TATA SI MÍESRƆ̃NA

Yehowa ƒe amewo le ŋutifafa ƒe nɔnɔme tɔxɛ aɖe me le eƒe habɔbɔa ƒe akpa si le anyigba dzi me. Aleke míaɖee afia be míedaa akpe ɖe tadedeagu vavãtɔ ƒe ɖoɖo si Mawu wɔ na mí la ta, eye nu kae mía dometɔ ɖe sia ɖe ate ŋu awɔ atsɔ ado ŋutifafa ƒe nɔnɔme sia ɖe ŋgɔ? Míakpɔ biabia siawo ƒe ŋuɖoɖowo le nyati sia me.

Nyati sia ɖe nu dodzidzɔname aɖewo siwo adzɔ kpuie me. Hekpe ɖe eŋu la, míakpɔ nu si ta wòle be mía dometɔ ɖe sia ɖe nayi edzi aka ɖe Yehowa dzi bliboe le xaxa gã la gɔ̃ hã me.

Ame siwo le Satana ƒe xexea me dometɔ akpa gãtɔ dea woƒe dukɔ, gbegbɔgblɔ, alo dekɔnu dzi vevie. Gake míawo ya míedo ŋugbe be míanɔ Yehowa ƒe akpa dzi. Nyati sia dzro nu si ta míedea akpa aɖeke dzi le xexe sia ƒe nyaʋiʋliwo me o, kple ale si míamla mía ɖokuiwo be míabu nuwo ŋu abe ale si Yehowa kple Yesu bua woe ene la me.

Yehowa ƒe ame siwo le xexea me godoo kpena le Fiaɖuƒe Akpatawo me kple teƒe bubuwo hesubɔnɛ. Nyati sia ana míakpɔ Biblia ƒe mɔfiame siwo akpe ɖe mía ŋu be míade bubu míaƒe tadeaguƒewo ŋu, míadzɔ nu tso dzi me faa, eye míalé be na akpataa ahadzra nu siwo gblẽ la ɖo be wòanye kafukafu na Yehowa.