Woado Kristotɔwo Ƒe Xɔse Akpɔ
‘Menye amewo katã sie xɔse le o.’—TESALONIKATƆWO II, 3:2.
1. Aleke wòdze le ŋutinya mee be menye amesiame sie xɔse vavãtɔ le o?
LE ŊUTINYA katã me la, ŋutsu, nyɔnu, kple ɖeviwo nɔ anyi siwo si xɔse vavãtɔ nɔ. Esɔ be míezã nɔnɔmefianya “vavãtɔ” elabena ame miliɔn bubu geɖe li siwo ƒe xɔse le abe nusianu ko dzixɔxɔse bɔbɔe ene, si fia be wolɔ̃na xɔa nu dzi sena togbɔ be gɔmeɖoanyi nyui aɖeke meli si ta wòle be woaxɔ edzi ase o hã. Xɔse sia ƒomevi nyea alakpamawu aɖe dzixɔse alo alakpasubɔsubɔ ƒomevi aɖe si mewɔ ɖeka kple Yehowa, Ŋusẽkatãtɔ kple eƒe Nya si wòɖe fia la o. Eyata apostolo Paulo ŋlɔ be, ‘Menye amewo katã sie xɔse le o.’—Tesalonikatɔwo II, 3:2.
2. Nukatae wòle vevie ale gbegbe be míado xɔse si le mía ŋutɔwo mía si la akpɔ?
2 Gake nya si Paulo gblɔ la fia be xɔse vavãtɔ nɔ ame aɖewo si ɣemaɣi, eye egafia be ele ame aɖewo si egbea hã. Magazine sia xlẽla akpa gãtɔ dina be xɔse vavãtɔ sia nanɔ yewo si eye wòadzi ɖe edzi na yewo—xɔse si wɔ ɖeka kple Mawu ƒe nyateƒe la ƒe sidzedze vavãtɔ. (Yohanes 18:37; Hebritɔwo 11:6) Esiae nye wò didia? Ke ele be nàlɔ̃ ɖe nyateƒe sia dzi be woado wò xɔse kpɔ eye nàdzra ɖo ɖe eŋu. Nukatae míate ŋu agblɔe nenema?
3, 4. Nukatae wòle be míaƒe ŋku nanɔ kpɔɖeŋu si Yesu ɖo ɖi ŋu le xɔse ƒe dodokpɔwo gome?
3 Ele be míalɔ̃ ɖe edzi be Yesu Kristoe nye ame vevitɔ si dzi míetu míaƒe xɔse ɖo. Le nyateƒe me, Biblia yɔe be eyae nye Amesi naa míaƒe xɔse dea blibo. Nusi Yesu gblɔ kple nusiwo wòwɔ, vevietɔ alesi wòna nyagblɔɖiwo va eme tae woyɔe nenema ɖo. Ena ŋusẽ ɖo gɔmeɖokpe si dzi amewo ate ŋu atu xɔse vavãtɔ ɖo la ŋu. (Hebritɔwo 12:2; Nyaɖeɖefia 1:1, 2) Ke hã míexlẽ be “wote” Yesu “kpɔ le nuwo katã me, abe míawo ke ene, negbe nuvɔ̃ koe mele eŋu o.” (Hebritɔwo 4:15) Nyateƒee, wodo Yesu ƒe xɔse kpɔ. Mele be esia naɖe dzi le mía ƒo alo wòana míavɔ̃ kura o, ɖe wòle be wòafa akɔ na mí boŋ.
