Nunyagbalẽ si me Gbedasi Le na Mí Egbea

BLEMAFOFO Hiob si ɖikeke mele eme o be enye eŋɔli me kesinɔtɔ gãtɔwo kekeake dometɔ ɖeka la gblɔ be: “Nunya [akplo ɖeka, NW] ƒe amesinɔnɔ nyo wu [akplo si yɔ fũ kple, NW] adzagba.” (Hiob 1:3; 28:18; 42:12) Enye nyateƒe be nunya de ŋgɔ wu ŋutilãmenunɔamesiwo sã le kpekpeɖeŋu nana ame be agbe nadze edzi nɛ gome. Nunyala Fia Salomo gblɔ be: “Nunya doa vɔvɔli, eye ga hã doa vɔvɔli; eye sidzedze ƒe viɖe enye: Nunya léa amesi si wòle la ƒe agbe ɖe te.”—Nyagblɔla 7:12.

Gake afikae míate ŋu akpɔ nunya sia le egbea? Amewo tsɔa woƒe kuxiwo yia nyadzɔdzɔgbalẽ me aɖaŋuɖolawo, susuŋutinunyalawo, tagbɔdɔdalawo, ɖawɔlawo kple taksikulawo gɔ̃ hã gbɔe. Eye eŋutinunyala gbogbo aɖewo hã le klalo be yewoaɖo aɖaŋu le nya ɖesiaɖe kloe ŋu—axɔ eŋu fetu. Gake zi geɖe la, “nunya” ƒe nya siawo hea dziɖeleameƒo kple afɔku gɔ̃ hã vɛ. Ekema aleke míawɔ ake ɖe nunya vavãtɔ ŋu?

Yesu Kristo si nya nu tso amegbetɔ ƒe nuwɔnawo ŋu nyuie la gblɔ kpɔ be: ‘Nunya ƒe dɔwɔwɔ tsoa afia nɛ.’ (Mateo 11:19) Mina míalé ŋku ɖe amewo ƒe agbemekuxi aɖewo siwo bɔ ŋu ne míakpɔe ɖa be nya siwo me nunya le kawoe kpe ɖe wo ŋu ŋutɔŋutɔ hezu nusi xɔ asi na wo wu “akplo si yɔ fũ kple adzagba” hã. Ðewohĩ wò hã àte ŋu ake ɖe ‘nunya gbogbo’ ma ŋu be wòaɖe vi na wò.

Ðe Nèléa Blanuia?

International Herald Tribune si wotana le London de dzesii be: “Ne ƒe alafa 20 lia he Dzimaɖitsiɣi vɛ la, ke eƒe nuwuwu nye Blanuiléɣi ƒe gɔmedzedze.” Egblɔ kpee be “numekuku gbãtɔ si wowɔ le dukɔwo me le blanuiléle vevie ŋu ɖee fia be kuxia le dzidzim ɖe edzi le xexeame katã. Le dukɔ siwo me nɔnɔmewo to vovo le abe Taiwan, Lebanon kple New Zealand ene la, kuxia bɔna ɖe dzidzime ɖesiaɖe si kplɔnɛ ɖo me wu.” Wogblɔ le amesiwo wodzi le ƒe 1955 megbe ŋu be anɔ bɔbɔe be woalé blanui vevie zi gbɔ zi etɔ̃ wu wo tɔgbuiwo kple wo mamawo.

Nenemae wòdzɔ ɖe Tomoe dzi, amesi léa blanui vevie eye wònɔa aba dzi le ŋkekea ƒe akpa gãtɔ me. Esi megate ŋu nɔ viaŋutsu si xɔ ƒe eve dzi kpɔm o ta la, egatrɔ yi edzilawo ƒe aƒeme. Eteƒe medidi o aƒelika aɖe si ƒe vinyɔnu le ƒe me kple Tomoe viŋutsua la dze xɔ̃e. Esime Tomoe gblɔ alesi gbegbe wòse le eɖokui me be yemeɖi naneke o na aƒelika la, aƒelika la fia nya aɖee tso agbalẽ aɖe me. Exlẽ be: “Ŋku mate ŋu agblɔ na asi bena: Wò koe mele ŋunye o, alo ta hã mate ŋu agblɔ na afɔwo bena: Miawo koe mele ŋunye o. Ke boŋ ŋutilã ŋutinu, siwo wobuna bena, wogbɔdzɔna wu la, woawoe hiãna wu.”a Aɖatsi lólo ɖe ŋku dzi na Tomoe esi wòkpɔe be wɔƒe li na amesiame le xexeame eye wohiã nɛ.

