Minɔ “Mia Nɔewo Tum Ðo”

 1. Nu kae apostolo Paulo de dzi ƒo na mí be míawɔ le 1 Tesalonikatɔwo 5:11?

ÐE WOTU Fiaɖuƒe Akpata yeye na mi alo trɔ asi le mia tɔ xoxoa ŋu kpɔa? Ne nenemaea, ke ànya ɖo ŋku zi gbãtɔ si miewɔ kpekpe le eme dzi. Anɔ eme be dzi dzɔ wò ale gbegbe be aɖatsi lólo ɖe ŋku dzi na wò esime mienɔ ha dzim atsɔ adze kpekpea gɔme. Ðikeke mele eme o be èda akpe gã aɖe na Yehowa gbe ma gbe. Fiaɖuƒe Akpatawo nana wokafua Yehowa, eya ta míekpea asi ɖe wo tutu ŋu. Gake míekpea asi ɖe kpɔɖeŋuxɔtudɔ bubu aɖe si nana wokafua Yehowa geɖe wu la hã ŋu. Eyae nye be míatu mía nɔewo ɖo. Apostolo Paulo de esia ƒe dzi ƒo na mí le mawunyakpukpui si dzi wotu nyati sia ɖo me.—Xlẽ 1 Tesalonikatɔwo 5:11.

 2. Nu ka mee míadzro le nyati sia me?

² Paulo ɖo kpɔɖeŋu nyui aɖe le ale si míatu mía nɔviwo ɖo me. Le nyati sia mea, míakpɔ ale si wòkpe ɖe nɔviawo ŋu be (1) woado dzi le nɔnɔme sesẽwo me, (2) woana ŋutifafa nanɔ wo dome, eye (3) woagaxɔ Yehowa dzi se geɖe wu. Na míakpɔ ale si míasrɔ̃ eƒe kpɔɖeŋua be míatu mía nɔviwo ɖoe ɖa.—1 Kor. 11:1.

 3. Kpɔɖeŋu nyui kae Paulo ɖo le dɔwɔɖuia kple subɔsubɔdɔa me?

³ Paulo lɔ̃ nɔvia Kristotɔwo vevie. Eya ŋutɔ to xaxa geɖe me; eya ta ete ŋu se veve ɖe nɔvia Kristotɔ siwo nɔ nɔnɔme sesẽwo me tom la nu. Ɣeaɖeɣi esi ga vɔ le esia, eva hiã be wòawɔ dɔ akpɔ eya ŋutɔ kple ame siwo nɔ eŋu ƒe nuhiahiãwo gbɔ. (Dɔw. 20:34) Paulo nye avɔgbadɔwɔla. Eya ta esi wòyi Korintoa, ewɔ dɔ kple Akwila kple Priskila siwo hã nye avɔgbadɔwɔlawo. Gake le “sabat ɖe sia ɖe” dzia, eɖea gbeƒã na Yudatɔwo kple Helatɔwo. Emegbe esi Sila kple Timoteo va ɖoa, “Paulo tsɔ nya la gbɔgblɔ ɖo dɔ koŋ.” (Dɔw. 18:2-5) Paulo ɖoa ŋku edzi ɣesiaɣi be yeƒe taɖodzinu vevitɔ le agbe mee nye be yeasubɔ Yehowa. Kpɔɖeŋu nyui si wòɖo le subɔsubɔdɔa kple dɔwɔɖuia siaa mea wɔe be wòte ŋu de dzi ƒo na nɔvia Kristotɔwo. Eɖo ŋku edzi na wo be woagaɖe mɔ be agbemekuxiwo alo ƒomea dzi kpɔkpɔ nava xɔ nɔƒe gbãtɔ le woƒe agbe me o. Ke boŋ woana “nu siwo le vevie wu,” si nye Yehowa subɔsubɔ ƒe akpa vovovoawo katã, naxɔ nɔƒe gbãtɔ.—Flp. 1:10.