4 Esi Yesu to dodokpɔ sesẽwo me yiɖase ku me ke gɔ̃ hã le fuwɔameti ŋuti la, ‘esrɔ̃ toɖoɖo.’ (Hebritɔwo 5:8) Eɖo kpe edzi be amegbetɔwo ate ŋu anɔ agbe ɖe xɔse vavãtɔ nu eɖanye dodokpɔ kawo mee woato o. Míagase nya sia me nyuie wu ne míebu nusi Yesu gblɔ tso eyomedzelawo ŋu la ŋuti, be: “Miɖo ŋku nya, si megblɔ na mi la dzi bena: Dɔla mewua eƒe aƒetɔ o.” (Yohanes 15:20) Le nyateƒe me, Yesu gblɔ ɖi le esubɔla siwo anɔ anyi le míaƒe ŋkekea me ŋu be: “Dukɔwo katã woalé fu mi le nye ŋkɔ ŋuti.”—Mateo 24:9.
5. Aleke Ŋɔŋlɔawo ɖee fiae be míado go xɔse ƒe dodokpɔwo?
5 Le ƒe alafa sia ƒe gɔmedzedze la, ʋɔnudɔdrɔ̃ dze egɔme tso Mawu ƒe aƒeme. Ŋɔŋlɔawo gblɔe ɖi be: “Azãgbe la ɖo vɔ, bena ʋɔnudɔdrɔ̃ la nadze gɔme tso Mawu ƒe aƒe me; ke ne wodze egɔme tso mía dzi la, ekema nuka lanye nuwuwu na amesiwo meɖo to Mawu ƒe nyanyui la o mahã? Eye nenye bebli hafi woaxɔ ame dzɔdzɔe la, afika ame mavɔ̃mawu kple nuvɔ̃wɔla lado ɖo mahã?”—Petro I, 4:17, 18.
Xɔse Dodokpɔ—Nukatae?
6. Nukatae xɔse si wodo kpɔ xɔ asi ale gbegbe?
6 Le gɔmesese aɖe nu la, asixɔxɔ si ŋu kakaɖedzi le aɖeke menɔa xɔse si womedo kpɔ o ŋu o, eye eƒe nuvãnyenye menɔa nyanya o. Àte ŋu atsɔe sɔ kple gaxɔgbalẽvi si wometsɔ xɔ gae haɖe o. Woate ŋu atsɔ gaxɔgbalẽvi na wò ɖe dɔ si nèwɔ ta, ɖe nusiwo woƒle le asiwò ta, alo woate ŋu atsɔe ana wò wòanye ɖe wonae wò. Awɔ abe ɖe nàte ŋu atsɔ gaxɔgbalẽvia axɔ ga lae ene, gake woatsɔ ga la na wòa? Ðe nàte ŋu atsɔe axɔ ga si woŋlɔ ɖe edzi laea? Nenema ke wòle be míaƒe xɔse nade ŋgɔ wu dzedzeme alo gbɔgblɔ ko be ele mía si. Ele be woadoe akpɔ hafi míate ŋu aka ɖe edzi be enyo eye wònye akuakua. Ne wodo míaƒe xɔse kpɔ la, míate ŋu akpɔ be enye xɔse sesẽ kple xɔse akuakua. Dodokpɔa ate ŋu ana míakpɔ nanewo, siwo me wòle be míatrɔ asi le míaƒe xɔse ŋu le alo siwo me wòahiã be míado ŋusẽe le.
7, 8. Afikae míaƒe xɔse ƒe dodokpɔwo tsona?
7 Mawu ɖea mɔ yometiti kple xɔse ƒe dodokpɔ bubuwo vaa mía dzi. Míexlẽ be: “Amesi wote kpɔ la, megagblɔ bena, Mawue te ye kpɔ o; elabena womate ŋu ate Mawu akpɔ kple nuvɔ̃ o, ke eya ŋutɔ la metea ame aɖeke kpɔna o.” (Yakobo 1:13) Ameka alo nuka gbɔe dodokpɔ siwo vaa mía dzi tsona? Satana, xexeame, kple mía ŋutɔwo míaƒe ŋutilã madebliboa gbɔe.
