒe.”—Nyagblɔla 12:9, 10.

Ehiã be Biblia-ŋlɔla aɖewo nawɔ numekuku geɖe hafi aŋlɔ woƒe nyawo ɖi. Le kpɔɖeŋu me, Luka ŋlɔ tso eƒe Nyanyuigbalẽa ŋu be: “Medzro wo katã me kpɔ tsitotsito vaseɖe egɔme ke bena, maŋlɔe . . . ɖekaɖeka.” Nyateƒee, Mawu ƒe gbɔgbɔ yra ɖe Luka ƒe agbagbadzedzewo dzi, eye ɖikeke mele eme o be ewɔe be wòte ŋu ke ɖe ŋutinyagbalẽ siwo dzi woate ŋu aka ɖo ŋu eye wòbia gbe amesiwo kpɔ nuwo teƒe kple ŋku, abe nusrɔ̃la siwo ganɔ agbe kple ɖewohĩ Yesu dada, Maria, hã ene. Emegbe Mawu ƒe gbɔgbɔ afia mɔ Luka be wòaŋlɔ nyawo pɛpɛpɛ.—Luka 1:1-4.

Yohanes ƒe Nyanyuigbalẽ nye nusi teƒe eya ŋutɔ kpɔ si wòŋlɔ anɔ ƒe 65 le Yesu ƒe ku megbe, si to vovo na Luka tɔ. Ðikeke mele eme o be Yehowa ƒe gbɔgbɔ wɔe be Yohanes ɖo ŋku nyaawo dzi nyuie ale be meŋlɔ wo be esi ɣeyiɣiwo tso eme o. Nya sia sɔ kple ŋugbe si Yesu do na eyomedzelawo be: “Nyaxɔɖakɔla, Gbɔgbɔ kɔkɔe, si Fofo la aɖo ɖa le nye ŋkɔa dzi la, eya afia nuwo katã mi, eye wòaɖo ŋku nusiwo katã megblɔ na mi la, dzi na mi.”—Yohanes 14:26.

Le go aɖewo me la, Biblia-ŋlɔlawo wɔ nuŋlɔɖiwo tso nusiwo teƒe ŋutinyaŋlɔla siwo do ŋgɔ kpɔ kple ŋku eye woŋlɔ ɖi, si menye wo katãe tso gbɔgbɔ me o la me. Yeremya ŋlɔ Fiawo ƒe Agbalẽ Gbãtɔ kple Evelia ƒe akpa gãtɔ le mɔ sia nu. (Fiawo II, 1:18) Ezra tsɔ nya tso nuŋlɔɖi 14 ya teti siwo metso gbɔgbɔ me o me hafi kpɔ nya tsɔ ŋlɔ Kronika Gbãtɔ kple Evelia, eye etsɔ nya tso “Fia Dawid ŋutinya” kple “Yuda-fiawo kple Israel-fiawo ƒe agbalẽ” hã me. (Kronika I, 27:24; Kronika II, 16:11) Mose yɔ nya tso “Yehowa ƒe aʋawɔwɔwo ƒe agbalẽ” gɔ̃ hã me—anye Mawu ƒe amewo ƒe aʋawɔwɔwo ŋuti nuŋlɔɖi si ŋu kakaɖedzi le.—Mose IV, 21:14, 15.

Gbɔgbɔ kɔkɔea nɔ dɔ dzi vevie le go mawo me eye eʋã Biblia-ŋlɔlawo be woatia nuŋlɔɖi siwo ŋu kakaɖedzi le ɖeɖeko, ale be emegbe wova zu Biblia me nuŋlɔɖi siwo gbɔgbɔ ʋã ƒe akpa aɖe.

Aɖaŋuɖoɖo Nyui—Tso Ameka Gbɔ?

