Ðe Wòle Be Míalé Sabat Ðoɖoa Me Ðe Asia?

LE ƑE 1980-awo ƒe nuwuwu lɔƒo la, Methodisttɔwo ƒe ƒuƒoƒo aɖewo va ɖe to ɖe Suva, si nye Fiji ƒe fiadu. Ŋutsuwo, nyɔnuwo, kple ɖevi siwo do sɔlemewu keŋ la va xe mɔwo le teƒe 70 sɔŋ. Woɖo asi yameʋuwo—asitsatɔwo, dukɔmetɔwo, kple dutatɔwo—katã dzi. Ðe susu ka ta? Be woazi dukɔa me tɔwo dzi woatrɔ ɖe Sabat ɖoɖoa me léle ɖe asi ŋu.

Le Israel la, wode se be ele be dziƒoxɔliamɔ̃ si tɔna le eɖokui si le dzisasrã ɖe sia ɖe dzi la ɖeka ya teti nanɔ dziƒoxɔ yeye ɖe sia ɖe si woatu tso ƒe 2001 me la ŋu. Nu ka tae? Bene Yudatɔ siwo léa woƒe dzixɔse me ɖe asi goŋgoŋ, eye Fiɖa fiẽ va se ɖe Memleɖa fiẽ nyea Sabat na wo la nagayi asi te ge ɖe dziƒoxɔliamɔ̃ ƒe xexlẽdzesi aɖeke dzi hafi wòalia ayi dzi o, elabena wòbua eya hã be enye “dɔ.”

Le Tonga, si le Pasifik Ƒua ƒe anyiehe gome la, wode se be ame aɖeke nagawɔ dɔ aɖeke Kwasiɖagbe o. Womeɖe mɔ be yameʋu alo tɔdziʋu aɖeke nava dze o. Wobua dɔwɔɖoɖo ɖe sia ɖe si te woade asi gbe ma gbe la be mele se nu o. Tonga ƒe dukplɔɖoɖoa bia be Kwasiɖagbe “nanye ŋkeke kɔkɔe” na dukɔmevi ɖe sia ɖe, subɔsubɔha ka ke mee woɖale o. Nu ka tae? Be ŋkeke ma nanye Sabat na ame sia ame le dukɔa me.

Kpɔɖeŋu siawo ɖee fia be ame geɖe susuna be Mawu di tso yewo si be yewoalé kwasiɖa sia kwasiɖa ƒe Sabat ɖoɖoa me ɖe asi. Le nyateƒe me la, wo dometɔ aɖewo gblɔna be Sabat ɖoɖoa me léle ɖe asi le vevie ŋutɔ, eye woxɔe se be míaƒe ɖeɖekpɔkpɔ nɔ te ɖe edzi. Ame aɖewo hã susui be Sabat ye nye Mawu ƒe sewo dometɔ vevitɔ. Nu kae nye Sabat? Ðe Biblia bia tso Kristotɔwo si be woalé kwasiɖa sia kwasiɖa ƒe Sabat ɖoɖoa me ɖe asia?

Nu Kae Nye Sabat?

Woɖe nyagbe “Sabat” tso Hebrigbe me nya aɖe si gɔmee nye “gbɔɖeme, tɔ te, dzudzɔ” la me. Togbɔ be Mose ƒe agbalẽ gbãtɔa gblɔ be Yehowa Mawu dzudzɔ le nuwɔwɔ ƒe ŋkeke adrea gbe hã la, Mose ƒe ŋkekeawo me hafie Mawu va de se na eƒe amewo be woadzudzɔ dɔwɔwɔ ŋkeke blibo ɖeka wòanye Sabat. (1 Mose 2:2) Esi Israel viwo dzo le Egipte le ƒe 1513 D.M.Ŋ. me la, Yehowa na mana wo le gbea dzi nukutɔe. Wode se na wo le mana fɔfɔ ŋu be: “Ŋkeke ade miafɔe; ke ŋkeke adrelia enye dzudzɔgbe [alo sabat], eya dzi miele ɖeke kpɔ ge o.” (2 Mose 16:26) “Ale dukɔ la dzudzɔ eɖokui le ŋkeke adrelia dzi,” tso Fiɖa fiẽ va de asi na Memleɖa fiẽ.—2 Mose 16:30.

