“Susu Ðoɖo Gbɔgbɔ La Ŋu Hea Agbe Kple Ŋutifafa Vanɛ”

1, 2. Nu ka tae Romatɔwo ta 8 lia me nyawo le vevie na Kristotɔ amesiaminawo?

ÐE NÈXLẼ Romatɔwo 8:15-17 le Yesu ƒe ku ƒe Ŋkuɖodzia ɖuɣi kpɔa? Anɔ eme nenema. Mawunyakpukpui vevi ma ɖe ale si Kristotɔwo wɔna nyana be wosi ami na yewo la me—gbɔgbɔ kɔkɔe la ɖia ɖase kpena ɖe woƒe gbɔgbɔ ŋu. Azɔ hã, Romatɔwo 8:1 ƒo nu tso “ame siwo wɔ ɖeka kple Kristo Yesu” la ŋu. Gake amesiaminawo ŋu koe Romatɔwo ta 8 lia me nyawo ku ɖoa? Alo ɖe wòku ɖe Kristotɔ siwo le mɔ kpɔm be yewoanɔ agbe le anyigba dzi la hã ŋua?

² Kristotɔ amesiaminawo koŋ ŋue ta ma me nyawo ku ɖo. Woxɔa “gbɔgbɔ la” abe ame siwo le “lalam . . . be woaxɔ [wo] abe viwo ene, be woaɖe [wo tso woƒe] ŋutilã me.” (Rom. 8:23) Ɛ̃, woava zu Mawu ƒe viwo le dziƒo. Mɔnukpɔkpɔ sia su wo si elabena woxɔ nyɔnyrɔ zu Kristotɔwo, eye Mawu wɔ tafea ŋu dɔ na wo, etsɔ woƒe nu vɔ̃wo ke wo, eye wòbu wo ame dzɔdzɔewoe ale be woazu yeƒe gbɔgbɔmeviwo.—Rom. 3:23-26; 4:25; 8:30.

 3. Nu ka tae míeƒo nya ta be ele be Romatɔwo ta 8 lia me nyawo nanɔ vevie na ame siwo si anyigbadzinɔnɔ ƒe mɔkpɔkpɔ le?

³ Ke hã, Romatɔwo ta 8 lia ka ame siwo si anyigbadzinɔnɔ ƒe mɔkpɔkpɔ le la hã, elabena Mawu bua wo abe ame dzɔdzɔewo ene le gɔmesese aɖe nu. Míekpɔ esia dze sii le nya siwo Paulo ŋlɔ ɖe eƒe agbalẽa me la me. Eƒo nu tso Abraham ŋu le ta 4 lia me. Ŋutsu xɔsetɔ ma nɔ anyi do ŋgɔ na ɣeyiɣi si me Yehowa tsɔ Se la na Israel dukɔa, si nye ɣeyiɣi didi aɖe hafi Yesu va ku ɖe míaƒe nu vɔ̃wo ta. Ke hã, Yehowa he susu yi Abraham ƒe xɔse ɖedzesi la dzi eye wòbui abe ame dzɔdzɔe ene. (Xlẽ Romatɔwo 4:20-22.) Le mɔ ma ke nu la, Yehowa ate ŋu abu Kristotɔ wɔnuteƒe siwo li egbea siwo si agbenɔnɔ tegbee le anyigba dzi ƒe mɔkpɔkpɔa le hã abe ame dzɔdzɔewo ene. Esia ta aɖaŋuɖoɖo siwo le Romatɔwo ta 8 lia me na ame dzɔdzɔewo la ate ŋu aɖe vi na woawo hã.