 4. Aleke Paulo kple Timoteo kpe ɖe nɔviawo ŋu wodo dzi le yometiti me?

⁴ Esi woɖo Tesalonika hamea megbe tetia, amewo tsi tsitre ɖe nɔviawo ŋu vevie eye wodi Paulo kple Sila be yewoalé, gake womekpɔ wo o. Eya ta wohe “nɔvi aɖewo yi dua me dziɖulawo gbɔ,” eye wodo ɣli be: “Ame siawo katã le tsitre tsim ɖe Kaisaro ƒe sewo ŋu.” (Dɔw. 17:6, 7) Ðeko wozu Kristotɔwo koe nye ema nu ma dzɔ ɖe wo dzi. Wò ya bu ale si woanya se le wo ɖokui me esime wokpɔe be dua me tɔwo trɔ ɖe yewo ŋu la ŋu kpɔ. Ele bɔbɔe be woavɔ̃ eye womagatsɔ dzo ɖe Yehowa subɔsubɔ ŋu o. Gake Paulo medi be esia nadzɔ ɖe wo dzi o. Eya ta hafi eya kple Sila nadzoa, wowɔ ɖoɖo aɖe si ado ŋusẽ nɔviawo ƒe xɔse. Paulo gblɔ na Tesalonika nɔviawo be: “Míedɔ [mía nɔvi] Timoteo be wòava do ŋusẽ mi, eye wòafa akɔ na mi le xɔse la me, ale be xaxa siawo nagaʋuʋu ame aɖeke o.” (1 Tes. 3:2, 3) Ðikeke mele eme o be Timoteo do dzi le yometiti me kpɔ le wo de Listra, eye ekpɔ ale si Paulo do ŋusẽ nɔviawo le afi ma kple ale si Yehowa kpe ɖe wo ŋu. Eya ta esu te nyuie ade dzi ƒo na Kristotɔ yeye siwo le Tesalonika be Yehowa akpe ɖe wo ŋu woado dzi.—Dɔw. 14:8, 19-22; Heb. 12:2.

 5. Aleke hamemetsitsi aɖe kpe ɖe Bryant ŋu, eye nu kae do tso eme?

⁵ Mɔ bubu ka nue Paulo do ŋusẽ nɔvia Kristotɔwo le? Biblia gblɔ be esi Paulo kple Barnaba trɔ yi Listra, Ikonio, kple Antiokia la, “woɖo hamemetsitsiwo . . . le hame ɖe sia ɖe me.” (Dɔw. 14:21-23) Ðikeke mele eme o be, hamemetsitsi mawo de dzi ƒo na nɔviawo ale gbegbe. Nenemae hamemetsitsi siwo li egbea hã wɔnɛ. Nɔvi aɖe si ŋkɔe nye Bryant gblɔ be: “Esi mexɔ ƒe 15 la, tɔnye gblẽ mí ɖi, eye woɖe nɔnye le haa me. Mese le ɖokuinye me be ame aɖeke meli nam o, eye dzi ɖe le ƒonye.” Nu kae kpe ɖe Bryant ŋu wòdo dzi? Egblɔ be: “Hamemetsitsi aɖe si ŋkɔe nye Tony ɖoa dze kplim le kpekpeawo me kple ɣeyiɣi bubuwo. Egblɔ Yehowa subɔla siwo kpɔ dzidzɔ esi wonɔ nɔnɔme sesẽwo me tom gɔ̃ hã la ŋu nya nam. Edzro Psalmo 27:10 me kplim. Eƒo nu tso ale si Hezekiya yi edzi wɔ nuteƒe togbɔ be tɔa meɖo kpɔɖeŋu nyui o la ŋu nam zi geɖe.” Aleke kpekpeɖeŋu si hamemetsitsia na Bryant la ɖe vi nɛ? Bryant gblɔ be: “Ale si Tony de dzi ƒo nam wɔe be mlɔebaa, meva le ɣeyiɣiawo katã ƒe subɔsubɔdɔa wɔm eye esia na mele dzidzɔ kpɔm ŋutɔ.” Hamemetsitsiwo, mina miaƒe ŋku nanɔ nɔviawo ŋu ne miate ŋu ade dzesi wo dometɔ siwo ahiã kpekpeɖeŋu abe Bryant ene, eye miagblɔ “nya nyui” aɖe atsɔ ade dzi ƒo na wo.—Lod. 12:25.

