Nɔnɔme Siwo Me Ƒe Alafa Gbãtɔ Me Kristotɔwo Nɔ Agbe Le

“Aƒemedɔwɔlawo”

“Ke esi wonɔ woƒe mɔzɔzɔa dzi la, eyi kɔƒe aɖe me. Nyɔnu aɖe si ŋkɔe nye Marta la xɔe amedzroe ɖe eƒe aƒe me le afi sia. Nɔvinyɔnu aɖe le nyɔnu sia si, si ŋkɔe nye Maria, gake eya nɔ anyi ɖe Aƒetɔ la ƒe afɔ nu henɔ to ɖom eƒe nya la. Gake nu geɖewo wɔwɔ xɔ susu me na Marta ya. Eya ta ete ɖe eŋu gblɔ be: ‘Aƒetɔ, mètsɔ ɖeke le eme be nɔvinyea gblẽ nuwo katã gbɔ kpɔkpɔ ɖe nye ɖeka dzinye oa? Eya ta gblɔe nɛ be wòava kpe ɖe ŋunye.’ Aƒetɔ la ɖo eŋu nɛ gblɔ bena: ‘Marta, Marta, ètsi dzi hele fu ɖem na ɖokuiwò le nu geɖewo ŋuti. Gake nu ʋɛ aɖewo koe hiã, alo ɖeka pɛ ko. Maria ya tia nyuia gome, eye womele exɔ ge le esi o.’”—LUKA 10:38-42.

EDZE ƒãa be nyɔnu veviedonulae Marta nye. Ðikeke mele eme o be amewo dea asixɔxɔ eŋu ale gbegbe. Le ƒe alafa gbãtɔ me Yudatɔwo dome la, nyɔnu ƒe veviedodo nu le aƒemedɔwo wɔwɔ me kple ale si wòléa be na eƒe ƒomea ye nana wodea asixɔxɔ eŋu.

Wode dzi ƒo na nyɔnu Kristotɔ siwo nɔ anyi le ƒe alafa gbãtɔa me be woanye “aƒemedɔwɔlawo.” (Tito 2:5) Gake woƒe agbanɔamedzi bubu, si ganye mɔnukpɔkpɔ hã na woe nye be woafia nu ame bubuwo tso woƒe dzixɔsewo ŋu. (Mateo 28:19, 20; Dɔwɔwɔwo 2:18) Nu kawoe nye ‘nu geɖe’ siwo gbɔ wòle be ƒe alafa gbãtɔ me Yuda nyɔnu nakpɔ? Eye nu kae míate ŋu asrɔ̃ tso nya siwo Yesu gblɔ tso Maria ŋu la me?

“Nu Geɖewo Wɔwɔ” Yuda nyɔnu aƒedzikpɔla dzea eƒe dɔwo gɔme hafi agu dzena. (Lododowo 31:15) Ne èƒo dzogbɔ na eƒe ƒomea vɔ la, ekplɔa viaŋutsuviwo yia suku siwo le ƒuƒoƒewo. Vianyɔnuviwo nɔa aƒe me bene wòate ŋu afia aƒemedɔ siwo ana woava zu srɔ̃nyɔnu zazɛ̃wo la wo.

Vidadaa kple vianyɔnuviawo dzea aƒemedɔ veviwo gɔme​—amidede akaɖiwo me (1), aƒemekpɔkplɔ (2), kple gbɔ̃notsifiafiã (3). Emegbe womèa abolo si woaɖu le ŋkekea me. Gbã la, nyɔnuviawo gbɔa nukuwo heɖea ɖi le wo me (4), eye emegbe woglia nukuawo le te dzi (5). Vidadaa dea tsi kple amɔʋãnu eme. Eblua amɔ la (6) hedanɛ ɖi be wòaho esime wòle aƒemedɔ bubuwo wɔm. Le ɣeyiɣi ma me la, nyɔnuviawo trɔa asi le gbɔ̃notsi la ŋu bene wòazu notsibabla (7).

Emegbe vidadaa kplɔa vianyɔnuviawo ɖoa ta asime. Afi ma, si nu vovovowo ƒe ʋeʋẽ xɔa ya me, lãwo nɔa xɔxlɔ̃m, eye nuƒlela siwo le asi ƒom la ƒe gbe dea dzi le lae wòƒlea nu siwo hiã na ƒomea le ŋkekea me la le (8). Detsiƒonu vovovowo kple lã yiyiwo nɔa nu siwo wòƒlena la dome. Ne Kristotɔe wònye la, awɔ mɔnukpɔkpɔa ŋu dɔ aƒo nu tso eƒe dzixɔsewo ŋu na amewo le asia me.—Dɔwɔwɔwo 17:17.

Vidada si léa fɔ ɖe eƒe agbanɔamedzi ŋu adi be yeazã mɔnukpɔkpɔa atsɔ akpe ɖe viawo ŋu woasrɔ̃ Ŋɔŋlɔawo me gɔmeɖosewo ahakpɔ ŋudzedze ɖe wo ŋu ne wole mɔa dzi yina asia me alo trɔ gbɔna. (5 Mose 6:6, 7) Ate ŋu afia mɔnu siwo akpe ɖe vianyɔnuviawo ŋu be woava zu asiƒlela siwo zãa ga nyuie la hã.—Lododowo 31:14, 18.

