Amekae Kpɔ Ŋusẽ Ðe Wò Tamesusu Dzi?

“AME aɖeke mate ŋu agblɔ nusi wòle be masusu nam o! Eye ame aɖeke mate ŋu agblɔ nusi wòle be mawɔ hã o!” Nya ma gbɔgblɔ gbeteteɖedzitɔe fiana zi geɖe be èka ɖe ɖokuiwò kple wò ŋutɔ wò nuŋububu dzi vevie. Nenemae nèsena le ɖokuiwò mea? Gɔmesese le eŋu be mele be ame bubu aɖeke naɖo nusi nàwɔ na wò o. Gake ɖe nunya le eme be nagbe nya si ate ŋu anye aɖaŋuɖoɖo nyui la enumakea? Ðe ame aɖeke kura mate ŋu akpe ɖe ŋuwò be nàwɔ nyametsotso nyuiwo oa? Ke ɖe nàte ŋu aka ɖe edzi ŋutɔŋutɔ le nyateƒe me be ame aɖeke mele ŋusẽ kpɔm ɖe wò tamesusu dzi le wò manyamanya me gɔ̃ hã oa?

Le kpɔɖeŋu me, do ŋgɔ na xexemeʋa evelia wɔɣi la, Joseph Goebbels si nye Hitler ƒe nyakakadɔnunɔla ye va kpɔ ŋusẽ ɖe Germany sinema dɔwɔƒewo dzi. Nukatae? Elabena ekpɔe be esia ana dɔwɔnu sesẽ ŋutɔ aɖe nasu ye si yeatsɔ “akpɔ ŋusẽ ɖe amewo ƒe dzixɔsewo kple woƒe nuwɔna hã dzi.” (Propaganda and the German Cinema 1933-1945) Ðewohĩ ènya nu tso alesi wòzã esia kple mɔnu bubuwo tagbɔsesẽtɔe tsɔ kpɔ ŋusẽ ɖe amewo—amesiwo li nyuie hesea nu gɔme—dzi wonɔ Nazi ƒe xexemenunya yome ɖekemanyatɔe.

Nya lae nye be amesiwo nèɖoa toe ƒe seselelãmewo kple nukpɔsusuwo kpɔa ŋusẽ ɖe alesi nèbua tamee kple nusi nèva wɔna dzi ɣesiaɣi le mɔ aɖe nu. Naneke megblẽ le esia ŋu o. Ne ameawo nye amesiwo tsɔa ɖe le wò nyonyo me—abe nufialawo, xɔlɔ̃wo, alo dzilawo ene—la, ke woƒe aɖaŋuɖoɖo kple mɔfiame aɖe vi na wò. Gake ne wonye amesiwo bua woa ŋutɔwo ƒe nyonyo ko ŋu eye woble woa ŋutɔwo hã alo woƒe tamesusu tro, eye wonye “ameblelawo” abe alesi apostolo Paulo ɖɔ woe ene la, ke kpɔ nyuie!—Tito 1:10; Mose V, 13:6-8.

Eyata mègaɖe ŋu ɖi ahasusu be ame aɖeke mate ŋu akpɔ ŋusẽ ɖe ye dzi o. (Tsɔe sɔ kple Korintotɔwo I, 10:12.) Ðewohĩ amewo le ŋusẽ kpɔm ɖe dziwò xoxo—edzɔna edziedzi wu alesi ɖewohĩ nàlɔ̃ ɖe edzi—le wò manyamanya me gɔ̃ hã. Tsɔ nusi nèɖona be yeaƒle ne èyi asiƒleƒe la wɔ eƒe kpɔɖeŋu bɔbɔe aɖe. Ðe wònyea wò ŋutɔŋutɔ ƒe nyametsotso si ŋu nèbu ɣesiaɣia? Alo ɖe ame bubu siwo mèkpɔna o toa ayemɔ dzi kpɔa ŋusẽ ɖe wò tiatiawɔwɔ dzi veviea? Eric Clark si nye nyadzɔdzɔŋlɔla si kua nya me bui be wokpɔa ŋusẽ ɖe mía dzi. Egblɔ be: “Zi geɖe alesi wolia kɔ boblododo ɖe mía dzii la, zi nenemae eƒe ŋusẽkpɔɖeamedzi medzena o, gake enye nyateƒe be zi nenemae wokpɔa ŋusẽ ɖe mía dzii.” Eka nya ta hã be ne wobia nya amewo le alesi wobu be boblododo wɔa dɔe ŋu la, “ame akpa gãtɔ lɔ̃na ɖe edzi be ekpɔa ŋusẽ ɖe ame dzi, gake menye ɖe yewo dzi ya o.” Amewo buna be nu te ŋu kpɔa ŋusẽ ɖe amesiame dzi bɔbɔe, gake menye ɖe yewo dzi o. “Wobuna be yewo ɖeɖeko dzie mate ŋu akpɔ ŋusẽ ɖo o.”—The Want Makers.