8 Míalɔ̃ ɖe edzi be Satana kpɔa ŋusẽ ɖe xexeame dzi geɖe ŋutɔ, ɖe eƒe susuwo kple eƒe nuwɔnawo dzi. (Yohanes I, 5:19) Eye míanyae be eyae naa wotia Kristotɔwo yome. (Nyaɖeɖefia 12:17) Gake ɖe míeka ɖe edzi nenema ke be Satana dzea agbagba be yeato míaƒe ŋutilã madeblibo la dzi akplɔ mí atrae, eye wòtsɔa xexeame ƒe ameblenuwo tea mí kpɔna kple susu be wòanye mɔ̃ aɖe mí, míagbe toɖoɖo Mawu, eye wòana Yehowa nagakpɔ ŋudzedze ɖe mía ŋu oa? Le nyateƒe me la, mele be Satana ƒe ameblemɔnuwo nawɔ nuku na mí o, elabena eto mɔ mawo ke dzi te Yesu kpɔ.—Mateo 4:1-11.
9. Aleke xɔse ƒe kpɔɖeŋuwo ate ŋu aɖe vi na míi?
9 Yehowa toa eƒe Nya la kple Kristo-hamea dzi fiaa xɔse ƒe kpɔɖeŋu nyui siwo míate ŋu asrɔ̃ la mí. Paulo xlɔ̃ nu be: “Mizu hanyesrɔ̃lawo, nɔviwo, eye milé ŋku ɖe amesiwo zɔna nenema ke la ŋuti, abe alesi míenye kpɔɖeŋu na mi ene.” (Filipitɔwo 3:17) Paulo nɔ Mawu subɔla siwo wosi ami na le ƒe alafa gbãtɔ me la dome, eye enye amesi xɔ ŋgɔ le xɔsedɔwo wɔwɔ me togbɔ be eto dodokpɔ gãwo me hã. Va ɖo ƒe alafa 20 lia ƒe nuwuwu la, xɔse ƒe kpɔɖeŋu siawo tɔgbe mele vevem le mía si o. Hebritɔwo 13:7 me nyawo gasɔ fifia abe esime Paulo ŋlɔ wo ene, be: “Miɖo ŋku mia nunɔlawo, amesiwo gblɔ mawunya na mi la dzi, eye mikpɔ woƒe agbenɔnɔ ƒe nuwuwu la ɖa, ne miasrɔ̃ woƒe xɔse.”
10. Mía ŋɔli ƒe xɔse ƒe kpɔɖeŋu kawo koŋ ye le mía si?
10 Nuxlɔ̃ame ma awɔ dɔ ɖe mía dzi nyuie wu ne míebu alesi amesiamina susɔeawo ƒe agbenɔnɔ yii ŋu. Míate ŋu alé ŋku ɖe woƒe kpɔɖeŋu ŋu eye míasrɔ̃ woƒe xɔse. Dodokpɔwo na woƒe xɔse gasesẽ wu. Tso gɔmedzedze si nɔ nyaŋui me le ƒe 1870 ƒeawo me ke la, Kristotɔwo ƒe nɔviwo ƒe habɔbɔ aɖe do le xexeame katã. Nusi do tso amesiaminawo ƒe xɔse kple dzidodo mee nye Yehowa ƒe Ðasefo siwo wu miliɔn atɔ̃ kple afã siwo le gbeƒã ɖem hele nu fiam le Mawu ƒe Fiaɖuƒea ŋu fifia. Mawu subɔla vavãwo ƒe xexeame katã ƒe hame si me dzo le la nye kpeɖodzi akuakua be wodo woƒe xɔse kpɔ nyateƒe.—Tito 2:14.