 6. Aleke Paulo zã Yehowa subɔla siwo nɔ anyi le blema ƒe ŋutinyawo tsɔ de dzi ƒo na nɔvia Kristotɔwo?

⁶ Paulo ɖo ŋku edzi na nɔviawo be Yehowa kpe ɖe esubɔla gbogbo aɖewo ŋu wodo dzi le nɔnɔme sesẽ vovovowo me. (Heb. 12:1) Paulo nyae be ame siwo do dzi le nɔnɔme sesẽwo me le blema ƒe ŋutinyawo ate ŋu ade dzi ƒo na nɔviawo eye wòakpe ɖe wo ŋu woƒe susu nanɔ “Mawu gbagbe la ƒe du” la ŋu. (Heb. 12:22) Nenema tututue wòle egbea hã. Ne míexlẽ Gideon, Barak, Samuel kple bubuawo ƒe ŋutinya eye míekpɔ ale si Yehowa kpe ɖe wo ŋua, ɖe medoa ŋusẽ míaƒe xɔse ŋutɔ oa? (Heb. 11:32-35) Mía nɔvi siwo li egbea hã ƒe ŋutinyawo doa ŋusẽ mí. Nɔvi geɖewo ŋlɔa lɛta ɖo ɖe míaƒe dɔwɔƒegãa tsɔ daa akpe ɖe ŋutinya aɖe si woxlẽ wòdo ŋusẽ wo ta.

 7. Nu kae nèsrɔ̃ tso aɖaŋu si Paulo ɖo le Romatɔwo 14:19-21 me?

⁷ Míetua mía nɔviwo ɖo eye míewɔa nu siwo ana ŋutifafa nanɔ hamea me. Esia taa, ne míaƒe susu to vovo le nya aɖe ŋua, míeɖea mɔ esia dea mama mía me o. Eye mímetea tɔ ɖe edzi be mía nɔviwo nawɔ ɖe míaƒe susu dzi ne wo tɔ meda le Biblia ƒe se aɖeke dzi o. Bu kpɔɖeŋu sia ŋu kpɔ: Yudatɔwo kple Dukɔwo me tɔ siwo va zu Kristotɔwo siaa nɔ Roma hamea me. Esi Kristotɔwo mele Mose ƒe Sea te o taa, mehiã be woawɔ ɖe se si wode ku ɖe nuɖuɖu aɖewo ŋu dzi o. (Marko 7:19) Esia ta Yudatɔ siwo va zu Kristotɔwo dometɔ aɖewo te ŋu ɖua nu sia nu faa, gake bubuwo ya kpɔe be mesɔ o. Nya sia de mama hamea me. Eya ta Paulo te gbe ɖe edzi be ele vevie be woana ŋutifafa nanɔ anyi. Egblɔ be: “Enyo be nàgaɖu lã, ano wain, alo awɔ nane si aɖia nɔviwò nu o.” (Xlẽ Romatɔwo 14:19-21.) Paulo to esia dzi kpe ɖe nɔviawo ŋu wokpɔe be nyahehe siawo ate ŋu agblẽ nu le ame ɖekaɖekawo kple hame bliboa ŋu. Eya ŋutɔ hã wɔ tɔtrɔwo be yeagaɖia amewo nu o. (1 Kor. 9:19-22) Togbɔ be mía kple mía nɔviwo ƒe susu ate ŋu ato vovo le nya aɖewo ŋu hãa, míate ŋu atu wo ɖo eye míana ŋutifafa nanɔ anyi ne mímehea nya kpli wo o.

