Fiaɖuƒe Gbeƒãɖelawo Ka Nya Ta
Gbeƒãɖeɖe ‘le Ɣeyiɣi Nyui Kple Ɣeyiɣi Sesẽwo Me’
ESIME aʋa dzɔ le Bosnia kple Herzegovina katã la, ame akpe geɖe do go nɔnɔme sesẽwo ŋutɔ. Le ɣeyiɣi sesẽ mawo me la, Yehowa Ðasefowo dze agbagba ɖesiaɖe be yewoatsɔ dzideƒo kple mɔkpɔkpɔ ayi na amewo. Nya siwo gbɔna nye lɛta aɖe si Ðasefo aɖe si subɔ ɣeaɖeɣi le Sarajevo ŋlɔ la ƒe akpa aɖewo.
“Agbenɔnɔ sesẽ ŋutɔ le afisia, gake ame geɖe ɖoa to Biblia me nyateƒea. Ðasefo siwo le afisia ɖoa kpɔɖeŋu nyui le kutrikuku me. Ŋutilãmenu boo aɖeke mele wo si o, gake woɖea nɔnɔme nyuitɔ kekeake fiana. Sɔhɛ siwo katã le hamea me kloe le ɣeyiɣiawo katã ƒe subɔsubɔdɔa wɔm. Veviedodo sia dea dzi ƒo na gbeƒãɖela yeyewo, eye zi geɖe la, wozãa gaƒoƒo 60 alo esi wu nenema le ɣleti ɖeka me tsɔ wɔa subɔsubɔdɔa tso ɣleti gbãtɔ si woadze gbeƒãɖeɖe gɔme la me ke.
“Tsɔ kpe ɖe gbeƒãɖeɖe tso aƒeme yi aƒeme ŋu la, míete mɔnu bubu vovovowo kpɔ be míaɖo amewo gbɔ. Le kpɔɖeŋu me, nu nyui geɖe do tso Biblia-srɔ̃gbalẽwo mamã le ameɖibɔ geɖe siwo le dua me la me.
“Woɖi ɖase le kɔdziwo hã. Atikewɔlawo ƒe tatɔ si le Dziŋutinusrɔ̃ƒe si le Sarajevo-kɔdzi xɔ December 8, 1996, ƒe Nyɔ! si ƒe akpa dzi tanya gblɔ be ‘Dzidɔ—Nukae Woate Ŋu Awɔ le Eŋu?’ Ebia be woatsɔ geɖe akpee ale be yeate ŋu ana ɖe ɖɔkta bubuwo. Emegbe woɖe mɔ na Ðasefoawo wotsa le dɔnɔ siwo katã le eƒe dɔwɔƒe dzi. Eyata le gaƒoƒo ɖeka kple aɖabaƒoƒo ʋee aɖewo me la, wona magazine 100 kple edzivɔ tso abati gbɔ yi abati gbɔ. Dɔnɔ geɖe gblɔ be esiae nye zi gbãtɔ si ame aɖe va srã yewo kpɔ le kɔadzi be wòana dzideƒo kple mɔkpɔkpɔ yewo.
“Ɣebubuɣi la, wotsɔ magazine me nyati siwo sɔ na ɖeviwo yi Ðeviwo Gbɔkpɔƒea. Atikewɔlawo ƒe tatɔ si le afima hã xɔ Nye Agbalẽ Si Nye Biblia-Ŋutinyawo ʋee aɖewo da ɖe agbalẽxlẽƒea. Fifia vidada siwo va srãa wo viwo kpɔna le kɔadzi xlẽa Biblia me ŋutinyawo na wo gbesiagbe. Wowɔ ɖoɖo hã be woayi ɖɔkta sia gbɔ le eƒe aƒeme.
“Le Sarajevo la, NATO [Dziehe Atlantik Nubabla Habɔbɔ] ƒe asrafo akpe geɖe siwo tso dukɔ vovovowo me li. Woɖi ɖase na amesiawo hã tsitotsito. Ɣeaɖewoɣi míeyina tso aʋawɔʋu gbɔ yi aʋawɔʋu gbɔ eye míezãa agbalẽvi si nye Good News for All Nations tsɔ kpe ɖe Gbetakpɔxɔ kple Nyɔ! magazine siwo le gbe vovovowo me ŋu. Míemã magazine 200 kple edzivɔ le Italy-srafowo ƒe nɔƒea. Ewɔ nuku be Italy-srafo geɖe gblɔ be yewomeɖo dze kple Yehowa Ðasefowo kpɔ o. Aleke ke o, míeke ɖe wo ŋu le Sarajevo.
“Gbeɖeka wotɔ aʋawɔʋu ɖe mɔa to. Metsɔ nye xexi ƒo ʋua, eye asrafo aɖe do. Metsɔ Gbetakpɔxɔ si ƒe tanya gblɔ be ‘Ŋutifafa ƒe Dɔlawo—Amekawoe Wonye?’ fiae. Asrafoa kpɔm dũ hebia be, ‘Menye Yehowa Ðasefoe nènye oa, alo?’ Esi wòse be eyae menye la, eɖo eŋu be, ‘Dzalele; miele afisia hã! Ðe teƒe aɖe le anyigba dzi si Ðasefowo mele oa?’ ”
Apostolo Paulo xlɔ̃ nu mí be: “Ðe gbeƒã nya la, nɔ edzi, vovoɣi li alo vovoɣi meli o.” (Timoteo II, 4:2) Yehowa Ðasefo siwo le Sarajevo le esia wɔm abe alesi wo hati xɔsetɔ siwo le xexeame katã le ewɔmee ene, eye woɖea gbeƒã tso abati gbɔ yia abati gbɔ kple tso aʋawɔʋu gbɔ yia aʋawɔʋu gbɔ!