Dzɔ Wò Dzi Ŋu
“Dzɔ wò dzi ŋu wu nuwo katã, elabena eya me agbe tsona.”—LODODOWO 4:23.
1, 2. Nukatae wòhiã be míadzɔ míaƒe dzi ŋu?
ŊUTSU tsitsi aɖe si le Carib-ƒukpo aɖe dzi do tso eƒe bebeƒe esi ahom sesẽ aɖe tu vɔ. Esi wònɔ ŋku lém ɖe nusiwo gblẽ ƒo xlãe ŋu la, ekpɔe be ati gã aɖe si nɔ eƒe aƒe ƒe agbo nu la megali o. Ebia eɖokui se be, ‘Aleke wɔ ati gã la mu evɔ ati sue siwo le nutoa me ya tsi anyi?’ Ŋkuléle ɖe ati si mu ƒe takpoa ŋu ɖo biabiaa ŋu. Ati si nɔ dzedzem abe ɖe mate ŋu amu o ene la nyunyɔ le etome, eye ɖeko ahom la klo nu le alesi wònyunyɔe la dzi.
2 Nublanuinya ka gbegbee nye si wònyena ne nyateƒe tadeagula si dze abe ɖe wòli ke sesĩe le Kristotɔwo ƒe agbenɔnɔ me ene na ta le xɔse ƒe dodokpɔ me? Biblia gblɔe wòsɔ be “ame ƒe dzimesusu enye vɔ̃ tso ɖevime ke.” (Mose I, 8:21) Esia fia be ne amesi si dzi nyui le gɔ̃ hã mele ŋudzɔ ɣeawokatãɣi o la, woate ŋu ablee wòawɔ nu gbegblẽ. Esi nugbegblẽwɔwɔ megbea amegbetɔ madeblibo aɖeke ƒe dzi me ɖoɖo o ta la, ehiã be míatsɔ aɖaŋuɖoɖo sia ŋkubiãnyae be: “Dzɔ wò dzi ŋu wu nuwo katã, elabena eya me agbe tsona.” (Lododowo 4:23) Eyata aleke míadzɔ míaƒe kpɔɖeŋudzi ŋui?
Edodokpɔ Edziedzi—Ele Vevie
3, 4. (a) Nya kawoe woate ŋu abia tso dzi ŋutɔŋutɔ ŋu? (b) Nukae akpe ɖe mía ŋu míadzro míaƒe kpɔɖeŋudzia me?
3 Ne èyi ɖe atikewɔla gbɔ be wòado ye akpɔ la, ɖewohĩ ado wò dzi akpɔ. Ðe wò ameti bliboa ƒe lãmesẽmenɔnɔ, tsɔ kpe ɖe wò dzi ŋu, fia be nunyiame si sɔ sua wòa? Wò ʋu le sisim nyuiea? Ðe wò dzi le dɔ wɔm nyuie eye ŋusẽ le eŋua? Èdea kame alesi dzea? Ðe nu tea wò dzi ŋu madzemadzea?
4 Ne ehiã be woanɔ dzi ŋutɔŋutɔ dom kpɔ edziedzi la, ke wò kpɔɖeŋudzi ya ɖe? Yehowa donɛ kpɔna. (Kronika I, 29:17) Nenema ke wòle be míadoe akpɔ. To mɔ ka nu? To nyabiabia siawo ƒomevi biabia me be: Ðe nye dzi kpɔa gbɔgbɔmenuɖuɖu si sɔ to ɖokuisinusɔsrɔ̃ kple kpekpewo dede edziedzi mea? (Psalmo 1:1, 2; Hebritɔwo 10:24, 25) Ðe Yehowa ƒe gbedasia le dzi me nam abe “dzobibi nue wotu nu ɖo ɖe nye ƒuwo me” ene heʋãam be makpɔ gome le Fiaɖuƒegbeƒãɖeɖe kple nusrɔ̃lawo wɔwɔ dɔa mea? (Yeremya 20:9; Mateo 28:19, 20; Romatɔwo 1:15, 16) Ðe wòʋãam be maʋli vevie be makpɔ gome le ɣeyiɣiawo katã ƒe subɔsubɔdɔa ƒe akpa aɖe me ne mate ŋuia? (Luka 13:24) Nukawo ŋue meɖea mɔ le wokpɔa ŋusẽ ɖe nye kpɔɖeŋudzia dzi? Ðe medea ha kple amesiwo ƒe dzi wɔ ɖeka kple tadedeagu vavãa? (Lododowo 13:20; Korintotɔwo I, 15:33) Mina míakpɔ gbɔdzɔgbɔdzɔwo adze sii kaba ahaɖe afɔ siwo aɖɔ wo ɖo la enumake.
