Miyi Edzi Miazɔ Kple Mawu
“Mizɔ le [gbɔgbɔ] me, eye miele ŋutilã ƒe nudzodzro dzi wɔ ge o.”—GALATIATƆWO 5:16.
1. (a) Nɔnɔme kawo mee Henox zɔ kple Mawu le eye vaseɖe ɣeyiɣi didi ka? (b) Ɣeyiɣi didi kae Noa zɔ kple Mawu, eye agbanɔamedzi kpekpe kawoe nɔ edzi?
BIBLIA gblɔ na mí be Henox ‘yi edzi zɔ kple Mawu vavã la.’ Togbɔ be amesiwo dome wònɔ la gblɔa nya ƒaƒãwo eye wonɔa agbe vlo hã la, eyi edzi zɔ kple Mawu vaseɖe eƒe kugbe esime wòtsi xɔ ƒe 365. (Mose I, 5:23, 24; Yuda 14, 15) Noa hã ‘zɔ kple Mawu vavã la.’ Enɔ edzi nenema esime wònɔ eƒe ƒome dzi kpɔm, ganɔ akɔ kpem kple xexe si me tɔwo dzi mawudɔla dzeaglãwo kple woƒe dzidehlɔ̃mevi sẽŋutawo kpɔ ŋusẽ ɖo, eye wòganɔ dɔ sia dɔ si hiã le aɖakaʋu gã si lolo wu blema tɔdzideʋu ɖesiaɖe ŋu la wɔm. Eyi edzi zɔ kple Mawu le Tsiɖɔɖɔa megbe, esime wogadze aglã ɖe Yehowa ŋu ake le Babel gɔ̃ hã. Le nyateƒe me la, Noa yi edzi zɔ kple Mawu vaseɖe esime wòxɔ ƒe 950 le eƒe kugbe.—Mose I, 6:9; 9:29.
2. Nukae ‘zɔzɔ kple Mawu’ fia?
2 Esi Biblia gblɔ be ŋutsu siawo “zɔ” kple Mawu la, kpɔɖeŋunya gblɔm wòle. Efia be Henox kple Noa nɔ agbe si ɖo kpe edzi be woxɔ Mawu dzi se vevie. Wowɔ dɔ si Yehowa de wo si eye wonɔ agbe wòsɔ ɖe alesi wonya be ewɔa nu kple ameƒomea la nu. (Tsɔe sɔ kple Kronika II, 7:17.) Menye susu me koe woda asi ɖe nusi Mawu gblɔ eye wòwɔ dzi le o ke wowɔ nusianu si wòbia tso wo si—menye wo dometɔ aɖewo ko o ke wowɔ nusianu si wo amegbetɔ madeblibowo ate ŋu awɔ ko. Aleae le kpɔɖeŋu me, Noa wɔ alesi Mawu de se nɛ la pɛpɛpɛ. (Mose I, 6:22) Noa mewɔa nusiwo ƒe se womede nɛ o, eye meŋea aɖaba ƒua dɔ dzi nɔa megbelele hem o. Enɔ zɔzɔm kple Mawu le esi ƒomedodo kplikplikpli nɔ wo kple Yehowa dome, wòte ŋu doa gbe ɖa na Mawu faa eye mefena le mawumemɔfiafia ŋu o ta. Èle nu ma wɔma?
Enye Agbenɔnɔ si Metsia Mɔ Ta O
3. Nukae le vevie ŋutɔ na amesiwo katã nye Mawu subɔla ɖeadzɔgbe xɔnyɔnyrɔwo?
3 Dzidzɔnyae wònyena ne míekpɔ be amewo dze zɔzɔ kple Mawu gɔme. Ne wole afɔɖeɖe nyuiwo wɔm wòsɔ ɖe Yehowa ƒe lɔlɔ̃nu nu la, enye xɔse si ne mele ame si o mate ŋu adze Mawu ŋu o la ɖeɖe fia. (Hebritɔwo 11:6) Aleke míetsoa aseye enye si be ƒe sia ƒe, le ƒe atɔ̃ siwo va yi me le mamã dedie nu la, ame 320,000 kple edzivɔ tsɔa wo ɖokui ɖea adzɔgbe na Yehowa hexɔa nyɔnyrɔ ɖe tsi me! Gake ele vevie na woawo kple mí katã be míayi edzi anɔ zɔzɔm kple Mawu.—Mateo 24:13; Nyaɖeɖefia 2:10.
