Agbemeŋutinya

Ƒe Blaadre Ye Nye Esia Melé Yuda Ŋutsu Ðeka Ƒe Awu Toga

Abe ale si Leonard Smith gblɔe ene

Esi meɖo sɔhɛmenɔɣiwo me teti ko la, mawunyakpukpui eve aɖewo wɔ dɔ ɖe dzinye vevie. Togbɔ be ƒe 70 ye nye esia hã la, megaɖoa ŋku gbe si gbe mese Zaxariya 8:23, si gblɔ be “ŋutsu ewo” alé “Yuda ŋutsu ɖeka ƒe awu toga” la, gɔme nyuie la dzi kokoko. Wogblɔ na Yuda ŋutsu la bena: “Míayi kpli mi, elabena míese be, Mawu li kpli mi.”

YUDA ŋutsu la le tsitre ɖi na Kristotɔ amesiaminawo, eye “ŋutsu ewo” la le tsitre ɖi na ‘alẽ bubuawo,’ alo “Yonadabwo,” si nye ale si woyɔa wo ɣemaɣi.a (Yoh. 10:16) Esi mese nyateƒe sia gɔme la, meva kpɔ ale si gbegbe agbe tegbee nɔnɔ le anyigba dzi ƒe mɔkpɔkpɔ si le asinye la me vava nɔ te ɖe nye alɔdodo amesiaminawo ƒe ha la nuteƒewɔwɔtɔe dzi.

Kpɔɖeŋu si Yesu wɔ tso “alẽwo” kple “gbɔ̃wo” ŋu, si dze le Mateo 25:31-46 la hã wɔ dɔ ɖe dzinye vevie. ‘Alẽawo’ tsi tre ɖi na ame siwo ŋu woakpɔ ŋudzedze ɖo le nuwuwuŋkekea dzi, le esi wowɔ nyui na Kristo nɔvi amesiamina siwo kpɔtɔ le anyigba dzi la ta. Esi menye sɔhɛ si hã nye Yonadabwo dometɔ ɖeka ta la, megblɔ na ɖokuinye be, ‘Leonard, ne èdi be Kristo nabu wò abe alẽ ene la, ele be nàkpe asi ɖe nɔvia amesiaminawo ŋu, eye nàbɔbɔ ɖe woƒe kpɔkplɔ te, elabena Mawu li kpli wo.’ Nugɔmesese sia kpe ɖe ŋunye le ƒe siwo wu blaadre sɔŋ la me.

‘AKPA KA WƆM MELE?’

Danye xɔ nyɔnyrɔ le ƒe 1925 me le akpata si me míewɔa kpekpe le le Betel la me. Woyɔa akpata ma be London Gbedoxɔ eye nɔvi siwo le nuto ma mee zãnɛ. Wodzim le October 15, 1926, dzi. Le March 1940 me la, mexɔ nyɔnyrɔ le takpekpe aɖe si wowɔ le Dover le England ƒuta la me. Melɔ̃ Biblia me nyateƒea hetsi kplii. Esi wònye be Dada nye Kristotɔ amesiamina ta la, eyae nye ‘Yudatɔ gbãtɔ si ƒe awu toga melé’ le kpɔɖeŋunyagbɔgblɔ nu. Ɣemaɣi la, fofonye kple nɔvinyenyɔnu tsitsitɔ la menɔ Yehowa subɔm o. Míenɔ Gillingham Hame si le England ƒe anyieheɣedzeƒe gome, si me tɔwo katã kloe nye Kristotɔ amesiaminawo la me. Dada ɖo dzonɔameme ƒe kpɔɖeŋu nyui aɖe ɖi le gbeƒãɖeɖedɔa me.

Le September 1941 me, le takpekpe aɖe si wowɔ le Leicester me la, woƒo nuƒo aɖe si ƒe tanyae nye “Nuteƒewɔwɔ” si me wodzro ame si dze aɖu xexea dzi la ƒe nya la me le. Nuƒo ma kpe ɖe ŋunye meva se egɔme zi gbãtɔ be, míele akpa aɖe wɔm le nya si fɔ ɖe te le Yehowa kple Satana dome la me. Eya ta ele be míanɔ Yehowa ƒe akpa dzi eye míalé míaƒe nuteƒewɔwɔ me ɖe asi na eya si nye Xexea Me Katã Dziɖulagã.