Aƒelika la kafui be wòadzro agbalẽ si me nya siawo le me akpɔ. Tomoe lɔ̃ ta, togbɔ be vaseɖe ɣemaɣi la, megate ŋu wɔa naneke o, eye eya ŋutɔ mete ŋu tsona le eɖokui si doa ŋugbe le nya suewo gɔ̃ hã ŋu o hã. Azɔ hã aƒelika la kpena ɖe eŋu ƒlea asi nɛ, eye wo kple Tomoe ye ɖaa nu gbesiagbe. Le ɣleti ɖeka megbe la, Tomoe te ŋu fɔna ŋdi sia ŋdi, nyãa nu, kplɔa aƒea me, dea asi me, heɖaa nu abe alesi nyɔnu aƒedzikpɔla ɖesiaɖe wɔnɛ ene. Ele be wòaɖu nɔnɔme sesẽ geɖe dzi, gake egblɔ be, “meka ɖe edzi be ne mewɔ ɖe nya siwo me nunya le siwo ŋu meke ɖo dzi la, manɔ nyuie.”

Esi Tomoe tsɔ nunya si ŋu wòke ɖo wɔ dɔe la, eɖu eƒe blanuiléle ƒe ŋkeke sesẽawo dzi. Fifia Tomoe wɔa dɔ ɣeawokatãɣi kpena ɖe ame bubuwo ŋu be woatsɔ nya mawo siwo na wòte ŋu kpe akɔ kple eƒe kuxiwo la ke awɔ dɔe. Nya mawo siwo me nunya le la dze le blemagbalẽ aɖe si me gbedasi aɖe le na amewo katã egbea me.

Ðe Ƒomekuxiwo Dze Ŋgɔ Wòa?

Srɔ̃gbegbe le dzidzim ɖe edzi le xexeame katã. Ƒomekuxiwo le dzidzim ɖe edzi le Ɣedzeƒedukɔwo gɔ̃ hã me, afisi amewo gblɔna le tsã be ƒomedodo kplikplikpli le yewoƒe ƒomewo me. Afikae míate ŋu akpɔ srɔ̃ɖeɖe ŋuti ɖaŋuɖoɖo nyuiwo le?

Bu Shugo kple Mihoko, srɔ̃tɔ siwo do go srɔ̃ɖeɖemekuxi geɖe, la ŋu kpɔ. Wowɔa dzre le nya sue ɖesiaɖe ŋu. Shugo doa dziku kabakaba, eye Mihoko hã nyrana ɣesiaɣi si wòakpɔ vodada le eŋu agblɔ. Mihoko bu gɔ̃ hã be, ‘Míate ŋu alɔ̃ ɖe nya ɖeka dzi gbeɖe o.’

Gbeɖeka nyɔnu aɖe yi ɖasrã Mihoko kpɔ eye wòxlẽ nya siawo nɛ tso agbalẽ aɖe me be: “Nusianu, si mielɔ̃na bena, amewo nawɔ na mi la, miawo hã miwɔ nenema ke na wo.”b Togbɔ be mawusubɔsubɔ medzɔa dzi na Mihoko o hã la, elɔ̃ be yeasrɔ̃ agbalẽ si me nya mawo le. Alesi wòawɔ eƒe ƒomegbenɔnɔ nanyo wu koŋ dimee wònɔ. Eyata esime wokpe Mihoko—kple srɔ̃a—be woade kpekpe si me wodzroa agbalẽ si ƒe tanyae nye Alesi Nàna Dzidzɔ Nanɔ Wò Ƒomegbenɔnɔ Me le la, wolɔ̃ ɖe edzi enumake.c

Shugo de dzesii le kpekpea me be vavalawo tsɔa nusi srɔ̃m wole la wɔa dɔe nyateƒe eye edze abe wole dzidzɔ kpɔm ene. Eɖoe be yeadzro agbalẽ si srɔ̃m ye srɔ̃ le la me akpɔ. Eteƒe medidi o nya aɖe he eƒe susu, si gblɔ be: “Dzigbɔɖitɔ la, nunya geɖe le esi; ke dɔmedzoetɔ doa boblo bometsitsi.”d Togbɔ be exɔ ɣeyiɣi hafi wòte ŋu wɔ gɔmeɖose sia ŋudɔ le eƒe agbenɔnɔ me hã la, amesiwo dome wòle kple srɔ̃a hã de dzesi tɔtrɔ si wònɔ wɔwɔm vivivi la.

