Dzilawo Mikpɔ Mia Viwo Ta!

LE SƐKƐNDRI suku aɖe me le Nigeria la, nyɔnuvi aɖe si wonya be enɔa agbe gbegblẽ ŋutɔ la lɔ̃a gbɔdɔdɔ ŋu nyawo gbɔgblɔ na ehati nyɔnuvi sukuviwo. Fuɖetike siwo wòfia wo la dometɔ ɖekae nye stout beer si me wode atama ƒomevi aɖee fũ. Nya siwo wòɖena tso amamaɖeɖegbalẽwo me dzɔa dzi na ehati sukuvi geɖewo. Wo dometɔ aɖewo te ŋutsuwo gbɔ dede, eye ɖeka va fɔ fu. Eno stout beer si me atama sɔ gbɔ ɖo fũ be yeatsɔ aɖe fu lae. Le gaƒoƒo aɖewo ko megbe la, edze ʋu tutru gɔme. Le ŋkeke ʋee aɖewo megbe la, eku ɖe kɔdzi.

Sɔhɛ geɖewo nɔa nuƒoƒo dzi tso gbɔdɔdɔ ŋu le egbe xexeame eye esia gblẽa nu le amesiwo xɔa woƒe nyawo dzi sena la ŋu. Ameka gbɔe sɔhɛwo ate ŋu akpɔ sidzedze vavãtɔ si akpɔ wo ta la le? Aleke wòanyoe nye si ne woate ŋu ayi wo dzila Mawu vɔ̃la siwo ƒe agbanɔamedzie wònye be, ‘woanyi wo le Yehowa ƒe hehe kple nuxɔxlɔ̃ me la’ gbɔ.—Efesotɔwo 6:4.

Alesi Afrikatɔwo Bua Gbɔdɔdɔ Ŋuti Nufiafiae

Le xexeame katã la, esesẽna na dzila geɖewo be woaƒo nu tso gbɔdɔdɔ ŋu na wo viwo. Afrika koŋ ye wòle alea le. Donald si nye vifofo le Sierra Leone de dzesii be: “Ƒã hafi woƒoa nu le eŋu. Mebɔ ɖe Afrika o.” Nigeria-nyɔnu aɖe si ŋkɔe nye Confident lɔ̃ ɖe edzi be: “Dzinyelawo bua gbɔdɔdɔ be enye nusi ŋu mele be woaƒo nu le gbeɖe le dutoƒo o; wotsrii le mía gbɔ.”

Le Afrika-dukɔ aɖewo me la, wobua nya siwo ku ɖe gbɔdɔdɔ ŋu abe aʋa, ŋutsu ƒe tsinyenye, alo dzinukpɔkpɔ ene gbɔgblɔ be enye gbegblẽnya gbɔgblɔ. Kristotɔ vidada aɖe gɔ̃ hã de se na vianyɔnuvi be megazã nya “gbɔdɔdɔ” o, gake ebe ate ŋu ayɔ “matrewɔwɔ” ya. Gake Mawu ƒe Nya Biblia ya ƒo nu tso gbɔdɔdɔ kple vidzinuwo ŋu tẽ. (Mose I, 17:11; 18:11; 30:16, 17; Mose III, 15:2) Menye eƒe taɖodzinue nye be woatsɔe aɖia Mawu ƒe amewo nu alo woanyɔ dzodzro ɖe wo me o ke woatsɔe afia nu wo eye woakpɔ wo ta.—Timoteo II, 3:16.

Vifofo aɖe si nye Nigeriatɔ gblɔ nu bubu si tae dzila aɖewo melɔ̃a nuƒoƒo le eŋu o be: “Ne meƒo nu tso gbɔdɔdɔ ŋu na vinyewo la, ate ŋu akplɔ wo ade gbɔdɔdɔ ƒe agbegbegblẽnɔnɔ me.” Gake ɖe gbɔdɔdɔ ŋuti numeɖeɖe si wogblɔ le bubumɔ nu si wotu ɖe Biblia dzi ade dzi ƒo na ɖeviwo be woaƒu du ayi ewɔwɔ te ge kpɔa? Ao, mana o. Le nyateƒe me la, ate ŋu anye be ne sɔhɛwo menya nu boo le eŋu o la, ana woaɖo afɔku me boŋ. Biblia gblɔ be, ‘nunya [si wotu ɖe sidzedze vavãtɔ dzi] nye ametakpɔnu.’—Nyagblɔla 7:12.

