Ta Enelia
Wodo Yehowa ƒe Aƒea Ðe Dzi
1, 2. Nya kawoe woŋlɔ ɖe gli ŋu le Dukɔ Ƒoƒuawo ƒe dɔwɔƒe, eye afikae wokpɔ nya mawo tsoe?
“WOATSƆ woƒe yiwo atu kodziwoe, eye woatsɔ woƒe akplɔwo atu hɛ gobɛwoe; dukɔ magatsɔ yi ɖe dukɔ ŋu azɔ o, eye womagasrɔ̃ aʋawɔwɔ hã azɔ o.” Woŋlɔ nya siawo ɖe gli ŋu le Dukɔ Ƒoƒuawo ƒe dɔwɔƒegã le New York City. Womegblɔ afisi woyɔ nya mawo tsoe o ƒe bla nanewo. Esi Dukɔ Ƒoƒuawo ƒe taɖodzinue nye be yewoadze agbagba ana ŋutifafa nanɔ xexeame katã ta la, ele bɔbɔe be amewo nagblɔ be Dukɔ Ƒoƒuawo gɔmeɖolawoe to nya mawo vɛ le ƒe 1945 me.
2 Gake le ƒe 1975 me la, woɖe ŋkɔ Yesaya ɖe glia ŋu le nyayɔyɔa te. Ɣemaɣie wòva dze be menye egbegbenyawoe o. Le nyateƒe me la, wonye nyagblɔɖi si woŋlɔ ƒe 2,700 kple edzivɔ enye si va yi ɖe afisi nye Yesaya ƒe agbalẽa ƒe ta 2 lia fifia. Ƒe akpe geɖe enye sia si ŋutifafalɔ̃lawo bu alesi nya siwo Yesaya gblɔ ɖi ava eme kple ɣeyiɣi si woava eme ŋu. Megahiã fifia be woabu eŋu o. Egbea mía ŋutɔwo míele blemanyagblɔɖi sia me vava ɖedzesia teƒe kpɔm.
3. Dukɔ kawoe tsɔ woƒe yiwo tu kodziwoe?
3 Amekawoe nye dukɔ siwo tsɔ woƒe yiwo tu kodziwoe? Edze ƒã be womenye egbeŋkekea me dunyahedukɔ alo dziɖuɖu aɖekee o. Vaseɖe fifia la, dukɔ siawo tua yiwo, alo aʋawɔnuwo, be yewoatsɔ awɔ aʋae agatsɔ alé “ŋutifafa” ɖe te akpasesẽtɔe. Ne míagblɔe ŋutɔŋutɔ la, dukɔwo dina ɣesiaɣi be yewoatsɔ yewoƒe kodziwo atu yiwo boŋ! Ame aɖewo siwo tso dukɔwo katã me boŋ dzie Yesaya ƒe nyagblɔɖia le eme vam ɖo, amesiwo dea ta agu na Yehowa, “ŋutifafa Mawu la.”—Filipitɔwo 4:9.
Dukɔ Siwo Ƒo Zi Ðe Tadedeagu Dzadzɛ Ŋu
4, 5. Nukae Yesaya ta 2 lia ƒe kpukpui gbãtɔwo gblɔ ɖi, eye nukae ɖo kpe kakaɖedzi si le nya mawo ŋu dzi?
4 Yesaya ta 2 lia dze egɔme kple nya siawo be: “Nya, si Yesaya, Amoz vi la, kpɔ le Yuda kple Yerusalem ŋu la enye si: Ava me le ŋkeke mlɔeawo me be, Yehowa ƒe aƒe ƒe to la akɔ ta agbɔ towo ŋu, eye wòaƒo togbɛwo ta, eye anyigba dzi dukɔwo katã aƒo zi ɖe eŋu.”—Yesaya 2:1, 2.