Esi Mihoko kpɔ tɔtrɔ siwo wɔm srɔ̃a nɔ la, eya hã dze egɔme tsɔ nusi srɔ̃m wòle la wɔ dɔe. Gɔmeɖose aɖe si kpe ɖe eŋu vevie enye esia si gblɔ be: “Migadrɔ̃ ʋɔnu, ne woagadrɔ̃ ʋɔnu mi o. Elabena ʋɔnudɔdrɔ̃, si miedrɔ̃ la, eya ke woatsɔ adrɔ̃ ʋɔnu mi.”e Eyata Mihoko kple srɔ̃a ɖoe be yewoaƒo nu tso yewoƒe nɔnɔme nyuiwo kple alesi yewoawɔ agawɔe nyuie wu tsɔ wu be yewoadi vodada le yewo nɔewo ŋu. Nukae do tso eme? Mihoko gblɔ be: “Ena mele dzidzɔ kpɔm ŋutɔŋutɔ. Míewɔa esia le fiẽnuɖuɣi ɖesiaɖe. Mía viŋutsu si xɔ ƒe etɔ̃ gɔ̃ hã kpɔa gome le dzeɖoɖoa me. Etua mí ɖo ale gbegbe!”

Esi ƒome sia tsɔ aɖaŋu nyui si woɖo na wo wɔ dɔe la, wote ŋu ɖu kuxi siwo de masɔmasɔ woƒe ƒomedodoa me wòde gbegblẽ ge la dzi. Ðe ema mexɔ asi na wo wu adzagba gbogbowo oa?

Èdi be Agbe Nadze Edzi na Yea?

Le ame geɖe gome egbea la, kɔlili kesinɔnuwo ɖie nye woƒe agbemetaɖodzinu. Gake asitsala kesinɔtɔ aɖe si le United States, amesi tsɔ ga dɔlar miliɔn alafa geɖe na kpekpeɖeŋu amewo la gblɔ kpɔ be: “Ga dzroa ame aɖewo, gake ame aɖeke mate ŋu ado afɔkpa eve zi ɖeka o.” Ame ʋee aɖewo koe lɔ̃ ɖe nyateƒenya sia dzi eye amesiwo gale ʋee wue dzudzɔa kesinɔnuwo yome titi.

Ahedada mee Hitoshi tsi ɖo, eyata edi vevie be yeava zu kesinɔtɔ. Esi wòkpɔ be fetɔwo tea asi ɖe ŋku dzi na fenyilawo la, ebu le eɖokui me be: “Amesi ƒe asi asu ga gbogbotɔ dzi ŋue ŋusẽ le.” Hitoshi ka ɖe ga ƒe ŋusẽ dzi ale gbegbe be ebu be woate ŋu atsɔe aƒle amegbetɔ ƒe agbe gɔ̃ hã. Esi wòdi be yeakpɔ kesinɔnu geɖe ta la, enyrɔ eɖokui ɖe pɔmpidɔ si wòwɔna me vĩ hewɔa dɔ le ƒe bliboa katã me eye medzudzɔna ŋkeke ɖeka gɔ̃ hã o. Togbɔ be Hitoshi dze agbagba vevie hã la, eteƒe medidi o ekpɔe be yemate ŋu anye ametedɔwɔla akpɔ ŋusẽ wòade dɔtɔ siwo naa dɔ ye la tɔ nu gbeɖe o. Dziɖeleameƒo kple vɔvɔ̃ na agbaɖuɖu ɖea fu nɛ gbesiagbe.

Emegbe ŋutsu aɖe va Hitoshi ƒe ʋɔtru nu eye wòbiae be enya be Yesu Kristo ku ɖe eta hã. Esi Hitoshi bu be ame aɖeke maku ɖe ame abe ye ene ta o ta la, edi be yeanya nu tso nyaa ŋu eye elɔ̃ be woayi numedzodzroa dzi kpli ye. Le kwasiɖa si kplɔe ɖo me ede va se nuƒo aɖe eye ewɔ mo yaa nɛ esi wòse aɖaŋuɖoɖoa be ‘womegato ŋku gã o.’ Nuƒola la ɖe eme be ‘ŋku si dzi dza’ nye esi kpɔa ŋgɔ ʋĩ henɔa gbɔgbɔmenuwo ŋu; gake “ŋku vɔ̃,” alo ‘esi ʋãa ŋu,’ nɔa ŋutilãmenu si woate ŋu akpɔ enumake ko dzi eye mekpɔa nu dea adzɔge o. Aɖaŋu si woɖo be, “Afisi wò nu nyui le la, afima wò dzi hã lanɔ,” wɔ dɔ ɖe edzi vevie.f Ekpɔe be nane li si gale vevie wu kesinɔnuwo! Mese nya sia tɔgbe kpɔ o.