Dɔ bubu si nyɔnuwo wɔna le ŋkekea mee nye be woayi vudo to (9). Afi mae woɖadua tsi le na ƒomea, eye anɔ eme be woɖoa dze kple wo tɔ nyɔnu siwo wodoa goe le afi ma. Ne vidadaa gbɔ tso vudoa to la, eya kple vianyɔnuviawo dzea abolo mème gɔme. Gbã la, wokaa amɔ la heƒonɛ gbadzɛgbadzɛ, eye wotsɔa wo dea kpo dzodzoe (10) si nɔa gota zi geɖe la me. Wonɔa afi ma nɔa aboloa ƒe ʋeʋẽ lililia sem henɔa dze ɖom va se ɖe esime wòbi.

Emegbe woyia tɔ to ɖanyãa nuwo (11). Gbã la, nyɔnuawo tsɔa adzalẽ aɖe si wotsɔa ati tɔxɛ aɖewo ƒe dzofi ɖana la nyãa nuawoe. Ne wokpala nuawo hefiã wo vɔ la, wosiaa wo ɖe gbe kple kpe siwo le tɔa to la dzi.

Ne wotsɔ nunyanyãwo gbɔ va aƒe me la, vidadaa kple vianyɔnuviawo yia xɔ ta, afi si le gbadzaa wote ŋu nɔna, bene yewoatɔ awuawo dometɔ siwo ƒe afi aɖe vuvu la (12) hafi ada wo ɖe xɔ me. Emegbe wofiaa avɔlɔlɔ̃ kple aɖaŋuwɔwɔ ɖe avɔwo me nyɔnuviawo (13). Eteƒe medidina o, ɣeyiɣia dena na nyɔnuwo be woate fiẽnu ɖaɖa (14). Amedzrowɔwɔ nye nu si bɔ ɣemaɣi, eya ta ƒomea nɔa klalo be yewoama yewoƒe nuɖuɖu tsɛa, si lɔa abolo, amagbewo, notsibabla, lã yiyi, kple tsi fafɛ ɖe eme la kple amedzro ɖe sia ɖe si ɖi tsa va.

Le ŋkekea ƒe nuwuwu, esi ɖeviwo ƒe anyimlɔɣi ɖo la, wotsɔa ami ɖoa woƒe klonubiwo na wo. Emegbe, dzilawo gblɔa Ŋɔŋlɔawo me ŋutinya aɖe na wo viawo le akaɖi nu hedoa gbe ɖa kpli wo. Esi woƒe aƒe tsɛa me zi ɖoɖoe toŋtoŋ la, srɔ̃ŋutsua akpɔe be ahiã be yeagblɔ nya nyanyɛ sia na yesrɔ̃ be: ‘Nyɔnu zazɛ̃, ame kae akpɔe? Exɔ asi wu adzagba.’—Lododowo 31:10.

“Nyuia Gome” Tiatia Ðikeke mele eme o be “nu geɖewo wɔwɔ” nana vovo menɔa nyɔnu veviedonula siwo nɔ anyi le ƒe alafa gbãtɔ me la ŋu o. (Luka 10:40) Nenema kee egbea hã, vovo menɔa nyɔnuwo ŋu kura o, vevietɔ vidadawo. Egbegbe nutovɛwo wɔe be aƒemedɔ aɖewo wɔwɔ va le bɔbɔe wu ya. Gake nɔnɔmeawo ƒoe ɖe vidada geɖewo nu be woawɔ dɔwɔɖui akpe ɖe aƒemedɔwo ŋu.

Togbɔ be nɔnɔmeawo mele bɔbɔe na nyɔnu Kristotɔ geɖewo o hã la, wosrɔ̃a Maria, si ŋu míeƒo nu tso le nyati sia ƒe gɔmedzedze la ƒe kpɔɖeŋu. Wodea asixɔxɔ gã aɖe gbɔgbɔmenuwo ŋu. (Mateo 5:3) Woléa be na woƒe ƒomewo abe ale si Ŋɔŋlɔawo de dzi ƒo na wo be woawɔ ene. (Lododowo 31:11-31) Gake wonɔa agbe ɖe gɔmeɖose si dzi Yesu he Marta ƒe susu yi la hã nu. Esi Marta nye nyɔnu si dea asixɔxɔ woa kple Mawu dome ƒomedodo ŋu ta la, ɖikeke mele eme o be exɔ Yesu ƒe aɖaŋuɖoɖoa de eme. Nyɔnu Kristotɔwo meɖea mɔ aƒemedɔwo wɔwɔ nana wodoa kpo mɔnukpɔkpɔwo ŋu dɔ wɔwɔ atsɔ asrɔ̃ nu tso Mawu ŋu (15) alo aƒo nu tso woƒe dzixɔsewo ŋu na amewo o. (Mateo 24:14; Hebritɔwo 10:24, 25) Wotoa esia wɔwɔ me tiaa “nyuia gome.” (Luka 10:42) Esia wɔnɛ be asixɔxɔ gã aɖe nɔa wo ŋu le Mawu, Kristo, kple woƒe ƒomea me tɔwo siaa ŋkume.—Lododowo 18:22.