5 De dzesii be nya si Yesaya gblɔ ɖi la menye nusi wobu le susu me dzro ko o. Wogblɔ na Yesaya be wòaŋlɔ nusiwo “ava eme”—godoo—la ɖi. Yehowa ƒe tameɖoɖo ɖesiaɖe ‘vaa eme godoo.’ (Yesaya 55:11) Edze ƒã be esi Mawu di be yeate gbe ɖe kakaɖedzi si le eƒe ŋugbedodoa ŋu dzi ta la, eƒe gbɔgbɔ ʋã nyagblɔɖila Mixa si nɔ agbe le Yesaya ƒe ɣeyiɣia me wòŋlɔ nyagblɔɖi ma ke si le Yesaya 2:2-4 la ɖi.—Mixa 4:1-3.
6. Ɣekaɣie Yesaya ƒe nyagblɔɖia ava eme?
6 Ɣekaɣie Yesaya ƒe nyagblɔɖia ava eme? “Le ŋkeke mlɔeawo me.” New International Version xlẽ be: “Le ŋkeke mamlɛawo me.” Kristotɔwo ƒe Hela Ŋɔŋlɔawo gblɔ nudzɔdzɔ siwo ade dzesi ɣeyiɣi sia ɖi. Wo dometɔ aɖewoe nye aʋawɔwɔ, anyigbaʋuʋu, dɔvɔ̃wo, dɔwuame, kple “ɣeyiɣi vɔ̃wo.”a (Timoteo II, 3:1-5; Luka 21:10, 11) Nyagblɔɖi siawo me vava ɖo kpe edzi wòdze ƒã be míele “ŋkeke mlɔeawo me,” si nye fifi xexemenuɖoanyia ƒe ŋkeke mamlɛawo. Ekema esɔ be míakpɔ mɔ be nusiwo Yesaya gblɔ ɖi ava eme le míaƒe ɣeyiɣia me.
To si Dzi Woade Ta Agu Le
7. Nɔnɔme kae Yesaya ɖɔ wònye nyagblɔɖi?
7 Yesaya zã nya ʋɛ aɖewo tsɔ ɖɔ nɔnɔme aɖe si nye nyagblɔɖi. Míekpɔ to kɔkɔ aɖe si dzi aƒe dzeani aɖe si nye Yehowa ƒe gbedoxɔ la le. To sia kɔ gbɔ to kple togbɛ siwo ƒo xlãe ŋu. Gake meɖi vɔvɔ̃ alo doa ŋɔdzi na ame o; ɖe wònya kpɔ boŋ. Dukɔwo katã me tɔwo di be yewoalia ayi Yehowa ƒe aƒe ƒe toa dzi; wole zi ƒom ɖe eŋu. Ele bɔbɔe be míakpɔ nusia le susu me, gake nukae wòfia?
8. (a) Nukae wowɔna le togbɛwo kple towo dzi le Yesaya ƒe ŋkekea me? (b) Nukae dukɔwo ƒe ziƒoƒo ɖe “Yehowa ƒe aƒe ƒe to” la ŋu tsi tre ɖi na?
8 Wozãa togbɛ kple towo ɖe tadedeagu ŋu zi geɖe le Yesaya ƒe ŋkekea me. Le kpɔɖeŋu me, teƒe mawoe wodea ta agu na legbawo hetu gbedoxɔwo na alakpamawuwo le. (Mose V, 12:2; Yeremya 3:6) Gake Yehowa ƒe aƒe, alo gbedoxɔ, ɖo atsyɔ̃ na Moria Toa tame le Yerusalem. Israel-vi nuteƒewɔlawo yia Yerusalem zi etɔ̃ ƒe sia ƒe eye woliaa Moria Toa ɖadea ta agu na Mawu vavã la. (Mose V, 16:16) Eyata dukɔwo ƒe ziƒoƒo ɖe “Yehowa ƒe aƒe ƒe to” la ŋu fia ame geɖe nu ƒoƒo ƒu ɖe tadedeagu dzadzɛ me.
