Ðe Nàte Ŋu Axɔ Mawu si Li Ŋutɔŋutɔ Dzi Asea?

BRITAINTƆWO ƒe yunivɛsiti nunɔla tsitsi aɖe gblɔ be: “Mehiã be nàxɔ Mawu dzi ase hafi anye Kristotɔ o . . . Míele tɔtrɔ kpata ƒe ɣeyiɣi me fifia, gake le ƒe alafa 21 lia me la, Mawu, le alesi wobunɛ vaseɖe fifia nu, maganɔ sɔlemehawo me o.” Enɔ nu ƒom le Xɔseha aɖe si ƒe dzixɔsewo dzi Britain-nunɔla siwo ade alafa ɖeka teti lɔ̃ ɖo la teƒe. “Kristotɔ mawudzimaxɔsela” siawo gblɔna be amewo ŋutɔe to mawusubɔsubɔ vɛ eye abe alesi emetɔ aɖe gblɔe ene la, “nususukpɔ” koe Mawu nye. Womegabua Mawu be enye ame aɖe si li si ƒo nusianu ta o.

“Mawu ku” zu nyagbɔgblɔ aɖe si bɔ ɖe ame geɖe nu kpɔ le ƒe 1960 ƒe ƒeawo me. Esia wɔ ɖeka kple ƒe alafa 19 lia me Germanytɔ xexemenunyala Friedrich Nietzsche ƒe nukpɔsusu, eye ezu taflatsedonu si sɔhɛ geɖe nɔ didim be yewoatsɔ awɔ nusi dze yewo ŋutɔwo ŋui, atsɔ anɔ agbe gbegblẽ eye woazã atikevɔ̃ɖiwo si womase fɔbubu aɖeke le wo ɖokui me be yewole nu gbegblẽ wɔm o. Gake ɖe ablɔɖe ma na ɖevi siwo wova yɔ be ame nɔɖokuisiwo la te ŋu nɔ agbe si me dzidzeme le wua?

Le ƒe mawo ke me la, Anglikan bisiɔp John A. T. Robinson ta eƒe agbalẽ si ƒe ŋkɔe nye Honest to God, si ŋu wohe nya le vevie. Ehati nunɔla bubuwo he nya ɖe eŋu be esusui be “nusi ŋu amegbetɔ ke ɖo le eya ŋutɔ ƒe ŋugblemeyiyi ʋĩ me koe” Mawu nye. Mawuŋununyafialagã Keith Ward bia be: “Ðe Mawu dzixɔse nye aʋatsodzixɔse xoxo si ƒomevi ŋu nunyalawo ɖe asi le fifiaa?” Egblɔ tsɔ ɖo eya ŋutɔ ƒe nyabiabiaa ŋui be: “Naneke mele vevie le mawusubɔsubɔ me egbea wu sidzedze alesi wobua Mawui tso gbaɖegbe ke o.”

Fukpekpe Kpakple Mawu si Li Ŋutɔŋutɔ

Esesẽna na ame geɖe siwo xɔ edzi se be ame si li ŋutɔŋutɔe Mawu nye la be woaɖe nusita wòanɔ anyi evɔ afɔku kple fukpekpe siwo wokpɔna naganɔ anyi la me. Le kpɔɖeŋu me, le March 1996 me la, woda tu ɖevi sue 16 kple woƒe nufiala woku le Dunblane, Scotland. Nyɔnu aɖe si nudzɔdzɔa tɔtɔ la gblɔ be: “Nyemete ŋu se nusi Mawu ƒe lɔlɔ̃nu nye koŋ gɔme o.” Woŋlɔ nuxaxa si afɔku sia nye la ɖe fafanamegbalẽvi aɖe si ŋu wotsɔ seƒoƒo kpe ɖo la dzi da ɖe ɖeviawo ƒe suku gbɔ. Nya ɖeka koe le edzi, si nye, “NUKATAE?” Dunblane ƒe bisiɔp ɖo eŋu be: “Numeɖeɖe aɖeke mele eŋu o. Míate ŋu aɖo nusita wòle be nusia nadzɔ ŋu o.”

Emegbe le ƒe ma ke me la, wowu ɖekakpui aɖe si nye England Sɔlemeha ƒe nunɔla si wonya nyuie la anyratɔe. Church Times ka nya ta be hame si tsi yaa se Liverpool ƒe bisiɔp ƒe kpeɖeŋutɔ wògblɔ be “yetsɔ biabia siwo nye nukatae? nukatae? ƒo ʋɔe na Mawu sesĩe.” Akɔfanamenya aɖeke mele nunɔla sia hã si tso Mawu si li ŋutɔŋutɔ gbɔ o. Ke nuka dzie wòle be míaxɔ ase?

Susu le eme be woaxɔ Mawu si li ŋutɔŋutɔ dzi ase. Nusia nyanya hiã vevie hafi míate ŋu akpɔ ŋuɖoɖo na nya sesẽ siwo míebia ɖe etame. Míele kpewòm be nàxlẽ numeɖeɖe si le nyati si kplɔe ɖo me.

[Nɔnɔmetata si le axa 3]

Fafanamegbalẽvia bia be “Nukatae?”

[Afi Si Míexɔ Mɔɖeɖe Tso]

NEWSTEAM No. 278468/Sipa Press