Le takpekpe ma me la, wote gbe ɖe mɔɖeɖedɔa wɔwɔ dzi ŋutɔ, eye wode dzi ƒo na sɔhɛwo be woaɖoe woƒe taɖodzinu. Nuƒo si woƒo si ƒe tanyae nye “Akpa Si Mɔɖelawo Wɔna Le Habɔbɔa Me” la na mebu tame eye mebia ɖokuinye be, ‘Akpa ka wɔm mele?’ Takpekpe ma na mekpɔe dze sii keŋ be esi menye Yonadabwo dometɔ ɖeka ta la, nye agbanɔamedzi wònye be mawɔ nye ŋutete ɖe sia ɖe akpe asi ɖe amesiaminawo ƒe ha la ŋu le gbeƒãɖeɖedɔa me. Enumake le takpekpe ma me le Leicester la, mede asi agbalẽ te be mazu mɔɖela.

MƆÐEÐEDƆA WƆWƆ LE AƲAWƆƔI LA

Le December 1, 1941 me, esi mexɔ ƒe 15 la, woɖom mɔɖela vevi. Dada ye nye nye zɔhɛ gbãtɔ le mɔɖeɖedɔa wɔwɔ me, gake anɔ abe ƒe ɖeka ene megbe la, eva hiã be wòaɖe asi le mɔɖeɖedɔa ŋu le lãmesẽkuxiwo ta. Ɣemaɣi la, alɔdzedɔwɔƒe si le London la tsɔm kpe ɖe Ron Parkin, si le subɔsubɔm abe Alɔdzekɔmiti me tɔ ene fifia le Puerto Rico, la ŋu.

Woɖo mí ɖe ƒutadu siwo nye Broadstairs kple Ramsgate siwo le Kent nutoa me la me, eye míehaya xɔ ɖe afi ma. Ga si wonaa mɔɖela veviwo ɣleti sia ɣletie nye shilling 40 (si anɔ abe Amerika dɔlar 8 ene ɣemaɣi). Eya ta ne míexe míaƒe xɔfetu vɔ ko la, ga sue aɖe koe susɔna na mí si nu míenɔa agbe ɖo, eye esesẽna ŋutɔ hafi míekpɔa nu ɖuna. Gake Yehowa toa mɔ aɖe dzi naa nu siwo míehiã la mí ɣesiaɣi.

Míezãa ŋusẽ geɖe doa míaƒe gasɔ siwo dzi míebla agba gbogbo aɖe ɖo la kpea ya sesẽ siwo ƒona tso Dziehe Ƒua dzi la. Ele na mí be míanɔ ŋudzɔ ɖe yameʋu siwo nɔa bɔmbwo dam kple bɔmb siwo woyɔna be V-1, siwo Germanytɔwo dana, siwo vaa anyime ŋutɔ eye wòtoa Kent nutoa tame yina ɖagblẽa nu le London la hã ŋu. Gbe ɖeka la, eva hiã be madzo kpo le nye gasɔa dzi aɖadze gɔta aɖe me esi bɔmb aɖe va to nye tagbɔ yi ɖawó le agble aɖe si te ɖe afi ma ŋu me ta. Togbɔ be enɔ alea hã la, ƒe siwo míetsɔ wɔ mɔɖeɖedɔa le Kent la yɔ fũu kple dzidzɔ.

MEZU “BETEL ÐEKAKPUI”

Danye gblɔa nya nyuiwo tso Betel ŋu ɣesiaɣi. Egblɔna be: “Nyemate ŋu adi nu nyui aɖeke na wò wu be nàva zu Betel ɖekakpui o.” Eya ta bu ale si wòwɔ nuku nam hedo dzidzɔ nam esi womia asim le January 1946 me be mava London Betel be mava kpe asi ɖe dɔa ŋu le afi ma kwasiɖa etɔ̃ ŋu kpɔ. Le kwasiɖa mawo ƒe nuwuwu la, Pryce Hughes si nye alɔdzea dzikpɔla la bia tso asinye be mayi edzi asubɔ le Betel. Hehe si mexɔ le afi ma la kpe ɖe ŋunye le nye agbe me katã.

Ame siwo anɔ abe 30 ene ye nɔ London Betel ƒomea me ɣemaɣi; ƒomea me tɔ akpa gãtɔ nye sɔhɛ siwo nye trewo, gake nɔviŋutsu siwo nye amesiaminawo, siwo dometɔ aɖewoe nye Pryce Hughes, Edgar Clay, kple Jack Barr, si va zu Dziɖuha la me tɔ emegbe, hã nɔ ƒomea me. Mɔnukpɔkpɔ gã ka gbegbee nye esi wònye be nye ɖekakpui dzaa sia mawɔ dɔ le ame siawo siwo nye “sɔtiwo” la ƒe mɔfiafia te ahato esia me akpe asi ɖe Kristo nɔviwo ŋu!—Gal. 2:9.

