Biblia Ƒe Nukpɔsusu
Ðe Nane Gblẽ le Ame Ðokui Dada Ŋua?
NYA aɖe li wogblɔna be dada nye nuvɔ̃ adre siwo wua ame ƒe gbãtɔ. Ke hã ame geɖe xɔe se egbea be nukpɔsusu sia zu tsigãdzinu xoxo aɖe. Le ƒe alafa 21 lia ƒe gɔmedzedze sia la, wobua dada nunɔamesii, ke menye nuvɔ̃ o.
Gake zi geɖe ne Biblia le nu ƒom nu tso dada ŋu la, megblɔa nya nyui le eŋu o. Nya geɖe le Biblia ƒe agbalẽ si nye Lododowo ɖeɖe dzaa me siwo tsi tre ɖe dada ŋu. Le kpɔɖeŋu me, Lododowo 8:13 gblɔ be: “Melé fu dada, ɖokuidodoɖedzi, mɔ vɔ̃ɖi kple alakpanu.” Lododowo 16:5 gblɔ be: “Dadalawo katã nye ŋunyɔ na Yehowa.” Eye kpukpui 18 lia xlɔ̃ nu be: “Dada doa ŋgɔ na gbegblẽ, eye ɖokuidodoɖedzi na anyidzedze.”
Dada si Gblẽa Nu
Míate ŋu aɖe dada si ŋu woƒo nu tsi tre ɖo le Biblia me gɔme be enye bubu dede ameɖokui ŋu akpa, gãnyenye ƒe seselelãme susumanɔmee le dzɔdzɔmenunanawo, ɖeka alo tugbe dzedze, kesinɔnu, agbalẽnyanya, ɖoƒe, kple nu bubuwo ta. Ate ŋu adze le amedadaɖeanyi, adegbeƒoƒo, amemabumabu, alo ɖokuiŋudzedze nuwɔnawo me. Asixɔxɔ dede ame ɖokui ŋu fũ akpa ate ŋu awɔe be woagbe nyagbename; agbe lɔlɔ̃ be yedze agɔ aɖe kuku, agbe asiɖeɖe le ɖoƒe ŋu, agbe be woagada ye ɖe anyi o; alo akpɔ dziku madzemadzee ɖe nane si ame aɖe wɔ alo gblɔ ta.
Dadala ate tɔ ɖe edzi be woawɔ nu alesi yesusui ɣesiaɣi alo be womawɔe kura o. Míekpɔnɛ be nɔnɔme siawo hea masɔmasɔ ƒomevi vovovo dea amewo dome. Dada le ŋutigbalẽ alo dukɔ aɖe me vi nyenye ta he aʋawɔwɔ kple ʋukɔkɔɖi gbogbo aɖewo vɛ. Biblia ɖee fia be dadae nye nusi ɖe fu na Mawu ƒe gbɔgbɔmeviwo dometɔ ɖeka wòdze aglã hewɔ eɖokui Satana Abosam. Paulo ɖo aɖaŋu le amesiwo woaɖo Kristotɔ hamemegãwo ƒe dzedze ŋu be: “Menye amesi ƒe dzimetɔtrɔ teƒe medidi o, bena wòagado eɖokui ɖe dzi, eye wòadze Abosam ƒe ʋɔnudɔdrɔ̃ la me o.” (Timoteo I, 3:6; tsɔe sɔ kple Xezekiel 28:13-17.) Ne nusiawoe dona tsoa dada me la, ke mewɔ nuku be Mawu tsi tre ɖe eŋu o. Gake àbia be: ‘Ðe dada masɔ le nɔnɔme aɖewo me oa?’
Ðe Dada si Sɔ Lia?
Le Kristotɔwo ƒe Hela Ŋɔŋlɔawo me la, wozãa dɔwɔnya kau·khaʹo·mai si gɔme woɖe be “da, kpɔ dzidzɔ, ƒo adegbe,” le susu gbegblẽ kple susu nyui nu. Le kpɔɖeŋu me, Paulo gblɔ be míate ŋu ‘aƒo adegbe le Mawu ƒe ŋutikɔkɔe mɔkpɔkpɔ la ta.’ Eɖo aɖaŋu hã be: “Amesi ƒoa adegbe la, naƒo adegbe le Aƒetɔ la me.” (Romatɔwo 5:2; Korintotɔwo II, 10:17) Esia fia dada le Yehowa ta be enye míaƒe Mawu, eye enye seselelãme si ate ŋu ana míaƒo adegbe le ŋkɔ nyui kple bubu si le eŋu ta.
Le kpɔɖeŋu me: Ðe wònye nu gbegblẽ be woaʋli ŋkɔ nyui ta ne wole ɖi ƒomeea? Kura o. Ne amewo ƒo nu madzemadzee le ƒowòmetɔwo alo ame bubu siwo nèlɔ̃ hebuna ŋu la, ɖe màdo dziku adi be yeaʋli wo ta oa? Biblia gblɔ be: “Ŋkɔ nyui xɔxɔ ƒo kesinɔnu geɖe ta.” (Lododowo 22:1) Mawu Ŋusẽkatãtɔ la gblɔ na Egipte-fia Farao dadala aɖe ɣeaɖeɣi be: “Esia ta megblẽ wò ɖi nèle agbe, le esia ta be manɔ nye ŋusẽ ɖem fia wò, eye bena woaɖe gbeƒã nye ŋkɔ le anyigba blibo la katã dzi.” (Mose II, 9:16, NW ) Eyata Mawu ƒoa adegbe le ŋkɔ nyui kple bubu si le eyama ŋu ta eye wòtsia dzi ɖe eŋu. Ŋkɔ nyui kple bubu si le mía ŋu taʋiʋli ate ŋu anɔ vevie na míawo hã ke hã manye le ɖokuikpɔkpɔ kple ɖokuitɔdidi ƒe dada ta o.—Lododowo 16:18.
