Wò Fɔmaɖimaɖi Doa Dzidzɔ Na Yehowa Ƒe Dzi
‘Vinye, dze nunya, be nado dzidzɔ na nye dzi, ne mate ŋu aɖo nya ŋu na ame siwo le alɔme ɖem le ŋunye.’—LOD. 27:11.
1, 2. (a) Satana ƒe amenutsotso ka ŋue Hiob ƒe agbalẽa ƒo nu tso? (b) Nu kae ɖee fia be Satana yi edzi nɔ Yehowa ƒe amewo nu tsom le Hiob ƒe ŋkekeawo megbe?
YEHOWA ɖe mɔ Satana do Mawu subɔla wɔnuteƒe Hiob ƒe fɔmaɖimaɖi kpɔ. Nu si do tso emee nye be Hiob bu eƒe lãhawo kple viawo, eye dɔléle vɔ̃ɖi aɖe dze eya ŋutɔ dzi. Gake esi Satana tsɔ nya ɖe Hiob ƒe fɔmaɖimaɖi ŋu la, menye Hiob ɖeka koe nɔ susu me nɛ o. Satana gblɔ be: ‘Ŋutigbalẽ ɖe ŋutigbalẽ teƒe, eye amegbetɔ atsɔ nu siwo katã le esi la, ana ɖe eƒe agbe ta.’ Gbetɔame ma fɔ nya aɖe ɖe te si lɔ Hiob kple ame bubu geɖewo ɖe eme, eye nya ma gakpɔtɔ li ɣeyiɣi didi aɖe le Hiob ƒe ku megbe gɔ̃ hã.—Hiob 2:4.
2 Anɔ abe ƒe 600 le Hiob ƒe dodokpɔa megbe la, Mawu ƒe gbɔgbɔ ʋã Salomo wòŋlɔ bena: ‘Vinye, dze nunya, be nado dzidzɔ na nye dzi, ne mate ŋu aɖo nya ŋu na ame siwo le alɔme ɖem le ŋunye.’ (Lod. 27:11) Edze ƒãa be ɣemaɣi la, Satana gakpɔtɔ nɔ gbe tɔm Yehowa kokoko. Tsɔ kpe ɖe eŋu la, le ŋutega aɖe si apostolo Yohanes kpɔ me la, wokpɔ Satana wònɔ Mawu subɔlawo nu tsom, esime wonya Satana le dziƒo ɣeaɖeɣi le Mawu Fiaɖuƒea ɖoɖo anyi le ƒe 1914 me megbee wònɔ esia wɔm. Vavãe, egbea si míele nuɖoanyi vɔ̃ɖi sia ƒe ŋkeke mamlɛawo ƒe yɔyrɔe nu gɔ̃ hã la, Satana gakpɔtɔ le nya tsɔm ɖe Mawu subɔlawo ƒe fɔmaɖimaɖi ŋu!—Nyaɖ. 12:10.
3. Nusɔsrɔ̃ vevi kawoe le Hiob ƒe agbalẽa me na mí?
3 Azɔ bu nusɔsrɔ̃ etɔ̃ aɖewo siwo le Hiob ƒe agbalẽa me na mí ŋu kpɔ. Gbã la, dodokpɔ siwo me Hiob to la ɖe ame si koŋue nye ameƒomea ƒe futɔ kple ame si koŋ le megbe na tsitretsitsi ɖe Mawu ƒe amewo ŋu la fia. Futɔ mae nye Satana Abosam. Evelia, dodokpɔ ka kee míeɖado go o, ne míele ƒomedodo kplikplikpli me kple Mawu la, akpe ɖe mía ŋu míalé fɔmaɖimaɖi me ɖe asi. Etɔ̃lia, ne tetekpɔwo va mía dzi, eye wodo mí kpɔ le mɔ aɖe nu la, Mawu kpena ɖe mía ŋu abe ale si ko wòkpe ɖe Hiob ŋu ene. Egbea la, Yehowa wɔa esia to eƒe Nya la, eƒe habɔbɔa, kple eƒe gbɔgbɔ kɔkɔea dzi.
