Alesi Míalala Le ‘Mɔkpɔkpɔ Me Vevie’

“Nuwɔwɔ la ƒe mɔkpɔkpɔ vevi la le mawuviwo ƒe ɖeɖefia la lalam.”—ROMATƆWO 8:19.

 1. Aleke nɔnɔme si me Kristotɔwo le egbea ɖi esi me ƒe alafa gbãtɔ me Kristotɔwo nɔ?

NƆNƆME si me Kristotɔ vavãtɔwo le egbea ɖi ƒe alafa gbãtɔ me Kristotɔwo tɔ. Nyagblɔɖi aɖee kpe ɖe Yehowa subɔlawo ŋu le ɣeyiɣi mawo me be wonya ɣeyiɣi si me Mesia la ado. (Daniel 9:24-26) Nyagblɔɖi ma ke mee wogblɔe le be woatsrɔ̃ Yerusalem, gake womegblɔ naneke si akpe ɖe Kristotɔwo ŋu be woanya dua tsrɔ̃ɣi do ŋgɔ o. (Daniel 9:26b, 27) Nenema ke le Mawu ƒe mɔfiafia me, nyagblɔɖi aɖe kpe ɖe ƒe alafa 19 lia me Biblia nusrɔ̃viwo ŋu be wonɔ mɔkpɔkpɔ me. Esi wotsɔ “azã adre” si woyɔ le Daniel 4:29 sɔ kple “trɔ̃subɔlawo ƒe ɣeyiɣi” la, ena wokpɔ mɔ be Kristo axɔ Fiaɖuƒeŋusẽ le ƒe 1914 me. (Luka 21:24; Xezekiel 21:30-32) Togbɔ be nyagblɔɖiwo le Daniel ƒe agbalẽa me fũ hã la, wo dometɔ aɖeke mekpe ɖe egbeŋkekea me Biblia nusrɔ̃viwo ŋu be woabu akɔnta anya ɣeyiɣi si tututu woatsrɔ̃ Satana ƒe nuɖoanyi bliboa o. (Daniel 2:31-44; 8:23-25; 11:36, 44, 45) Ke hã nusia adzɔ kpuie, elabena míele “nuwuɣi” la me.—Daniel 12:4.a

Ŋudzɔnɔnɔ le Kristo ƒe Anyinɔɣia Me

2, 3. (a) Nukawoe nye kpeɖodzi vevitɔwo be míele Kristo ƒe anyinɔnɔ le fiaɖuŋusẽ ƒe ɣeyiɣi la me? (b) Nukae fia be ele be Kristotɔwo nanɔ ŋudzɔ le Kristo ƒe anyinɔɣia me?

² Nyateƒee, nyagblɔɖi aɖee na Kristotɔwo nɔ mɔkpɔkpɔ me hafi wova tsɔ Fiaɖuƒeŋusẽ na Kristo le ƒe 1914 me. Gake nudzɔdzɔwoe nye ‘dzesi’ si Kristo na be woafia yeƒe anyinɔnɔ kple nuɖoanyiawo ƒe nuwuɣi. Eye eƒe anyinɔnɔa adze egɔme vɔ hafi nusiawo dometɔ akpa gãtɔ adzɔ woakpɔ. Nudzɔdzɔ siawo—siwo nye aʋawɔwɔwo, nuɖuɖu ƒe veve, anyigbaʋuʋu, dɔvɔ̃, sedzimawɔmawɔ ƒe dzidziɖedzi, Kristotɔwo yometiti, kple gbeƒãɖeɖe Mawu Fiaɖuƒe ŋuti nyanyuia le xexeame katã—nye kpeɖodzi vevitɔ be míele Kristo ƒe anyinɔnɔ le fiaɖuŋusẽ me ƒe ɣeyiɣi me.—Mateo 24:3-14; Luka 21:10, 11.

