Biblia Le Amewo Ƒe Agbenɔnɔ Trɔm

NU KAE ʋã aʋawɔla aɖe si dze aglã ɖe dziɖuɖu ŋu, eye wònye fiafitɔ la wòɖe asi le eƒe agbenɔnɔ ŋu? Nu ka tae nyɔnu aɖe si xɔ ŋkɔ le kɔdada me la trɔ eƒe agbemetaɖodzinuwo? Nu nyui kae do tso eme na vifofo aɖe si xɔe se be ye vi ava trɔ la? Xlẽ ŋutinya siwo gbɔna la be nàkpɔ ŋuɖoɖoawo.

“Nye agbe menyo tsã o, gake fifia mele dzidzɔ kpɔm.”—GARRY P. AMBROCIO

ƑE SI WÒXƆ: 47

DUKƆ SI ME WÒTSO: PHILIPPINES

AME SI TƆGBI WÒNYE TSÃ: AƲAWƆLA SI DZE AGLÃ ÐE DZIÐUÐU ŊU

AGBE SI MENƆ TSÃ: Du sue si nye Vintar mee menɔ tso nye ɖevime. To siwo dzi gbe damawo le, tɔsisi siwo me tsiwo dza kple afi si ya nyui ƒona le lae ƒo xlã tagba si míenɔ la. Togbɔ be tome fafa le afi ma hã la, agbea menɔ bɔbɔe o. Amewo va fina míaƒe lãhawo, eye wova fia míaƒe nuwo le aƒea me.

Esime menɔ nye ƒewuiwo me la, mía kple xɔ̃nyewo míenoa aha muna zi geɖe, noa atama, eye mefia fi tsɔ doa alɔ ɖokuinye le agbe baɖa si nɔm menɔ la me. Mefia mamanye ƒe lekewɔnuwo gɔ̃ hã. Dziɖuɖua ƒe asrafowo susui be aʋawɔlawo ƒe ha si tsi tsitre ɖe dziɖuɖua ŋu, si ŋkɔe nye New People’s Army (NPA) la, me tɔe menye, eya ta enuenu la, wolénam ƒona vevie. Le sia ta metso nya me be mawɔ ɖeka kple aʋawɔla siwo tsi tsitre ɖe dziɖuɖua ŋu la. Menɔ toawo dzi ƒe atɔ̃ sɔŋ kple NPA ha la me tɔwo. Agbea menɔ bɔbɔe kura o. Míenɔ tsaglãla tsam gbe sia gbe nɔ sisim le dziɖuɖua ƒe asrafowo nu. Mlɔeba la, ale si míenɔ sisim nɔ bebem le toawo dzi la va te ɖeɖi ŋunye, eya ta metsɔ ɖokuinye de asi na dziɖuɖua teƒe nɔla si nɔ Ilocos Norte dzi kpɔm la. Exɔm nyuie hekpe ɖe ŋunye mekpɔ dɔ nyui aɖe gɔ̃ hã. Ke hã, nyemeɖe asi le nu gbegblẽ siwo menɔ wɔwɔm la ŋu o, megadaa adzo amewo hedoa ŋɔdzi na wo.

ALE SI BIBLIA TRƆ NYE AGBENƆNƆ: Nyɔnu aɖe si nye nye dɔwɔhati, si ŋkɔe nye Loida, la nye Yehowa Ðasefo. To nyɔnu sia dzi la, meva dze si Jovencio, eye wòdze Biblia sɔsrɔ̃ gɔme kplim. Gake eganɔ sesẽm nam kokoko be matrɔ nye agbenɔnɔ. Menoa atama hafi Jovencio vana míesrɔ̃a Biblia, eye megakpɔtɔ nɔ nu vlowo wɔm. Mlɔeba la, kpovitɔwo va lém esime menɔ nu gbegblẽ aɖe wɔm, eye menɔ gaxɔ me ɣleti 11. Le ɣeyiɣi mawo me la, menɔ gbe dom ɖa na Yehowa henɔ koko ƒom nɛ be wòakpe ɖe ŋunye. Mebiae be wòatsɔ nye nu vɔ̃wo akem, eye wòana eƒe gbɔgbɔ kɔkɔea nafia mɔm ahado ŋusẽm.