4. Togbɔ be Israel-vi siwo dzo le Egipte ɖe xɔse fia vaseɖe afi aɖe hã la, nukata wo dometɔ akpa gãtɔ meɖo Ŋugbedodonyigba la dzi o?
4 Le Mose ŋɔli la, ebia xɔse hafi Israel-ƒome naɖu Ŋutitotoa le Egipte eye woasisi ʋu ɖe woƒe aƒe ƒe ʋɔtrutiawo kple etame tɔ ŋu. (Mose II, 12:1-28) Gake wo dometɔ geɖe ƒe xɔse ʋuʋu esime wokpɔ be Farao ƒe aʋakɔ te tu wo vɔ le Ƒudzĩa nu. (Mose II, 14:9-12) Psalmo 106:12 ɖee fia be esi wozɔ to ƒugoa me le anyigba ƒuƒui dzi dedie eye wokpɔ ƒutsotsoeawo tsrɔ̃ Egipte-ʋakɔa vɔ la, ‘wogaxɔ Yehowa ƒe nyawo dzi se’ ake. Gake esi woɖo gbeadzi eteƒe medidi o la, Israel-viawo va nɔ nyatoƒoe tom le tsinono, nuɖuɖu, kple wo dzi kpɔkpɔ ŋu. Nyatakaka vɔ̃ si ŋkutsala 12 dometɔ 10 tsɔ tso Ŋugbedodonyigba la dzi gbɔe la na wovɔ̃. Le nɔnɔme mawo me abe alesi Psalmo 106:24 gblɔe ene la, “womexɔ [Mawu ƒe] nyawo dzi se o.” Wodi be yewoagatrɔ ayi Egipte. (Mose IV, 14:1-4) Ne wokpɔ Mawu ƒe ŋusẽ ƒe ɖeɖefia wɔnukuwo teƒe ko hafi xɔse si le wo si la dzena. Womeyi edzi nɔ zɔzɔm kple Mawu o. Ewɔe be Israel-vi mawo mege ɖe Ŋugbedodonyigba la dzi o.—Psalmo 95:10, 11.
5. Aleke Korintotɔwo II, 13:5 kple Lododowo 3:5, 6 do ƒome kple zɔzɔ kple Mawui?
5 Biblia xlɔ̃ nu mí be: “Mite mia ɖokui kpɔ, abe ɖe miele xɔse me ene; mido mia ɖokui kpɔ!” (Korintotɔwo II, 13:5) ‘Xɔse me nɔnɔ’ fia Kristotɔwo ƒe dzixɔsewo katã me léle ɖe asi. Nusia le vevie ŋutɔ hafi míate ŋu azɔ kple Mawu le míaƒe agbemeŋkekewo katã me wòadze edzi. Bene míazɔ kple Mawu la, ele hã be xɔse ɖeɖefia ƒe nɔnɔme nanɔ mía si, eye míaɖo ŋu ɖe Yehowa ŋu bliboe. (Lododowo 3:5, 6) Gbɔdzɔgbɔdzɔ kple mɔ̃ gbogbo aɖewo li siwo ate ŋu aɖe amesiwo doa kpo nu mawo wɔwɔ. Wo dometɔ aɖewo ɖe?
Ƒo Asa na Kakaɖeameɖokuidzi ƒe Mɔ̃ La
6. Nukae Kristotɔwo katã nya le ahasiwɔwɔ kple matrewɔwɔ ŋu, eye aleke wosena le wo ɖokui me le nuvɔ̃ siawo ŋu?
6 Amesiame si srɔ̃ Biblia, tsɔ eƒe agbe ɖe adzɔgbe na Yehowa, eye wòxɔ nyɔnyrɔ la nya be Mawu ƒe Nya tsri ahasiwɔwɔ kple matrewɔwɔ. (Tesalonikatɔwo I, 4:1-3; Hebritɔwo 13:4) Amesiawo lɔ̃ ɖe edzi be enyo nenema. Woɖoe be yewoanɔ agbe ɖe enu. Gake gbɔdɔdɔ ƒe agbegbegblẽnɔnɔ ganye Satana ƒe mɔ̃ si wɔa dɔ nɛ kokoko. Nukatae?