Wodo Woƒe Xɔse Kpɔ le Ƒe 1914 Nya la Me
11. Aleke gbegbee ƒe 1914 nɔ vevie na C. T. Russell kple eƒe zɔhɛwo?
11 Ƒe aɖewo do ŋgɔ na xexemeʋa gbãtɔ la, amesiamina susɔeawo nɔ gbeƒã ɖemee be ƒe 1914 anye ɣeyiɣi tɔxɛ le Biblia ƒe nyagblɔɖiwo nu. Gake wokpɔ mɔ na nanewo siwo ƒe ɣeyiɣi meɖo hafi o, eye menye nusiwo katã wonɔ mɔ kpɔm nae sɔ tututu o. Le kpɔɖeŋu me, C. T. Russell, Gbetakpɔxɔ Habɔbɔa ƒe zimenɔla gbãtɔ, kple eƒe zɔhɛwo te ŋu kpɔe be ehiã be woawɔ gbeƒãɖeɖedɔ gã aɖe. Woxlẽe be: “Woaɖe gbeƒã fiaɖuƒeŋutinya nyui sia afia amewo le xexe blibo la katã me, bena wòanye ɖaseɖiɖi na dukɔwo katã, eye ekema nuwuwu la aɖo.” (Mateo 24:14) Gake aleke wo ame ʋee mawo woawɔ dɔ mae?
12. Aleke Russell ƒe zɔhɛ aɖe wɔ nui ɖe Biblia ƒe nyateƒea ŋu?
12 Kpɔ alesi esia wɔ dɔ ɖe A. H. Macmillan, si nye Russell ƒe dɔwɔhati dzii ɖa. Wodzi Macmillan le Canada eye mexɔ ƒe 20 hafi xɔ Russell ƒe agbalẽ si nye The Plan of the Ages (Ɣeyiɣiwo Ŋuti Ðoɖo) (ƒe 1886) o. (Agbalẽ sia, si wogayɔna hã be The Divine Plan of the Ages [Mawu ƒe Ɣeyiɣiwo Ŋuti Ðoɖo], va zu agbalẽ siwo ƒe ƒuƒoƒo woyɔna be Studies in the Scriptures [Nusɔsrɔ̃ le Ŋɔŋlɔawo Me] ƒe Tata Gbãtɔ. Babla 2 lia si ƒe ŋkɔe nye The Time Is at Hand (Ɣeyiɣia Ðo Vɔ) [ƒe 1889], tɔ asi ƒe 1914 dzi be enye “Dukɔwo ƒe ɣeyiɣiwo” ƒe nuwuwu. [Luka 21:24]) Zã gbãtɔ si me Macmillan dze exexlẽ gɔme la, egblɔ le tame be: “Nya sia ɖi nyateƒe loo!” Le ƒe 1900 ƒe dzomeŋɔli me la, edo go Russell le Biblia Nusrɔ̃viwo, si nye ŋkɔ si woyɔna na Yehowa Ðasefowo ɣemaɣi, ƒe takpekpe aɖe me. Mexɔ ɣeyiɣi aɖeke hafi Macmillan xɔ nyɔnyrɔ o eye wòdze dɔwɔwɔ gɔme kple Nɔviŋutsu Russell le Habɔbɔa ƒe dɔwɔƒegã le New York.
13. Kuxi kae Macmillan kple ame bubuwo kpɔ ku ɖe Mateo 24:14 me vava ŋu?
13 Kristotɔ amesiamina mawo nɔ te ɖe nusi woxlẽ le Biblia me dzi tɔ asi edzi be ƒe 1914 anye tɔtrɔƒe vevi aɖe le Mawu ƒe tameɖoɖo me. Gake Macmillan kple ame bubuwo nɔ alesi tututu woate ŋu awɔ aɖe gbeƒã na dukɔwo abe alesi wogblɔe ɖe Mateo 24:14 ene la ŋu bum. Egblɔ emegbe be: “Meɖo ŋkui be meɖoa dze tso eŋu kple Nɔviŋutsu Russell enuenu, eye wògblɔna be, ‘Enyo, nɔvi, Yudatɔ siwo le mía gbɔ le New York la sɔ gbɔ wu esiwo le Yerusalem. Irelandtɔ siwo le afisia sɔ gbɔ wu esiwo le Dublin. Eye Italytɔ siwo le afisia sɔ gbɔ wu esiwo le Rome. Ne míete ŋu ɖo wo gbɔ le afisia la, ke ɖe míetsɔ nya la ɖo xexeamee nye ma.’ Gake metrɔ na mí tututu o. Eyata ‘Fotoɖeɖefia’ la wɔwɔ va susu me na mí.”
