Agbemeŋutinya

Yehowa Fia Eƒe Lɔlɔ̃nu Wɔwɔm

Abe ale si Max Lloyd gblɔe ene

Le zã aɖe me le ƒe 1955 me la, ameha aɖe si do dziku vevie la va ƒo xlã aƒe si me nye kple nye zɔhɛ dutanyanyuigblɔla aɖe míele le Paraguay, Anyiehe Amerika la. Wonɔ ɣli dom be: “Míaƒe mawu la le ʋu dim be yeano, eye ame tutɔwo ƒe ʋu dim wòle be yeano.” Aleke wòdzɔe be mí ame siwo yɔm wole be ame tutɔwo (amedzrowo) la míewɔ va le afi sia?

LE GONYEME la, nye ŋutinya dze egɔme ƒe geɖee nye esia le Australia, afi si metsi le, afi si Yehowa te nufiafiam le be mawɔ yeƒe lɔlɔ̃nu. Fofonye xɔ agbalẽ aɖe si ƒe tanyae nye Enemies tso Ðasefo aɖe gbɔ le ƒe 1938 me. Hakplɔla siwo le nutoa me, siwo gblɔna be Biblia ƒe akpa aɖewo nye gliwo la ƒe nu ti eya kple Dada xoxo. Anɔ abe ƒe ɖeka ene megbe la, dzinyelawo xɔ nyɔnyrɔ tsɔ ɖo kpe woƒe adzɔgbeɖeɖe na Yehowa dzi. Tso ɣemaɣi la, Yehowa ƒe lɔlɔ̃nu wɔwɔ ye va nye nu vevitɔ na míaƒe ƒomea. Le woƒe nyɔnyrɔxɔxɔ megbe la, nɔvinyenyɔnu Lesley, si tsi wum ƒe atɔ̃ la xɔ nyɔnyrɔ, eye nye hã mexɔ nyɔnyrɔ le ƒe 1940 me esime mexɔ ƒe asieke.

Esi Xexemeʋa II dze egɔme eteƒe medidi o la, woɖo asi Yehowa Ðasefowo ƒe Biblia srɔ̃gbalẽwo tata kple wo mama dɔa dzi le Australia. Eya ta abe ɖevi sue ene la, mesrɔ̃ ale si mazã Biblia la ɖeɖe ko atsɔ aɖe nye dzixɔsewo me. Metsɔa nye Biblia yia suku ɣesiaɣi be mate ŋu azãe atsɔ aɖe nu si tae nyemedoa gbe na aflaga alo kpea asi ɖe aʋa si wɔm dukɔwo le ŋu o la me.—2 Mose 20:4, 5; Mat. 4:10; Yoh. 17:16; 1 Yoh. 5:21.

Nye sukuhati geɖe medea ha kplim o, elabena wogblɔna be menye “Germanytɔwo ƒe ŋkutsala.” Ɣemaɣi la, woɖea sinimawo le sukua. Hafi woadze sinima la ɖeɖe gɔme la, ele be ame sia ame natso adzi dukɔa ƒe ha. Ne mekpɔtɔ le anyinɔƒe la, ŋutsuvi eve alo etɔ̃ léa nye ɖa eye wohenɛ sesĩe ale be matso ɖe tsitrenu. Mlɔeba la, wonyam le sukua le esi melé nye dzixɔse siwo wotu ɖe Biblia dzi la me ɖe asi sesĩe ta. Ke hã mewu sukua nu le aƒe me to agbalẽŋɔŋlɔ dzi.

TAÐODZINU AÐE SI GBƆ MEÐO MLƆEBA

Meɖoe nye taɖodzinu be madze ɣeyiɣiawo katã ƒe subɔsubɔdɔa gɔme abe mɔɖela ene ne mexɔ ƒe 14. Eya ta dzi ɖe le ƒonye ŋutɔ esi dzinyelawo gblɔ nam be ele be madi dɔ eye madze dɔwɔwɔ gɔme gbã. Wote tɔ ɖe edzi be maxe nye ŋutɔ nye xɔfe eye makpɔ nye nuɖunyawo gbɔ le aƒe me, gake wodo ŋugbe nam be ne mexɔ ƒe 18 la, mate ŋu adze mɔɖeɖedɔa gɔme. Esia na be míehea nya zi geɖe tso ga si xɔm menɔ le dɔme la ŋu. Megblɔna na wo be medi be madzrae ɖo hena mɔɖeɖedɔa wɔwɔ gake wonɔ exɔm.