³ Gake nya si ko gblɔm Yesu nɔ le eƒe kaklãnuxɔxlɔ̃a me na eƒe nusrɔ̃lawoe nye be: “Mikpɔ nyuie, eye minɔ ŋudzɔ; . . . Minɔ ŋudzɔ!” (Marko 13:33, 37; Luka 21:36) Ne míexlẽ nya siwo ƒo xlã ŋudzɔnɔnɔ nuxlɔ̃ame siawo nyuie la, míakpɔe be menye ɖe Kristo nɔ gbɔgblɔm koŋ be woake ŋku nyuie ɖe dzesi si afia be yeƒe anyinɔnɔ dze egɔme ŋu o. Ke boŋ ɖe wònɔ gbɔgblɔm na eƒe nusrɔ̃lawo be woanɔ ŋudzɔ le yeƒe anyinɔɣia me. Nukae wobia tso Kristotɔwo si be woanɔ ŋudzɔ na?

 4. Taɖodzinu kae le dzesi si Yesu na ŋu?

⁴ Biabia si ŋu Yesu tsɔ eƒe nyagblɔɖi vevi la ɖoe nye: “Ɣekaɣie nusiawo ava [nusiwo adzɔ do ŋgɔ na Yudatɔwo ƒe nuɖoanyia ƒe tsɔtsrɔ̃], eye ka enye wò anyinɔnɔ kple nuɖoanyiawo ƒe nuwuwu la ƒe dzesi?” (Mateo 24:3, NW) Menye Kristo ƒe anyinɔnɔ koe dzesi si wògblɔ ɖi la ana woade dzesii o ke ana woadze si nusiwo adzɔ do ŋgɔ na nuɖoanyi vɔ̃ɖi sia ƒe nuwuwu hã.

 5. Aleke Yesu ɖee fiae be togbɔ be yeanɔ anyi le gbɔgbɔ me hã la, ‘yegagbɔna’ kokoko?

⁵ Yesu ɖee fia be yeava le ŋusẽ kple ŋutikɔkɔe me le yeƒe ‘anyinɔɣia’ (Helagbe, pa·rou·siʹa) me. Egblɔ le eƒe ‘vava’ (si wozã Helagbe me nya erʹkho·mai ƒe tɔtrɔ vovovowo na) ŋu be: “Tete Amegbetɔvi la ƒe dzesi lado ɖe dziŋgɔli me, eye anyigba dzi ƒomeawo katã woado konyifaɣli, eye woakpɔ Amegbetɔvi la le dziƒolilikpowo dzi gbɔna kple ŋusẽ kple ŋutikɔkɔe geɖe. . . . Ke misrɔ̃ lododo le gboti ŋuti! Ne tsi ɖo eƒe alɔwo me, eye wòto aŋgbawo la, ekema midze sii bena, dzomeŋɔli le ɖoɖo ge; nenema ke miawo hã, ne miekpɔ nusiawo katã la, midze sii bena, [Kristo gogo] agbo la nu. . . . Eyaŋuti minɔ ŋudzɔ, elabena mienya ŋkeke ka dzi mia Aƒetɔ la ava o. . . . Misu te; elabena Amegbetɔvi la ava le gaƒoƒo, si ŋuti miebu o la me.”—Mateo 24:30, 32, 33, 42, 44, míawoe te gbe ɖe edzi.

Nukatae Yesu Kristo Gbɔna?

 6. Aleke ‘Babilon Gã la’ gbɔna tsɔtsrɔ̃ gee?

⁶ Togbɔ be Yesu Kristo va nye Fia tso ƒe 1914 me ke hã la, ele be wòadrɔ̃ ʋɔnu nuɖoanyiwo kple ame ɖekaɖekawo hafi ahe to na amesiwo wòkpɔ be wo vɔ̃ɖi. (Tsɔe sɔ kple Korintotɔwo II, 5:10.) Eteƒe madidi o Yehowa adee susu me na dunyahedziɖulawo be woatsrɔ̃ ‘Babilon Gã’ si nye xexeame katã ƒe alakpasubɔsubɔhawo ƒe fiaɖuƒe. (Nyaɖeɖefia 17:4, 5, 16, 17) Apostolo Paulo gblɔe kɔte be Yesu Kristo atsrɔ̃ ‘sedzimawɔla la’—si nye Kristodukɔa ƒe hakplɔla xɔsegbela siwo nye ame vevitɔwo le ‘Babilon Gã’ la me. Paulo ŋlɔe be: “Tete woaɖe sedzimawɔla ɖe go, amesi Aƒetɔ Yesu lawu kple eƒe nu me gbɔgbɔ, eye wòatsrɔ̃e to eƒe anyinɔnɔ ƒe ɖeɖefia la me.”—Tesalonikatɔwo II, 2:3, 8.