Wò Susu Nenɔ Ame Si Tututu Nye Míaƒe Futɔ La Ŋu
4. Ame kae wòle be woabu fɔ ɖe ale si xexea me ƒe nɔnɔme le egbea la ta?
4 Ame geɖe mexɔe se be Satana li o. Eya ta togbɔ be nu siwo le dzɔdzɔm le xexea me naa vɔvɔ̃ ɖoa wo vevie hã la, womekpɔa ame si tututu le megbe na nu siawo—si nye Satana Abosam—dzea sii o. Enye nyateƒe be fu siwo kpem ameƒomea le egbea la dometɔ geɖe tso amegbetɔwo ŋutɔ gbɔ. Elabena mía dzila gbãtɔwo Adam kple Xawa tiae be yewoanɔ yewo ɖokui si yewo Wɔlaa ƒe mɔfiame manɔmee. Eye tso ɣemaɣi la, dzidzime siwo kplɔe ɖo va se ɖe egbe la wɔ nu bometsitsitɔe. Ke hã, Abosam ye ble Xawa wòdze aglã ɖe Mawu ŋu. Eyae ɖo xexemenuɖoanyi aɖe si dzi wòkpɔ ŋusẽ ɖo la ɖe ameƒome madeblibo si le kudɔ ƒom la dome. Esi wònye be Satanae nye “nuɖoanyi sia ƒe mawu” ta la, ameƒomea ɖea nɔnɔme siwo tututu le eya amea si la ke fiana—dada, dzrehehe, ŋuʋaʋã, ŋukeklẽ, amebeble, kple aglãdzedze. (2 Kor. 4:4; 1 Tim. 2:14; 3:6; mixlẽ Yakobo 3:14, 15.) Nɔnɔme mawo he dunyahehe kple mawusubɔsubɔ me dzrewo, fuléle, nu fitifiti wɔwɔ, kple tɔtɔ vae, eye esiawo gbɔe kuxi siwo le fu ɖem na ameƒomea la ƒe akpa gãtɔ tso.
5. Nu kae wòle be míawɔ kple sidzedze xɔasi si su mía si la?
5 Sidzedze xɔasi kae nye esi su mí Yehowa subɔlawo si! Ɛ̃, míenya ame si wòle be woabu fɔ ɖe xexea me ƒe nɔnɔme si le gbegblẽm ɖe edzi la ta. Ðe esia meʋã mí be míakpɔ gome le gbeƒãɖeɖedɔa me ale be míana amewo nanya ame si tututu le zitɔtɔ dem xexea me oa? Eye ɖe medzɔa dzi na mí be míade Yehowa, Mawu vavã la, dzi ahaɖe ale si wògbɔna Satana kple ameƒomea ƒe kuxiwo ɖe ge ɖae la me na amewo oa?
6, 7. (a) Ame kae le megbe na yometiti si me tom tadeagula vavãwo le la? (b) Aleke míate ŋu asrɔ̃ Elihu si nɔ anyi le blema la ƒe kpɔɖeŋu?
6 Satanae nye ame si le megbe na ameƒomea ƒe kuxi geɖewo kple tsitretsiɖeŋu si Mawu ƒe amewo doa goe la siaa. Eɖoe kplikpaa be yeado mí kpɔ. Yesu Kristo gblɔ na apostolo Petro be: “Simon, Simon, kpɔ ɖa! Satana bia be woaɖe mɔ le mia ŋu, ne yeagbɔ mi, abe lu ene.” (Luka 22:31) Nenema kee, mí ame siwo dzea Yesu ƒe afɔɖoƒewo yome la dometɔ ɖe sia ɖe ado go dodokpɔ aɖewo godoo. Petro tsɔ Abosam sɔ kple “dzata, si le gbe ɖem . . . eye wòle ame dim be yeami.” Eye Paulo gblɔ be: “Ame siwo katã dina be yewoanɔ agbe le ɖokuitsɔtsɔ na Mawu nu le Kristo Yesu me la, woati woawo hã yome.”—1 Pet. 5:8; 2 Tim. 3:12.