Esi ɣeyiɣia de be madze mɔɖeɖedɔa gɔme la, dzinyelawo nɔ anyi kplim eye wogblɔ nam be yewotsɔ ga siwo katã yewoxɔ le asinye la dzra ɖo ɖe gadzraɖoƒe nam. Eyome wotrɔ ga la katã nam be maƒle awuwo kple nu bubu siwo ahiãm le mɔɖeɖedɔa wɔwɔ me. Wonɔ ale si nye ŋutɔ makpɔ ɖokuinye dzi eye nyemanɔ mɔ kpɔm be ame bubu aɖeke nawɔ esia nam o la fiamem. Ne metrɔ kpɔ megbe la, mekpɔe be hehe xɔasi aɖee wonam.

Esime mía kple Lesley míenɔ tsitsim la, mɔɖelawo va dzea míaƒe aƒe me zi geɖe, eye edoa dzidzɔ na mí ŋutɔ be míayi gbedzi kpli wo. Míezãa kwasiɖanuwuwuwo tsɔ wɔa aƒe me yi aƒe me dɔa, ablɔdziɖaseɖiɖidɔa kple Biblia nusɔsrɔ̃wo. Le ƒe mawo me la, gbeƒãɖela ɖe sia ɖe ɖonɛ eƒe taɖodzinu be yeakpɔ gaƒoƒo 60 ɣleti sia ɣleti. Dada ɖoa gaƒoƒo ma gbɔ ɣleti ɖe sia ɖe kloe, eye esia nye kpɔɖeŋu nyui aɖe na nye kple Lesley.

MƆÐEÐEDƆA WƆWƆ LE TASMANIA

Teƒe gbãtɔ si meɖe gbeƒã le esi mezu mɔɖelae nye Tasmania, si nye ƒukpo aɖe le Australia, afi si meyi ɖawɔ ɖeka kple nɔvinyenyɔnu kple srɔ̃a le. Gake eteƒe medidi o, wodzo yi Gilead Sukua ƒe klass 15 lia. Ŋu kpeam ŋutɔ, eye nyemedzo le aƒe me yi ɖanɔ ɖokuinye si kpɔ o. Ame aɖewo gblɔ be ɣleti etɔ̃ koe mate ŋu anɔ afi ma. Ke hã, esi menɔ afi ma ƒe ɖeka ko la, woɖom hamesubɔla le ƒe 1950 me; woyɔa hamesubɔla fifia be hamemetsitsiwo ƒe ha ƒe ɖoɖowo gbɔ kpɔla. Emegbe woɖom mɔɖela vevi, eye nɔviŋutsu ɖekakpui aɖe va zu nye zɔhɛ.

Afi si woɖo mí ɖo la nye nuto saɖeaga aɖe si me wokua akɔbli le, afi si Ðasefo aɖeke mele o. Míeɖo bɔs heva ɖo afi ma ɣetrɔ aɖe me. Míetsi amedzrodzeƒe xoxo aɖe dɔ le zã gbãtɔa me. Le ŋufɔke esi míenɔ gbeƒã ɖem tso aƒe me yi aƒe me la, míenɔ aƒemenɔlawo biam nenye be wonya afi aɖe si xɔ aɖe le si me míate ŋu adze hã. Le fiẽ me lɔƒo la, ame aɖe gblɔ be ame aɖeke mele nunɔla ƒe aƒe si te ɖe Presbiteria sɔlemexɔa ŋu la me o, eye wògblɔ be míate ŋu abia subɔla la. Ewɔ ame ŋutɔ eye wòɖe mɔ na mí be míamlɔ aƒea me faa. Enye nu si wɔ nuku ŋutɔ be gbe sia gbe la, míedona le nunɔlaa ƒe aƒe me ɖaɖea gbeƒã.