Emegbe la, Yehowa Ðasefowo dometɔ ɖeka va sram kpɔ le gaxɔa me, eye wòtsɔ Biblia vae nam. Esi mexlẽe la, mekpɔe be Yehowa nye nublanuikpɔla, elɔ̃a ame, eye wòtsɔa vodada kena. Mekpɔe dze sii be Yehowa kpɔ nublanui nam, eye wòna mɔnukpɔkpɔ su asinye be masrɔ̃ eƒe mɔwo. Meɖe kuku nɛ be wòado ŋusẽm maɖe asi le nye mɔ vɔ̃wo ŋu. Nu si mexlẽ le Lododowo 27:11 la, wɔ dɔ ɖe dzinye ŋutɔ. Esi mexlẽ mawunyakpukpui ma la, mese le ɖokuinye me be Yehowae le nu ƒom nam tẽe. Wogblɔ le afi ma be: “Vinye, dze nunya, be nado dzidzɔ na nye dzi, ne mate ŋu aɖo nya ŋu na ame siwo le alɔme ɖem le ŋunye.”

Esi woɖem le gaxɔ me la, Ðasefoawo gate Biblia sɔsrɔ̃ kplim, eye meva nɔ woƒe kpekpeawo dem henɔa agbe nɔm ɖe Biblia me gɔmeɖosewo nu. Yehowa kpe ɖe ŋunye meɖe asi le agbe vloe mawo katã ŋu mlɔeba. Eyome meɖe adzɔgbe na Yehowa Mawu.

VIÐE SIWO MEKPƆ: Togbɔ be nye agbe menyo kura tsã o hã la, fifia mele dzidzɔ kpɔm. Togbɔ be agbe baɖa nɔnɔ nye numame nam tsã hã la, fifia mezu ame yeye. (Kolosetɔwo 3:9, 10) Mɔnukpɔkpɔ gã su asinye egbea be mele ha dem kple Yehowa ƒe amewo, siwo dza la, eye mele kpekpem ɖe ame bubuwo ŋu be woava nya mía Mawu ŋusẽkatãtɔ Yehowa.

“Medi be manɔ Brazil teƒe aʋli ho hafi.”—JULIANA APARECIDA SANTANA ESCUDEIRO

ƑE SI WÒXƆ: 31

DUKƆ SI ME WÒTSO: BRAZIL

AME SI TƆGBI WÒNYE TSÃ: KƆDALA BIBI

AGBE SI MENƆ TSÃ: Du si nye Londrina mee menɔ tso nye ɖevime. Togbɔ be ame siwo le nutoa me la dometɔ akpa gãtɔ da ahe hã la, nutoa me nɔ dzadzɛ, eye tomefafa nɔ anyi. Esi mexɔ ƒe ewo la, fonye de dzi ƒo nam be mawɔ ɖeka kpli ye ne míanɔ kɔdada ƒomevi aɖe si woyɔna be tae kwon do, si gɔmee nye “asi kple afɔ ƒe mɔwo,” la srɔ̃m. Le gɔmedzedzea me la, esia medzɔ dzi na fofonye o, gake eva na ta le ɣeyiɣi kpui aɖe megbe.

Medo vevie nu, eye mexɔ dziɖuɖu geɖe le tae kwon do hoʋiʋliwo me le Parana nutoa me. Emegbe meɖu dzi le dukɔa ƒe hoʋiʋliwo me, eye le ƒe 1993 me la, mezu Brazil bliboa ƒe tae kwon do dziɖulawo dometɔ ɖeka. Nye didi ye nye be makpɔ gome le dukɔwo dome hoʋiʋliwo me. Ke ha, nye ƒomea da ahe, eye nyemekpɔ ga atsɔ axe nye ʋudzɔ ayi dukɔ bubuwo me aɖaʋli ho o.

Menɔ mɔ kpɔm be woatsɔ tae kwon do akpe ɖe Olimpik fefewo ŋu, eye eva eme nenema hã mlɔeba. Esi wònye be medi be manɔ Brazil teƒe le Olimpik Kamedefefewo me ta la, medo vevie kɔdada sɔsrɔ̃, eye adzɔhawo do alɔm be mete ŋu kpɔ gome le hoʋiʋliwo me le France, Vietnam, South Korea, kple Japan, kpakple South America Kamedefefewo me. Nu si ganye nye taɖodzinu ye nye be makpɔ gome le Pan America Kamedefefewo me, eya ta medo vevie nu ale gbegbe be wotiam be manɔ ame etɔ̃ siwo aʋli ho le fefe mawo me le Dominican Republic ƒe dugã si nye Santo Domingo me, le ƒe 2003 me.