Le Yesu ƒe lododo aɖe me la, ŋutsu nyanu si kpɔ do ŋgɔ be ahomya ate ŋu aƒo le etsɔme la tu eƒe xɔ ɖe kpe gbadza dzi gake ŋutsu manyanu ya tu etɔ ɖe ke dzi eye wòmu. (Mateo 7:24-27) Nenema ke esi Kristotɔ dzila nyanuwo nya be yewo viwo ado go nyaƒoɖeamenu siwo nu sẽ abe ahomya ene be woanɔ agbe ɖe xexeame ƒe gbɔdɔdɔ dzidzenuwo nu la, woatsɔ sidzedze vavãtɔ kple nugɔmesese adzra wo viwo ɖo be wòakpe ɖe wo ŋu woanɔ te sesĩe.

Afrika-nyɔnu aɖe gblɔ nu bubu si ta dzilawo meɖoa dze le gbɔdɔdɔ ŋu kple wo viwo o be: “Esi menye sɔhɛ la, dzinyela siwo nye Ðasefowo meɖo dze tso gbɔdɔdɔnyawo ŋu kplim o, eyata meva susu me nam be maƒo nu tso nusiawo ŋu na vinyewo o.” Gake nyaƒoɖeamenu siwo egbe sɔhɛwo doa goe nu sẽ wu esiwo sɔhɛwo do goe le ƒe 10 alo 20 siwo va yi me. Esia mewɔ nuku o. Mawu ƒe Nya gblɔe ɖi be, “le ŋkeke mamlɛawo me la . . . ame vɔ̃ɖiwo kple ameblelawo la woayi dzi vɔ̃ɖitɔe wu anɔ amewo blem, eye amewo able wo.”—Timoteo II, 3:1, 13.

Nusi gagblẽ nyaa ɖe edzi wue nye be ɖevi geɖe medina be yewoagblɔ yewoƒe nya ɣaɣlawo na yewo dzilawo o alo menya gblɔna na wo o. Wo kple wo viwo metea ŋu ɖoa dze le nya suewo gɔ̃ hã ŋu o. Ðekakpui ƒe 19 vi aɖe fa konyi be: “Nyemedzroa nya me kple dzinyelawo o. Dzeɖoɖo kadodo nyui mele mía kple fofonye dome o. Eƒe susu menɔa ŋunye o.”

Sɔhɛwo anɔ vɔvɔ̃m hã be nu nyui aɖeke mado tso yewoƒe nyabiabia tso gbɔdɔdɔ ŋu me o. Ðetugbi ƒe 16 vi aɖe gblɔ be: “Nyemeɖoa dze tso gbɔdɔdɔkuxiwo ŋu na dzinyelawo o le alesi wowɔna ne wogblɔ nya mawo ta. Ɣeaɖeɣi va yi danye bia nya aɖewo Nɔnye tso gbɔdɔdɔ ŋu. Le esi Nɔnye nakpɔ eƒe kuxiwo gbɔ nɛ teƒe la, eva nɔ nazã bum be nu gbegblẽ aɖee wòdi be yeawɔ. Nɔnye yɔam zi geɖe biaa nya tsoa nɔvinyea ŋu, eye ɣeaɖewoɣi wònɔa ahama sim ɖe eŋu. Nyemedi be Nɔnye magalɔ̃ nye nya o eyata nyemegblɔa nye nya ɣaɣlawo nɛ o.”

Nukatae Nàfia Nu Wo?