Esi nyaa wɔ dɔ ɖe edzi ta la, edze egɔme tsɔ nusi srɔ̃m wòle wɔ dɔe. Le esi teƒe be wòadagba ɖe ga ta la, ete gbɔgbɔmenuwo tsɔtsɔ ɖo nɔƒe gbãtɔ le eƒe agbe me. Ezãa ɣeyiɣi ɖe eƒe ƒomea ƒe gbɔgbɔmenyonyo hã ŋu. Abe alesi wòanɔ godoo ene la, efia be megatsɔa ɣeyiɣia katã wɔa dɔe o, ke hã eƒe dɔ va nyo wu. Nukatae?

Esi wòxɔ aɖaŋu si woɖo nɛ ta la, alesi wòwɔa nu hohoho la trɔ wòzu ame fafa si doa vivi ɖe ame ŋu. Aɖaŋuɖoɖo si wɔ dɔ ɖe edzi vevie wue nye be: “Miɖe nusiawo katã, siwo nye: Dziku, dɔmedzoe, nu tovo wɔwɔ, busunyagbɔgblɔ, ŋukpenanyawo la ɖa tso miaƒe nu me; migaka aʋatso na mia nɔewo o; elabena mieɖe ame xoxoa kple eƒe nuwɔnawo ɖa, eye mido ame yeye, si wowɔ yeye hena sidzedze le amesi wɔe la ƒe nɔnɔme nu.”g Aɖaŋuɖoɖo sia dzi wɔwɔ mewɔe wòzu kesinɔtɔ ya o, gake eƒe ‘amenyenye yeyea’ na eƒe nu nyo eƒe asisiwo ŋu eye woɖoa ŋu ɖe eŋu hekana ɖe edzi. Ẽ, nya siwo me nunya le siwo ŋu wòke ɖo kpe ɖe eŋu agbenɔnɔ dze edzi nɛ. Le eya gome la, asixɔxɔ le wo ŋu sã wu adzagba alo ga gbogbo.

Àʋu Wò Akplo Laa?

Ènya akplo si yɔ fũ kple nunya eye wòva zu nu vevitɔ na amesiwo ƒe kpɔɖeŋu míegblɔ va yi laa? Eyae nye nunya si le Biblia, agbalẽ si womã wòde teƒe geɖe wu eye wòbɔ wu ɖesiaɖe le anyigba dzi la me. Ðewohĩ ɖe le asiwò alo àte ŋu akpɔ ɖe bɔbɔe. Gake abe alesi adzagba xɔasi gbogbowo maɖe vi boo aɖeke na nua tɔ ne mezã wo o ene la, nenema ke Biblia ƒe amesinɔnɔ dzro ko hã maɖe vi boo aɖeke o. Ne míagblɔe le kpɔɖeŋumɔ nu la, anyo wu be nàʋu akplo la ahatsɔ Biblia ƒe aɖaŋuɖoɖo kple mɔfiame si sɔ ɖe ɣeyiɣia nu awɔ dɔe be nàkpɔ alesi wòate ŋu akpe ɖe ŋuwò nàkpɔ agbemekuxiwo gbɔ dzidzedzetɔe.

Ne wotsɔ akplo si yɔ fũ kple adzagba na wò la, ɖe màdze ŋuwò nàdze agbagba anya amesi gbɔ wòtso ale be nàda akpe nɛ oa? Ðe nènya amesi nye Nunala la le Biblia gomea?

Biblia ɖe nunya si le eme la Dzɔtsoƒe fia mí esi wògblɔ be: “Ŋɔŋlɔ sia ŋɔŋlɔ, si tso Mawu ƒe [gbɔgbɔ me nyo].” (Timoteo II, 3:16) Egblɔ na mí hã be “Mawu ƒe nya la le agbe, eye wòsẽa ŋu.” (Hebritɔwo 4:12) Ema tae nya siwo me nunya le siwo dze le Biblia me sɔ ɖe ɣeyiɣia nu eye wònyo na mí egbea. Adzɔ dzi na Yehowa Ðasefowo be woakpe ɖe ŋuwò nàsrɔ̃ nu tso Nunala dɔmenyotɔ sia si nye Yehowa Mawu ŋu, ale be nàte ŋu akpɔ mɔ be yeakpɔ viɖe tso ‘nunya geɖe’ si le Biblia—nunyagbalẽ si me gbedasi aɖe le na amewo egbea—la me.