 7. Ne Amegbetɔvi la va ɖo le eƒe ŋutikɔkɔe me la, ʋɔnu kae wòadrɔ̃?

⁷ Le ɣeyiɣi si gbɔna kpuie me la, Kristo anɔ te ɖe alesi dukɔwo me tɔwo wɔ nu ɖe nɔvia siwo le anyigba dzi ŋu la dzi adrɔ̃ ʋɔnu wo. Míexlẽ be: “Ne Amegbetɔvi la ava le eƒe ŋutikɔkɔe me, eye dɔlawo katã akpe ɖe eŋuti la, ekema abɔbɔ nɔ eƒe ŋutikɔkɔezikpui la dzi; eye woaƒo dukɔwo katã nu ƒu ɖe eƒe ŋku me, eye wòamã wo me atso wo nɔewo gbɔ, abe alesi alẽkplɔla mãa alẽwo kple gbɔ̃wo mee ene; eye wòatsɔ alẽwo aɖo eƒe nuɖusi me, ke atsɔ gbɔ̃wo aɖo eƒe mia me. . . . Fia la aɖo eŋu agblɔ na [alẽawo] bena: Vavã mele egblɔm na mi bena: Nusianu, si miewɔ na nenem nɔvinye sue siawo dometɔ ɖeka la, nyee miewɔe na. . . . Eye [gbɔ̃awo ayi ɖe tsɔtsrɔ̃] mavɔ la me, ke ame dzɔdzɔewo la woayi ɖe agbe mavɔ la me.”—Mateo 25:31-46.

 8. Aleke Paulo gblɔ Kristo ƒe vava be yeadrɔ̃ toheʋɔnu ame mavɔ̃mawuwoe?

⁸ Abe alesi wòdze le alẽwo kple gbɔ̃wo ƒe lododoa me ene la, Yesu adrɔ̃ ʋɔnu mamlɛa ame mavɔ̃mawuwo katã. Paulo na kakaɖedzi ehati xɔsetɔwo be Yesu “ana gbɔɖeme mi kpakple mí katã siaa le Aƒetɔ Yesu Kristo kple eƒe ŋusẽ ƒe dɔlawo ƒe ɖeɖefia tso dziƒo la me le dzo ƒe aɖe me, esime wòabia hlɔ̃ amesiwo menya Mawu o kple amesiwo meɖoa to mía Aƒetɔ Yesu Kristo ƒe nyanyui la o, amesiwo akpɔ fetu vɔ̃, si nye gbegblẽ mavɔmavɔ la, tso Aƒetɔ ƒe ŋku me kple eƒe ŋusẽ ƒe ŋutikɔkɔe la gbɔ, ne ava, bena wòakpɔ ŋutikɔkɔe le eƒe ame kɔkɔewo me.” (Tesalonikatɔwo II, 1:7-10) Esi nudzɔdzɔ ʋãdziname siawo katã le mía ŋgɔ ta la, ɖe mele be míaɖe xɔse afia eye míatsɔ mɔkpɔkpɔ vevie anɔ ŋudzɔ na Kristo ƒe vava la oa?

Didi Vevie Tsɔtsɔ Lala Kristo ƒe Ðeɖefia Lae

9, 10. Nukata amesiamina siwo gakpɔtɔ le anyigba dzi la le mɔkpɔkpɔ me vevie na Yesu Kristo ƒe ɖeɖefia?