Menye ɖeko wòsɔ be míafia gbɔdɔdɔ ŋuti nu alesinu dze mía viwo ko o ke enye nusi me lɔlɔ̃ le hã. Ne dzilawo mefia nu wo viwo tso gbɔdɔdɔ ŋu o la, ame bubuwo ya afiae wo—zi geɖe la, wofianɛ wo kaba kura wu alesi dzilawo asusui eye ɣesiaɣi kloe la, mesɔna ɖe Mawu ƒe gɔmeɖosewo nu o. Nyɔnuvi ƒe 13 vi aɖe wɔ matre le esi eƒe sukuhati aɖe gblɔ nɛ be ne eganye ɖetugbi nɔaƒe kokoko la, egbɔna veve se ge ŋutɔ le etsɔme. Sukuhatia gblɔ nɛ be, “Sakisi ye woava tsɔ alã ayi si tsyɔ wò nyɔnume nui.” Esi wobiae emegbe be nukatae megblɔ nusi wòse na dadaa si nye Kristotɔ o hã la, nyɔnuvia ɖo eŋu be womegblɔa nya mawo tɔgbe na ame tsitsiwo gbeɖe o.

Nigeria-nyɔnuvi aɖe gblɔ be: “Xɔ̃nye sukuviwo dze agbagba be woable nunye be gbɔdɔdɔ nye nusi me wòle be amesiame si le ame me nakpɔ gome le. Wogblɔ nam be ne nyemedɔ ŋutsu gbɔ fifia o eye mexɔ ƒe 21 la, dɔ aɖe adze dzinye si agblẽ nu le nye nyɔnunyenye ŋu vevie. Wogblɔ be, eyata be nu dziŋɔ ma magadzɔ ɖe dzinye o la, enyo be made ŋutsu gbɔ kpɔ hafi aɖe srɔ̃.”

Esi dzeɖoɖo kadodo nyui nɔ wo kple edzilawo dome ta ekpɔe dze sii enumake be menye nu mae yesrɔ̃ le aƒeme o. “Abe alesi mewɔnɛ ɖaa ene la, metrɔ yi aƒeme ɖagblɔ nusi wogblɔ nam le suku nɛ.” Dadaa te ŋu ɖɔ eƒe nukpɔsusu ɖo le alakpanya si wogblɔ nɛ ŋu.—Tsɔe sɔ kple Lododowo 14:15.

Ne dzilawo kpe ɖe wo viwo ŋu fia nusi wohiã be mawumenunya nasu wo si le gbɔdɔdɔnyawo ŋu wo la, ke wole wo viwo dzram ɖo be woate ŋu ade dzesi nɔnɔme siwo me afɔku le eye woakpɔ amesiwo di be yewoagblẽ wo la adze sii. Akpɔ wo ta tso nulɔdɔwo kple gbɔmeyafufɔfɔ me. Enaa wodea bubu wo ɖokui ŋu eye ame bubuwo hã bua wo. Ekpɔa wo ta tso susu masɔmasɔwo ƒe amesinɔnɔ kpakple dzimaɖitsitsi me. Enaa gbɔdɔdɔ ŋuti nukpɔsusu nyui si sɔ si awɔe be woakpɔ dzidzɔ ne wova ɖe srɔ̃ la nɔa wo si. Ate ŋu akpe ɖe wo ŋu be woayi edzi anɔ ƒomedodo nyui me kple Mawu. Eye ne ɖeviwo kpɔ alesi wo dzilawo tsɔ ɖe le eme na wo lɔlɔ̃tɔe dze sii la, aʋã wo be woade bubu wo ŋu alɔ̃ wo awu.