Ðe Satana Kpɔa Ŋusẽ Ðe Wò Tamesusu Dzia?

Ne boblo si wodona gbesiagbe kpɔa ŋusẽ ɖe dziwò hã la, ɖewohĩ magblẽ nu le ŋuwò boo o. Gake ŋusẽkpɔɖeamedzi bubu aɖe li si ŋu afɔku le ŋutɔ. Biblia ɖee fia eme kɔ ƒã be Satana bi ɖe ŋusẽkpɔkpɔɖeamedzi me ŋutɔ. (Nyaɖeɖefia 12:9) Aɖaŋu si ŋudɔ wòwɔna la sɔ kple alesi boblodola aɖe buna, amesi gblɔ be mɔ evee li wotsɔ kpɔa ŋusẽ ɖe asisiwo dzi—“to wo nu beble me loo alo to woƒe susu tɔtrɔ ɖe nua ŋu me.” Ne susudoɖeŋgɔlawo kple boblodolawo te ŋu zãa ayemɔ siawo tsɔ kpɔa ŋusẽ ɖe wò tamesusu dzii la, ke aleke gbegbe Satana si bi ɖe esia me wu sã la azã aɖaŋu siawoe nye si!—Yohanes 8:44.

Apostolo Paulo nya esia. Evɔ̃ be ɖewohĩ ye hati Kristotɔ aɖewo aɖe ŋu ɖi ale be Satana nable wo. Eŋlɔ bena: “Mele vɔvɔ̃m bena, ame aɖe menya nu o, alesi da la tsɔ eƒe aɖaŋu vɔ̃ ble Xawa la, nenema ke woagblẽ miaƒe tamesusuwo tso dzimekɔkɔ, si miekɔ na Kristo la me mahĩ?” (Korintotɔwo II, 11:3) Tsɔ nuxlɔ̃ame ma nya vevii. Ne menye nenema o la, àva nɔ abe amesiwo xɔe se be nya tsɔtsɔ de susu me na ame kple ame ƒe susu tɔtrɔ ɖe nu ŋu wɔa dɔ—“gake menye ɖe yewo dzi o” la ene. Nyateƒe si wònye be Satana ƒe nya ƒaƒa ɖe amewo ƒe susu me kpɔa dzidzedze la dzena ƒã míekpɔna le ŋutasesẽ, agbevlonɔnɔ, kple alakpanuwɔwɔ si dzena le dzidzime sia me tɔwo ŋu me.

Eyata Paulo ɖe kuku na ehati Kristotɔwo be ‘woagana woƒe anyinɔnɔ naɖi xexe sia me o.’ (Romatɔwo 12:2) Biblia-gɔmeɖela aɖe gbugbɔ Paulo ƒe nyaawo gblɔ le mɔ bubu nu be: “Migana xexe si me miele natrɔ mi ɖe eƒe nɔnɔme ŋu o.” (Romatɔwo 12:2, Phillips) Satana ato mɔ sia mɔ nu ate kpɔ be yeatrɔ wò ɖe eƒe nɔnɔme ŋu, abe alesi blema zemela trɔa asi le tsu ŋu be dzesidenuwo kple nɔnɔme siwo dim wòle naɖe ɖe eŋu ene. Satana trɔ asi le xexeame dunyahehe, asitsatsa, mawusubɔsubɔ, kple modzakaɖeɖe ŋu be yeatsɔ awɔ esiae. Aleke gbegbee eƒe ŋusẽkpɔɖeamedzi keke tae? Ekaka ɖe afisiafi abe alesi wònɔ le apostolo Yohanes ƒe ŋkekea me ene. Yohanes gblɔ be: “Xexeme blibo la katã le vɔ̃ɖitɔ la me.” (Yohanes I, 5:19; kpɔ Korintotɔwo II, 4:4 hã.) Ne mèka ɖe edzi be ŋutete le Satana si wòtsɔ blea amewo hegblẽa woƒe tamesusu o la, ke ɖo ŋku alesi wòble dukɔ blibo, si nye Israel-dukɔa, amesiwo ɖe adzɔgbe na Mawu la dzi. (Korintotɔwo I, 10:6-12) Ðe nu ma ke ate ŋu adzɔ ɖe dziwòa? Ate ŋu adzɔ ne mèle ŋudzɔ le susu me ɖe Satana ƒe ŋusẽkpɔɖeamedzi fluamea ŋu o.