Le mɔfiame siawo nana megbe kpuie la, Yehowa de se ku ɖe Sabat ɖoɖoa ŋu, eye esia hã nye Se Ewo siwo wòtsɔ na Mose la dometɔ ɖeka. (2 Mose 19:1) Se mawo dometɔ enelia ƒe akpa aɖe gblɔ be: “Ðo ŋku dzudzɔgbe la dzi, ne nawɔe kɔkɔe. Ŋkeke ade nawɔ dɔ, eye nawɔ ŋuwò dɔwo katã. Ke ŋkeke adrelia enye dzudzɔgbe [alo sabat] na Yehowa, wò Mawu.” (2 Mose 20:8-10) Esia wɔe be Sabat ɖoɖoa va zu nu vevi aɖe le Israel viwo ƒe agbe me.—5 Mose 5:12.

Ðe Yesu Wɔ Ðe Kwasiɖa Sia Kwasiɖa Ƒe Sabat Ðoɖoa Dzia?

Ɛ̃, Yesu wɔ ɖe Sabat ɖoɖoa dzi. Wogblɔ na mí tso eyama ŋu be: “Gake esi ɣeyiɣi la de keŋkeŋ la, Mawu dɔ Via ɖo ɖa, ame si to nyɔnu aɖe dzi va, eye wòva nɔ se te.” (Galatiatɔwo 4:4) Israel vidzidzie Yesu nye, eya ta eya hã nɔ Se la, si me Sabat sea hã nɔ la te. Yesu ƒe ku megbe hafi wova ɖe Se ƒe nubabla la ɖa. (Kolosetɔwo 2:13, 14) Ɣeyiɣi siwo me nu siawo dzɔ nyanya akpe ɖe mía ŋu míanya Mawu ƒe nukpɔsusu le nya la ŋu.—Kpɔ aɖaka si le axa 15.

Ele eme baa be Yesu gblɔ be: “Migasusu be ɖe meva Se la kple Nyagblɔɖilawo ɖe ge ɖa o. Nyemeva be maɖe wo ɖa o, ke boŋ be mana woava eme.” (Mateo 5:17) Gake nu kae nyagbɔgblɔ “mana woava eme” fia? Míawɔ eƒe kpɔɖeŋu ale: Ne xɔtula aɖe wu xɔtudɔ si wode esi nu ko hafi woagblɔ be ewɔ ɖe ɖoɖo si le woa kple dɔa tɔ dome la dzi, ke menye ne egblẽ agbalẽ si wowɔ ɖe dɔa dzi la dome o. Ne enya wɔ dɔa le ale si dɔtɔa dii nu vɔ ko la, dɔwɔɖoɖoa ƒe se aɖeke megablae o. Nenema kee Yesu hã meva gblẽ Sea dome o, ke boŋ ɖe wòna wòva eme to edziwɔwɔ bliboe me. Esi wònya na Se ƒe “ɖoɖoa” va eme ko la, se ma megabla Mawu ƒe amewo o.

Ðoɖo Si Dzi Wòle Be Kristotɔwo Nawɔ Ðo Yea?

Esi wònye Kristo na Se la va eme ɖe, ɖe wòle be Kristotɔwo nagalé kwasiɖa sia kwasiɖa ƒe Sabat ɖoɖoa me ɖe asia? Apostolo Paulo ɖo nya sia ŋu esi gbɔgbɔ ʋãe wògblɔ be: “Migana ame aɖeke nadrɔ̃ ʋɔnu mi le nuɖuɖu kple nunono alo azãɖuɖu aɖe alo ɣletidzedzi ƒe ŋkekenyui aɖe, alo sabat aɖe ŋuti o; elabena nu mawo nye nu siwo ava va la ƒe vɔvɔli, ke nua ŋutɔŋutɔ le Kristo la me.”—Kolosetɔwo 2:16, 17.

Nya mawo siwo tso gbɔgbɔ me la ɖee fia be tɔtrɔ aɖe va nu siwo Mawu di tso esubɔlawo si la me. Nu ka tae tɔtrɔ sia va hiã? Elabena Kristotɔwo va le se yeye aɖe te, si nye “Kristo la ƒe se.” (Galatiatɔwo 6:2) Se ƒe nubabla gbãtɔ si Mawu wɔ kple Israel viwo to Mose dzi la wu enu esi Yesu ƒe ku na wòva eme. (Romatɔwo 10:4; Efesotɔwo 2:15) Ðe wowu Sabat sea hã nua? Ɛ̃. Esi Paulo gblɔ be “wotu mí tso Se la me” vɔ megbe la, etɔ asi Se Ewoawo dometɔ ɖeka dzi. (Romatɔwo 7:6, 7) Eya ta Se Ewoawo—Sabat sea hã le eme—le Se si wu enu la dome. Eya ta womegabia tso Mawu subɔlawo si egbea be woalé kwasiɖa sia kwasiɖa ƒe Sabat ɖoɖoa me ɖe asi o.