 4. Ne míexlẽ nya siwo le Romatɔwo 8:21 la, nya kae wòle be míabia mía ɖokuiwo?

⁴ Míekpɔe le Romatɔwo 8:21 be kakaɖedzi li be xexe yeyea ava godoo. Mawunyakpukpui sia gblɔ be “woaɖe nuwɔwɔ la ŋutɔ hã tso gbegblẽ ƒe kluvinyenye la me, eye wòakpɔ Mawu ƒe viwo ƒe ŋutikɔkɔe ƒe ablɔɖe la.” Biabia lae nye be ɖe míele afi ma nɔ gea, ɖe teƒeɖoɖo ma asu mía sia? Ðe kakaɖedzi le asiwò be èle afi ma nɔ gea? Aɖaŋuɖoɖo siwo akpe ɖe mía ŋu be teƒeɖoɖo ma nasu mía si la le Romatɔwo ta 8 lia me.

 5. Ŋkubiãnya ka ŋue Paulo ƒo nu tsoe le Romatɔwo 8:4-13?

⁵ Xlẽ Romatɔwo 8:4-13. Romatɔwo ta 8 lia ƒo nu tso ame siwo nɔa agbe “ɖe ŋutilã nu la” ŋu hetsɔ wo sɔ kple ame siwo nɔ zɔzɔm “le gbɔgbɔ la nu.” Ame aɖewo ate ŋu asusu be, le afi sia la, ɖe Paulo tsɔ ame siwo mele nyateƒea me o la nɔ sɔsɔm kple ame siwo le nyateƒea me, alo ame siwo menye Kristotɔwo o kple Kristotɔwoe wòtsɔ le sɔsɔm kple wo nɔewo. Gake “Mawu ƒe lɔlɔ̃tɔ siwo katã le Roma, ame siwo woyɔ be woava zu ame kɔkɔewo” lae Paulo nɔ agbalẽa ŋlɔm na. (Rom. 1:7) Eya ta, Kristotɔ siwo nɔ zɔzɔm le ŋutilã nu la kple Kristotɔ siwo nɔ zɔzɔm le gbɔgbɔ la nue Paulo tsɔ nɔ sɔsɔm kple wo nɔewo. Aleke woto vovo na wo nɔewo?

6, 7. (a) Mɔ siwo nu wozã nya “ŋutilã” le le Biblia me la dometɔ aɖewo ɖe? (b) Gɔmesese ka nue Paulo zã nya “ŋutilã” le le Romatɔwo 8:4-13?

⁶ Gbã, bu ŋkɔnya “ŋutilã” ŋu kpɔ. Nu kae Paulo wɔnɛ? Biblia zã nya “ŋutilã” le mɔ vovovowo nu. Ɣeaɖewoɣi la, ekuna ɖe míaƒe ametia ŋutɔ ŋu. (Rom. 2:28; 1 Kor. 15:39, 50) Ate ŋu aku ɖe ƒometɔwo hã ŋu. Yesu nye “David ƒe dzidzimevi le ŋutilã nu,” eye Paulo gblɔ tso Yudatɔwo ŋu be wonye ‘yeƒe ƒometɔwo le ŋutilã nu.’—Rom. 1:3; 9:3.

⁷ Ke hã, nu siwo Paulo ŋlɔ ɖe ta 7 lia me la kpe ɖe mía ŋu míese nu si wòwɔnɛ esi wòzã nya “ŋutilã” le Romatɔwo 8:4-13 la gɔme. Eƒe nyawo ɖee fia be kadodo le ‘agbenɔnɔ le ŋutilã nu’ kple “nu vɔ̃ ƒe dzodzro sesẽ” siwo ‘nɔ dɔ dzi le woƒe ŋutilãwo me’ la dome. (Rom. 7:5) Esia na míese nya si Paulo gblɔ be “ame siwo nɔa agbe ɖe ŋutilã nu la tsɔa woƒe susuwo ɖoa ŋutilã la ƒe nuwo ŋu” la gɔme. Le afi sia la, enɔ nu ƒom tso ame siwo ɖe mɔ woƒe nudzodzrowo kple amegbetɔ madeblibo ƒe didiwo kpɔ ŋusẽ ɖe wo dzi alo ame siwo tia nu mawo yome la ŋu. Ame siwo ɖia kɔ na woƒe ŋutilã ƒe nudzodzrowo, didiwo kple seselelãmewo, woɖanye esiwo ku ɖe gbɔdɔdɔ ŋu alo bubuwo o la koŋue wòwɔnɛ.

