Nyanyuia Gbɔgblɔ le Haiti Dukɔ Dzeani la Me

HAITI kple Dominican Republic siaa le Hispaniola-tɔdomekpo xɔdzo, afisi Carib-nutowo ƒe to kɔkɔtɔwo le, la dzi. Toawo dometɔ aɖewo kɔ wu meta 2,400. Le vuvɔŋɔliwo la, ta siwo le toawo tame la me tsiwo te ŋu blana vie.

Avetsu damawo do ɖe to siwo le Haiti ƒe anyiehe la dzi kple bali siwo le afima la me. Le teƒe bubuwo la, avewo tsɔtsrɔ̃ wɔe be toawo, si dometɔ aɖewo dzɔ kã la, tame kpã heƒu kplakplakpla. Ne èɖi tsa le Haiti ƒe dziehe alo anyiehe la, àkpɔe be dukɔa me nya kpɔ ale gbegbe. Ne èle mɔ gɔdɔegɔdɔe siwo wodo to toawo dome la dometɔ aɖewo dzi la, ànɔ tagba kple atsiaƒu, siwo ƒe dzedzeme nɔa tɔtrɔm vovovoe, la kpɔm. Àkpɔ seƒoƒo hamehame kple nutata dzeani gbogbowo le afisiafi.

Ame miliɔn 8, akpe 300, siwo le dukɔ dzeani sia me la ƒe akpa gãtɔ tso Afrika, eye wole duviwo me. Togbɔ be nu mede wo dometɔ akpa gãtɔ dzi boo o hã la, wonye dɔmenyolawo kple amedzrowɔlawo. Ƒe 60 aɖewo enye esia si Yehowa Ðasefowo tsɔa dzidzɔ ɖagblɔa Mawu ƒe Fiaɖuƒe ŋuti nyanyuia na wo, eye woawo hã xɔa wo nyuie.—Mateo 24:14.

Gbeƒãɖeɖe le Duviwo Me

Nusi teƒe dutanyanyuigblɔla aɖe kpɔ esime woyi duvi aɖe me zi gbãtɔ la ɖe dzesi ŋutɔ. Eŋlɔ bena:

“Le March 2003 ƒe ŋkeke aɖe dzi la, míetso Cabaret-du si me mí dutanyanyuigblɔlawo le, si le Port-au-Prince si nye fiadua, ƒe dziehe, me yi gbeƒã ɖe ge le duvi aɖe si ŋkɔe nye Casale, si me wokua ʋu kilometa 30, alo gaƒoƒo afã, kloe hafi ɖona, la me. Esi wònye be ƒe 1999 mee Ðasefowo yi ɖaɖe gbeƒã le Casale ko womega yi kpɔ o ta la, míetsɔ didi vevi sia dze mɔa le ŋdi ga adre me. Mí ame 22—si nye míaƒe hamea katã kloe—ye nɔ bɔs vi eve me yi. Mí katã míenɔ dze ɖom henɔ nu kom esime míenɔ mɔ siwo womedo o, evɔ woɖi abu, la dzi kakaka va do ɖe bali aɖe, si me ati gã gbogbo aɖewo le la, me. Tɔ aɖe si to balia me heyi ɖato Casale-dua me.

“Ƒe 1800-awo ƒe gɔmedzedze me kee wotso du sia, esime Poland-srafo siwo va kpe ɖe kluviwo ŋu woxɔ ɖokuisinɔnɔ la kpakple Haiti-nyɔnu siwo woɖe la tso kɔƒewo ɖe bali wɔnu sia me. Esia wɔe be wova dzi ame ƒomevi vovovowo tsaka. Ewɔ nuku ŋutɔ be àkpɔ yevuwo, ame hɛwo, ame dzẽwo, amesiwo ƒe ŋku ƒe yibɔeaƒe nye gbemu, amesiwo tɔ le dzĩe, kple bubuawo, le dukɔa me.