7 Aleke míate ŋu aɖee afia be míenya ame si tututu nye míaƒe futɔa ne nya vɔ̃ aɖe dzɔ ɖe haxɔsetɔ aɖe dzi? Le esi míaƒo asa na mía nɔvi si dzi nyaa dzɔ ɖo teƒe la, míewɔa nu abe Elihu si nɔ anyi le blema, ame si ƒo nu na Hiob abe xɔlɔ̃ vavã ene, la ene. Míewɔa ɖeka kple mía nɔvia le avuwɔwɔ kple míaƒe futɔ Satana me. (Lod. 3:27; 1 Tes. 5:25) Míaƒe taɖodzinue nye be míakpe ɖe míaƒe hatitadeagula la ŋu wòalé eƒe fɔmaɖimaɖi me ɖe asi nu ka kee ɖale dzɔdzɔm o ahato ema dzi ado dzidzɔ na Yehowa ƒe dzi.
8. Nu ka tae Satana mete ŋu na Hiob dzudzɔ bubudede Yehowa ŋu o?
8 Nunɔamesi si dome Satana gblẽ na Hiob gbãe nye eƒe lãhawo. Lã mawo nɔ vevie nɛ ŋutɔ, eye anɔ eme be lã mawo hea ga geɖe vana nɛ. Gake Hiob zãa wo le tadedeagu me hã. Ne Hiob kɔ viawo ŋu vɔ la, ‘efɔna ŋdi kanya, eye wòsaa numevɔ ɖe wo katã ƒe xexlẽme nu; elabena Hiob gblɔ be: Misela vinyewo wɔ nu vɔ̃, eye wofe Mawu ɖe aga le woƒe dziwo me hĩ. Alea Hiob wɔna ɣesiaɣi.’ (Hiob 1:4, 5 ) Esia ɖee fia be Hiob tsɔa lãwo saa vɔe na Yehowa edziedzi. Esi dodokpɔawo nya dze egɔme ko la, magate ŋu awɔ esia o. “Kesinɔnuwo” meganɔ Hiob si wòatsɔ ade bubu Yehowa ŋu o. (Lod. 3:9) Gake ate ŋu ade bubu Yehowa ŋu kple eƒe nuyiwo ya—eye ewɔe hã!
Na Ƒomedodo Kplikplikpli Nanɔ Mia Kple Yehowa Dome
9. Nu kae nye míaƒe nunɔamesi xɔasitɔ kekeake?
9 Míeɖanye kesinɔtɔwo alo ame dahewo o, sɔhɛwo alo ame tsitsiwo o, míeɖale lãmesẽ me loo alo le dɔ lém o, míate ŋu ana ƒomedodo kplikplikpli nanɔ mía kple Yehowa dome. Eɖanye dodokpɔ ka kee míele go domee o, ne ƒomedodo kplikplikpli le mía kple Mawu dome la, akpe ɖe mía ŋu míalé míaƒe fɔmaɖimaɖi me ɖe asi ahato ema dzi ado dzidzɔ na Yehowa ƒe dzi. Ame aɖewo siwo si nyateƒea ŋuti sidzedze boo mesu o gɔ̃ hã wɔ nu dzinɔameƒotɔe helé fɔmaɖimaɖi me ɖe asi.
10, 11. (a) Aleke mía nɔvinyɔnu aɖe wɔ nu esi wodo eƒe fɔmaɖimaɖi kpɔ? (b) Ŋuɖoɖo sẽŋu kae nɔvinyɔnu sia na Satana?
10 Bu Nɔvinyɔnu Valentina Garnovskaya, si nye Ðasefo gbogbo siwo lé fɔmaɖimaɖi me ɖe asi le Russia abe Hiob ene togbɔ be woto dodokpɔ sesẽwo me la, dometɔ ɖeka ŋu kpɔ. Le ƒe 1945 me, esi wòxɔ abe ƒe 20 ene la, nɔviŋutsu aɖe ɖi ɖase nɛ. Nɔviŋutsua trɔ va egbɔ zi eve va dzro Biblia me kplii, eye tso ema dzi la megakpɔe kpɔ o. Togbɔ be enɔ alea hã la, Valentina te gbeƒãɖeɖe na eƒe aƒelikawo. Esia wɔe be wova lée de ga le asaɖa aɖe me hena ƒe enyi. Le ƒe 1953 me la, woɖe asi le eŋu, eye wògadze gbeƒãɖeɖedɔa gɔme enumake. Wogalée ake—fifia ya la, woka ƒe ewo nɛ. Le asaɖa aɖe me nɔnɔ ƒe geɖe megbe la, woɖee yi ɖe asaɖa bubu me. Nɔvinyɔnu aɖewo nɔ asaɖa ma me siwo si Biblia ɖeka nɔ. Gbe ɖeka la, nɔvinyɔnu aɖe tsɔ Biblia la fia Valentina. Dzi dzɔe eteƒe mekɔ o! Bu eŋu kpɔ ko, to vovo na Biblia si Valentina kpɔ le nɔviŋutsu si ɖi ɖase nɛ le ƒe 1945 me si la, esiae nye zi gbãtɔ si wògakpɔ Biblia kpɔ!