9. Nukae “Yehowa ƒe aƒe ƒe to” la tsi tre ɖi na?
9 Gake egbea Mawu ƒe amewo mekpea ta le to ŋutɔŋutɔ si dzi wotsɔ kpe tu gbedoxɔ ɖo dzi o. Roma-ʋakɔwo tsrɔ̃ Yehowa ƒe gbedoxɔ si nɔ Yerusalem la le ƒe 70 M.Ŋ. me. Azɔ hã apostolo Paulo na eme kɔ be Yerusalem-gbedoxɔa kple avɔgbadɔ si nɔ anyi do ŋgɔ nɛ la nye nane ƒe kpɔɖeŋu. Wotsi tre ɖi na gbɔgbɔmetɔ ŋutɔŋutɔ si lolo wu, si nye “agbadɔ vavã, si Mawu ŋutɔ tu, eye menye amee tui o.” (Hebritɔwo 8:2) Gbɔgbɔmevɔgbadɔ mae nye tete ɖe Yehowa ŋu le tadedeagu me ƒe ɖoɖo si wotu ɖe Yesu Kristo ƒe tafevɔsa dzi. (Hebritɔwo 9:2-10, 23) Nenema ke “Yehowa ƒe aƒe ƒe to” si ŋu woƒo nu tsoe le Yesaya 2:2 tsi tre ɖi na Yehowa ƒe tadedeagu dzadzɛ si wodo ɖe dzi le míaƒe ŋkekea me. Amesiwo xɔ tadedeagu dzadzɛ la megaƒoa ƒu ɖe teƒe aɖe koŋ o; woƒoa ƒu le tadedeagu ƒe ɖekawɔwɔ me.
Tadedeagu Dzadzɛ Dodo Ðe Dzi
10, 11. Gɔmesese ka nue wodo Yehowa ƒe tadedeagu ɖe dzi le míaƒe ŋkekea me le?
10 Nyagblɔɖila la gblɔ be “Yehowa ƒe aƒe ƒe to,” alo tadedeagu dzadzɛ, “akɔ ta agbɔ towo ŋu” eye “wòaƒo togbɛwo ta.” Do ŋgɔ xoxoxo na Yesaya ƒe ɣeyiɣia la, Fia Dawid tsɔ nubablaɖaka la yi Zion-to la dzi le Yerusalem, si ƒe nɔƒe kɔkɔ meta 760 ne wodzidzee tso atsiaƒu ƒe sɔsɔme nu. Afimae aɖakaa nɔ vaseɖe esime wowu gbedoxɔa tutu nu le Moria Toa dzi eye wotsɔe yi emee. (Samuel II, 5:7; 6:14-19; Kronika II, 3:1; 5:1-10) Eyata kaka Yesaya ƒe ŋkekea naɖo la, wodo aɖaka kɔkɔe la ɖe dzi ŋutɔŋutɔ hetsɔe yi ɖada ɖe gbedoxɔa me xoxo, le afisi kɔkɔ wu togbɛ geɖe si ƒo xlãe si wozãna na alakpasubɔsubɔ.
11 Le gbɔgbɔmegɔmesese nu la, enye nyateƒe be Yehowa ƒe tadedeagu ƒo amesiwo subɔa alakpamawuwo tɔ ta ɣesiaɣi. Gake le míaƒe ŋkekea me la, Yehowa do eƒe tadedeagu ɖe dzi bobobo, wòƒo tadedeagu makɔmakɔ ƒomeviwo katã ta, eye egbɔ “togbɛwo” kple “towo” katã ŋu sasasã. Le mɔ ka nu? Amesiwo di be yewoade ta agu nɛ “le gbɔgbɔ kple nyateƒe me” nu ƒoƒo ƒu koŋ dzie wòto wɔ esia.—Yohanes 4:23.