⁹ Menye ɖeko woava tsrɔ̃ ame vɔ̃ɖiwo le ‘Aƒetɔ Yesu Kristo ƒe ɖeɖefia tso dziƒo la’ me ko evɔ o ke woana teƒeɖoɖo ame dzɔdzɔewo hã. Kristo nɔvi amesiamina susɔe siwo gale anyigba dzi agate ŋu akpe fu hafi Kristo ƒe ɖeɖefia la naɖo ya, gake woƒe dziƒomɔkpɔkpɔ kɔkɔe la na wotsoa aseye. Apostolo Petro ŋlɔ ɖo ɖe Kristotɔ amesiaminawo be: “Zi geɖe alesi miekpɔ gome le Kristo ƒe fukpekpewo me la, zi geɖe ma ke mikpɔ dzidzɔ bena, le eƒe ŋutikɔkɔe ƒe ɖeɖefia me hã la miakpɔ dzidzɔ, eye miatso aseye.”—Petro I, 4:13.

¹⁰ Amesiaminawo ɖoe kplikpaa be yewoakpɔtɔ awɔ nuteƒe vaseɖe esime Kristo ‘nava ƒo yewo nu ƒu ɖe eɖokui gbɔ’ bene woƒe xɔse si ‘wodo kpɔ’ la “[nanye] kafukafu kple ŋutikɔkɔe kple bubu le Yesu Kristo ƒe ɖeɖefia la me.” (Tesalonikatɔwo II, 2:1; Petro I, 1:7) Woate ŋu agblɔ le Kristotɔ wɔnuteƒe siawo siwo wotsɔ gbɔgbɔ dzii ŋu be: “Woli ke Kristo ƒe ɖaseɖiɖi le mia me . . . bena miele megbe le amenuvevenunana aɖeke me o, eye miele mía Aƒetɔ Yesu Kristo ƒe ɖeɖefia la lalam.”—Korintotɔwo I, 1:6, 7.

11. Esi Kristotɔ amesiaminawo le Yesu Kristo ƒe ɖeɖefia lalam la, nuka wɔm wole?

¹¹ Amesiamina susɔeawo ƒe seselelãme ɖi Paulo tɔ, amesi ŋlɔ be: “Mebuna bena, ɣeyiɣi sia me fukpekpewo medze ŋutikɔkɔe, si wole ɖeɖe ge ɖe go afia le mía ŋuti la o.” (Romatɔwo 8:18) Menye ɣeyiɣikɔntabubuwoe ana ŋusẽ nanɔ woƒe xɔse ŋu o. Wobiã ŋku ɖe Yehowa ƒe subɔsubɔdɔ wɔwɔ ŋu, eye wonyea kpɔɖeŋu nyui na woƒe zɔhɛ siwo nye ‘alẽ bubuawo.’ (Yohanes 10:16) Amesiamina siawo nya be nuɖoanyi vɔ̃ɖi sia ƒe nuwuwu tu aƒe, eye wowɔna ɖe Petro ƒe nuxlɔ̃me sia dzi be: “Mibla miaƒe tamesusuwo ƒe aliwo dzi, minɔ mo xexi, eye mitsɔ miaƒe mɔkpɔkpɔ ɖo amenuveve, si [woatsɔ avɛ na mi, NW] le Yesu Kristo ƒe ɖeɖefia me la dzi blibo.”—Petro I, 1:13.

“Nuwɔwɔ la ƒe Mɔkpɔkpɔ Vevi”

12, 13. Aleke wòdzɔe be ‘wobɔbɔ nuwɔwɔ siwo nye amegbetɔwo ɖe gbegblẽ te,’ eye nukae alẽ bubuawo le mɔ kpɔm na?