7. Aleke Israel-ŋutsuwo wɔ va nɔ agbe si wonya be menyo o la le Moab Tagbae?
7 Amesiwo nɔa agbe gbegblẽ alea la meɖoe gbã be yewoawɔe hafi o. Ðewohĩ nenemae wònɔ le Israel-vi siwo nɔ Moab Tagba la hã gome. Ðewohĩ Israel-ŋutsu siwo gbeadzinɔnɔ ti kɔ na la asusu gbã be ɖe Moab kple Midian nyɔnu siwo va nɔ wo blem la nye xɔlɔ̃wɔlawo kple amedzrowɔlawo. Gake nukae va dzɔ esi Israel-viawo lɔ̃ yi ɖade ha kple amesiwo subɔa Baal ke menye Yehowa o, amesiwo ɖea mɔ na wo vinyɔnuwo (esiwo tso ƒome ŋkutawo me gɔ̃ hã) be woadɔ kple ŋutsu siwo menye wo srɔ̃wo o? Esi hadede mawo va nɔ Israel-ŋutsuwo ŋu nyom la, edzro wo wowɔ nusiwo wonya be menyo o, eye woku le nusia ta.—Mose IV, 22:1; 25:1-15; 31:16; Nyaɖeɖefia 2:14.
8. Le míaƒe ŋkekea me la, nukae ate ŋu akplɔ Kristotɔ ade gbɔdɔdɔ ƒe agbegbegblẽnɔnɔ me?
8 Nukae ate ŋu ana mɔ̃ ma tɔgbe naɖe ame le míaƒe ŋkekea me? Togbɔ be amea anya be gbɔdɔdɔ ƒe agbegbegblẽnɔnɔ nye ŋkubiãnya hã la, ne menya afɔku si le kakaɖeameɖokuidzi me hã o la, ate ŋu ade eɖokui nɔnɔme aɖe si ana nuvɔ̃ɖiwɔwɔ ƒe dzodzro naɖu eƒe tamebubu dzi la me.—Lododowo 7:6-9, 21, 22; 14:16.
9. Ŋɔŋlɔawo me nuxlɔ̃me kawoe ate ŋu akpɔ mía ta tso agbegbegblẽnɔnɔ me?
9 Mawu ƒe Nya xlɔ̃ nu mí eme kɔ be míagaflu mía ɖokui asusu be ŋusẽ le mía ŋu ale gbegbe be hadede vɔ̃wo magblẽ mí o. Nusiawo dometɔ aɖewo nye television dzi nuwɔna siwo me woɖea agbegbegblẽnɔlawo le kpakple magazine siwo nyɔa dzodzro vɔ̃wo ɖe ame me la me kpɔkpɔ. (Korintotɔwo I, 10:11, 12; 15:33) Hadede kple haxɔsetɔwo gɔ̃ hã le nɔnɔme manyomanyowo me ate ŋu ahe mí ade afɔku gãwo me. Dzodzro si le ŋutsu kple nyɔnu dome nu sẽ. Eyatae Yehowa ƒe habɔbɔa tsɔa ɖetsɔleme xlɔ̃a nu mí lɔlɔ̃tɔe be mía kple ŋutsu alo nyɔnu si menye mía srɔ̃ loo alo ƒometɔ o míagaɖe ɖe vovo aɖanɔ ɣaɣlaƒe o. Bene míayi edzi anɔ zɔzɔm kple Mawu la, ele be míatsri kakaɖeameɖokuidzi ƒe mɔ̃ la eye míawɔ ɖe nuxlɔ̃me ƒe aɖaŋu siwo wònaa mí la dzi.—Psalmo 85:9.