De Dzesi Nusi Le Edzi Yim

Ne míagblɔe la, ne èɖe mɔ ko hafi ŋusẽ vɔ̃ɖi siawo akpɔ ŋusẽ ɖe dziwò. Vance Packard gblɔ nya sia le eƒe agbalẽ The Hidden Persuaders me be: “Takpɔnu sesẽ aɖe le mía si kokoko ɖe amenublela [ɣaɣla] siawo ŋu: míate ŋu atiae be míana woable mí o. Míate ŋu awɔ tiatia le nɔnɔme ɖesiaɖe kloe me, eye womate ŋu akplɔ mí atra fũ o ne míenya nusi le edzi yim.” Nenema ke wòle le susuwo ƒaƒa ɖe ame me kple amebeble hã gomee.

Le nyateƒe me la, hafi ‘nànya nusi le edzi yim’ la, ele be nàʋu susu me eye nàna nu nyuiwo nakpɔ ŋusẽ ɖe dziwò. Ele be woade nu susu nyui me wòade edeƒe hafi wòate ŋu awɔ dɔ nyuie, abe alesi wòle le ameti si le lãmesẽ me gome ene. (Lododowo 5:1, 2) Ne womele nyatakaka dem eme o la, afɔku ate ŋu anɔ eme abe alesi ko nyatakaka gbegblẽ agblẽ nu le eŋui ene. Eyata togbɔ be enye nyateƒe be ele be nàkpɔ wò susu ta tso ameblenya kple xexemenunya si me hã la, dze agbagba be màganyɔ ŋu aɖaŋuɖoɖo alo nya ɖesiaɖe si woagblɔ na wò ahado vlo wo o.—Yohanes I, 4:1.

Numeɖeɖe na ame anukwaretɔe le vovo na susu aɖe si woakaka ayetɔe. Edze ƒã be apostolo Paulo xlɔ̃ nu ɖekakpui Timoteo be wòanɔ ŋudzɔ ɖe “ame vɔ̃ɖiwo kple ameblelawo, [siwo ayi edzi] vɔ̃ɖitɔe wu anɔ amewo blem, eye amewo able wo” la ŋu. Gake Paulo gblɔ kpee be: “Ke wò la nɔ nusiwo nèsrɔ̃, eye nèkpɔ kakaɖedzi le wo me la me; elabena ènya amesiwo gbɔ nèsrɔ̃e le.” (Timoteo II, 3:13, 14) Esi nusianu si nèdea wò susu me akpɔ ŋusẽ ɖe dziwò vaseɖe afi aɖe ta la, nu vevitɔe nye be ‘nànya amesiwo gbɔ nèsrɔ̃a nuwo tsonɛ,’ eye nàka ɖe edzi be wonye amesiwo tsɔ ɖe le wò nyonyo me vevie, ke menye woa ŋutɔwo tɔ o.

Wò ŋutɔe awɔ tiatia. Àte ŋu atiae be yeana yeƒe “anyinɔnɔ naɖi xexe sia me” tɔ ahana xexe sia me nunya kple nusi ŋu wodea asixɔxɔe naɖu wò tamesusu dzi. (Romatɔwo 12:2) Gake xexe sia metsɔ ɖeke le wò nyonyo me o. Eyata apostolo Paulo xlɔ̃ nu mí be: “Mikpɔ nyuie, bena ame aɖeke nagakplɔ mi ayi aboyo to xexemenunya kple beble dzodzro me o.” (Kolosetɔwo 2:8) Mesesẽ kura be Satana natrɔ mí ɖe eƒe nɔnɔme ŋu, alo ‘wòakplɔ mí ayi aboyo me’ o. Ðeko wòle abe dzudzɔ si wotu ɖe yame ene. Ya ƒoɖi la gbɔgbɔ ko ate ŋu agblẽ nu le ŋuwò.