12. Amekawoe nye “fiaɖuƒe la ƒe viwo,” eye amewo nu ƒoƒo ƒu ƒe dɔ kae yi edzi?
12 Kristo Yesu ƒo nu tso ‘nuɖoanyiawo ƒe nuwuɣi’ ŋu be enye nuŋeɣi si me mawudɔlawo aƒo “fiaɖuƒe la ƒe viwo” nu ƒu—amesiwo ƒe mɔkpɔkpɔe nye be yewoaɖu fia kple Yesu le dziƒoŋutikɔkɔe me. (Mateo 13:36-43) Tso ƒe 1919 me la, Yehowa do ŋusẽ eƒe vi siawo dometɔ “siwo susɔ” be woawɔ dɔ kple mawudɔlawo le nuŋeŋedɔa me. (Nyaɖeɖefia 12:17) Eyata Yesu nɔvi amesiaminawoe nye ‘fiaɖuƒe la ƒe vi’ gbãtɔ siwo nu woƒo ƒu. Emegbe woawo hã kpɔ gome le amewo nu ƒoƒo ƒu dɔ bubu aɖe me.
13. Aleke Yehowa yra amesiamina susɔeawoe?
13 Le nuŋeɣi sia me la, Yehowa kpe ɖe amesiamina susɔeawo ŋu vivivi wose eƒe Nya, Biblia, gɔme hetsɔe wɔ dɔe. Esia hã do tadedeagu dzadzɛa ɖe dzi. Togbɔ be “viviti xɔ anyigba dzi, eye blukɔ tsyɔ dukɔwo” hã la, amesiaminawo ‘le keklẽm abe akaɖiwo ene’ le ameƒomea me, le esi Yehowa dza wo ŋu hewɔ wo kɔkɔe ta. (Yesaya 60:2; Filipitɔwo 2:15) Amesiawo si wotsɔ gbɔgbɔ si ami na siwo ‘eƒe lɔlɔ̃nu ƒe sidzedze yɔ fũ le gbɔgbɔ ƒe nunya kple gɔmesese katã me’ la ‘klẽna abe ɣe ene le wo Fofo ƒe fiaɖuƒe la me.’—Kolosetɔwo 1:9; Mateo 13:43.
14, 15. Tsɔ kpe ɖe “fiaɖuƒe la ƒe viwo” nu ƒoƒo ƒu ŋu la, amekawo nu hãe woƒo ƒu, eye aleke Xagai gblɔ esia ɖii?
14 Tsɔ kpe ɖe eŋu la, ame bubuwo hã ƒo zi ɖe “Yehowa ƒe aƒe ƒe to” la ŋu. Amesiawo siwo Yesu yɔ be yeƒe “alẽ bubuwo” la ƒe mɔkpɔkpɔe nye be yewoanɔ agbe tegbee le paradisonyigba dzi. (Yohanes 10:16; Nyaɖeɖefia 21:3, 4) Wodo va zu ame akpe nanewo tso ƒe 1930 ƒeawo me, emegbe wodzi ɖe edzi va zu akpe alafa nanewo, eye azɔ wozu miliɔn geɖe! Le ŋutega aɖe si wona apostolo Yohanes kpɔ me la, wogblɔ be wonye “ameha gã, si ame aɖeke mete ŋu xlẽ o [siwo] tso dukɔ sia dukɔ kple to sia to kple du sia du kple gbegbɔgblɔ sia gbegbɔgblɔ me.”—Nyaɖeɖefia 7:9.
15 Nyagblɔɖila Xagai gblɔ ameha gã sia ƒe dodo ɖi. Eŋlɔ bena: “Ale Yehowa Zebaot gblɔ esi: Esusɔ vie ko maʋuʋu dziƒo kple anyigba, atsiaƒu kple ƒuƒuiƒe; maʋuʋu dukɔwo katã, eye woahe dukɔwo katã ƒe nu vevitɔ [amesiwo va wɔa ɖeka kple Kristotɔ amesiaminawo le tadedeagu dzadzɛ me] vɛ, eye matsɔ ŋutikɔkɔe ayɔ xɔ sia taŋ, Yehowa Zebaot ye gblɔe.” (Xagai 2:6, 7) “Ameha gã” sia si gale dzidzim ɖe edzi kple woƒe zɔhɛ amesiaminawo ƒe anyinɔnɔ doa tadedeagu dzadzɛ ɖe dzi hedea ŋutikɔkɔe eŋu le Yehowa ƒe aƒea me. Ame gbogbowo mewɔ ɖeka le tadedeagu na Mawu vavã la me alea kpɔ o, eye esia nye ŋutikɔkɔe na Yehowa kple eƒe Fia Yesu Kristo si wòɖo zi dzi. Fia Salomo ŋlɔ bena: “Fia ƒe atsyɔ̃ le dukɔ ƒe agbɔsɔsɔ me.”—Lododowo 14:28.