Mègana Amegbetɔvɔvɔ̃ Naɖu Dziwò O
10. Aleke “amegbetɔvɔvɔ̃” nye mɔ̃ ɖea amee?
10 Wotɔ asi afɔku bubu aɖe dzi le Lododowo 29:25, afisi gblɔ be: “Amegbetɔvɔvɔ̃ mɔ̃e wònye ɖea ame.” Zi geɖe la, adela ƒe mɔ̃ nyea kamɔ̃e si wosa kɔe eye wòmiaa ve na lã alo ka si lea afɔ na lã. (Hiob 18:8-11) Amegbetɔvɔvɔ̃ hã ate ŋu axe mɔ na ame be magate ŋu aƒo nu faa alo awɔ nusi adze Mawu ŋu o. Enyo be woadi be woadze amewo ŋu, eye medze Kristotɔ be wòatsɔ dzimesesẽ agbe bubudede nusi ame bubuwo susu ŋu o. Gake ehiã be woada asɔ. Ne ame aɖe tsi dzi ɖe alesi amegbetɔ bubuwo awɔ nui ŋu ale be wòva wɔ nusi Mawu tsri alo wògbe se si Mawu ƒe Nya la de dzi wɔwɔ la, ke mɔ̃ ɖe amea.
11. (a) Nukae ate ŋu akpɔ ame ta bene wòagaɖe mɔ amegbetɔvɔvɔ̃ naɖu edzi o? (b) Aleke Yehowa kpe ɖe esubɔla siwo amegbetɔvɔvɔ̃ ɖea fu na ŋui?
11 Menye ame ŋutɔ ƒe nɔnɔme si wòdzɔ kplii ye akpɔ eta tso mɔ̃ ma si me o, ke ‘ŋuɖoɖo ɖe Yehowa ŋu’ boŋ ye. (Lododowo 29:25b) Ne amesi kpea ŋu kura gɔ̃ hã ɖo ŋu ɖe Mawu ŋu la, dzi ate ŋu aɖo eƒo eye maʋuʋu o. Zi alesi Satana ƒe nuɖoanyi sia ƒe nyaƒoɖeamenuwo ɖe to ɖe mí ko la, ahiã be míanɔ ŋudzɔ ɖe amegbetɔvɔvɔ̃ si nye mɔ̃ si ɖea ame ŋu. Togbɔ be wonya Eliya be esubɔ dzideƒotɔe hã la, esi Izebel do ŋɔdzi nɛ be yeana woawui la, vɔvɔ̃ ɖoe wòsi dzo. (Fiawo I, 19:2-18) Esi woyɔ ʋu ɖe apostolo Petro nu la, vɔvɔ̃ na wòsẽ nu be yemenya Yesu Kristo o, eye le ƒe aɖewo megbe eɖe mɔ vɔvɔ̃ ɖoe wòwɔ nusi tsi tre ɖe xɔse ŋu. (Marko 14:66-71; Galatiatɔwo 2:11, 12) Gake Eliya kple Petro siaa lɔ̃ xɔ gbɔgbɔmekpekpeɖeŋu eye esi woɖo ŋu ɖe Yehowa ŋu la, woyi edzi subɔ Mawu wòdze eŋu.