Anyigbamamaa tse ku ŋutɔ. Míeɖo dze nyui geɖewo eye míedze Biblia nusɔsrɔ̃ geɖewo gɔme. Esi sɔlemeha la ƒe ŋgɔnɔla siwo le fiadua me see be Yehowa Ðasefowo le nunɔlaa ƒe me la, wobia tso subɔlaa si be wòanya mí le aƒea me enumake. Míegazu dzeƒemanɔsitɔwo ake!

Le ŋkeke si kplɔe ɖo dzi, esi míeɖe gbeƒã ʋuu va se ɖe ɣetrɔ me lɔƒo la, míedi teƒe si míamlɔ le zã me. Lãmesẽfefewɔƒea ƒe akpa si wogba tame na la koe nye teƒe nyuitɔ si ŋu míeke ɖo. Míeɣla míaƒe mɔzɔkplowo ɖe afi ma heyi ɖe gbeadzi ake. Zã nɔ dodom, gake míetso nya me be míage ɖe aƒe ʋɛ siwo susɔ la me atsɔ awu dɔa nu le nuto aɖe me. Le aƒeawo dometɔ ɖeka me la, ŋutsu aɖe tsɔ xɔnugoe eve aɖe si nɔ eƒe aƒea megbe la na mí míedze eme!

NUTOME SUE DZIKPƆKPƆDƆA KPLE GILEAD

Anɔ abe ɣleti enyi le gbeƒãɖeɖe le anyigbamama sia me megbe la, Australia alɔdzedɔwɔƒea kpem be mazu nutome sue dzikpɔla. Esia wɔ nuku nam ŋutɔ, elabena ƒe 20 koe mexɔ ɣemaɣi. Esi wona hehem kwasiɖa ʋɛ aɖewo ko megbe la, medze hamewo sasrã kpɔ edziedzi gɔme henɔ dzi dem ƒo na wo. Ame siwo tsi wum, magblɔ be wo katã kloe, medam ɖe anyi le esi menye ɖekakpui ta o, ke boŋ wode bubu dɔ si wɔm menɔ la ŋu.

Mɔzɔmɔnu vovovowoe mezãna ne mele dzodzom le hame aɖe gbɔ yina bubu gbɔ. Le kpɔɖeŋu me, kwasiɖa aɖe me la, meɖoa bɔs, bubu me la, meɖoa elektrik-keteke si woyɔna be tram, ɣebubuɣiwo la, meɖoa ʋu viwo alo ɖoa dzokeke, eye menɔa agbagba dzem be malé nye mɔzɔkploa kple gbeadzidekploa siaa. Hati Ðasefowo gbɔ nɔnɔ nye dzidzɔ vavã. Hamesubɔla aɖe di vevie be madze ye gbɔ togbɔ be wometu eƒe aƒea wu enu o gɔ̃ hã. Le kwasiɖa ma me la, yevuwo ƒe tsilegba legbe si me womlɔna léa tsi la mee memlɔ, gake míetu mía nɔewo ɖo le gbɔgbɔ me ŋutɔ kwasiɖa ma me!

Dzidzɔnya bubu gava le ƒe 1953 me esi woɖo Gilead Suku ƒe klass 22 lia ƒe dɔbiagbalẽ ɖem be makpee ɖo. Edo dzidzɔ nam gake metsi dzimaɖi hã. Nya lae nye be, esi nɔvinyenyɔnu kple srɔ̃a wowu Gilead Sukua nu le July 30, 1950 dzi la, woɖo wo ɖe Pakistan. Mede ƒe ɖeka o, Lesley dze dɔ vevie eye wòku le afi ma. Mebia ɖokuinye be, aleke dzinyelawo ase le wo ɖokui me tso nye ʋuʋu yi xexea me ƒe teƒe bubu aɖe ŋu esi nu sia dzɔ eteƒe medidi kura o? Ke hã wogblɔ be: “Yi nàɖasubɔ Yehowa le afi sia afi si wòɖo wò ɖo.” Emae nye zi mamlɛtɔ si mekpɔ fofonye ŋkume. Eku le ƒe 1957 me.