Dzeɖoɖo Kadodo Nyui

Be dzilawo naɖo aɖaŋu si asɔ ɖe wo viwo ƒe nuhiahiãwo nu la, ele be dzeɖoɖo kadodo nanɔ akpa evea siaa dome. Ne dzilawo menya nusiwo le wo viwo ƒe susu kple dzi me o la, aɖaŋuɖoɖo nyuiwo kura gɔ̃ hã maɖe vi o, abe alesi ko dɔyɔla si menya dɔ si le fu ɖem na dɔnɔ o anɔ agbagba dzem be yeaŋlɔ atike nɛ ene. Be dzilawo ƒe aɖaŋuɖoɖo nawɔ dɔ la, ele be woanya alesi tututu wo viwo bua nu ŋui kple alesi tututu wosena le wo ɖokui me. Ele be woase nyaƒoɖeamenu kple kuxi siwo wo viwo doa goe kpakple nyabiabia siwo ɖea fu na wo la gɔme. Ehiã be woaɖo to ɖeviwo nyuie, ‘woaɖe abla le nusese me, anɔ blewu le nuƒoƒo me.’—Yakobo 1:19; Lododowo 12:18; Nyagblɔla 7:8.

Ebia ɣeyiɣi, dzigbɔɖi, kple agbagbadzedze be dzilawo nana ƒomedodo kplikplikpli naɖo wo kple wo viwo dome eye wòanɔ anyi ɖaa, wòanye ƒomedodo si me ɖeviwo lɔ̃na faa ʋua go woƒe dɔmenyawo le. Gake aleke wòanyoe ne wote ŋu wɔ esia enye si! Vifofo aɖe si tso Ɣetoɖoƒe Afrika si si vi atɔ̃ le gblɔ be: “Vifofo kple amesi wogblɔa woƒe nya ɣaɣlawo na lae menye. Ðeviawo ɖoa dze kplim faa tso nya sia nya ŋu, tso gbɔdɔdɔnyawo hã ŋu. Nyɔnuviawo kura gɔ̃ hã gblɔa woƒe nya ɣaɣlawo nam. Míegbɔa dzi ɖi dzroa woƒe kuxiwo me. Wogblɔa woƒe dzidzɔnyawo hã nam.”

Vianyɔnu ɖeka si ŋkɔe Bola gblɔ be: “Nyemeɣlaa naneke ɖe fofonye o. Fofonye bua mía ŋu eye wòsea nu gɔme na mí. Mewɔa anyrã alo sẽa tame le mía ŋu ne míedze agɔ kura gɔ̃ hã o. Ðe dzikudodo teƒe la, eléa ŋku ɖe nya la ŋu eye wòfiaa nusi wòle be míawɔ alo nusi mele be míawɔ o la mí. Egblɔa nyawo tsoa Youth-gbalẽa kple agbalẽ si nye Ƒome ƒe Dzidzɔkpɔkpɔ me zi geɖe.”a

Le ɣeyiɣi si me wòanya awɔ me la, enyo be dzilawo nadze nuƒoƒo kple viwo tso gbɔdɔdɔ ŋu gɔme tso woƒe ɖevime ke. Esia anye gɔmeɖoɖo si dzi woatu dze si woaɖo kple wo ɖo le woƒe ƒewui siwo me toto sesẽna zi geɖe la me. Ne womedze numedzodzroawo gɔme kaba o la, edodoɖa emegbe sesẽna ɣeaɖewoɣi, gake woate ŋu awɔe. Vidada aɖe si si vi atɔ̃ le gblɔ be: “Mezia ɖokuinye dzi hafi te ŋu ƒoa nu tsoa eŋu vaseɖe esime mlɔeba megasesẽa na mía kple ɖevia o.” Esi nu geɖe ŋutɔ ate ŋu agblẽ le ɖeviwo ŋu ta la, agbagbadzedze mawo hiã godoo.

Wokpɔ Wo Ta Wònye Dzidzɔ na Wo

Ðeviwo kpɔa ŋudzedze ɖe dzila siwo tsɔa sidzedze si akpɔ wo ta dzraa wo ɖo lɔlɔ̃tɔe la ŋu. Bu nya siwo Afrika Yehowa Ðasefo aɖewo gblɔ ŋu kpɔ:

Mojisola gblɔ esime wòxɔ ƒe 24 be: “Manɔ akpedada dzi na danye ɖaa. Ena gbɔdɔdɔ ŋuti nufiame si mehiã lam le ɣeyiɣi nyuitɔ dzi. Togbɔ be ekpea ŋu nam le ɣeyiɣi si me danye nɔ nya mawo me dzrom kplim hã la, fifia mekpɔ nu nyui siwo wòwɔ nam la dze sii.”

