Dario—Fia si Wɔa Nu le Dzɔdzɔenyenye Me

FIA xɔŋkɔ aɖe ƒo adegbe gbeɖeka le du si wòtso ŋu be: “Meɖo gli sesẽ aɖe ƒo xlã Babilon le eƒe ɣedzeƒe gome. Meɖe ʋe gã globo ƒo xlãe . . . Metsɔ aŋɔ kple anyikpe ɖo gli gã aɖe si womate ŋu aho o abe to ene.” Nyateƒee, Babilon Fia Nebukadnezar ƒo eɖokui ɖe dutsotsodɔ gã aɖe me eye edze agbagba blibo tɔ kpɔ ɖe eƒe fiaɖuƒea ƒe fiadu ŋu. Gake Babilon-dugã la, meli ke tegbee abe alesi wòsusui ene o.

Esia ƒe kpeɖodzie nye nusi dzɔ le October 5, ƒe 539 D.M.Ŋ. dzi. Persia-fia Kores II kple Mediatɔwo ƒe asrafo siwo kpe ɖe eŋu ɖu Babilon dzi ɣemaɣi hewu Kaldeatɔwo ƒe fia Belsazar. Ke fifia amekae anye du sia si dzi woɖu yeyee la ƒe dziɖula gbãtɔ? Mawu ƒe nyagblɔɖila Daniel si nɔ dua me hafi woɖu edzi la ŋlɔ be: “Mediatɔ Dario xɔ fiaɖuƒe la, esime wòtsi xɔ ƒe blaade vɔ eve.”—Daniel 5:30–6:1.

Amekae nye Dario? Dziɖula ka tɔgbe wòva nye? Aleke wòwɔ nu ɖe nyagblɔɖila Daniel si nɔ aboyome le Babilon wu ƒe 70 sɔŋ la ŋui?

FIA SI ŊUTINYA MEDE EDEƑE O

Ŋutinya ʋee aɖe koe woŋlɔ tso Mediatɔ Dario ŋu. Mediatɔwo mewɔ nuŋlɔɖi boo aɖeke o. Azɔ hã la, ŋutinya siwo mede tutu o siwo me dometsotso geɖe le koe kpedzinuŋlɔɖi siwo ŋu woke ɖo le tomekuku me le Titina Ɣedzeƒe ɖe fia. Blema xexemenuŋlɔɖi bubu siwo li la le ʋee eye wo kple nudzɔdzɔ siwo ku ɖe Dario ŋu dome didi ƒe alafa alo esi wu nenema.

Gake kpeɖodziwo ɖee fia be, esi Persia-dziɖula Kores II ɖu Ecbatana, si nye fiadu na Media dzi megbe la, ete ŋu wɔe be Mediatɔwo bɔbɔ wo ɖokui nɛ. Esia megbe la, Mediatɔwo kple Persiatɔwo wɔ ɖeka ɖawɔa aʋa le eƒe kpɔkplɔ te. Agbalẽŋlɔla Robert Collins ŋlɔ nu tso woƒe ɖekawɔwɔa ŋu ɖe eƒe agbalẽ si nye The Medes and Persians me be: “Mediatɔwo nɔ tasɔsɔ me kple Persiatɔwo le ŋutifafa gome. Enuenu la, wonaa ɖoƒe kɔkɔ sua wo si le dukpɔkplɔ me eye woɖoa wo asrafomegãwoe le Persia-srafowo dome. Dukɔ bubu me tɔwo ƒoa nu tso Mediatɔwo kple Persiatɔwo ŋu vovototomademade amesiwo dzi woɖu kple dziɖulawo domee.” Esia na Media kple Persia wɔ ɖeka zu Medo-Persia Fiaɖuƒe.—Daniel 5:28; 8:3, 4, 20.

Nyateƒee, Mediatɔwo wɔ akpa gã aɖe le Babilon dzi ɖuɖu me. Ŋɔŋlɔawo ɖee fia be “Axasweros vi Dario, amesi tso Media-ƒome la me” ye nye Medo-Persia Fiaɖuƒea ƒe fia gbãtɔ si ɖu Babilon dzi. (Daniel 9:1) Ŋusẽ siwo wòkpɔ le eƒe fianyenye me ƒe ɖee nye be wòade sewo “ɖe Mediatɔwo kple Persiatɔwo ƒe se, si metrɔna o la nu.” (Daniel 6:9) Nusiwo Biblia gblɔ tso Dario ŋu hã na míedze si eƒe amenyenye vie kpakple nusi koŋ ta xexemenuŋlɔɖi boo aɖeke meli tso eŋu o.