Gbe ɖeka le Betel la, nɔviŋutsu aɖe va gblɔ nam be nɔvinyɔnu aɖe le tsitre ɖe agboa nu di be yeakpɔm. Kaka makpɔa, danye ye nye ema, elé nubabla aɖe ɖe asi. Egblɔ be yemage ɖe eme o, be yeagana madzudzɔ dɔ si wɔm mele la o, gake etsɔ nubabla la nam eye wòtrɔ dzo. Vuvɔmewu aɖee nɔ eme. Eƒe dɔmenyonunana sia na meɖo ŋku Xana, ame si tsɔa dziwui vanɛ na via Samuel si nye ŋutsuvi dzaa esime wònɔ subɔsubɔm le avɔgbadɔa me la, dzi.—1 Sam. 2:18, 19.

GILEAD—NUTEƑEKPƆKPƆ AÐE SI NYEMAŊLƆ BE GBEÐE O

Le ƒe 1947 me la, womia asi mí ame atɔ̃ le ame siwo nɔ subɔsubɔm le Betel la dome be míayi aɖade Gilead Sukua le Amerika, eye le ƒe si kplɔe ɖo me la, míede sukua ƒe klass 11 lia. Esi míeva ɖo la, vuvɔ nɔ wɔwɔm le New York ƒe dziehe, afi si wowɔa sukua le ɣemaɣi la ale gbegbe. Dzi dzɔm ŋutɔ be metsɔ vuvɔmewu ma si danye nam la ɖe asi!

Nyemate ŋu aŋlɔ ɣleti ade siwo metsɔ de Gilead Sukua la be gbeɖe o. Hadede kple hati sukuvi siwo tso dukɔ vovovo 16 me la na nye nuŋububu de ŋgɔ. To vovo na hehe si mexɔ le sukua me, si na nye kple Yehowa dome ƒomedodoa gasẽ ɖe edzi wu la, mekpɔ viɖe geɖe le hadede kple Kristotɔ tsitsiwo me. Hati sukuviawo dometɔ ɖeka, Lloyd Barry; nufialawo dometɔ ɖeka, Albert Schroeder; kple John Booth, si nye Fiaɖuƒea Ƒe Agble (afi si wowɔa Gilead Sukua le tsã) la dzikpɔla la siaa va zu Dziɖuha la me tɔwo emegbe. Medea asixɔxɔ aɖaŋu siwo nɔviŋutsu siawo ɖo nam lɔlɔ̃tɔe la kple kpɔɖeŋu nyui si woɖo le nuteƒewɔwɔ na Yehowa kple eƒe habɔbɔa me la ŋu ŋutɔ.

MEZU NUTOME SUE DZIKPƆLA EYE MEGATRƆ VA BETEL

Esi mewu Gilead Sukua nu la, wode dɔ asi nam be mayi aɖasubɔ abe nutome sue dzikpɔla ene le Ohio, U.S.A. Ƒe 21 koe mexɔ ɣemaɣi, gake nɔviawo kpɔ dzidzɔ ɖe ɖekakpui ƒe dzo si nɔ menye la ŋu. Mesrɔ̃ nu geɖe tso hamemetsitsi kpɔnuteƒewo gbɔ le nutome sue ma me.

Le ɣleti ʋɛ aɖewo megbe la, womia asim be mava Betel le Brooklyn be mava xɔ hehe bubu kpee. Ɣemaɣie meva nya Milton Henschel, Karl Klein, Nathan Knorr, Nɔviŋutsu T. J. (Bud) Sullivan, kple Lyman Swingle, siwo katã nye sɔtiwo la; wo katã wova subɔ abe Dziɖuha la me tɔwo ene emegbe. Nuteƒekpɔkpɔ tuameɖo wònye nam be mekpɔ ame siawo le dɔ dzi hekpɔ Kristotɔwo ƒe nɔnɔme nyui siwo woɖena fiana. Esia na nye kaka ɖe Yehowa ƒe habɔbɔa dzi me gasẽ ŋutɔ. Eyome wogbugbɔ ɖom ɖe Europa be mayi nye subɔsubɔdɔa dzi le afi ma.