Eteƒe medidi o, nye kple Australiatɔ atɔ̃ bubuwo míeɖo meli hedze kwasiɖa ade ƒe mɔzɔzɔ gɔme yina New York City. Le mɔa dzi la, míexlẽa Biblia, míesrɔ̃a nu, eye míeɖea gbeƒã na hati mɔzɔlawo. Hafi míayi afi si wowɔa sukua le le South Lansing, New York la, míede July 1953 dukɔwo dome takpekpe si wowɔ le Yankee Stadium la. Vavalawo katã ƒe xexlẽmee nye 165,829 si nye agbɔsɔsɔ gbogbotɔ kekeake!

Gilead sukuvi siwo tso anyigba ƒe dzogoe ɖe sia ɖe dzi, siwo ƒe xexlẽme nye 120 ye nɔ míaƒe klass la. Womegblɔ afi si míayi aɖasubɔ le la na mí o va se ɖe gbe si gbe míewu sukua nu. Esi míesee eye asinukpɔkpɔ su mía si ko la, míeɖe abla yi ɖe Gilead Sukua ƒe agbalẽdzraɖoƒe be míaxlẽ nu tso dukɔ siwo me woɖo mí ɖo la ŋu. Mekpɔe be Paraguay, afi si woɖom ɖo la, nye dukɔ si ƒe ŋutinya yɔ fũu kple aglãdzedze ɖe dziɖuɖuwo ŋu. Esi meɖo dukɔa me eteƒe medidi o la, mebia nye hati dutanyanyuigblɔlaawo ŋdi aɖe be, nu ka ƒe ‘dzidzɔ kpɔm amewo nɔ’ le zã me mahã. Woko alɔgbɔnu eye wogblɔ nam be: “Woƒe aglãdzedze ɖe dziɖuɖu ŋu ɖeka teƒe koe nye ema nèkpɔ. Kpɔ agboa nu ɖa.” Mekpɔ kpovitɔwo le dzogoe ɖe sia ɖe dzi!

NUTEƑEKPƆKPƆ ÐEDZESI AÐE

Gbe ɖeka la, mekplɔ nutome sue dzikpɔla ɖo be míayi aɖasrã hame saɖeaga aɖe kpɔ eye míaɖe sinima si nye The New World Society in Action (La Société du Monde Nouveau en action) afia wo. Mɔzɔzɔa xɔ gaƒoƒo enyi alo asieke sɔŋ; gbã la, míeɖo keteke, eyome míeɖo agbatsɔkeke si sɔ hena, eye mlɔeba la, míeɖo tasiaɖam si nyitsu hena. Míetsɔ elektrikŋusẽnamɔ̃ kple sinimaɖemɔ̃ aɖe ɖe asi. Esi míeva ɖo afi si yim míele mlɔeba la, míezã ŋkeke si kplɔe ɖo la katã tsɔ nɔ amewo gbɔ yim le agblewo dzi eye míenɔ wo katã kpem be woava kpɔ sinima si míaɖe zã ma me la. Ame 15 aɖewo va!

Esi míeɖe sinima la hena miniti 20 aɖewo ko la, wogblɔ na mí be míawɔ kaba age ɖe aƒea me. Míekɔ sinimaɖemɔ̃a enumake eye míege ɖe aƒea me. Ɣemaɣie ŋutsuwo dze ɣlidodo gɔme, nɔ tu dam ɖe ya me, eye wonɔ ha dzim be: “Míaƒe mawu la le ʋu dim be yeano, eye ame tutɔwo ƒe ʋu dim wòle be yeano.” Ame tutɔ eve koe nɔ afi ma, eye nyee nye ɖeka! Ame siwo va sinema la kpɔƒe la xe mɔ na nu vlo wɔha la be woagadze kpɔ age ɖe aƒea me o. Gake tsitretsiɖeŋulawo gatrɔ gbɔ va, anɔ abe fɔŋli ga etɔ̃ me ene, henɔ woƒe tuawo dam eye wonɔ atam kam be yewoƒe asi asu mía dzi godoo ne míele mɔ dzi trɔ yina dugã me gbe ma gbe.