“Amesi ŋu míeke ɖo gbã la mexɔ mí o. Esi míedzo le egbɔ la, ŋutsu aɖe zɔ va tu mí le mɔa dzi. Edi be yeanya ne míeka ɖe edzi be vovototo le Yesu kple Mawu dome. Míebiae be wòaɖatsɔ eƒe Biblia vɛ, eye le Ŋɔŋlɔawo me dzodzro kplii vɔ la, eva xɔe se be Yesu enye Mawu ƒe Vi eye be Yehowae nye ‘Mawu vavã ɖeka kolia la.’ (Yohanes 17:3) Ame geɖe kpe mí be míava nɔ anyi aɖe gbeƒã na yewo. Wo dometɔ aɖewo bia be, ‘Ɣekaɣie miagava srɔ̃ Biblia kpli mí?’

“Le ŋdɔ me la, míekpɔ teƒe fafɛ aɖe yi ɖanɔ bene míaɖu ŋdɔnu. Nɔvinyɔnu eve ɖa tɔmelã gbogbo aɖe ɖe asi. Nuɖuɖua vivi ale gbegbe! Esime míeɖe dzi ɖi le nua ɖum hele dze ɖom la, míenɔa gbeƒã ɖem na amesiwo va le yiyim la hã. Emegbe míetso tɔa yi ɖe eƒe go kemɛ dzi. Amedzrowɔla siawo gbɔ nɔnɔ le woƒe ati siwo wodo ɖe woƒe abɔwo me la te ahaɖe gbeƒã na wo vivi mía nu ale gbegbe. Edzɔ dzi na mí ŋutɔ be míese ɖevi siwo le fefem, amesiwo le nu nyam le tɔa me, kple mama siwo le kɔfikuwo tum la ŋkɔ.

“Esi ɣetrɔ ga ene ƒo la, míetrɔ kple dzidzɔ va ɖo míaƒe bɔs viawo hetrɔ gbɔ va Cabaret. Zi gbãtɔ si mía kple srɔ̃nye míede Casale, si nye afisi amedzrowɔla kple xɔlɔ̃wɔlawo le, la vivi mía nu ale gbegbe.”

Tso esime Ðasefo dutanyanyuigblɔlawo ɖo afɔ Haiti zi gbãtɔ le ƒe 1945 me ke la, Fiaɖuƒe gbeƒãɖela siwo le dukɔa me ƒe xexlẽme dzi ɖe edzi, si wɔe be ame 14,000 aɖewo va le gbeƒã ɖem fifia hele Biblia srɔ̃m kple ame 22,000 kple edzivɔwo le woƒe aƒewo me. Woƒe gbeƒãɖeɖedɔa ʋã amewo, si wɔe be le ƒe 2005 me la, ame 59,372 ye de Kristo ƒe ku ƒe Ŋkuɖodzia ɖuƒe, eye wogakpɔtɔ le Mawu ƒe Fiaɖuƒea ŋuti nyanyuia gblɔm le dutoƒo. Se mɔ vovovo siwo nu Yehowa Ðasefowo ƒe dɔa kpɔ ŋusẽ ɖe amewo dzi le la ɖa.

Nyanyuia Le Nutata Dzeaniwo Me

Nutata siwo wode amae nyuie la léa dzi na Haititɔ akpa gãtɔ. Esia dzena le woƒe nudodowo, alesi wosi aŋɔwoe na aƒewo, le seƒoƒo ƒomevi vovovo siwo le woƒe abɔwo me, kple woƒe nutatawo me. Wota nusiwo le wo gbɔ la ɖe avɔwo dzi hede amae wònya kpɔe nyuie, si woyɔna be L’Art Haitien, tsɔ ti ɖe mɔdodo siwo katã le Port-au-Prince la dzi. Amewo tsoa xexeame ƒe akpa vovovowo va ƒlea nusiawo.

Menye avɔwo ko dzie wotaa nu dzeani siawo ɖo o. Wota nu dzeani siawo hã ɖe ʋu gbogbo siwo amewo ɖona le Port-au-Prince, si woyɔna be camionettes, alo tap-tap, la hã dzi. Nutata siawo dometɔ geɖe nye esi tso Biblia me.