Wodo Tadedeagu Ðe Dzi le Amewo ƒe Agbenɔnɔ Me
16-18. Tɔtrɔ kawoe ame aɖewo wɔ be woade ta agu na Yehowa wòadze eŋu?
16 Kafukafu ɖesiaɖe si tadedeagu dzadzɛ dodo ɖe dzi le míaƒe ɣeyiɣia me ahe vɛ la nye Yehowa tɔ. Ke hã mɔnukpɔkpɔ sua amesiwo vaa egbɔ si ale be wokpɔa gome le dɔ sia wɔwɔ me. Abe alesi tolialia bia agbagbadzedze ene la, nenema ke Mawu ƒe dzidzenu dzɔdzɔeawo sɔsrɔ̃ kple agbenɔnɔ ɖe wo nu hã bia agbagbadzedzee. Abe ƒe alafa gbãtɔ me Kristotɔwo ene la, Mawu subɔla siwo li egbea ɖe asi le agbenɔnɔ kple nuwɔna siwo mesɔ ɖe tadedeagu vavãtɔ nu o ŋu. Matrewɔlawo, trɔ̃subɔlawo, ahasiwɔlawo, fiafiwo, ŋuklẽlawo, ahamulawo, kple ame bubuwo trɔ woƒe mɔwo eye ‘wole tsi na wo’ le Mawu ƒe ŋkume.—Korintotɔwo I, 6:9-11.
17 Eƒe kpɔɖeŋu aɖee nye ɖetugbi aɖe si ŋlɔ bena: “Mebu tsã eye mɔkpɔkpɔ aɖeke menɔ asinye o. Menɔa agbe gbegblẽ eye memua aha hã. Nulɔdɔwo nɔ ŋunye. Medzraa atike vɔ̃ɖiwo hã eye nyemetsɔ ɖeke le naneke me o.” Le Biblia sɔsrɔ̃ megbe la, ewɔ tɔtrɔ gãwo ale be wòanɔ agbe ɖe Mawu ƒe dzidzenuwo nu. Fifia egblɔ be: “Nye susu dze akɔ anyi, bubu le ŋunye, etsɔme mɔkpɔkpɔ le asinye, mele ƒome vavã aɖe me, eye ƒo wo katã ta la, ƒomedodo va le mía kple mía Fofo, Yehowa, dome.”
18 Ne tenɔnɔ nyui va su mía si le Yehowa ŋkume vɔ hã la, ele be mí katã míayi edzi ado tadedeagu dzadzɛa ɖe dzi abui nu vevii le míaƒe agbe me. Ƒe akpe geɖe enye si va yi la, Yehowa to Yesaya dzi ɖee fia be kakaɖedzi le ye si be amehawo adi vevie be woatsɔ yeƒe tadedeagu aɖo nɔƒe vevitɔ le woƒe agbe me egbea. Amesiawo domee nèlea?
Amesiwo Wofia Yehowa ƒe Mɔe
19, 20. Nukae wofiaa Mawu ƒe amewo, eye afikae wofiaa nu wo le?
19 Yesaya gagblɔ nya bubuwo na mí le amesiwo xɔa tadedeagu dzadzɛ egbea ŋu. Egblɔ be: “Eye dukɔ geɖewo atso agblɔ bena: Mina míayi Yehowa ƒe to la, Yakob ƒe Mawu ƒe aƒe la gbɔ, ne wòafia nu mí le eƒe mɔwo ŋu, eye míazɔ eƒe toƒewo. Elabena nufiame atso Zion, eye Yehowa ƒe nya atso Yerusalem.”—Yesaya 2:3.