12. Egbegbe kpɔɖeŋu kawoe li siwo fia alesi wokpe ɖe amewo ŋu be womena vɔvɔ̃ wɔe be wogbe nusi dze Mawu ŋu wɔwɔ o?
12 Yehowa subɔla siwo le míaƒe ŋkekea me dometɔ geɖe hã srɔ̃ alesi woaɖu vɔvɔ̃ si nye mɔ̃ si ɖea ame la dzi. Ðasefo ƒewuivi aɖe si le Guyana gblɔ be: “Hatiwo ƒe nyaƒoɖeamenu dzi ɖuɖu le suku sesẽ.” Gake nyɔnuvia gagblɔ be: “Nenemae mesẽ ŋu le Yehowa dzixɔxɔse hã mee.” Esi woƒe nufiala ɖu fewu le eŋu le klass bliboa ŋkume le eƒe xɔse ta la, edo gbe ɖa na Yehowa le tame. Emegbe eɖi ɖase na nufiala la ŋuɖɔɖotɔe esi woawo ɖeɖe woli. Esi ɖekakpui aɖe si nɔ nu srɔ̃m tso Yehowa ƒe nudidiwo ŋu ɖi tsa yi wo dedu me le Benin la, eɖoe kplikpaa be yeagblẽ legba aɖe si fofoa wɔ nɛ dome. Ðekakpuia nya be agbe mele legba la me o, eye mevɔ̃ nɛ hã o, gake enya be kɔƒea me tɔ siwo me dziku aɖo la ate kpɔ be yewoawu ye. Edo gbe ɖa na Yehowa, eye le zãme etsɔ legba la yi gbeme hetsɔe ƒu gbe. (Tsɔe sɔ kple Ʋɔnudrɔ̃lawo 6:27-31.) Esi nyɔnu aɖe si le Dominican Republic dze Yehowa subɔsubɔ gɔme la, srɔ̃a gblɔ nɛ be wòatia ye loo alo Yehowa. Ŋutsua do ŋɔdzi nɛ be yeagbee. Ðe vɔvɔ̃ ana wòaɖe asi le eƒe xɔse ŋua? Eɖo eŋu be: “Ne ŋutsu bubu gbɔe mede la, ke ŋu akpem, gake ŋu makpem le Yehowa Mawu subɔsubɔ ta o!” Eyi edzi nɔ zɔzɔm kple Mawu, eye le ɣeyiɣi aɖe megbe la, srɔ̃a va kpe ɖe eŋu wole Yehowa ƒe lɔlɔ̃nu wɔm. Ne míeɖo ŋu ɖe mía Fofo si le dziƒo ŋu bliboe la, míawo hã míaɖe mɔ amegbetɔvɔvɔ̃ nawɔe be míagbe nusi míenya be edzea Yehowa ŋu wɔwɔ o.
Mègabu Aɖaŋuɖoɖo Nu Tsɛe O
13. Mɔ̃ ka ŋue woxlɔ̃ nu mí le le Timoteo I, 6:9?
13 Togbɔ be adelawo ɖoa mɔ̃ aɖewo kple susu be woaɖe lã ɖesiaɖe si ava to teƒea hã la, wotrea mɔ̃ aɖewo tsɔa mɔ̃gbɔɖonu si dzroa lãwo la flua woe. Nenemae kesinɔnuwo le le ame geɖe gome. (Mateo 13:22) Biblia de dzi ƒo na mí le Timoteo I, 6:8, 9 be nunyiame kple avɔtata nadze mía ŋu. Eyome exlɔ̃ nu be: “Amesiwo dina be, yewoazu kesinɔtɔwo la, gena ɖe tetekpɔwo kple mɔ̃tetrewo kpakple movidzɔdzɔ kple nuveviwɔame ƒe nudzodzro geɖe, siwo tsɔa amewo xlãna ɖe gbegblẽ kple tsɔtsrɔ̃ me la me.”
14. (a) Nukae ate ŋu awɔe be woagbe aɖaŋu si woɖo be woana nunyiame kple avɔtata nadze ame ŋu la dzi wɔwɔ? (b) Aleke nusi woabu vodadatɔe be woawoe nye kesinɔnuwo la ana woabu aɖaŋu si woɖo le Timoteo I, 6:9 la nu tsɛe? (d) Mɔ ka nue “ŋkuwo ƒe ŋubiabiã” awɔe le be ame aɖewo naŋe aɖaba aƒu mɔ̃ si le wo lalam dzi?