Gake àte ŋu aƒo asa na ‘ya’ ma gbɔgbɔ. (Efesotɔwo 2:2) Ðe ema teƒe la, wɔ ɖe Paulo ƒe aɖaŋuɖoɖoa dzi be: “Mitrɔ miaƒe nɔnɔme to miaƒe tamesusu ƒe yeyewɔwɔ me boŋ, bena miadzro nusi nye Mawu ƒe lɔlɔ̃nu, si nyo, eye wòdzea eŋu nyuie, eye wòle blibo la me akpɔ.” (Romatɔwo 12:2) Esia bia agbagbadzedze. (Lododowo 2:1-5) Ðo ŋku edzi be Yehowa meblea ame dea nane wɔwɔ me o. Ena míenyaa nu le nya siwo hiã be míanya la katã ŋu, gake be wòaɖe vi na wò la, ele be nàsee eye nàna wòakpɔ ŋusẽ ɖe wò tamesusu dzi. (Yesaya 30:20, 21; Tesalonikatɔwo I, 2:13) Ele be nàlɔ̃ atsɔ nyateƒe si le “ŋɔŋlɔ kɔkɔeawo,” si nye Biblia, Mawu ƒe Nya si tso gbɔgbɔ me la, ade wò susu me.—Timoteo II, 3:15-17.

Na Yehowa Natrɔ Asi le Wò Nɔnɔme Ŋu

Wowɔ alesi wòhiã be nàlɔ̃ awɔ nu le toɖoɖo me be Yehowa ƒe ŋusẽkpɔɖeamedzi si trɔa ame naɖe vi na wò la ƒe kpɔɖeŋu wɔdɔɖeamedzi aɖe esime Yehowa gblɔ na nyagblɔɖila Yeremya be wòayi zemela aɖe ƒe zemeƒe. Yeremya kpɔ zemela la wòtrɔ eƒe susu le alesi wòame ze aɖee ŋu esi zea ‘gblẽ le zemela la ƒe asi me.’ Azɔ Yehowa gblɔ nɛ be: “Israel ƒe aƒe, ɖe nyemate ŋu awɔ mi, abe alesi zemela sia wɔna ene oa? Israel ƒe aƒe, kpɔ ɖa, alesi tsu le zemela si mee la, nenema miele asinye mee!” (Yeremya 18:1-6) Ðe ema fia be amesiwo nɔ Israel nɔ abe tsu si woli kɔe ɖi si me agbe mele o le Yehowa ƒe asi me ale be wòtsɔ wo wɔ ze ɖesiaɖe si dze eŋua?

Yehowa mezãa eƒe ŋusẽ triakɔa tsɔ naa amewo wɔa nusi menye woƒe lɔlɔ̃nu gbeɖe o; eye menye eya gbɔe wòtso be ame aɖe ƒe nɔnɔme nagblẽ, abe alesi ɖewohĩ wòadzɔ le amegbetɔ zemela gome ene hã o. (Mose V, 32:4) Ne amesiwo Yehowa dzea agbagba be yeatrɔ ɖe nɔnɔme nyui me gbe eƒe mɔfiafia la, egblẽa nu le wo ŋu. Emae nye vovototo gã si le wò kple tsu si me agbe mele o dome. Tiatiawɔblɔɖe le asiwò. Ne èwɔ eŋudɔ la, àte ŋu atiae be yeaɖe mɔ Yehowa nakpɔ ŋusẽ ɖe ye dzi yeatrɔ nɔnɔme loo alo yeaɖoe koŋ agbe.

Nufiame si na wobua tame kae nye si! Aleke gbegbe wònyoe nye esi be nàse Yehowa ƒe gbe tsɔ wu be nàgblɔ dadatɔe be, “Ame aɖeke mate ŋu agblɔ nusi mawɔ nam o”! Mí katã míehiã Yehowa ƒe ŋusẽkpɔɖeamedzi si fiaa mɔ ame. (Yohanes 17:3) Nɔ abe hakpala Dawid ene, amesi do gbe ɖa be: “Yehowa, ɖe wò mɔwo fiam, eye nafia wò toƒewom!” (Psalmo 25:4) Ðo ŋku nya si Fia Salomo gblɔ dzi be: “Nunyala nasee, eye wòadzi eƒe nunya ɖe dzi.” (Lododowo 1:5) Àseea? Ne èsee la, ke “tamebubu akpɔ dziwò, eye gɔmesese adzɔ ŋuwò.”—Lododowo 2:11.