Ŋusẽdodo Míaƒe Mawu ƒe Nya la Dzixɔxɔse
AME geɖe wu xlẽ Biblia wu agbalẽ bubu ɖesiaɖe. Gake ame nenie ɖee fia be yewoxɔ emenyawo dzi se? Biblia ŋutɔ ɖe nu me be “menye amewo katã si xɔse la le o.” (Tesalonikatɔwo II, 3:2) Eme kɔ ƒã be womedzi mí kple xɔse o. Nue wònye wòle be míatu ɖo. Mele be amesiwo si xɔse agbɔsɔsɔme aɖe le gɔ̃ hã natsɔe be enye nu le yewo si ko evɔ o. Nu ate ŋu agblẽ le xɔse ŋu wòaku. Eyata ebia agbagbadzedze hafi míate ŋu ayi edzi ‘anɔ blibo le xɔse me.’—Tito 2:2.
Le esia ta susu nyui aɖe le eme be Yehowa Ðasefowo ƒe Dziɖuha la tia tanya si nye “Mawu ƒe Nya Dzixɔxɔse” na woƒe ƒe 1997/98 nutome gã takpekpewo. Ena Ðasefo miliɔn geɖe kple ame bubuwo kpɔ mɔnu kpe ta be woatsɔ ado ŋusẽ woƒe Mawu ƒe Nya la dzixɔxɔsee.
Mawu ƒe Nya la Nye Nyateƒe—Eya Dzie Míetu Míaƒe Xɔse Ðo
Esiae nye takpekpea ƒe ŋkeke gbãtɔ ƒe tanya. Wokafu vavalawo katã tsɔ dze egɔmee. Takpekpea vava nye kpeɖodzi be wodea bubu Biblia ŋu. Ke hã wobia nya siwo bia tamebubu tso míaƒe xɔse ƒe nyonyome ŋu be: ‘Ðe míete ŋu yɔa nya tso Mawu ƒe Nya la me tsɔ ʋlia míaƒe dzixɔsewo taa? Ðe míebua gbɔgbɔmenuɖuɖua nu xɔasii, eye míebua Biblia, hamea ƒe kpekpewo, kple Biblia-srɔ̃gbalẽwo nu tsɛwoe oa? Ðe míele tsitsim le lɔlɔ̃, sidzedze vavãtɔ, kple gɔmesese mea?’ Nuƒola la de dzi ƒo na amesiame be wòaɖo to nyuie, eye wògblɔ be “wotrɔ asi le ‘Mawu ƒe Nya Dzixɔxɔse’ Nutome Gã Takpekpe sia ŋu be woatsɔ akpe ɖe mía ŋu be míado mía ɖokui kple xɔse agbɔsɔsɔme si le mía dometɔ ɖesiaɖe si kple eƒe nyonyome akpɔ.”
Nuƒo tɔxɛa ƒe tanyae nye “Zɔzɔ le Xɔse me, Menye le Nukpɔkpɔ nu O.” (Korintotɔwo II, 5:7) Nuƒolaa gblɔ be: “Menye nusianu ko dzixɔxɔse bɔbɔe dzie amesiwo zua Yehowa Ðasefowo ƒe xɔse nɔ te ɖo o.” Aleke gbegbe esia nye nyateƒee nye si! Xɔse akuakua mexɔa nusianu ko dzi sena o. Nu ŋutɔŋutɔwo dzie wotui ɖo. Hebritɔwo 11:1 gblɔ be: “Xɔse enye dziɖoɖo ɖe nusiwo wokpɔ mɔ na ŋu kple kaka ɖe nusiwo womekpɔna o la dzi.” Nuƒolaa de dzesii be: “Ne míazɔ le xɔse me vavã la, ke ele be xɔse si wotu ɖe gɔmeɖokpe vavã dzi nanɔ mía si.” Esi wònye xɔse mee míezɔna le, menye le nukpɔkpɔ nu o ta la, míehiã alesi Yehowa ana eƒe tameɖoɖo ƒe akpa sia akpa nava emee kple ɣeyiɣi si me woava eme ŋuti numeɖeɖe tsitotsitowo o. Nusi míenya le eyama ŋu xoxo na kakaɖedzi blibo mí be ate ŋu ana eƒe tameɖoɖowo nava eme le lɔlɔ̃ kple dzɔdzɔenyenye me.
