Nyateƒea Trɔa Amewo Ƒe Agbenɔnɔ

Ewɔ nublanui gake nyateƒee wònye be ame geɖe siwo li egbea ƒe agbenɔnɔ sẽ eye léƒe mele eŋu gɔ̃ hã o. Ðe wòanya wɔ be ame siawo nakpɔ dzidzɔa? Wo dometɔ aɖewo nye adzodalawo eye wodaa adzo woƒe nutometɔwo. Ðe woate ŋu ava zu anukwareɖilawo le hadome gbaɖegbea? Biabia eve siawo katã ƒe ŋuɖoɖoe nye ẽ. Amewo ate ŋu atrɔ. Woƒe agbenɔnɔ ate ŋu atrɔ. Apostolo Paulo ɖee fia be anya wɔ esi wòŋlɔ be: “Mitrɔ miaƒe nɔnɔme to miaƒe tamesusu ƒe yeyewɔwɔ me boŋ, bene miadzro nusi nye Mawu ƒe [lɔ̃lɔnu], si nyo, eye wòdzea eŋu nyuie, eye wòle blibo la me akpɔ.”—Romatɔwo 12:2.

Ðewohĩ nya si nye “Mawu ƒe lɔlɔ̃nu, si nyo” la aɖo ŋku nya si Yesu gblɔ na eƒe nusrɔ̃lawo ƒe 20 do ŋgɔ hafi Paulo va ŋlɔ nya siwo le etame la dzi na mí. Yesu gblɔ be: “Miadze si nyateƒe la, eye nyateƒe la lawɔ mi ablɔɖeviwoe.” (Yohanes 8:32) Numeɖeɖe—vevietɔ numeɖeɖe si ku ɖe Mawu ƒe lɔlɔ̃nu ŋu—si tso Mawu ƒe gbɔgbɔ me si ta wokpɔ na mí wòle Biblia me lae Yesu yɔ be “nyateƒe la.” (Yohanes 17:17) Ðe Biblia me nyateƒea te ŋu naa ablɔɖe amewo nyateƒea? Ðe agbe nɔnɔ ɖe Mawu ƒe lɔlɔ̃nu nu trɔa amewo ƒe agbenɔnɔ vavãa? Etrɔnɛ nyateƒe. Bu kpɔɖeŋu aɖewo ŋu kpɔ.

Tameɖoɖo Le Agbe Ŋu

Eteƒe medidi boo o la, ame makpɔdzidzɔ aɖee Moisés si le Gibraltar nye. Egblɔ be: “Ahamulae menye tsã eye memlɔa ablɔdzi. Mesusu be wɔna vɔ le ŋunye. Medoa gbe ɖa biaa Mawu zã ɖesiaɖe be wòakpɔ nublanui nam bene magakpe fu ŋkeke eveagbe o. Metsɔa avifafa biaa Mawu be nukata mele xexe sia me nenye be wɔna aɖeke mele ŋunye o, dɔ ge le asinye, ƒome mele asinye o, eye ame aɖeke meli akpe ɖe ŋunye o. Nukatae maganɔ agbe ɖo?” Tete nane va dzɔ.

Moisés yi edzi be: “Mekpɔe be Mawu se nye gbedodoɖa esime medo go Roberto si nye Yehowa Ðasefo. Roberto na Biblia kple Biblia-srɔ̃gbalẽ si nye Nukae Mawu Di tso Mía Si?a lam. Míesrɔ̃a Biblia ɖekae gbesiagbe le zikpui si dzi memlɔna ne zã do la dzi. Ɣleti ɖeka megbe la, Roberto kplɔm yi kpekpe le Yehowa Ðasefowo ƒe Fiaɖuƒe Akpata si le afima me. Medidi o Biblia me nyateƒea trɔ nye dzedzeme. Nyemegamlɔa ablɔdzi o; eye nyemeganɔa aha alo atama o. Nye agbenɔnɔ trɔ, eye dzi le dzɔyem. Mele mɔ kpɔm be mava xɔ nyɔnyrɔ kpuie eye masubɔ Yehowa anye eƒe Ðasefo.”

