Gbedada na Ameƒomea Nukutɔe Gogo Vɔ

“MÍEKPƆ ale nusiawo tɔgbe kpɔ o.” Nenemae eteƒekpɔlawo gblɔ esi Yesu da gbe le lãmetututɔ aɖe ŋu enumake. (Marko 2:12) Yesu da gbe le ŋkuagbãtɔwo, aɖetututɔwo, kple xɔdrɔ̃wo hã ŋu eye eyomedzelawo hã da gbe le wo ŋu nenema ke. Ŋusẽ kae Yesu tsɔ wɔ dɔ siae? Akpa kae xɔse wɔ le eme? Nukawoe ƒe alafa gbãtɔ me nudzɔdzɔ siawo na míenya tso gbedada nukutɔe ŋu egbea?—Mateo 15:30, 31.

“Wò Xɔse la Ðe Wò”

Egbe xɔsegbedalawo lɔ̃a nya si Yesu gblɔ na nyɔnu si ŋu ʋusisidɔ nɔ ƒe 12 si va egbɔ wòda dɔ nɛ si nye “wò xɔse la ɖe wò” la gbɔgblɔ. (Luka 8:43-48) Ðe Yesu ƒe nya sia fia be gbedada le nyɔnua ŋu nɔ te ɖe nyɔnua ƒe xɔse dzia? Ðe ema nye egbegbe “xɔsegbedada” ƒe kpɔɖeŋu aɖea?

Ne míexlẽ Biblia me nuŋlɔɖia nyuie la, míekpɔnɛ dzea sii be zi geɖe la Yesu kple eƒe nusrɔ̃lawo mebiana tso dɔnɔwo si be woaʋu woƒe xɔse me hafi woada gbe le wo ŋu o. Ðeko nyɔnu si ƒe nya míegblɔ va yi va to Yesu megbe nya aɖeke magblɔmagblɔ nɛ helé eƒe awu dzaa “eye enumake eƒe ʋusisi la nu tso.” Le ɣebubuɣi la, Yesu da gbe le ŋutsu aɖe ŋu eye enɔ amesiwo va be yewoalée la dome. Eda gbe le ŋutsu aɖe si menya Yesu o gɔ̃ hã ŋu.—Luka 22:50, 51; Yohanes 5:5-9, 13; 9:24-34.

Eyata akpa kae xɔse wɔ? Esi Yesu kple eƒe nusrɔ̃lawo nɔ Tiro kple Sidon nutoawo me la, Foinike-nyɔnu aɖe do go eye wòdo ɣli be: “Aƒetɔ, Dawid vi la, kpɔ [nye] nublanui! Vinyenyɔnuvi le fu kpem ŋɔdzitɔe tso gbɔgbɔ vɔ̃ si me.” Kpɔ alesi mɔkpɔkpɔ bu ɖe nyɔnuae esi wòƒo koko be, “Aƒetɔ, xɔ nam!” la ɖa le susu me. Yesu ƒe dɔme trɔ ɖe eŋu eye wògblɔ nɛ be: “O, nyɔnu, wò xɔse la lolo! Neva me na wò, abe alesi nèdi ene.” Eye eƒe vinyɔnua ƒe lãme sẽ “le nenem gaƒoƒo ma dzi.” (Mateo 15:21-28) Edze ƒã be xɔse wɔ dɔ ya, gake ameka ƒe xɔsee? De dzesii be vidada la ƒe xɔsee Yesu kafu ke menye ɖevi si nɔ dɔ lém la tɔe o. Nuka dzie wòxɔ se? Esi wòyɔ Yesu be “Aƒetɔ, Dawid vi” la, nyɔnua nɔ eme ʋum le gaglãgbe be Yesue nye Mesia si ŋugbe wodo la. Menye Mawu dzixɔse alo gbedala la ƒe ŋusẽ dzixɔse gbɔgblɔ dzro aɖe koe o. Esi Yesu gblɔ be, “Wò xɔse la ɖe wò” la, enɔ fiafiam be ne ɖe dɔnɔawo mexɔ ye dzi se be yenye Mesia o la, womava yegbɔ be yeneda gbe le yewo ŋu o.