Míate ŋu awɔ tɔtrɔ si va le nu siwo wodi tso Israel viwo si kple esiwo wova di tso Kristotɔwo si me la ƒe kpɔɖeŋu ale: Dukɔ aɖe ate ŋu atrɔ eƒe dukplɔse. Ne dukplɔse yeyea nya te dɔwɔwɔ ko la, womegabiana tso amewo si be woawɔ ɖe xoxoa dzi o. Togbɔ be dukplɔse yeyea ƒe nudidi aɖewo asɔ kple xoxoa tɔ aɖewo hã la, ɖewo ya ato vovo kuraa. Eya ta ele be amewo nasrɔ̃ dukplɔse yeyea nyuie bene woanya nudidi yeye siwo dzi wòle be woawɔ ɖo. Tsɔ kpe ɖe eŋu la, dukɔmevi nyui adi be yeanya ɣeyiɣi si me dukplɔse yeyea te dɔwɔwɔ.

Le mɔ ma ke nu la, Yehowa Mawu hã na se 600 kple edzivɔwo, siwo dometɔ 10 nye vevitɔwo la Israel dukɔa. Se siwo ku ɖe agbe nyui nɔnɔ, vɔsawo, lãmesẽnyawo, kple Sabat ŋu hã le eme. Ke hã, Yesu gblɔ be ye yomedzela amesiaminawo azu “dukɔ” yeye. (Mateo 21:43) Tso ƒe 33 M.Ŋ. me la, wotsɔ “dukplɔse” yeye si wotu ɖe se vevi eve—siwo nye lɔlɔ̃ na Mawu kple lɔlɔ̃ na amehavi—dzi la na dukɔ yeye sia. (Mateo 22:36-40) Togbɔ be ‘Kristo ƒe se la’ ƒe nudidi aɖewo sɔ kple esiwo nɔ Se si wotsɔ na Israel viwo me hã la, mele be wòawɔ nuku na mí be wo dometɔ aɖewo ya to vovo sãa, eye be ɖewo ya megale dɔ wɔm kura o. Se si ku ɖe kwasiɖa sia kwasiɖa ƒe Sabat ŋu hã le esiwo megale dɔ wɔm o la dome.

Ðe Mawu Trɔa Eƒe Dzidzenuwoa?

Ðe ale si Mawu wɔ tɔtrɔ le Mose ƒe Sea ŋu wòzu Kristo ƒe se la fia be etrɔa eƒe dzidzenuwoa? Ao. Abe ale si ko dzila aɖe awɔ tɔtrɔ le se siwo wòde na viawo la ŋu ne wole tsitsim eye woƒe nɔnɔmewo le tɔtrɔm ene la, Yehowa hã wɔ tɔtrɔ aɖewo le se siwo wòde na eƒe amewo la ŋu. Apostolo Paulo ɖe eme ale: “Hafi xɔse la nava ɖo la, wonɔ mía ŋu dzɔm le se la te, abe ame siwo nu wotu nu ɖo ene, eye míenɔ mɔ kpɔm na xɔse si woava ɖe afia la. Ale Se la va zu míaƒe mɔfiala si kplɔa mí yia Kristo gbɔ, bene woabu mí ame dzɔdzɔewo le xɔse ta. Gake azɔ si xɔse la va ɖo la, míegale mɔfiala aɖeke te o.”—Galatiatɔwo 3:23-25.

Aleke Paulo ƒe numeɖeɖea ku ɖe Sabat ŋui? Bu kpɔɖeŋu sia ŋu kpɔ: Woate ŋu abia tso sukuvi aɖe si be woasrɔ̃ atikpakpadɔ zi ɖeka le kwasiɖaa me akpe ɖe nu bubuwo ŋu. Ke hã, ne eva zu atikpala la, ava hiã be wòanɔ aɖaŋu siwo wòsrɔ̃ tso atikpakpa ŋu la zãm gbe sia gbe, ke menye le kwasiɖaa ƒe ŋkeke ɖeka aɖe ko dzi o. Nenema kee wobia tso Israel viwo si le Sea te be woaɖo ŋkeke ɖeka aɖe ɖi kwasiɖa sia kwasiɖa hena gbɔɖeme kple tadedeagu. Gake wobia tso Kristotɔwo ya si be woasubɔ Mawu gbe sia gbe, ke menye le ŋkeke ɖeka aɖe ko dzi le kwasiɖaa me o.