WOVE DANIEL NU

Biblia gblɔ be esi Dario dze dziɖuɖu gɔme le Babilon teti ko la, “[eɖo] amegã alafa ɖeka kple blave fiaɖuƒe la nu, amesiwo anɔ fiaɖuƒe blibo la me. Eɖo tatɔ etɔ̃ wo nu, amesiwo dome Daniel le.” (Daniel 6:2, 3) Gake ɖoƒe kɔkɔ si nɔ Daniel si medze tatɔ bubuawo ŋu o. Ðikeke mele eme o be eƒe nuteƒewɔwɔ zu mɔxenu na nufitifitiwɔwɔ, eye anya do dziku na wo. Ŋuʋaʋã hã anya kpɔ ŋusẽ ɖe tatɔawo dzi, le esi fia la lɔ̃ Daniel eye wòɖoe be yeatsɔe aɖo dumegãwo ƒe tatɔe ta.

Tatɔ eveawo kple amegãawo ɖoe be yewoatre mɔ̃ nɛ le senyawo me kple susu be yewoatsɔ atsi nɔnɔmea nui. Wova fia la gbɔ eye wobia tso esi be wòade asi se si nye be ame aɖeke ‘negabia nu mawu alo amegbetɔ bubu aɖeke’ tsɔ wu Dario ko o, hena ŋkeke 30 la te. Wodoe ɖa be amesiame si ada se sia dzi la, woatsɔe aƒu gbe ɖe dzatawo ƒe do me. Wona Dario susui be se sesẽ sia adze dziɖuɖumegãwo katã hã ŋu, eye ewɔ nɛ be ɖoɖo sia fia be wole megbe na fia la.—Daniel 6:2-4, 7-9.

Ale Dario de asi nuŋɔŋlɔa te, eye eteƒe medidi o emetsonuwo va dze ŋgɔe. Daniel va nye ame gbãtɔ si da sea dzi le esi wòyi edzi nɔa gbe dom ɖa na Yehowa Mawu ta. (Tsɔe sɔ kple Dɔwɔwɔwo 5:29.) Togbɔ be fia la dze agbagba ɖesiaɖe be yeatrɔ se matrɔmatrɔa hã la, wotsɔ Daniel nuteƒewɔla la ƒu gbe ɖe dzatawo ƒe do me kokoko. Dario ka ɖe edzi be ŋusẽ le Daniel ƒe Mawu si be wòakpɔ nyagblɔɖila la ta be wòatsi agbe.—Daniel 6:10-18.

Le Dario ƒe zãdomadɔlɔ̃e kple nutsitsidɔ megbe la, eɖe abla yi dzatawo ƒe do la gbɔ. Aleke gbegbee dzi dzɔe enye si esi wokpɔ Daniel le agbe eye nuvevi aɖeke mewɔe o! Abe wɔɖenui si le dzɔdzɔenyenye nu ene la, enumake fia na wotsɔ Daniel nutsolawo kple woƒe ƒomewo ƒu gbe ɖe dzatawo ƒe doa me. Ede se hã be ‘Daniel ƒe Mawu nadzi ŋɔ, eye woavɔ̃e le yeƒe fiaɖuƒe bliboa me.’—Daniel 6:19-28.

Eme kɔ be Dario de bubu Daniel ƒe Mawu kple eƒe subɔsubɔ ŋu eye wòdi vevie be yeaɖɔ nusi gblẽ la ɖo. Gake ele eme be tohehe na Daniel nutsolawo wɔe be amegã susɔeawo lé fui vevie. Gakpe ɖe eŋu la, ele eme be Dario ƒe se si wòde le fiaɖuƒe bliboa me be amesiame ‘navɔ̃ Daniel ƒe Mawu’ do dziku na Babilon-trɔ̃nuawo ƒe ha sẽŋua vevie. Esi wònye nudzɔdzɔ siawo anya kpɔ ŋusẽ ɖe agbalẽŋlɔlawo dzi kokoko ta la, ne woblu afɔ na xexemenuŋlɔɖiawo be woɖe nyatakaka siwo ku ɖe Dario ŋu ɖa la, mewɔ nuku o. Gake nuŋlɔɖi kpui si le Daniel ƒe agbalẽ me ɖee fia be Dario nye dziɖula si wɔa nu ameŋkumemakpɔmakpɔtɔe kple le dzɔdzɔenyenye me.