Alesi Xexeame Ava Wɔ Ðekae

AMEGBETƆWO ƒe agbagbadzedze be yewoaɖu yewo ɖokui dzi wòadze edzi la do kpo nu keŋkeŋ. Ðikekemanɔmee la, àlɔ̃ ɖe nya sia siwo tso gbɔgbɔ me la dzi be: “Amegbetɔ ɖua fia ɖe ame bubuwo dzi hena woƒe dzɔgbevɔ̃e.” (Nyagblɔla 8:9) Nukatae amegbetɔwo do kpo nu nublanuitɔe le wo ɖokui dzi ɖuɖu me alea?

Biblia gblɔ nusitae esi wògblɔ be: “Ŋutsu ƒe zɔzɔme la menye eya ŋutɔ si me wòle, ne eƒe azɔlime nato mɔ ɖeka o.” (Yeremya 10:23) Ao, menye amegbetɔ ƒe ŋusẽ alo eƒe gomee wònye be wòaɖu eya ŋutɔ ɖokui alo ehavi amegbetɔ dzi o. Mía Wɔla, Yehowa, ƒe gome tɔxɛe wònye, eya amesi ŋu wogblɔ le na mí be: “Yehowa enye míaƒe ʋɔnudrɔ̃la, Yehowa enye míaƒe aʋafia, Yehowa enye míaƒe fia.”—Yesaya 33:22.

Ne amewo katã va lɔ̃ ɖe edzi be Yehowa Mawue nye Dziɖula ko hafi ɖekawɔwɔ ava xexeame. Gake ɖe nu ma adzɔ gbaɖegbea? Ɣeyiɣi didi aɖee nye sia si Mawu ƒe nyagblɔɖila aɖe ƒo nu tso “ŋkeke mlɔeawo” ŋu esime ame geɖe atrɔ ɖe Yehowa ŋu hena mɔfiame xɔxɔ.

Xexeame Katã ƒe Ŋutifafa si ŋu Nya Wogblɔ Ði

Nyagblɔɖila Yesaya ŋlɔe be: “Ava me le ŋkeke mlɔeawo me be, Yehowa ƒe aƒe ƒe to la akɔ ta agbɔ towo ŋu, . . . eye anyigba dzi dukɔwo katã aƒo zi ɖe eŋu. Eye dukɔ geɖewo atso agblɔ bena: Mina míayi Yehowa ƒe to la, Yakob ƒe Mawu ƒe aƒe la gbɔ, ne wòafia nu mí le eƒe mɔwo ŋu.” Ne míexlẽe yi edzi la, míakpɔ nusi dona tso mɔfiame xɔxɔ tso Yehowa gbɔ me. Nyagblɔɖia yi edzi be: “Woatsɔ woƒe yiwo atu kodziwoe, eye woatsɔ woƒe akplɔwo atu hɛ gobɛwoe; dukɔ magatsɔ yi ɖe dukɔ ŋu azɔ o, eye womagasrɔ̃ aʋawɔwɔ hã azɔ o.”—Yesaya 2:2-4.

Ẽ, nusi ado tso Mawu ƒe nufiafia ŋudɔwɔwɔ mee nye be ana dzrewɔwɔ, dukɔmevinyenye ƒe ŋutasesẽnuwɔwɔ, kple aʋawɔwɔ maganɔ anyi o. Dziɖula siwo nye amegbetɔwo susu be yewoate ŋu ana Biblia ƒe nyagblɔɖi sia nava eme eye woŋlɔ eƒe akpa mamlea gɔ̃ hã ɖe Dukɔ Ƒoƒuawo ƒe Dɔwɔƒegã si le New York Dugã me ƒe Ablɔgã ƒe gli ŋu. Gake ɖeko dukɔmeviʋawɔwɔwo kple gbevovovodolawo dome ʋawɔwɔwo kpakple fuléle dzi ɖe edzi va ɖo ƒe 1993 ƒe nuwuwu ke. Eyata ɖe nàgblɔ be Mawu ƒe nyagblɔɖia do kpo emevavaa?