20 Yehowa meɖea asi le eƒe amewo ŋu wotsana abe alẽ siwo bu ene o. To Biblia kple Biblia-srɔ̃gbalẽwo dzi la, enaa “nufiame” wo eye wosea eƒe “nya” be woasrɔ̃ eƒe mɔwo. Sidzedze sia dzraa wo ɖo be ‘woazɔ eƒe toƒewo.’ Esi ŋudzedzekpɔkpɔ yɔ woƒe dzime eye wowɔa nu ɖe Mawu ƒe mɔfiafia nu ta la, woɖoa dze kple wo nɔewo le Yehowa ƒe mɔwo ŋu. Woƒoa ƒu ɖekae le takpekpe gãwo kple le ƒuƒoƒo suewo me—le Fiaɖuƒe Akpatawo kple amewo ƒe aƒewo me—be yewoase nya tso Mawu ƒe mɔwo ŋu ahasrɔ̃ wo. (Mose V, 31:12, 13) Woto esia wɔwɔ me srɔ̃a Kristotɔ gbãtɔwo ƒe kpɔɖeŋu, amesiwo kpea ta be woade dzi ƒo na wo nɔewo ahaʋã wo nɔewo be woagba go le “lɔlɔ̃ kple dɔ nyui wɔwɔ me.”—Hebritɔwo 10:24, 25.
21. Dɔ ka wɔwɔ mee Yehowa subɔlawo le gome kpɔm le?
21 Wokpea ame bubuwo be ‘woayi’ Yehowa Mawu ƒe tadedeagu si wodo ɖe dzi la me. Aleke gbegbe esia wɔ ɖeka kple se si Yesu de na eƒe nusrɔ̃lawo do ŋgɔ teti na eƒe dziƒoyiyi enye si! Egblɔ na wo be: “Miheyi ɖawɔ dukɔwo katã me nɔlawo ne woanye nusrɔ̃lawo, mianyrɔ wo ɖe Fofo la kple Vi la kpakple gbɔgbɔ kɔkɔe la ƒe ŋkɔa me, miafia wo bena, woawɔ nusiwo katã meɖo na mi la dzi.” (Mateo 28:19, 20, NW) Esi Mawu le megbe na Yehowa Ðasefowo ta la, wotsɔ toɖoɖo wɔ ɖe nya sia dzi yi anyigba dzi katã le nu fiam hele amewo wɔm nusrɔ̃lawoe, eye wole nyɔnyrɔ nam wo.
Wotsɔ Yiwo Tu Kodziwoe
22, 23. Nya kae Yesaya 2:4 gblɔ ɖi, eye nya kae Dukɔ Ƒoƒuawo ƒe amegã aɖe gblɔ le eŋu?
22 Fifia míeɖo kpukpui si kplɔe ɖo dzi, si ƒe akpa aɖe woŋlɔ ɖe gli ŋu le Dukɔ Ƒoƒuawo ƒe dɔwɔƒegã. Yesaya ŋlɔ bena: “Adrɔ̃ ʋɔnu na anyigba dzi dukɔwo, eye wòatso nya me na dukɔ geɖewo; woatsɔ woƒe yiwo atu kodziwoe, eye woatsɔ woƒe akplɔwo atu hɛ gobɛwoe; dukɔ magatsɔ yi ɖe dukɔ ŋu azɔ o, eye womagasrɔ̃ aʋawɔwɔ hã azɔ o.”—Yesaya 2:4.