¹² Ðe nane li si alẽ bubuawo hã anɔ mɔ kpɔm na veviea? Nane li woakpɔ mɔ na godoo. Esi Paulo ƒo nu tso amesiwo Yehowa xɔ wozu ‘via’ siwo wotsɔ gbɔgbɔ dzii eye woanye “Kristo ƒe hadomenyilawo” le dziƒo Fiaɖuƒea me ƒe ŋutikɔkɔemɔkpɔkpɔa ŋu vɔ la, egblɔ be: “Nuwɔwɔ la ƒe mɔkpɔkpɔ vevi la le mawuviwo ƒe ɖeɖefia la lalam. Elabena wobɔbɔ nuwɔwɔ la ɖe gbegblẽ la te, menye eya ŋutɔ ƒe lɔlɔ̃nu o, ke le amesi bɔbɔe ɖe anyi la ŋuti hena mɔkpɔkpɔ. Eyata woaɖe nuwɔwɔ la ŋutɔ hã tso gbegblẽ ƒe kluvinyenye la me ayi ɖe mawuviwo ƒe ŋutikɔkɔe ƒe ablɔɖe la me.”—Romatɔwo 8:14-21; Timoteo II, 2:10-12.

¹³ Le Adam ƒe nuvɔ̃ ta la, ‘wobɔbɔ eƒe dzidzimeviwo katã ɖe gbegblẽ te,’ si nye be wodzia wo ɖe nuvɔ̃ kple ku ƒe kluvinyenye me. Womete ŋu ɖe wo ɖokui tso kluvinyenye ma me o. (Psalmo 49:8; Romatɔwo 5:12, 21) Oo, aleke gbegbe wòdzroa alẽ bubuawo be ‘woaɖe yewo atso gbegblẽ ƒe kluvinyenye mee’ nye si! Gake hafi woaɖe wo la, ele be nanewo nadzɔ le Yehowa ƒe ɣeyiɣiwo kple azãgbewo nu gbã.

14. Nukawoe adzɔ le “mawuviwo ƒe ɖeɖefia la” me, eye aleke wòava eme be ‘woaɖe ameƒomea tso gbegblẽ ƒe kluvinyenye mee’?

¹⁴ Ele be ‘Mawu ƒe vi’ amesiamina susɔeawo ƒe “ɖeɖefia” nava gbã. Nukawoe adzɔ le ɖeɖefia sia me? Le Mawu ƒe ɣeyiɣi ɖoɖi dzi la, adze na alẽ bubuawo be ‘wotre’ amesiaminawo ‘nu’ keŋkeŋ vɔ eye wokɔ wo ŋuti be woaɖu fia kple Kristo. (Nyaɖeɖefia 7:2-4) Woagaɖe ‘Mawu ƒe vi’ siwo wofɔ ɖe tsitre la ‘afia’ esime woakpe ɖe Kristo ŋu woatsrɔ̃ Satana ƒe nuɖoanyi vɔ̃ɖi sia. (Nyaɖeɖefia 2:26, 27; 19:14, 15) Emegbe le Kristo ƒe Ƒe Akpe Ðeka Dziɖuɖua me la, ‘woagaɖe wo afia’ woanye nunɔla siwo dzi woato ana Yesu ƒe tafevɔsa ƒe viɖewo nawɔ dɔ aɖo “nuwɔwɔ” siwo nye amegbetɔwo gbɔ. Awɔe be ‘woaɖe ameƒomea atso gbegblẽ ƒe kluvinyenye me’ eye mlɔeba woayi ɖe “mawuviwo ƒe ŋutikɔkɔe ƒe ablɔɖe la me.” (Romatɔwo 8:21; Nyaɖeɖefia 20:5; 22:1, 2) Esi mɔkpɔkpɔ wɔnuku siawo le ŋgɔ na alẽ bubuawo ta la, ɖe wòwɔ nuku be wotsɔ ‘mɔkpɔkpɔ vevie’ le ‘mawuviwo ƒe ɖeɖefia la lalama’?—Romatɔwo 8:19.