ALE SI BIBLIA TRƆ NYE AGBENƆNƆ: Le ƒe 2001 me la, mía kple nye ahiãvi míedo go Yehowa Ðasefowo, eye wodze Biblia sɔsrɔ̃ gɔme kpli mí. Le gɔmedzedzea me la, nyemetsɔ dzo ɖe nusɔsrɔ̃a ŋu tututu o. Zi geɖe la, ɖeɖi tea ŋunye ale gbegbe be, alɔ̃ finam ne míele nua srɔ̃m. Togbɔ be enɔ alea hã la, nu siwo srɔ̃m menɔ la nɔ nye dzi gbɔ ɖom, eye esia ƒe nyateƒenyenye dze ƒãa le hoʋiʋli ƒe wɔna vevi si me megakpɔ gome le la me.

Esi wònye be menɔ ame siwo wotia be woakpɔ gome le Pan America Kamedefefewo me dome ta la, ame siwo xɔa ŋgɔ le tae kwon do kamedefefewo me la na mekpɔ gome le hoʋiʋli ƒe wɔna aɖe si woawɔ do ŋgɔ la me. Esi wòɖo dzinye be mada kɔa la, ɖeko metɔ ɖi maʋãmaʋãe—kɔdada metsɔ fu lãme nam kura o. Enumake, mese le ɖokuinye me be mele be Kristotɔ nada kɔ o, ne kamedefefee wònye gɔ̃ hã! Meɖo ŋku Biblia ƒe sedede si nye, ‘lɔ̃ hawòvi abe wò ŋutɔ ɖokuiwò ene’ la dzi. (Mateo 19:19) Ðeko metrɔ kpoo hedzo le teƒea, nyemebu eŋu zi eve o. Ame sia ame nɔ kpɔyem gãa, le esi wòwɔ mo yaa na wo ta.

Esi meva aƒe me la, mebɔbɔ nɔ anyi de ŋugble le nu si mawɔ le agbe me ŋu. Medo asi ɖa tsɔ agbalẽ aɖe si Ðasefowo ta, si ƒo nu tso nu si Mawu di tso mía si ŋu. Le agbalẽa me la, mekpɔ mawunyakpukpui si nye Psalmo 11:5, si gblɔ tso Yehowa ŋu be: “Eƒe luʋɔ léa fu . . . ame si lɔ̃a ŋutasẽnuwɔwɔ la.” Hakpalaa ƒe nya mawo wɔ dɔ ɖe dzinye ŋutɔ, eya ta metso nya me be madzudzɔ tae kwon do fefea.

Esia medzɔ dzi na ame siwo nɔ tae kwon do fiamem la o. Wogblɔ nam be nyee ƒo tae kwon do dalawo katã ta le dukɔa me, eye be esusɔ vie ko ne makpɔ gome le Olimpik Kamedefefewo me, tsɔ nɔ agbagba dzem be yewoana matrɔ susu. Gake metso nya me xoxo.

Ɣemaɣi la, mía kple nye ahiãvia míeva ɖe mía nɔewo azɔ. Eya nɔ gome kpɔm le gbeƒãɖeɖedɔa me kple Ðasefoawo xoxo. Egbɔna vaa aƒe me kple dzidzɔ, eye wòva gblɔa dze siwo katã wòɖo kple amewo la ŋu nya nam. Mekpɔe dze sii be, ne medi be nye hã makpɔ gome le dɔ ma me la, ahiã be matrɔ nye agbenɔnɔ. Medo le subɔsubɔha si me menɔ la me, eye meva dze xɔ nyɔnyrɔ hezu Yehowa Ðasefo mlɔeba.

VIÐE SIWO MEKPƆ: Mía kple srɔ̃nye míele dzidzɔ kpɔm ŋutɔ, eye míewɔ ɖeka hã, elabena míedzea agbagba tsɔa Biblia me gɔmeɖosewo wɔa dɔe le míaƒe srɔ̃ɖeɖea me. Edzɔa dzi nam be manɔ alɔ domee esi wòle hame si me míele la ƒe nuhiahiãwo gbɔ kpɔm. Anye ne mate ŋu adze agbagba be nye asi nasu dziɖuɖufetu si wotsɔ sika wɔ la dzi, eye nye ŋkɔ nade du hafi. Gake menya be naneke meli si xexe vɔ̃ɖi sia ate ŋu ana, si asɔ kple mɔnukpɔkpɔ si su asinye be masubɔ Yehowa Mawu la o.