 8. Aleke Paulo wɔ nui esi nya sesẽ aɖe do mo ɖa le Kristo hamea me?

⁸ Paulo ɖo kpɔɖeŋu nyui aɖe le ale si woawɔ nu ne amewo ƒe susu to vovo le nya vevi aɖe ŋu me. Le kpɔɖeŋu me, le ƒe alafa gbãtɔ mea, hamea me tɔ aɖewo nɔ tɔ tem ɖe edzi be ele be Dukɔwo me tɔ siwo va zu Kristotɔwo natso aʋa, ɖewohĩ kple susu be Yudatɔwo nagatsɔ nya ɖe wo ŋu o. (Gal. 6:12) Paulo meda asi ɖe woƒe susua dzi kura o, gake mezi eƒe susu ɖe wo dzi o. Ke boŋ ebɔbɔ eɖokui eye wòɖo nyaa ɖe apostoloawo kple hamemetsitsiawo le Yerusalem. (Dɔw. 15:1, 2) Ale si Paulo wɔ nui la na ŋutifafa nɔ Kristo hamea me eye nɔviawo yi edzi subɔ Yehowa kple dzidzɔ.—Dɔw. 15:30, 31.

 9. Aleke míate ŋu asrɔ̃ Paulo ƒe kpɔɖeŋua?

⁹ Ne nya sesẽ aɖe do mo ɖa le hamea mea, míedia mɔfiafia tso ame siwo Yehowa ɖo mía nu la gbɔ. Zi geɖea, habɔbɔa naa mɔfiame siawo mí to míaƒe Biblia-srɔ̃gbalẽwo kple mɔnu bubuwo dzi. Ne míewɔna ɖe mɔfiame mawo dzi eye míetea tɔ ɖe míaƒe susuwo dzi oa, míakpe asi ɖe eŋu be ŋutifafa nanɔ hamea me.

10. Nu bubu kae Paulo wɔ tsɔ do ŋutifafa ɖe ŋgɔ le hamea me?

¹⁰ Nu bubu si Paulo wɔ tsɔ do ŋutifafa ɖe ŋgɔe nye be ehe susu yi nɔviawo ƒe nɔnɔme nyuiwo dzi, ke menye woƒe gbɔdzɔgbɔdzɔwo o. Le kpɔɖeŋu me, le lɛta si wòŋlɔ na Romatɔwo ƒe nuwuwua, eyɔ nɔvi geɖe ŋkɔ eye wògblɔ nya nyuiwo tso wo ŋu. Míate ŋu asrɔ̃ Paulo akafu mía nɔviwo ɖe woƒe nɔnɔme nyuiwo ta eye míaƒo nu nyui tso wo ŋu na amewo. Ne míewɔe alea, ana mía nɔviwo dome nanɔ kplikplikpli eye míatu mía nɔewo ɖo le hamea me.

11. Ne masɔmasɔ aɖe do mo ɖaa, nu kae míate ŋu awɔ be ŋutifafa nava?

¹¹ Ɣeaɖewoɣia, ate ŋu adzɔ be masɔmasɔ naɖo Kristotɔ siwo tsi le xɔse me gɔ̃ hã dome alo woaʋli nya kple wo nɔewo vevie. Esia dzɔ ɖe Paulo kple exɔlɔ̃ vevi Barnaba dzi. Gbe ɖekaa, eva hiã be woana Marko nakplɔ wo ɖo le dutanyanyuigbɔgblɔdɔa me, gake woƒe susu mewɔ ɖeka le nya sia ŋu o. “Wodo dɔmedzoe ɖe wo nɔewo ŋu vevie” eye woma mɔ. (Dɔw. 15:37-39) Gake Paulo, Barnaba kple Marko va kpɔ nyaa gbɔ eye esia ɖee fia be hamea ƒe ŋutifafa kple ɖekawɔwɔ nɔ vevie na wo. Emegbea, Paulo ƒo nu nyui tso Barnaba kple Marko ŋu. (1 Kor. 9:6; Kol. 4:10) Ne masɔmasɔ aɖe ɖo mía kple nɔvi aɖe domea, ehiã be míakpɔ egbɔ kaba eye míayi edzi atsɔ susu aɖo nɔvia ƒe nɔnɔme nyuiwo ŋu. Ne míewɔe alea, ke míele ŋutifafa kple ɖekawɔwɔ dom ɖe ŋgɔ.—Ef. 4:3.