11 Le ƒe 1967 me la, woɖe asi le Valentina ŋu, eye mɔnukpɔkpɔ va su esi mlɔeba wòxɔ nyɔnyrɔ tsɔ ɖo kpe eƒe adzɔgbeɖeɖe na Yehowa dzi. Ewɔ eƒe ablɔɖe la ŋu dɔ tsɔ kpɔ gome le subɔsubɔdɔa me dzonɔamemetɔe va ɖo ƒe 1969 me. Gake le ƒe ma me la, wogalée ake, eye fifia ya la, wodee gaxɔ me ƒe etɔ̃. Ke hã, Valentina gakpɔtɔ nɔ gbeƒã ɖem kokoko. Hafi wòaku le ƒe 2001 me la, ekpe ɖe ame 44 ŋu wosrɔ̃ nyateƒea. Ƒe siwo wòtsɔ nɔ gaxɔwo kple asaɖawo me katã nye ƒe 21. Elɔ̃ faa be yeatsɔ nu sia nu asa vɔe, eya ŋutɔ ƒe ablɔɖe gɔ̃ hã, bene yealé yeƒe fɔmaɖimaɖi me ɖe asi. Hafi Valentina naku la, egblɔ be: “Aƒe menɔ nye ŋutɔ asinye kpɔ o. Nye nunɔamesiwo katã nɔ mɔzɔkplo ɖeka ko me, gake dzi dzɔam eye mekpɔ dzidzeme le Yehowa subɔsubɔ me.” Ŋuɖoɖo sẽŋu ka gbegbee nye esi Valentina na Satana, ame si gblɔ be ne amegbetɔwo do go dodokpɔwo la, womayi edzi awɔ nuteƒe na Mawu o la! (Hiob 1:9-11) Míate ŋu aka ɖe edzi be Valentina do dzidzɔ na Yehowa ƒe dzi, eye Yehowa le mɔ kpɔm vevie na ɣeyiɣi si wòagbɔ agbe Valentina kple ame siwo katã ku nuteƒewɔwɔtɔe la le tsitretsitsia me.—Hiob 14:15.
12. Akpa kae lɔlɔ̃ wɔna le mía kple Yehowa dome ƒomedodoa me?
12 Lɔlɔ̃ si le mía si na Yehowa dzie mía kplii dome xɔlɔ̃dzedzea nɔ te ɖo. Míekpɔa ŋudzedze ɖe Mawu ƒe nɔnɔmewo ŋu, eye míewɔa nu sia nu si míate ŋui be míanɔ agbe wòawɔ ɖeka kple eƒe tameɖoɖowo. To vovo na nya si Abosam gblɔ la, mía ŋutɔwoe tsoa dzi me faa lɔ̃a Yehowa, eye menye ɖe viɖe si míakpɔ tso egbɔ tae o. Lɔlɔ̃ vavã sia doa ŋusẽ mí míeléa fɔmaɖimaɖi me ɖe asi le dodokpɔwo me. Eye Yehowa hã “[adzɔ] eƒe mawumemewo ƒe mɔ ŋuti.”—Lod. 2:8; Ps. 97:10.