“Fofonye meɖe asi le nye nya me gbeɖe o.”—INGO ZIMMERMANN

ƑE SI WÒXƆ: 44

DUKƆ SI ME WÒTSO: GERMANY

AME SI TƆGBI WÒNYE TSÃ: DZƆLA LE ZÃMODZAKAÐEƑE

AGBE SI MENƆ TSÃ: Du aɖe si ŋkɔe nye Gelsenkirchen, si me wokua tomenuwo le la, mee wodzim le. Menye subɔsubɔha ɖeka mee fofonye kple danye nɔ o. Fofonye nye Yehowa Ðasefo. Danye menɔ lɔlɔ̃m be fofonye nahe mía kple fonye, kple nɔvinyenyɔnu eveawo ɖe eƒe dzixɔsewo nu o. Agbatsɔʋu kulae wònye, eye wòwɔa dɔ sia gaƒoƒo ewo gbe sia gbe. Ke hã, ekpɔa vovo ɖe mía ŋu naa hehe mí tso Mawu ƒe Nya la me. Gake nyemetsɔ ɖeke le agbagba siwo katã dzem wònɔ be yeakpe ɖe ŋunye la me o.

Esi mexɔ ƒe 15 la, Kristotɔwo ƒe kpekpe siwo wònana medena la va tim, eye medze aglã. Ƒe ɖeka megbe la, meva te hehexɔxɔ le kɔdada me. Le ƒe eve siwo kplɔe ɖo me la, agbe si menɔ la te ɖe fofonye dzi vevie. Esi mexɔ ƒe 18 la, meʋu le aƒea me.

Kɔdada si srɔ̃m menɔ la vivia nu nye ŋutɔ, eya ta mexɔa hehe zi ade le kwasiɖa me—mekpɔa gome le kɔdada sɔsrɔ̃ me gbã, eyome meyia edzi kple gakpokɔkɔ. Mía kple xɔ̃nyewo míedea zãɣeɖuƒewo zi geɖe le kwasiɖanuwuwuwo. Gbe ɖeka mía kple ame aɖe si hã va teƒea la míeda kɔ, eƒe ŋkume ɖi vɔvɔ̃, gake mekpe edzi bɔbɔe. Ame si nye teƒea tɔ la de dzesi esia, eye enumake wòna dɔm be manye dzɔla le teƒea. Fe si wòbe yeatu nam la kɔ mo dzi, eya ta melɔ̃ be mawɔ dɔa.

Kwasiɖanuwuwu ɖe sia ɖe la, metsia tre ɖe agboa nu, eye nyee tsoa nya me le ame si age ɖe eme kple ame si mage ɖe eme o ŋu. Ame abe 1,000 ene tea ŋu vaa teƒea, eya ta vovo menɔa ŋunye kura o. Dzre dzɔna le afi ma edziedzi. Amewo tsɔa tuwo kple tukpa gbagbãwo ɖe ŋunye. Ame siwo nyemeɖe mɔ na be woage ɖe eme o kple ame siwo menyã do goe la lalana le gota be yewo hã yewoatu nu kplim. Mexɔ ƒe 20 ɣemaɣi, eye mesusu be ame aɖeke mate ŋu akpe dzinye o. Ke hã, le nyateƒe me la, ɖe medze aglã, nye mo medze anyi o, medo ɖokuinye ɖe dzi, media ɖoƒe gã, eye nyemebua ame o.

ALE SI BIBLIA TRƆ NYE AGBENƆNƆ: Fofonye meɖe asi le nye nya me gbeɖe o. Ewɔ ɖoɖo be woanɔ Gbetakpɔxɔ kple Nyɔ! magazinewoa tsɔm vae nam le afi si menɔ la. Woli kɔ ɖe nye xɔ me, gake nyemexlẽa wo o. Gbe ɖeka la, metsɔ ɖewo be mada ŋku ɖe wo me akpɔ. Nyati siwo mexlẽ ku ɖe ale si xexe sia ƒe dunyahehe, asitsatsa, kple mawusubɔsubɔ ƒe nuɖoanyiawo nu ayi ŋu la, wɔ dɔ ɖe dzinye si wɔe be meyɔ nɔvinyenyɔnua. Yehowa Ðasefowoe wo kple srɔ̃a wonye. Wodoe ɖe gbɔnye be yewoasrɔ̃ Biblia kplim, eye melɔ̃.