5. Tameɖoɖo nyui ka gbɔe xɔse ƒe dodokpɔwo ate ŋu akpɔ?
5 Míetoa xɔse ƒe dodokpɔwo me zi geɖe. Woʋua mɔnukpɔkpɔwo na mí be míadze si míaƒe dzi ƒe nɔnɔme. Mose gblɔ na Israel-vi siwo wòsusɔ vie woage ɖe Ŋugbedodonyigbaa dzi be: “Yehowa, wò Mawu, kplɔ wò [to gbeadzi] ƒe blane sɔŋ, bena yeabɔbɔ wò ɖe anyi, ne yeado wò akpɔ, bena yeanya nusi le wò dzime, be awɔ eƒe seawo dzi loo, alo màwɔ wo dzi o.” (Mose V, 8:2) Ne míedze ŋgɔ nɔnɔme alo tetekpɔ siwo míenɔ mɔ kpɔm na o la, ɖe seselelãme alo dzodzro, siwo ɖoa mía me alo alesi míewɔa nui mewɔa nuku na mí oa? Dodokpɔ siwo ŋu Yehowa ɖea mɔ ɖo ate ŋu ana míanya míaƒe gbɔdzɔgbɔdzɔwo godoo eye wòaʋu mɔ na mí be míawɔ asitɔtrɔ. (Yakobo 1:2-4) Negadzɔ gbeɖe be míado kpo ŋugbledede gbedodoɖatɔe le alesi míewɔa nui le tetekpɔwo me ŋu o!
Nukae Míaƒe Nyagbɔgblɔwo Ðena Fiana?
6. Nukae nya siwo ŋu míeɖoa dze tsoe ate ŋu aɖe afia le míaƒe dzi ŋu?
6 Aleke míawɔ anya nusi le míaƒe dzi me? Yesu gblɔ be: “Ame nyui la ɖea nu nyui doa go tsoa eƒe dzi ƒe nu nyui dzraɖoƒe; eye ame vɔ̃ɖi la ɖea nu vɔ̃ɖi doa go tsoa eƒe nu vɔ̃ɖi dzraɖoƒe; elabena nya, si ke wu dzi la, eyae nu gblɔna.” (Luka 6:45) Nusiwo ŋu míeƒoa nu tsoe zi geɖe ɖea nusi ŋu míaƒe dzi ku ɖo fiana. Ðe míeƒoa nu tsoa ŋutilãmenuwo kple xexeme nudzedzinamewo ŋua? Alo ɖe míaƒe dzeɖoɖowo kuna ɖe gbɔgbɔmenuwo kple teokrasi taɖodzinuwo ŋu enuenua? Le esi teƒe be míanɔ boblo dom ame bubuwo ƒe vodadawo la, ɖe míete ŋu tsyɔa nu wo dzi bɔbɔea? (Lododowo 10:11, 12) Ðe míeƒoa nu kpaŋkpaŋ tso amewo kple nusiwo me tom wole ŋu gake míeƒoa nu boo tso gɔmeɖosewo kple agbenyuinɔnɔ ŋu oa? Ðe esia ate ŋu afia be míele ŋku kem ɖe ame bubuwo ƒe nya me madzemadzeea?—Petro I, 4:15.
7. Míaƒe dzi ŋu dzɔdzɔ ŋuti nufiame kae míesrɔ̃ tso Yosef nɔviŋutsu ewoawo ƒe ŋutinya me?
7 Bu nusi dzɔ le ƒome gã aɖe me ŋu kpɔ. Yakob viŋutsu tsitsi ewo “megaƒoa nu” na wo nɔvi suetɔ, Yosef, “nyuie o.” Nukatae? Wonɔ ŋu ʋãm le esi wònye wo fofo ƒe lɔlɔ̃vi ta. Emegbe esi Mawu na Yosef ku drɔ̃e, si ɖo kpe edzi be Yehowa kpɔ ŋudzedze ɖe eŋu la, “wogalé fui ɖe edzi” wu. (Mose I, 37:4, 5, 11) Wotsɔ ŋutasesẽ dzra wo nɔvia de kluvinyenye me. Emegbe esi wote kpɔ be yewoatsyɔ nu yewoƒe nugbegblẽwɔwɔa dzi la, woble wo fofo wòbu be lã wɔadã aɖe wu Yosef. Yosef nɔviŋutsu ewo mete ŋu dzɔ woƒe dzi ŋu le ɣeyiɣi ma me o. Ne míekpɔa vodada le ame ŋu kabakaba la, ɖe ema anye dzesi be ŋukeklẽ alo ŋuʋaʋã le míaƒe dzi mea? Ehiã be míanɔ ŋudzɔ be míakpɔ míaƒe nuƒoƒo dzi eye míawɔ kaba aɖe dzodzro manyomanyowo ɖa.