14 Togbɔ be woxlɔ̃ nu alea hã la, mɔ̃ ɖea ame geɖe le esi wometsɔa aɖaŋuɖoɖoa wɔa dɔe o ta. Nukatae? Ðe wòanye be dadae le wo ʋãm be woayi edzi avu ɖe agbenɔnɔ ƒomevi aɖe si bia be woadi nusi sɔ gbɔ wu “nunyiame kple avɔtata” si Biblia de dzi ƒo na mí be woadze mía ŋu la ŋua? Ðe wòanye be nusiwo le gatɔ gagãwo sie wobuna be woawoe nye kesinɔnuwo tae ɖewohĩ wobua Biblia ƒe nuxlɔ̃mea nu tsɛea? Nusi ko Biblia ɖe gblɔe nye vovototo si le tameɖoɖo kplikpaa be yeazu kesinɔtɔ kpakple ŋudzedzekpɔkpɔ ɖe nunyiame kple avɔtata ŋu dome. (Tsɔe sɔ kple Hebritɔwo 13:5.) Ðe “ŋkuwo ƒe ŋubiabiã”—didi be nusiwo ŋku kpɔna nasu ame si, ne woatsɔ gbɔgbɔmedɔwo asa vɔe gɔ̃ hã—wɔnɛ be wotsɔa tadedeagu vavãtɔ ƒe nudidiwo ɖoa nɔƒe evelia? (Yohanes I, 2:15-17; Xagai 1:2-8) Aleke gbegbe amesiwo wɔna ɖe Biblia ƒe aɖaŋuɖoɖoa dzi le nyateƒe me eye wozɔna kple Mawu to Yehowa ƒe subɔsubɔ wɔwɔ nu vevitɔ le woƒe agbe me la kpɔa dzidzɔe nye si!
Tenɔnɔ Ðe Agbemedzimaɖitsitsiwo Nu Dzidzedzetɔe
15. Nɔnɔme kawo ŋue gɔmesese le be wonaa Yehowa subɔla geɖe tsia dzimaɖi, eye mɔ̃ ka ŋue wòle be míanɔ ŋudzɔ ɖo ne nu te ɖe mía dzi nenema?
15 Dzitsitsi ɖe agbemenuhiahiãwo ƒe amesisusu ŋu bɔ wu tameɖoɖo kplikpaa be woazu kesinɔtɔ. Nunɔamesi ʋee aɖewo koe le Yehowa subɔla geɖe si. Wowɔa dɔ sesẽ gaƒoƒo geɖe bene awudodo suetɔ kekeake, afisi woƒe ƒomea amlɔ le zã me, kple nusi woaɖu ŋkeke ɖeka teti nasu yewo si. Ame bubuwo tsoa hloloe le kuxiwo ŋu le woa ŋutɔwo alo ƒomea me tɔ aɖewo ƒe lãmegbegblẽ alo tsitsi ta. Aleke gbegbe wòate ŋu anɔ bɔbɔe be woaɖe mɔ nɔnɔme siawo naxe mɔ ɖe gbɔgbɔmenuwo yomenɔnɔ le woƒe agbe me nue nye si!—Mateo 13:22.
16. Aleke Yehowa kpena ɖe mía ŋui be míanɔ te ɖe agbe me nuteɖeamedziwo nu?
16 Lɔlɔ̃tɔe la, Yehowa gblɔ gbɔdzɔe si míava kpɔ le Mesia Fiaɖuƒea me la na mí. (Psalmo 72:1-4, 16; Yesaya 25:7, 8) Azɔ etoa aɖaŋu siwo wòɖona na mí le alesi míana míaƒe taɖodzinuwo nato mɔ ɖekae dzi kpena ɖe mía ŋu be míanɔ te ɖe nuteɖeamedziwo nu fifia. (Mateo 4:4; 6:25-34) Yehowa toa nuŋlɔɖi siwo li ku ɖe alesi wòkpe ɖe eƒe blema subɔlawo ŋu dzi na dzi ɖoa mía ƒo. (Yeremya 37:21; Yakobo 5:11) Ena ŋusẽ nɔa mía ŋu esi míenyae be fukpekpe ka kee va mía dzi o, lɔlɔ̃ si le esi na esubɔla wɔnuteƒewo nu metsina o. (Romatɔwo 8:35-39) Yehowa gblɔ na amesiwo ɖoa ŋu ɖe eŋu be: “Nyemele asi ɖe ge le mia ŋu o, eye nyemele mia gblẽ ge ɖi akpɔ o.”—Hebritɔwo 13:5.