Gɔmeɖose si le Galatiatɔwo 6:7 la ʋãm be mawɔ tɔtrɔwo le agbe me. Nu siwo me meto la na menya be nu sia nu si mawɔ alo agblɔ kple nyametsotso siwo mawɔ la akpɔ ŋusẽ ɖe nye agbe dzi le etsɔme godoo. Amekpekpe si dze le Yesaya 1:18 la de dzi ƒo nam ŋutɔ. Afi ma gblɔ be: “Yehowa be: Miva mídrɔ̃ ʋɔnu! Ne miaƒe nu vɔ̃wo le abe nyagadzĩ ene la, woafu abe sno ene.” Tso esime medze nua sɔsrɔ̃ gɔme la, mawunyakpukpui ma wɔe be nyemese le ɖokuinye me be asixɔxɔ aɖeke mele ŋunye o alo be manya wɔ be mawɔ tɔtrɔ o.

Le ɣleti ade me la, mewɔ tɔtrɔ gãwo le nye agbe me, gake menɔ bɔbɔe nam kura o. Mekpɔe be ehiã be maɖe ɖe aga le ame siwo dome menɔ la ŋu, eye madzudzɔ hadede kple ame gblẽkuwo. Eya ta megblɔ na xɔ̃nyewo be mele Biblia srɔ̃m azɔ, eye menɔ nu siwo srɔ̃m menɔ la gblɔm na wo. Esia wɔe be womegatena ɖe ŋunye o, eye wonɔ yɔyem be osɔfo. Nɔvinyenyɔnua kpe ɖe ŋunye mekpɔ dɔ bubu aɖe si ŋu bubu le wu.

Azɔ hã, mete kpekpeawo dede le Fiaɖuƒe Akpata me, afi si nɔvinyea kple srɔ̃a dena woƒe kpekpewo le, togbɔ be edidi tso gbɔnye kilometa 30 hã. Fiaɖuƒe Akpata aɖe te ɖe ŋunye, gake menɔ vɔvɔ̃m be mava do go ame siwo dze sim tso nye ɖevime ke la. Menɔ vɔvɔ̃m hã be maɖe gbeƒã tso aƒeme yi aƒeme le míaƒe nutoa me. Ke ne eva dzɔ be medo go ame aɖe si menyã do goe le kpɔa me nyitsɔ laa alo ame aɖe si metsɔ atikevɔ̃ɖi na kpɔ ya ɖe? Mesrɔ̃ nane tso hehe si mexɔ le kamedefefea me—eyae nye be, kamedede si sesẽna lae nyea esi nɔa vevie wu. Eya ta, esi menya dze na gbeƒãɖeɖe ko la, menɔ ewɔm kple nye ŋutete katã.

Kuxi bubu aɖe hã nɔ ŋunye si dzi wòle be maɖu—nuxexlẽ kple nusɔsrɔ̃ medzɔa dzi nam o. Gake menyae be ne medi be xɔse sẽŋu nasu asinye la, ele be mamla ɖokuinye be manɔ Biblia me nyeteƒe goglowo me kum. Meva kpɔe dze sii be, abe ale si wòle le gakpokɔkɔ gome ene la, ele be manɔ kutri kum be masẽ ŋu le xɔse me.

VIÐE SIWO MEKPƆ: Megakpɔtɔ le agbe! Egahiã kokoko be manɔ ɖokuinye dzi ɖum be nye gbɔdzɔgbɔdzɔwo nagava kpɔ ŋusẽ ɖe dzinye o. Gake fifia mía kple srɔ̃nyea, si si Kristotɔwo ƒe nɔnɔme nyuiwo le la, míele dzidzɔ kpɔm ŋutɔ le míaƒe ƒomea me. Xɔlɔ̃ vavã siwo dzi mate ŋu aka ɖo bliboe la le asinye le Yehowa Ðasefowo dome. Ƒe atɔ̃e nye esia si fofonye megava li o, gake hafi wòaku la, dzi dzɔe be ye vi trɔ gbɔ va aƒe na ye.

[Etenuŋɔŋlɔ]