Egbegbe Kristmas ƒe Dzɔtsoƒewo

KRISTMAS ɣeyiɣia nye aseyetsoɣi le ƒea me na ame miliɔn geɖe le xexeame godoo. Enye nu damiwo ɖuɣi, kɔnu xoxowo wɔɣi, kple ƒome ƒe ɖekawɔɣi. Kristmas ŋkekenyuia nye ɣeyiɣi si me xɔlɔ̃wo kple ƒometɔwo lɔ̃a gbedonamegbalẽviwo kple nunanawo ɖoɖo ɖe wo nɔewo.

Gake le ƒe 150 siwo va yi ko me la, ŋkekenyui bubu kura ye Kristmas nye. Ŋutinyafialagã Stephen Nissenbaum ŋlɔ le eƒe agbalẽ si nye The Battle for Christmas me be: “Kristmas . . . nye ahamuɣi tsã si me woɖea asi le hadomegbenɔnɔ ŋuti sewo ŋu gbɔ bene ‘woatu aglo hoo,’ si ɖi December me Mardi Gras.”

Ðewohĩ nyagbɔgblɔ sia aɖe fu na amesiwo tsɔ subɔsubɔ ƒe bubu deto na Kristmas. Nukata woado gu ŋkekenyui si wobe wotsɔ le ŋku ɖom Mawu Vi la ƒe dzidzi dzi? Ðewohĩ ŋuɖoɖoa awɔ mo yaa na wò.

Gɔmedzedze Manyomanyo

Nyaʋiʋli geɖe nɔ Kristmas ŋu tso esime wotoe vɛ le ƒe alafa enelia me ke. Le kpɔɖeŋu me, biabia fɔ ɖe te ku ɖe ŋkeke si dzi wodzi Yesu le ŋu. Esi Biblia metɔ asi ŋkeke alo ɣleti si me wodzi Kristo dzi o ta la, amewo do ɣletiŋkeke aɖewo ɖa. Le ƒe alafa etɔ̃lia me la, Egiptetɔwo ƒe mawunyaŋununyalawo ƒe ƒuƒoƒo aɖe dae ɖe May 20 lia dzi, gake ame bubuwo dae ɖe ŋkeke siwo do ŋgɔ abe March 28, April 2, alo April 19 ene dzi. Kaka ƒe alafa 18 lia naɖo la, woda Yesu ƒe dzigbe ɖe ɣleti ɖesiaɖe me le ƒea me! Ke aleke wɔ wova tia December 25 lia mlɔeba?

Agbalẽnyalagã geɖe lɔ̃ ɖe edzi be Katoliko-ha lae da Yesu ƒe dzigbezã ɖe December 25 lia dzi. Nukatae? The New Encyclopædia Britannica gblɔ be: “Anɔ eme kokoko be le esi Kristotɔ gbãtɔwo di be ŋkekea nadze Romatɔwo ƒe azã si nye ‘ɣe si dzi womeɖu o ƒe dzigbezã’ dzi tae.” Gake nukatae Kristotɔ siwo yome trɔ̃subɔlawo tina vɔ̃ɖitɔe hena ƒe alafa eve kple afã la aɖe asi le wo ɖokui ŋu na wo yometilawo kpata nenema?

Gbegblẽ Va Ge Ðe Eme

Apostolo Paulo xlɔ̃ nu Timoteo le ƒe alafa gbãtɔa me be “ame vɔ̃ɖiwo kple ameblelawo” ava tra ɖe Kristo-hamea me eye woaflu ame geɖe. (Timoteo II, 3:13) Xɔsegbegbe gã sia dze egɔme esime apostoloawo ku vɔ. (Dɔwɔwɔwo 20:29, 30) Le dzimetɔtrɔ si wobe Constantine wɔ le ƒe alafa enelia me megbe la, trɔ̃subɔlawo lɔ bibibi va ge ɖe Kristotɔnyenye ƒomevi si nɔ anyi ɣemaɣi la me. Nukae do tso eme? Agbalẽ si nye Early Christianity and Paganism gblɔ be: “Xɔsetɔ dovevienu ŋutɔŋutɔwo ƒe ƒuƒoƒo sue la meva ɖi naneke le ameha gã siwo be Kristotɔwoe yewonye la dome o.”