Tɔtrɔwɔwɔ ka gbegbee nye si! Zi geɖe ne mɔkpɔkpɔ bu ɖe amewo la, sidzedzee mesu wo si o tae. Womenya nu tso Mawu alo eƒe tameɖoɖo wɔnukuawo ŋu o. Le Moisés gome la, esi sidzedzea su esi la, edo ŋusẽe gana dzideƒoe be wòtrɔ eƒe agbenɔnɔ. Woɖo hakpala la ƒe gbedodoɖa na Mawu ŋu na Moisés be: “Ðo wò kekeli kple wò nyateƒe ɖa, ne woakplɔm ayi wò to kɔkɔe la kple wò nɔƒe la gbɔe.”—Psalmo 43:3.

Le Belize la, Daniel hã to nɔnɔme si ɖi ema me. Daniel memlɔa ablɔdzi o—dɔ si ŋu bubu le nɔ esi. Gake enɔ avu wɔm kple atikevɔ̃ɖizazã kple ahamumu eye enɔa agbe gbegblẽ hena ƒe 20 sɔŋ. Togbɔ be Katolikotɔe wònye tso ɖevime hã la, Daniel mese agbenɔnɔ gɔme o, eye meka ɖe edzi be Mawu li o. Ede sɔlemeha geɖe me nɔ kpekpeɖeŋu dim gake eva kpɔe be yeƒe xɔlɔ̃ sɔlemedelawo kple xɔlɔ̃ sɔlemehakplɔlawo aɖewo gɔ̃ hã zãa atike vɔ̃ɖiwo alo womua aha. Le ɣeyiɣi ma me la, srɔ̃a hã di be yeagbee.

Nu va glo Daniel wòyi dɔdaƒe be woakpe ɖe ye ŋu yeadzudzgɔ. Ke hã enya be ne woɖe asi le ye ŋu la, madidi o yeagadze atike vɔ̃ɖiwo zazã gɔme ne womekpe ɖe ye ŋu o. Gake kpekpeɖeŋu ka ƒomevie wòanye? Esi woɖe asi le eŋu tso dɔdaƒea ŋkeke eve megbe le May 1996 me la, ewɔ nuku na Yehowa Ðasefo aɖe esi Daniel te ɖe eŋu ɖe kuku be, “Tafletse srɔ̃ Biblia kplim sea.” Ðasefoa va wɔ ɖoɖo be yeasrɔ̃ Biblia kple Daniel zi eve le kwasiɖa me, eye medidi o Daniel va nɔ eƒe agbenɔnɔ trɔm ɖe Mawu ƒe lɔlɔ̃nu nu eye ɖe xɔlɔ̃ xoxoawo teƒe la, edze xɔ̃ Kristotɔ siwo mezãa atike vɔ̃ɖiwo loo alo mua aha o eye wotsri agbegbegblẽnɔnɔ la, Eya ta Daniel va kpɔe be nya si Biblia gblɔ nye nyateƒe be: “Ne èzɔ kple nunyalawo la, àdze nunya; ke ne ède ha kple bometsilawo la àzu ame gbegblẽ.” (Lododowo 13:20) Medidi o egblɔ be: “Zi gbãtɔe enye sia le nye agbe me si meva nya alesi wònɔna ne dzitsinya nyui le ame si.” Daniel hã ƒe agbenɔnɔ trɔ.

Le Puerto Rico la, ŋutsu aɖe hã ƒe nɔnɔme trɔ wòɖe dzesi. Gaxɔ mee wònɔ eye wobunɛ ame vɔ̃ɖi, elabena ewu ame gbogbo aɖewo. Ðe Biblia me nyateƒea ate ŋu atrɔea? Ẽ. Yehowa Ðasefo aɖe na Gbetakpɔxɔ kple Nyɔ! magazine ƒe ɖewoe, eye wògabia be woatsɔ bubuwo akpee na ye. Wodze Biblia-nusɔsrɔ̃ gɔme kplii, eye esi Biblia me nyateƒea va te dɔ wɔwɔ ɖe eƒe dzi dzi la, tɔtrɔ si wòwɔ la dze amesiame kpɔ. Alesi wòtrɔ ƒe dzesiawo dometɔ gbãtɔe nye be eƒo eƒe ɖa dzi eye wolũ eƒe ge wuya lae.