Ne èle mɔawo to zɔm la, nutata nyanyɛwo—si ƒe ɖee nye esime Adam kple Xawa nɔ Eden-bɔa me—koe nànɔ kpɔkpɔm keŋ. Wò ya kpɔ ɖa, ɖee nye ma wota ɖe camionette si yina ɖaa la dzi. Woŋlɔ Ŋɔŋlɔawo me nya, alo nya nyanyɛ, siwo me Yehowa ƒe ŋkɔ dze le la ɖe ʋu siawo dzi loo alo ɖe fiasewo dzi.

Gbeƒãɖeɖe Nyanyuia le Suku

Mɔnukpɔkpɔ nyui aɖewo sua sɔhɛ Ðasefo siwo le Haiti la si be woakpe ɖe wo hatisukuviwo ŋu bene woasrɔ̃ Biblia. Esia ƒe kpɔɖeŋue nye nyatakaka si ɖetugbi Ðasefo aɖe, si xɔ ƒe 17, na. Egblɔ be:

“Nye sukuxɔmehati aɖe te ɖe ŋunye gbeɖeka hebiam be nukae nye ‘matrewɔwɔ?’ Esi mebui be ɖee wòdi be yeadze ahiãm ta la, nyemede nu eme nɛ o. Ke hã, eyi ɖabia nya sia ke ehati ŋutsuvi aɖe hã, eye klass bliboa va di vevie be yewoanya nu tso nya sia ŋu. Eyata meyi ɖawɔ numekuku le nyaa ŋu eye le kwasiɖa si kplɔe ɖo me la, meɖe nyatia me na klass la, eye meɖe nusitae Yehowa Ðasefowo dzea agbagba be yewoanɔ kɔkɔe le agbenɔnɔ, mawusubɔsubɔ, kple ŋutilãme, me na wo.

“Sukuviawo bia nya geɖewo helɔ̃ ɖe Biblia me ŋuɖoɖo siwo mena wo la dzi. Sukua ƒe tatɔ, amesi medi be mawɔ nusia hafi o la, gɔ̃ hã bia nya geɖe hewɔ ɖoɖo nam be maɖe nya sia me na klass bubuwo hã. Metsɔ agbalẽ si nye Questions Young People Ask—Answers That Worka la fia wo, eye agbalẽa dze wo dometɔ geɖe ŋu. Le ŋufɔke la, mena agbalẽ sia 45 le sukua. Wo dometɔ geɖe xlẽe wu enu le ɣeyiɣi kpui aɖe me, eye Ðasefo siwo le wo dometɔ aɖewo ƒe nutowo me la, le Biblia srɔ̃m kpli wo fifia. Sukuviawo dometɔ ɖeka si le míaƒe nutoa me la dea kpekpeawo katã fifia.”

Creolegbe Dodo

Alesi ko dukɔa me tɔwo nya kpɔ hewɔa amedzroe la, nenema kee Creolegbe si Haititɔwo dona, si nye Fransegbe si wotsɔa Afrikatɔwo ƒe gbeŋutisewo donae, la hã nya senae. Eyae nye Haititɔwo degbe, si gɔme wosena nyuie wu. Gbe sia koŋ mee Yehowa Ðasefowo ɖea gbeƒã le, eye wowɔ ɖoɖowo be woata Biblia-srɔ̃gbalẽ geɖewo ɖe Haititɔwo ƒe Creolegbe me.

Le ƒe 1987 me la, woɖe Se Agbe ƒe Vivi le Anyigba Dzi Tegbee! ƒe agbalẽa gɔme ɖe Haititɔwo ƒe Creolegbe me, eye emegbe woɖe agbalẽ siwo nye Sidzedze si Kplɔa Ame Yia Agbe Mavɔ Me kple Nukae Mawu Di tso Mía Si? hã gɔme ɖe gbe sia me. Agbalẽ siawo kpe ɖe ame yeye siwo dze Biblia sɔsrɔ̃ gɔme, hedi be yewoase Mawu ƒe Nya la me nu veviwo gɔme, la ŋu ale gbegbe. Tso September 1, 2002 me la, wote Gbetakpɔxɔ la hã tata ɖe Haititɔwo ƒe Creolegbea me. Wogakpɔtɔ zãa Fransegbe me gbalẽwo ya, ke hã, ame geɖe dina be yewoaxlẽ agbalẽawo le yewo ŋutɔ yewo degbe me.