Aleke Paulo ƒe nyawo va nye nyateƒee enye si! Ðeko wònɔ abe ɖe trɔ̃subɔlawo ƒe nugbegblẽwɔwɔ va nɔ Kristotɔnyenye akuakua mim ene. Eye gbegblẽ sia medze le teƒe aɖeke wu ŋkekenyuiwo ɖuɖu me o.

Le nyateƒe me la, azã ɖeka pɛ si wode se na Kristotɔwo be woaɖu ye nye Aƒetɔ ƒe Fiẽnuɖuɖu la. (Korintotɔwo I, 11:23-26) Le alesi trɔ̃subɔsubɔ nuwɔnawo nɔ Romatɔwo ƒe azãɖuɖuwo me ta la, Kristotɔ gbãtɔwo mekpɔ gome le wo ɖuɖu me o. Ƒe alafa etɔ̃lia me trɔ̃subɔlawo doa vlo Kristotɔwo le nusia ta gblɔna be: “Miedea nuwo ɖefiaƒewo o; mietsɔa ɖeke le hahoo fefewo me o; mietsri hahoo kplɔ̃ɖoɖowo, eye mienyɔ ŋu hoʋiʋli kɔkɔewo.” Evɔ trɔ̃subɔlawo ƒoa adegbe be: “Míetsɔa dzidzɔ, kplɔ̃ɖoɖowo, hadzidziwo kple lãmesẽfefewo dea ta agu na míaƒe mawuwoe.”

Wova dzudzɔ nyatoƒoetotoa le ƒe alafa enelia ƒe domedome. Aleke wòdzɔe? Esi yeaɖi Kristotɔwo va nɔ gegem ɖe ha la me dzaa la, xɔsegbelawo ƒe nufiafiawo va nɔ dzidzim ɖe edzi. Nusia wɔe be wova wɔ ɖeka kple Roma-xexeame. Agbalẽ si nye The Paganism in Our Christianity gblɔ le nya sia ŋu be: “Nu wònye Kristotɔwo ɖo koŋ be yewoaɖo tɔ ɖe trɔ̃subɔlawo ƒe azã siwo wowɔna le kɔnu nu wòvivia wo nu la dzi bene yewoawɔe wòazu Kristotɔwo ƒe azã vevi boŋ.” Ẽ, xɔsegbegbe gã la va nɔ nu gblẽm. Alesi Kristotɔwo lɔ̃ faa be yewoaɖu trɔ̃subɔlawo ƒe azãwo la va wɔe be wova sɔ amehawo dome. Eteƒe medidi o, ƒezã gbogbo aɖewo va nɔ Kristotɔwo si wòde trɔ̃subɔlawo ŋutɔwo tɔ nu. Mewɔ nuku o be Kristmas ye nye gbãtɔ nɔ wo dome.

Dukɔwo Dome Ŋkekenyui

Esi Kristotɔnyenye si xɔ aƒe ɖi wu la nɔ kakam ɖe Europa la, Kristmas hã kaka kplii. Katoliko-ha la va da asi ɖe nukpɔsusua dzi be esɔ be woanɔ dzidzɔzã si woatsɔ ade bubu Yesu ƒe dzigbezã ŋu la ɖum ɖaa. Eva wɔe be le ƒe 567 M.Ŋ. me la, Tours ƒe Aɖaŋuɖotakpekpe “ɖe gbeƒã ŋkeke 12 siwo tso Kristmas dzi vaseɖe Epifani dzi be wole kɔkɔe eye wonye azãɖuɣi.”—The Catholic Encyclopedia for School and Home.

Eteƒe medidi o xexemenu geɖe siwo wowɔna le dzigbe alo dziehe Europa ƒe nuŋeŋezãwo me va bɔ ɖe Kristmas ɖuɖu me. Le esi aglotulawo ɖua nu tsu hemua aha ta la, aglotutu va zu nusi bɔ wu mawuvɔvɔ̃. Le esi teƒe be sɔlemeha la nagbe hadzegbenɔnɔ ma la, ɖe woda asi ɖe edzi boŋ. (Tsɔe sɔ kple Romatɔwo 13:13; Petro I, 4:3.) Le ƒe 601 M.Ŋ. me la, Papa Gregory I ŋlɔ ɖo ɖe Mellitus si nye eƒe mawunyadɔgbedela si nɔ England gblɔ nɛ be “megaɖo asi blema trɔ̃subɔsubɔzã mawo dzi o, ke nexɔe kpe Sɔlemeha la ƒe kɔnuwo, eye wòatrɔ trɔ̃subɔsubɔ ƒe susu si wotsɔ ɖunɛ ko eye wòatsɔ Kristotɔwo ƒe nukpɔsusu akplɔe boŋ.” Nenemae Arthur Weigall si nye blemanyawo ŋuti numekulagã na Egypt dziɖuɖua tsã la ka nya tae.