 8. Nu ka tae wòhiã be Paulo naxlɔ̃ nu Kristotɔ amesiaminawo tso ‘agbenɔnɔ le ŋutilã nu’ ŋu?

⁸ Gake ɖewohĩ awɔ yaa na wò be Paulo xlɔ̃ nu Kristotɔ amesiaminawo tso afɔku si le ‘agbenɔnɔ le ŋutilã nu’ me ŋu. Eye ɖe agbenɔnɔ le ŋutilãa nu ate ŋu anye afɔku na Kristotɔ siwo li egbea, ame siwo Mawu xɔ abe exɔlɔ̃wo ene, siwo wòbuna abe ame dzɔdzɔewo ene la hã? Nublanuitɔe la, Kristotɔ ɖe sia ɖe ate ŋu ava nɔ agbe nɔm ɖe nu vɔ̃ ŋutilãa ƒe nudzodzrowo nu. Le kpɔɖeŋu me, Paulo ŋlɔ bena nɔvi siwo nɔ Roma la dometɔ aɖewo va zu kluviwo “na woawo ŋutɔwo ƒe dzodzrowo”; esiawo ate ŋu anye gbɔdɔdɔ ƒe dzodzrowo loo alo dzodzro sẽŋu siwo nɔ wo me ɖe nuɖuɖu, nunono, alo nu bubuwo ŋu. Wo dometɔ aɖewo “blea ame siwo mele vɔ̃ aɖeke susum o la.” (Rom. 16:17, 18; Flp. 3:18, 19; Yuda 4, 8, 12) Ðo ŋku edzi hã be nɔviŋutsu aɖe si nɔ Korinto la “xɔ fofoa srɔ̃” hena ɣeyiɣi aɖe. (1 Kor. 5:1) Esia na míese nu si tae Mawu to Paulo dzi xlɔ̃ nu Kristotɔwo tso “susu ɖoɖo ŋutilã la ŋu” ŋuti la gɔme.—Rom. 8:5, 6.

 9. Nu kae Paulo ƒe aɖaŋuɖoɖo si dze le Romatɔwo 8:6 la mefia o?

⁹ Nuxlɔ̃ame ma gasɔ egbea hã. Ate ŋu adzɔ be Kristotɔ aɖe si subɔ Mawu ƒe geɖe la nava tsɔ eƒe susu aɖo ŋutilã ƒe nuwo ŋu. Esia meku ɖe Kristotɔ si bua nuɖuɖu, dɔwɔɖui, modzakaɖeɖe, alo eya kple srɔ̃a dome lɔlɔ̃nyawo ŋu ɣeaɖewoɣi la ŋu o. Emawo nye agbemenu siwo Mawu subɔla akpa gãtɔ wɔna. Yesu se vivi na nuɖuɖu, eye wòna nu ame bubuwo hã woɖu. Ekpɔe be ɖiɖiɖeme hiã. Eye Paulo ƒo nu tso akpa vevi si srɔ̃tɔwo dome lɔlɔ̃ wɔna le atsu kple asi dome ŋu.

10. Nu kae nya si nye be ‘woatsɔ susu aɖo nane ŋu’ si dze le Romatɔwo 8:5, 6 la fia?

¹⁰ Ke nu kae Paulo wɔnɛ esi wòƒo nu tso “susu ɖoɖo ŋutilã la ŋu” ŋuti? Helagbe me nya si Paulo zã la fia be “ame natsɔ eƒe susu alo dzi aɖo nane ŋu, ame nawɔ eƒe nuŋububu ŋutete ŋu dɔ, eye didi vevi si le eme ɖe nua ŋu koŋ tae.” Ame siwo nɔa agbe ɖe ŋutilã nu la ɖea mɔ woƒe nu vɔ̃ ŋutilãa kpɔa ŋusẽ ɖe woƒe agbenɔnɔ bliboa dzi. Agbalẽnyala aɖe ɖe nya ma si Paulo zã le Romatɔwo 8:5 la me be: “Wotsɔa woƒe susu ɖoa ŋutilã ƒe nuwo ŋu—wotsɔ ɖe le nu mawo me vevie, woƒoa nu tso wo ŋu enuenu, wokpɔa gome le wo me eye wokafua nu mawo.”