Nyanyuia Tsɔtsɔ Yi na Gamenɔlawo

Ƒe ʋɛ aɖewo enye esia si Yehowa Ðasefowo te nyanyuia tsɔtsɔ yi na amesiwo wode mɔ̃ la. Edzɔa dzi na Ðasefo siwo kpɔa gome le dɔ sia wɔwɔ me la be yewoatsɔ gbedasi fakɔnamewo ayi na amesiwo le nɔnɔme wɔnublanui sia me. Subɔla Kristotɔ aɖe gblɔ be:

“Esi míeyi gakpɔ aɖe me zi gbãtɔ la, wokplɔ amesiwo le mɔ̃ la va ƒo ƒu ɖe xɔ gã aɖe me bene míaɖe gbeƒã na wo. Míenya alesi tututu woaxɔ míi o. Esi míeɖe mía ɖokui nu be ɖe míeva kpekpe ge ɖe wo ŋu woase Biblia gɔme la, wo ame 50 la katã xɔ mí nyuie. Míena Srɔ̃ Nuxexlẽ Kple Nuŋɔŋlɔ kpakple Se Agbe ƒe Vivi le Anyigba Dzi Tegbee! ƒe agbalẽ siwo wota ɖe Creolegbe me la wo, hete Biblia sɔsrɔ̃ kple wo dome ame 26. Wo dometɔ ewo mede suku o, gake esi míefia alesi woate ŋu azã nɔnɔmetata siwo le agbalẽa me atsɔ ase nusi fiam wole la gɔme wo la, wokpɔ dzidzɔ ŋutɔ.”

Esi Ðasefoawo gatrɔ yi la, ŋutsuawo dometɔ ɖeka gblɔ be: “Mexlẽ agbalẽa gaxlẽe ake. Medea ŋugble le eme nyawo ŋu ɣeawokatãɣi, eye menɔ mɔ kpɔm na mi.” Ŋutsu aɖe si wode mɔ̃ ɖe adzodada ta la gblɔ be yedi be yeatrɔ nɔnɔme, eye wòbia be woana ame aɖe naɖanɔ Biblia srɔ̃m kple ye srɔ̃ na ye. Ðevi eve aɖewo fofo si wode mɔ̃ la hã bia be woaɖasrɔ̃ nu kple ye srɔ̃ na ye ale be wòate ŋu anya vovototo si le nyateƒe dzixɔsewo kple aʋatso tɔwo dome. Protestanttɔwo ƒe subɔsubɔhakplɔla aɖe, si wode mɔ̃ be eble eƒe sɔlemeviwo wodzɔ ga gbogbo aɖe nɛ la, gblɔ be yeke ɖe nyateƒea ŋu azɔ eye be ne yeƒe ɣeyiɣia de woɖe asi le ye ŋu la, yeakpe ɖe yeƒe sɔlemetɔwo ŋu ne woazu Yehowa Ðasefowo.

Gamenɔla bubu si si Nusi Mawu Di ƒe agbalẽa, si le Creolegbe me, mele o la xɔ gaxɔmenɔla aɖe tɔ hekpɔ edzi ŋlɔ agbalẽa me nyawo katã ɖe agbalẽ bubu me hesrɔ̃e ɖe tame. Nyɔnu gamenɔla aɖe ya te nusiwo srɔ̃m wònɔ la gbɔgblɔ na nyɔnu asieke aɖewo siwo le gaxɔa me kplii la, hele nu srɔ̃m kpli wo gɔ̃ hã. Esi ŋutsu aɖe ya srɔ̃ Nusi Mawu Di ƒe agbalẽa wu enu hedze Sidzedze-gbalẽa sɔsrɔ̃ gɔme la, ete gbeƒãɖeɖe na gamenɔla bubuwo. Eteƒe medidi o enɔ Biblia srɔ̃m kple ame ene.