14. Dɔ ɖedzesi ka gɔmee wodze hafi ƒe 1914 ɖo?
14 “Xexemewɔwɔ ƒe Fotoɖeɖefia” la nye nu yeye kura! Enye sinima ƒe ɖeɖefia ƒomevi kple nutata si le amadede me woɖe ɖe ahuhɔ̃e gbabɛwo dzi ɖeɖefia, eye woɖea wo le akasa nu kple Biblia nuƒowo kpakple ha siwo wolé ɖe hagbawo dzi. Le ƒe 1913 me la, Eŋlisigbe me Gbetakpɔxɔ gblɔ le takpekpe aɖe si wowɔ le Arkansas, U.S.A. ŋu be: “Wowɔ tameɖoɖo kplikpaa aɖe si dzi amesiame lɔ̃ ɖo be game su na sinimaɖeɖe zazã le Biblia ƒe nyateƒeawo fiafia me. . . . [Russell] ɖe nu me be yele dɔ sia tututu dzi ƒe etɔ̃e nye sia eye foto dzeani alafa siwo katã ŋu wowɔ dɔ le vɔ kloe li, si ahe ameha gbogbowo eye wòaɖe gbeƒã Nyanyuia, eye woakpe ɖe amewo ŋu be woagaxɔ Mawu dzi ase.”
15. Vi kawoe “Fotoɖeɖefia” la ɖe?
15 Nu ma tututue dzɔ zi gbãtɔ si woɖe “Fotoɖeɖefia” la le January 1914 me. Woka nya siwo gbɔna ta le ƒe 1914 ƒe Eŋlisigbe me Gbetakpɔxɔ me:
April 1: “Esi osɔfo aɖe kpɔ eƒe akpa eve vɔ la, egblɔ be, ‘XEXEMEWƆWƆ ƑE FOTOÐEÐEFIA la ƒe afã koe mekpɔ, gake mesrɔ̃ nu geɖe tso Biblia me le eme xoxo wu ƒe etɔ̃ siwo metsɔ de mawunyasrɔ̃sukui.’ Esi Yudatɔ aɖe kpɔe vɔ la, egblɔ be, ‘Esi medzo yina aƒeme la, mezu Yudatɔ nyui wu alesi menɔ hafi va.’ Katolikotɔwo ƒe nunɔla kple saɖaganyɔnu geɖe de va kpɔ ÐEÐEFIA la eye wokpɔ ŋudzedze gã aɖe ɖe eŋu. . . . ÐEÐEFIA la ɖeɖe ɖekaɖeka wuieve ko ŋue míewɔ dɔ le vɔ. . . . Gake míeɖo dugã blaetɔ̃ vɔ ɖekɛ me xoxo hele eɖem le wo me . . . Amesiwo wu akpe blaetɔ̃ vɔ atɔ̃e kpɔnɛ, sea emenyawo, wòwɔa nuku na wo, wobua tame le eŋu eye wònyea yayra na wo gbesiagbe.”
June 15: “Fotoawo de dzo yeye lãme nam be makaka Nyateƒea, eye wodzi nye lɔlɔ̃ na Dziƒofofo la kple mía Fo lɔlɔ̃a Yesu ɖe edzi. Mebiaa Mawu ƒe yayra gbogbowo ɖe XEXEMEWƆWƆ ƑE FOTOÐEÐEFIA la kple eɖelawo katã dzi . . . Nye mia subɔla le Eyama me, F. W. KNOCHE.—Iowa.”