Míekpɔ le Ŋɔŋlɔawo me kpɔɖeŋu siawo me be gbe siwo Yesu da le amewo ŋu la to vovo sã na esiwo míekpɔna alo esiwo amewo gblɔna be yewodana egbea. Amehawo meɖe seselelãme sesẽ—ɣlidodo, nyaɖekagbugbɔgagblɔ, konyifafa, kple dablibɛƒoƒo kple esiawo tɔgbe—fia o eye Yesu mewɔ nu gbodogbodo tsɔ wɔ dɔ ɖe amewo dzi o. Tsɔ kpe ɖe eŋu la, Yesu medo kpo gbedada le lãmegbegblẽtɔwo ŋu kpɔ heto ayemɔ dzi gblɔ be ɖe wonye xɔseʋeetɔwo alo be ɖe woƒe dɔmenyonunanawo mesɔ gbɔ tae o.

Gbedada Siwo Tso Mawu ƒe Ŋusẽ Me

Aleke Yesu kple eƒe nusrɔ̃lawo da gbee? Biblia la ɖo eŋu be: “Aƒetɔ ƒe ŋusẽ li be, wòada gbe le wo ŋu.” (Luka 5:17) Luka 9:43 gblɔ be esi wòda gbe le ame aɖe ŋu vɔ megbe la, “kuvia ɖo wo katã le Mawu ƒe gãnyenye ŋuti.” Esɔ be Yesu mehe susu yi eɖokui dzi be yee nye gbedala la o. Ɣeaɖeɣi la, egblɔ na ŋutsu aɖe si wòɖe tso gbɔgbɔ vɔ̃wo ƒe fuɖename si me be: “Heyi aƒewò me ɖe tɔwòwo gbɔ, eye naxlẽ nusianu, si [Yehowa, NW] wɔ na wò kple alesi wòkpɔ nublanui na wò la, afia wo.”—Marko 5:19.

Esi wònye Mawu ƒe ŋusẽe Yesu kple eƒe apostolowo tsɔ da gbe le amewo ŋu ta la, ele bɔbɔe be míakpɔ nusitae mehiã kokoko be xɔse nanɔ amesiwo ŋu woda gbe le la si hafi o. Ke hã la, ele vevie be gbedala ya ƒe xɔse me nasẽ. Eyata esi Yesu yomedzelawo mete ŋu nyã gbɔgbɔ vɔ̃ sesẽ aɖe o la, Yesu gblɔ nusitae na wo be: “Miaƒe xɔse ʋee ŋutie.”—Mateo 17:20.

Tameɖoɖo si Nɔ Nukugbedadawo Ŋu

Togbɔ be Yesu da gbe le ame geɖewo ŋu le eƒe anyigba dzi subɔsubɔdɔa me hã la, menye ‘gbedada koŋ ye wòwɔ o.’ “Gbeƒãɖeɖe fiaɖuƒe la ŋutinya nyui la” nɔ vevie nɛ wu gbe si wòda le amewo ŋu nukutɔe—ga alo nudzɔdzɔ aɖeke maxɔmaxɔe. (Mateo 9:35) Nuŋlɔɖia gblɔ be ɣeaɖeyi la ‘exɔ wo, eye wòƒo nu na wo le mawufiaɖuƒe ŋuti, eye amesiwo hiã gbedada la, eda gbe le wo ŋu.’ (Luka 9:11) Woyɔ Yesu zi geɖe le Nyanyuigbalẽawo me be “Nufiala” ke menye “Gbedala” o.

Ke nukatae Yesu da gbe nukutɔe? Nusi koŋ tae nye be etsɔe fia be yee nye Mesia si ŋugbe wodo la. Esi wode Yohanes Amenyrɔɖetsimela gaxɔ me madzemadzee la, edi be yeaka ɖe edzi be yewɔ dɔ siwo Mawu dɔ ye be yeava wɔ la de goe. Edɔ eya ŋutɔ ƒe nusrɔ̃lawo ɖe Yesu gbɔ be woabiae be: “Wòe nye amesi gbɔna loo, alo ame bubu aɖee míakpɔ mɔ na mahã?” De dzesi nusi Yesu gblɔ na Yohanes ƒe nusrɔ̃lawo: “Miyi ɖato nusi miese kple nusi miekpɔ la, na Yohanes: Ŋkunɔwo le nu kpɔm, eye tekunɔwo le azɔli zɔm, anyidzelawo ŋuti le kɔkɔm, tokunɔwo le nu sem, eye ame kukuwo le tsitre tsim, eye wole nyanyui la gblɔm fia ame dahewo.”—Mateo 11:2-5.