11. Nu siwo ŋu míate ŋu ava nɔ dzi tsim ɖo fũu akpa la dometɔ aɖewo ɖe?

¹¹ Esɔ be Kristotɔ siwo nɔ Roma la nadzro wo ɖokuiwo me akpɔ be nu kawo ŋue yewotsɔ yewoƒe susu ɖo vevie le agbe me hã. Ðe wòanye be “ŋutilã la ƒe nuwo” ŋue wova tsi dzi ɖo wua? Eye esɔ be míawo hã míadzro mía ɖokui me alea. Nu kae le vevie na mí wu, eye nu kawo ŋue míelɔ̃a nuƒoƒo tsoe? Nu kawo yome míenɔna gbe sia gbe? Ame aɖewo akpɔe be nu siwo ŋu yewotsia dzi ɖo ɣesiaɣie nye wain ƒomevi vovovo siwo yewoate kpɔ, ale si yewoaɖo atsyɔ̃ na yewo ƒeme, awu ƒe atsyãwo didi, dɔ si me yewoade gae akpɔ viɖe, ɖoɖowɔwɔ ɖe modzakaɖetsaɖiɖiwo ŋu, kple esiawo tɔgbi. Nu siawo megblẽ le wo ɖokui si o; woate ŋu anye agbemenuwɔna siwo sɔ. Le kpɔɖeŋu me, gbe ɖeka Yesu trɔ tsi wòzu wain, eye Paulo hã gblɔ na Timoteo be wòano “wain vi aɖe.” (1 Tim. 5:23; Yoh. 2:3-11) Gake ɖe Yesu kple Paulo siaa ‘ƒoa nu tso wain ŋu enuenu, nɔa enono dzi hekafunɛa’? Ðe wain dzroa wo veviea? Ðe ‘woƒoa nu le eŋu enuenua’? Ao. Ke míawo ya ɖe? Nu kae le vevie na mí wu le agbe me?

12, 13. Nu ka tae nu si ŋu míetsɔa susu ɖonɛ la nye ŋkubiãnya?

¹² Ðokuimedzodzro le vevie. Nu ka tae? Paulo gblɔ be: “Susu ɖoɖo ŋutilã la ŋu hea ku vanɛ.” (Rom. 8:6) Esia nye ŋkubiãnya, elabena efia be ehea gbɔgbɔmeku vanɛ fifia kple ku ŋutɔŋutɔ vanɛ le etsɔme. Ke hã, Paulo ƒe nyawo mefia be ne ame aɖe va le ‘susu ɖom ŋutilãa ŋu’ ko la, aku godoo o. Amea ate ŋu atrɔ. Bu ŋutsu agbe gbegblẽ nɔla si nɔ Korinto si dze “ŋutilã la” yome si wɔe be wòva hiã be woaɖee le haa me la ŋu kpɔ. Ate ŋu atrɔ eƒe agbenɔnɔ, eye ewɔe hã. Edzudzɔ agbenɔnɔ ɖe ŋutilãa nu eye wòtrɔ ɖe mɔ dzɔdzɔe ŋu.—2 Kor. 2:6-8.