12. Nɔnɔme kawo me tom nɔvi aɖewo le?

¹² Míate ŋu atu mía nɔviwo ɖo ne míekpena ɖe wo ŋu be woƒe xɔse nasẽ. Nɔvi aɖewo ƒe sukuhatiwo, dɔwɔhatiwo alo ƒometɔ siwo menye Ðasefowo o la ɖua fewu le wo ŋu. Nɔvi aɖewo hã ƒe lãme gblẽ vevie, eye ɖewo ƒe dzi gbã. Ðewo hã le Yehowa subɔm ƒe gbogbo aɖewoe nye esia eye wole mɔ kpɔm ɣeyiɣi didi aɖee nye esia be nuwuwua nava. Nu siawo ate ŋu ado Kristotɔ ƒe xɔse kpɔ egbea. Ƒe alafa gbãtɔ me Kristotɔwo hã to nɔnɔme siawo tɔgbi me. Aleke Paulo do ŋusẽ woe?

13. Aleke Paulo kpe ɖe Kristotɔ siwo ŋu woɖu fewu le le woƒe dzixɔse ta la ŋu?

¹³ Paulo zã Ŋɔŋlɔawo tsɔ do ŋusẽ nɔvia Kristotɔwo ƒe xɔse. Le kpɔɖeŋu me, ɖewohĩ esesẽ na Yudatɔ siwo va zu Kristotɔwo be woaɖe nu me na woƒe ƒometɔ siwo gblɔna be Yuda-subɔsubɔ nyo wu Kristotɔnyenye. Lɛta si Paulo ŋlɔ na Hebritɔwo la anya do ŋusẽ Kristotɔ mawo. (Heb. 1:5, 6; 2:2, 3; 9:24, 25) Woate ŋu azã eƒe numeɖeɖewo atsɔ aɖo nya ŋu na woƒe ƒometɔwo. Egbea hãa, amewo ɖua fewu le mía nɔvi Kristotɔ aɖewo ŋu. Míate ŋu azã míaƒe Biblia-srɔ̃gbalẽwo atsɔ akpe ɖe wo ŋu woaɖe nu me na amewo. Eye ne wokoa mía nɔvi sɔhɛ aɖe le eƒe dzixɔsewo taa, míate ŋu akpe ɖe eŋu wòaku nu me le míaƒe agbalẽwo me ale be wòagaka ɖe Biblia ƒe nufiafiawo dzi geɖe wu eye wòate ŋu aɖe nu me na amewo.

14. Togbɔ be Paulo ƒe ŋku biã ɖe gbeƒãɖeɖe kple nufiafia dɔa ŋu hãa, nu kae wòte ŋu wɔ?

¹⁴ Paulo de dzi ƒo na nɔvia Kristotɔwo be woato “dɔ nyuiwo wɔwɔ” me aɖe lɔlɔ̃ afia. (Heb. 10:24) Nya siwo Paulo gblɔ na nɔviawo kple mɔfiame siwo wòna wo kpe ɖe wo ŋu ŋutɔ. Gake ewɔ nu ŋutɔŋutɔ aɖewo hã tsɔ kpe ɖe wo ŋu. Le kpɔɖeŋu me, esi dɔ to le Yudea, Paulo kpe asi ɖe eŋu be wotsɔ nuhiahiã vevi aɖewo yi na nɔviawo le afi ma. (Dɔw. 11:27-30) Togbɔ be Paulo ƒe ŋku biã ɖe gbeƒãɖeɖe kple nufiafia dɔa ŋu hãa, edina ɣesiaɣi be yeawɔ nane atsɔ akpe ɖe nɔvi siwo hiã tu la ŋu. (Gal. 2:10) Esia wɔe be nɔviawo gaka ɖe Yehowa dzi geɖe wu be alé be na yewo. Egbea, míawo hã míate ŋu ado ŋusẽ mía nɔviwo ƒe xɔse ne míezãa míaƒe ɣeyiɣi, ŋusẽ kple ŋutetewo tsɔ kpea asi ɖe kpekpeɖeŋunadɔwo ŋu, eye míedzɔa nu tsɔ kpea asi ɖe xexea me katã ƒe dɔa ŋu edziedzi. Míetoa mɔ sia kple bubuwo dzi kpena ɖe mía nɔviwo ŋu wogakana ɖe edzi geɖe wu be Yehowa magblẽ yewo ɖi gbeɖe o.