Nuƒo si ƒe tanyae nye “Kristotɔ Sɔhɛwo—Wonye Hamea ƒe Akpa Vevi Aɖe” ɖo ŋku alesi gbegbe sɔhɛwo xɔ asi na Yehowa la dzi na wo. Wode dzi ƒo na wo be woati taɖodzinuwo abe Biblia bliboa xexlẽ kple adzɔgbeɖeɖe kpakple nyɔnyrɔxɔxɔ ƒe nudidiwo gbɔ ɖoɖo me atsi le gbɔgbɔ me. Sukudede akpee nye woawo ŋutɔ woƒe nyametsotso si woawɔ kple wo dzilawo, gake ne woagadee akpee la, ele be wòanye kple taɖodzinu be wòakpe ɖe wo ŋu be woasubɔ Mawu nyuie wu. Sukudede ate ŋu aɖe vi nyui aɖe ne ‘míeka ɖe nusiwo le vevie wu,’ siwo ku ɖe míaƒe xɔse ŋu la ‘dzi.’—Filipitɔwo 1:9, 10.
Nuƒo kpui siwo mã ɖe akpa etɔ̃ me siwo ƒe tanyae nye “Ameka ƒe Dzidzenuwo Dzie Nèzɔna Ðo?” kplɔe ɖo. Mawu ƒe Nya dzixɔxɔse ʋãa mí be míeléa Biblia ƒe dzidzenuwo me ɖe asi. Kristotɔwo wɔna ɖe Yehowa ƒe sewo kple gɔmeɖosewo dzi. Le kpɔɖeŋu me, Ŋɔŋlɔawo xlɔ̃ nu mí be míagagblɔ yakanyawo o eye míagadzu ame hã o. (Efesotɔwo 4:31, 32) Nuƒola la bia be: “Ðe nèwona ɖe srɔ̃wò alo viwòwo ta dzua wo ne dzi ku wò alo ne wodo dziku na wòa?” Le nyateƒe me la, madze Kristotɔ nenema o. Dzidzenuwo le Mawu si ku ɖe míaƒe dzedzeme hã ŋu. Ele be Kristotɔwo nado awu “ɖe nɔnɔme nyui me . . . [kple] ŋukpekpe.” (Timoteo I, 2:9, 10) Nya si gɔme woɖe le afisia be “ŋukpekpe” fia bubudedeameɖokuiŋu, ŋkɔ nyui ƒe ame si nɔnɔ, numagbɔmewɔwɔ, kple nusi dze ga dzi wɔwɔ. Lɔlɔ̃ na ame bubuwoe ʋãa mí míewɔa nu eye Biblia ƒe gɔmeɖosewo kple nusi sɔ wɔwɔ fiaa mɔ mí.
Wodzro Hebritɔwo 3:7-15 kple 4:1-16 ƒe kpukpuiwo me ɖekaɖekae le nuƒo eve siwo kplɔe ɖo me. Biblia ƒe akpa siawo xlɔ̃ nu mí le afɔku si nye be ‘nuvɔ̃ ƒe amebleŋusẽ ana míaƒe dzime nasẽ’ ŋu. (Hebritɔwo 3:13) Aleke míawɔ akpɔ dzidzedze le aʋa si wɔm míele kple nuvɔ̃ me? Yehowa kpena ɖe mía ŋu to eƒe Nya la dzi. Nyateƒee, “Mawu ƒe nya la le agbe, eye wòsẽa ŋu, . . . [enye] tamesusuwo kple dzimedidiwo ƒe ʋɔnudrɔ̃la.”—Hebritɔwo 4:12.