Danye ku le February 1950 me. Esi míeɖii vɔ la, nye kple fofonye kpakple nɔvinyenyɔnu Dora míeɖo dze vevi aɖe si me meto nyateƒe na wo le. Mebia wo be nu kae nye woƒe susu le nyateƒea ŋu fifia si Dada megali o eye nye hã nyemele aƒea me o mahã. Esi wonya nɔviŋutsu amesiamina tsitsi aɖe si ŋkɔe nye Harry Browning la nyuie hedea bubu eŋu ta la, wolɔ̃ be wòafia nyateƒea yewo. Le ƒe ɖeka me la, Papa kple Dora siaa xɔ nyɔnyrɔ. Emegbe woɖo Papa abe subɔla ene le Gillingham hamea me. Le Papa ƒe ku megbe la, Dora ɖe hamemetsitsi wɔnuteƒe aɖe si ŋkɔe nye Roy Moreton eye wòsubɔ Yehowa nuteƒewɔwɔtɔe va se ɖe ku me le ƒe 2010 me.

KPEKPEÐEŊUNANA LE FRANCE

Esi menɔ suku dem la, mesrɔ̃ Fransegbe, Germanygbe, kple Latingbe, gake Fransegbe ye nye gbegbɔgblɔ si sɔsrɔ̃ ɖe fu nam wu le wo katã me. Eya ta esi wobia tso asinye be mayi aɖakpe asi ɖe dɔa ŋu le Paris Betel le France la, nye susu nɔ wɔwɔm evevee. Le afi ma la, mɔnukpɔkpɔ su asinye mewɔ dɔ kple alɔdzea dzikpɔla Henri Geiger si nye nɔviŋutsu amesiamina tsitsi aɖe. Dɔdeasia menɔ bɔbɔe ɣesiaɣi o, eye ɖikekemanɔmee la, mewɔ vodada geɖe, ke hã mesrɔ̃ nu geɖe tso ale si wonɔa anyi kple amewo le ŋutifafa me ŋu.

Tsɔ kpe ɖe eŋu la, mekpɔ gome le ɖoɖowɔwɔ ɖe dukɔwo dome takpekpe si wowɔ le aʋaa megbe le Paris le ƒe 1951 me ŋu la me. Ðekakpui dzaa aɖe si nye dzikpɔla mɔzɔla si woyɔna be Léopold Jontès la va Betel hena kpekpeɖeŋum. Emegbe la, woɖo Léopold alɔdzedzikpɔla. Wowɔ takpekpea le Palais des sports si te ɖe Eiffel Xɔ Kɔkɔ la ŋu. Vavalawo tso dukɔ 28 me. Le takpekpea ƒe ŋkeke mamlɛa dzi la, Ðasefo 6,000 siwo le France la kpɔ dzidzɔ ale gbegbe esi wokpɔe be ame 10,456 sɔŋ ye va takpekpea!

Esime meva ɖo France la, nyemese Fransegbea tututu o. Nu si gagblẽ nyaa ɖe edzie nye be nyemelɔ̃na doa Fransegbea kura o, negbe ɖe meka ɖe nya si medi be magblɔ la dzi ko hafi. Gake ne mèwɔa vodada o la, womate ŋu aɖɔ wò ɖo gbeɖe o, eye màwɔ ŋgɔyiyi le gbea sɔsrɔ̃ hã me o.

Be makpɔ kuxia gbɔ la, metso nya me be made suku aɖe si fiaa Fransegbe amedzrowo. Medea sukua le ɣetrɔ siwo kpekpe mele mía si o la me. Meva te Fransegbea lɔlɔ̃, eye lɔlɔ̃ ma nɔ tsitsim ɖe edzi esi ƒeawo va nɔ yiyim. Esia ɖe vi ŋutɔ, elabena mete ŋu kpe asi ɖe France ƒe alɔdzedɔwɔƒea ŋu le gbegɔmeɖeɖedɔa me. Le ɣeyiɣi aɖe megbe la, meva zu gbegɔmeɖela, heɖea Eŋlisigbe gɔme ɖe Fransegbe me. Mɔnukpɔkpɔe wònye nam be makpe asi ɖe gbɔgbɔmenuɖuɖu dami si kluvi ƒe ha la nana la tɔtrɔ ɖe Fransegbe me na mía nɔvi Fransegbedola siwo le xexea me godoo la ŋu.—Mat. 24:45-47.