17. Gblɔ kpɔɖeŋu aɖewo siwo fia alesi ame aɖewo te ŋu yi edzi zɔ kple Mawu esi wonɔ fukpekpe sesẽwo me tom gɔ̃ hã.
17 Nusia nyanya doa ŋusẽ nyateƒe Kristotɔwo ale be woyia edzi zɔna kple Mawu tsɔ wu be woatrɔ ɖe xexemenuwɔnawo ŋu. Nukpɔsusu si bɔ ɖe ame dahewo dome le dukɔ geɖe mee nye be menye fi ye wònye be nàtsɔ amesi si nuwo sɔ gbɔ ɖo ƒe nu bene nàtsɔ anyi wò ƒomea o. Gake amesiwo zɔna le xɔse me gbe nya ma. Wobua ŋudzedze si Mawu akpɔ ɖe wo ŋu wu nusianu eye wokpɔa esinu be wòaɖo yewoƒe anukwareɖiɖi teƒe na yewo. (Lododowo 30:8, 9; Korintotɔwo I, 10:13; Hebritɔwo 13:18) Ahosi aɖe si le India kpɔe be lɔlɔ̃ be yeawɔ dɔ kple be yeate dɔ sia dɔ kpɔ la wɔe be yete ŋu le nuwo me tom. Le esi teƒe be wòado dɔmedzoe le nusiwo me tom wòle le agbe me ta la, edze sii boŋ be, ne yetsɔ Mawu Fiaɖuƒea kple eƒe dzɔdzɔenyenye ɖo nɔƒe gbãtɔ le yeƒe agbe me la, Yehowa ayra yeƒe agbagbadzedzewo bene nusiwo hiã ye kple ye viŋutsua nasu ye si. (Mateo 6:33, 34) Ame akpe geɖe siwo le xexeame godoo ɖee fia be fukpekpe ka kee va yewo dzi o, Yehowae nye yewoƒe sitsoƒe kple mɔ̃ sesẽ. (Psalmo 91:2) Nenemae wòle le gowòmea?
18. Nukae akpe ɖe mía ŋu be míaƒo asa na Satana ƒe xexeame ƒe mɔ̃wo?
18 Zi alesi míegale fifi nuɖoanyia me ko la, mɔ̃wo akpɔtɔ anɔ anyi siwo míaƒo asa na. (Yohanes I, 5:19) Biblia tɔ asi wo dzi eye wòfia alesi míaƒo asa na woe la mí. Amesiwo lɔ̃ Yehowa le nyateƒe me eye vɔvɔ̃ nyui le wo me be yewomada eƒe se dzi o la, ate ŋu akpe akɔ kple mɔ̃ siawo dzidzedzetɔe. Ne ‘woyi edzi le zɔzɔm le gbɔgbɔ me’ la, womana xexeame ƒe mɔwo naɖu wo dzi o. (Galatiatɔwo 5:16-25) Zɔzɔ kple Mawu, kple eƒe xɔlɔ̃ veviwo nyenye tegbee ye nye mɔkpɔkpɔ wɔnuku si le ŋgɔ na amesiwo katã nɔa agbe anukwareɖiɖitɔe be ƒomedodo nanɔ yewo kple Yehowa dome.—Psalmo 25:14.
Nya Kae Nàgblɔ?
◻ Aleke kakaɖeameɖokuidzi ate ŋu anye mɔ̃e?
◻ Nukae ate ŋu akpɔ mía ta be amegbetɔvɔvɔ̃ nagaɖu mía dzi o?
◻ Nukae ate ŋu ana míado kpo aɖaŋu si woɖo le afɔku si le kesinɔnuwo yomenɔnɔ ŋu la dzi wɔwɔ?
◻ Nukae ate ŋu akpe ɖe mía ŋu be míagana dzimaɖitsitsi le agbe ŋu nazu mɔ̃ aɖe mí o?
[Nɔnɔmetata si le axa 16]
Ame geɖe yi edzi le zɔzɔm kple Mawu le woƒe agbemeŋkekewo katã me