Iniobong gblɔ kpee be: “Dzi dzɔam ɣesiaɣi ne metrɔ kpɔ megbe eye mebu nusiwo Dada wɔ nam esi wòfia nu alesinu hiã lam le gbɔdɔdɔ ŋu. Ekpe ɖe ŋunye ŋutɔ fia mɔm yi nyɔnunyenye me. Meka atam be nye hã mafiae vi siwo mava dzi nenema.”

Kunle si xɔ ƒe 19 gblɔ be: “Dzinyelawo kpe ɖe ŋunye be mete ŋu nɔ te ɖe xexemenyɔnuwo ƒe gbɔdɔdɔ ƒe nyaƒoɖeamenuwo nu. Ne ɖe menye hehe si wonam tae o la, anye ne medze nuvɔ̃ me. Mada akpe ɖe nusi wowɔ la ta ɣesiaɣi.”

Christiana gblɔ be: “Mekpɔ viɖe geɖe le gbɔdɔdɔ ŋu dze si mía kple danye míeɖo la me. Wokpɔ tanye tso dɔ vɔ̃ɖiwo kple gbɔmeyafufɔfɔ me, eye mete ŋu ɖo kpɔɖeŋu nyui ɖi na tsɛnyewo kple ƒenyewo. Bubu hã le ŋunye le amewo gbɔ, eye ŋutsu si mava ɖe hã abum. Vevietɔ wu la, ƒomedodo nyui le mía kple Yehowa Mawu dome ɖe eƒe seawo me léle ɖe asi ta.”

Bola si ƒe nya míegblɔ va yi gblɔ be: “Nye sukuhati aɖe gblɔ be àte ŋu adɔ ŋutsu gbɔ ne menye ɖe nèɖo be yeaɖee o hã. Modzakaɖenu koe wònye le eya gbɔ. Gake esi wòva fɔ fu eye megate ŋu wɔ dodokpɔ mamlɛa o la, eva nyae be menye fefenue wònye o. Ne ɖe fofo nyui mele asinye afia num o la, anye ne ɖewohĩ ɖe manɔ abe eya ke ene, adzɔ ɖe dzinye hafi manya.”

Le xexe sia si ku gbɔdɔdɔ ƒe tsu me la, yayra kae nye si wònye ne dzila Kristotɔwo kpe ɖe wo viwo ŋu ‘wodze nunya hena agbexɔxɔ’! (Timoteo II, 3:15) Woƒe nufiafia si tso Biblia me la le abe kɔgɛ xɔasi si wotsɔ ɖo atsyɔ̃e na ɖeviwo le Mawu ŋkume ene. (Lododowo 1:8, 9) Ðeviwo senɛ le wo ɖokui me be yewole dedie, eye dzilawo ƒe dzi dzea eme ŋutɔ. Vifofo aɖe si le Afrika si dzea agbagba be yeana dzeɖoɖo kadodo nanɔ ye kple ye vi suewo dome la gblɔ be: “Míaƒe susu me dze akɔ anyi. Míeka ɖe edzi be mía viwo nya nusi dzea Yehowa ŋu; egodotɔwo mate ŋu able wo o. Míeka ɖe edzi be womawɔ naneke si ado nuxaxa na ƒomea o. Meda akpe na Yehowa be woɖee fia be míate ŋu aka ɖe yewo dzi.”

[Etenuŋɔŋlɔ]

[Nɔnɔmetata si le axa 10]

Kristotɔ sɔhɛ siwo wo dzilawo fia nui tso Biblia me ate ŋu agbe gbegblẽnya si sɔhɛ bubuwo gblɔna na wo la sese