Takpekpea ƒe ŋkeke gbãtɔ ƒe nuƒo mamlɛae nye “Agbalẽ si Nyo na Dukɔwo Katã.” Eƒo nu tso Biblia ƒe nyateƒenyenye, emenyawo ƒe dede pɛpɛpɛ, kple asixɔxɔ si le eŋu la ŋuti. Dzidzɔ gã kae nye si wònye be woasee nuƒola la naɖe gbeƒãe be woɖe axa 32-gbalẽ gbadza yeye si ƒe tanyae nye Agbalẽ si Nyo na Amesiame ɖe go! Amesiwo nye agbalẽnyalawo gake womenya nu boo aɖeke tso Biblia ŋu o koŋ ye wota agbalẽ sia na. Woƒo nuƒoa ta kple nya siawo be: “Ehiã be amewo nadzro Mawu ƒe Nya la me na wo ɖokui. Míeka ɖe edzi be ne woa ŋutɔwo dzro Biblia me la, woava kpɔe be agbalẽ tɔxɛ sia nye agbalẽ si nyo na amewo katã nyateƒe!”
Srɔ̃ ‘Amesi Naa Míaƒe Xɔse Zua Blibo’
Takpekpea ƒe ŋkeke evelia ƒe tanya sia he susu yi Yesu Kristo, ‘amesi naa míaƒe xɔse zua blibo’ dzi. Ehiã be ‘míadze eƒe afɔɖoƒewo yome tututu.’ (Hebritɔwo 12:2; Petro I, 2:21) Wogblɔna na ame geɖe le Kristodukɔa me be: ‘Xɔ Aƒetɔ Yesu dzi se, eye nàkpɔ ɖeɖe!’ Gake xɔsea katã koe nye maa? Biblia gblɔ be “xɔse dɔwɔwɔ manɔŋui . . . nye nu kuku.” (Yakobo 2:26) Eyata hekpe ɖe Yesu dzixɔxɔse ŋu la, ele be míawɔ dɔ siwo wòwɔ, vevietɔ gbeƒãɖeɖe Mawu Fiaɖuƒe nyanyuia.
Nyanyuigbɔgblɔdɔa koŋ dzie wote gbe ɖo le ŋdi me nuƒoawo me. Abe Paulo ene la, ele be wòanye míaƒe didi vevie be míagblɔ xɔxɔnyanyui la. (Romatɔwo 1:14-16) Yesu ɖe gbeƒã na amewo le afisiafi. Togbɔ be míaƒe aƒeme yi aƒeme dɔa le ku nyuiwo tsem hã la, míegatua ame geɖe le aƒeme ne míeyi o. (Dɔwɔwɔwo 20:20) Ame geɖe nɔa suku, yia dɔ me, alo zɔa mɔ. Eyata ehiã be míaɖe gbeƒã le afisiwo amesiame te ŋu nɔna hã kple afisiafi si míate ŋu ake ɖe amewo ŋu le ko.
Nuƒo si ƒe tanyae nye “Mili Ke eye Miasẽ Ŋu le Nyateƒea Me” ɖo ŋku nusrɔ̃la yeye siwo xɔa nyɔnyrɔ dzi na mí—ame 1,000 kple edzivɔ gbesiagbe le mamã dedie nu! Ehiã vevie be ame yeye siawo nali ke eye woasẽ ŋu le xɔse la me. (Kolosetɔwo 2:6, 7) Nuƒola la ɖe nu me be ati ƒe kewo ŋutɔŋutɔ lɔa tsi kple nunyiamewo tso tome eye wogaléa atia ɖe te. Nenema ke nusɔsrɔ̃ ƒe numãme nyuiwo kple hadede tuameɖowo ana nusrɔ̃la yeyewo nate ŋu ali ke le nyateƒea me.