¹³ Ne ŋutsu ma te ŋu trɔ eƒe agbenɔnɔ ɣemaɣi la, ke anya wɔ be Kristotɔ si li egbea hã natrɔ eƒe nɔnɔme, vevietɔ ame si medze ŋutilãa yome de keke afi si Korinto ŋutsu ma ɖo o. Eya ta ele vevie be nya si Paulo gblɔ tso nu si ate ŋu adzɔ ɖe ame si ‘tsɔa eƒe susu ɖoa ŋutilãa ŋu’ dzi mlɔeba ŋu la naʋã Kristotɔwo be woawɔ tɔtrɔ ɖe sia ɖe si hiã!

14, 15. (a) Le “susu ɖoɖo ŋutilã la ŋu” teƒe la, nu ka ŋue wòle be míatsɔ susu aɖo? (b) Nu kae wòfia be míatsɔ ‘susu aɖo gbɔgbɔ la ŋu’?

¹⁴ Esi apostoloa xlɔ̃ nu mí tso “susu ɖoɖo ŋutilã la ŋu” ŋuti megbe la, egblɔ dzideƒonya sia be: “Susu ɖoɖo gbɔgbɔ la ŋu hea agbe kple ŋutifafa vanɛ.” Agbe kple ŋutifafa—teƒeɖoɖo nyui ka gbegbee nye esi! Aleke míawɔ be teƒeɖoɖo ma nasu mía si?

¹⁵ Be ame natsɔ ‘susu aɖo gbɔgbɔ la ŋu’ mefia be wòaɖe susu ɖa keŋkeŋ le agbemenyawo ŋu o. Eye mefia hã be nu siwo ŋu wòle be wòabu alo aƒo nu tsoe la naku ɖe Biblia alo lɔlɔ̃ si le esi na Mawu kple mɔkpɔkpɔ si le esi ɖe etsɔme ŋu la ɖeɖe ko ŋu o. Ele be míaɖo ŋku edzi be Paulo kple Mawu subɔla bubu siwo nɔ anyi le ƒe alafa gbãtɔ me hã nɔ agbe abe ame bubuwo ke ene le go geɖe me. Woɖu nu no nu. Wo dometɔ geɖe ɖe srɔ̃ dzi viwo, eye wowɔ dɔ kpɔ wo ɖokuiwo dzi.—Marko 6:3; 1 Tes. 2:9.

16. Togbɔ be Paulo nɔ agbe abe ame bubuwo ke ene le go geɖe me hã la, nu kae nɔ vevie nɛ wu le agbe me?

¹⁶ Ke hã, Mawu subɔla mawo meɖe mɔ agbemenuwɔna mawo va nye nu vevitɔ na wo o. Esi ŋɔŋlɔawo gblɔ tso Paulo ŋu be enye avɔgbadɔwɔla vɔ la, ena míenya nu si koŋ nɔ vevie nɛ le agbe me: Eƒo eɖokui ɖe Kristotɔwo ƒe gbeƒãɖeɖe kple nufiafia dɔa me bliboe. (Xlẽ Dɔwɔwɔwo 18:2-4; 20:20, 21, 34, 35.) Eye nu siawo kee wòde dzi ƒo na nɔvi siwo nɔ Roma be woawɔ. Ɛ̃, gbeƒãɖeɖedɔa kple nu siwo do ƒome kple mawusubɔsubɔe nɔ vevie na Paulo le agbe me. Ehiã be Romatɔwo nasrɔ̃ eƒe kpɔɖeŋu.—Rom. 15:15, 16.

17. Ne ‘míetsɔ susu ɖo gbɔgbɔ la ŋu’ la, aleke agbea anɔ na mí?

¹⁷ Ne míetsɔ susu ɖo gbɔgbɔ la ƒe nuwo ŋu la, nu kae anye emetsonu? Romatɔwo 8:6 ɖo eŋu eme kɔ nyuie ale: “Susu ɖoɖo gbɔgbɔ la ŋu hea agbe kple ŋutifafa vanɛ.” Esia fia be míana gbɔgbɔ kɔkɔea nafia mɔ míaƒe susuwo eye míabu nuwo ŋu abe ale si Mawu bua woe ene. Kakaɖedzitɔe la, ne susu ɖoɖo “gbɔgbɔ la” ŋu nye nu vevitɔ na mí le agbe me la, míaƒe dzi adze eme eye taɖodzinu anɔ míaƒe agbe ŋu fifia gɔ̃ hã. Eye mlɔeba la, míakpɔ agbe mavɔ le dziƒo loo alo le anyigba dzi.