8. Nukae akpe ɖe mía ŋu be míadzro míaƒe dzi me akpɔ ne míeda alakpa?
8 Togbɔ be ‘Mawu mate ŋu aka aʋatso o’ hã la, amegbetɔ madeblibowo ya daa alakpa bɔbɔe. (Hebritɔwo 6:18) Hakpala la fa konyi be: “Amegbetɔwo katã nye alakpadalawo.” (Psalmo 116:11) Apostolo Petro gɔ̃ hã gbe nu le Yesu gbɔ alakpatɔe zi etɔ̃. (Mateo 26:69-75) Edze ƒã be ele be míadze agbagba aƒo asa na alakpadada, elabena Yehowa lé fu “aʋatsoɖe.” (Lododowo 6:16-19) Ne edzɔ be míeda alakpa kpɔ la, anyo be míakpɔ ɖa be nuka gbɔe wòtso hã. Amegbetɔ vɔvɔ̃ gbɔe wòtsoa? Vɔvɔ̃ na tohehe taea? Ðewohĩ be ŋu nagakpe mí o alo ɖokuitɔdidi gbɔe kuxia tsoa? Nuka ke gbɔe wòtso o, aleke gbegbe wòasɔe nye si be míade ŋugble le nyaa ŋu, atsɔ ɖokuibɔbɔ axɔ míaƒe vodadaa, ahaɖe kuku na Yehowa be wòatsɔe ake mí eye abiae be wòakpe ɖe mía ŋu míaɖu gbɔdzɔgbɔdzɔa dzi! “Hamemegãwo” anye amesiwo sɔ wu be woana kpekpeɖeŋua.—Yakobo 5:14.
9. Nukae míaƒe gbedodoɖawo ate ŋu aɖe afia le míaƒe dzi ŋu?
9 Esi Yehowa nɔ Fia Salomo ƒe biabia be wòana sidzedze kple nunya ye ŋu ɖom la, egblɔ be: “Esi nusia le dzi me na wò, eye mèbia ho kple kesinɔnu, bubu . . . o [la], metsɔ nunya kple sidzedze na wò, eye matsɔ ho kple kesinɔnu kpakple bubu, . . . akpe ɖe eŋu na wò.” (Kronika II, 1:11, 12) Yehowa nya nusi nɔ dzi me na Salomo to nusi wòbia kple esi mebia o me. Nukae nya siwo míegblɔna na Mawu ɖena fiana tso míaƒe dzi ŋu? Ðe míaƒe gbedodoɖawo ɖenɛ fiana be míetsia dzi ɖe sidzedze, nunya, kple nugɔmesese ŋua? (Lododowo 2:1-6; Mateo 5:3) Ðe míetsia dzi ɖe Fiaɖuƒea ƒe nuwo ŋua? (Mateo 6:9, 10) Ne míaƒe gbedodoɖawo va zu gotagome nuwɔna kple kɔnu aɖe ko la, esia ate ŋu anye dzesi be ehiã be míagbɔ dzi ɖi ade ŋugble le Yehowa ƒe nuwɔwɔwo ŋu. (Psalmo 103:2) Ele be Kristotɔwo katã nanɔ ŋudzɔ ate ŋu anya nusi woƒe gbedodoɖawo ɖena fiana.
Nya Kae Míaƒe Nuwɔnawo Gblɔna?
10, 11. (a) Afikae ahasiwɔwɔ kple matrewɔwɔ dzea egɔme tsonɛ? (b) Nukae akpe ɖe mía ŋu be ‘míagawɔ ahasi le dzi me o’?