13. Aleke Yehowa bua nu siwo míewɔna nɛ lae?
13 Lɔlɔ̃ ʋãa mí míedea bubu Yehowa ƒe ŋkɔa ŋu ne míese le mía ɖokuiwo me be míete ŋu le geɖe wɔm o hã. Ekpɔa susu nyui siwo ʋãa mí, eye mebua fɔ mí ne míete ŋu le nu siwo katã míadi be míawɔ hafi la wɔm o. Menye nu siwo míewɔna la koe nɔa vevie nɛ o, ke nu si tae míewɔa wo la hãe. Togbɔ be Hiob nɔ nu xam, eye wòkpe fu geɖe hã la, eƒo nu tso ale si wòlɔ̃ Yehowa ƒe mɔwoe la ŋu na ame siwo nɔ enu tsom la. (Mixlẽ Hiob 10:12; 28:28.) Le Hiob ƒe agbalẽa ƒe ta mamlɛtɔ me la, Mawu gblɔ be yedo dziku ɖe Elifaz, Bildad, kple Zofar ŋu, elabena wometo nyateƒe o. Le ɣeyiɣi ma ke me la, Yehowa ɖee fia be yekpɔ ŋudzedze ɖe Hiob ŋu to ale si wòyɔe zi ene be “nye dɔla” kple ale si wòbia tso Hiob si be wòaɖe kuku ɖe agɔdzela mawo ta la me. (Hiob 42:7-9) Mina míawo hã míawɔ nu le mɔ ma tɔgbi nu be Yehowa nakpɔ ŋudzedze ɖe mía ŋu.
Yehowa Kpena Ðe Esubɔla Wɔnuteƒewo Ŋu
14. Aleke Yehowa kpe ɖe Hiob ŋu wòɖɔ eƒe nukpɔsusu ɖo?
14 Hiob lé eƒe fɔmaɖimaɖi me ɖe asi togbɔ be ame madebliboe wònye hã. Ɣeaɖewoɣi la, nuteɖeamedzi si nu sẽ na Hiob megabu nuwo ŋu nyuie o. Le kpɔɖeŋu me, egblɔ na Yehowa be: “Medoa ɣli yɔa wò, ke mètɔna nam o; . . . Ètrɔ zu ŋutasẽla ɖe ŋunye, eye nètsɔa wò asi sesẽ wɔa avu kplim.” Gawu la, Hiob tsɔ eƒe susu ɖo eɖokui nu ɖeɖe ŋu fũu akpa esi wògblɔ be: “Nyemeɖi fɔ o” eye “madzɔmadzɔ aɖeke mele nye asiwo me o, eye alakpa mele nye gbedodoɖa me o.” (Hiob 10:7; 16:17; 30:20, 21) Ke hã, Yehowa bia nya vovovo aɖewo Hiob tsɔ kpe ɖe eŋu dɔmenyotɔe be wòɖe susu ɖa le eya ŋutɔ ɖokui ŋu. Nyabiase siawo kpe ɖe Hiob ŋu wòkpɔ Mawu ƒe gãnyenye kple amegbetɔwo ƒe numaɖinunyenye hã dze sii kɔtɛ. Hiob lɔ̃ xɔ mɔfiamea, eye wòwɔ ɖɔɖɔɖo.—Mixlẽ Hiob 40:8; 42:2, 6.
15, 16. Mɔ kawo dzie Yehowa tona kpena ɖe esubɔlawo ŋu egbea?
15 Yehowa ganaa mɔfiamewo eƒe amewo egbea le tufafa me, gake kple moveviɖoɖo. Gakpe ɖe eŋu la, míekpɔa viɖe gã aɖewo hã. Le kpɔɖeŋu me, Yesu Kristo na tafe la heto ema dzi ʋu mɔ ɖi na nu vɔ̃wo ƒe tsɔtsɔke. To vɔsa ma dzi la, míate ŋu anɔ ƒomedodo kplikplikpli me kple Mawu togbɔ be míenye ame madeblibowo hã. (Yak. 4:8; 1 Yoh. 2:1) Ne míele dodokpowo me tom la, míawo hã míedoa gbe ɖa be Mawu ƒe gbɔgbɔ kɔkɔea nakpe ɖe mía ŋu ahado ŋusẽ mí. Tsɔ kpe ɖe eŋu la, Biblia bliboa le mía si, eye ne míexlẽnɛ hedea ŋugble tso emenyawo ŋu la, ke míele mía ɖokuiwo dzram ɖo ɖe xɔse ƒe dodokpɔwo ŋu. Nusɔsrɔ̃ kpena ɖe mía ŋu míesea xexea me katã ƒe dziɖulanyenye kple amegbetɔwo ƒe fɔmaɖimaɖi me léle ɖe asi ƒe nya si fɔ ɖe te la gɔme.