Le Titinaɣeyiɣiwo me la, ame aɖewo siwo tsi dzi ɖe tɔtrɔwɔwɔ ŋu susui be ehiã be woaƒo nu tsi tre ɖe nu trama siawo wɔwɔ ŋu. Woŋlɔ agbalẽ geɖe tsɔ tsi tre ɖe “gudodo Kristmas ƒe aglotutu” ŋu. Ðk. Penne Restad gblɔ le eƒe agbalẽ si nye Christmas in America—A History me be: “Subɔsubɔhakplɔla aɖewo te gbe ɖe edzi gblɔ be ameƒome madebliboa hiã na ɖokuidzimaɖumaɖu kple nutovowɔwɔ ƒe ɣeyiɣi aɖe, zi alesi wowɔe le Kristotɔwo ƒe dzikpɔkpɔ te ko.” Ðeko nya sia gatɔtɔ nuwo ɖe edzi boŋ. Gake menye nya aɖekee nye ema o, elabena wotsɔ trɔ̃subɔsubɔkɔnuwo tsaka kple Kristmas ale gbegbe be ame akpa gãtɔ meganɔ lɔlɔ̃m be yewoaɖe asi le wo ŋu o. Aleae nuŋlɔla Tristram Coffin gblɔe enye si be: “Ðeko amehawo katã le nusi wowɔna xoxo la wɔm eye wometsɔ ɖeke le agbenyuinɔnɔtaʋlilawo ƒe nyagbɔgblɔ me o.”

Kaka ɣeyiɣi si me Europatɔwo nava nɔ Nɔƒe Yeyea ɖom anyi la, Kristmas zu ŋkekenyui nyanyɛ xoxo. Gake kokoko la, amewo meda asi ɖe Kristmas dzi le dutanyigbaawo dzi o. Puritan ɖɔɖɔɖotaʋlilawo bu azãɖuɖua be enye trɔ̃subɔsubɔ eye woxe mɔ ɖe enu le Massachusetts tso ƒe 1659 va ɖo ƒe 1681.

Esi wova ɖe mɔxenua ɖa vɔ megbe la, Kristmas ɖuɖu va dzi ɖe edzi le dutaduawo katã me, vevietɔ le New England ƒe anyigbe alo anyiehe. Eyata ne míebu ŋkekenyuia ƒe ŋutinya ŋu la, mewɔ nuku be ame aɖewo tsi dzi ɖe vivisese ŋu wu bubudede Mawu ƒe Vi la ŋu o. Kristmas kɔnu aɖe si gblẽa nu vevietɔ enye ahatsunono. Ðekakpui gbevuviwo gena ɖe nutoa me tɔ hotsuitɔwo ƒe aƒewo me henɔa vɔvɔ̃ dom wo na be woana nuɖuɖu kple aha yewo femaxee. Ne aƒeamenɔlaa gbe la, woƒoa fi denɛ, eye ɣeaɖewoɣi wogblẽa nuwo le aƒea me.

Nɔnɔmewo va gblẽ le ƒe 1820 ƒeawo me ale gbegbe be Nufialagã Nissenbaum gblɔ be “Kristmas ɖuɣi ƒe ʋunyaʋunyawɔwɔ” va zu “hadomegbenɔnɔ dome gblẽnu vɔ̃ɖi aɖe.” Le dugãwo abe New York kple Philadelphia ene me la, xɔtɔ kesinɔtɔwo va haya dzɔlawo be woadzɔ yewoƒe nuwo ŋu na yewo. Wogblɔ gɔ̃ hã be hoowɔwɔ si me wogblẽ nu le le ƒe 1827/28 ƒe Kristmas ɖuɣie na New York Dugã la ɖo kpovitɔwo anyi zi gbãtɔ!