[Etenuŋɔŋlɔwo]

[Aɖaka/Nɔnɔmetata si le axa 4]

Nya Siwo me Nunya Le Siwo Ana Susu Nadze Akɔ Anyi

“Yehowa, ne èbe, yealé vodadawo ɖi la, Aƒetɔ, ameka anɔ te ma? Elabena gbɔwò tsɔtsɔke le, ne woavɔ̃ wò.”—Psalmo 130:3, 4.

“Dzi konu nana mo kɔna; ke ne dzi le nu xam la, ekema wɔna vɔna le dzideƒo ŋu.”—Lododowo 15:13.

“Megawɔ nu dzɔdzɔe vivivo o, eye meganya nu tso eme akpa o; nukaŋuti nèbe, yeade ye ɖokui tsɔtsrɔ̃ me ɖo?”—Nyagblɔla 7:16.

“Nana enye yayra wu xɔxɔ.”—Dɔwɔwɔwo 20:35.

“Mibi dzi, eye migawɔ nuvɔ̃ o; ɣe la nagaɖo to ɖe miaƒe dzibibi o.”—Efesotɔwo 4:26.

[Aɖaka/Nɔnɔmetata si le axa 5]

Nya Siwo me Nunya Le si Dea Ƒomegbenɔnɔ Dzi

“Afisi adaŋudede mele o la, tameɖoɖowo tsia akpo dzi; ke afisi adaŋudela geɖewo le la, edzea edzi.”—Lododowo 15:22.

“Nugɔmesela ƒe dzi kpɔa sidzedze, eye nunyala ƒe to dia sidzedze yome.”—Lododowo 18:15.

“Nya, si wogblɔ ɖe egblɔɣi la, sikatɔtɔŋuti wònye le klosalogba me.”—Lododowo 25:11.

“Mihe adodo kple mia nɔewo, eye mitsɔ ke mia nɔewo, ne nya aɖe le ame aɖe si ɖe ame aɖe ŋuti la, alesi [Yehowa, NW] tsɔ ke mii la, miawo hã miwɔ nenema ke! Ke hekpe ɖe nusiawo katã ŋuti la mido lɔlɔ̃, si nye blibonyenye la ƒe nublanu.”—Kolosetɔwo 3:13, 14.

“Nɔvinye lɔlɔ̃tɔwo, minya esia: Amesiame naɖe abla le nusese me, nanɔ blewu le nuƒoƒo me, nanɔ blewu hã le dziku me.”—Yakobo 1:19.

[Aɖaka/Nɔnɔmetata si le axa 6]

Nya Siwo me Nunya Le si Na Nu Dzea Dzi na Ame le Agbe Me

“Nudanu amebatɔ enye ŋunyɔ na Yehowa; ke nudanu blibo dzea eŋu.”—Lododowo 11:1.

“Dada doa ŋgɔ na gbegblẽ, eye ɖokuidodoɖedzi na anyidzedze.”—Lododowo 16:18.

“Amesi mate ŋu aɖu eƒe gbɔgbɔ dzi o la, le abe du, si wogbã gli le eŋu, wòtsi nuvo ene.”—Lododowo 25:28.

“Wò gbɔgbɔ megayɔ ɖe dzikudodo ŋu o, elabena bometsilawo ƒe akɔtae dziku nɔna.”—Nyagblɔla 7:9.

“Na wò abolo nato tɔ dzi yii, elabena àgakpɔe le ŋkeke geɖewo megbe.”—Nyagblɔla 11:1.

“Migana nya vlo aɖeke nado go tso miaƒe nu me gbeɖegbeɖe o, ke boŋ nya, si nyo na ŋgɔgbedede, ne ehiã la, bene wòana amenuveve amesiwo senɛ la.”—Efesotɔwo 4:29.

[Nɔnɔmetata si le axa 7]

Biblia sɔsrɔ̃e nye afɔɖeɖe gbãtɔ si ana ‘nunya geɖe’ la naɖe vi na ame