Aɖaŋuɖoɖo nyui xɔasi siwo wotu ɖe ame ƒe ŋkuléleɖenuŋu nyuie dzi la le Biblia me. Le kpɔɖeŋu me, Salomo ŋlɔ be: “Ðe menyo na amegbetɔ wu be, wòaɖu nu ano nu, eye eƒe luʋɔ naɖu agbe akpe ɖe eƒe agbagbadzedzewo ŋu oa? Ke esia la, Mawu si me ko wòtsona, abe alesi mekpɔe ene.” (Nyagblɔla 2:24) Paulo gblɔ be ‘yeƒe nukpɔkpɔ nue’ yeɖo aɖaŋu tso srɔ̃ɖeɖe ŋu le, gake egblɔ kpee be: “Ke mebuna bena, Mawu ƒe Gbɔgbɔ la le nye hã menye.” (Korintotɔwo I, 7:25, 39, 40) Mawu ƒe gbɔgbɔ nɔ Paulo me vavã, elabena apostolo Petro gblɔ be nusi Paulo ŋlɔ la tso “nunya, si wonae la” me. (Petro II, 3:15, 16, míawoe te gbe ɖe edzi.) Eyata Mawu ƒe gbɔgbɔe nɔ eʋãm hafi wòɖo aɖaŋua.

Nusi Biblia-ŋlɔlawo srɔ̃ tso Ŋɔŋlɔ siwo nɔ wo si me eye wotsɔ nɔ dɔ wɔm dzie wonɔ te ɖo gblɔ woƒe susuwo. Míeka ɖe edzi be woƒe nuŋlɔɖiwo wɔ ɖeka kple Mawu ƒe susu. Nusi woŋlɔ la va zu Mawu ƒe Nya ƒe akpa aɖe.

Gake ame aɖewo ƒe nya totro siwo wogblɔ la le Biblia me ya. (Tsɔ Hiob 15:15 sɔ kple Hiob 42:7.) Mawu subɔlawo ƒe nya ʋee aɖewo siwo wotsɔ nuxaxa gblɔ hã le eme, togbɔ be menye nusianu ŋue woƒo nu tsoe o ha.c Togbɔ be nuŋlɔla la gblɔ eya ŋutɔ ƒe nya hã la, Mawu ƒe gbɔgbɔ fia mɔe wòŋlɔ nusi le eteƒe, si wɔe be wode dzesi nukpɔsusu gbegblẽwo heɖe wo ɖe go. Gakpe ɖe eŋu la, nya bubu siwo ƒo xlã nya la ana nuxlẽla ɖesiaɖe si sea nu gɔme la nanya nenye be nuŋlɔla la ƒe nukpɔsusua sɔ.

Kpuie ko la, míate ŋu aka ɖe edzi be Biblia bliboa nye Mawu ƒe gbedasi. Le nyateƒe me la, Yehowa kpɔ egbɔ be nusianu si le eme la sɔ kple eƒe tameɖoɖo eye wòna mɔfiame si hiã na amesiwo di be yewoasubɔe.—Romatɔwo 15:4.

Amegbetɔ Nuŋlɔlawo—Nukatae?

Alesi Yehowa zã amegbetɔwo woŋlɔ Biblia la ɖe eƒe nunya gã fia. Bu nusia ŋu kpɔ: Ne ɖe Mawu dee asi na mawudɔlawo la, ɖe Biblia anyo ame ŋu abe alesi wòle fifia enea? Nyateƒe wònye be avivi mía nu be míaxlẽ nu tso Mawu ƒe nɔnɔmewo kple nuwɔnawo ŋu le alesi mawudɔla kpɔnɛ nu. Gake ne ɖe womeŋlɔ Biblia ɖe amegbetɔ ƒe nukpɔkpɔ nu o la, anye ne eme nyawo gɔmesese asesẽ na mí.

Míawɔ kpɔɖeŋu: Biblia ate ŋu agblɔ dzro ko be Fia Dawid wɔ ahasi eye ewu ame ale be wòtrɔ dzime emegbe. Gake aleke wònyo wue nye si be Dawid ŋutɔ nagblɔ eƒe nyawo tso alesi eƒe dzi gbã wòxa nu vevie ɖe nusiwo wòwɔ ta eye wòɖe kuku bia Yehowa ƒe tsɔtsɔkee la ŋu! Eŋlɔ be: “Nye nuvɔ̃ le nye ŋkume ɖaa. Mawu, màdo vlo dzi gbagbã, si tugu la o.” (Psalmo 51:5, 19) Eyata amegbetɔ ƒe dzonɔameme, nuwɔwɔ wo tɔ wo tɔwoe, kple vividodoɖenuŋu dze le Biblia la me.