SRƆ̃ÐEÐE KPLE MƆNUKPƆKPƆ BUBUWO

Le ƒe 1956 me la, meɖe Esther, si nye mɔɖela Switzerlandtɔ aɖe, si medo go ƒe ʋɛ aɖewo do ŋgɔ. Míeɖe mía nɔewo le Fiaɖuƒe Akpata si le London Betel (London Gbedoxɔ xoxo si me danye xɔ nyɔnyrɔ le) la me. Nɔviŋutsu Hughes ye ƒo míaƒe srɔ̃ɖenuƒoa. Esther dada hã nɔ afi ma, eye dziƒomɔkpɔkpɔ nɔ eya hã si. Menye kpeɖeŋutɔ lɔ̃ame wɔnuteƒe aɖe koe nye srɔ̃ɖeɖea he vae nam o, ke ena nu xɔasi aɖe hãm, si nye dzeɖoɖo gaƒoƒo geɖe kple lɔ̃xo lɔ̃ame si lɔ̃ gbɔgbɔmenuwo la, va se ɖe esime wòwu eƒe anyigbadzigbenɔnɔ nu le ƒe 2000 me.

Le míaƒe srɔ̃ɖeɖea megbe la, mía kple Esther míeganɔ Betel o. Togbɔ be megaɖea gbe gɔme na Betel hã la, Esther ya subɔ abe mɔɖela vevi ene le Paris ƒe gbɔtodu aɖe me. Ete ŋu kpe ɖe ame geɖewo ŋu wova zu Yehowa subɔlawo. Le ƒe 1964 me la, wogayɔ mí be míava nɔ Betel ake. Emegbe le ƒe 1976 me, esime wodze Alɔdzekɔmiti ƒe ɖoɖoa gɔme la, wotiam be manye wo dometɔ ɖeka. Esi ƒeawo va nɔ yiyim la, Esther na kpekpeɖeŋum lɔlɔ̃tɔe ɣesiaɣi.

“NYEMANƆ MIA GBƆ ƔESIAƔI O”

Mɔnukpɔkpɔ su asinye meyia habɔbɔa ƒe dɔwɔƒe gã si le New York la enuenu. Le sasrãkpɔ mawo me la, mexɔ aɖaŋuɖoɖo nyuiwo tso Dziɖuha la me tɔ vovovowo gbɔ. Le kpɔɖeŋu me, gbe ɖeka esi meɖe ale si metsi dzi ɖe dɔ aɖe nu wuwu ɖe game dzi ŋu gblɔ la, Nɔviŋutsu Knorr ko alɔgbɔnu eye wògblɔ nam be: “Mègavɔ̃ o. Yi dɔa dzi ko!” Tso ɣemaɣi la, edzɔ zi geɖe be ne dɔdeasiwo li kɔ ɖi la, nyemetsia dzimaɖi o, ke boŋ meléa fɔ ɖe dɔawo wɔwɔ ŋu ɖekaɖeka eye zi geɖe la, mewua wo katã nu ɖe game dzi.

Hafi Yesu naku la, egblɔ na eƒe nusrɔ̃lawo be: “Nyemanɔ mia gbɔ ɣesiaɣi o.” (Mat. 26:11) Mí ame siwo nye alẽ bubuawo hã míenyae be Kristo nɔvi amesiaminawo manɔ mía dome le anyigba dzi afi sia ɖaa o. Eya ta mebui mɔnukpɔkpɔ xɔasi si ɖeke mesɔ kplii o be mebɔ ha kplikplikpli kple amesiamina geɖewo hena ƒe 70 sɔŋ—ɛ̃, edo dzidzɔ nam ŋutɔ be melé Yuda ŋutsu ɖeka ƒe awu toga.

[Etenuŋɔŋlɔ]

[Nya si ɖe dzesi si le axa 21]

Nɔviŋutsu Knorr ko alɔgbɔnu eye wògblɔ nam be: “Mègavɔ̃ o. Yi dɔa dzi ko!”

[Nɔnɔmetata siwo le axa 19]

(Miame) Dada kple Papa

(Ðusime) Le Gilead sukukpodzi le ƒe 1948 me, esi medo vuvɔmewu si Dada nam la

[Nɔnɔmetata si le axa 20]

Menɔ gbe gɔme ɖem na Nɔviŋutsu Lloyd Barry, le France alɔdzedɔwɔƒea ŋukɔɣi le ƒe 1997 me

[Nɔnɔmetata siwo le axa 21]

(Miame) Mía kple Esther le míaƒe srɔ̃ɖegbe

(Ðusime) Míele gbeƒã ɖem ɖekae