Yehowa ƒe Dzigbɔɖi Wɔe be Amewo Akpɔ Ðeɖe

15. Nukae mele be míaŋlɔ be gbeɖe o le ɣeyiɣi siwo Yehowa ɖo be nuwo nadzɔ ŋu?

¹⁵ Yehowae nye Gamedziwɔla Gãtɔ. Nuwo adzɔ le ɣeyiɣi siwo wòɖo dzi pɛpɛpɛ. Ðewohĩ menye ɣesiaɣie nuwo adzɔ le alesi míekpɔ mɔ na woe nu o. Gake xɔse blibo nenɔ mía si be Mawu ƒe ŋugbedodowo katã ava eme. (Yosua 23:14) Ðewohĩ aɖe mɔ nuwo nanɔ edzi yim adidi wu alesi ame geɖe asusui. Gake mina míadze agbagba ase eƒe mɔwo gɔme eye míakpɔ ŋudzedze ɖe eƒe nunya ŋu. Paulo ŋlɔ be: “Oo, Mawu ƒe kesinɔnuwo kple nunya kple sidzedze me goglo loo! Aleke eƒe ʋɔnudɔdrɔ̃wo me dzodzro tsitotsito meli o, eye eƒe mɔwo mele nyanya me gobi o ale! Elabena ameka nya Aƒetɔ la ƒe tamesusu, alo ameka zu eƒe adaŋudela kpɔ mahã?”—Romatɔwo 11:33, 34.

16. Amekawoe Yehowa ƒe dzigbɔgbɔ blewu aɖe vi na?

¹⁶ Petro ŋlɔ be: “Lɔlɔ̃tɔwo, esi miele nusiawo [siwo nye “dziƒo” kple “anyigba” xoxo la ƒe tsɔtsrɔ̃ kpakple Mawu ƒe “dziƒo yeye” kple “anyigba yeye” la ƒe xɔxɔ ɖe wo teƒe] lalam ŋuti la, mido vevie, bena woakpɔ mi le ŋutifafa me ɖimaƒomaƒo kple mokaka manɔŋui le eƒe ŋku me [mlɔeba, NW], eye mibu mía Aƒetɔ ƒe dzigbɔgbɔ blewu la bena, enye mia xɔxɔ.” Le Yehowa ƒe dzigbɔgbɔ blewu ta la, wole mɔnukpɔkpɔ nam ame miliɔn bubu geɖe bene woakpɔ ɖeɖe le ‘Yehowa ƒe ŋkeke’ si ava le vome “abe fiafitɔ ene” la dzi. (Petro II, 3:9-15) Eƒe dzigbɔgbɔ blewu ganye mɔnukpɔkpɔ na mía dometɔ ɖesiaɖe be ‘míatsɔ vɔvɔ̃ kple dzodzo nyanyanya awɔ mía ŋutɔwo míaƒe ɖeɖekpɔkpɔdɔe.’ (Filipitɔwo 2:12) Yesu gblɔ be ne míedi be woabu mí be míedze eye be míate ŋu ‘atsi tre ɖe Amegbetɔvi la ŋkume’ ne wòva ʋɔnu drɔ̃ ge la, ke ele be ‘míakpɔ mía ɖokui dzi nyuie’ eye ‘míanɔ ŋudzɔ.’—Luka 21:34-36; Mateo 25:31-33.

Tsɔ Dzidodo Nɔ Lalamee

17. Apostolo Paulo ƒe nya kawo dzie wòle be míawɔ ɖo?

¹⁷ Paulo de dzi ƒo na eƒe gbɔgbɔmenɔviwo be woƒe ŋku naganɔ “nusiwo wokpɔna la ŋu o, ke nusiwo womekpɔna o la boŋ ŋuti.” (Korintotɔwo II, 4:16-18) Medi be naneke nawɔe be dziƒoteƒeɖoɖo si woɖo wo ŋkume la nado viviti ɖe wo o. Kristotɔ amesiaminawo loo alo alẽ bubuawoe míeɖanye o, mina mɔkpɔkpɔ wɔnuku si woɖo mía ŋkume nakpɔtɔ anɔ míaƒe susu me eye míagana ta o. Mina míatsɔ ‘dzidodo anɔ lalamee ɖaa’ eye míaɖee afia be “míawo míenye amesiwo gbugbɔna ɖe megbe ɖe gbegblẽ me la dometɔwo o, ke boŋ amesiwo xɔnɛ sena hena luʋɔ xɔxɔ la dometɔwo míenye.”—Romatɔwo 8:25; Hebritɔwo 10:39.