23 Esia wɔwɔ menye dɔ feŋui o. Federico Mayor si nye Dukɔ Ƒoƒuawo ƒe Agbalẽsɔsrɔ̃, Dzɔdzɔmeŋutinunya, Kple Dekɔnu Nyawo Gbɔkpɔha ƒe tatɔ gblɔ ɣeaɖeɣi be: “Edze abe aʋawɔwɔ ƒe yakanunyenye si wona míete ŋu kpɔna le aƒeme fifia to nyasemɔ̃ kple nukpɔmɔ̃wo dzi la mete ŋu le dzadzraɖo gbogbo siwo wowɔna ɖe aʋawɔwɔ ŋu helénɛ ɖe te ƒe alafa geɖe enye sia la nu tsim o ene. Dɔ gã aɖe si ŋu Biblia ƒo nu tsoe ye le egbegbedzidzimewo dzi, si nye be ‘woatsɔ woƒe yiwo atu kodziwoe’ eye woatrɔ aʋawɔwɔ ƒe didi si le wo me—tso gbaɖegbe ke—la wòazu ŋutifafa didi ƒe seselelãme. Esia gbɔ ɖoɖo anye afɔɖeɖe nyuitɔ kekeake si ‘xexeamenɔlawo’ awɔ, kple domenyinu nyuitɔ kekeake na míaƒe dzidzimeviwo.”
24, 25. Amekawo dzie Yesaya ƒe nyaawo le eme vam ɖo, eye le mɔ ka nu?
24 Dukɔwo mate ŋu aɖo taɖodzinu kɔkɔ sia gbɔ akpɔ o. Egbɔ manya ɖo na wo o. Amesiwo tso dukɔ geɖe me, siwo wɔ ɖeka le tadedeagu dzadzɛ me dzie Yesaya ƒe nyaawo le eme vam ɖo. Yehowa ‘ɖɔ nuwo ɖo’ le wo dome. Efia eƒe amewo be woanɔ ŋutifafa me kple wo nɔewo. Nyateƒee, wotsɔ woƒe ‘yiwo tu kodziwoe eye wotsɔ woƒe akplɔwo tu hɛ gobɛwoe’ le kpɔɖeŋumɔ nu le xexe si me mama kple dzrewɔwɔ yɔ fũ la me. Aleke wowɔe?
25 Nusiwo wowɔna ƒe ɖee nye be womedea akpa aɖeke dzi le dukɔwo ƒe aʋawɔwɔwo me o. Do ŋgɔ teti na Yesu ƒe ku la, ame aɖewo tsɔ lãnuwo va be yewoalée. Esi Petro ɖe yi be yeaʋli yeƒe Aƒetɔ ta la, Yesu gblɔ nɛ be: “Gbugbɔ wò yi la ɖo eteƒe; elabena amesiwo katã dia yi la, yi kee woatsɔ awu woe.” (Mateo 26:52) Tso ɣemaɣi la, Yesu ƒe afɔɖoƒe yomedzelawo tsɔ woƒe yiwo tu kodziwoe eye wometsɔa lãnu be woatsɔ awu wo havi amegbetɔ alo dea aʋawɔwɔ dzi le mɔ bubu aɖeke nu o. ‘Wodia ŋutifafa na amewo katã.’—Hebritɔwo 12:14.
Ŋutifafamɔwo Yome Nɔnɔ
26, 27. Aleke Mawu ƒe amewo ‘dia ŋutifafa hetia eyomee’? Gblɔ eƒe kpɔɖeŋu.
26 Mawu ƒe amewo ƒe ŋutifafa yi ŋgɔ sã wu gbegbe be yewomawɔ aʋa o dzro ko. Togbɔ be wole dukɔ siwo wu 230 me eye woƒe gbegbɔgblɔ kple dekɔnu gbogboawo le hamehame hã la, ŋutifafa le wo dome. Woawo dzie nya si Yesu gblɔ na eƒe nusrɔ̃lawo le ƒe alafa gbãtɔ me la va eme ɖo egbea be: “Esia me amewo katã woanyae le bena, nye nusrɔ̃lawo mienye, ne lɔlɔ̃ le mia dome.” (Yohanes 13:35) Kristotɔ siwo li egbea nye “ŋutifafawɔlawo.” (Mateo 5:9, NW ƒe etenuŋɔŋlɔ) ‘Wodia ŋutifafa hetia eyome.’ (Petro I, 3:11) Yehowa, “ŋutifafa Mawu la,” léa wo ɖe te.—Romatɔwo 15:33.