Nuxlɔ̃ame sia sɔ nyuie na nyɔnyrɔxɔlawo. Ẽ, le takpekpea ƒe ŋkeke eveagbe wonyrɔ nusrɔ̃la yeye gbogbo aɖewo, le Yesu ƒe kpɔɖeŋua sɔsrɔ̃ me. Nuƒo si nye “Mawu ƒe Nya Dzixɔxɔse Kplɔa Ame Yia Nyɔnyrɔxɔxɔ Gbɔe” ɖo ŋku edzi na nyɔnyrɔxɔlawo be wo nyɔnyrɔ keŋkeŋ ɖe tsi me nye kpɔɖeŋunuwɔna si sɔ na alesi woku na woƒe tsã ɖokuitɔdidigbenɔnɔ lae. Wo fɔfɔ tso tsia me fia alesi wofɔ wo na agbenɔnɔ na Mawu ƒe lɔlɔ̃nu wɔwɔe.
Wotu nuƒo si nye “Ʋli Xɔse la Ta Sesĩe” ɖe Biblia ƒe agbalẽ si nye Yuda dzi. Wode dzi ƒo na mí be míatsi tre ɖe ŋusẽkpɔɖeamedzi gbegblẽwo, abe agbegbegblẽnɔnɔ, aglãdzedze, kple xɔsegbegbe ene ŋu atsɔ akpɔ míaƒe xɔse tae. Eyome wona nufiame tɔxɛ dzilawo—vevietɔ vifofowo—le nuƒo si nye “Wɔ Ðoɖo na Wò Aƒemetɔwo” me. Gbɔgbɔ me, ŋutilã me, kple seselelãme nuhiahiãwo didi na ƒomea nye Ŋɔŋlɔawo me gbanɔamedzi. (Timoteo I, 5:8) Esia biaa ɣeyiɣi, dzeɖoɖo, kple ƒomedodo kplikplikpli ƒe anyinɔnɔ. Ðikekemanɔmee la, agbagba siwo gbegbe Kristotɔ dzilawo dzena be yewoahe yewo viwo le nyateƒea me dzɔa dzi na Yehowa Mawu.
Nuƒo kpui siwo kplɔe ɖo be, “Mina Míayi Yehowa ƒe Aƒeme” tu míaƒe ŋudzedzekpɔkpɔ ɖe Kristotɔwo ƒe kpekpewo ŋu ɖo. Wonaa míeɖea dzi ɖi tso xexe sia me ƒe dzimaɖitsitsiwo me. Mɔnukpɔkpɔ sua mía si le kpekpeawo me be míade dzi ƒo na mía nɔewo, eye míate ŋu aɖe míaƒe lɔlɔ̃ na mía haxɔsetɔwo afia le wo me. (Hebritɔwo 10:24, 25) Kpekpeawo gakpena ɖe mía ŋu be míabi ɖe míaƒe nufiafia ŋutete me, eye be míesea Mawu ƒe tameɖoɖo gɔme wòdea to wu. (Lododowo 27:17) Megadzɔ gbeɖe be míaɖe mía ɖokui ɖe aga tso hamea gbɔ o, eye mina míaɖo ŋku Yesu ƒe nyawo dzi be: “Afisi ame eve alo ame etɔ̃ wokpe ta ɖo le nye ŋkɔa dzi la, afima mele wo titina.”—Mateo 18:20.
