Ðe Mɔkpɔkpɔ Nɔa Asiwòa alo Dzi Ðena Le Ƒowòa?

“ƔEYIƔI nyuitɔ kekeakee wònye, ɣeyiɣi vɔ̃ɖitɔ kekeakee wònye, . . . enye mɔkpɔkpɔ ƒe nuwɔɣi, enye mɔkpɔkpɔbuɖeame ƒe wɔnavɔleameŋuɣi, nusianu nɔ mía ŋgɔ, naneke menɔ mía ŋgɔ o.” Woɖe alesi nyadzɔdzɔ vovovowo ate ŋu akpɔ ŋusẽ ɖe míaƒe tamebubu, seselelãmewo, kple mɔkpɔkpɔ dzii fia aɖaŋutɔe le Charles Dickens ƒe agbalẽ nyui si nye A Tale of Two Cities (Dugã Eve Ŋutinya) ƒe ŋgɔdonyawo me.

Dugã eve siwo wòwɔnɛ enye London kple Paris le Franseawo ƒe Tɔtrɔ Kpata ƒe zitɔtɔa me. Amegbetɔ ƒe gomenɔamesi si woɖe gblɔ le tɔtrɔ kpata ƒe ɣeyiɣia me nye “mɔkpɔkpɔ ƒe nuwɔɣi” na dumevi siwo wote ɖe anyi le ƒe alafa 18 lia me le France nyateƒe. Gake “mɔkpɔkpɔbuɖeame ƒe wɔnavɔleameŋuɣi” si ɖo ta ku kple tsɔtsrɔ̃ mee wònye na dziɖuɖu xoxoa, alo dunyahehe nuɖoanyi si womu la me tɔwo.

Ðe wònye mɔkpɔkpɔnɔamesi loo alo mɔkpɔkpɔmanɔamesia? Akpa si dzi nède dzie ye katã nɔ te ɖo. Eye ekpɔtɔ le nenema.

Ameɖokuimedzroɣi

Ðe mɔkpɔkpɔ nɔa asiwòa? Ðe nèbua dzidzɔdonamenuwo ŋu le agbe me, hekpɔa mɔ na nu nyuiwo ɣesiaɣia? Alo ɖe dzi ɖena le ƒowò nèbuna be eme mava nyo na ye o, eye nènɔa mɔ kpɔm be nu nyuitɔ nava dzɔ gake ganɔa mɔ kpɔm na dzɔgbevɔ̃ea?

Ƒe 60 enye sia si Amerikatɔ ŋutinyaŋlɔla James Branch Cabell gblɔ nukpɔsusu eve siawo siwo tsi tre ɖe wo nɔewo ŋu la kpuie ko be: “Mɔkpɔkpɔnɔamesitɔ gblɔna be nɔnɔme nyuitɔ kekeake mee míele; eye mɔkpɔkpɔmanɔamesitɔ susu be mele nenema o.” Ne wòwɔ na wò be nya sia nye ɖeklemiɖeɖe la, ke de ŋugble le nu nyui kple nu gbegblẽ si le egbe xexeame ƒe nɔnɔme etɔ̃ aɖewo ko siwo gbɔna ŋu kpɔ. Emegbe nàdzro wò seselelãmewo me, eye nàbia ɖokuiwò be, ‘Ðe mɔkpɔkpɔ nɔa asinyea alo dzi ɖena le ƒonye?’

Ŋutifafa Mavɔ: Teƒe nenie afɔku le le xexeame nàte ŋu ayɔ? Ireland, tsã Yugoslavia, Titinaɣedzeƒe, Burundi, Rwanda—teƒe siawoe vaa susu me kaba. Ðe woate ŋu akpɔ aʋawɔwɔ siawo kple bubuwo gbɔ bene ŋutifafa mavɔ si axɔ xexeame katã nava? Ðe xexeame ƒe asi atu ŋutifafaa?

Ganyawo ƒe Kelili: Esi Europa-dukɔwo ƒe Habɔbɔ le mɔ kpɔm be yewoawɔ ɖeka le ganyawo gome le ƒe 1999 me ta la, dukɔawo ho aʋa ɖe kuxi siwo nuwo ƒe asixɔxɔ kple dziɖuɖu ƒe gadodo le dumeviwo gbɔ hena vɛ ŋu vevie. Le teƒe bubuwo la, nufitifitiwɔwɔ gblẽ ganyawo dome le Amerika kple Afrika dukɔ geɖe me, afisi nuwo ƒe asixɔxɔ zu agba gã si wu tsɔtsɔ eye gbevovodolawo dome kuxiwo mã amewo dome le. Ðe ganyawo ava li ke le xexeame kpuiea?

Dɔmakpɔwɔe: Le dukɔ ƒe akɔdada me le ƒe 1997 me la, Britain ƒe sɔlemehawo wɔ ɖeka ƒoe ɖe dunyahehawo nu be woana dɔwɔɖui kpɔkpɔ na amesiame nanye nu vevi le woƒe taɖodzinuwo dome. Gake esi dɔ ge le xexeame ƒe dɔwɔlawo ƒe alafa memamã 30 si alo womekpɔ dɔ gbagbe le wɔwɔm o ɖe, ɖe amesiame ate ŋu ava kpɔ dɔ awɔ ɖaa—vevietɔ sɔhɛwo?

Aleke gbegbe wòle bɔbɔe be mɔkpɔkpɔ nabu ɖe ame enye esi! Gake míate ŋu akpɔ mɔ be nuwo ava nyo, eye míele kpewòm be nàdzro alesi nàwɔ be etsɔme mɔkpɔkpɔ nyui nava su asiwò la me.

[Nɔnɔmetata si le axa 3]

Franseawo ƒe Tɔtrɔ Kpata la

[Afi Si Miìexɔ Mɔɖeɖe Tso]

Etso agbalẽ si nye Pictorial History of the World me