27 Amesiwo srɔ̃ alesi woanye ŋutifafawɔlawo ƒe kpɔɖeŋu wɔdɔɖeamedziwo li. Ðekakpui aɖe ŋlɔ le agbe si wònɔ tsã ŋu be: “Nɔnɔme sesẽ siwo me meto na mesrɔ̃ alesi maʋli ɖokuinye tae. Ena veve kple dziku nɔ menye ɖe agbenɔnɔ ŋu. Mewɔa avu kple amewo ɣesiaɣi. Medaa kɔ kple ɖevi bubu le míaƒe nutoa me gbesiagbe, mezãa asi, mezãa kpe alo atukpa ɣeaɖewoɣi. Metsi va zu amesi sẽa ŋuta ŋutɔ.” Gake mlɔeba la, ewɔ ɖe amekpekpea dzi be wòayi “Yehowa ƒe aƒe ƒe to” la dzi. Esrɔ̃ Mawu ƒe mɔwo eye wòva zu Mawu subɔla ŋutifafame.
28. Nukae Kristotɔ ate ŋu awɔ atsɔ ati ŋutifafa yomee?
28 Yehowa subɔlawo ƒe akpa gãtɔ mesẽa ŋuta nenema tsã ya o. Ke hã le nu suewo me—dɔmenyowɔwɔ, tsɔtsɔke, kple veveseɖeameti—gɔ̃ hã me la, wodzea agbagba be ŋutifafa nanɔ yewo kple ame bubuwo dome. Togbɔ be womede blibo o hã la, wodze agbagba be yewoatsɔ Biblia ƒe aɖaŋuɖoɖo sia awɔ dɔe be ‘woagbɔ dzi ɖi na wo nɔewo, eye woatsɔ ake wo nɔewo, ne nya aɖe le ame aɖe si ɖe ame aɖe ŋuti.’—Kolosetɔwo 3:13.
Etsɔme si me Ŋutifafa Anɔ
29, 30. Mɔkpɔkpɔ kae li na anyigba?
29 Yehowa wɔ nu gã aɖe le ‘ŋkeke mlɔe’ siawo me. Eƒo amesiwo di be yewoasubɔe nu ƒu tso dukɔwo katã me. Efia wo be woazɔ eƒe mɔ siwo nye ŋutifafamɔwo dzi. Amesiawoe atsi agbe le “xaxa gã” si gbɔna la me ayi ɖe ŋutifafa xexe yeye si me woaɖe aʋawɔwɔ ɖa tegbee le la me.—Nyaɖeɖefia 7:14.
30 Yiwo—aʋawɔnuwo—maganɔ anyi o. Hakpala la ŋlɔ le ɣeyiɣi ma ŋu be: “Miva kpɔ Yehowa ƒe nuwɔwɔwo, amesi doa aƒedo anyigba, amesi tsia aʋawɔwɔwo nu vaseɖe anyigba ƒe mlɔenu ke, eflia dati, eŋea akplɔ, eye wòtɔa dzo tasiaɖamwo!” (Psalmo 46:9, 10) Esi míele mɔ kpɔm na nusiawo ta la, Yesaya ƒe nuxlɔ̃amenya si kplɔe ɖo la sɔ egbea abe alesi wònɔ esime wòŋlɔe ene be: “Yakob ƒe aƒe, mitso, ne míazɔ le Yehowa ƒe kekeli me!” (Yesaya 2:5) Ẽ, mina Yehowa ƒe kekeli naklẽ ɖe míaƒe afɔtoƒe fifia, eye míazɔ eƒe mɔ dzi ayi ɖe mavɔmavɔ me.—Mixa 4:5.
[Etenuŋɔŋlɔwo]
a Kpɔ agbalẽ si nye Sidzedze si Kplɔa Ame Yia Agbe Mavɔ Me, si Watchtower Bible and Tract Society of New York, Inc. ta, ƒe ta 11, si ƒe tanyae nye “Ŋkeke Mamleawoe Nye Esia!”