Ẽ, Yehowa tia mɔ nyuitɔ kekeake heto edzi tsɔ eƒe Nya la na mí. Togbɔ be amegbetɔ si ŋu gbɔdzɔgbɔdzɔ kple vodada le ye wòzã hã la, gbɔgbɔ kɔkɔe ye ʋã wo ale be vodada mele woƒe nuŋlɔɖiwo me o. Eyata asixɔxɔ kɔkɔtɔ kekeakee le Biblia ŋu. Eƒe aɖaŋuɖoɖowo nyo, eye woate ŋu aɖo ŋu ɖe etsɔme anyigba dzi Paradiso ŋuti nyagblɔɖi siwo le eme ŋu.—Psalmo 119:105; Petro II, 3:13.

Nukata màtsɔe aɖo dɔe anɔ Mawu ƒe Nya la ƒe akpa aɖe xlẽm gbesiagbe o? Petro ŋlɔ be: “Notsi tsimatɔ nadzro mi vevie, bene miatsi to me hena xɔxɔ la.” (Petro I, 2:2) Esi Ŋɔŋlɔawo katã tso Mawu ƒe gbɔgbɔ me ta la, àkpɔe be “[wonyo] na nufiafia, na mokaka, na ɖɔɖɔɖo, na amehehe, si le dzɔdzɔenyenye me, bene Mawu ƒe ame la nade blibo, eye wòanɔ dzadzraɖoɖi hena dɔ nyui sia dɔ nyui wɔwɔ.”—Timoteo II, 3:16, 17.

[Etenuŋɔŋlɔwo]

[Aɖaka/Nɔnɔmetata siwo le axa 7]

Afikae Mose Kpɔ Eƒe Nyawo Tsoe?

MOSE ye ŋlɔ Biblia-gbalẽ si nye Mose ƒe Agbalẽ Gbãtɔ, gake nusiwo katã wòŋlɔ la dzɔ hafi wodzii. Ke afikae wòkpɔ nya mawo tsoe? Anye Mawue ɖe wo fiae tẽ, alo xo si amesiwo dzɔ do ŋgɔ tu na wo megbeviwo mee wòse nudzɔdzɔ aɖewo ŋutinya le. Esi amegbetɔwo nɔa agbe didi wu le ɣeyiɣi gbãtɔ mawo me ta la, anye ame atɔ̃ siwo dzɔ kplɔ wo nɔewo ƒe agbenɔɣi ɖo—Metusala, Sem, Isak, Lewi, kple Amram—tso Adam dzie Mose to se nya siwo wòŋlɔ ɖe Mose ƒe Agbalẽ Gbãtɔ me ƒe akpa gãtɔ.

Gakpe ɖe eŋu la, Mose ate ŋu axlẽ wo le nuŋlɔɖiwo me. Míade dzesii le go sia me be Mose lɔ̃a nyagbe si nye “esia enye . . . ƒe dzidzimeviwo ŋutinya” zazã, ale be eyɔa amesi ŋu wòaƒo nu tsoe ƒe ŋkɔ dea eme. (Mose I, 6:9; 10:1; 11:10, 27; 25:12, 19; 36:1, 9; 37:2) Agbalẽnyalagã aɖewo gblɔ be Hebrigbe me nya si gɔme woɖe le afisia be “ŋutinya” toh·le·dhohthʹ, fia ŋutinyagbalẽ si li xoxo si dzi Mose kpɔ hafi ŋlɔ eƒe nyawoe. Gake míate ŋu atso gbe ɖe nya sia dzi o.

Anɔ eme be mɔnu etɔ̃ siwo katã míeyɔ va yi dzie woto kpɔ nya siwo le Mose ƒe Agbalẽ Gbãtɔa me—ɖewo nye ɖeɖefia tẽ, ɖewo nye xotutu, eye ɖewo tso nusiwo woŋlɔ ɖi xoxo me. Nu vevitɔe nye be Yehowa ƒe gbɔgbɔe ʋã Mose. Eyata esɔ be wobua nusiwo wòŋlɔ be wonye Mawu ƒe nya.

[Nɔnɔmetata si le axa 4]

Mawu to mɔ vovovowo nu ʋã amewo woŋlɔ Biblia la