18. Nukata míate ŋu atsɔ kakaɖedzi agblẽ ɣeyiɣiwo kple azãgbewo ɖe Yehowa si me?

¹⁸ Míate ŋu atsɔ kakaɖedzi agblẽ ɣeyiɣiawo kple azãgbewo ɖe Yehowa si me. Eƒe ŋugbedodowo ‘mahe ɖe megbe le eƒe ɣeyiɣiɖoɖiwo nu o.’ (Xabakuk 2:3) Hafi ɣeyiɣi ma nava la, nuxlɔ̃amenya si Paulo gblɔ na Timoteo la hiã míawo hã vevie fifia wu tsã. Egblɔ be: “Mele atam kam na wò, le Mawu kple Yesu Kristo, amesi le ʋɔnu drɔ̃ ge ame gbagbewo kple ame kukuwo le eƒe ɖeɖefia kple fiaɖuƒe me la, ƒe ŋku me: Ðe gbe ƒã nya la, nɔ edzi, vovoɣi li alo vovoɣi meli o, . . . wɔ nyanyuigblɔla ƒe dɔ, eye nawu wò subɔsubɔdɔ la nu blibo.”—Timoteo II, 4:1-5.

19. Nuka wɔɣie ɣeyiɣi sia ganye kokoko na Yehowa ƒe amewo, eye nukatae?

¹⁹ Amewo ƒe agbe ɖo afɔku me—mía kple mía haviwo siaa tɔ. Paulo ŋlɔ be: “Kpɔ ɖokuiwò kple wò nufiafia la dzi nyuie, nɔ nusiawo dzi; elabena ne èwɔ esia la, àxɔ ɖokuiwò kple amesiwo ɖoa to wò la, ɖe agbe.” (Timoteo I, 4:16) Ɣeyiɣi kpui aɖe koe susɔ na nuɖoanyi vɔ̃ɖi sia. Esi míetsɔ didi vevie le nu ʋãdziname siwo ava dzɔ le mía ŋgɔ lalam la, mina wòanɔ susu me na mí ɣesiaɣi be ɣeyiɣi sia ganye Yehowa ƒe ɣeyiɣi kple azãgbe kokoko be yeƒe amewo naɖe gbeƒã Fiaɖuƒe ŋuti nyanyuia. Ele be woawu dɔ sia nu alesi wòdii. “Ekema,” abe alesi Yesu gblɔe ene la, “nuwuwu aɖo.”—Mateo 24:14.

[Etenuŋɔŋlɔ]

Numetoto

◻ Aleke míaƒe nɔnɔmea ɖi esi me ƒe alafa gbãtɔ me Kristotɔwo nɔ le ɣeyiɣikɔntabubuwo gome?

◻ Nukatae wòle be Kristotɔwo ‘nakpɔtɔ anɔ ŋudzɔ’ le Kristo ƒe anyinɔɣia gɔ̃ hã me?

◻ Nukatae nuwɔwɔ siwo nye amegbetɔwo le mɔ kpɔm vevie na “mawuviwo ƒe ɖeɖefia la”?

◻ Nukatae míate ŋu atsɔ kakaɖedzi agblẽ ɣeyiɣiwo kple azãgbewo ɖe Yehowa si me?

[Nɔnɔmetata si le axa 17]

Ele be Kristotɔwo nanɔ ŋudzɔ anɔ Kristo ƒe vava lalam

[Nɔnɔmetata si le axa 18]

Amesiamina susɔeawo ƒe ŋku biã ɖe Yehowa subɔsubɔ ŋu kokoko, eye wometu woƒe xɔse ɖe ɣeyiɣikɔntabubuwo dzi o