Asitɔtrɔ le Kristmas Ŋu

Nuwo trɔ le ameƒomea dome le ƒe alafa 19 lia me si ƒomevi medzɔ kpɔ o. Mɔdodowo kple ketekemɔwo toto vɛ wɔe be amewo, adzɔnuwo, kple nyatakaka dea teƒewo kaba wu. Mɔ̃ɖaŋu ŋudɔwɔwɔ ƒe tɔtrɔ kpata na dɔwɔɖui ƒe mɔnu miliɔn geɖe va ʋu ɖi, eye adzɔnuwɔƒewo wɔ adzɔnu gbogbo aɖewo. Mɔ̃ɖaŋu ŋudɔwɔwɔ hã he hadomekuxi sesẽ yeye siwo va gblẽ nu le Kristmas ɖuɖu ŋu vɛ.

Ŋkekenyuiwo ɖuɣie ame geɖe tsɔ doa ŋusẽ ƒomekadodowo, eye Kristmas ɖuɣi hã le eme. Amesiwo to Kristmas vɛ la te ŋu trɔ asi le eƒe kɔnu xoxo aɖewo ŋu ɖekaɖeka ale be Kristmas megava nye aglotutu hoo ƒe azã o, ke ezu ƒomeŋkekenyui boŋ.

Le nyateƒe me le ƒe alafa 19 lia ƒe nuwuwu lɔƒo la, wova nɔ Kristmas bum be enye egbegbe Amerikatɔwo ƒe agbenɔnɔ vɔ̃wo gbɔ kpɔnu. Ðk. Restad gblɔ be: “Le ŋkekenyuiwo katã dome la, Kristmas koe nye mɔ nyuitɔ si dzi woto na be mawusubɔsubɔ kple mawusosroɖa va ge ɖe aƒewo me eye eya dzie wotona ɖɔa nu tovo kple nu vlo siwo wowɔna le hadome la ɖo.” Egblɔ kpee be: “Nuwo nana, dɔmenyowɔwɔ, xɔlɔ̃wɔwɔ ƒe ŋkekenyui gbedoname kple atsyɔ̃ɖonuwo kpakple dzidzɔkpɔkpɔ ɖe ati maluxe si woda ɖe anyinɔxɔ me ŋu alo, esi wova dana ɖe Kwasiɖa sukuxɔ me la tea aƒekɔ ɖesiaɖe me tɔwo ƒoa ƒu eye ɖekawɔwɔ nɔa woa kple sɔlemetɔwo, kple amewo dome.”

Nenema ke egbea hã amewo ɖua Kristmas kple susu be yewoatsɔ aɖe lɔlɔ̃ afia yewo nɔewo ahana ɖekawɔwɔ nanɔ ƒomea me. Gake mele be míaŋlɔ akpa si nye gbɔgbɔmetɔ be o. Ame miliɔn geɖe ɖua Kristmas tsɔ dea bubu Yesu ƒe dzidzi ŋu. Ðewohĩ woade sɔleme wɔna tɔxɛwo wɔƒe, awɔ Yesu Dzidzi ƒe nuwo le aƒeme, alo ado gbe ɖa ada akpe na Yesu ŋutɔ. Gake aleke Mawu bua nya lae? Ðe wòda asi ɖe nusiawo dzia? De ŋugble le nusi Biblia gblɔ ŋu kpɔ.

“Milɔ̃ Nyateƒe Kple Ŋutifafa”

Esime Yesu nɔ anyigba dzi la, egblɔ na eyomedzelawo be: “Mawue nye Gbɔgbɔ, eye amesiwo le gbe dom ɖa nɛ la, ele be, woado gbe ɖa le gbɔgbɔ kple nyateƒe me.” (Yohanes 4:24) Yesu nɔ agbe ɖe nya siawo nu. Nyateƒee wògblɔna ɣesiaɣi. Esrɔ̃ Fofoa, ‘Yehowa Mawu nyateƒetɔ la’ bliboe.—Psalmo 31:6; Yohanes 14:9.