10 Wogblɔna be ame ƒe nuwɔna wɔa dɔ wu eƒe numenya. Le nyateƒe me la, míaƒe nuwɔnawo ƒoa nu gbogbo aɖe tso amesi ƒomevi míenye le ememe ŋu. Le kpɔɖeŋu me, le agbenyuinɔnɔ ƒe nyawo me la, dzia ŋu dzɔdzɔ bia nu geɖe wu asaƒoƒo na matrewɔwɔ alo ahasiwɔwɔ dzro ko. Yesu gblɔ le eƒe Todzimawunya me be: “Amesiame, si ke kpɔ nyɔnu aɖe wòdzroe la, ewɔ ahasi kplii xoxo le eƒe dzi me.” (Mateo 5:28) Aleke míate ŋu aƒo asa na ahasiwɔwɔ le míaƒe dzi me gɔ̃ hãe?
11 Blemafofo Hiob nuteƒewɔla la ɖo kpɔɖeŋu ɖi na Kristotɔ ŋutsu kple nyɔnu srɔ̃tɔwo. Ðikeke mele eme o be Hiob wɔ nu kple ɖetugbiwo hekpe ɖe wo ŋu tufafatɔe ne wohiã kpekpeɖeŋu gɔ̃ hã abe alesi wòwɔna na amesiame ene. Gake meva susu me na nuteƒewɔla sia be yeaɖo gbɔdɔdɔ ƒe lɔlɔ̃ na wo kura o. Nukatae? Elabena eɖoe kplikpaa be yematsɔ gbɔdɔdɔ ƒe dzodzro vɔ̃ anɔ nyɔnuwo kpɔmee o. Egblɔ be: “Mebla nu kple nye ŋku, eye aleke lawɔ malé ŋku ɖe ɖetugbi ŋu?” (Hiob 31:1) Mina míawo hã míabla nu ma tɔgbe kple míaƒe ŋku ahadzɔ míaƒe dzi ŋu.
12. Aleke nàzã Luka 10:16 me nyawo le wò dzi ŋu dzɔdzɔ mee?
12 Mawu ƒe Vi la gblɔ be: “Amesi wɔa nuteƒe le nu suetɔ ke me la, enyea nuteƒewɔla le nu geɖewo hã me, eye amesi wɔa nu madzɔmadzɔ le nu suetɔ ke me la, enyea nu madzɔmadzɔ wɔla le nu geɖewo hã me.” (Luka 16:10) Ẽ, ehiã be míalé ŋku ɖe míaƒe agbenɔnɔ ŋu le gbesiagbegbenɔnɔ me nuwɔna suewo me kple esiwo míewɔna le ɣaɣlaƒe le míaƒe aƒeme gɔ̃ hã ŋu. (Psalmo 101:2) Ne míele míaƒe aƒeme, le television kpɔm, alo le Internet dzi nuwo me tsam la, ɖe míekpɔa egbɔ be míawɔ ɖe Ŋɔŋlɔawo ƒe aɖaŋuɖoɖo si gblɔ be: “Ke ahasiwɔwɔ kple makɔmakɔnyenye katã alo ŋukeklẽ la womagayɔ eŋkɔ gɔ̃ hã le mia dome o, abe alesi wòdze ame kɔkɔewo ene, kple ŋukpenanu kple yakanyagbɔgblɔwo kple atsaƒoƒo, siwo medze o” la dzia? (Efesotɔwo 5:3, 4) Ke ŋutasesẽnuwɔna siwo woɖena le television alo video dzi fefewo me ya ɖe? Hakpala la gblɔ be: “Yehowa doa ame dzɔdzɔe kpɔna, ke eƒe luʋɔ léa fu ame vɔ̃ɖi kple amesi lɔ̃a ŋutasẽnuwɔwɔ.”—Psalmo 11:5.
13. Ne míele ŋugble dem le nusi dona tsoa míaƒe dzi me ŋu la, aleke wòle be míaɖɔ ŋu ɖoe?
13 Yeremya xlɔ̃ nu be: “Ame ƒe dzi la, alakpatɔ wònye wu nuwo katã, nu gbegblẽ wònye.” (Yeremya 17:9) Dzi ƒe alakpatɔnyenye adze ne míele míaƒe vodadawo nu ɖem, ne míebu gbɔdzɔgbɔdzɔwo nu tsɛe, ne míetsyɔ nu míaƒe gbɔdzɔgbɔdzɔ gãwo dzi, alo ne míeɖe ami ɖe nusiwo míete ŋu wɔ ŋu. Nɔnɔme eve hã te ŋu nɔa dzi gbegblẽa si—agblɔ numevivinyawo ahawɔ nu bubu kura. (Psalmo 12:3; Lododowo 23:7) Aleke gbegbe wòle vevie enye si be míatsɔ anukwareɖiɖi adzro nusi dona tsoa míaƒe dzi mee!