Merconyb srɔ̃a Biblia tsã eye eƒe ƒometɔ aɖewo nye Yehowa Ðasefowo. Ede dzi ƒo na gamenɔla bubuwo be woaxlẽ Biblia-srɔ̃gbalẽ siwo yeƒe ƒometɔawo tsɔna vanɛ na ye la. Egblɔ be: “Ne metsɔ agbalẽawo na gamenɔlawo la, woyɔam be Yehowa Ðasefo. Meɖoa eŋu na wo be nyemenye Yehowa Ðasefo o elabena menya nusi Ðasefonyenye bia. Fifia medi vevie be masrɔ̃ nu, axɔ nyɔnyrɔ. Ne ɖee medze fonyewo ƒe afɔɖoƒewo yome le ɖevime la, anye ne nyemele gakpɔ me afisia o.”

Gaxɔmenɔla siwo Mercony na agbalẽe la dometɔ ɖeka gblɔ na Ðasefo si va egbɔ la be: “Hafi ne miava le Dzoɖa si va yi gbe la, melé blanui ale gbegbe eye meɖoe be mawu ɖokuinye. Gake esi mexlẽ magazineawo la, medo gbe ɖa na Mawu be wòatsɔ nu gbegblẽ siwo mewɔ la akem eye be wòadɔ ame aɖe ɖa be wòava fia mɔ nyuitɔ lam. Eyata esi mieva le ŋkeke si kplɔe ɖo dzi be yewoava srɔ̃ Biblia kple gamenɔlawo la, dzi dzɔm ale gbegbe! Madi be nàfiam alesi wosubɔa Yehowae.”

Nyɔ! Le Nyanyuia Fiam Ame Geɖewo

November 8, 2000, ƒe Nyɔ! la ƒo nu tso dɔnɔdzikpɔkpɔdɔa ŋu. Nyɔnu aɖe xɔ ɖekaɖeka 2,000 sɔŋ hema na dɔnɔdzikpɔla siwo va takpekpe aɖe wɔ ge le Port-au-Prince. Woma July 8, 2002, ƒe Nyɔ!, si me nyati aɖewo ƒo nu tso kpovitɔwo kple woƒe dɔa ŋu la na kpovitɔwo le Port-au-Prince katã. Wokpɔ ŋudzedze ɖe eŋu ale gbegbe be fifia kura gɔ̃ hã la, wo dometɔ aɖewo tena ɖe Ðasefowo ŋu le ablɔwo dzi hebiaa magazine ma ƒe ɖewo wo.

Nyitsɔ laa la, Xexeame ƒe Lãmesẽ Habɔbɔ ƒe dɔwɔla aɖe wɔ ɖoɖo be yewoaƒo nu na amewo tso kuxi siwo AIDS hena vɛ ŋu. Wokpee be wòava Yehowa Ðasefowo ƒe alɔdzedɔwɔƒea eye wotsɔ AIDS ŋuti nyatakaka siwo wota ɖe Nyɔ! me la fiae. Alesi wotsɔ Biblia dzro AIDS ƒe nya sia, kpakple mɔ nyuitɔ si dzi woate ŋu ato atsi enu kple alesi woate ŋu akpe ɖe amesiwo le dɔ sia lém ŋui bene woanɔ te ɖe enu, mee la wɔ dɔ ɖe edzi ale gbegbe. Egblɔ be Nyɔ! ya tre nya sia ŋuti nyatakakawo nana xoxo.

Ẽ, Yehowa Ðasefowo le gbeƒã ɖem Fiaɖuƒe ŋuti nyanyuia le mɔ geɖewo nu le Haiti dzeani la, abe alesi ko wole ewɔmee le dukɔ 234 bubuwo me le xexeame katã ene. Ame geɖe le mɔkpɔkpɔgbedasi sia xɔm eye wole kpekpem ɖe wo ŋu be woƒe nukpɔkpɔ nato agbemekuxi siwo li fifia la ta aɖo xexeme yeyea, si me Yehowa, Mawu vavã la, subɔlawo anɔ agbe deblibo le yi ɖe mavɔ me la me.—Nyaɖeɖefia 21:4.

[Etenuŋɔŋlɔwo]

[Nɔnɔmetata si le axa 9]

Fotoa megbe: ©Adalberto Rios Szalay/photodisc/age fotostock