15-16. Aleke wòle be míawɔ nu ɖe ame siwo ƒe xɔse gbɔdzɔ ŋu?

¹⁵ Paulo megblẽ ame siwo ƒe xɔse gbɔdzɔ la ɖi o. Ese nu gɔme na wo eye wòƒo nu na wo veveseɖeamenutɔe tsɔ tu wo ɖo. (Heb. 6:9; 10:39) Le kpɔɖeŋu me, le lɛta si wòŋlɔ na Hebritɔwo mea, ezã nya “mí” enuenu tsɔ ɖee fia be ehiã be ye ŋutɔ hã yeawɔ ɖe aɖaŋu siwo ɖom yele dzi. (Heb. 2:1, 3) Abe Paulo enea, míegblẽa mía nɔvi siwo ƒe xɔse gbɔdzɔ ɖi o, ke boŋ míelɔ̃a wo eye míetsɔa ɖe le eme na wo vevie. Esia dea dzi ƒo na wo ŋutɔ. Azɔ hã esi wònye míaƒe nyawo kple ale si míegblɔa woe siaa le vevie taa, anyo be míaƒo nu na wo veveseɖeamenutɔe be wòatu wo ɖo.

¹⁶ Paulo ka ɖe edzi na nɔviawo be Yehowa nya agbagba siwo wodze le subɔsubɔdɔa me. (Heb. 10:32-34) Míawo hã míate ŋu awɔe alea ne míele kpekpem ɖe nɔvi aɖe si ƒe xɔse gbɔdzɔ ŋu. Míate ŋu ade dzi ƒo nɛ be wòade ŋugble le ale si wòwɔ va nyateƒea me alo ɣeyiɣi siwo me wòkpɔ Yehowa ƒe asi le eƒe agbe me ŋu. Míate ŋu aka ɖe edzi nɛ be Yehowa meŋlɔ subɔsubɔdɔ si lɔlɔ̃ ʋãe wòwɔ va yi la be o, eye magblẽe ɖi akpɔ o. (Heb. 6:10; 13:5, 6) Dzeɖoɖo siawo tɔgbi ate ŋu akpe ɖe mía nɔvi lɔlɔ̃ siawo ŋu be woagana ta o.

17. Nu ka mee wòhiã be míaku kutri le?

¹⁷ Xɔtudɔwɔla si kua kutri le eƒe dɔ me gabina ɖe edzi. Nenema kee ne míawo hã míekua kutri be míatu mía nɔewo ɖoa, míagava bi ɖe ewɔwɔ me. Míedoa ŋusẽ mía nɔviwo be woado dzi ne míegblɔa ame siwo do dzi va yi la ƒe ŋutinyawo na wo. Míedoa ŋutifafa ɖe ŋgɔ ne míekafua mía nɔviwo ɖe woƒe nɔnɔme nyuiwo ta, míeƒoa nu nyui tso wo ŋu na ame bubuwo, míetoa míaƒe nuƒoƒo kple nuwɔna dzi nana ŋutifafa nɔa hamea me, eye míekpɔa mía kple mía nɔviwo dome masɔmasɔwo gbɔ. Azɔ hã, míedoa ŋusẽ mía nɔviwo ƒe xɔse ne míehea woƒe susu yia Biblia me nyateƒenya veviwo dzi, míekpena ɖe wo ŋu ne woɖo hiã me, eye míedea dzi ƒo na wo dometɔ siwo ƒe xɔse gbɔdzɔ.

18. Nu kae nèɖo kplikpaa be yeawɔ?

¹⁸ Ame siwo kpea asi ɖe teokrasixɔtudɔwo ŋu la kpɔa dzidzɔ geɖe. Nenema kee míekpɔ dzidzɔ geɖe ne míetu mía nɔviwo ɖo le hamea me. Xɔwo ate ŋu ava mu gbe ɖeka, gake ne míetu mía nɔviwo ɖoa, aɖe vi na wo tso fifia yi ɖe mavɔmavɔ me! Mina míaɖoe kplikpaa be ‘míanɔ dzi dem ƒo na mía nɔewo, eye míanɔ mía nɔewo tum ɖo.’—1 Tes. 5:11.