Ke ɖe wògblẽ be ame aɖe naɖo ŋkeke ɖeka aɖe ɖi kwasiɖa sia kwasiɖa hena gbɔɖeme kple tadedeagua? Ao. Mawu ƒe Nya la gblẽ nyametsotso ma ɖe ame sia ame si me esi wògblɔ be: “Ame aɖe bua ŋkeke aɖe be ele vevie wu bubu; ame bubu bua ŋkeke sia ŋkeke sɔsɔe; ame sia ame nekpɔ kakaɖedzi le ye ŋutɔ ƒe susu me.” (Romatɔwo 14:5) Togbɔ be ame aɖe ate ŋu abu ŋkeke aɖe be ele vevie wu bubu hã la, Biblia na eme kɔ ƒãa be Mawu mebia tso Kristotɔwo si be woalé Kwasiɖa sia kwasiɖa ƒe Sabat ɖoɖoa me ɖe asi o.

[Nya si ɖe dzesi si le axa 12]

“Ŋkeke ade miafɔe; ke ŋkeke adrelia enye dzudzɔgbe [alo sabat], eya dzi miele ɖeke kpɔ ge o.”​—2 MOSE 16:26

[Nya si ɖe dzesi si le axa 14]

“Se la va zu míaƒe mɔfiala si kplɔa mí yia Kristo gbɔ, bene woabu mí ame dzɔdzɔewo le xɔse ta. Gake azɔ si xɔse la va ɖo la, míegale mɔfiala aɖeke te o.”​—GALATIATƆWO 3:24, 25

[Box/​Diagram on page 13]

Gbe Ka Gbee Anye Sabat Na Dukɔ Siwo Ƒe Ŋkeke Mele Ðeka O?

Ale si dukɔ aɖewo tsɔ ŋkeke ɖeka le ŋgɔ na bubuwo la zu kuxi na ame siwo xɔe se be ele be yewoalé kwasiɖa sia kwasiɖa ƒe Sabat ɖoɖoa me ɖe asi le ŋkeke ɖeka dzi le dukɔ mawo me? Dzɔdzɔmeŋutinunyalawo gblɔ be fli aɖe si meli ŋutɔŋutɔ o la ma anyigbaa me ɖe eve tso dziehe gome va se ɖe anyiehe gome. Dukɔ siwo le fli sia ƒe ɣetoɖoƒe gome pɛe la tsɔ ŋkeke ɖeka le ŋgɔ na dukɔ siwo le eƒe ɣedzeƒe gome.

Le kpɔɖeŋu me, ne Memleɖagbe ɖo le Samoa kple Niue la, Kwasiɖagbe ɖona le Fiji kple Tonga ya. Eya ta ne subɔsubɔha aɖe me tɔ siwo le Fiji tiae be Memleɖa nanye yewoƒe Sabat ŋkeke la, woƒe hametɔ siwo le Samoa, si didi abe kilometa 1,145 ene ko tso wo gbɔ ya anɔ dɔ wɔm, elabena ŋkeke ma nye Fiɖa le woawo ya gbɔ.

Adventistɔ siwo le Tonga la tia Kwasiɖagbe be wòanye Sabat kple susu be wòasɔ kple yewoƒe hametɔ siwo le Samoa, si didi tso wo gbɔ abe kilometa 850 ene la tɔ. Gake le ɣeyiɣi ma ke me la, woƒe hametɔ siwo le Fiji, si didi tso Tonga gbɔ abe kilometa 800 ene ko la ya medzudzɔa dɔ wɔwɔ o, elabena ŋkeke ma nye Kwasiɖa le wo gbɔ, evɔ Memleɖagbee nye woƒe Sabat.

[Diagram]

(Edze nyuie le agbalẽa ŋutɔ me)

\

\

\

\ SAMOA

\

— ― ― ― ― ― ― ―

FIJI \

Kwasiɖagbe \ Memleɖagbe

\

\

TONGA \

\

\

\

[Nyaɖoɖo si le 15]

(Edze nyuie le agbalẽa ŋutɔ me)

Nu Vevi Siwo Wòle Be Nànya Tso Sabat Ŋu:

Togbɔ be Mawunyakpukpui aɖe ate ŋu aƒo nu tso kwasiɖa sia kwasiɖa ƒe Sabat ɖoɖoa me léle ɖe asi ŋu hã la, ele be míanya ɣeyiɣi si tututu me wogblɔ nya mawo.

2010 M.Ŋ.

[Nɔnɔmetata si le axa 11]

Woƒo nu tso ale si Methodisttɔwo ƒe ƒuƒoƒo aɖewo va xe mɔwo le teƒeteƒewo bene woazi Fiji dukɔa me tɔwo dzi woatrɔ ɖe Sabat ɖoɖoa ŋu la ŋu le nyadzɔdzɔgbalẽwo me

[Afi Si Míexɔ Mɔɖeɖe Tso]

Courtesy of the Fiji Times