Ẽ, nyateƒe si wònye be menye gbe ɖeɖekoe Yesu da o ke ewɔ nukunu bubu siwo ŋu nya woŋlɔ ɖe Nyanyuiawo me la ɖo kpe edzi kɔte be eyae nye “Amesi Gbɔna,” Mesia si ŋugbe wodo la. Mehiã be ame aɖeke ‘nakpɔ mɔ na ame bubu o.’

Nukugbedadawoe Wonye Egbea?

Eyata ɖe míakpɔ mɔ be Mawu naɖe eƒe ŋusẽ afia to gbedadawo dzi egbea? Ao. Yesu to nukudɔ siwo wòtsɔ Mawu ƒe ŋusẽ wɔe dzi ɖee fia kɔte be yee nye Mesia si ŋugbe Mawu do be ava la. Woŋlɔ Yesu ƒe ŋusẽdɔwo ɖe Biblia me be amesiame naxlẽ. Mehiã be Mawu nanɔ nu mawo wɔm fia dzidzime ɖesiaɖe atsɔ aɖo kpe eƒe ŋusẽ dzi o.

Nukutɔe la, gbedadawo kple nukudɔ bubuwo kpɔa ŋusẽ ɖe ame dzi vaseɖe afi aɖe ko. Yesu ƒe nukunuwo teƒekpɔla aɖewo gɔ̃ hã mexɔe se be Fofoa si le dziƒo lae nɔ megbe nɛ o. “Esi wòwɔ ale dzesi geɖe siawo le woƒe ŋku me hã la, womexɔ edzi se o.” (Yohanes 12:37) Eyatae esi apostolo Paulo dzro nukununana—nyagbɔgblɔɖi, aɖe yeye gbɔgblɔ, gbedada kple bubu—siwo Mawu na ame vovovowo le ƒe alafa gbãtɔ me Kristo-hamea me vɔ la, gbɔgbɔ ʋãe wògblɔ be: “Nenye nyagbɔgblɔɖiwo la, woaɖe wo ɖa, nenye gbegbɔgblɔwo la, woadzudzɔ, nenye sidzedze la, woaɖee ɖa. Elabena míenyaa nu afã kple afã, eye míegblɔa nya ɖi afã kple afã. Ke ne nu blibo la va va la, ekem woaɖe nusiwo nye afãafãwo la ɖa.”—Korintotɔwo I, 12:28-31; 13:8-10.

Nyateƒee, Mawu dzixɔxɔse le vevie hena míaƒe nyonyo. Gake ne gbedada ƒe ŋugbedodo siwo nye aʋatso dzie ame atu eƒe xɔse ɖo la, nusi wòle mɔ kpɔm na la mava eme o. Hekpe ɖe eŋu la, Yesu gblɔ le nuwuɣia ŋu be: “Aʋatsokristowo kple aʋatsonyagblɔɖilawo atsi tre, eye woafia dzesi gãwo kple nukunuwo bena, ne woate ŋui la, woaflu ame tiatiawo hã.” (Mateo 24:24) Le amebeblegbedadawo kple ametafatafawo megbe la, gbɔgbɔ vɔ̃wo ƒe ŋusẽdɔwɔwɔwo hã anɔ eme. Eyata nudzɔdzɔ siwo me menya kɔna o siwo amewo gblɔna la megawɔ nuku na mí o, eye le nyateƒe me la, nusiawo manye nusi dzi míatu Mawu dzixɔse vavãtɔ ɖo o.

Esi wònye be ame aɖeke mete ŋu daa gbe egbea abe Yesu ene o ta la, ɖe ema agblẽ nane le mía ŋua? Kura o. Le nyateƒe me la, amesiwo ŋu Yesu da gbe le agate ŋu adze dɔ mlɔeba ake. Wo katã wotsi ku amegã heku. Viɖe siwo wokpɔ tso gbe si woda le wo ŋu me la menɔ anyi didi o. Ke hã la, gɔmesese mavɔ nɔ Yesu ƒe nukugbedadawo ŋu elabena wotsi tre ɖi na etsɔme yayrawo.