Gbemagbe ƒe nuƒo susɔeae nye “Wò Xɔse ƒe Nyonyome—Wole Edom Kpɔ Fifia.” Asixɔxɔ aɖeke menɔa xɔse si womedo kpɔ o ŋu o, eye eƒe nuvãnyenye menɔa nyanya o. Ele abe gaxɔgbalẽvi si wometsɔ xɔ gae haɖe o ene. Ðe wònyo ŋutɔŋutɔ de ga home si woŋlɔ ɖe edzi nua? Nenema ke wòle be woado míaƒe xɔse akpɔ anya eƒe nuvãnyenye kple nyonyome. (Petro I, 1:6, 7) Nuƒolaa gblɔ be: “Ɣeaɖewoɣi la, osɔfowo kple xɔsegbelawo blea nyakakadɔwɔlawo kpakple dziɖuɖumegãwo wotsoa mía nu aʋatsotɔe, eye wogblɔa nya gbegblẽwo le míaƒe Kristotɔwo ƒe dzixɔsewo kple agbenɔnɔ ŋu. . . . Ðe míaɖe mɔ amesiwo Satana gbã ŋku na nado vɔvɔ̃ na mí eye woaɖe dzi le mía ƒo eye woana nyanyuia nakpe ŋu na mía? Ðe míaɖe mɔ aʋatsonya siwo wogblɔna ɖe nyateƒea ŋu nagblẽ nu le míaƒe kpekpewo dede edziedzi kple míaƒe gbeƒãɖeɖedɔa wɔwɔ ŋua? Alo ɖe míanɔ te sesĩe eye míalé dzi ɖe ƒo ahaɖoe kplikpaa wu be míayi edzi aɖe gbeƒã nyateƒe si ku ɖe Yehowa kple eƒe Fiaɖuƒea ŋua?”
Nɔ Agbe to Xɔse Me
Wotu takpekpea ƒe ŋkeke etɔ̃lia ƒe tanya ɖe Paulo ƒe nya siawo dzi: “Edze ƒã bena, wometsoa afia na ame aɖeke to se la me le Mawu ŋku me o; elabena ‘ame dzɔdzɔe la anɔ agbe tso xɔse me.’ ” (Galatiatɔwo 3:11) Nuƒo kpui siwo nye “Yoel ƒe Nyagblɔɖinyawo na Míaƒe Ŋkekea” nye ŋdia me nuƒo veviwo ƒe ɖe. Yoel ƒe agbalẽa gblɔ nya tso míaƒe ɣeyiɣia ŋu eye wòtsɔ vevienyenye si bia nuwɔwɔ kpata gblɔ be: “[Alele], ŋkeke la! Elabena Yehowa ƒe ŋkeke la tu aƒe, eye gbegblẽ wònye tso ŋusẽkatãtɔ la gbɔ gbɔna.” (Yoel 1:15) Abe ʋetsuvi siwo menaa ta o ene la, Kristotɔ amesiaminawo meɖe mɔ naneke xe mɔ na woƒe Fiaɖuƒe gbeƒãɖeɖea le nuwuɣi sia o.
Yoel ƒe agbalẽa gana mɔkpɔkpɔ hã, esi wògblɔ be: “Woaɖe amesiame, si ayɔ Yehowa ŋkɔ la.” (Yoel 3:5) Esia wɔwɔ bia nu geɖe wu Yehowa ƒe ŋkɔa zazã ko. Dzimetɔtrɔ tso dzi blibo me hiã, eye esia bia hã be míatsri nugbegblẽwɔwɔ. (Yoel 2:12, 13) Menye ɣeyiɣi sia mee míaganɔ hehem ɖe megbe o elabena esusɔ vie ko Yehowa ahe ʋɔnudɔdrɔ̃ ava dukɔwo dzi, abe alesi wòhee va Moab, Amon, kple Seir si nɔ tonyigba dzi la dzi le Yuda Fia Yosafat ŋɔli ene.—Kronika II, 20:1-30; Yoel 4:2, 12.
Nuƒo si nye “Ðe Xɔse Fia to Yehowa Sinu Kpɔkpɔ Me” de dzi ƒo na amesiame. Fifia si míeɖo didiƒe ʋĩ le nuwuɣia me la, míate ŋu atrɔ akpɔ megbe akpɔ alesi Yehowa ƒe nyagblɔɖi geɖewo va emee, eye míetsɔ ɖe le nusiwo susɔ agava dzɔ me vevie. Ele be Yehowa ƒe amewo nayi edzi agbɔ dzi ɖi, wòanɔ ŋku dzi na wo be nusianu si ƒe ŋugbe Mawu do la ava eme.—Tito 2:13; Petro II, 3:9, 10.