Ðe Míaƒe Ŋku Dzi Dzaa?
14, 15. (a) Nukae nye ŋku si “dzi dza”? (b) Aleke nana be míaƒe ŋku dzi nadza akpe ɖe mía ŋu be míadzɔ dzia ŋui?
14 Yesu gblɔ be: “Ame blibo la ƒe akaɖi enye ŋku.” Egblɔ kpee be: “Ne wò ŋku dzi dza la, wò ame blibo la katã me lakɔ.” (Mateo 6:22) Ŋku si dzi dza la nɔa taɖodzinu, alo tameɖoɖo, ɖeka dzi eye metena ɖa le eŋu alo nu bubu kpɔkpɔ henɛ o. Le nyateƒe me la, ele be míaƒe ŋku nanɔ ‘mawufiaɖuƒe la kple Mawu ƒe dzɔdzɔenyenye didi’ ŋu. (Mateo 6:33) Ne míaƒe ŋku dzi medza o la, nukae ate ŋu adzɔ ɖe míaƒe kpɔɖeŋudzia dzi?
15 Bu dɔwɔɖui ƒe nya ŋu kpɔ. Míaƒe ƒome ƒe nuhiahiãwo gbɔ kpɔkpɔ nye nusi wodi tso Kristotɔ si. (Timoteo I, 5:8) Ke ne nuɖuɖu, nudodo, aƒe, kple nu bubu siwo le tsia dzi ƒe dzodzroe nye nusi hea mí ya ɖe? Ðe ema maɖe aboyo míaƒe dzi kple susu, ana be míatsɔ dzi afã anɔ subɔsubɔmee oa? (Psalmo 119:113; Romatɔwo 16:18) Nukatae wòle be míatsi dzi ɖe ŋutilãmenuwo gbɔ kpɔkpɔ ŋu ale gbegbe be ƒomea, dɔwɔɖui, kple ŋutilãmenuwo koe ava nɔ vevie na mí wu le agbe me? Ðo ŋku aɖaŋuɖoɖo sia si tso gbɔgbɔ me dzi be: “Mikpɔ mia ɖokui dzi nyuie, bena nutsuɖuɖu kple ahamumu kple dzimaɖitsitsi ɖe nuɖuɖu ŋu nagate miaƒe dzi ɖe to o, eye ŋkeke ma nagalili mi abe mɔ̃ ene o; elabena adze amesiwo katã nɔ anyigba blibo la ƒe ŋku me la dzi.”—Luka 21:34, 35.
16. Aɖaŋu kae Yesu ɖo le ŋku ŋu, eye nukatae?
16 Ŋku nye kadodomɔnu vevi aɖe si le susu kple dzi la dome. Nusi ŋku kpɔna vevie ate ŋu akpɔ ŋusẽ ɖe míaƒe tamesusu, seselelãmewo, kple nuwɔnawo dzi vevie. Le kpɔɖeŋunyagbɔgblɔ me la, Yesu ƒo nu tso ŋusẽ si le nukpɔkpɔ ƒe amehehe ŋu hegblɔ be: “Ke ne wò nuɖusi ŋku ɖia nuwò la, hoe le eme, eye natsɔe aƒu gbe, elabena enyo na wò be, wò ŋutinuwo dome ɖeka nagblẽ, wu esi woatsɔ wò ame blibo la katã aƒu gbe ɖe [Gehena ƒe dzo, NW] la me.” (Mateo 5:29) Ele be míaɖe ŋku ɖa tso numanyomanyowo kpɔkpɔ ŋu. Le kpɔɖeŋu me, mele be míaɖe mɔ nɛ be wòanɔ nusiwo ŋu wotrɔ asi le be woanyɔ seselelãme kple dzodzro gbegblẽwo ɖe ame me ŋu o.
17. Aleke Kolosetɔwo 3:5 ŋudɔwɔwɔ akpe ɖe mía ŋu be míadzɔ dzia ŋui?
17 Gake menye ŋku koe nye sidzenu si ko dzi míetona nyaa nusiwo le edzi yim o. Sidzenu bubuwo, abe asikakanuŋu kple nusese ene, wɔa woƒe akpa dzi, eye ehiã be míanɔ ŋudzɔ ɖe ŋutinu siwo do ƒome kpli wo hã ŋu. Apostolo Paulo xlɔ̃ nu be: “Eyata miwu mia ŋutinu, siwo le anyigba dzi; ahasiwɔwɔ, makɔmakɔnyenye, fiẽŋufiẽŋui, nudzodzro vɔ̃ kple ŋukeklẽ, si nye trɔ̃subɔsubɔ.”—Kolosetɔwo 3:5.