Eyata esi Alexandre kple Benedita siwo ŋu nya míegblɔ va yi dzro Mawu ƒe Nya Biblia me vɔ megbe la, womegaxɔ egbegbe xɔsegbedada kple gbe siwo wodana to gbɔgbɔwo ƒe ŋusẽ dzi la dzi se azɔ o. Ke hã la, wonya be menye ɣeyiɣi siwo va yi me koe woda gbe le amewo ŋu nukutɔe o. Nukatae? Abe ame miliɔn siwo le xexeame godoo ene la, wole mɔ kpɔm na yayra siwo woakpɔ tso gbedada me le Mawu ƒe Fiaɖuƒea ƒe dziɖuɖu te.—Mateo 6:10.

Dɔléle Kple Ku Maganɔ Anyi O

Abe alesi míekpɔe va yi ene la, menye gbedada le dɔnɔwo ŋu kple nukunu bubuwo wɔwɔe nye susu vevi si tae Yesu wɔ eƒe subɔsubɔdɔa ɖo o. Ke boŋ gbeƒãɖeɖe Mawufiaɖuƒea ŋuti nyanyuiae nye dɔ si koŋ wòwɔ. (Mateo 9:35; Luka 4:43; 8:1) Fiaɖuƒe mae nye nusi dzi Mawu ato ada gbe le ameƒomea ŋu nukutɔe eye wòadzra nuvɔ̃ kple blibomademade ƒe nugblẽƒewo ɖo le amegbetɔƒomea ŋu. Alekee eye ɣekaɣie wòawɔ nusiawo?

Esi Kristo Yesu nɔ nya gblɔm ɖi ɖe etsɔme ʋĩ ŋu la, ena eƒe apostolo Yohanes kpɔ nyagblɔɖi ŋutegã aɖe: “Azɔ xɔname kple ŋusẽ kpakple fiaɖuƒe la zu mía Mawu la tɔ, eye ŋusẽ la zu eƒe Kristo la tɔ.” (Nyaɖeɖefia 12:10) Ðaseɖiɖiawo katã fia be tso ƒe 1914 me la, wonyã Mawu ƒe tsitretsiɖeŋula gãtɔ Satana ɖo ɖe anyigba dzi nutowo me, eye Fiaɖuƒea le dzi ɖum fifia! Woɖo Yesu Fiae le Mesia Fiaɖuƒea me eye ele dzadzraɖoɖi fifia be yeawɔ tɔtrɔ gãwo le anyigba dzi.

Le etsɔme si ava kpuie la, Yesu ƒe dziƒodziɖuɖua aɖu “anyigba yeye” si nye ameƒome yeye si le dzɔdzɔe la dzi. (Petro II, 3:13) Aleke nuwo anɔ ɣemaɣi? Eƒe kpɔɖeŋu kpui nyui aɖee nye esi: “Mekpɔ dziƒo yeye kple anyigba yeye; elabena gbã dziƒo kple gbã nyigba la nu va yi . . . Eye Mawu latutu aɖatsi sia aɖatsi ɖa le woƒe ŋku me, eye ku maganɔ anyi akpɔ o, eye konyifafa kple ɣlidodo kple veve aɖeke maganɔ anyi o; elabena nu gbãtɔwo nu va yi.”—Nyaɖeɖefia 21:1, 4.

Àte ŋu akpɔ alesi agbenɔnɔ anɔ ne eva me be woda gbe le ameƒomea ŋu nukutɔe le susu mea? “Duametɔ aɖeke magblɔ be, yele dɔ lém o; wotsɔ vodada ke amesiwo le eme.” Ẽ, Mawu awɔ nusi xɔsegbedalawo mate ŋu awɔ akpɔ gbeɖe o. “Ami ku saɖagatsi tegbee.” Le nyateƒe me la, “Aƒetɔ Yehowa atutu aɖatsi ɖa le ŋkuwo katã me.”—Yesaya 25:8; 33:24.

[Nɔnɔmetata si le axa 7]

Le Mawu ƒe Fiaɖuƒea ƒe dziɖuɖu te la, woada gbe le ameƒomea ŋu nukutɔe