July 15: “Edzɔ dzi na mí be míakpɔ alesi fotoawo wɔ dɔ ɖe amewo dzii le du sia me, eye míeka ɖe edzi be wotsɔ ɖaseɖiɖi si wònye na xexeame la hã le ame geɖe siwo ɖee fia be yewonye nu xɔasi siwo Aƒetɔ la ŋutɔ tia la nu ƒom ƒu. Míenya Biblia nusrɔ̃vi dovevienu siwo wɔ ɖeka kple Hame la le afisia le Fotoɖeɖefia la ta. . . . Mia nɔvinyɔnu le Aƒetɔ la me, EMMA L. BRICKER.”
November 15: “Míeka ɖe edzi be adzɔ dzi na mi be miase ɖase nyui si ɖim wole to XEXEMEWƆWƆ ƑE FOTOÐEÐEFIA la dzi le London Opera House, Kingsway. Edze nukutɔe le ɖeɖefia sia ƒe akpa sia akpa be Aƒetɔ lae le mɔ fiam ale gbegbe be nɔviawo le dzidzɔ gã aɖe kpɔm ɖe eŋu . . . Amesiwo va kpɔnɛ nye ame hatsotso vovovo kple ameƒomevi vovovo; míekpɔ osɔfo geɖe hã le ekpɔlawo dome. Nunɔla aɖe . . . bia be woana tikit ye ne ye kple ye srɔ̃ yewoagava kpɔe. England Sɔlemeha la ƒe Nunɔla aɖe va kpɔ ÐEÐEFIA la zi gbɔ zi geɖe, eye . . . ekplɔ exɔlɔ̃ geɖe hã va ekpɔƒee. Bisiɔp eve hã va, tsɔ kpe ɖe ame ŋkuta geɖe ŋu.”
December 1: “Mía kple srɔ̃nye míedaa akpe na mía Fofo si le dziƒo le nyateƒe me ɖe yayra gã xɔasi si míekpɔ to dziwò la ta. Wò FOTOÐEÐEFIA lae nye nusi na míeke ɖe Nyateƒea ŋu eye míexɔe . . . Wò STUDIES IN THE SCRIPTURES (Nusɔsrɔ̃ le Ŋɔŋlɔawo Me) ƒe tata adeawo le mía si. Wole kpekpem ɖe mía ŋu ŋutɔ.”
Alesi Wowɔ le Dodokpɔ Siwo me Woto Ɣemaɣi Me
16. Nukatae ƒe 1914 nye ƒe si he dodokpɔ vɛ?
16 Gake nukae Kristotɔ veviedola siwo tsɔ wo ɖokui ke la wɔ esime woƒe mɔkpɔkpɔ be yewoava wɔ ɖeka kple Aƒetɔ la le ƒe 1914 me meva eme o? Amesiamina mawo to dodokpɔɣi sesẽ ŋutɔ aɖewo me. November 1 ƒe Eŋlisigbe me Gbetakpɔxɔ gblɔ be: “Mina míaɖo ŋku edzi be dodokpɔɣi mee míele.” Jehovah’s Witnesses—Proclaimers of God’s Kingdom (ƒe 1993) gblɔ le esia ŋu be: “Ƒe 1914 vaseɖe 1918 va nye ‘dodokpɔɣi’ ŋutɔŋutɔ na Biblia Nusrɔ̃viwo nyateƒe.” Ðe woaɖe mɔ woƒe xɔse nasesẽ wu eye woatrɔ asi le woƒe tamesusuwo ŋu, ale be woate ŋu awɔ dɔ gã si nɔ ŋgɔ laa?