Nɔviawo yɔ dudzikpɔla la, eye wòva ŋdɔme kple sɔ eve be yeakplɔ mí ayi dugã me. Esi míele mɔa dzi la, ɣesiaɣi si míegogo ave dodo aɖe alo teƒe aɖe si atiwo sɔ gbɔ ɖo la, eɖea eƒe tua ɖe go eye wòdoa eƒe sɔa dzea mía ŋgɔ ɖaléa ŋku ɖe teƒea. Mekpɔe be sɔ nye mɔzɔmɔnu vevi aɖe, eya ta meƒle ɖeka emegbe.

DUTANYANYUIGBLƆLA BUBUWO VA ÐO

Gbeƒãɖeɖedɔa yi edzi nɔ dzidzedze kpɔm togbɔ be subɔsubɔhaŋgɔnɔlawo tsia tsitre ɖe mía ŋu enuenu hã. Le ƒe 1955 me la, dutanyanyuigblɔla atɔ̃ bubu siwo dome nɔvinyɔnu Canadatɔ aɖe si ŋkɔe nye Elsie Swanson, si wu Gilead Sukua ƒe klass 25 lia nu, hã nɔ la va ɖo. Mí katã míenɔ alɔdzedɔwɔƒea hena ɣeyiɣi aɖe hafi wova ɖoe ɖe dukɔa ƒe akpa bubu. Etsɔ eƒe agbe ɖo anyi na Yehowa subɔsubɔ, togbɔ be edzila siwo mexɔ nyateƒea kpɔ gbeɖe o la menaa kpekpeɖeŋu aɖekee o gɔ̃ hã. Le December 31, 1957 dzi la, nye kple Elsie míeɖe mía nɔewo eye míawo ɖeɖe míenɔ dutanyanyuigblɔlawo ƒe aƒe aɖe me le Paraguay ƒe anyiehe.

Pɔmpi menɔ míaƒe aƒea me o; vudo boŋue nɔ míaƒe xɔ godo. Eya ta xɔmetsileƒe alo xɔmefɔdzideƒe menɔ anyi o, nunyamɔ̃ menɔ mía si o, eye nufamɔ̃ kura gɔ̃ hã meli o. Míeƒlea nuɖuɖu siwo tea ŋu gblẽna la ɖe ŋkeke ɖe sia ɖe ƒe zazã nu. Gake agbe tsɛ nɔnɔ kple ƒomedodo nyui si nɔ mía kple nɔviawo dome le hamea me wɔe be ɣeyiɣi mawo nye dzidzɔɣeyiɣiwo le míaƒe srɔ̃ɖegbenɔnɔ me.

Esi míetrɔ yi Australia le ƒe 1963 me be míaɖasrã danye kpɔ la, eteƒe medidi o, dzidɔ dze edzi, eye edze abe dzidzɔ si gbegbe wòkpɔ esi wògakpɔ via ake le ƒe ewo sɔŋ megbe la gbɔe wòtso ene. Esi ɣeyiɣi si míatrɔ ayi míaƒe dutanyanyuigbɔgblɔdɔa dzi le Paraguay nɔ ɖoɖom la, nyametsotso sesẽtɔ siwo míewɔ le míaƒe agbe me la dometɔ ɖeka dze ŋgɔ mí. Ðe míagblẽ danye ɖe kɔdzi, anɔ mɔ kpɔm be ame aɖe akpɔ edzi eye míatrɔ ayi míaƒe dɔ si míelɔ̃ ŋutɔ la dzi le Paraguay la? Esi míedo gbe ɖa tso eŋu ɣeyiɣi didi aɖe vɔ la, nye kple Elsie míetso nya me be míanɔ anyi akpɔ Dada dzi. Míenɔ edzi kpɔm, eye le ɣeyiɣi ma ke me la, míeyi ɣeyiɣiawo katã ƒe subɔsubɔdɔa dzi va se ɖe esime wòku le ƒe 1966 me.