Ao, medo kpo emevava o—elabena fifi laa la, amewo tso dukɔwo katã me le zi ƒom ɖe Yehowa ƒe aƒe la ŋu be Mawu nafia nu yewo. Le nyateƒe me la, ɖaseɖiɖi gã kae nye si Yehowa Ðasefowo ƒe “Mawu ƒe Nufiafia” Nutome Gã Takpekpe siwo wowɔ le dzomeŋɔli sia la nye le nyagblɔɖi sia ƒe emevava me! Yehowa Ðasefowo ƒe xexeame katã ƒe nɔviwo ƒe habɔbɔ meɖea mɔ naneke na woléa fu wo nɔewo alo awu wo nɔewo o—eɖanye ameƒomevinyenye, dukɔmevinyenye, alo gbegbɔgblɔ ƒe vovototo ye o. Wotsɔ woƒe yiwo tu kodziwoe, eye wotsɔ woƒe akplɔwo tu hɛ gobɛwoe le kpɔɖeŋumɔ nu.

Ame aɖe agblɔ be, ‘Gake màte ŋu akpɔ mɔ be amesiame awɔ ɖe Mawu ƒe nufiame be míalɔ̃ mía nɔewo la dzi o ɖe.’ Togbɔ be esia nye nyateƒe hã la, ŋusẽ le Mawu si be wòaɖe amesiwo katã mewɔa eƒe lɔlɔ̃nu o la ɖa.

Nusi Mawu Awɔ

Ðe nèdoa gbe ɖa abe alesi Yesu fia eyomedzelawo be woado gbe ɖae be: “Mía Fofo, si le dziƒowo! Wò ŋkɔ ŋuti nakɔ! Wò fiaɖuƒe nava! Woawɔ wò lɔlɔ̃nu le anyigba dzi, sigbe alesi wowɔna le dziƒo” la enea? (Mateo 6:9, 10) Ne èdonɛ ɖa la, ke àte ŋu aka ɖe edzi be míaƒe Dziƒofofo lɔlɔ̃tɔ la aɖo gbedodoɖa ma ŋu. Aleke wòle esia wɔ gee?

Mawu ɖo Via si nye “Ŋutifafafia” la xoxo be wòanye yeƒe “dziɖuɖu” si nye Fiaɖuƒe si wofia mí be míado gbe ɖa abia la ƒe dziɖula si yetia. (Yesaya 9:5) Míehiã gbɔgbɔmedziɖula si kɔ wu amegbetɔwo alea, elabena eya ɖeɖekoe ate ŋu aɖe amegbetɔwo le Satana kple eƒe gbɔgbɔ vɔ̃wo ƒe ŋusẽkpɔɖeamedzi vɔ̃ɖiawo si me. Aleke ke amegbetɔwo ƒe dziɖulawo ɖoe o, womate ŋui o.—Yohanes I, 3:8; Nyaɖeɖefia 12:7-12.

Gake nukae adzɔ ɖe egbegbe dziɖuɖu siwo gbe be yewomabɔbɔ ɖe Mawu ƒe dziɖulanyenye te o la dzi? Biblia me nyagblɔɖi bubu si ƒo nu tso Fiaɖuƒe si Yesu fia mí be míado gbe ɖa abia ŋu la gblɔ be: “Dziƒo ƒe Mawu la aɖo fiaɖuƒe aɖe anyi, si matsrɔ̃ gbeɖegbeɖe o, . . . [Mawu ƒe Dziƒofiaɖuƒea] agbã fiaɖuƒe mawo katã, eye wòagblẽ wo, ke eya ŋutɔ anɔ anyi tegbee.” Eyata gbedodoɖa be Mawu ƒe Fiaɖuƒe nava la fia be míele gbe dom ɖa be dziɖuɖu ɖeka si anɔ “Ŋutifafafia” la te la naɖu xexeame katã dzi.—Daniel 2:44; Yesaya 9:5.

Ekema ne woƒo ameƒomea nu ƒu le ŋutifafa me ɖe Mawu ƒe Fiaɖuƒea te la, amesiame alɔ̃ nɔvia eɖanye ameƒomevi alo dukɔ ka mee wotso o. Dzidzɔɣeyiɣi kae nye si wòanye ɣemaɣi! (Nyaɖeɖefia 21:3, 4) Míele kpewòm be nàse vivi le ŋutifafaɣeyiɣi ma me fifia gɔ̃ hã le Yehowa Ðasefowo dome eye nàwɔ ɖeka kple wo ne miakpɔ mɔ na ɣeyiɣi si me xexeame katã awɔ ɖeka le ŋutifafa me.

[Nɔnɔmetata si le axa 15]

Mawu ƒe Fiaɖuƒea ana amewo katã nawɔ ɖeka le ŋutifafa me