17. Aleke amesiamina susɔeawo wɔ nui ɖe woƒe anyigbadzinɔnɔ ŋu esi ƒe 1914 va yi?
17 September 1, 1916, Eŋlisigbe me Gbetakpɔxɔ, ɖo eŋu be: “Míebui be Nuŋeŋedɔ si nye [amesiaminawo ƒe] Ha la nu ƒoƒoƒu la awu enu hafi Trɔ̃subɔlawo ƒe Ɣeyiɣia nawu enu; gake nya aɖeke mele Biblia me nenema o. . . . Ðe wòvea mí be Nuŋeŋedɔa gale edzi yima? . . . Nɔvi lɔlɔ̃tɔwo, nɔnɔme si wòle be wòanɔ mía si fifiae nye be míada akpe gã aɖe na Mawu, míakpɔ ŋudzedze ɖe Nyateƒe dzeani si Eyama ɖe mɔ míekpɔ eye wotsɔ dea dzesi mí la ŋu geɖe wu, eye míagatsɔ dzonɔameme geɖe wu ana kpekpeɖeŋu be míana ame bubuwo nadze si Nyateƒe ma.” Wodo woƒe xɔse kpɔ, gake wonɔ te ɖe enu eye wodo le eme dzidzedzetɔe. Gake ele be mí Kristotɔwo míanyae be xɔse ƒe dodokpɔwo ate ŋu asɔ gbɔ eye woanɔ hamehame.
18, 19. Xɔse ƒe dodokpɔ bubu kawo hãe va Mawu ƒe amewo dzi le Nɔviŋutsu Russell ƒe ku megbe?
18 Le kpɔɖeŋu me, dodokpɔ ƒomevi bubu va ame susɔeawo dzi ɣeyiɣi kpui aɖe le Nɔviŋutsu Charles T. Russell ƒe ku megbe. Enye woƒe nuteƒewɔwɔ kple xɔse ƒe dodokpɔ. Amekae nye “dɔla nuteƒewɔla” si woyɔ le Mateo 24:45? Ame aɖewo bui be Nɔviŋutsu Russell ŋutɔ ye, eye womedi be yewoakpe asi ɖe ɖoɖo yeye siwo va ŋu o. Ne eyae nye dɔla la tsã la, ke nukae wòle be nɔviawo nawɔ fifia si wòku? Ðe wòle be woadze ame yeye aɖe si woɖo yomea, alo ɖe ɣeyiɣi de na wo azɔ be woakpɔe adze sii be menye ame ɖeka aɖe ko zãm Yehowa le o, ke boŋ Kristotɔwo ƒe ha bliboa katã si nye dɔwɔnu alo dɔla ƒe ha la zãm wòlea?
19 Dodokpɔ bubu gava nyateƒe Kristotɔwo dzi le ƒe 1918 me esime xexemedziɖuɖu siwo te Kristodukɔa ƒe osɔfowo ƒlɔ dzo ɖo ‘to setɔwo dzi ɖo nugbe’ ɖe Yehowa ƒe habɔbɔa ŋu. (Psalmo 94:20) Yometiti sesẽ aɖe va Biblia Nusrɔ̃viwo dzi le Dziehe Amerika kple Europa siaa. Tsitretsiɖeŋu si osɔfowo le megbe na la va ɖo eƒe sesẽaƒe le May 7, 1918, dzi, esime United States dziɖuɖua ɖe gbe be woalé J. F. Rutherford kple eƒe zɔhɛ vevi geɖe siwo me A. H. Macmillan hã nɔ. Woka aʋatso ɖe wo si be wonye dugbãlawo, eye dziɖuɖua gbe wo ɖokuinuɖeɖe be yewomeɖi fɔ o la sese.
20, 21. Abe alesi wogblɔe ɖi ɖe Maleaxi 3:1-3 ene la, dɔ kae wowɔ le amesiaminawo dome?