Mɔnukpɔkpɔ gã aɖe wònye be wozã mí le nutome sue kple nutome gã dzikpɔkpɔdɔa me le Australia ƒe ʋɛ aɖewo, eye mefia nu le Fiaɖuƒe Subɔsubɔ Suku si hamemetsitsiwo dena hã me. Eyome tɔtrɔ bubu aɖe gava míaƒe agbe me. Wode dɔ asi nam be manye Alɔdzekɔmiti gbãtɔ si woɖo le Australia la me tɔ ɖeka. Emegbe esi ɣeyiɣia de be míatu alɔdzedɔwɔƒe yeye la, wotiam menye xɔtukɔmitia ƒe zimenɔla. Le dɔwɔla kpɔnuteƒe siwo kpea asi ɖe ame ŋu ƒe kpekpeɖeŋu me la, míetu alɔdzedɔwɔƒe dzeani aɖe.

Esia megbe la, wobia tso asinye be mawɔ dɔ le Subɔsubɔ Dɔdzikpɔƒe, si nye dɔwɔƒe si kpɔa gbeƒãɖeɖedɔa dzi le dukɔ aɖe me. Mɔnukpɔkpɔ su asinye meyi ɖasrã alɔdzedɔwɔƒe bubuwo kpɔ abe alɔdzewo dzikpɔla ene le xexea me godoo hena kpekpeɖeŋu kple dzideƒo wo. Le dukɔ aɖewo me la, meyi ɖasrã nɔvi siwo nɔ gaxɔwo kple fuwɔamegaxɔwo me ƒe geɖe—ƒe gbogbo aɖewo gɔ̃ hã—le toɖoɖo Yehowa nuteƒewɔwɔtɔe ta la kpɔ, eye esia do ŋusẽ nye xɔse ŋutɔ.

DƆDEASI SI WƆM MÍELE FIFIA

Esi míeyi ɖasrã alɔdzewo kpɔ le ƒe 2001 me si na ɖeɖi te mía ŋu hafi míegbɔ la, mekpɔ lɛta aɖe si me wokpem le be mava Brooklyn, New York, ava subɔ abe United States Alɔdzekɔmiti yeye si woɖo la me tɔ ɖeka ene. Nye kple Elsie míedo gbe ɖa tso amekpekpea ŋu, eye míelɔ̃ xɔ dɔdeasi sia dzidzɔtɔe. Ƒe 11 sɔŋ ye nye esia, míekpɔtɔ le Brooklyn.

Mekpɔa dzidzɔ ŋutɔ be srɔ̃nyɔnu aɖe si lɔ̃na be yeawɔ nu sia nu si Yehowa bia la le asinye. Nye kple Elsie siaa míele míaƒe ƒe 80-awo ƒe gɔmedzedze eye míegakpɔtɔ le lãmesẽ si sɔ me. Míele mɔ kpɔm be míase vivi na Yehowa ƒe nufiafiawo yi ɖe mavɔmavɔ me ahakpɔ gome le yayra wɔnuku siwo ame siwo yi edzi wɔ eƒe lɔlɔ̃nu akpɔ la me.

[Nya si ɖe dzesi si le axa 19]

Kwasiɖa aɖe me la, meɖoa bɔs, bubu me la, meɖoa elektrik-keteke si woyɔna be “tram,” ɣebubuɣiwo la, meɖoa ʋu viwo alo ɖoa dzokeke, eye menɔa agbagba dzem be malé nye mɔzɔkploa kple gbeadzidekploa siaa

[Nya si ɖe dzesi si le axa 21]

Míele mɔ kpɔm be míase vivi na Yehowa ƒe nufiafiawo yi ɖe mavɔmavɔ me

[Nɔnɔmetata siwo le axa 18]

Miame: Le nutome sue dzikpɔkpɔdɔa me le Australia Ðusime: Nye kple dzinyelawo

[Nɔnɔmetata si le axa 20]

Míaƒe srɔ̃ɖegbe, le December 31, 1957, dzi