18. Ne ‘míetsɔ susu ɖo gbɔgbɔa ŋu’ la, mɔ ka nue esia hea ŋutifafa vanɛ le?

¹⁸ Mina míaƒe susu nanɔ nyateƒenya si nye be “susu ɖoɖo gbɔgbɔ la ŋu hea . . . ŋutifafa vanɛ” ŋu. Ame geɖe kua kutri be yewoakpɔ ŋutifafa ememetɔ. Esime wole agbagba dzem vevie be yewoakpɔ ŋutifafa sia la, esu míawo ya si xoxo. Nu si gbɔ ŋutifafa sia tsona dometɔ ɖekae nye agbagba si míedzena be míanɔ ŋutifafa me kple míaƒe ƒometɔwo kpakple hamea me tɔwo. Míeɖoa ŋku edzi be míawo ŋutɔwo kple mía nɔviwo siaa míede blibo o. Le esia ta la, masɔmasɔwo ado mo ɖa ɣeaɖewoɣi, eye ne edzɔ alea la, míewɔa Yesu ƒe aɖaŋuɖoɖo sia dzi be: “Wɔ ŋutifafa kple nɔviwòa.” (Mat. 5:24) Esia wɔwɔ nɔa bɔbɔe ne míeɖo ŋku edzi be nɔvi kemɛa hã le “Mawu si naa ŋutifafa” la subɔm.—Rom. 15:33; 16:20.

19. Ne míetsɔ susu ɖo gbɔgbɔa ŋu la, ŋutifafa tɔxɛ kae ate ŋu asu mía si?

¹⁹ Eye ŋutifafa bubu aɖe hã li si ŋu asixɔxɔ gãtɔ kekeake le. Ne ‘míetsɔ susu ɖo gbɔgbɔ la ŋu’ la, míenɔa ŋutifafa me kple mía Wɔla la. Yesaya gblɔ nya aɖe si va eme le blema eye wògale eme vam le mɔ si lolo wu nu egbea. Egblɔ tso Yehowa ŋu be: “Àkpɔ ame si ziɔ ɖe ŋuwò bliboe la ta; àna ŋutifafa si nɔa anyi ɖaa la wo, elabena ŋuwòe woɖo ŋu ɖo.”—Yes. 26:3; xlẽ Romatɔwo 5:1.

20. Nu ka tae nàda akpe ɖe aɖaŋuɖoɖo si le Romatɔwo ta 8 lia me ta?

²⁰ Eya ta míeɖanye amesiaminawo alo ame siwo le mɔ kpɔm be yewoanɔ agbe tegbee le paradiso me le anyigba dzi o, aɖaŋuɖoɖo si gbɔgbɔ ʋã Paulo wòŋlɔ le Romatɔwo ta 8 lia me ate ŋu aɖe vi na mí. Aleke gbegbe míedaa akpee nye esi be wode dzi ƒo na mí be míagana ‘susu ɖoɖo ŋutilã la’ ŋu nanye nu vevitɔ na mí le agbe me o! Míekpɔe be nunya le eme boŋ be míatsɔ susu aɖo gbɔgbɔa ŋu, elabena “susu ɖoɖo gbɔgbɔ la ŋu hea agbe kple ŋutifafa vanɛ.” Teƒeɖoɖo mavɔe míakpɔ ne míewɔ esia, elabena Paulo ŋlɔ bena: “Nu vɔ̃ ƒe fetue nye ku, ke Mawu ƒe amenuvevenunanae nye agbe mavɔ to Kristo Yesu mía Aƒetɔ la dzi.”—Rom. 6:23.