20 Togbɔ be womedze sii ɣemaɣi o hã la, ameŋukɔdɔ aɖe nɔ edzi yim si ŋu woƒo nu le le Maleaxi 3:1-3 be: “Amekae ado dzi anɔ anyi le eƒe vavagbe, eye amekae anɔ te ɖe eƒe dodo nu? Elabena [nubabla ƒe dɔla la le] abe galólola ƒe dzo ene, eye wòle abe avɔnyãla ƒe adzalẽtsi ene. Abɔbɔ nɔ anyi alólo klosalo, eye wòadza eŋu, akɔ Lewi-viwo ŋu, eye wòadza wo ŋu abe sika kple klosalo ene, eye woasa vɔ na Yehowa le dzɔdzɔenyenye me.”
21 Esi Xexemeʋa I nɔ kekem la, Biblia Nusrɔ̃viwo dometɔ aɖewo gado go xɔse ƒe dodokpɔ bubu—ɖe woalé akpaɖekedzimademade me ɖe asi le xexeame ƒe asrafonyawo me loo alo womalé eme ɖe asi o. (Yohanes 17:16; 18:36) Wo dometɔ aɖewo melé eme ɖe asi o. Eyata le ƒe 1918 me la, Yehowa dɔ “nubabla ƒe dɔla,” Kristo Yesu, ɖe Eƒe gbɔgbɔmegbedoxɔa me be wòakɔ Ye subɔlawo ƒe ƒuƒoƒo sue la ŋu tso xexeame ɖiƒoƒowo me. Amesiwo ɖoe be yewoaɖe xɔse vavãtɔ afia la srɔ̃ nu tso nusi dzɔ ɖe wo dzi me eye woyi ŋgɔ tsɔ dzonɔameme yi gbeƒãɖeɖedɔa dzii.
22. Nukae gasusɔ míasrɔ̃ le xɔse ƒe dodokpɔ ŋu?
22 Menye ŋutinya gbɔlo koe nusi me míedzro la nye o. Eku ɖe nɔnɔme si me Yehowa ƒe xexeame katã ƒe hamea le le gbɔgbɔ me fifia ŋu tẽ. Gake mina míadzro xɔse ƒe dodokpɔ siwo Mawu ƒe amewo doa goe egbea la me eye míakpɔ alesi míawɔ ato wo me dzidzedzetɔe.
Èɖo Ŋku Wo Dzia?
◻ Nukatae wòle be Yehowa ƒe amewo nakpɔ mɔ be woado yewoƒe xɔse akpɔ?
◻ Agbagba kawoe wodze do ŋgɔ na ƒe 1914 be woana Mawu ƒe nya la nakaka?
◻ Nukae nye “Fotoɖeɖefia” la, eye vi kawoe wòɖe?
◻ Aleke nusiwo dzɔ le ƒe 1914-18 me do amesiaminawo kpɔe?
[Nɔnɔmetata si le axa 12]
Esi wòsusɔ vie ƒe alafa sia nadze egɔme la, ame geɖe tsɔ agbalẽ siwo nye “Millennial Dawn” si wova yɔ emegbe be “Studies in the Scriptures” nɔ Biblia srɔ̃mee
[Nɔnɔmetata si le axa 13]
Lɛta aɖe si C. T. Russell ŋlɔ si me nya woalé ɖe ka dzi ƒe ŋgɔdonya, si me wògblɔ le be: “IBSA—Dukɔwo Dome Biblia Nusrɔ̃viwo ƒe Habɔbɔ—ye wɔ ‘Xexemewɔwɔ ƒe Fotoɖeɖefia’ la. Eƒe taɖodzinue nye be woafia nu amewo le mawusubɔsubɔ kple dzɔdzɔmeŋutinunya me nyawo ŋu, eye be woatsɔ aʋli Biblia tae”
[Nɔnɔmetata si le axa 15]
Demetrius Papageorge zɔa mɔ nɔa “Xexemewɔwɔ ƒe Fotoɖeɖefia” la ɖem fia. Emegbe wodee game ɖe eƒe Kristotɔwo ƒe akpaɖekedzimademade ta