16 Gakpe ɖe eŋu la, míenye xexea me katã ƒe nɔviwo ƒe habɔbɔ si Yehowa naa gbɔgbɔmenuɖuɖu to “kluvi nyateƒetɔ kple aɖaŋudzela” dzi la me tɔwo, eye esia hã ɖea vi geɖe na mí. (Mat. 24:45-47) Le Yehowa Ðasefowo ƒe hame siwo wu 100,000 la dometɔ ɖe sia ɖe me la, wofiaa nu mí hedoa ŋusẽ mí le ale si míakpe akɔ kple xɔse ƒe dodokpɔ siwo ate ŋu ava mía dzi la ŋu le kpekpeawo me. Míate ŋu atsɔ Sheila, Yehowa Ðasefo ƒewuivi aɖe si le Germany la, awɔ esia ƒe kpɔɖeŋui.
17. Gblɔ ale si nunya le wɔwɔ ɖe Yehowa ƒe habɔbɔa ƒe mɔfiamewo dzi me egbea la ƒe kpɔɖeŋu ɖeka.
17 Gbe ɖeka esi Sheila kple eƒe sukuhatiwo nɔ sukuxɔ me, eye woƒe nufiala do le wo gbɔ vie la, eƒe sukuhatiwo ɖoe be yewoafe kple afakaʋuƒo si woyɔna be Ouija board. Sheila do le sukuxɔa me enumake, eye nya siwo wòva se emegbe la, na dzi dzɔe be yeɖe afɔ ma. Esime sukuviawo nɔ fefem kple afakaʋuƒoa la, wo dometɔ aɖewo se gbɔgbɔ vɔ̃wo ƒe nuwɔna le xɔa me, eye dzidzi ƒo wo wosi. Gake nu kae kpe ɖe Sheila ŋu wòtso nya me kaba be yeadzo le xɔa me? Sheila gblɔ be: ‘Ɣeyiɣi kpui aɖe do ŋgɔ na nudzɔdzɔ sia la, míesrɔ̃ nu tso afɔku siwo le Ouija board zazã ŋu le kpekpe aɖe si míewɔ le Fiaɖuƒe Akpata me la me. Eya ta menya nu si wòle be mawɔ. Nye didie nye be mado dzidzɔ na Yehowa abe ale si Biblia gblɔe le Lododowo 27:11 ene.’ Aleke gbegbe wòhenyoe nye esi be Sheila de kpekpea heɖo to nyuie!
18. Nu kae wò ŋutɔ nèɖo kplikpaa be yeawɔ?
18 Mina mía dometɔ ɖe sia ɖe naɖoe kplikpaa be yealé mɔfiame siwo míexɔna tso Mawu ƒe habɔbɔa gbɔ la me ɖe asi goŋgoŋ. Míexɔa mɔfiame kple kpekpeɖeŋu siwo míehiã la to kpekpeawo dede edziedzi, Biblia xexlẽ, Biblia srɔ̃gbalẽwo sɔsrɔ̃, gbedodoɖa, kpakple hadede kple Kristotɔ siwo tsi le gbɔgbɔ me dzi. Yehowa di be míaɖu dzi, eye eka ɖe edzi be míayi edzi anye nuteƒewɔlawo hã. Mɔnukpɔkpɔ kae nye esi wònye na mí be míado Yehowa ƒe ŋkɔ ɖe dzi, alé fɔmaɖimaɖi me ɖe asi ahado dzidzɔ na Yehowa ƒe dzi!
Èɖo Ŋku Wo Dzia?
• Nɔnɔme kple dodokpɔ kawoe Satana le megbe na?
• Nu kae nye nunɔamesi xɔasitɔ kekeake si le mía si?
• Nu ka dzie mía kple Yehowa dome xɔlɔ̃dzedzea nɔ te ɖo?
• Mɔ siwo dzi Yehowa tona kpena ɖe mía ŋu egbea la dometɔ aɖewo ɖe?
[Nɔnɔmetata si le axa 8]
Ðe nèsena le ɖokuiwò me be ele vevie be yeagblɔ sidzedze xɔasi si su ye si la ŋu nya na amewoa?
[Nɔnɔmetata si le axa 9]
Míate ŋu akpe ɖe hatitadeagulawo ŋu woalé woƒe fɔmaɖimaɖi me ɖe asi
[Nɔnɔmetata si le axa 10]
Valentina lɔ̃ faa be yeatsɔ nu sia nu asa vɔe bene yeate ŋu alé yeƒe fɔmaɖimaɖi me ɖe asi