Biblia gblɔ be Mawu tsɔnɛ kena nuvɔ̃wɔla siwo trɔ dzime vavã hetrɔ woƒe agbenɔnɔ. Paulo ŋlɔ be: “Mienyae bena, ame madzɔmadzɔwo manyi mawufiaɖuƒe la ƒe dome oa?... Eye nenem mia dome ame aɖewo nɔ tsã; ke wole tsi na mi.” (1 Korintotɔwo 6:9, 11) Ðikeke mele o be nya siawo fa akɔ na ŋutsu sia, eye Dɔwɔwɔwo 24:15 hã fa akɔ nɛ, si gblɔ be: “Tsitretsitsi li na ame dzɔdzɔewo kple ame madzɔmadzɔwo siaa.” Egblɔ be: “Medi be manɔ afima esime amewo anɔ fɔfɔm ɖe tsitre bene mate ŋu abia tsɔtsɔke tso amesiwo mewu la si.”

Ƒome Yeye

Gbeɖeka woɖe ŋustsu aɖe si ƒe nya wɔ nublanui la fia Luis si nye Yehowa Ðasefo ɣeyiɣiwo katã ƒe nyanyuigblɔla le Argentina. Esi edzilawo gblẽe ɖi tso edziɣi ke la, vidzikpɔƒe geɖewoe nyii. Esi wòtsi xɔ ƒe 20 la, eva nya afisi dada le eye wòɖoe be yeava nɔ afisi te ɖe ye dada ŋu. Ewɔ dɔ veviedodotɔe dzra ga geɖe ɖo, eye wòzɔ mɔ yi du si me dadaa nɔ me. Dadaa na wònɔ egbɔ vaseɖe esime eƒe ga vɔ eye wògblɔ nɛ be wòadzo le ye gbɔ. Alesi wogbee alea na wòdi be yeawu ye ɖokui. Gake Luis va gblɔ Biblia me nyateƒea na ɖekakpui sia. Kakaɖedzinya sia hã le nyateƒea me be, ‘Ne fofonye kple danye gblẽm ɖi hã la, Yehowa axɔm.’ (Psalmo 27:10) Ðekakpuia va kpɔe be Fofo aɖe le ye si le dziƒo si magblẽ ye ɖi akpɔ gbeɖe o. Fifia enye dzidzɔ nɛ be yele ƒome yeye si nye Yehowa ƒe ƒome me.

Ŋutsu bubu aɖe si le dukɔ ma ke me gblɔ na Yehowa Ðasefo aɖe be Gbetakpɔxɔ magazinea dzɔa dzi na ye. Nukatae? Elabena edzra eƒe srɔ̃ɖeɖe me ɖo. Ewɔ abe esi ŋutsu sia nɔ dzodzom le dɔwɔƒe gbeɖeka la, ekpɔ Gbetakpɔxɔ magazine si dzi wotsɔ ŋɔŋlɔdzesi gagãwo ŋlɔ tanya si nye “Srɔ̃gbegbe” ɖo le gbelɔnu me ene. Esi wònye eƒe srɔ̃ɖeɖe ɖo nya me eye wo kple srɔ̃a wodze afɔɖeɖewo wɔwɔ gɔme hena kaklã ta la, etsɔ magazinea hedze exexlẽ gɔme. Etsɔe yi aƒemee eye woa kple srɔ̃a woxlẽe. Srɔ̃tɔawo dze agbagba be yewoawɔ ɖe Biblia me ɖaŋuɖoɖo siwo le magazinea me dzi. (Efesotɔwo 5:21-6:4) Eteƒe medidi o woƒe ƒomedodoa va ɖɔ ɖo. Wotɔ te kaklã ƒe afɔɖeɖeawo eye wonye srɔ̃tɔ wɔɖeka siwo le Biblia srɔ̃m ɖekae fifia.