Ŋdi me kpekpea wu enu kple drama si nye “Mègato Ŋku Gã O.” Drama sia si sɔ ɖe alesi nuwo le nu la de dzi ƒo na mí be míadzro alesi míebua ŋutilãmenudidiwo ŋu me. Eɖanye afikae míele o, ne míedi be agbe me dzimaɖitsitsiwo megado kplamatse mí o la, ke ele be míawɔ ɖe Yesu ƒe nuxlɔ̃ame be míaƒe ŋku dzi nadza, eye míana wòanɔ Mawu ƒe Fiaɖuƒea dzi tẽ la dzi.—Mateo 6:22.
Tanya ʋãme si wona dutoƒonuƒoae nye “Xɔse Kple Wò Etsɔme.” Wogblɔ alesi kplɔla siwo nye amegbetɔwo mate ŋu akpɔ xexeame ƒe kuxiwo gbɔe o la ƒe kpeɖodziwo. (Yeremya 10:23) Nusiwo dzɔ va yi le amegbetɔ ƒe ŋutinya me koe ganɔa dzɔdzɔm—eye wokekea ta hegblẽa nu geɖe wu. Nukae Yehowa Ðasefowo buna le etsɔme ŋu? Míexɔ edzi se be etsɔme nyui aɖe li na ameƒomea me tɔ nuteƒewɔlawo le Mawu ƒe Fiaɖuƒea ƒe dziɖuɖu te. (Mateo 5:5) Mawu awɔ eƒe ŋugbedodowo dzi hena amesiwo katã xɔ eƒe Nya la dzi se ƒe nyonyo; Nya sia xlɔ̃ nu mí vevie be: “Midi Yehowa, ŋkeke alesi wòle gaglãgbe, miyɔe, esime wòtsɔ kpuiƒe.”—Yesaya 55:6.
Yesu bia nya vevi aɖe si ku ɖe míaƒe ŋkekea ŋu. Ebia be: “Ne Amegbetɔvi la va la, ɖe wòakpɔ xɔse la le anyigba la dzi mahã?” (Luka 18:8) Wogbugbɔ to takpekpea me nyawo me le nuƒo mamlɛa me eye wogblɔ kpeɖodzi sẽŋu siwo fia be Mawu ƒe Nya la dzixɔselawo li, togbɔ be xɔsemanɔamesi kple ŋutilãmenudidi xexemee míele hã.
Ke hã la, mía dometɔ ɖesiaɖe ate ŋu abia eɖokui ase be, ‘Ðe mele amesiwo si Mawu kple eƒe Nya dzixɔxɔse maʋãmaʋãe le la domea?’ “Mawu ƒe Nya Dzixɔxɔse” Nutome Gã Takpekpea nekpe ɖe mía ŋu míaɖo nya ma ŋu be ẽ. Eye akpe gã kae nye si míeda na Yehowa be wòdo ŋusẽ míaƒe eyama kple eƒe Nya si tso gbɔgbɔ me, Biblia, la dzixɔxɔse!
[Nɔnɔmetata si le axa 24]
Lɔlɔ̃nu faa dɔwɔla geɖewo tsɔ dzidzɔ wɔ dɔe le dzeƒe didi na takpekpevala akpe geɖewo me
[Nɔnɔmetata si le axa 25]
Wozã lãmesẽfefewɔƒe gãwo le xexeame katã
[Nɔnɔmetata si le axa 25]
L. A. Swingle si nye Dziɖuha la me tɔ le agbalẽ gbadza yeyea ɖem ɖe go
[Nɔnɔmetata si le axa 26]
Ame geɖe xɔ nyɔnyrɔ tsɔ wɔ woƒe adzɔgbeɖeɖe na Yehowa ƒe kpɔɖeŋui
[Nɔnɔmetata si le axa 27]
Takpekpevalawo tsɔ dzidzɔ dzi Fiaɖuƒehawoe. Eme fotoa: drama si nye “Mègato Ŋku Gã O”