Yehowa na eme kɔ le Biblia me be yelé fu amebeble ƒomevi ɖesiaɖe. (Psalmo 5:7) Le esia ta la, ɖe mewɔ mo yaa be nu geɖe siwo do ƒome kple Kristmas nye alakpa oa? Le kpɔɖeŋu me, bu gli si wotona le Santa Claus ŋuti ŋu kpɔ. Ète kpɔ be yeaɖe nusita Santa lɔ̃na be yeato adzudzɔlɔnu me ke menye ʋɔtru nu o, abe alesi woxɔe se le teƒe geɖe ene la me na ɖevi aɖe kpɔa? Eye aleke Santa wɔna hafi te ŋu ɖoa aƒe miliɔn geɖe me le zã ɖeka me? Ke kpagbadzoɖekɛ si dzona ya ɖe? Ne ɖevi va dze sii be woble ye le alesi yexɔe se be Santa nye ame ŋutɔŋutɔ ŋu la, ɖe nusia mana magaka ɖe edzilawo dzi oa?

The Catholic Encyclopedia gblɔe eme kɔ be: “Trɔ̃subɔsubɔkɔnuwo . . . va de nu Kristmas me.” Ke nukata Katoliko-ha kple Kristodukɔa ƒe sɔlemeha bubuwo gaɖua ŋkekenyui si ƒe kɔnuwo menye Kristotɔwo tɔ o? Ðe ema mefia asi dada ɖe trɔ̃subɔlawo ƒe nufiafiawo dzi oa?

Esi Yesu nɔ anyigba dzi la mede dzi ƒo na amewo be woade ta agu na ye o. Yesu ŋutɔ gblɔ be: “Aƒetɔ, wò Mawu la, nade ta agu na, eye eya ɖeka ko nasubɔ.” (Mateo 4:10) Nenema ke esi wokɔ Yesu ŋu le dziƒo vɔ la, mawudɔla aɖe gblɔ na apostolo Yohanes be ‘wòade ta agu na Mawu ko’ si fia be naneke metrɔ le nya sia ŋu o. (Nyaɖeɖefia 19:10) Esia fɔ biabia ɖe te be, Ðe Yesu ada asi ɖe subɔsubɔ ƒe bubu siwo katã wotsɔna nɛ le Kristmas ɖuɣi, si menye na Fofoa o la dzia?

Edze ƒã be nya siwo ku ɖe egbegbe Kristmas ŋu la medzea ame ŋu tututu o. Ŋkekenyui si ŋu kpeɖodzi geɖe fia le be etso blema nutovowɔɣi aɖe mee woɖee tsoe koŋ. Dzitsinya nyui ʋã Kristotɔ miliɔn geɖe be wogbe be yewomaɖu Kristmas o. Le kpɔɖeŋu me, sɔhɛ aɖe si ŋkɔe nye Ryan gblɔ le Kristmas ŋu be: “Ŋkeke ʋee aɖewo le ƒea me ne ƒomea ƒo ƒu eye dzi le amesiame dzɔm ko hafi amewo kpɔa dzidzɔ ŋutɔŋutɔ. Gake nu tɔxɛ kae le nu ma ŋu? Dzinyelawo naa num ɣesiaɣi le ƒea me!” Sɔhɛ bubu si xɔ ƒe 12 gblɔ be: “Nyemesusu be naneke to ŋunye o. Mexɔa nunanawo le ƒe bliboa me, ke menye le ŋkeke tɔxɛ ɖeka aɖe dzi esime amewo susu be ele be yewoaƒle nunanawo ɖeɖeko o.”

Nyagblɔɖila Zaxarya de dzi ƒo na etɔ Israel-viwo be ‘woalɔ̃ nyateƒe kple ŋutifafa.’ (Zaxarya 8:19) Ne míewɔ nu abe Zaxarya kple blematɔ nuteƒewɔla mawo ene, eye ‘míelɔ̃ nyateƒe’ la, ɖe mele be míatsri alakpasubɔsubɔ ƒe azã ɖesiaɖe si medea bubu Yehowa, “Mawu gbagbe vavãtɔ” la ŋu oa?—Tesalonikatɔwo I, 1:9.

[Nɔnɔmetata si le axa 7]

“Nyemesusu be naneke to ŋunye o. Mexɔa nunanawo le ƒe bliboa me”