Bubu nye nusi hiã vevie le ƒomedodo nyui ɖesiaɖe me. Ne míegaka ɖe míaƒe zɔhɛwo dzi o la, egblẽa míaƒe hadomegbenɔnɔ kple dɔwɔwɔƒomedodowo me. Nenema ke hamenuwɔwɔ alo hadɔwɔwɔ dome ate ŋu agblẽ ne dɔa ɖolawo dometɔ ɖeka pɛ wɔ nane si ɖe bubu le eɖokui alo ehatiwo ŋu le amewo ŋkume. Be woate ŋu aɖo taɖodzinuwo gbɔ la, taɖodzinu ka kee wòɖanye o, ele be ŋkɔ nyui nakpɔtɔ anɔ ame ŋu. Esia hã nye susu si ta wòle be dzikpɔla siwo le Kristo-hamea me nakpɔ “ɖaseɖiɖi nyui” tso egodotɔwo gbɔ. (Timoteo I, 3:7) Woƒe didi be ŋkɔ nyui nanɔ yewo ŋu metso ɖokuidodoɖedzi glodzo gbɔ o, ke boŋ agbagbadzedze be woanɔ Mawu teƒe le bubu mɔ si dze nu gbɔe wòatso. Ne èbu eŋu kpɔ la, kakaɖedzi kae anɔ subɔla ŋu ne egodotɔwo ɖia ɖase gbegblẽ le eŋu?
Ke dada le nusiwo ame te ŋu wɔ ta ya ɖe? Le kpɔɖeŋu me, de ŋugble le dzidzɔ si dzilawo akpɔ ne wo vi dze agbagba le suku ŋu kpɔ. Esɔ be woakpɔ dzidzɔ le dzidzedzekpɔkpɔ sia ƒomevi ta. Esi Paulo ŋlɔ agbalẽ na hati Kristotɔ siwo nɔ Tesalonika la, eya hã ɖee fia be yekpɔa dzidzɔ ɖe dzidzedzekpɔkpɔ ŋu, esi wògblɔ be: “Ele na mí bena, míada akpe na Mawu ɖaasi le mia ta, nɔviwo, abe alesi dze ene; elabena miaƒe xɔse tsina ŋutɔ, eye mi katã mia dome amesiame ƒe lɔlɔ̃, si mietsɔna lɔ̃a mia nɔewo la, sɔa gbɔ ɖe edzi, ale bena mía ŋutɔwo míeƒoa adegbe le mia ta le Mawu ƒe hameawo me le miaƒe dzidodo kple miaƒe xɔse, si le mia si le miaƒe yometitiwo kple xaxa, siwo miekpɔna me la ŋuti.” (Tesalonikatɔwo II, 1:3, 4, míawoe te gbe ɖe edzi.) Ẽ, ele dzɔdzɔme nu be woakpɔ dzidzɔ ɖe dzidzedze siwo lɔlɔ̃tɔwo kpɔ ŋuti. Ekema, nukae nye vovototo si le dada gbegblẽ kple dada nyui dome?
Menye nu gbegblẽ be míadi be míayi edzi ana ŋkɔ nyui nanɔ mía ŋu, akpɔ dzidzedze, ahakpɔ dzidzɔ ɖe nudzedziname siawo ŋu o. Gake ɖokuidodoɖedzi, dada, kple adegbeƒoƒo le ame ɖokui ŋu alo le ame bubuwo ta nye nusiwo ŋu Mawu tsi tre ɖo. Le nyateƒe me manyo kura ne ame aɖewo te ‘wo ɖokui dodo ɖe dzi’ alo ‘wo ɖokui bubu gã wu alesi dze’ o. Kristotɔwo mekpɔ mɔ ada alo aƒo adegbe le ame aɖeke alo naneke ŋuti o negbe le Yehowa Mawu kple nusi wòwɔ na wo ko ŋuti. (Korintotɔwo I, 4:6, 7; Romatɔwo 12:3, NW ) Nyagblɔɖila Yeremya na gɔmeɖose nyui si dzi míawɔ ɖo la mí be: “Amesi ke be, yeaƒo adegbe la, neƒo adegbe be, [yenya] nu, eye wòdze sim be, nyee nye Yehowa, amesi si me amenuveve, ʋɔnudɔdrɔ̃ kple dzɔdzɔenyenye le le anyigba dzi.”—Yeremya 9:23.
[Nɔnɔmetata si le axa 18]
“Papa Innocent X,” si Don Diego Rodríguez de Silva Velázquez ta
[Afi Si Míexɔ Mɔɖeɖe Tso]
Scala/Art Resource, NY