18. Afɔ kawoe wòle be míaɖe ɖe tamesusu gbegblẽwo ŋu?
18 Dzodzro gbegblẽ ate ŋu anyɔ tso míaƒe susu ƒe gogloeaƒe ke. Zi geɖe la, eŋububu nana dzodzro gbegblẽa nu sẽna ɖe edzi hekpɔa ŋusẽ ɖe dzia dzi. “Emegbe la ne nudzodzro la fɔ fu la, edzia nuvɔ̃.” (Yakobo 1:14, 15) Ame geɖe lɔ̃ ɖe edzi be mɔ sia dzie wotona hafi va dɔa ame ɖokui gbɔ. Aleke gbegbe wòle vevie enye si be míayi edzi atsɔ gbɔgbɔmenuwo anɔ míaƒe susu me demee! (Filipitɔwo 4:8) Eye ne susu gbegblẽ nyɔ ɖe susua me la, ele be míadze agbagba aɖee ɖa.
‘Subɔ Yehowa Kple Dzi Blibo’
19, 20. Aleke míawɔ akpɔ dzidzedze le Yehowa subɔsubɔ kple dzi blibo me?
19 Le Fia Dawid ƒe amegãkuku me la, egblɔ na via be: “Vinye Salomo, dze si fofowò ƒe Mawu la, eye nasubɔe kple dzi blibo kpakple luʋɔ blibo, elabena Yehowa dzroa dziwo katã me kpɔna, eye wònya tamesusuwo katã!” (Kronika I, 28:9) Salomo ŋutɔ do gbe ɖa bia “dzi nyanu.” (Fiawo I, 3:9) Ke hã dɔ sesẽ aɖe kpɔ eŋkume be wòana dzia nanɔ nenema le eƒe agbemeŋkekewo katã me.
20 Nenye be míakpɔ dzidzedze le go sia me la, menye dzi si dzea Yehowa ŋu ɖeɖekoe hiã be wòasu mía si o ele be míadzɔ eŋu hã. Be míate ŋu awɔe la, ele be Mawu ƒe ŋkuɖodzinyawo nanɔ dzi me na mí—‘le eƒe gogloeaƒe ke.’ (Lododowo 4:20-22) Ele be míatsɔe aɖo dɔe anɔ míaƒe dzi me dzrom, atsɔ gbedodoɖa anɔ ŋugble dem le nusiwo míaƒe nyagbɔgblɔ kple nuwɔna ɖena fiana ŋu. Viɖe kae anɔ ŋugbledede sia ŋu ne míedi Yehowa ƒe kpekpeɖeŋu be míaɖɔ gbɔdzɔgbɔdzɔ ɖesiaɖe si ŋu míake ɖo la ɖo o? Eye aleke gbegbe wòle vevie enye si be míanɔ ŋudzɔ ɖe nusiwo míexɔna toa míaƒe sidzenuwo mee ŋu! Le esia wɔwɔ me la, kakaɖedzi anɔ mía si be “Mawu ƒe ŋutifafa, si ƒo gɔmesesewo katã ta la, adzɔ miaƒe dziwo kple miaƒe tamesusuwo ŋu adzra wo ɖo le Kristo Yesu me.” (Filipitɔwo 4:6, 7) Ẽ, mina míaɖoe kplikpaa be míadzɔ míaƒe dzi ŋu wu nusianu si ŋu wòle be woadzɔ ahasubɔ Yehowa kple dzi blibo.
Èɖo Ŋku Wo Dzia?
• Nukatae wòle vevie be míadzɔ dzia ŋu?
• Aleke nya siwo míegblɔna me dzodzro akpe ɖe mía ŋu be míadzɔ miaƒe dzi ŋui?
• Nukatae wòle be míaƒe ŋku dzi ‘nadza’?
[Nɔnɔmetata siwo le axa 23]
Zi geɖe la, nukawo ŋue míeƒoa nu le le gbeadzisubɔsubɔdɔa me, le kpekpewo me, kple le aƒeme?
[Nɔnɔmetata siwo le axa 25]
Ŋku si dzi dza meɖena ɖa le nu ŋu o