Le Uruguay la, dzi aɖeke menɔ ŋutsu bubu aɖe si ŋkɔe nye Luis dzɔm o. Atikevɔ̃ɖizazã, gbɔgbɔyɔyɔ, trɔ̃subɔsubɔ, ahatsunono—nusiawoe nye nusiwo na eƒe agbenɔnɔ tɔtɔ la dometɔ aɖewo. Mlɔeba esi dzi ɖe Luis ƒo keŋkeŋ la, eva zu mawudzimaxɔsela. Exɔlɔ̃ aɖe tsɔ agbalẽ si nye Life—How Did It Get Here? By Evolution Or By Creation?b nae. Nusia na kadodo va nɔ wo kple Yehowa Ðasefowo dome ɣeyiɣi kpuie aɖe ko, gake Luis gava dze ahanono kple atike vɔ̃ɖiwo zazã gɔme. Esi wòxaxa eye wòkpɔ be yeva nɔ anyi ɖe do aɖe si me gbeɖuɖɔ yɔ fũ me la, edo gbe ɖa na “Yesu Kristo fofo,” le esi menya Mawu ƒe ŋkɔ o ta.

Ebia Mawu be ne susu aɖe li si ta yele xexeame la, nefia ye. Luis ka nya ta be: “Le ŋufɔke tututu la, ame nyanyɛ aɖe tsɔ agbalẽ aɖe si megahiãe o la nam. Ènya eƒe tanya? Enye Nyaɖeɖefia—Etaƒoƒo Keŋkeŋ La Ðo Vɔ!c” Agbalẽa kpe ɖe eŋu wòɖo eƒe biabiaa ŋu. Luis gado gbe ɖa be woakpe ɖe ye ŋu yeakpɔ subɔsubɔha si afia alesi yeasubɔ Mawui la ye. Nukunu kae nye esi! Eƒe agbonuga ɖi, eye Yehowa Ðasefo eve aɖewoe nye si tɔ ɖe xexe. Wodze Biblia sɔsrɔ̃ gɔme kple Luis enumake. Ewɔ ŋgɔyiyi kabakaba eye ekpɔe fifia be yayra wònye be yenye Ðasefo xɔnyɔnyrɔ. Enɔa agbe nyui eye ele kpekpem ɖe ame bubuwo ŋu be tameɖoɖo nanɔ woawo hã ƒe agbe ŋu. Nya siwo le Psalmo 65:3 va eme nɛ, be: “Èɖoa to gbedodoɖa, gbɔwòe ŋutilãwo katã woayi.”

Le Philippines la, sukuviwo ƒe nyataʋlilae Allan nye tsã. Enɔ habɔbɔ aɖe si ƒe taɖodzinue nye “be woaɖe dziɖuɖua ɖa bene megbeviwo nanɔ agbe sɔsɔminasɔe” la me. Gake gbeɖeka Yehowa Ðasefowo do goe eye esrɔ̃ tame si Mawu ɖo le ameƒomea ŋu le Biblia me. Ŋugbedodo sia hã si tso gbɔgbɔ me la le tameɖoɖoa me be: “Ekpɔtɔ vie ko ame vɔ̃ɖi la maganɔ anyi o... Ke ame ɖihiãwo anyi anyigba la dome, eye dzi adzɔ wo ɖe ŋutifafa gbogbo la ŋuti.” (Psalmo 37:10,11) Allan gblɔ be: “Medidi o meva kpɔe be wodo nusi ta ʋlim míaƒe habɔbɔa nɔ la ƒe ŋugbe le Biblia me xoxoxo. Woana nusiwo katã nɔ mía dzrom vevie la mí le Mawu ƒe Fiaɖuƒea me.” Mawu Fiaɖuƒea ƒe akpa dzie Allan le fifia eye ele kpekpem ɖe ame bubuwo ŋu be woaxɔ Biblia me nyateƒea dzi ase.

Ẽ, amewo ƒe agbenɔnɔ trɔna ne wowɔ ɖe Mawu ƒe Nya, Biblia me nyateƒea dzi. Nyateƒee, ɣeyiɣi gbɔna esime ameƒomea me tɔ siwo katã aganɔ agbe la atrɔ woƒe agbenɔnɔ wòasɔ ɖe Mawu ƒe lɔlɔ̃nu nu. Tɔtrɔwɔwɔ ka gbegbee nye si wòanye! Nyagblɔɖia ava eme ɣemaɣi be: “Womawɔ vɔ̃ aɖeke o, eye womahe gbegblẽ ava nye tonyigba kɔkɔe blibo la dzi o; elabena sidzedze Yehowa xɔ anyigba la dzi abe alesi tsi yɔ atsiaƒu me ene.”—Yesaya 11:9.

[Etenuŋɔŋlɔwo]